រយៈពេល ៣ខែចុងក្រោយ គណបក្សសាធារណរដ្ឋ ដែលមានលោក ដូណាល់ ត្រាំ ជាបេក្ខភាពតំណាង ឈរឈ្មោះបោះឆ្នោតជាប្រធានាធិបតីអាមេរិក ទទួលបានទឹកប្រាក់ឧបត្ថម្ភចំនួន ២១៨លានដុល្លារ ពីមហាសេដ្ឋីអាមេរិកចំនួន ៣រូប។

តាមរយៈការចុះផ្សាយពីគេហទំព័រ Independent បានបង្ហាញថា មហាសេដ្ឋីទាំង ៣រូបនោះរួមមាន មេធំ Tesla លោក Elon Musk អ្នកស្រី Miriam Adelson និងលោក Dick Uihlein ដែលអ្នកទាំង៣ សុទ្ធតែមានទំនាក់ទំនង និងជាអ្នកគាំទ្រលោកត្រាំ ជាខ្លាំង។

ក្នុងនោះ អ្នកស្រី Adelson បានបរិច្ចាគប្រាក់ច្រើនជាងគេបំផុតក្នុងរយៈពេល ៣ខែចុងក្រោយ ប្រមាណ ៩៥លានដុល្លារ ខណៈមហាសេដ្ឋី Elon Musk បរិច្ចាគប្រមាណ ៧៥លានដុល្លារ ស្របពេលលោក Uihlein នាយកប្រតិបត្តិក្រុមហ៊ុនដឹកជញ្ជូន Uline បានបរិច្ចាគប្រាក់ ៤៨លានដុល្លារ។

សូមជម្រាបដែរថា បេក្ខភាពប្រធានាធិបតីទាំង ២រូប គឺអ្នកស្រីកាម៉ាឡា ហារីស និងលោក ដូណាល់ ត្រាំ មានពេលមិនច្រើនទៀតឡើយ ក្នុងការឃោសនារកសន្លឹកឆ្នោត ដ្បិតសល់តែជាង ២សប្ដាហ៍ទៀតប៉ុណ្ណោះ ការបោះឆ្នោតជ្រើសរើសមេដឹកនាំអាមេរិកថ្មី នឹងចាប់ផ្ដើមធ្វើឡើងនៅថ្ងៃទី០៥ ខែវិច្ឆិកាខាងមុខ៕

អត្ថបទ៖ Luffy រូបភាព៖ FirstPost