ទ្រព្យសម្បត្តិរបស់ម្ចាស់ក្រុមហ៊ុនអចលនទ្រព្យ Novaland អតីតមហាសេដ្ឋីវៀតណាម លោក Bui Thanh Nhon បានថយចុះរហូតដល់ ៩២% គិតចាប់តាំងពីចុងឆ្នាំ២០២១ មកទល់ពេលបច្ចុប្បន្ន។ នេះបើតាមការចុះផ្សាយពីគេហទំព័រ Forbes។

នៅចុងឆ្នាំ២០២១ លោក Nhon បានគ្រប់គ្រងភាគហ៊ុននៃក្រុមហ៊ុន Novaland ច្រើនជាង ៦១% គិតជាសាច់ប្រាក់ប្រហែល ១០៨ទ្រីលានដុង ប៉ុន្តែលោកបានលក់ភាគហ៊ុនជាបន្តបន្ទាប់ និងពេលនេះ នៅសល់តិចជាង ៣៩% ដែលស្មើនឹងទឹកប្រាក់ ៨,៤ទ្រីលានដុងប៉ុណ្ណោះ។

ការលក់ភាគហ៊ុនបន្តកន្ទុយគ្នាមិនដាច់របស់អតីតមហាសេដ្ឋីរូបនេះ កើតឡើងក្រោយផ្ទុះព័ត៌មានថា ក្រុមហ៊ុន Novaland ជាប់បំណុលជាច្រើន ដែលធ្វើឲ្យតម្លៃហ៊ុនរបស់ពួកគេបានបន្តធ្លាក់ចុះឥតឈប់ឈរ ខណៈក្រុមវិនិយោគិនក៏អស់ជំនឿចិត្ត និងសម្រុកលក់ហ៊ុនរៀងៗខ្លួន ដែលធ្វើឲ្យក្រុមហ៊ុនវៀតណាមនេះ ខាតបង់ជាខ្លាំងរយៈពេល ៤ឆ្នាំចុងក្រោយ។

គួរជម្រាបដែរថា កាលពីចុងឆ្នាំ២០២១ លោក Bui Thanh Nhon ត្រូវបានសារព័ត៌មាន Forbes បញ្ចូលឈ្មោះក្នុងបញ្ជីកំពូលមហាសេដ្ឋីវៀតណាម ដែលមានទ្រព្យសម្បត្តិប្រហែល ៣ពាន់លានដុល្លារ ប៉ុន្តែបច្ចុប្បន្នទ្រព្យសម្បត្តិរបស់លោក បានស្រុតចុះមកនៅត្រឹម ៣២៩លានដុល្លារប៉ុណ្ណោះ៕

អត្ថបទ៖ Luffy រូបភាព៖ VNExpress