ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញឱ្យក្រុមហ៊ុនជប៉ុនបង្កើនការវិនិយោគ និងនាំយកបច្ចេកវិទ្យាមកកម្ពុជា ដើម្បីចូលរួមអភិវឌ្ឍវិស័យទឹកស្អាត និងពង្រីកសេវាផ្គត់ផ្គង់ទឹកស្អាតទៅកាន់តំបន់ថ្មីៗ។

ការជំរុញនេះធ្វើឡើងនៅថ្ងៃទី៧ ខែតុលា ឆ្នាំ២០២៦ ក្នុងជំនួបរវាងឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងគណៈប្រតិភូទីក្រុងគីតាឃ៊្យូស៊ូ ប្រទេសជប៉ុន ដឹកនាំដោយលោក Keisuke Tachi អភិបាលរងក្រុង ដើម្បីពិភាក្សាអំពីការពង្រីកកិច្ចសហប្រតិបត្តិការលើវិស័យទឹកស្អាត ការផ្ទេរបច្ចេកវិទ្យា និងការវិនិយោគ។

ឯកឧត្តម ហែម វណ្ណឌី បានបញ្ជាក់ថា ទឹកស្អាតគឺជាអាទិភាពសម្រាប់ការអភិវឌ្ឍសេដ្ឋកិច្ច និងសហគមន៍។ ក្នុងន័យនេះ លោកបានលើកទឹកចិត្តឱ្យក្រុមហ៊ុនជប៉ុនបង្កើនការវិនិយោគ និងនាំយកបច្ចេកវិទ្យាមកកម្ពុជា ជាពិសេសដើម្បីគាំទ្រប្រតិបត្តិករទឹកស្អាតឯកជន និងពង្រីកសេវាផ្គត់ផ្គង់ទឹកស្អាតទៅតំបន់ថ្មីៗបន្ថែមទៀត។

ឯកឧត្តម ហែម វណ្ណឌី បានមានប្រសាសន៍ថា៖ «យើងស្វាគមន៍ការវិនិយោគ និងការផ្ទេរបច្ចេកវិទ្យាពីក្រុមហ៊ុនជប៉ុន។ យើងត្រូវការដំណោះស្រាយជាក់ស្តែង ដែលអាចធានាបានទាំងនិរន្តរភាពអាជីវកម្ម និងតម្រូវការរបស់សហគមន៍ ដើម្បីពង្រីកលទ្ធភាពទទួលបានទឹកស្អាតប្រកបដោយសុវត្ថិភាព និងថ្លៃសមរម្យ» ។

ក្នុងជំនួបនេះ ឯកឧត្តមរដ្ឋមន្ត្រីក៏បានលើកឡើងពីតម្រូវការហេដ្ឋារចនាសម្ព័ន្ធប្រព្រឹត្តកម្មទឹកស្អាតខ្នាតធំ និងបានផ្តល់បច្ចុប្បន្នភាពអំពីដំណើរការបង្កើតនិយ័តករទឹកស្អាត ដើម្បីពង្រឹងអភិបាលកិច្ច និងគាំទ្រការអភិវឌ្ឍវិស័យនេះ។

ជាមួយគ្នានេះ លោក Keisuke Tachi បានគូសបញ្ជាក់ថា កិច្ចសហប្រតិបត្តិការរវាងទីក្រុងគីតាឃ៊្យូស៊ូ និងកម្ពុជា បានឈានដល់ឆ្នាំទី២៥ ហើយទីក្រុងគីតាឃ៊្យូស៊ូនឹងបន្តជំរុញក្រុមហ៊ុនជប៉ុនឱ្យស្វែងរកឱកាសវិនិយោគបន្ថែមនៅកម្ពុជា។

លោក Keisuke Tachi បានមានប្រសាសន៍ថា៖ «យើងនឹងនាំយកអាទិភាពរបស់ក្រសួងក្នុងវិស័យទឹកស្អាត ទៅពិភាក្សាជាមួយក្រុមហ៊ុននៅទីក្រុងគីតាឃ៊្យូស៊ូ និងស្វែងរកឱកាសបន្ថែមសម្រាប់កិច្ចសហប្រតិបត្តិការ និងការវិនិយោគ ទាំងក្នុងវិស័យទឹកស្អាត និងទឹកកខ្វក់»។

គណៈប្រតិភូទីក្រុងគីតាឃ៊្យូស៊ូកំពុងបំពេញបេសកកម្មនៅកម្ពុជា និងគ្រោងចូលរួមសិក្ខាសាលាស្តីពី «ទឹកស្អាត និងប្រព័ន្ធទឹកកខ្វក់ កម្ពុជា-ជប៉ុន» លើកទី១៩ ដែលនឹងរៀបចំនៅរាជធានីភ្នំពេញ នាថ្ងៃទី៨-៩ ខែតុលា ឆ្នាំ២០២៦៕

អត្ថបទ៖ ប៊ី