លោក Bill Gates និយាយថា លោកបានជួបជាមួយប្រធានាធិបតី Donald Trump នៅសេតវិមានកាលពីថ្ងៃពុធ ដើម្បីតស៊ូមតិសម្រាប់ការបន្តការផ្តល់ជំនួយបរទេសពីទីភ្នាក់ងារសហរដ្ឋអាមេរិកសម្រាប់កិច្ចអភិវឌ្ឍន៍អន្តរជាតិ (USAID)។

NBC News បានចុះផ្សាយថា សហស្ថាបនិក Microsoft បាននិយាយថា លោកមានកិច្ចប្រជុំខ្លីជាមួយប្រធានាធិបតី Donald Trump និងកិច្ចប្រជុំដ៏យូរជាមួយប្រធានបុគ្គលិក Susie Wiles ។

រដ្ឋបាលថ្មីលោក Trump បានបិទទីភ្នាក់ងារ USAID ជា​ម្ចាស់​ជំនួយ​ធំ​ជាង​គេ​បង្អស់​តែ​មួយ​គត់​នៅលើ​ពិភពលោក។  នាយកដ្ឋានប្រសិទ្ធភាពរដ្ឋាភិបាល (DOGE) របស់មហាសេដ្ឋី Elon Musk ចោទប្រកាន់ថា វាចំណាយខ្ជះខ្ជាយ។

ក្នុង​ឆ្នាំ​សារពើពន្ធ ២០២៣ សហរដ្ឋ​អាមេរិក​បាន​បញ្ចេញ​ជំនួយ ៧២ ពាន់​លាន​ដុល្លារ​នៅ​ជុំវិញ​ពិភពលោក​ទៅ​លើ​ផ្នែក​គ្រប់មុខ​រាប់ចាប់ពី​សុខភាព​ស្ត្រី​ក្នុង​តំបន់​សង្គ្រាម​រហូត​ដល់​ការ​ទទួល​បាន​ទឹកស្អាត ការ​ព្យាបាល​វីរុស​ឬ​ជំងឺ​អេដស៍ សន្តិសុខ​ថាមពល និង​ការងារ​ប្រឆាំង​អំពើ​ពុករលួយ។ ទីភ្នាក់ងារ​នេះ​បាន​ផ្តល់​ជំនួយ​មនុស្សធម៌ ៤២% ក្នុង​ចំណោម​ជំនួយ​មនុស្សធម៌​ទាំងអស់​ដែល​កត់ត្រា​ដោយ​អង្គការ​សហប្រជាជាតិ​ក្នុង​ឆ្នាំ ២០២៤៕

អត្ថបទ៖ សារ៉ាយ រូបភាព៖ Google