នាព្រឹកថ្ងៃ ២១ ខែកញ្ញា ឆ្នាំ ២០២៦ នេះ ក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍ បានដាក់ឲ្យដំណើរការជាផ្លូវការនូវគេហទំព័រមន្ទីរព័ត៌មានរាជធានី-ខេត្ត ដើម្បីពង្រឹងការផ្សព្វផ្សាយព័ត៌មានពីមូលដ្ឋានទៅកាន់សាធារណជន និងបង្កើនវត្តមានរបស់ស្ថាប័នព័ត៌មានរដ្ឋ នៅលើប្រព័ន្ធឌីជីថល ស្របតាមការរីកចម្រើនបច្ចេកវិទ្យា និងតម្រូវការទទួលបនព័ត៌មានរបស់ប្រជាពលរដ្ឋ។
Million Times 
ការដាក់ឲ្យប្រើប្រាស់ជាផ្លូវការនេះ ធ្វើឡើងក្រោមអធិបតីភាពលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងលោក នេត្រ ភក្ត្រា រដ្ឋមន្ត្រីក្រសួងព័ត៌មាន។ ការដាក់ឲ្យដំណើរការគេហទំព័រមន្ទីរព័ត៌មានរាជធានី-ខេត្ត គឺជាផ្នែកមួយនៃការធ្វើទំនើបកម្មប្រព័ន្ធផ្សព្វផ្សាយព័ត៌មាន នៅថ្នាក់មូលដ្ឋាន តាមរយៈការប្រើប្រាស់បច្ចេកវិទ្យាឌីជីថលសម្រាប់ប្រមូល រៀបចំ និងផ្សព្វផ្សាយព័ត៌មានឲ្យបានទូលំទូលាយ រហ័ស និងមានប្រសិទ្ធភាព។
គេហទំព័រទាំងនេះ នឹងក្លាយជាច្រកព័ត៌មានឌីជីថលសម្រាប់ផ្សព្វផ្សាយសកម្មភាពការងារ សមិទ្ធផល និងព័ត៌មានសំខាន់ៗនៅតាមរាជធានី-ខេត្ត ព្រមទាំងជួយសម្រួលដល់ការផ្សារភ្ជាប់ព័ត៌មានពីមូលដ្ឋានទៅកាន់សាធារណជន។ ការពង្រឹងវត្តមានព័ត៌មាននៅលើប្រព័ន្ធអនឡាញ ក៏នឹងរួមចំណែកដល់ការផ្តល់ព័ត៌មានផ្លូវការដែលមានភាពទាន់ពេលវេលា ច្បាស់លាស់ និងងាយស្រួលសម្រាប់សាធារណជន។
ការបង្កើតវេទិកាឌីជីថលសម្រាប់មន្ទីរព័ត៌មានរាជធានី-ខេត្ត ក៏បង្ហាញពីការសម្របខ្លួនរបស់វិស័យព័ត៌មានទៅនឹងការរីកចម្រើននៃបច្ចេកវិទ្យា និងការផ្លាស់ប្តូររបៀបទទួលព័ត៌មានរបស់សាធារណជន ដែលកាន់តែពឹងផ្អែកលើប្រព័ន្ធអនឡាញ និងបណ្តាញឌីជីថល។
ជាមួយគ្នានេះ ការដាក់ឱ្យដំណើរការគេហទំព័រនេះ ក៏ជាលទ្ធផលនៃកិច្ចសហការរវាងក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍ ក្នុងការប្រើប្រាស់ហេដ្ឋារចនាសម្ព័ន្ធ និងបច្ចេកវិទ្យាឌីជីថល ដើម្បីគាំទ្រដល់ការអភិវឌ្ឍប្រព័ន្ធព័ត៌មាននៅថ្នាក់មូលដ្ឋាន និងបង្កើនប្រសិទ្ធភាពការងារក្នុងវិស័យព័ត៌មាន៕
អត្ថបទ៖ ឆដា, រូបភាព៖ អ៊ីនធឺណិត
