នៅថ្ងៃចន្ទ ទី២០ ខែមករា សភាអាមេរិកបានប្រកាសទទួលស្គាល់លោក Marco Rubio ជារដ្ឋមន្ត្រីការបរទេសផ្លូវការ សម្រាប់រដ្ឋបាលប្រធានាធិបតីអាមេរិកទី៤៧ លោក Donald Trump។
Million Times 
តាមការចុះផ្សាយពីសារព័ត៌មាន Reuters បានឲ្យដឹងថា លោក Rubio ទទួលបានសម្លេងគាំទ្រក្នុងសភារហូតដល់ ៩៩ ទល់នឹង០ ដើម្បីឡើងកាន់តំណែងថ្មីមួយនេះ។
ទន្ទឹមនឹងនោះ សមាជិកបក្សសាធារណៈរដ្ឋរូបនេះ គឺជាបេក្ខភាពគណៈរដ្ឋមន្ត្រីជ្រើសរើសដោយលោក Trump ដំបូង ដែលទទួលបានការយល់ព្រមពីសភាអាមេរិក ក្នុងតួនាទីសំខាន់ៗក្នុងរដ្ឋបាលលោក Trump ខណៈបេក្ខភាពផ្សេងទៀតកំពុងរង់ចាំការយល់ព្រមសភាអាមេរិកនៅឡើយ។
លោក Marco Rubio វ័យ ៥៣ឆ្នាំ គឺជាអ្នករិះគន់ប្រឆាំងចិន និងគាំទ្រអ៊ីស្រាអែលផ្កាប់មុខ ហើយអំឡុងពេលរង់ចាំការសម្រេចពីសភា លោកបានព្រមានអាមេរិកថា ត្រូវតែមានការផ្លាស់ប្ដូរ ដើម្បីជៀសវៀងការពឹងផ្អែកលើប្រទេសចិន និងសន្យាពង្រឹងគោលនយោបាយការបរទេសអាមេរិក ឲ្យកាន់តែខ្លាំងជាងមុន ជាពិសេសផ្ដោតសំខាន់លើការនាំយកផលប្រយោជន៍ច្រើនជាងមុន សម្រាប់ប្រជាជនអាមេរិកទាំងមូល៕
អត្ថបទ៖ Luffy រូបភាព៖ The Hindu