នៅថ្ងៃនេះក្រសួងអប់រំ យុវជន និងកីឡា សម្រេចផ្អាកដំណើរការសិក្សានៅគ្រឹះស្ថានសិក្សា សាធារណៈ និងឯកជនទាំងអស់ក្នុងរាជធានីភ្នំពេញ រយៈពេល ២ ថ្ងៃ គឺនៅថ្ងៃទី១៥ និងថ្ងៃទី១៦ ខែវិច្ឆិកា ឆ្នាំ២០២៦ ខាងមុខ ដើម្បីជៀសវាងការរំខានដល់ការសិក្សា និងសម្រួលដល់ការធ្វើដំណើរ ក្នុងអំឡុងពេលកិច្ចប្រជុំកំពូលហ្វ្រង់កូហ្វូនីលើកទី២០ ដែលប្រទេសកម្ពុជាធ្វើជាម្ចាស់ផ្ទះ។
Million Times 
ការផ្អាកដំណើរការសិក្សានេះ មានគោលបំណងជៀសវាងផលប៉ះពាល់ពីការកកស្ទះចរាចរណ៍ ដែលអាចកើតឡើងក្នុងអំឡុងពេលកិច្ចប្រជុំកំពូលហ្វ្រង់កូហ្វូនីលើកទី២០ ដែលគ្រោងនឹងប្រព្រឹត្តចាប់ពីថ្ងៃ ១៥-១៦ ខែវិច្ឆិកា ឆ្នាំ ២០២៦ នារាជធានី ភ្នំពេញ។
កិច្ចប្រជុំកំពូលហ្វ្រង់កូហ្វូនីលើកទី២០ នឹងនាំមកជួបជុំប្រមុខរដ្ឋ និងប្រមុខរដ្ឋាភិបាលនៃបណ្ដាប្រទេសសមាជិកដែលប្រើប្រាស់ភាសាបារាំង ដើម្បីពិភាក្សាលើបញ្ហាប្រឈមសំខាន់ៗក្នុងពិភពលោករួមមាន កិច្ចសហប្រតិបត្តិការអន្តរជាតិ ពហុភាគីនិយម និងការអភិវឌ្ឍប្រកបដោយចីរភាព។
ក្រៅពីជាវេទិកាសម្រាប់ការពិភាក្សាលើបញ្ហាអន្តរជាតិ កិច្ចប្រជុំនេះក៏ជាឱកាស សម្រាប់ពង្រឹងទំនាក់ទំនង និងកិច្ចសហប្រតិបត្តិការរវាងសមាជិកនៃអង្គការអន្តរជាតិហ្វ្រង់កូហ្វូនី (OIF) ព្រមទាំងលើកកម្ពស់តួនាទីកម្ពុជា នៅក្នុងសហគមន៍ប្រើប្រាស់ភាសាបារាំងផងដែរ។
នាឱកាសនេះ ក៏គ្រោងនឹងមានការចុះហត្ថលេខាលើកិច្ចព្រមព្រៀងទ្វេភាគីមួយចំនួន និងការរៀបចំកម្មវិធីផ្លាស់ប្ដូរវប្បធម៌ ដើម្បីបង្ហាញពីភាពសម្បូរបែបនៃភាសា វប្បធម៌ និងបេតិកភណ្ឌរបស់កម្ពុជា។
ការធ្វើជាម្ចាស់ផ្ទះនៃកិច្ចប្រជុំកំពូលនេះ ត្រូវបានរំពឹងថានឹងផ្ដល់ឱកាសដល់កម្ពុជា ក្នុងការពង្រឹងទំនាក់ទំនងអន្តរជាតិ និងពង្រីកកិច្ចសហប្រតិបត្តិការជាមួយបណ្ដាប្រទេសសមាជិកនៃសហគមន៍ហ្វ្រង់កូហ្វូនី៕
អត្ថបទ៖ ឆដា, រូបភាព៖ អ៊ីនធឺណិត
