តាមដានជាមួយយើង៖ Million Times

ភ្នំពេញ៖ ទីផ្សារដីធ្លីនៅរាជធានីភ្នំពេញ មិនមែនបាត់បង់តម្រូវការទាំងស្រុងនោះទេ ប៉ុន្តែភាពស្ងប់ស្ងាត់នៃការទិញលក់នាពេលបច្ចុប្បន្ន គឺបណ្តាលមកពីគម្លាតតម្លៃរវាងអ្នកលក់ និងអ្នកទិញ ដែលមិនទាន់អាចឈានដល់ការព្រមព្រៀងគ្នាបាន។ នេះបើតាមការលើកឡើងរបស់អ្នកឧកញ៉ាបណ្ឌិត សំ សុខនឿន ប្រធានសម្ព័ន្ធក្រុមហ៊ុន SAM SN Group និងជាអ្នកជំនាញក្នុងវិស័យអចលនទ្រព្យដែលមានបទពិសោធន៍យូរឆ្នាំ។

អ្នកឧកញ៉ាបណ្ឌិត សំ សុខនឿន បានលើកឡើងថា បច្ចុប្បន្ននេះ មានមតិពីរផ្ទុយគ្នានៅក្នុងទីផ្សារអចលនទ្រព្យ ដោយអ្នកខ្លះយល់ថា ដីនៅភ្នំពេញលក់មិនចេញ និងគ្មានទីផ្សារ ខណៈអ្នកទិញវិញក៏ពិបាករកដីដែលមានតម្លៃទាបជាងទីផ្សារ ៤០% ទៅ ៥០% ផងដែរ។ ប៉ុន្តែតាមការយល់ឃើញរបស់អ្នកឧកញ៉ាបណ្ឌិត បញ្ហានេះមិនមែនដោយសារគ្មានទីផ្សារនោះទេ គឺដោយសារតម្លៃដែលអ្នកលក់ចង់បាន និងតម្លៃដែលអ្នកទិញចង់ទិញនៅមានគម្លាតឆ្ងាយពីគ្នា។

អ្នកជំនាញរូបនេះបានពន្យល់ថា មូលហេតុទីមួយ គឺម្ចាស់ដីភាគច្រើននៅតែចង់លក់ក្នុងតម្លៃចាស់ ដែលពួកគេធ្លាប់ទិញ ឬតម្លៃដែលធ្លាប់ឃើញដីនៅក្បែរនោះត្រូវបានលក់ក្នុងតម្លៃខ្ពស់។ ដូច្នេះ ប្រសិនបើម្ចាស់ដីមិនមានតម្រូវការសាច់ប្រាក់បន្ទាន់ទេ ពួកគេមិនសូវមានឆន្ទៈក្នុងការបញ្ចុះតម្លៃនោះឡើយ។

ផ្ទុយទៅវិញ អ្នកទិញបច្ចុប្បន្នមានការប្រុងប្រយ័ត្នខ្ពស់ចំពោះការវិនិយោគ ដោយបារម្ភពីស្ថានភាពសេដ្ឋកិច្ច ហានិភ័យនៃការលក់ចេញវិញ និងលទ្ធភាពខាតបង់។ ហេតុនេះ ពួកគេច្រើនចង់ទិញក្នុងតម្លៃទាបជាងទីផ្សារច្រើន ដើម្បីទុកចន្លោះសម្រាប់ប្រាក់ចំណេញ និងកាត់បន្ថយហានិភ័យនៃការវិនិយោគ។

មូលហេតុមួយទៀត គឺការរឹតបន្តឹងឥណទាន ដែលជះឥទ្ធិពលដល់លទ្ធភាពទិញដីរបស់ប្រជាពលរដ្ឋ។ អ្នកឧកញ៉ាបណ្ឌិត សំ សុខនឿន បានលើកឡើងថា អ្នកទិញដីមួយចំនួនពឹងផ្អែកលើកម្ចីពីធនាគារ។ នៅពេលការផ្តល់ឥណទានមានភាពតឹងរ៉ឹង អ្នកទិញក៏មានការថយចុះ ខណៈអ្នកដែលមិនមានសាច់ប្រាក់សុទ្ធគ្រប់គ្រាន់ ក៏មិនអាចសម្រេចចិត្តទិញបានដែរ ដែលធ្វើឱ្យសកម្មភាពទិញលក់ក្នុងទីផ្សារមានភាពស្ងប់ស្ងាត់។

ទោះជាយ៉ាងណា អ្នកឧកញ៉ាបណ្ឌិត បានបញ្ជាក់ថា ដីដែលមានទីតាំងល្អក្នុងក្រុង មានបណ្ណកម្មសិទ្ធិស្របច្បាប់ ផ្លូវធ្វើដំណើរងាយស្រួល និងនៅជិតផ្សារ សាលារៀន ឬមន្ទីរពេទ្យ នៅតែមានតម្រូវការពីអ្នកទិញ។ ដោយសារម្ចាស់ដីដឹងពីតម្លៃ និងអត្ថប្រយោជន៍នៃទីតាំងរបស់ខ្លួន ដីប្រភេទនេះមិនងាយត្រូវបានបញ្ចុះតម្លៃពី ៤០% ទៅ ៥០% ដូចការរំពឹងទុករបស់អ្នកទិញនោះទេ។

ចំណែកដីដែលស្ថិតនៅឆ្ងាយពីក្រុង មានផ្លូវធ្វើដំណើរមិនសូវល្អ មិនទាន់មានអ្នករស់នៅច្រើន ឬមានបញ្ហាភាពមិនច្បាស់លាស់លើបណ្ណកម្មសិទ្ធិ ជាប្រភេទដីដែលប្រឈមការលំបាកក្នុងការលក់ចេញ។ ក្នុងករណីម្ចាស់ដីត្រូវការសាច់ប្រាក់ ពួកគេអាចមានឆន្ទៈបញ្ចុះតម្លៃច្រើនជាងដីដែលមានទីតាំង និងឯកសារកម្មសិទ្ធិល្អ។

បន្ថែមពីនេះ កត្តាចិត្តវិទ្យាទីផ្សារក៏ជាផ្នែកមួយដែលធ្វើឱ្យការទិញលក់ដីមិនសូវមានសកម្មភាពផងដែរ។ អ្នកលក់រង់ចាំឱ្យទីផ្សារងើបឡើងវិញ ដើម្បីលក់ក្នុងតម្លៃដែលខ្លួនចង់បាន ខណៈអ្នកទិញវិញរង់ចាំឱ្យតម្លៃធ្លាក់ចុះបន្ថែម មុននឹងសម្រេចចិត្តទិញ។ ការរង់ចាំរបស់ភាគីទាំងពីរនេះ ធ្វើឱ្យទីផ្សារមើលទៅស្ងប់ស្ងាត់ ប៉ុន្តែមិនមានន័យថាទីផ្សារបានបាត់បង់សកម្មភាពទាំងស្រុងនោះទេ។

អ្នកឧកញ៉ាបណ្ឌិត សំ សុខនឿន បានសន្និដ្ឋានថា ទីផ្សារដីធ្លីនៅភ្នំពេញកំពុងស្ថិតក្នុងដំណាក់កាលរង់ចាំការសម្របសម្រួលតម្លៃរវាងអ្នកលក់ និងអ្នកទិញ។ ដរាបណាអ្នកលក់នៅតែចង់បានតម្លៃខ្ពស់ ហើយអ្នកទិញនៅតែចង់ទិញក្នុងតម្លៃទាបខ្លាំង ការទិញលក់ក៏ពិបាកនឹងកើតឡើង។

ដូច្នេះ បញ្ហាសំខាន់មិនមែនថា ដីនៅភ្នំពេញគ្មានទីផ្សារនោះទេ ប៉ុន្តែជាការមិនទាន់ជួបគ្នានៃការរំពឹងទុកលើតម្លៃរបស់អ្នកលក់ និងអ្នកទិញ ដែលជាកត្តាធ្វើឱ្យទីផ្សារអចលនទ្រព្យមើលទៅមានភាពស្ងប់ស្ងាត់នាពេលបច្ចុប្បន្ន៕

អត្ថបទ៖ ប៊ី

second...

x

The post អ្នកជំនាញ៖ វិស័យដីធ្លីភ្នំពេញមិនមែនអត់ទីផ្សារទេ តែអ្នកលក់ និងអ្នកទិញកំពុងរង់ចាំគ្នា appeared first on Millions times.

តាមដានជាមួយយើង៖ Million Times

សៀមរាប៖ ក្រុមហ៊ុនជាង ១០០ ក្នុងវិស័យទេសចរណ៍ បាននាំយកឱកាសការងារ និងកម្មសិក្សាជាង ៥,០០០ កន្លែង មកផ្តល់ជូនយុវជន និងអ្នកស្វែងរកការងារនៅកម្ពុជា តាមរយៈ «វេទិកាផ្គូផ្គងឱកាសការងារក្នុងវិស័យទេសចរណ៍ ឆ្នាំ២០២៦» ដែលរំពឹងថានឹងមានអ្នកចូលរួមដាក់ពាក្យ និងសម្ភាសន៍ការងារដោយផ្ទាល់ប្រមាណ ៣,០០០ នាក់។

វេទិកានេះត្រូវបានរៀបចំឡើងជាលើកដំបូង ដោយមានឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍ អញ្ជើញជាអធិបតីក្នុងពិធីបើក កាលពីថ្ងៃទី៣០ ខែតុលា ឆ្នាំ២០២៦ នៅសាលាសណ្ឋាគារ និងទេសចរណ៍ ប៉ូលឌុយប្រ៊ូល ខេត្តសៀមរាប។

ពិធីនេះមានការចូលរួមពីឯកឧត្តម ង៉ូវ សេងកាក់ អភិបាលរងនៃគណៈអភិបាលខេត្តសៀមរាប លោក François Schnoebelen នាយកសាលាសណ្ឋាគារ និងទេសចរណ៍ ប៉ូលឌុយប្រ៊ូល តំណាងក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ ប្រតិបត្តិករទេសចរណ៍ សមាគមទេសចរណ៍ គ្រឹះស្ថានបណ្តុះបណ្តាល និងអ្នកស្វែងរកការងារប្រមាណ ៤០០ នាក់។

ថ្លែងក្នុងពិធីនេះ ឯកឧត្តម ហួត ហាក់ បានសម្តែងការកោតសរសើរ និងថ្លែងអំណរគុណចំពោះក្រសួង ស្ថាប័នពាក់ព័ន្ធ ដៃគូអភិវឌ្ឍន៍ សមាគមទេសចរណ៍ គ្រឹះស្ថានបណ្តុះបណ្តាល និងវិស័យឯកជន ដែលបានសហការរៀបចំវេទិកា ព្រមទាំងចូលរួមបណ្តុះបណ្តាល និងអភិវឌ្ឍធនធានមនុស្សក្នុងវិស័យទេសចរណ៍។

ឯកឧត្តមរដ្ឋមន្ត្រីបានបញ្ជាក់ថា វេទិកានេះមានសារៈសំខាន់ក្នុងការភ្ជាប់ការបណ្តុះបណ្តាលជំនាញវិជ្ជាជីវៈទៅនឹងតម្រូវការជាក់ស្តែងរបស់ទីផ្សារការងារ ព្រមទាំងបង្កើតឱកាសឱ្យអ្នកស្វែងរកការងារបានជួប និងទំនាក់ទំនងដោយផ្ទាល់ជាមួយនិយោជក ដើម្បីទទួលបានការងារដែលសមស្របនឹងជំនាញ និងសមត្ថភាពរបស់ខ្លួន។

ឯកឧត្តមបានសង្កត់ធ្ងន់ថា ការអភិវឌ្ឍជំនាញមិនគួរបញ្ចប់ត្រឹមវគ្គបណ្តុះបណ្តាលនោះទេ ប៉ុន្តែត្រូវជំរុញវប្បធម៌សិក្សាពេញមួយជីវិត និងការបណ្តុះបណ្តាលបន្ថែម ដើម្បីឱ្យអ្នកជំនាញអាចបន្តពង្រឹងសមត្ថភាព ស្របតាមការវិវត្តនៃឧស្សាហកម្មទេសចរណ៍។

ជាមួយគ្នានេះ ឯកឧត្តមបានលើកឡើងថា ការអភិវឌ្ឍធនធានមនុស្ស គឺជាអាទិភាពសំខាន់ក្នុងការលើកកម្ពស់គុណភាពវិស័យទេសចរណ៍ ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល ដែលបានកំណត់មនុស្សជាអាទិភាពទី១ ដើម្បីកសាងធនធានមនុស្សប្រកបដោយជំនាញ សមត្ថភាពប្រកួតប្រជែង សីលធម៌ និងគុណធម៌។

បច្ចុប្បន្ន ក្រសួងទេសចរណ៍កំពុងជំរុញការភ្ជាប់កម្មវិធីបណ្តុះបណ្តាល HoKa ទៅនឹងក្របខ័ណ្ឌគុណវុឌ្ឍិជាតិកម្ពុជា ដើម្បីឱ្យជំនាញ និងបទពិសោធការងារទទួលបានការទទួលស្គាល់ជាផ្លូវការ ព្រមទាំងបង្កើតគន្លងអាជីពកាន់តែច្បាស់លាស់សម្រាប់អ្នកជំនាញទេសចរណ៍។

បន្ថែមពីនេះ ឯកឧត្តមរដ្ឋមន្ត្រីបានណែនាំឱ្យគ្រប់ភាគីពាក់ព័ន្ធបន្តពង្រឹងកិច្ចសហការលើការបណ្តុះបណ្តាលជំនាញវិជ្ជាជីវៈ និងពង្រីកវេទិកាផ្គូផ្គងការងារទៅកាន់តំបន់ទេសចរណ៍សំខាន់ៗផ្សេងទៀត ដូចជារាជធានីភ្នំពេញ និងតំបន់ឆ្នេរសមុទ្រ។ ទន្ទឹមនឹងនេះ ក៏ត្រូវជំរុញការប្រើប្រាស់ប្រព័ន្ធចុះបញ្ជីអ្នកជំនាញទេសចរណ៍ (CTPRS) និងយន្តការវាយតម្លៃការសិក្សាពីមុន (RPL) ដើម្បីជួយឱ្យអ្នកជំនាញទទួលបានគុណវុឌ្ឍិស្របតាមស្តង់ដាជាតិ និងអាស៊ាន។

គួរបញ្ជាក់ថា សាលាសណ្ឋាគារ និងទេសចរណ៍ ប៉ូលឌុយប្រ៊ូល ខេត្តសៀមរាប បានចូលរួមបណ្តុះបណ្តាល និងអភិវឌ្ឍធនធានមនុស្សក្នុងវិស័យទេសចរណ៍នៅកម្ពុជាចាប់តាំងពីឆ្នាំ២០០២ ដោយសហការជាមួយក្រសួងទេសចរណ៍ និងផ្តល់ការបណ្តុះបណ្តាលស្របតាមស្តង់ដាអាស៊ាន។ គិតមកដល់បច្ចុប្បន្ន សាលានេះបានបណ្តុះបណ្តាលអ្នកជំនាញទេសចរណ៍ជាង ៦,០០០ នាក់៕

អត្ថបទ៖ ប៊ី

second...

x

The post ក្រុមហ៊ុនជាង ១០០ ផ្តល់ឱកាសការងារ និងកម្មសិក្សាជាង ៥,០០០ កន្លែង ក្នុងវិស័យទេសចរណ៍ appeared first on Millions times.

តាមដានជាមួយយើង៖ Million Times

ភ្នំពេញ៖ អ្នកឧកញ៉ាបណ្ឌិត សំ សុខនឿន ប្រធានសម្ព័ន្ធក្រុមហ៊ុន SAM SN Group និងជាអ្នកជំនាញក្នុងវិស័យអចលនទ្រព្យដែលមានបទពិសោធន៍យូរឆ្នាំ បានលើកឡើងថា ឱកាសវិនិយោគនៅក្នុងវិស័យអចលនទ្រព្យកំពុងផ្លាស់ប្តូរពីទីផ្សារខុនដូទៅកាន់អចលនទ្រព្យឧស្សាហកម្ម ដោយសារតម្រូវការទីផ្សារមានភាពខុសគ្នា។

អ្នកឧកញ៉ា បានឱ្យដឹងថា នៅត្រីមាសទី៣ ឆ្នាំ២០២៦ តម្លៃលក់ខុនដូថ្នាក់ខ្ពស់នៅភ្នំពេញបានធ្លាក់ចុះ ៦.៧% ធៀបនឹងត្រីមាសមុន មកនៅត្រឹមតម្លៃមធ្យម ២,៥៩៩ ដុល្លារក្នុងមួយម៉ែត្រការ៉េ។ ចំណែកខុនដូតម្លៃមធ្យម និងសន្សំសំចៃ មានតម្លៃមធ្យម ២,០៤៥ ដុល្លារ និង ១,១១០ ដុល្លារក្នុងមួយម៉ែត្រការ៉េ រៀងគ្នា។

ផ្ទុយពីទីផ្សារខុនដូ តម្លៃជួលរោងចក្រស្តង់ដារបានកើនឡើងដល់ ២.៩០ ដុល្លារក្នុងមួយម៉ែត្រការ៉េក្នុងមួយខែ កើន ៣.៦% ធៀបនឹងត្រីមាសមុន។ តម្លៃដីនៅក្នុងតំបន់សេដ្ឋកិច្ចពិសេស (SEZ) ក៏បានកើនឡើង ១.៩៦% ផងដែរ។

តាមការពន្យល់របស់អ្នកឧកញ៉ាបណ្ឌិត សំ សុខនឿន ការធ្លាក់ថ្លៃខុនដូបណ្តាលមកពីការផ្គត់ផ្គង់លើសតម្រូវការ។ ចំនួនខុនដូនៅភ្នំពេញបានកើនពីប្រមាណ ២០,០០០ យូនីតទៅជាង ៦០,០០០ យូនីត ចាប់តាំងពីឆ្នាំ២០១៩ ដែលលើសពីតម្រូវការជាក់ស្តែងរបស់អ្នករស់នៅ។

ជាមួយគ្នានេះ ទុនវិនិយោគពីចិនបានដកខ្លួនវិញជិតពាក់កណ្តាល ខណៈកំណើនឥណទានធនាគារមានត្រឹម ៥.៦% ដែលធ្វើឱ្យអ្នកទិញមានការលំបាកក្នុងការទទួលបានហិរញ្ញប្បទាន។

ផ្ទុយទៅវិញ វិស័យឧស្សាហកម្មកំពុងទទួលបានការជំរុញពីការវិនិយោគផលិតកម្មសម្រាប់ការនាំចេញ ជាពិសេសឧស្សាហកម្មអេឡិចត្រូនិច និងការផ្គុំរថយន្ត។ ក្នុងរយៈពេល ៨ ខែដើមឆ្នាំ២០២៦ មានគម្រោងវិនិយោគដែលបានអនុម័តរហូតដល់ ៥.៤៥ ពាន់លានដុល្លារ។

ផ្ទៃដីតំបន់សេដ្ឋកិច្ចពិសេសត្រូវបានព្យាករណ៍ថានឹងកើនដល់ ២៣,៧០០ ហិកតា ក្នុងឆ្នាំ២០២៦ កើនឡើង ៤២% ធៀបនឹងឆ្នាំ២០២៣។ កំណើននេះបានបង្កើតតម្រូវការជាក់ស្តែងសម្រាប់រោងចក្រ និងដីឧស្សាហកម្ម។

ចំពោះវិនិយោគិន អ្នកឧកញ៉ាបណ្ឌិត សំ សុខនឿន បានណែនាំឱ្យមានការប្រុងប្រយ័ត្នចំពោះការទិញខុនដូដែលកំពុងប្រឈមបញ្ហា ដោយសារអ្នកអភិវឌ្ឍន៍មួយចំនួនបានព្រមបញ្ចុះតម្លៃរហូតដល់ ៥០% ដើម្បីលក់ចេញ ដែលអាចបង្កហានិភ័យសម្រាប់អ្នកទិញថ្មី។

អ្នកឧកញ៉ា បានចង្អុលបង្ហាញថា ជាជាងទិញខុនដូដើម្បីរង់ចាំការឡើងថ្លៃ វិនិយោគិនអាចពិចារណាលើការវិនិយោគក្នុងរោងចក្រសម្រេច ឬដីនៅក្នុងតំបន់សេដ្ឋកិច្ចពិសេស ដើម្បីជួលឱ្យក្រុមហ៊ុនផលិតកម្ម។

យោងតាមអ្នកឧកញ៉ា សំ សុខនឿន ការវិនិយោគលើអចលនទ្រព្យឧស្សាហកម្មបែបនេះមានសក្តានុពលបង្កើតប្រាក់ចំណូលជាក់ស្តែង ដោយសារមានតម្រូវការពីវិស័យផលិតកម្មនាំចេញ៕

អត្ថបទ៖ ប៊ី

second...

x

The post អ្នកឧកញ៉ា សំ សុខនឿន៖ ឱកាសវិនិយោគកំពុងផ្លាស់ពីខុនដូទៅអចលនទ្រព្យឧស្សាហកម្ម appeared first on Millions times.

តាមដានជាមួយយើង៖ Million Times

កណ្តាល៖ គម្រោងព្រែកជីកហ្វូណនតេជោ នឹងផ្តល់អត្ថប្រយោជន៍សេដ្ឋកិច្ច-សង្គមយ៉ាងធំធេងសម្រាប់ប្រទេសជាតិ ជាពិសេសការបង្កើនប្រសិទ្ធភាពដឹកជញ្ជូនតាមផ្លូវទឹក ការអភិវឌ្ឍប្រព័ន្ធធារាសាស្ត្រ និងការជំរុញការអភិវឌ្ឍតំបន់ជុំវិញឱ្យកាន់តែរីកចម្រើន។ នេះបើតាមការលើកឡើងរបស់ឯកឧត្តម គួច ចំរើន អភិបាលខេត្តកណ្តាល។

នាព្រឹកថ្ងៃទី៣០ ខែតុលា ឆ្នាំ២០២៦ ឯកឧត្តម គួច ចំរើន បានដឹកនាំប្រតិភូ និងក្រុមការងារជំនាញពាក់ព័ន្ធ ចុះពិនិត្យទីតាំងការដ្ឋានសាងសង់ព្រែកជីកហ្វូណនតេជោ ក្នុងភូមិសាស្ត្រស្រុកកោះធំ ខេត្តកណ្តាល ដើម្បីធានាឱ្យការអនុវត្តគម្រោងប្រព្រឹត្តទៅដោយរលូន មានប្រសិទ្ធភាព និងត្រឹមត្រូវតាមលក្ខណៈបច្ចេកទេស។

ក្នុងឱកាសនោះ ឯកឧត្តម គួច ចំរើន បានកោតសរសើរ និងវាយតម្លៃខ្ពស់ចំពោះក្រុមការងារបច្ចេកទេស ដែលបានខិតខំបំពេញភារកិច្ចយ៉ាងសកម្ម ដើម្បីធានាឱ្យដំណើរការសាងសង់ប្រព្រឹត្តទៅដោយរលូន និងទាន់ពេលវេលា។

ការចុះពិនិត្យនេះមានគោលបំណងសិក្សា និងវាយតម្លៃលើទិដ្ឋភាពបច្ចេកទេសជាក់ស្តែង ពិនិត្យតម្រាយផ្លូវជីកព្រែក និងហេដ្ឋារចនាសម្ព័ន្ធពាក់ព័ន្ធ ដើម្បីធានាថាការអនុវត្តស្របតាមផែនការមេដែលបានកំណត់ ព្រមទាំងកាត់បន្ថយផលប៉ះពាល់ផ្សេងៗឱ្យនៅកម្រិតអប្បបរមា។

ឯកឧត្តមក៏បានណែនាំដល់អាជ្ញាធរមូលដ្ឋានស្រុកកោះធំ ឱ្យបន្តសម្របសម្រួល និងសហការយ៉ាងជិតស្និទ្ធជាមួយក្រុមការងារសាងសង់ ដើម្បីដោះស្រាយបញ្ហាប្រឈមនានាឱ្យបានទាន់ពេលវេលា។

បន្ទាប់ពីបញ្ចប់ការចុះពិនិត្យការដ្ឋានក្នុងស្រុកកោះធំ ឯកឧត្តមអភិបាលខេត្ត និងប្រតិភូអមដំណើរ បានបន្តចុះទស្សនកិច្ចសិក្សាស្វែងយល់អំពីការអនុវត្តគម្រោងព្រែកជីកហ្វូណនតេជោ នៅក្នុងភូមិសាស្ត្រខេត្តតាកែវ។

ការចុះទស្សនកិច្ចនេះមានគោលបំណងសិក្សាឱ្យកាន់តែស៊ីជម្រៅអំពីបច្ចេកទេសសាងសង់ ការគ្រប់គ្រងប្រព័ន្ធផ្លូវទឹក ការត្រៀមរៀបចំបណ្តាញហេដ្ឋារចនាសម្ព័ន្ធតភ្ជាប់ និងការរៀបចំផែនការអភិវឌ្ឍន៍សេដ្ឋកិច្ច-សង្គមនៅតាមសងខាងផ្លូវទឹក ដើម្បីទាញយកផលប្រយោជន៍ឱ្យបានអតិបរមាជូនប្រជាពលរដ្ឋក្នុងខេត្តកណ្តាល។

ឯកឧត្តម គួច ចំរើន បានសង្កត់ធ្ងន់ថា គម្រោងព្រែកជីកហ្វូណនតេជោ នឹងផ្តល់អត្ថប្រយោជន៍សេដ្ឋកិច្ច-សង្គមយ៉ាងធំធេងសម្រាប់ប្រទេសជាតិ ជាពិសេសការបង្កើនប្រសិទ្ធភាពដឹកជញ្ជូនតាមផ្លូវទឹក ប្រព័ន្ធធារាសាស្ត្រ និងការអភិវឌ្ឍតំបន់ជុំវិញឱ្យកាន់តែរីកចម្រើន។

លោកក៏បានកោតសរសើរដល់ក្រុមការងារបច្ចេកទេស អាជ្ញាធរដែនដីគ្រប់លំដាប់ថ្នាក់ និងប្រជាពលរដ្ឋ ដែលបានចូលរួមសហការយ៉ាងសកម្ម និងគាំទ្រដល់ការអនុវត្តគម្រោងនេះ។

គម្រោងព្រែកជីកហ្វូណនតេជោ គឺជាគម្រោងផ្លូវទឹកប្រវត្តិសាស្ត្រដំបូងគេនៅកម្ពុជា ដែលភ្ជាប់ប្រព័ន្ធទន្លេបាសាក់ទៅកាន់ឆ្នេរសមុទ្រខេត្តកែប។ គម្រោងនេះត្រូវបានរំពឹងថានឹងផ្តល់ផលប្រយោជន៍ដល់សេដ្ឋកិច្ចជាតិ ជាពិសេសការដឹកជញ្ជូនតាមផ្លូវទឹក ការកាត់បន្ថយថ្លៃដើមដឹកជញ្ជូន វិស័យកសិកម្ម ធារាសាស្ត្រ ការគ្រប់គ្រងទឹកជំនន់ និងការលើកកម្ពស់ជីវភាពរស់នៅរបស់ប្រជាពលរដ្ឋនៅតាមដងទន្លេ។

គម្រោងនេះមានប្រវែង ១៨០ គីឡូម៉ែត្រ ចាប់ផ្តើមពីចំណុចព្រែកតាកែវនៃទន្លេមេគង្គ ឆ្លងកាត់ព្រែកតាឯកនៃទន្លេបាសាក់ និងព្រែកតាហ៊ីងនៃទន្លេបាសាក់ក្នុងស្រុកកោះធំ រហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន កណ្តាល តាកែវ កំពត និងកែប។

ផ្លូវទឹកនេះមានទទឹងមុខកាត់ផ្នែកខាងលើ ១០០ម៉ែត្រ និងផ្នែកខាងក្រោមប្រមាណ ៨០ម៉ែត្រ ជម្រៅទឹកប្រមាណ ៥,៤ម៉ែត្រ ក្នុងនោះជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ។ គម្រោងនេះមានគន្លងនាវាចរណ៍ចំនួន២ ដែលអាចឱ្យនាវាចេញ-ចូល និងចៀសគ្នាបាន។

គម្រោងព្រែកជីកហ្វូណនតេជោ ត្រូវបានគ្រោងចំណាយទុនវិនិយោគចំនួន ១,៧ ពាន់លានដុល្លារ ក្នុងទម្រង់វិនិយោគ BOT រួមគ្នារវាងក្រុមហ៊ុនខ្មែរ ដែលកាន់កាប់ទុនវិនិយោគ ៥១% និងក្រុមហ៊ុនចិន CRBC ដែលកាន់កាប់ ៤៩% ហើយគ្រោងបញ្ចប់ការសាងសង់នៅឆ្នាំ២០២៨៕

អត្ថបទ៖ ប៊ី

second...

x

The post ព្រែកជីកហ្វូណនតេជោ នឹងផ្តល់អត្ថប្រយោជន៍ធំធេងដល់ការដឹកជញ្ជូន ធារាសាស្ត្រ និងតំបន់ជុំវិញ appeared first on Millions times.

តាមដានជាមួយយើង៖ Million Times

ភ្នំពេញ៖ ក្រុមហ៊ុនកម្ពុជា និងវៀតណាម បានចុះហត្ថលេខាលើអនុស្សរណៈនៃការយោគយល់គ្នា (MOU) ស្តីពីកិច្ចសហប្រតិបត្តិការផ្គត់ផ្គង់ដំឡូងមីក្រៀម និងពោតក្នុងបរិមាណសរុប ៤០ ម៉ឺនតោន ក្នុងរយៈពេល ២ឆ្នាំ ដោយមានតំណាងធនាគារអភិវឌ្ឍន៍ជនបទ និងកសិកម្ម (ARDB) ចូលរួមជាគណៈធិបតី និងជាសាក្សី។

ពិធីចុះហត្ថលេខានេះធ្វើឡើងនៅសណ្ឋាគារ Daewoo Hotel ទីក្រុងហាណូយ ប្រទេសវៀតណាម កាលពីថ្ងៃទី២៩ ខែតុលា ឆ្នាំ២០២៦ រវាងក្រុមហ៊ុន HANG HARVEST AGRICULTURE CO., LTD និងក្រុមហ៊ុន VIETNAM GREENHOUSE MTV COMPANY LIMITED ដោយមានការចូលរួមពីភាគីពាក់ព័ន្ធ និងភ្ញៀវកិត្តិយសជាច្រើនរូប។

ដោយទទួលបានការអនុញ្ញាតពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ARDB ឯកឧត្តម ចាន់ សីហា អគ្គនាយករង ARDB រួមជាមួយសហការី បានអញ្ជើញចូលរួមក្នុងពិធីចុះហត្ថលេខានេះ។

កិច្ចសហប្រតិបត្តិការនេះ ត្រូវបានចាត់ទុកថាមានសារៈសំខាន់សម្រាប់ការពង្រីកទីផ្សារនាំចេញដំឡូងមី និងពោតរបស់កម្ពុជា ព្រមទាំងការពង្រីកខ្សែចង្វាក់ផលិតកម្មកសិកម្ម និងបង្កើនទីផ្សារប្រកបដោយស្ថិរភាពសម្រាប់ប្រជាកសិករ។

តាម ARDB កិច្ចសហការនេះក៏នឹងរួមចំណែកលើកកម្ពស់ប្រាក់ចំណូល និងជីវភាពរបស់កសិករ គាំទ្រដល់ការអភិវឌ្ឍវិស័យកសិកម្ម និងកំណើនសេដ្ឋកិច្ចជាតិ ព្រមទាំងពង្រឹងទំនាក់ទំនងពាណិជ្ជកម្មរវាងកម្ពុជា និងវៀតណាម។

ជាមួយគ្នានេះ កិច្ចព្រមព្រៀងនេះត្រូវបានមើលឃើញថា ជាមូលដ្ឋានសម្រាប់ការពង្រីកកិច្ចសហការក្នុងវិស័យកសិកម្មរវាងប្រទេសទាំងពីរនាពេលអនាគត។

ក្នុងនាមជាធនាគារដែលមានតួនាទីគាំទ្រដល់ការអភិវឌ្ឍវិស័យកសិកម្ម ARDB បញ្ជាក់ថា ខ្លួននឹងបន្តយកចិត្តទុកដាក់លើការជំរុញការតភ្ជាប់រវាងអ្នកផលិត អ្នកផ្គត់ផ្គង់ និងទីផ្សារ ដើម្បីរួមចំណែកលើកកម្ពស់សមត្ថភាពប្រកួតប្រជែងរបស់ផលិតផលកសិកម្មកម្ពុជា និងជំរុញការអភិវឌ្ឍប្រកបដោយចីរភាព៕

អត្ថបទ៖ ប៊ី

second...

x

The post កម្ពុជាចុះ MOU ផ្គត់ផ្គង់ដំឡូងមីក្រៀម និងពោត ៤០ ម៉ឺនតោន ទៅវៀតណាម ក្នុងរយៈពេល ២ឆ្នាំ appeared first on Millions times.

តាមដានជាមួយយើង៖ Million Times

ភ្នំពេញ៖ កម្ពុជាបានស្នើឱ្យរដ្ឋាភិបាលអាល្លឺម៉ង់បន្តគាំទ្រវិស័យអាទិភាព និងជួយសម្របសម្រួលទាក់ទាញវិនិយោគិនអាល្លឺម៉ង់ និងអឺរ៉ុបឱ្យមកបណ្តាក់ទុននៅកម្ពុជាបន្ថែមទៀត ដើម្បីជំរុញកំណើនសេដ្ឋកិច្ច និងគាំទ្រគោលដៅចាកចេញពីប្រទេសដែលមានការអភិវឌ្ឍតិចតួចនៅឆ្នាំ២០២៩។

ការស្នើនេះធ្វើឡើងក្នុងជំនួបសម្តែងការគួរសម និងពិភាក្សាការងាររវាងឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកជំទាវ Silke Röfer ឯកអគ្គរដ្ឋទូតវិសាមញ្ញ និងពេញសមត្ថភាពថ្មីនៃសាធារណរដ្ឋសហព័ន្ធអាល្លឺម៉ង់ប្រចាំកម្ពុជា នៅទីស្តីការក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២៧ ខែតុលា ឆ្នាំ២០២៦ ក្នុងឱកាសដែលលោកជំទាវចាប់ផ្តើមបំពេញបេសកកម្មការទូតនៅកម្ពុជា។

ក្នុងជំនួបនេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានសម្តែងការស្វាគមន៍ និងអបអរសាទរចំពោះលោកជំទាវ Silke Röfer ដែលទទួលបានការតែងតាំងជាឯកអគ្គរដ្ឋទូតថ្មីប្រចាំកម្ពុជា ព្រមទាំងបានវាយតម្លៃខ្ពស់ចំពោះកិច្ចសហប្រតិបត្តិការកម្ពុជា-អាល្លឺម៉ង់ ដែលបានរួមចំណែកដល់ការអភិវឌ្ឍសង្គម និងសេដ្ឋកិច្ចកម្ពុជាកន្លងមក។

ជាក់ស្តែង ក្នុងរយៈពេលជាង ៣០ឆ្នាំមកនេះ អាល្លឺម៉ង់បានផ្តល់ហិរញ្ញប្បទានសហប្រតិបត្តិការដល់កម្ពុជាសរុបប្រមាណ ៨៨៧លានដុល្លារអាម៉េរិក តាមរយៈធនាគារអភិវឌ្ឍន៍អាល្លឺម៉ង់ (KfW) និងទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ)។ ក្នុងនោះ ហិរញ្ញប្បទានឥតសំណង និងជំនួយបច្ចេកទេសមានចំនួន ៧៦២លានដុល្លារអាម៉េរិក ខណៈឥណទានសម្បទានមានចំនួន ១២៥លានដុល្លារអាម៉េរិក។

ហិរញ្ញប្បទាននេះបានគ្របដណ្តប់លើវិស័យសំខាន់ៗជាច្រើន រួមមាន សេដ្ឋកិច្ច ពាណិជ្ជកម្ម អប់រំ អភិវឌ្ឍន៍ជនបទ ថាមពល សុខាភិបាល គាំពារសង្គម ការដោះមីន និងយុទ្ធភណ្ឌមិនទាន់ផ្ទុះ វាយនភណ្ឌ និងអភិបាលកិច្ច។

ឯកឧត្តមឧបនាយករដ្ឋមន្ត្រីបានគូសបញ្ជាក់ថា ដើម្បីសម្រេចគោលដៅចាកចេញពីប្រទេសដែលមានការអភិវឌ្ឍតិចតួចនៅឆ្នាំ២០២៩ កម្ពុជាចាំបាច់ត្រូវរក្សាកំណើនសេដ្ឋកិច្ចខ្ពស់ និងស្ថិរភាពម៉ាក្រូសេដ្ឋកិច្ច តាមរយៈការបន្តកែទម្រង់ហិរញ្ញវត្ថុសាធារណៈ ការគ្រប់គ្រងបំណុលសាធារណៈ ការបង្កើនមូលធនក្នុងស្រុក និងការដាក់ចេញគោលនយោបាយលើកទឹកចិត្តការវិនិយោគ។

ជាពិសេស កម្ពុជាត្រូវការទាញយកសក្តានុពលមូលធនឯកជនពីវិនិយោគិនបរទេស និងដៃគូវិនិយោគ ដើម្បីបង្កើនសកម្មភាពវិនិយោគនៅក្នុងទីផ្សារកម្ពុជា ព្រមទាំងបន្តអនុវត្តកម្មវិធីកែទម្រង់អាទិភាពផ្សេងៗទៀត។ ក្នុងន័យនេះ ឯកឧត្តមអគ្គបណ្ឌិតសភាចារ្យបានស្នើឱ្យរដ្ឋាភិបាលអាល្លឺម៉ង់បន្តផ្តល់ការគាំទ្រលើវិស័យអាទិភាពរបស់កម្ពុជា និងជួយសម្របសម្រួលទាក់ទាញវិនិយោគិនអាល្លឺម៉ង់ និងអឺរ៉ុបឱ្យមកវិនិយោគនៅកម្ពុជាកាន់តែច្រើន។

ជាការឆ្លើយតប លោកជំទាវ Silke Röfer បានថ្លែងអំណរគុណចំពោះឯកឧត្តមឧបនាយករដ្ឋមន្ត្រីដែលបានអនុញ្ញាតឱ្យលោកជំទាវ និងសហការីចូលជួបសម្តែងការគួរសម និងពិភាក្សាការងារ។ លោកជំទាវបានវាយតម្លៃខ្ពស់ចំពោះវឌ្ឍនភាពនៃកិច្ចសហប្រតិបត្តិការរវាងប្រទេសទាំងពីរ និងសមិទ្ធផលរបស់រាជរដ្ឋាភិបាលកម្ពុជាក្នុងការគ្រប់គ្រងសេដ្ឋកិច្ច និងហិរញ្ញវត្ថុសាធារណៈ។

លោកជំទាវបានបញ្ជាក់ពីការប្តេជ្ញាចិត្តរបស់អាល្លឺម៉ង់ក្នុងការបន្តគាំទ្រការអភិវឌ្ឍសង្គម និងសេដ្ឋកិច្ចកម្ពុជា តាមរយៈ KfW និង GIZ ស្របតាមវិស័យអាទិភាពរបស់រាជរដ្ឋាភិបាល ព្រមទាំងបានលើកឡើងពីចំណាប់អារម្មណ៍របស់វិស័យឯកជនអាល្លឺម៉ង់ក្នុងការស្វែងរកឱកាសវិនិយោគនៅកម្ពុជា ជាពិសេសក្នុងវិស័យដែលមានសក្តានុពល។

ជាចុងក្រោយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងអំណរគុណចំពោះរដ្ឋាភិបាល និងប្រជាជនអាល្លឺម៉ង់ ដែលបាននិងកំពុងបន្តផ្តល់ការគាំទ្រដល់ការអភិវឌ្ឍសេដ្ឋកិច្ច និងសង្គមកម្ពុជា ព្រមទាំងបានជូនពរលោកជំទាវឯកអគ្គរដ្ឋទូតឱ្យទទួលបានជោគជ័យក្នុងការបំពេញបេសកកម្មការទូតនៅកម្ពុជា៕

អត្ថបទ៖ ប៊ី

second...

x

The post កម្ពុជាស្នើអាល្លឺម៉ង់ជួយទាក់ទាញវិនិយោគិនអាល្លឺម៉ង់ និងអឺរ៉ុបមកវិនិយោគនៅកម្ពុជា appeared first on Millions times.

ធនាគារជាតិនៃកម្ពុជា ត្រៀមពង្រីកការតភ្ជាប់ប្រព័ន្ធបាគង (Bakong) សម្រាប់​ការ​ទូទាត់​ឆ្លងដែន ទៅកាន់​ប្រទេស​ឥណ្ឌូណេស៊ី ហ្វីលីពីន និង​រវ៉ាន់ដា នា​ពេលខាងមុខ បន្ទាប់ពី​សម្រេច​បាន​ការ​តភ្ជាប់​ជាមួយ​ប្រទេស​ ៩ រួច​មក។

តាមដានជាមួយយើង៖ Million Times

ការពង្រីកនេះ គឺជាការបោះជំហានថ្មីក្នុងការពង្រីកបណ្តាញទូទាត់អន្តរជាតិ និង​ពង្រឹង​ការ​តភ្ជាប់​ហិរញ្ញវត្ថុ​កម្ពុជា ជាមួយ​បណ្តា​ប្រទេស​ក្នុង​តំបន់ និង​ពិភពលោក។ បច្ចុប្បន្ន តាមរយៈប្រព័ន្ធបាគង កម្ពុជា​បាន​សម្រេច​ការ​តភ្ជាប់ការទូទាត់ឆ្លងដែនជាមួយប្រទេសចិន ឥណ្ឌា ជប៉ុន ឡាវ ម៉ាឡេស៊ី សិង្ហបុរី កូរ៉េខាងត្បូង ថៃ និង​វៀតណាម។

ការតភ្ជាប់នេះអនុញ្ញាត​ឲ្យ​អាជីវករ និងពាណិជ្ជករជាង ២៥០ លាន​នាក់​នៅ​ទូទាំង​តំបន់ អាច​ទទួល​ការ​ទូទាត់​សង​ប្រាក់​តាមរយៈប្រព័ន្ធបាគងបានយ៉ាងទូលំទូលាយ។ ការ​ពង្រីក​បណ្ដាញ​ទៅ​កាន់​ឥណ្ឌូណេស៊ី ហ្វីលីពីន និងរវ៉ាន់ដា នឹង​ក្លាយ​ជា​ការ​បោះជំហាន​បន្ថែម​ទៀត​ក្នុង​ការ​ពង្រឹង​កិច្ច​សហប្រតិបត្តិការ​ផ្នែក​ហិរញ្ញវត្ថុ​ឆ្លងដែន និង​បង្កើន​ភាព​ងាយ​ស្រួល​ក្នុង​ការ​ទូទាត់​ប្រាក់​សម្រាប់​ប្រជាពលរដ្ឋ អាជីវករ និង​ធុរជន​រវាង​ប្រទេស​ទាំងនេះ។

សមិទ្ធផល​នៃ​ការ​អភិវឌ្ឍ​ប្រព័ន្ធ​ទូទាត់​របស់​កម្ពុជា​នេះ ក៏​នឹង​ក្លាយ​ជា​ប្រធាន​បទ​សំខាន់​មួយ​នៅ​ក្នុង​វេទិកា​ហិរញ្ញវត្ថុ​អន្តរជាតិ Black Swan Summit ដែលនឹងរៀបចំឡើងនៅរាជធានីភ្នំពេញ នាថ្ងៃទី១៥-១៦ ខែ​វិច្ឆិកា ឆ្នាំ២០២៦ ស្របពេលជាមួយកិច្ចប្រជុំកំពូលហ្វ្រង់កូហ្វូនី។

វេទិកានេះនឹងមានការចូលរួមពីទេសាភិបាលធនាគារកណ្តាល អ្នក​បង្កើត​នវានុវត្តន៍​បច្ចេកវិទ្យា​ហិរញ្ញវត្ថុ និងថ្នាក់ដឹកនាំមកពីតំបន់អាស៊ាន និងបណ្តាប្រទេសប្រើប្រាស់ភាសាបារាំង ដើម្បីពិភាក្សា និងចែករំលែកបទពិសោធលើការអភិវឌ្ឍប្រព័ន្ធទូទាត់ និងការតភ្ជាប់ហិរញ្ញវត្ថុឆ្លងដែន។

វេទិកា​អន្តរជាតិ​នេះ​នឹងផ្តោតលើប្រធានបទសំខាន់ ៤ រួមមាន ការ​តភ្ជាប់​ប្រព័ន្ធ​ទូទាត់​សង​ប្រាក់​ឆ្លងដែន​តាម​ច្រក​របៀង​សេដ្ឋកិច្ច ការ​ប្រែ​ក្លាយ​នវានុវត្តន៍​ហិរញ្ញវត្ថុ​ពី​ការ​សាកល្បង​ទៅ​ជា​ហេដ្ឋារចនា​សម្ព័ន្ធ​ផ្លូវការ ការ​បង្កើន​ប្រសិទ្ធភាពនៃប្រព័ន្ធទូទាត់ឆ្លងដែនតាមរយៈ QR និងការផ្ទេរប្រាក់ ព្រម​ទាំង​ការ​ពង្រីក​ការ​តភ្ជាប់​ពី​កម្រិតទ្វេភាគីទៅជាបណ្តាញហិរញ្ញវត្ថុក្នុងតំបន់។

គួរបញ្ជាក់ថា ធនាគារជាតិនៃកម្ពុជា បានដាក់​ឲ្យ​ដំណើរការជាផ្លូវការនូវប្រព័ន្ធបាគង នៅថ្ងៃទី២៨ ខែតុលា ឆ្នាំ២០២០។ ប្រព័ន្ធនេះត្រូវបានអភិវឌ្ឍឡើងដោយផ្អែកលើតម្រូវការ និង​បរិបទ​សេដ្ឋកិច្ច​ក្នុង​ស្រុក ហើយ​បាន​ក្លាយ​ជា​ហេដ្ឋារចនាសម្ព័ន្ធ​សំខាន់​ក្នុង​ការ​ជំរុញ​ការ​ទូទាត់​ឌីជីថល និង​ពង្រីក​ការ​តភ្ជាប់​ប្រព័ន្ធ​ទូទាត់​ជាមួយ​បណ្ដា​ប្រទេស​ដៃគូ៕

អត្ថបទ៖ ឆដា, រូបភាព៖ ធនាគារជាតិ​នៃកម្ពុជា

second...

x

The post ធនាគារជាតិកម្ពុជា ត្រៀមពង្រីកប្រព័ន្ធបាគង សម្រាប់ការទូទាត់ឆ្លងដែនទៅកាន់ឥណ្ឌូណេស៊ី ហ្វីលីពីន និងរវ៉ាន់ដា appeared first on Millions times.

អគ្គ​នាយិកា​នៃ​ក្រុមហ៊ុន ធី អ អ៊ី អ៉ីមផត អិចផត ឯ.ក (T R E IMPORT EXPORT CO., LTD.) លោកស្រី តែ ស៊ូអេង ដែល​ជា​ថៅកែ​ស្រី នាំចូលផលិតផល និង​គ្រឿង​សំអាង​ពី​បរទេស ព្រម​ទាំង​មាន​ផលិតផល​ប្រេន​ផ្ទាល់ខ្លួននៅលើទីផ្សារប្រទេសកម្ពុជា ថ្មី​ៗ​នេះ​បាន​រៀបចំ​កម្មវិធី​ខួប​កំណើត​ឲ្យ​កូន​ប្រុស​ស្រី​ទាំង ២ ក្នុង​ថ្ងៃ​តែ​មួយ។

តាមដានជាមួយយើង៖ Million Times

សេដ្ឋិនី​ដែល​រកស៊ី​ជំនួញ​ផ្នែក​ផលិតផល​ថែរក្សា​សម្រស់​រូបនេះ ស្រលាញ់​កូន​ប្រុស​ស្រី​ទាំង ២ ខ្លាំង​ណាស់។ សម្រាប់​ថ្ងៃ​ខួប​កូន​ប្រុស​ច្បង ដ្បិត​ថា​កន្លង​ហួស​ពី​កូន​ស្រី ១ សប្ដាហ៍ តែ​លោកស្រី ស៊ូអេង បាន​រៀបចំ​ឡើង​ក្នុង​ថ្ងៃ​តែ​មួយ​តែម្ដង។

ដោយ​កូន​ប្រុស​ច្បង​មាន​ឈ្មោះ តាន់ អមណារិន វ័យ ១៤ ឆ្នាំ និង​កូន​ស្រី​ដ៏​គួរឲ្យ​ក្នាញ់ តាន់ អេលេនណា គម្រប់​វ័យ ១០ ឆ្នាំ។ ដោយ​លោកស្រី តែ ស៊ូអេង កំពុង​ពពោះ​កូន​ទី ៣ តែ​រូប​សម្ផស្ស​នៅតែ​ស្រស់​ស្អាត ដដែល។

ចំណែក​ការ​គ្រង​ឈុត​សម្លៀកបំពាក់​វិញ​លោកស្រី ស៊ូអេង ជ្រើសរើស​ឈុត​ពណ៌​ផ្ទៃមេឃ​យ៉ាង​ស្រស់​ស្អាត សមសួន​ជាមួយ​រូបរាង​ពេល​មាន​ផ្ទៃពោះ​ស្រាប់។ សម្រាប់​ស្បែកជើង​វិញ សម​គ្នា​ជាមួយ​ឈុត​ពណ៌​ផ្ទៃមេឃ​នោះ។

ស្បែកជើង AMINA MUADDI តម្លៃ​ជាង​១ ពាន់​ដុល្លារ អម​ដោយ​គ្រឿង​អលង្ការ​ពេជ្រ ភ្លឺ ចាំងចែង នរណា​ក៏​សរសើរ​មិន​ដាច់​ពី​មាត់៕

អត្ថបទ៖ ឆដា, រូបភាព៖ តែ ស៊ូអេង Te sou eng

second...

x

The post លោកស្រី តែ ស៊ូអេង អគ្គនាយិកាក្រុមហ៊ុន ធី អ អ៊ី អ៉ីមផត អិចផត ឯ.ក រៀបចំខួបកំណើតកូនទាំង ២ ក្នុងថ្ងៃតែមួយ appeared first on Millions times.

តាមដានជាមួយយើង៖ Million Times

ភ្នំពេញ៖ ក្រសួងទេសចរណ៍ សហការជាមួយរដ្ឋបាលខេត្តព្រះសីហនុ ក្រសួង-ស្ថាប័នពាក់ព័ន្ធ និងវិស័យឯកជន នឹងរៀបចំព្រឹត្តិការណ៍បុណ្យសមុទ្រលើកទី១២ ជុំទី៤ ឆ្នាំ២០២៦ នៅខេត្តព្រះសីហនុ ចាប់ពីថ្ងៃទី១៨ ដល់ថ្ងៃទី២០ ខែធ្នូ ឆ្នាំ២០២៦ ក្រោមប្រធានបទ «គុណតម្លៃសមុទ្រ៖ សេដ្ឋកិច្ចខៀវផ្សារភ្ជាប់ចីរភាពជីវចម្រុះតំបន់ឆ្នេរសមុទ្រ»។

ព្រឹត្តិការណ៍នេះ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ព្រមទាំងមានការអញ្ជើញចូលរួមពីថ្នាក់ដឹកនាំ សមាជិក សមាជិកាព្រឹទ្ធសភា រដ្ឋសភា រាជរដ្ឋាភិបាល ក្រសួង-ស្ថាប័នពាក់ព័ន្ធ តំណាងក្លឹបឆ្នេរសមុទ្រដែលស្អាតបំផុតលើសកលលោក តំណាងស្ថានទូតបរទេសប្រចាំកម្ពុជា រដ្ឋបាលរាជធានី-ខេត្ត ដៃគូអភិវឌ្ឍ អង្គការជាតិ-អន្តរជាតិ សមាគមទេសចរណ៍ ប្រតិបត្តិករទេសចរណ៍ វិស័យឯកជន អ្នកផលិតមាតិកាទេសចរណ៍ និងភ្ញៀវកិត្តិយសជាតិ-អន្តរជាតិជាច្រើន។

ក្រសួងទេសចរណ៍បានឱ្យដឹងថា ព្រឹត្តិការណ៍ប្រចាំឆ្នាំនេះ ត្រូវបានរៀបចំឡើងក្នុងគោលបំណងផ្សព្វផ្សាយសក្តានុពលទេសចរណ៍តំបន់ឆ្នេរសមុទ្រកម្ពុជា ជំរុញការអភិរក្ស និងអភិវឌ្ឍតំបន់ឆ្នេរប្រកបដោយចីរភាព ព្រមទាំងលើកកម្ពស់គុណភាពសេវាកម្មក្នុងឧស្សាហកម្មទេសចរណ៍ និងជំរុញការលើកតម្លៃផលិតផលខ្មែរ។

ដើម្បីធ្វើឱ្យព្រឹត្តិការណ៍បុណ្យសមុទ្រលើកទី១២ ប្រព្រឹត្តទៅដោយភាពអធិកអធម គណៈកម្មការអន្តរក្រសួងគ្រោងរៀបចំសកម្មភាព និងព្រឹត្តិការណ៍អមសំខាន់ៗជាច្រើន។

សកម្មភាពទាំងនោះរួមមាន ការសម្តែងទស្សនីយភាពសិល្បៈដែលបង្ហាញពីប្រពៃណី ទំនៀមទម្លាប់ និងសក្តានុពលទេសចរណ៍របស់ខេត្តតំបន់ឆ្នេរ ការប្រគំតន្ត្រីមហាជន និងការអុជកាំជ្រួចអបអរសាទរព្រឹត្តិការណ៍បុណ្យសមុទ្រ។

ព្រឹត្តិការណ៍នេះ ក៏នឹងមានការតាំងពិព័រណ៍សមិទ្ធផលក្នុងវិស័យទេសចរណ៍ មហោស្រពម្ហូបអាហារ និងភេសជ្ជៈ ការតាំងពិព័រណ៍ផលិតផលក្នុងស្រុក ការតាំងបង្ហាញសមិទ្ធផលរបស់ក្រសួង ស្ថាប័ន និងរដ្ឋបាលថ្នាក់ក្រោមជាតិ ព្រមទាំងគម្រោងអភិវឌ្ឍន៍ទេសចរណ៍របស់ខេត្តតាមតំបន់ឆ្នេរ។

ក្រៅពីនេះ នឹងមានសិក្ខាសាលា និងកិច្ចពិភាក្សាលើប្រធានបទសំខាន់ៗពាក់ព័ន្ធនឹងវិស័យទេសចរណ៍ ព្រមទាំងព្រឹត្តិការណ៍កីឡាជាច្រើនប្រភេទ រួមមាន កីឡាលើទឹក កីឡាលើឆ្នេរខ្សាច់ ការប្រកួតទាញព្រ័ត្រ ការប្រកួតបង្ហោះខ្លែង និងកីឡាទេសចរណ៍លក្ខណៈមហាជន។

ផ្នែកបរិស្ថាន និងការអភិរក្សជីវចម្រុះ ក៏ត្រូវបានដាក់បញ្ចូលក្នុងកម្មវិធីសំខាន់ៗផងដែរ ដោយមានកម្មវិធីដាំដើមឈើស្របតាមទស្សនទាន «ទេសចរម្នាក់ ដើមឈើមួយដើម» ក្រោមប្រធានបទ «រួមគ្នាដាំដើមកោងកាង ដើម្បីសមុទ្របៃតង និងផ្ញើក្តីនឹករលឹកដល់ជនភៀសសឹក»។

ជាមួយគ្នានេះ នឹងមានកម្មវិធីលែងកូនក្តាម និងកូនអណ្តើកសមុទ្រ ដើម្បីផ្តល់ជីវិតថ្មី និងបន្តចីរភាពជីវៈចម្រុះ ព្រមទាំងកម្មវិធីរាប់បាត្រឧទ្ទិសកុសលដល់វិញ្ញាណក្ខន្ធវីរៈកងកម្លាំងប្រដាប់អាវុធ។

កម្មវិធីអមផ្សេងទៀត រួមមាន ការប្រកួតម្ហូបអាហារប្រចាំតំបន់ ការប្រកួតប្រជែងរូបភាព កម្មវិធីដង្ហែគោមនាពេលរាត្រីដើម្បីដឹងគុណសមុទ្រ និងកម្មវិធីកម្សាន្តជាច្រើនទៀត។

ក្រសួងទេសចរណ៍បានបញ្ជាក់ថា បុណ្យសមុទ្រលើកទី១២ ជុំទី៤ ឆ្នាំ២០២៦ នឹងក្លាយជាវេទិកាមួយសម្រាប់ផ្សព្វផ្សាយសក្តានុពលទេសចរណ៍តំបន់ឆ្នេរសមុទ្រកម្ពុជា ព្រមទាំងបង្ហាញពីការយកចិត្តទុកដាក់លើការអភិរក្ស និងការអភិវឌ្ឍតំបន់ឆ្នេរប្រកបដោយចីរភាព៕

second...

x

The post ព្រះសីហនុត្រៀមរៀបចំបុណ្យសមុទ្រលើកទី១២ ផ្សព្វផ្សាយសក្តានុពលទេសចរណ៍ និងសេដ្ឋកិច្ចខៀវ appeared first on Millions times.

តាមដានជាមួយយើង៖ Million Times

ភ្ញៀវទេសចរអន្តរជាតិប្រមាណ ២០០នាក់ មកពី ១៥សញ្ជាតិ រួមជាមួយនាវិក និងក្រុមការងារប្រមាណ ១៥០នាក់ នៃនាវាទេសចរណ៍ Villa Vie Odyssey បានសម្តែងការដឹងគុណ និងថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា ចំពោះការទទួលស្វាគមន៍ប្រកបដោយភាពកក់ក្តៅ បដិសណ្ឋារកិច្ចល្អ និងការយកចិត្តទុកដាក់ខ្ពស់ ខណៈនាវាកំពុងចតនៅកំពង់ផែស្វយ័តក្រុងព្រះសីហនុ។

ដោយទទួលបានអនុសាសន៍ដឹកនាំពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២៩ ខែតុលា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយឯកឧត្តម សាមុត សុធារិទ្ធ អភិបាលស្តីទីនៃគណៈអភិបាលខេត្តព្រះសីហនុ ឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ ព្រមទាំងតំណាងអគ្គនាយកដ្ឋានអន្តោប្រវេសន៍ មន្ទីរទេសចរណ៍ខេត្ត និងមន្ទីរ អង្គភាពពាក់ព័ន្ធ បានចុះពិនិត្យករណីនាវា Villa Vie Odyssey ដែលជួបបញ្ហាប្រេងដើម្បីបន្តដំណើរ។

ក្នុងឱកាសនោះ មន្ត្រីពាក់ព័ន្ធបានចុះសាកសួរសុខទុក្ខ ស្តាប់ក្តីកង្វល់ និងសំណូមពររបស់ភ្ញៀវទេសចរអន្តរជាតិ នាវិក និងក្រុមការងាររបស់នាវា ដើម្បីស្វែងរកដំណោះស្រាយសមស្រប និងឆ្លើយតបចំពោះតម្រូវការចាំបាច់នានា។

ឯកឧត្តមរដ្ឋមន្ត្រី ហួត ហាក់ ក៏បានថ្លែងអំណរគុណដល់គ្រប់ផ្នែក និងភាគីពាក់ព័ន្ធ ដែលបានចូលរួមសហការយ៉ាងជិតស្និទ្ធ ជាពិសេសឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមប្រឹក្សាជាតិភស្ដុភារកម្ម ព្រមទាំងឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន ដែលបានផ្តល់កិច្ចសហការយ៉ាងសកម្ម។

បន្ទាប់ពីការពិភាក្សា និងវាយតម្លៃស្ថានភាពជាមួយគ្រប់ភាគីពាក់ព័ន្ធ ក្រសួងទេសចរណ៍ រដ្ឋបាលខេត្តព្រះសីហនុ និងក្រសួង ស្ថាប័នមានសមត្ថកិច្ច បានចាត់តាំងក្រុមការងារសម្របសម្រួល និងដាក់ចេញវិធានការចាំបាច់ និងទាន់ពេលវេលា ដើម្បីជួយសម្រួលដល់ការទទួលបានព័ត៌មាន និងការផ្តល់សេវាកម្មចាំបាច់ផ្សេងៗ ដោយផ្តោតលើសុវត្ថិភាព សុខុមាលភាព ផាសុកភាព និងភាពកក់ក្តៅរបស់ភ្ញៀវទេសចរអន្តរជាតិ។

សម្រាប់កម្ពុជា ភ្ញៀវទេសចរអន្តរជាតិមិនត្រឹមតែជាអ្នកមកទស្សនាប៉ុណ្ណោះទេ ប៉ុន្តែជាមិត្តភក្តិដែលត្រូវទទួលបានការគោរព ការយកចិត្តទុកដាក់ និងភាពកក់ក្តៅ ជាពិសេសនៅពេលពួកគេជួបប្រទះការលំបាក។

ភ្ញៀវទេសចរអន្តរជាតិ នាវិក និងក្រុមការងាររបស់នាវា បានសម្តែងក្តីរំភើប ការដឹងគុណ និងទំនុកចិត្តចំពោះការយកចិត្តទុកដាក់របស់រាជរដ្ឋាភិបាលកម្ពុជា និងអាជ្ញាធរពាក់ព័ន្ធ។ ពួកគេក៏បានកោតសរសើរចំពោះទឹកចិត្តមនុស្សធម៌ ស្នាមញញឹម និងភាពរួសរាយរាក់ទាក់របស់ប្រជាជនកម្ពុជា ព្រមទាំងសម្រស់ធម្មជាតិ និងសក្តានុពលទេសចរណ៍ដ៏សម្បូរបែបរបស់កម្ពុជា។

ក្នុងអំឡុងពេលស្នាក់នៅកម្ពុជា ភ្ញៀវទេសចរមួយចំនួនបានឆ្លៀតឱកាសបន្តដំណើរកម្សាន្តទៅកាន់តំបន់ឆ្នេរ កោះ និងគោលដៅទេសចរណ៍ជុំវិញខេត្តព្រះសីហនុ ខណៈមួយចំនួនទៀតបានបន្តដំណើរទស្សនកិច្ចមកកាន់រាជធានីភ្នំពេញ។ ភ្ញៀវទេសចរមួយចំនួនក៏បានបង្ហាញចំណាប់អារម្មណ៍ និងបំណងវិលត្រឡប់មកទស្សនាកម្ពុជាជាថ្មីនៅពេលអនាគត។

ការយកចិត្តទុកដាក់របស់កម្ពុជាចំពោះនាវា Odyssey នាពេលនេះ ក៏បានរំលេចឡើងវិញនូវកេរដំណែលមនុស្សធម៌របស់កម្ពុជា ដែលពិភពលោកបានចងចាំតាមរយៈការទទួលស្វាគមន៍នាវាទេសចរណ៍ Westerdam កាលពីខែកុម្ភៈ ឆ្នាំ២០២០។

នៅពេលនោះ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា កម្ពុជាបានអនុញ្ញាតឱ្យនាវា Westerdam ចូលចតនៅកំពង់ផែក្រុងព្រះសីហនុ បន្ទាប់ពីនាវានេះជួបការលំបាកក្នុងការស្វែងរកកំពង់ផែចូលចត ដោយសារការព្រួយបារម្ភអំពីការរីករាលដាលនៃជំងឺកូវីដ-១៩។

កាយវិការប្រកបដោយមនុស្សធម៌នេះបានទទួលការកោតសរសើរពីមជ្ឈដ្ឋានអន្តរជាតិ និងបានធ្វើឱ្យសារថា «កម្ពុជាជាប្រទេសតូច ប៉ុន្តែមានបេះដូងធំ» (A Small Country with a Big Heart) ក្លាយជានិមិត្តរូបនៃសាមគ្គីភាព និងភាពកក់ក្តៅរបស់ប្រជាជនកម្ពុជា។

សកម្មភាពទាំងនេះបានចូលរួមពង្រឹងកិត្តិនាមរបស់កម្ពុជានៅលើឆាកអន្តរជាតិ ក្នុងនាមជាគោលដៅទេសចរណ៍ប្រកបដោយសុវត្ថិភាព មិត្តភាព និងបដិសណ្ឋារកិច្ចដ៏កក់ក្តៅ ស្របតាមស្មារតី «កម្ពុជា ព្រះរាជាណាចក្រអច្ឆរិយៈ ផ្តល់ភាពកក់ក្តៅ»៕

អត្ថបទ៖ ប៊ី

second...

x

The post ភ្ញៀវទេសចរ Odyssey សរសើរកម្ពុជា «ប្រទេសតូច ប៉ុន្តែបេះដូងធំ» appeared first on Millions times.