រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក ហែម វណ្ណឌី បានឲ្យដឹងថា គិតត្រឹមខែកញ្ញា ឆ្នាំ ២០២៦ សហគ្រាស និងសិប្បកម្មដែលបានចុះ បញ្ជីជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានជាង ៤៤ ០០០ មូលដ្ឋាន ដែលផ្តល់ការងារជិត ៥០ ម៉ឺនកន្លែង។
Million Times 
លោក ហែម វណ្ណឌី បានថ្លែងបែបនេះនាឱកាសពិធីប្រកាសជាផ្លូវការ “យុទ្ធសាស្ត្រជាតិ ស្ដីពីកាអភិវឌ្ឍសហគ្រាសធុនមីក្រូតូច និងមធ្យម ឆ្នាំ ២០២៦-២០៣០” ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជានាព្រឹកថ្ងៃ ២២ ខែតុលា ឆ្នាំ២០២៦។
រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងបន្តថាតួលេខនេះឆ្លុះបញ្ចាំងយ៉ាងច្បាស់ពីទំហំ និងសារសំខាន់របស់វិស័យនេះ ចំពោះសកម្មភាពសេដ្ឋកិច្ច និងជីវភាពរបស់ប្រជាពលរដ្ឋ។
“ទោះយ៉ាងណា បញ្ហាប្រឈមរបស់យើងនៅដំណាក់កាលបន្ទាប់ មិនមែនត្រឹមតែការបង្កើនចំនួនសហគ្រាសប៉ុណ្ណោះទេ ប៉ុន្តែគឺត្រូវធ្វើឱ្យសហគ្រាសទាំងនេះកាន់តែមានផលិតភាព គុណភាព និងស្តង់ដា ចាប់យកបច្ចេកវិទ្យាបានកាន់តែប្រសើរ និងអាចតភ្ជាប់ទៅនឹងទីផ្សារ រោងចក្រធំៗ និងខ្សែច្រវាក់ផ្គត់ផ្គង់ដែលមានតម្លៃបន្ថែមខ្ពស់។ នេះជាការបន្ថែមរបស់រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
លោក ហែម វណ្ណឌី បានបន្តទៀតថា “សម្តេចធិបតីនាយករដ្ឋមន្ត្រី បានបន្តពង្រឹង និងពង្រីកប្រព័ន្ធគាំទ្រនេះ ឲ្យកាន់តែគ្រប់ជ្រុងជ្រោយ ក្រោមការចង្អុលបង្ហាញដោយ «យុទ្ធសាស្ត្របញ្ចកោណ ដំណាក់កាលទី១» ជាពិសេសបញ្ចកោណទី៣ ស្ដីពី «ការអភិវឌ្ឍវិស័យឯកជន និងការងារ» ដែលផ្ដោតលើការលើកស្ទួយសហគ្រាសធុនមីក្រូ តូច និងមធ្យម ការអភិវឌ្ឍសេដ្ឋកិច្ចក្រៅប្រព័ន្ធការអភិវឌ្ឍជំនាញ និងការលើកកម្ពស់ធុរកិច្ចថ្មី និងនវានុវត្តន៍៕
អត្ថបទ៖ ឆដា, រូបភាព៖ សភាពាណិជ្ជកម្មកម្ពុជា
