ប្រសិនបើមិនមានការប្រែប្រួលនោះទេ អាកាសយានដ្ឋានអន្តរជាតិតេជោ ដែលវិនិយោគពីក្រុមហ៊ុន CAIC លោកអ្នកឧកញ៉ា ពុង ឃាវសែ នឹងគ្រោងដាក់ឱ្យដំណើរការជាផ្លូវការនាខែកក្កដាខាងមុខនេះ ខណៈត្រឹមពាក់កណ្តាលខែមីនានេះសម្រេចការសាងសង់បានចំនួន ៩៥%ហើយ។
ឧកញ៉ា ឆារស៏ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) ក្នុងឱកាសទទួលជួបឆ្លើយឆ្លងជាមួយអ្នកសារព័ត៌មានពី ៥៦ ស្ថាប័ន នារសៀលថ្ងៃទី២១ ខែមីនា ឧកញ៉ា ឆារស៍ វ៉ាន់ បានបង្ហាញពីវឌ្ឍនភាពនៃគម្រោងសាងសង់អាកាសយានដ្ឋានអន្តរជាតិតេជោ ដោយគិតត្រឹមថ្ងៃទី២១ ខែមីនា ឆ្នាំ២០២៥ សម្រេចបាន ៩៥% ដែលចំណាយថវិកាអស់ប្រមាណ ១៦០០ លានដុល្លារអាមេរិក។
Million Times 
លោកឧកញ៉ាថ្លែងបញ្ជាក់ថា អាកាសយានដ្ឋានអន្តរជាតិតេជោ ដែលត្រូវបានស្គាល់ជា អាកាសយានដ្ឋានធំបំផុតនៅកម្ពុជា សាងសង់បាន៩៥% និងចំណាយទឹកប្រាក់អស់ ១៦០០លានដុល្លារ នឹងបើកដំណើរការក្នុងខែកក្កដា ឆ្នាំ២០២៥ខាងមុខនេះ។
គម្រោងសាងសង់អាកាសយានដ្ឋានអន្តរជាតិតេជោ ក្រោមការវិនិយោគទឹកប្រាក់ ១៥០០ លានដុល្លារ ជាគម្រោងចម្រុះរដ្ឋ និងឯកជន ដែលរដ្ឋលេខាធិការដ្ឋានអាកាសចរណ៍ស៊ីវិល មានភាគហ៊ុនវិនិយោគ១០% នៅក្នុងភាគហ៊ុន CAIC ១០០%។
គួរឲ្យដឹងថា អាកាសយានដ្ឋានអន្តរជាតិតេជោ ត្រូវបានសាងសង់លើផ្ទៃដីសរុប ២,៦០០ហិកតា ស្ថិតនៅចម្ងាយ ១៩គីឡូម៉ែត្រ ពីរាជធានីភ្នំពេញ។ អាកាសយានដ្ឋានជាប្រភេទ 4F ដែលនឹងស្រូបយក និងទទួលបានការហោះហើរពីឆ្ងាយឆ្លងទ្វីប ហើយអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបានផងដែរ៕
អត្ថបទ៖ សាងតេជៈ រូបភាព៖ ក្លឹបអ្នកកាសែតកម្ពុជា