ព្រឹត្តិការណ៍ចាប់ត្រីបែបប្រពៃណី ដ៏ធំជាងគេនៅទូទាំងប្រទេសកម្ពុជា ស្ថិតនៅបឹងត្រពាំងក្រម ក្នុងស្រុកមេមត់ ខេត្តត្បូងឃ្មុំ ដោយឆ្នាំនេះមានពលរដ្ឋជាច្រើនចូលរួមកុះករ មិនខុសពីសព្វមួយដងឡើយ។
Million Times 
មិនខុសពីរាល់ឆ្នាំ រដ្ឋបាលខេត្តត្បូងឃ្មុំ បានរៀបចំព្រឹត្តិការណ៍ពិធីចាប់ត្រីបែបបុរាណ ជាទំនៀមទម្លាប់ប្រជាពលរដ្ឋ ពីដូនតាតជំនាន់រាប់រយឆ្នាំមកហើយ នៅភូមិសាទុំ ឃុំជាំក្រវៀន ស្រុកមេមត់។ សម្រាប់ឆ្នាំនេះ បានរៀបចំធ្វើនៅថ្ងៃ១ ខែកុម្ភៈ ឆ្នាំ ២០២៥ ជាការបន្តថែរក្សាទំនៀមទម្លាប់ពីបុរាណរបស់ពលរដ្ឋ។
ជារៀងរាល់ឆ្នាំ ដើមខែកុម្ភៈ ប្រជាពលរដ្ឋនៅទីនោះ តែងតែប្រារព្ធពិធីចាប់ត្រី យកមកចម្អិនហូបជុំគ្នា ដែលជាទំនៀមទម្លាប់តាំងពីដើមរហូតរៀងមកដល់សព្វថ្ងៃ តែជាលក្ខណៈតាមតំបន់ក្នុងភូមិ-ស្រុក។
បើតាមការបញ្ជាក់ពីអាជ្ញាធរស្រុកមេមត់ នេះមានឧបករណ៍ សម្រាប់ចាប់ត្រីបែបបុរាណដូចជា អង្រុត, ឈ្នាង, ត្រក, ក្អុះ ជាដើម។
គួរបញ្ជាក់ថា បឹងត្រពាំងក្រមស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ មានផ្ទៃជម្រាលប្រមូលទឹក ៣០ ហិកតា និងមានបឹងតូចៗ ២០ បឹង ជាសាខា ព្រមទាំងមានរុក្ខជាតិលិចទឹកជាច្រើនប្រភេទ។
ប៉ុន្មានឆ្នាំចុងក្រោយនេះ ក្រោមការយកចិត្តទុកដាក់គិតគូខ្ពស់ពីសំណាក់រដ្ឋបាលខេត្ត បានរៀបចំព្រឹត្តិការណ៍នេះកាន់តែធំឡើងៗ ពិសេសដោយមានការផ្សព្វផ្សាយពីសំណាក់ប្រព័ន្ធផ្សព្វផ្សាយរដ្ឋ ក្រសួងព័ត៌មាន មានមន្ទីរព័ត៌មានខេត្តត្បូងឃ្មុំ និងប្រព័ន្ធផ្សព្វផ្សាយឯកជននានា ធ្វើឲ្យពលរដ្ឋជិតឆ្ងាយបានឃើញ បានដឹង និងចាប់អារម្មណ៍ចូលរួមរាប់ម៉ឺននាក់ ច្រើនកកកុញ កុះករ ក្នុងនោះក៏មានភ្ញៀវទេសចរបរទេសផងដែរ៕
អត្ថបទ៖ មេរ៉ា៖ រូបភាព៖ រដ្ឋបាលខេត្តត្បូងឃ្មុំ