កាលពីថ្ងៃទី១៩ ខែកុម្ភៈ ប្រធានាធិបតីអាមេរិក លោក Donald Trump បាននិយាយថា បើសិនជាក្រុមហ៊ុន Tesla របស់មហាសេដ្ឋី Elon Musk សង់រោងចក្រនៅប្រទេសឥណ្ឌា ដើម្បីជៀសផុតពីការទារពន្ធ នោះវាគឺជារឿងអយុត្តិធម៌សម្រាប់សហរដ្ឋអាមេរិក។
តាមរយៈការចុះផ្សាយពីសារព័ត៌មាន Reuters បានឲ្យដឹងថា បន្ទាប់ពីជួបជាមួយនាយករដ្ឋមន្ត្រី Narendra Modi មនុស្សកំពូលលុយ Elon Musk ហាក់មានបំណងចង់បង្កើតរោងចក្រ Tesla មួយនៅឥណ្ឌា ដោយសារគោលនយោបាយកាត់បន្ថយពន្ធរបស់ប្រទេសនៅទ្វីបអាស៊ី។
Million Times 
រដ្ឋាភិបាលឥណ្ឌា បានប្រកាសកាលពីខែមីនាឆ្នាំមុនថា នឹងកាត់បន្ថយការទារពន្ធនាំចូលរថយន្តពីជិត ១០០% មកនៅត្រឹម ១៥% ប៉ុណ្ណោះ បើសិនជាក្រុមហ៊ុនផលិតរថយន្តបរទេស ចាយលុយវិនិយោគ ៥០០លានដុល្លារ និងសង់រោងចក្រក្នុងប្រទេសរបស់ខ្លួន។
ជុំវិញចចាមអារ៉ាមខាងលើ ក្រុមហ៊ុន Tesla មិនទាន់ចេញមុខបកស្រាយឡើយ ខណៈប្រធានាធិបតី Trump សង្កត់ធ្ងន់ថា Elon Musk មានសិទ្ធក្នុងការសង់រោងចក្រនៅឥណ្ឌា ប៉ុន្តែបើគេសម្រេចចិត្តបែបនេះ នោះប្រជាជនអាមេរិកនឹងរងភាពអយុត្តិធម៌ជាមិនខាន៕
អត្ថបទ៖ Luffy រូបភាព៖ BizzBuzz