ក្រុមហ៊ុនសែលកាត របស់អ្នកឧកញ៉ា គិត ម៉េង បានចុះអនុស្សរណៈនៃការយោគយល់គ្នា (MoU) ជាមួយក្រុមហ៊ុន Huawei ក្នុងទំហំទឹកប្រាក់ ៣០០ លានដុល្លារ ដោយជំរុញទំហំវិនិយោគ សរុបកើនដល់ ៥,៦ ប៊ីលានដុល្លារ ក្នុងរយៈពេល ៣០ ឆ្នាំ។
Million Times 
នៅថ្ងៃ ២៨ ខែកញ្ញា ឆ្នាំ ២០២៦ នេះ ក្រុមហ៊ុន ខេម ជ្ជីអេសអេម ម.ក (CamGSM PLC) ឬស្គាល់ជាទូទៅថាក្រុមហ៊ុនសែលកាត ដែលជាប្រតិបត្តិករទូរគមនាគមន៍ឌីជីថលរបស់កូនខ្មែរ បានចុះហត្ថលេខាលើអនុស្សរណៈនៃការយោគយល់គ្នា ជាយុទ្ធសាស្ត្រជាមួយក្រុមហ៊ុន Huawei។
ការចុះ MoU ក្នុងទំហំទឹកប្រាក់វិនិយោគដ៏ច្រើនសន្ទឹកសន្ធាប់នេះ ក៏ជាការបន្ត និងពង្រឹងកិច្ចសហប្រតិបត្តិការរវាងសែលកាត និង Huawei ដែលបានចាប់ផ្តើមតាំងពីឆ្នាំ ១៩៩៩ មក ដោយផ្ដោតលើការអភិវឌ្ឍបច្ចេកវិទ្យា និងហេដ្ឋារចនាសម្ព័ន្ធទូរគមនាគមន៍នៅកម្ពុជា។
កិច្ចខិតខំប្រឹងប្រែងជាបន្តបន្ទាប់របស់រាជរដ្ឋាភិបាលក្នុងការពង្រឹងបរិយាកាសវិនិយោគ និងការអភិវឌ្ឍហេដ្ឋារចនាសម្ព័ន្ធ បានរួមចំណែកយ៉ាងសំខាន់ក្នុងការបង្កើតបរិយាកាសកាន់តែអំណោយផល សម្រាប់អាជីវកម្ម និងការវិនិយោគ។
ក្រុមហ៊ុនសែលកាតស្វាគមន៍ចំពោះកិច្ចខិតខំប្រឹងប្រែងទាំងនេះ ហើយនៅតែបន្តប្តេជ្ញាចិត្តយ៉ាងមុតមាំក្នុងការគាំទ្រដល់ការអភិវឌ្ឍឌីជីថលរយៈពេលវែងរបស់កម្ពុជា តាមរយៈការវិនិយោគជាបន្តបន្ទាប់លើប្រព័ន្ធភ្ជាប់ទំនាក់ទំនង និងបច្ចេកវិទ្យា។ កិច្ចសហប្រតិបត្តិការយុទ្ធសាស្ត្រនេះ បាននាំក្រុមហ៊ុនសែលកាតបោះជំហានមួយដ៏ធំគាំទ្រទៅលើការអភិវឌ្ឍបណ្តាញទូរស័ព្ទចល័ត បណ្តាញអ៊ីនធឺណិត មជ្ឈមណ្ឌលទិន្នន័យ វេទិកាបញ្ញាសិប្បនិម្មិត Cloud បទពិសោធអតិថិជនដ៏ប្រសើរ និងប្រតិបត្តិការបណ្តាញ ដែលប្រើប្រាស់ ថាមពលកាន់តែមានប្រសិទ្ធភាព នៅក្រោមចក្ខុវិស័យរួមគ្នាតែមួយ។
កិច្ចព្រមព្រៀងនេះ ក៏បានពង្រឹងភាពជាដៃគូដ៏យូរអង្វែង និងប្រកបដោយជោគជ័យរវាង ក្រុមហ៊ុនសែលកាត និង Huawei ដែលមានមហិច្ឆតារួមគ្នាក្នុងការពន្លឿនការផ្លាស់ប្តូររបស់កម្ពុជា ទៅជាកម្លាំងចលករសេដ្ឋកិច្ចឌីជីថលក្នុងតំបន់។
លោក Wang Xu ប្រធានក្រុមហ៊ុន Huawei ប្រចាំតំបន់អាស៊ីអាគ្នេយ៍មានប្រសាសន៍ថា៖ «ក្រុមហ៊ុន Huawei មានមោទនភាពយ៉ាងខ្លាំងក្នុងការរឹតចំណងកិច្ចសហប្រតិបត្តិការយុទ្ធសាស្ត្ររបស់ Huawei ជាមួយក្រុមហ៊ុនសែលកាត ក្នុងខណៈពេលដ៏សំខាន់នៃការអភិវឌ្ឍឌីជីថលរបស់កម្ពុជា។ តាមរយៈការរួមបញ្ចូលគ្នានូវការបង្កើតថ្មីនៅទូទាំងបច្ចេកវិទ្យា 5G, បណ្តាញអុបទិក មជ្ឈមណ្ឌលទិន្នន័យ Cloud បញ្ញាសិប្បនិម្មិត បទពិសោធអតិថិជន និងបច្ចេកវិទ្យាបណ្តាញ Huawei រំពឹងយ៉ាងមុតមាំក្នុងការគាំទ្រក្រុមហ៊ុនសែលកាតរួមជាមួយក្រុមហ៊ុនបុត្រសម្ព័ន្ឋផ្សេងទៀតរបស់ RGC ក្នុងការកសាងហេដ្ឋារចនាសម្ព័ន្ធឌីជីថលដ៏ទូលំទូលាយ និងត្រៀមខ្លួនជាស្រេចសម្រាប់អនាគត។ យើងមានជំនឿរួមគ្នាថា បច្ចេកវិទ្យាជឿនលឿនបង្កើតបានជារបស់ដែលមានតម្លៃបំផុត នៅពេលវាជួយកែលម្អជីវភាពរស់នៅរបស់ប្រជាជន ពង្រឹងអាជីវកម្ម និងគាំទ្រដល់ការអភិវឌ្ឍជាតិប្រកបដោយចីរភាព។
សម្រាប់ប្រទេសកម្ពុជា មហិច្ឆតានេះគឺធំធេងជាងត្រឹមតែការភ្ជាប់ទំនាក់ទំនងដោយល្បឿនលឿន។ វាគឺជាការបង្កើតគ្រឹះឌីជីថលសម្រាប់អាជីវកម្មកាន់តែប្រសើរ សហគមន៍កាន់តែរឹងមាំ សេវាកម្មដោយការបង្កើតថ្មី និងកំណើនឌីជីថលជំនាន់ថ្មីរបស់កម្ពុជា៕
អត្ថបទ៖ ឆដា, រូបភាព៖ CNC
