សារព័ត៌មាន CNN បានចុះផ្សាយថា កាលពីថ្ងៃទី០៦ ខែវិច្ឆិកា ទ្រព្យសម្បត្តិរបស់កំពូលមហាសេដ្ឋីមានបំផុត ១០រូប មានការកើនឡើងសរុបរហូតដល់ ៦៤ពាន់លានដុល្លារ ក្រោយលោកដូណាល់ ត្រាំ ជាប់ឆ្នោតក្លាយជាប្រធានាធិបតីអាមេរិកលើកទី២។

ក្នុងនោះមហាសេដ្ឋី ដែលកើបលុយបានច្រើនបំផុតគឺ Elon Musk អគ្គនាយកក្រុមហ៊ុន Tesla ដែលកើនទ្រព្យសម្បត្តិ ២៦,៥ពាន់លានដុល្លារ ស្របពេលមេធំ Amazon មហាសេដ្ឋី Jeff Bezos កើនលុយជាង ៧ពាន់លានដុល្លារ។

កំណើនទ្រព្យសម្បត្តិដ៏ច្រើនបែបនេះ គឺដោយសារក្រុមមហាសេដ្ឋីទាំងនោះ ជាអ្នកគាំទ្រលោកត្រាំ ដូច្នេះហើយពេលលោកត្រាំ ជាប់ឆ្នោត តម្លៃភាគហ៊ុននៃក្រុមហ៊ុនរបស់ពួកគេ ក៏មានកំណើនខ្លាំងផងដែរ។

ទន្ទឹមនឹងនោះ គេហទំព័រនិយាយពីអ្នកមាន Bloomberg ក៏បានកត់សម្គាល់ដែរថា កំណើនទ្រព្យសម្បត្តិដ៏ច្រើននេះ គឺជាការកើនលុយច្រើនបំផុតរបស់កំពូលអ្នកមានទាំង១០រូប រយៈពេល ១២ឆ្នាំចុងក្រោយ ស្របពេលបច្ចុប្បន្នទីផ្សារហ៊ុននៅអាមេរិកកំពុងមានសញ្ញាណល្អជាខ្លាំង៕

អត្ថបទ៖ Luffy រូបភាព៖ CNN