រដ្ឋាភិបាលចិនបានចេញមុខតបតភ្លាមៗ បន្ទាប់ពីប្រធានាធិបតីអាមេរិក Donald Trump ប្រកាសវិធានការទារពន្ធគយសងសឹកនាថ្ងៃព្រហស្បតិ៍ ទី០៣ ខែមេសា ចំពោះ ១០០ប្រទេសទូទាំងពិភពលោក ដោយអាមេរិកទាមទារតំឡើងពន្ធនាំចូលទំនិញពីចិន ៣៤% បន្ថែម។
Million Times 
រដ្ឋាភិបាលចិនបានទទូចឲ្យអាមេរិកលុបចោលការទារពន្ធចុងក្រោយនេះ ចំពោះខ្លួនជាបន្ទាន់ បើមិនដូច្នេះទីក្រុងប៉េកាំង នឹងរៀបផែនការទារពន្ធសងសឹកវិញ ដែលអាចបង្កជាសង្គ្រាមពន្ធគយ រវាងមហាអំណាចសេដ្ឋកិច្ចពិភពលោកទាំង២។ នេះបើតាមការចុះផ្សាយពីទីភ្នាក់ងារព័ត៌មាន Reuters។
ក្រោយប្រកាសតំឡើងពន្ធនាំចូលទំនិញថ្មីនេះ មានន័យថា ទំនិញនាំចូលពីចិន តម្រូវឲ្យបង់ពន្ធជូនរដ្ឋាភិបាលអាមេរិក ៥៤% ដែលធ្វើឲ្យក្រុមហ៊ុនចិនជាច្រើន កើតទុក្ខមិនសុខចិត្ត ទាមទារឲ្យរដ្ឋាភិបាលជួយចេញមុខដោះស្រាយបញ្ហាខាងលើ។
ទោះជាយ៉ាងណា អ្នកជំនាញផ្នែកសេដ្ឋកិច្ចអះអាងថា ស្ថានភាពសេដ្ឋកិច្ចចិន នឹងមិនរងផលប៉ះពាល់ខ្លាំងឡើយ ពីការពន្ធបន្ថែមរបស់អាមេរិក ដ្បិតចិនមានទីផ្សារធំស្រាប់ និងមានដៃគូពាណិជ្ជកម្មជាច្រើននៅតំបន់អាស៊ី និងអឺរ៉ុប៕
អត្ថបទ៖ Luffy រូបភាព៖ Fox News