កម្ពុជា​-​សហ​ភាព​អឺរ៉ុប ​ដាក់​ចេញ​កម្មវិធី​ថ្មី​ជួយ​រោងចក្រ​កាត់បន្ថយ​ចំណាយ​ថាមពល ​និង​បង្កើន​ផលិតភាព​

តាមដានជាមួយយើង៖ Million Times

ភ្នំពេញ​៖​ ​កម្ពុជា​ ​និង​សហ​ភាព​អឺរ៉ុប​ ​(​EU​)​ ​បាន​ប្រកាស​ដាក់​ឱ្យ​អនុវត្ត​កម្មវិធី​ភាព​ជា​ដៃគូ​ថ្មី​មួយ ​ដើម្បី​ជួយ​រោងចក្រ​កែលម្អ​ប្រសិទ្ធភាព​នៃ​ការ​ប្រើប្រាស់​ថាមពល​ ​កាត់បន្ថយ​ចំណាយ​ផលិតកម្ម ​បង្កើន​ការ​ប្រើប្រាស់​ថាមពល​កកើត​ឡើង​វិញ​ ​និង​ពង្រឹង​ភាព​ប្រកួតប្រជែង​របស់​វិស័យ​ឧស្សាហកម្ម​កម្ពុជា​។​

​កម្មវិធី​ ​«​ភាព​ជា​ដៃគូ​កម្ពុជា​-​សហ​ភាព​អឺរ៉ុប ​សម្រាប់​ការ​ប្រើប្រាស់​ថាមពល​ប្រកបដោយ​ចីរភាព​ក្នុង​វិស័យ​ឧស្សាហកម្ម​» ​ត្រូវ​បាន​ប្រកាស​ដាក់​ឱ្យ​អនុវត្ត​ជា​ផ្លូវការ​ ​នៅ​រាជធានី​ភ្នំពេញ​ ​កាលពី​ថ្ងៃ​ទី​១៩ ​ខែ​វិច្ឆិកា​ ​ឆ្នាំ​២០២៦ ​ដោយ​ឯកឧត្តម​ ​ហែម វណ្ណ​ឌី ​រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ​ ​បច្ចេកវិទ្យា​ ​និងន​វានុវត្តន៍​ ​ឯកឧត្តម​ ​កែវ​ រ​តនៈ​ ​រដ្ឋមន្ត្រី​ក្រសួង​រ៉ែ ​និង​ថាមពល ​និង​ឯកឧត្តម​ ​Igor ​Driesmans ​ឯក​អគ្គ​រដ្ឋទូត​សហ​ភាព​អឺរ៉ុប​ប្រចាំ​កម្ពុជា​។

​កម្មវិធី​នេះ​ផ្តោត​ជាពិសេស​លើ​វិស័យ​កាត់ដេរ ​ស្បែកជើង​ ​និង​ផលិតផល​ធ្វើដំណើរ ​ដែល​រួមចំណែក​ប្រមាណ​ពីរ​ភាគ​បី​នៃ​ការ​នាំចេញ​ទំនិញ​សរុប​របស់​កម្ពុជា​ ​និង​ផ្តល់​ការងារ​ដល់​ប្រជា​ពលរដ្ឋ​ជា​ច្រើន ​ជាពិសេស​ស្ត្រី​។ តាមរយៈ​កម្មវិធី​នេះ​ ​រោងចក្រ​នឹង​ទទួល​បាន​ការ​គាំទ្រ​ក្នុង​ការ​បង្កើន​ប្រសិទ្ធភាព​ប្រើប្រាស់​ថាមពល ​និង​អនុវត្ត​ផលិតកម្ម​ស្អាត ​ដើម្បី​ឆ្លើយតប​នឹង​លក្ខខណ្ឌ​តម្រូវ​ផ្នែក​និរន្តរភាព​ដែល​កាន់តែ​ខ្ពស់​ពី​អ្នក​បញ្ជាទិញ​ ​និង​ទីផ្សារ​អន្តរជាតិ​។

​ឯកឧត្តម​ ហែម វណ្ណ​ឌី ​បាន​លើកឡើង​ថា​ ​ប្រសិទ្ធភាព​ថាមពល​គឺជា​ផ្នែក​ដ៏​សំខាន់​នៃ​ការ​ធ្វើ​ទំនើបកម្ម ​និង​ការ​បង្កើន​ភាព​ប្រកួតប្រជែង​របស់​ឧស្សាហកម្ម​កម្ពុជា​។​ ​កម្មវិធី​ភាព​ជា​ដៃគូ​នេះ​នឹង​ជួយ​រោងចក្រ​កែលម្អ​សមត្ថភាព​បច្ចេកទេស​ ​អនុវត្ត​ផលិតកម្ម​ស្អាត ​និង​មាន​ប្រសិទ្ធភាព​ ​ព្រមទាំង​បង្កើន​ផលិតភាព​។

​ឯក​ឧត្តម​បាន​បញ្ជាក់​ថា​ ​តាមរយៈ​ការ​ប្រែក្លាយ​គោល​នយោបាយ​ទៅ​ជា​សកម្មភាព​ជាក់ស្តែង​នៅក្នុង​រោងចក្រ​ ​កម្ពុជា​អាច​កសាង​វិស័យ​ឧស្សាហកម្ម​ដែល​មាន​ចីរភាព​ ​និង​សមត្ថភាព​ប្រកួតប្រជែង​កាន់តែ​ប្រសើរ​។

​កម្មវិធី​នេះ​នឹង​គាំទ្រ​ដល់​ការ​កែលម្អ​បទប្បញ្ញត្តិ​ស្តីពី​ប្រសិទ្ធភាព​ថាមពល ​ផ្តល់​ជំនួយ​បច្ចេកទេស​ដល់​រោងចក្រ​ ​និង​សម្រួល​លទ្ធភាព​ទទួល​បាន​ហិរញ្ញប្បទាន​សម្រាប់​ការ​វិនិយោគ​លើ​ថាមពល​ស្អាត ​និង​ការ​ប្រើប្រាស់​ថាមពល​ប្រកប​ដោយ​ប្រសិទ្ធភាព​។ ​កម្មវិធី​ក៏​នឹង​គាំទ្រ​ការ​រៀបចំ​ស្តង់ដារ​ប្រសិទ្ធភាព​ថាមពល​សម្រាប់​ឧបករណ៍​ឧស្សាហកម្ម កែលម្អ​ប្រព័ន្ធ​តាមដាន​ ​និង​រាយការណ៍​អំពី​ការ​ប្រើប្រាស់​ថាមពល ព្រមទាំង​ពង្រឹង​សមត្ថភាព​បច្ចេកទេស​របស់​រោងចក្រ ​ដើម្បី​កាត់បន្ថយ​ចំណាយ ​និង​បង្កើន​ប្រសិទ្ធភាព​ផលិតកម្ម​។

​ឯក​ឧត្តម​ ​កែវ រ​តនៈ ​បាន​លើកឡើង​ថា​ ​«​ថាមពល​ដែល​មាន​តម្លៃ​បំផុត​មួយ​គឺ​ថាមពល​ដែល​យើង​មិន​ចាំបាច់​ប្រើប្រាស់​»​។ ​ឯក​ឧត្តម​បាន​បញ្ជាក់​ថា​ ​កម្ពុជា​ទទួល​ស្គាល់ «​ឥន្ធនៈ​លាក់​កំបាំង​» ​នេះ​ជា​សសរស្តម្ភ​សំខាន់​មួយ​នៃ​យុទ្ធសាស្ត្រ​ថាមពល​ជាតិ​។

​ឯក​ឧត្តម​បាន​បន្ត​ថា​ ​នៅ​ពេល​តម្រូវការ​ថាមពល​បន្ត​កើនឡើង​ ការ​កែលម្អ​ប្រសិទ្ធភាព​នៃ​ការ​ប្រើប្រាស់​ថាមពល​ក្នុង​វិស័យ​ផលិតកម្ម ​នឹង​ជួយ​ឱ្យ​ឧស្សាហកម្ម​រីកចម្រើន​ប្រកបដោយ​ចីរភាព​ ​ហើយ​កម្ពុជា​ស្វាគមន៍​ភាព​ជា​ដៃគូ​របស់​សហ​ភាព​អឺរ៉ុប​ក្នុង​ការ​ជំរុញ​កិច្ចការ​នេះ​។

​ក្រោម​កិច្ច​សហការ​ជាមួយ​អង្គការ​អភិវឌ្ឍន៍​ឧស្សាហកម្ម​នៃ​អង្គការ​សហ​ប្រជា​ជាតិ​ ​(​UN​IDO​)​ ​កម្មវិធី​នេះ​គ្រោង​នឹង​គាំទ្រ​ការ​ធ្វើ​សវនកម្ម​ថាមពល​ចំនួន​ ​២១០​លើក ​នៅ​តាម​រោងចក្រ​កាត់ដេរ​ ​ស្បែក​ជើង​ ​និង​ផលិតផល​ធ្វើដំណើរ ​ដើម្បី​ជួយ​រោងចក្រ​កំណត់​វិធីសាស្ត្រ​កាត់បន្ថយ​ការ​ប្រើប្រាស់​ថាមពល ​និង​បង្កើន​ប្រសិទ្ធភាព​ផលិតកម្ម​។

​បន្ថែម​ពី​នេះ​ ​កម្ម​វិធី​នឹង​លើកកម្ពស់​ការ​ប្រើប្រាស់​ជីវ​ម៉ាស​ប្រកប​ដោយ​និរន្តរភាព​ ​និង​កែលម្អ​លក្ខខណ្ឌ​ការងារ​នៅក្នុង​រោងចក្រ ​រួម​មាន​ប្រព័ន្ធ​ខ្យល់​ចេញ​ចូល​ ​ភ្លើង​បំភ្លឺ​ ​និង​វិធានការ​កាត់បន្ថយ​បញ្ហា​ស្ត្រេស​កម្ដៅ​។​ ​សមាគម​ឧស្សាហកម្ម​ក៏​នឹង​ទទួល​បាន​ការ​គាំទ្រ​ដើម្បី​ជួយ​រោងចក្រ​រៀបចំ​សំណើ​វិនិយោគ ​និង​ទទួល​បាន​ហិរញ្ញប្បទាន​បៃតង​ផងដែរ​។

​ឯក​ឧត្តម​ ​Igor ​Driesmans ​បាន​មានប្រសាសន៍​ថា​ ​ខណៈ​កម្ពុជា​កំពុង​ត្រៀមខ្លួន​ចាកចេញ​ពី​ឋានៈ​ជា​ប្រទេស​ដែល​មាន​ការ​អភិវឌ្ឍ​តិច​តួច​ ការ​កសាង​វិស័យ​ឧស្សាហកម្ម​ដែល​មាន​និរន្តរភាព​ ​និង​ប្រសិទ្ធភាព​ថាមពល​ខ្ពស់​ ​អាច​ជួយ​អាជីវកម្ម​កាត់បន្ថយ​ចំណាយ​ ​បង្កើន​ផលិតភាព​ ​និង​ឆ្លើយតប​នឹង​តម្រូវការ​ទីផ្សារ​ដែល​កំពុង​ផ្លាស់ប្តូរ​។

​ឯក​ឧត្តម​បាន​បញ្ជាក់​ថា​ ​តាមរយៈ​ភាព​ជា​ដៃគូ​នេះ​ ​និង​ក្រោម​យុទ្ធសាស្ត្រ​ ​Global ​Gateway ​សហ​ភាព​អឺរ៉ុប​កំពុង​រួមបញ្ចូល​គោលនយោបាយ​ ​វិស័យ​ឧស្សាហកម្ម ​និង​ការ​វិនិយោគ ​ដើម្បី​គាំទ្រ​កំណើន ភាព​ធន់ ​និង​ផលប្រយោជន៍​រយៈពេល​វែង​សម្រាប់​អាជីវកម្ម​ ​កម្ម​ករ ​និង​សហគមន៍​នៅ​កម្ពុជា​។

​កម្មវិធី​នេះ​ក៏​ជា​ផ្នែក​មួយ​នៃ​ការ​គាំទ្រ​ដល់​ការ​អនុវត្ត​គោលនយោបាយ​ជាតិ​ប្រសិទ្ធភាព​ថាមពល ​និង​កិច្ច​ខិតខំ​ប្រឹងប្រែង​របស់​កម្ពុជា​ ​ក្នុង​ការ​ធ្វើ​ទំនើប​កម្ម​វិស័យ​ឧស្សាហកម្ម ​បង្កើន​ប្រសិទ្ធភាព​នៃ​ការ​ប្រើប្រាស់​ធនធាន​ ​និង​ជំរុញ​កំណើន​ឧស្សាហកម្ម​ប្រកបដោយ​ចីរភាព​៕

អត្ថបទ៖ ប៊ី