ភ្នំពេញ៖ កម្ពុជាកំពុងជំរុញការពង្រឹងវិស័យវេចខ្ចប់ ដើម្បីគាំទ្រការកែច្នៃអាហារ លើកកម្ពស់គុណភាពផលិតផល និងបង្កើនតម្លៃបន្ថែមក្នុងស្រុក ខណៈឧស្សាហកម្មកែច្នៃអាហារ និងផលិតកម្មក្នុងស្រុកកំពុងរីកចម្រើន។

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រុមហ៊ុន Informa Markets បានសហការរៀបចំ «វេទិកាវេចខ្ចប់ និងពិព័រណ៍បច្ចេកវិទ្យាអាហារកម្ពុជា ២០២៦» នៅមណ្ឌលសន្និបាត និងពិព័រណ៍កោះពេជ្រ ចាប់ពីថ្ងៃទី២៨ ដល់ថ្ងៃទី៣០ ខែកញ្ញា ឆ្នាំ២០២៦ ដោយប្រមូលផ្តុំក្រុមហ៊ុនផលិត អ្នកផ្គត់ផ្គង់បច្ចេកវិទ្យា អ្នកជំនាញផ្នែកវេចខ្ចប់ អ្នកស្រាវជ្រាវ និងដៃគូអាជីវកម្ម។

វេទិកាវេចខ្ចប់កម្ពុជា ២០២៦ (PackTalk Cambodia 2026) ត្រូវបានរៀបចំក្រោមប្រធានបទ «ការវេចខ្ចប់៖ ជំហានចុងក្រោយដើម្បីចូលទៅកាន់ទីផ្សារ» ដោយភ្ជាប់កិច្ចពិភាក្សាអំពីគោលនយោបាយ និងឧស្សាហកម្ម ជាមួយបច្ចេកវិទ្យា និងសេវាកម្មដែលអាចអនុវត្តបានជាក់ស្តែង។

ថ្លែងក្នុងពិធីបើក ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសង្កត់ធ្ងន់លើសារសំខាន់នៃការពង្រឹងសមត្ថភាពផ្នែកវេចខ្ចប់ ស្របពេលដែលឧស្សាហកម្មកែច្នៃអាហារ និងផលិតកម្មក្នុងស្រុកកំពុងរីកចម្រើន។

ឯកឧត្តមបានលើកឡើងថា ការវេចខ្ចប់គឺជាតំណភ្ជាប់បន្ទាប់នៅក្នុងខ្សែច្រវាក់ផលិតកម្ម ហើយការអភិវឌ្ឍវិស័យនេះមានសារសំខាន់ មិនត្រឹមតែសម្រាប់កែលម្អផលិតផលនីមួយៗប៉ុណ្ណោះទេ ប៉ុន្តែថែមទាំងសម្រាប់ពង្រឹងខ្សែច្រវាក់ផ្គត់ផ្គង់ក្នុងស្រុក និងបង្កើនតម្លៃបន្ថែមសម្រាប់សេដ្ឋកិច្ចកម្ពុជាផងដែរ។

ឯកឧត្តមរដ្ឋមន្ត្រីបានបន្ថែមថា ប្រព័ន្ធអេកូឡូស៊ីវេចខ្ចប់ដែលមានភាពប្រកួតប្រជែង ត្រូវការអ្នកផ្គត់ផ្គង់ក្នុងស្រុកកាន់តែរឹងមាំ សេវាបច្ចេកទេស សមត្ថភាពស្រាវជ្រាវ និងធ្វើតេស្ត ព្រមទាំងទំនាក់ទំនងកាន់តែជិតស្និទ្ធរវាងអ្នកផលិតសំបកវេចខ្ចប់ និងឧស្សាហកម្មដែលប្រើប្រាស់សំបកវេចខ្ចប់។

វេទិកាវេចខ្ចប់នេះបានលើកយកប្រធានបទសំខាន់ៗ រួមមាន ការការពារផលិតផល ការរចនាសំបកវេចខ្ចប់ សុវត្ថិភាពម្ហូបអាហារ ស្តង់ដារ ការរៀបចំស្លាកលើសំបកផលិតផល និរន្តរភាពនៃការវេចខ្ចប់ និងទំនុកចិត្តរបស់អ្នកប្រើប្រាស់។

កម្មវិធីនេះមានគោលបំណងផ្សារភ្ជាប់ក្រុមហ៊ុនផលិត និងសហគ្រាសកែច្នៃកសិផលកម្ពុជា ជាមួយអ្នកផ្គត់ផ្គង់សម្ភារវេចខ្ចប់ អ្នកស្រាវជ្រាវ ស្ថាប័នបច្ចេកទេស និងដៃគូអាជីវកម្មសក្តានុពល ដើម្បីជំរុញការផ្លាស់ប្តូរចំណេះដឹង និងកិច្ចសហការក្នុងវិស័យនេះ។

ចំណែកពិព័រណ៍បច្ចេកវិទ្យាអាហារកម្ពុជា ២០២៦ (FoodTec Cambodia 2026) មានស្តង់ពិព័រណ៍ជាង ១០០ សម្រាប់តាំងបង្ហាញគ្រឿងម៉ាស៊ីន ដំណោះស្រាយសម្រាប់ការកែច្នៃ និងវេចខ្ចប់អាហារ និងបច្ចេកវិទ្យាកសិកម្ម។ ពិព័រណ៍នេះរំពឹងថានឹងទាក់ទាញអ្នកពាក់ព័ន្ធពីវិស័យឧស្សាហកម្ម ធុរកិច្ច អ្នកស្រាវជ្រាវ និងអ្នកចូលរួមប្រមាណ ៥.០០០ នាក់។

លោក Gerard Leeuwenburgh អគ្គនាយកប្រចាំប្រទេសម៉ាឡេស៊ី និងកម្ពុជា នៃក្រុមហ៊ុន Informa Markets បានលើកឡើងថា ពិព័រណ៍នេះផ្តល់វេទិកាសម្រាប់គំនិតអាជីវកម្ម ដំណោះស្រាយឆ្លាតវៃ និងកិច្ចសហការជាសកល។

លោកបានលើកទឹកចិត្តអ្នកចូលរួមឱ្យស្វែងយល់ បង្កើតទំនាក់ទំនង និងទទួលការបំផុសគំនិត ខណៈភាគីពាក់ព័ន្ធកំពុងរួមគ្នាកសាងឧស្សាហកម្មផលិត និងកែច្នៃអាហារដែលកាន់តែមានចីរភាព នវានុវត្តន៍ និងប្រាក់ចំណេញ។

ក្នុងឱកាសនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក៏បានប្រកាសដាក់ឱ្យដំណើរការជាផ្លូវការនូវសេវាសាធារណៈទាំងអស់ ១០០% របស់ក្រសួងតាមប្រព័ន្ធឌីជីថល ដើម្បីឱ្យសហគ្រាស និងសាធារណជនអាចប្រើប្រាស់សេវាបានកាន់តែលឿន ងាយស្រួល មានតម្លាភាព និងប្រសិទ្ធភាព៕

អត្ថបទ៖ ប៊ី