សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានណែនាំឱ្យសាលាបឋមសិក្សារដ្ឋទាំងអស់ ត្រូវតែមានស្ដង់ដារតែមួយ និងឱ្យឈប់បង្កើតសាលាជំនាន់ថ្មី សាលាគំរូ អ្វីបន្ថែមទៀតទៅ។
Million Times 
ក្នុងពិធីជួបសំណេះសំណាលជាមួយសិស្សនិទ្ទេស A ពីការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ១០ សីហា ដោយនាព្រឹកថ្ងៃ ២៨ ខែតុលា ឆ្នាំ ២០២៦ នេះ នាយករដ្ឋមន្រ្តីកម្ពុជា សម្តេច ហ៊ុន ម៉ាណែត បានប្រកាសឱ្យសាលារដ្ឋទាំងអស់ នៅប្រទេសកម្ពុជាត្រូវតែមានស្ដង់ដារតែមួយ។ លើសពីនេះ សម្ដេចក៏បានបដិសេធរួចហើយដែរ ចំពោះការស្នើសុំរបស់គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ ក្នុងការពង្រីកសាលារៀនគំរូ គ.វ.អ. ( គ្រូបង្រៀន វិន័យ និងអភិបាលកិច្ច)។
ដោយឡែកសាលាគំរូ គឺបង្កើតឡើង ដើម្បីសាកល្បងប៉ុណ្ណោះ ដើម្បីយកបទពិសោធន៍របស់សាលានេះ ទៅអនុវត្តនៅទូទាំងប្រទេស មិនមែនជាការពង្រីកសាលាគំរូ ក្នុងចំនួនណាមួយ ៥០០ ទៅ ១ ០០០ កន្លែង នាំឱ្យមានស្តង់ដារ ២ ក្នុងប្រព័ន្ធអប់រំឡើយ។ ទិសដៅរបស់រដ្ឋាភិបាល គឺសាលាបឋមសិក្សាដែលមាន ៧ ០០០ ទៅ ៨ ០០០ កន្លែងទូទាំងប្រទេស គឺត្រូវជាគំរូទាំងអស់ដែលមានស្តង់ដារអប់រំតែមួយ។
«គោលដៅខ្ញុំមិនត្រូវពង្រីកសាលា គ.វ.អ ឬ សាលាគំរូ ៥០០ទៅ ១០០០កន្លែង គឺអត់ទេ។ គោលគំនិតធំរបស់ខ្ញុំ មិនត្រូវបង្កើតស្តង់ដា២ ក្នុងសាលារដ្ឋទេ ប៉ុន្តែត្រូវរកវិធីសាស្ត្រដែលល្អដើម្បីឱ្យសាលាទាំងអស់ ជាសាលាមានសមត្ថភាព ហើយក្លាយជាសាលាគំរូគ្រប់សាលាទាំងអស់»។ នេះជាការបញ្ជាក់របស់សម្តេច ហ៊ុន ម៉ាណែត ៕
អត្ថបទ៖ ឆដា, រូបភាព៖ Samdech Thipadei Hun Manet, Prime Minister of Cambodia
