កាលពីថ្ងៃទី១១ ខែតុលា ក្រសួងរតនាគារអាមេរិក បានអំពាវនាវសុំឲ្យមូលនិធិហិរញ្ញវត្ថុអន្តរជាតិ IMF និងធនាគារពិភពលោក សហការរួមគ្នា ដើម្បីស្វែងរកដំណោះស្រាយសមស្របមួយ សម្រាប់បញ្ហាលំហូរសាច់ប្រាក់នៅប្រទេសមានប្រាក់ចំណូលទាប និងមធ្យម។
Million Times 
យោងតាមការចុះផ្សាយទីភ្នាក់ងារសារព័ត៌មាន Reuters បានបង្ហាញថា ការចាយវាយរបស់ប្រទេសមានប្រាក់ចំណូលទាប ទៅលើការបង់សេវាបំណុល បានលោតពីចំនួន ២០ពាន់លានដុល្លារ ចន្លោះឆ្នាំ២០១០ និង២០២០ មកដល់ ៦០ពាន់លានដុល្លារក្នុងរយៈពេលប៉ុន្មានឆ្នាំចុងក្រោយ។
ការចំណាយដ៏ច្រើនបែបនេះ បានធ្វើឲ្យសេដ្ឋកិច្ចវិទូជាច្រើនបង្ហាញក្ដីបារម្ភថា ហេដ្ឋារចនាសម្ព័ន្ធបំណុលសកលលោក នឹងជួបប្រទះបញ្ហាលំហូរសាច់ប្រាក់ធ្ងន់ធ្ងរ ខណៈប្រទេសមួយចំនួន នឹងមិនអាចបង់សូម្បីតែការប្រាក់ នៅក្នុងរយៈពេលប៉ុន្មានខែខាងមុខ។
លោក Jay Shambaugh អនុរដ្ឋលេខាធិការក្រសួងហិរញ្ញវត្ថុអន្តរជាតិ បានបង្ហើបឲ្យដឹងថា លោកសង្ឃឹមថា IMF និងធនាគារពិភពលោក នឹងចាប់ផ្ដើមរៀបចំផែនការ សម្រាប់ដោះស្រាយបញ្ហាលំហូរសាច់ប្រាក់មួយនេះ នៅក្នុងកិច្ចប្រជុំប្រចាំឆ្នាំនៅក្នុងខែនេះ តាមរយៈការអភិវឌ្ឍយន្តការថ្មី និងការផ្លាស់ប្តូរការរចនាកម្មវិធីថ្មី ឲ្យស្របតាមតម្រូវការរបស់ប្រទេសជាច្រើន៕