អ្នកឧកញ៉ាបណ្ឌិត សំ សុខនឿន ចូលរួមពិភាក្សាពីដំណោះស្រាយហិរញ្ញប្បទាន

តាមដានជាមួយយើង៖

ភ្នំពេញ៖ អ្នកឧកញ៉ាបណ្ឌិត សំ សុខនឿន ប្រធានសម្ព័ន្ធក្រុមហ៊ុន SAM SN Group និងជាអនុប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានចូលរួមជាវាគ្មិនក្នុងកិច្ចពិភាក្សាស្តីពីការពង្រឹងលទ្ធភាពទទួលបានហិរញ្ញប្បទានរបស់សហគ្រាសធុនមីក្រូ តូច និងមធ្យម (MSMEs) តាមរយៈទិន្នន័យ និងថ្នាលឌីជីថល ក្នុងឱកាសវេទិកាថ្នាក់ជាតិស្តីពីហិរញ្ញប្បទានសម្រាប់ MSMEs លើកទី១ ឆ្នាំ២០២៦។

កិច្ចពិភាក្សាទី៤ នៃវេទិកា ដែលប្រព្រឹតិ្តទៅកាលពីថ្ងៃទី២៨ ខែតុលា កន្លងនេះ បានប្រមូលផ្តុំតំណាងស្ថាប័នរាជរដ្ឋាភិបាល សមាគមធុរកិច្ច និងក្រុមហ៊ុនព័ត៌មានឥណទាន ដើម្បីពិភាក្សាអំពីតួនាទីរបស់ទិន្នន័យ និងថ្នាលឌីជីថលក្នុងការកាត់បន្ថយគម្លាតព័ត៌មាន និងពង្រីកលទ្ធភាពទទួលបានហិរញ្ញប្បទានរបស់សហគ្រាស។

បញ្ហាសំខាន់មួយដែលត្រូវបានលើកឡើងក្នុងកិច្ចពិភាក្សា គឺគម្លាតព័ត៌មានរវាង MSMEs និងគ្រឹះស្ថានហិរញ្ញវត្ថុ។ សហគ្រាសជាច្រើននៅខ្វះព័ត៌មានអំពីប្រភព និងផលិតផលហិរញ្ញប្បទាន ខណៈព័ត៌មានដែលមានស្រាប់នៅខ្ចាត់ខ្ចាយតាមប្រភពផ្សេងៗ។ ជាមួយគ្នានេះ គ្រឹះស្ថានហិរញ្ញវត្ថុក៏ប្រឈមនឹងការខ្វះទិន្នន័យអាជីវកម្មដែលអាចផ្ទៀងផ្ទាត់បាន ដើម្បីវាយតម្លៃសមត្ថភាពរបស់សហគ្រាសក្នុងការទទួល និងសងឥណទាន។

ដើម្បីដោះស្រាយបញ្ហានេះ កិច្ចពិភាក្សាបានលើកឡើងពីការបង្កើតថ្នាលឌីជីថលរួមមួយ ដែលអាចតភ្ជាប់ភាគីពាក់ព័ន្ធក្នុងខ្សែច្រវាក់តម្លៃ និងផ្តល់លទ្ធភាពឱ្យ MSMEs ស្វែងរកព័ត៌មានអំពីប្រភពហិរញ្ញប្បទាន អ្នកផ្គត់ផ្គង់ និងសេវាគាំទ្រអាជីវកម្មនៅកន្លែងតែមួយ។ ការអភិវឌ្ឍថ្នាលនេះត្រូវការការគាំទ្រ និងសម្របសម្រួលទិន្នន័យពីស្ថាប័នរដ្ឋ និយ័តករ និងវិស័យឯកជន។

កិច្ចពិភាក្សាក៏បានលើកឡើងពីសក្តានុពលនៃប្រតិបត្តិការឌីជីថលតាមប្រព័ន្ធបាគង និង KHQR ក្នុងការបង្កើតកំណត់ត្រាហិរញ្ញវត្ថុសម្រាប់ MSMEs ប្រើប្រាស់ក្នុងការស្នើសុំឥណទាន។ កំណត់ត្រាទាំងនេះអាចជួយឱ្យគ្រឹះស្ថានហិរញ្ញវត្ថុយល់ដឹងកាន់តែច្បាស់អំពីសកម្មភាពអាជីវកម្ម និងពង្រីកជម្រើសក្នុងការវាយតម្លៃឥណទាន។

ទន្ទឹមនេះ គ្រឹះស្ថានហិរញ្ញវត្ថុត្រូវបានលើកទឹកចិត្តឱ្យពង្រីកជម្រើសហិរញ្ញប្បទាន ដូចជា ហិរញ្ញប្បទានតាមខ្សែច្រវាក់ផ្គត់ផ្គង់ ហិរញ្ញប្បទានដោយផ្អែកលើទ្រព្យចលនា និងកិច្ចសន្យា ព្រមទាំងឥណទានដែលមានការធានាពីសាជីវកម្មធានាឥណទានកម្ពុជា (CGCC)។ វិធីសាស្ត្រទាំងនេះក៏អាចជួយឱ្យការវាយតម្លៃផ្តោតលើសក្តានុពលអាជីវកម្ម ជាជាងពឹងផ្អែកតែលើទ្រព្យធានា។

ចំពោះ MSMEs ការត្រៀមខ្លួនរបស់សហគ្រាសក៏ជាកត្តាសំខាន់ក្នុងការទទួលបានហិរញ្ញប្បទាន។ សហគ្រាសត្រូវចុះបញ្ជីអាជីវកម្ម រៀបចំកំណត់ត្រាហិរញ្ញវត្ថុជាទម្រង់ឌីជីថល និងស្វែងយល់ពីប្រភេទហិរញ្ញប្បទានដែលសមស្របនឹងតម្រូវការរបស់ខ្លួន រួមមាន ឥណទាន មូលធន ឬជំនួយឥតសំណង។

ជាមួយគ្នានេះ ថ្នាលឌីជីថលគួរតែមានភាពងាយស្រួលប្រើប្រាស់ និងភ្ជាប់ជាមួយការបណ្តុះបណ្តាលចំណេះដឹងឌីជីថល ដើម្បីឱ្យ MSMEs គ្រប់ទំហំអាចប្រើប្រាស់បានប្រកបដោយប្រសិទ្ធភាព។

កិច្ចពិភាក្សាបានបង្ហាញថា ទិន្នន័យគ្រប់គ្រាន់ និងអាចជឿទុកចិត្តបាន អាចជួយកាត់បន្ថយគម្លាតព័ត៌មាន ធ្វើឱ្យការវាយតម្លៃឥណទានកាន់តែច្បាស់លាស់ និងពង្រីកលទ្ធភាពទទួលបានហិរញ្ញប្បទានរបស់ MSMEs។

ទោះជាយ៉ាងណា ការបង្កើតថ្នាលឌីជីថលរួមឱ្យទទួលបានជោគជ័យ ទាមទារកិច្ចសហការរវាងស្ថាប័នរាជរដ្ឋាភិបាល និយ័តករ គ្រឹះស្ថានហិរញ្ញវត្ថុ និងវិស័យឯកជន ដោយត្រូវធានាថា ថ្នាលនេះឆ្លើយតបនឹងតម្រូវការជាក់ស្តែងរបស់សហគ្រាស និងជួយសម្រួលដល់ការស្វែងរកហិរញ្ញប្បទានរបស់ពួកគេ៕

អត្ថបទ៖ ប៊ី