លោកស្រី ណូ សុភា ឬបងប្អូនខ្មែរយើងហៅថាឧកញ៉ាចិត្តធម៌ ណូ សុភា (Sophea Böttcher) ត្រូវបានព្រះមហាក្សត្រចេញព្រះរាជក្រឹត្យតែងតាំង និងផ្តល់ឋានៈជាទីប្រឹក្សា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា មានឋានៈស្មើ «រដ្ឋមន្ត្រី» នៅថ្ងៃទី១៤ ខែតុលា ឆ្នាំ២០២៦។
Million Times 
អគ្គនាយិកាក្រុមហ៊ុន AG Bottcher និងជាសមាជិកសមាគមឧកញ៉ាកម្ពុជាខាងលើជាស្ត្រីខ្មែរមួយរូបរស់នៅក្រៅប្រទេស ប៉ុន្តែមានចិត្តសប្បុរស ធ្វើបុណ្យ ជួយអ្នកខ្សត់ខ្សោយជាច្រើនមកហើយ។ ជាពិសេសកំឡុងពេលថៃ ឈ្លានពានកម្ពុជានៅឆ្នាំមុន ឧកញ៉ាចិត្តធម៌ ណូ សុភា បានជួយកងទ័ព ជនភៀសសឹក និងអ្នកមានជីវភាពខ្វះខាតជាបន្តបន្ទាប់។ ជាមួយទឹកចិត្តខ្មែរ ស្រលាញ់ខ្មែរ ខ្សែជួយខ្មែរយ៉ាងពិតប្រាកដនេះហើយ ទើបលោកស្រី ណូ សុភា ទទួលបានគោរមងារជាឧកញ៉ា និងទទួលបានការស្រលាញ់រាប់អានពីប្រជាជនកម្ពុជាជាច្រើន។
ជាក់ស្ដែងកាលពី ខែកក្កដា ឆ្នាំ ២០២៦ កន្លងទៅ លោកស្រីទើបទទួលបានគ្រឿងឥស្សរិយយស «ជាតូបការ» ពីព្រះមហាក្សត្រ ដែលជាកិត្តិយសធំធេងមួយ។ ហើយការផ្ដល់ឋានៈជាទីប្រឹក្សា សម្តេចប្រធានរដ្ឋសភា ដែលមានឋានៈស្មើ «រដ្ឋមន្ត្រី»នេះទៀត គឺរឹតតែបង្ហាញថាឧកញ៉ាចិត្តធម៌ ណូ សុភា ទទួលបានការស្រលាញ់ច្រើនពីកម្ពុជា។
គោរមងា និងឥស្សរយសនេះ គាត់ស័ក្តិសមនិងទទួលបាន ព្រោះតែកន្លងមកទាំង ឧកញ៉ា ណូ សុភា និងស្វាមី បានជួយដល់សង្គមជាតិខ្មែរច្រើន។ សាមីខ្លួន គឺឧកញ៉ា សុភា បានរៀបរាប់ថា “នាងខ្ញុំ សូមក្រាបបង្គំសម្តែងនូវកតញ្ញូតាធម៌ និងអំណរព្រះគុណយ៉ាងជ្រាលជ្រៅបំផុត ថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលទ្រង់ព្រះមេត្តាប្រោសព្រះរាជទានការតែងតាំងដល់នាងខ្ញុំ។ នាងខ្ញុំ សូមគោរពថ្លែងអំណរគុណដ៏ជ្រាលជ្រៅជូន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ចំពោះសេចក្តីទុកចិត្ត ការគាំទ្រ និងការផ្តល់កិត្តិយសដ៏ថ្លៃថ្លានេះដល់នាងខ្ញុំ។ កិត្តិយសនេះ មានអត្ថន័យដ៏ធំធេងចំពោះនាងខ្ញុំ និងជាកម្លាំងចិត្តដ៏មុតមាំ ឱ្យនាងខ្ញុំបន្តចូលរួមក្នុងកិច្ចការមនុស្សធម៌ និងជួយដល់ប្រជាពលរដ្ឋដែលមានការលំបាក ជាពិសេសកុមារ និងយុវជនខ្វះខាត ឱ្យមានឱកាសទទួលបានការអប់រំប្រកបដោយគុណភាព មានចំណេះដឹង និងជំនាញ ដើម្បីកសាងអនាគតល្អប្រសើរសម្រាប់ខ្លួនឯង ក្រុមគ្រួសារ និងសង្គមជាតិ។ នាងខ្ញុំនឹងបន្តខិតខំចូលរួមតាមលទ្ធភាព ដោយសេចក្តីស្រឡាញ់ ភាពស្មោះត្រង់ និងការទទួលខុសត្រូវ ដើម្បីជាប្រយោជន៍ដល់ប្រជាជន និងមាតុភូមិកម្ពុជា។ នាងខ្ញុំ សូមបួងសួងថ្វាយព្រះពរ ព្រះករុណាជាអម្ចាស់ជីវិតលើត្បូង សូមទ្រង់មានព្រះរាជសុខភាពល្អបរិបូរណ៍ ព្រះជន្មាយុយឺនយូរ និងគង់ប្រថាប់ជាម្លប់ដ៏ត្រជាក់ដល់ប្រជារាស្ត្រខ្មែរជានិច្ច“៕
អត្ថបទ៖ ឆដា, រូបភាព៖ Sophea Böttcher
