
ភ្នំពេញ៖ ក្រសួងពាណិជ្ជកម្មកម្ពុជា ជំរុញការនាំចេញផលិតផលម្ហូបអាហារកម្ពុជាទៅកាន់ទីផ្សារសហរដ្ឋអាម៉េរិក ដោយផ្តោតលើការពង្រឹងគុណភាព សុវត្ថិភាពម្ហូបអាហារ និងការអនុលោមតាមស្តង់ដាររបស់រដ្ឋបាលចំណីអាហារ និងឱសថសហរដ្ឋអាម៉េរិក (FDA) ស្របពេលពាណិជ្ជកម្មទ្វេភាគីរវាងប្រទេសទាំងពីរមានទំហំ ១៣,៨២ ពាន់លានដុល្លារអាម៉េរិក ក្នុងរយៈពេល ១០ ខែដំបូងនៃឆ្នាំ២០២៦។
ការជំរុញនេះធ្វើឡើងតាមរយៈសិក្ខាសាលាស្តីពី «ការជំរុញការនាំចេញផលិតផលម្ហូបអាហារកម្ពុជាទៅកាន់ទីផ្សារសហរដ្ឋអាម៉េរិក» ដែលរៀបចំឡើងនៅទីស្តីការក្រសួងពាណិជ្ជកម្ម កាលពីថ្ងៃទី១៧ ខែវិច្ឆិកា ឆ្នាំ២០២៦ ក្រោមអធិបតីភាពឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម។
សិក្ខាសាលានេះមានការចូលរួមពីលោក Dan Solis អតីតជំនួយការស្នងការទទួលបន្ទុកប្រតិបត្តិការនាំចូលនៃរដ្ឋបាលចំណីអាហារ និងឱសថសហរដ្ឋអាម៉េរិក (FDA) តំណាងក្រសួង-ស្ថាប័នពាក់ព័ន្ធ និងតំណាងវិស័យឯកជន រួមមានអ្នកផលិត អ្នកកែច្នៃ និងអ្នកនាំចេញផលិតផលម្ហូបអាហារជាច្រើនរូប។
សិក្ខាសាលានេះមានគោលបំណងលើកកម្ពស់ការយល់ដឹងរបស់វិស័យឯកជនអំពីលក្ខខណ្ឌតម្រូវ បទប្បញ្ញត្តិបច្ចេកទេស និងនីតិវិធីនាំចូលផលិតផលម្ហូបអាហាររបស់សហរដ្ឋអាម៉េរិក ព្រមទាំងពង្រឹងសមត្ថភាព និងការត្រៀមខ្លួនរបស់ធុរកិច្ចកម្ពុជា ដើម្បីជំរុញការនាំចេញផលិតផលម្ហូបអាហារទៅកាន់ទីផ្សារនេះប្រកបដោយភាពប្រកួតប្រជែង និងនិរន្តរភាព។
ថ្លែងក្នុងសុន្ទរកថាបើកសិក្ខាសាលា ឯកឧត្តម សំហេង បូរ៉ា បានគូសបញ្ជាក់ពីវឌ្ឍនភាពនៃទំនាក់ទំនងពាណិជ្ជកម្មរវាងកម្ពុជា និងសហរដ្ឋអាម៉េរិក ដែលបន្តរីកចម្រើនជាលំដាប់។ ឯកឧត្តមបានចាត់ទុកផលិតផលកសិកម្ម និងអាហារកែច្នៃជាវិស័យអាទិភាពដែលមានសក្តានុពលខ្ពស់សម្រាប់ការពង្រីក និងធ្វើពិពិធកម្មការនាំចេញរបស់កម្ពុជាទៅកាន់ទីផ្សារសហរដ្ឋអាម៉េរិក។
ឯកឧត្តមរដ្ឋលេខាធិការបានលើកទឹកចិត្តដល់ធុរជន អ្នកផលិត អ្នកកែច្នៃ និងអ្នកនាំចេញផលិតផលម្ហូបអាហារកម្ពុជា ឱ្យបន្តបង្កើនការវិនិយោគលើការលើកកម្ពស់គុណភាព សុវត្ថិភាពម្ហូបអាហារ ការរចនា និងការវេចខ្ចប់តាមស្តង់ដារ ព្រមទាំងធានាការអនុលោមតាមបទប្បញ្ញត្តិអន្តរជាតិ ដើម្បីបង្កើនតម្លៃបន្ថែម ភាពប្រកួតប្រជែង និងពង្រីកចំណែកទីផ្សារសម្រាប់ផលិតផលសក្តានុពលរបស់កម្ពុជា។
ផលិតផលទាំងនោះរួមមាន អង្ករ គ្រាប់ស្វាយចន្ទី ម្រេច និងផ្លែឈើស្រស់ ព្រមទាំងផ្លែឈើកែច្នៃ ដែលអាចជំរុញការធ្វើពិពិធកម្មមុខទំនិញនាំចេញ និងបង្កើនឱកាសទីផ្សារសម្រាប់ផលិតករ និងធុរកិច្ចក្នុងស្រុក។
ក្នុងសិក្ខាសាលានេះ លោក Dan Solis បានធ្វើបទបង្ហាញ និងចែករំលែកបទពិសោធន៍ជាក់ស្តែងពាក់ព័ន្ធនឹងប្រព័ន្ធបទប្បញ្ញត្តិរបស់ FDA និងនីតិវិធីនាំចូលផលិតផលម្ហូបអាហារទៅកាន់សហរដ្ឋអាម៉េរិក។ ខ្លឹមសារសំខាន់ៗរួមមាន កម្មវិធីផ្ទៀងផ្ទាត់អ្នកផ្គត់ផ្គង់បរទេស (Foreign Supplier Verification Program – FSVP) តម្រូវការតាមដានប្រភពដើម និងខ្សែច្រវាក់ផ្គត់ផ្គង់ម្ហូបអាហារ (Food Traceability Requirements) នីតិវិធីត្រួតពិនិត្យទំនិញនាំចូល ប្រព័ន្ធប្រកាសអាសន្នការនាំចូល (Import Alerts) និងវិធានការកែតម្រូវភាពមិនអនុលោម (Corrective Actions)។
ការយល់ដឹងអំពីលក្ខខណ្ឌ និងនីតិវិធីទាំងនេះមានសារៈសំខាន់សម្រាប់អាជីវកម្មកម្ពុជាក្នុងការរៀបចំផលិតផល និងឯកសារនាំចេញឱ្យបានត្រឹមត្រូវ ដើម្បីកាត់បន្ថយហានិភ័យនៃការឃាត់ទុក ឬការបដិសេធទំនិញនៅតាមច្រកនាំចូលរបស់សហរដ្ឋអាម៉េរិក។
យោងតាមទិន្នន័យដែលចេញផ្សាយដោយអគ្គនាយកដ្ឋានគយ និងរដ្ឋាករកម្ពុជា ពាណិជ្ជកម្មទ្វេភាគីរវាងកម្ពុជា និងសហរដ្ឋអាម៉េរិកមានទំហំសរុប ១៣,៨២ ពាន់លានដុល្លារអាម៉េរិក ក្នុងរយៈពេល ១០ ខែដំបូងនៃឆ្នាំ២០២៦។
ក្នុងនោះ កម្ពុជាបាននាំចេញទំនិញទៅកាន់សហរដ្ឋអាម៉េរិកក្នុងទំហំ ១៣,២៧ ពាន់លានដុល្លារអាម៉េរិក កើនឡើង ២៧,៨% ធៀបនឹងរយៈពេលដូចគ្នាកាលពីឆ្នាំមុន។ ចំណែកការនាំចូលទំនិញពីសហរដ្ឋអាម៉េរិកមកកម្ពុជាមានទំហំជិត ៥៥០ លានដុល្លារអាម៉េរិក កើនឡើង ៦៨,២%។
ការពង្រឹងសមត្ថភាពផលិត កែច្នៃ និងការអនុលោមតាមស្តង់ដារអន្តរជាតិ ត្រូវបានលើកឡើងជាចំណុចសំខាន់ក្នុងការត្រៀមខ្លួនរបស់ធុរកិច្ចកម្ពុជា ដើម្បីពង្រីកការនាំចេញផលិតផលម្ហូបអាហារ និងទាញយកឱកាសពីទីផ្សារសហរដ្ឋអាម៉េរិក៕
អត្ថបទ៖ ប៊ី










