ភ្នំពេញ៖ កំណើនសេដ្ឋកិច្ចកម្ពុជាត្រូវបានព្យាករថានឹងថយមកនៅត្រឹម ៣.៥% ក្នុងឆ្នាំ ២០២៦ មុននឹងងើបឡើងវិញដល់ ៤.០% ក្នុងឆ្នាំ ២០២៧ និង ៥.០% ក្នុងឆ្នាំ ២០២៨ ដោយសារការប្រើប្រាស់ឯកជនធ្លាក់ចុះ រួមជាមួយការធ្លាក់ចុះនៃរំហូរប្រាក់ផ្ញើពីក្រៅប្រទេស អតិផរណាខ្ពស់ និងកំណើនឥណទានទាប។

យោងតាមរបាយការណ៍ថ្មីស្តីពី បច្ចុប្បន្នភាពសេដ្ឋកិច្ចប្រចាំឆមាសសម្រាប់តំបន់អាស៊ីបូព៌ា និងប៉ាស៊ីហ្វិក របស់ធនាគារពិភពលោក ចេញផ្សាយនៅថ្ងៃទី៦ ខែតុលា ឆ្នាំ២០២៦ បានឱ្យដឹងថា កត្តាទាំងនេះបានដាក់សម្ពាធយ៉ាងខ្លាំងលើកម្លាំងទិញរបស់គ្រួសារ។

ក្នុងរយៈពេលមធ្យម កំណើនសេដ្ឋកិច្ចកម្ពុជាត្រូវបានព្យាករថានឹងងើបឡើងវិញដល់ ៤.០% ក្នុងឆ្នាំ ២០២៧ និង ៥.០% ក្នុងឆ្នាំ ២០២៨ ក្នុងសេណារីយោដែលមានស្ថិរភាពនៃតម្លៃថាមពល ការស្តារឡើងវិញនៃវិស័យទេសចរណ៍ និងការធ្វើសមាហរណកម្មសេដ្ឋកិច្ចបានជោគជ័យរបស់ពលករចំណាកស្រុកដែលបានវិលត្រឡប់មកប្រទេសវិញ។

ទោះជាយ៉ាងណា បាតុភូត El Niño ត្រូវបានរំពឹងថានឹងបន្ថយល្បឿននៃការស្តារឡើងវិញរបស់វិស័យកសិកម្មក្នុងឆ្នាំ ២០២៧។

សម្រាប់តំបន់អាស៊ីបូព៌ា និងប៉ាស៊ីហ្វិកទាំងមូល កំណើនសេដ្ឋកិច្ចត្រូវបានព្យាករថានឹងមានអត្រា ៤.៥% ក្នុងឆ្នាំ ២០២៦ ដែលបង្ហាញពីភាពធន់នៅចំពោះមុខបញ្ហាប្រឈមជាច្រើនដែលកំពុងកើតមាននៅលើពិភពលោក។ កំណើនសេដ្ឋកិច្ចនៅតែមិនដូចគ្នារវាងបណ្តាប្រទេស និងវិស័យ ខណៈការប្រើប្រាស់បច្ចេកវិទ្យាបញ្ញាសិប្បនិម្មិត (AI) កាន់តែទូលំទូលាយកំពុងបង្កើតឱកាសថ្មីៗ។

នៅទូទាំងតំបន់ សេដ្ឋកិច្ចនៃប្រទេសមួយចំនួនបានលូតលាស់លឿនជាងការរំពឹងទុកក្នុងឆ្នាំ ២០២៦ ដោយមានកម្លាំងជំរុញពីការផលិត និងការនាំចេញទំនិញបច្ចេកវិទ្យាខ្ពស់ ដែលបានទ្រទ្រង់ដល់ការកើនឡើងនៃសកម្មភាពទាក់ទងនឹង AI នៅទូទាំងពិភពលោក។

ការព្យាករកំណើនសេដ្ឋកិច្ចសម្រាប់ឆ្នាំ ២០២៦ ត្រូវបានកែសម្រួលឡើងវិញ ដោយដំឡើង ១.១ ពិន្ទុភាគរយ សម្រាប់ប្រទេសវៀតណាម ធ្វើឱ្យកំណើនរបស់ប្រទេសនេះឈានដល់ ៧.៤% និងដំឡើង ០.៧ ពិន្ទុភាគរយ សម្រាប់ប្រទេសម៉ាឡេស៊ី និងថៃ ធ្វើឱ្យប្រទេសទាំងពីរមានកំណើន ៥.១% និង ២.០% រៀងគ្នា។

បណ្តាប្រទេសនៅកោះប៉ាស៊ីហ្វិកត្រូវបានព្យាករថានឹងមានកំណើន ២.២% ដែលយឺតជាងការរំពឹងទុកពីមុន ០.៥ ពិន្ទុភាគរយ។ ប្រទេសចិន ដែលជាសេដ្ឋកិច្ចធំបំផុតក្នុងតំបន់ ត្រូវបានព្យាករថានឹងមានកំណើន ៤.៤% ខណៈតម្រូវការក្នុងស្រុកនៅតែស្ទុះងើបមិនរួច ដោយសារទីផ្សារការងារមិនសូវរឹងមាំ និងការបន្តកែសម្រួលនៅក្នុងវិស័យអចលនទ្រព្យ។

លោក Carlos Felipe Jaramillo អនុប្រធានធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក មានប្រសាសន៍ថា ការធ្វើសមាហរណកម្មស៊ីជម្រៅរបស់តំបន់ទៅក្នុងខ្សែច្រវាក់តម្លៃសកល រួមជាមួយភាពស្វាហាប់ផ្នែកសេដ្ឋកិច្ច បានធ្វើឱ្យតំបន់នេះស្ថិតក្នុងស្ថានភាពអំណោយផលក្នុងការទទួលផលប្រយោជន៍ពីការកើនឡើងនៃសកម្មភាពទាក់ទងនឹង AI នៅទូទាំងពិភពលោក។

លោកបានបន្ថែមថា បញ្ហាប្រឈមនៅពេលនេះ គឺការប្រែក្លាយភាពខ្លាំងរបស់តំបន់ក្នុងការផលិតទំនិញដែលពាក់ព័ន្ធនឹង AI ទៅជាការប្រើប្រាស់វាឱ្យបានទូលំទូលាយ ដើម្បីជួយជំរុញផលិតភាព និងបង្កើតការងារកាន់តែច្រើន ព្រមទាំងការងារដែលមានគុណភាពល្អសម្រាប់ប្រជាជនរាប់លាននាក់។

ក្នុងការវិភាគពិសេសស្តីពី AI នៅក្នុងតំបន់ របាយការណ៍បានរកឃើញថា ប្រទេសមួយចំនួនកំពុងទទួលប្រយោជន៍ពីការផ្គត់ផ្គង់ទំនិញដែលជាមូលដ្ឋានសម្រាប់ការកើនឡើងនៃការវិនិយោគលើ AI នៅទូទាំងពិភពលោក ប៉ុន្តែការរីកសាយភាយនៃបច្ចេកវិទ្យានេះនៅក្នុងវិស័យសេដ្ឋកិច្ចទាំងមូល នៅតែមិនទាន់ស្មើគ្នានៅឡើយទេ។

ការចាប់យក AI ក្នុងចំណោមបុគ្គល និងក្រុមហ៊ុននានាកំពុងកើនឡើង ប៉ុន្តែនៅក្នុងកម្រិតទាបជាងបណ្តាប្រទេសមានសេដ្ឋកិច្ចជឿនលឿន ដោយសារអាជីវកម្មត្រូវប្រឈមមុខនឹងបញ្ហាដូចជា ការចំណាយខ្ពស់ កង្វះជំនាញ និងកង្វល់ជុំវិញសុវត្ថិភាព និងភាពឯកជន។

សម្រាប់ប្រទេសភាគច្រើន ផលចំណេញធំបំផុតក្នុងរយៈពេលខ្លីខាងមុខនឹងកើតចេញពីអ្វីដែលហៅថា «Small AI» ឬបញ្ញាសិប្បនិម្មិតខ្នាតតូច ដែលសំដៅលើការទទួលយក និងការបន្ស៊ាំខ្លួននៃបច្ចេកវិទ្យាដែលមានស្រាប់ ជាពិសេសឧបករណ៍ AI ដែលងាយស្រួលប្រើប្រាស់។

លោក Sarvesh Suri អនុប្រធានប្រចាំតំបន់អាស៊ី និងប៉ាស៊ីហ្វិករបស់សាជីវកម្មហិរញ្ញវត្ថុអន្តរជាតិ (IFC) មានប្រសាសន៍ថា វិស័យឯកជនអាចដើរតួនាទីស្នូលក្នុងការប្រែក្លាយសក្តានុពលរបស់ AI ទៅជាការងារកាន់តែច្រើន និងកាន់តែប្រសើរឡើងនៅទូទាំងតំបន់អាស៊ីបូព៌ា និងប៉ាស៊ីហ្វិក។

លោកបានបន្ថែមថា តាមរយៈការកៀរគរទុនវិនិយោគពីវិស័យឯកជនសម្រាប់ហេដ្ឋារចនាសម្ព័ន្ធឌីជីថល និងថាមពល ការពង្រីកលទ្ធភាពទទួលបានហិរញ្ញវត្ថុសម្រាប់អាជីវកម្ម និងការវិនិយោគលើការអភិវឌ្ឍជំនាញកម្លាំងពលកម្ម ប្រទេសនានាអាចពន្លឿនការប្រើប្រាស់ AI នៅក្នុងប្រព័ន្ធសេដ្ឋកិច្ច និងជួយឱ្យក្រុមហ៊ុនខ្នាតតូចមានភាពប្រកួតប្រជែង ស្វាហាប់ និងមានភាពធន់កាន់តែខ្លាំងឡើង។

របាយការណ៍បានបង្ហាញថា AI មិនទាន់ជះឥទ្ធិពលខ្លាំងលើការងារដែលដើរដោយប្រព័ន្ធស្វ័យប្រវត្តិនៅឡើយទេ ប៉ុន្តែវាបាននិងកំពុងកែប្រែទម្រង់នៃតម្រូវការជំនាញរួចទៅហើយ។ ក្រុមហ៊ុននានាកំពុងស្វែងរកអ្នកមានជំនាញផ្នែក AI កាន់តែច្រើនឡើង រួមជាមួយសមត្ថភាពវិភាគ និងជំនាញទំនាក់ទំនងសង្គម។

AI មានប្រសិទ្ធភាពបំផុតក្នុងការជួយការងារដែលទាមទារការគិត និងការសម្រេចចិត្តបែបស្មុគស្មាញ ប៉ុន្តែមានតែ ១៣% នៃការងារនៅក្នុងតំបន់នេះ ដែលស្ថិតក្នុងប្រភេទនេះ បើធៀបនឹង ៣៩% នៅក្នុងប្រទេសដែលមានសេដ្ឋកិច្ចជឿនលឿន។

ដើម្បីរក្សាកំណើន និងជំរុញការងារដែលមានផលិតភាពខ្ពស់ជាងមុន របាយការណ៍បានស្នើឱ្យមានវិធានការមុតមាំលើវិស័យចំនួនបី។ វិស័យទីមួយ គឺបង្កលក្ខណៈដល់ការចាប់យក AI មកប្រើ តាមរយៈការបង្កើតបរិយាកាសធុរកិច្ចរឹងមាំ ហេដ្ឋារចនាសម្ព័ន្ធថាមពល និងឌីជីថល ការផ្តល់ហិរញ្ញប្បទាន និងការអភិវឌ្ឍជំនាញដែលអនុញ្ញាតឱ្យកម្មករនិយោជិតទទួលបានអត្ថប្រយោជន៍ពីបច្ចេកវិទ្យានេះ។

វិធានការទីពីរ គឺបន្ស៊ាំការប្រើប្រាស់ AI ក្នុងស្រុក ដើម្បីបង្កើតការងារកាន់តែប្រសើរឡើង ដោយប្រើឧបករណ៍ភាសាក្នុងស្រុកដែលសមស្របនៅក្នុងវិស័យដែលអាចស្រូបយកកម្លាំងពលកម្មបានច្រើន និងគ្រប់កម្រិតជំនាញ ដូចជាវិស័យទេសចរណ៍ និងអាជីវកម្មកសិកម្មជាដើម។

វិធានការទីបី គឺប្រើប្រាស់តួនាទីសំខាន់របស់រដ្ឋាភិបាល ក្នុងនាមជាអ្នកប្រើប្រាស់ និងជានិយ័តករ AI ដើម្បីកែលម្អសេវាសាធារណៈ គ្រឹះឌីជីថល បទប្បញ្ញត្តិ និងកិច្ចសហប្រតិបត្តិការក្នុងតំបន់៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ធនាគារពិភពលោក៖ សេដ្ឋកិច្ចកម្ពុជារំពឹងថានឹងមានកំណើនត្រឹម ៣.៥% ក្នុងឆ្នាំ ២០២៦ appeared first on Millions times.

ភ្នំពេញ៖ មូលនិធិរូបិយវត្ថុអន្តរជាតិ (IMF) ព្យាករថា សេដ្ឋកិច្ចកម្ពុជានឹងកើនឡើងត្រឹម ៣% ក្នុងឆ្នាំ ២០២៦ ដោយរងសម្ពាធពីការកើនឡើងថ្លៃថាមពល ការថយចុះនៃទេសចរណ៍ និងប្រាក់ផ្ញើពីក្រៅប្រទេសជាដើម។

តាមសេចក្តីប្រកាសរបស់ IMF ចេញផ្សាយនៅថ្ងៃទី ២៨ ខែកញ្ញា ឆ្នាំ ២០២៦ បន្ទាប់ពីក្រុមប្រឹក្សាប្រតិបត្តិ IMF បញ្ចប់ការពិគ្រោះយោបល់ Article IV ឆ្នាំ ២០២៦ ជាមួយកម្ពុជា កំណើនសេដ្ឋកិច្ចត្រូវបានព្យាករថានឹងស្ទុះឡើងដល់ ៤% នៅឆ្នាំ ២០២៧។

IMF បានឱ្យដឹងថា សេដ្ឋកិច្ចកម្ពុជានៅតែមានភាពធន់ក្នុងឆ្នាំ ២០២៥ ដោយទទួលបានការគាំទ្រពីការនាំចេញផលិតផលផលិតកម្ម ការវិនិយោគផ្ទាល់ពីបរទេស និងគម្រោងហេដ្ឋារចនាសម្ព័ន្ធ។ ទោះជាយ៉ាងណា កំណើនបានថយមក ៥,៣% ដោយសារតម្រូវការក្នុងស្រុកនៅមានកម្រិតទាប ស្របពេលវិស័យអចលនទ្រព្យបន្តស្ថិតក្នុងការកែតម្រូវយូរអង្វែង។

IMF ក៏បានបញ្ជាក់ថា ភាពតានតឹងតាមព្រំដែនជាមួយប្រទេសថៃបានប៉ះពាល់ដល់ទេសចរណ៍តាមផ្លូវគោក និងប្រាក់ផ្ញើពីក្រៅប្រទេស ហើយបានជំរុញឱ្យពលករចំណាកស្រុកជិត ១ លាននាក់ ត្រឡប់មកកម្ពុជាវិញ។

ជាមួយគ្នានេះ អតិផរណាបានកើនឡើងខ្លាំងនៅដើមឆ្នាំ ២០២៦ ដំបូងដោយសារការកើនឡើងថ្លៃថាមពល ហើយបន្ទាប់មកបានរាលដាលទៅកាន់ទំនិញ និងសេវាកម្មផ្សេងទៀត។ IMF ព្យាករថា អតិផរណាជាមធ្យមនឹងស្ថិតនៅ ៥,៦% ក្នុងឆ្នាំ ២០២៦ មុនថយមក ៣,១% នៅឆ្នាំ ២០២៧ ខណៈអតិផរណាចុងឆ្នាំត្រូវបានព្យាករនៅ ៥,៨% ក្នុងឆ្នាំ ២០២៦។

សម្រាប់គោលនយោបាយសារពើពន្ធ IMF ណែនាំឱ្យផ្តល់ការគាំទ្រដែលមានគោលដៅច្បាស់លាស់ ដើម្បីទប់ទល់នឹងការថយចុះក្នុងរយៈពេលខ្លី ខណៈរក្សានិរន្តរភាពបំណុល។ IMF ក៏បានណែនាំឱ្យបន្តកាត់បន្ថយការគាំទ្រថ្លៃប្រេងឥន្ធនៈទូលំទូលាយ នៅពេលសម្ពាធតម្លៃថយចុះ និងផ្តោតជំនួយទៅលើគ្រួសារដែលងាយរងគ្រោះ។

ចំពោះវិស័យហិរញ្ញវត្ថុ IMF បានសង្កត់ធ្ងន់លើការកែលម្អស្ថានភាពតារាងតុល្យការរបស់ស្ថាប័នហិរញ្ញវត្ថុ ការដោះស្រាយឥណទានមិនដំណើរការ និងការពង្រឹងការត្រួតពិនិត្យ ជាពិសេសការប្រឈមដែលពាក់ព័ន្ធនឹងអចលនទ្រព្យ អ្នកអភិវឌ្ឍន៍ និងអ្នកខ្ចីប្រាក់ធំៗ។

សម្រាប់រយៈពេលមធ្យម IMF បានលើកឡើងពីសារៈសំខាន់នៃការទាក់ទាញការវិនិយោគផ្ទាល់ពីបរទេសដែលមានគុណភាពខ្ពស់ ការបង្កើនការវិនិយោគក្នុងស្រុក ការពង្រឹងទំនាក់ទំនងរវាងអ្នកផ្គត់ផ្គង់ក្នុងស្រុក និងវិនិយោគិន ការលើកកម្ពស់ជំនាញ និងការផ្ទេរបច្ចេកវិទ្យា ដើម្បីបង្កើនផលិតភាព និងភាពធន់របស់សេដ្ឋកិច្ច។

យ៉ាងណាក៏ដោយ កាលពីថ្ងៃទី២៣ ខែកញ្ញា ឆ្នាំ២០២៦ ធនាគារអភិវឌ្ឍន៍អាស៊ី (ADB) បានព្យាករថា កំណើនសេដ្ឋកិច្ចកម្ពុជាកើនត្រឹម ៣,៩% សម្រាប់ឆ្នាំ២០២៦ ពី ៤,១% ដែលបានព្យាករកាលពីខែកក្កដា ដែលនេះឆ្លុះបញ្ចាំងពីសកម្មភាពខ្សោយជាងការរំពឹងទុក​ក្នុងវិស័យ​ទេសចរណ៍ និងសេវាកម្មពាក់ព័ន្ធនានា។ កំណើនសេដ្ឋកិច្ចត្រូវបានរំពឹងថានឹងកើនឡើងដល់ ៤,៧% ក្នុងឆ្នាំ២០២៧ ជំរុញដោយភាពធន់នៃវិស័យកម្មន្តសាល ការធ្វើពិពិធកម្មការនាំចេញ និង ការវិនិយោគផ្ទាល់ពីបរទេសជាបន្តបន្ទាប់។

លោកស្រី Yasmin Siddiqi នាយិកាប្រចាំប្រទេសកម្ពុជារបស់ ADB មានប្រសាសន៍ថា «សេដ្ឋកិច្ចកម្ពុជាបន្តបង្ហាញភាពធន់។ កំណើនដ៏រឹងមាំនៃការនាំចេញផលិតផលកម្មន្តសាល និងការបន្តមានលំហូរចូលទុនវិនិយោគពីបរទេស កំពុងជួយប៉ះប៉ូវបញ្ហាប្រឈមក្នុងវិស័យទេសចរណ៍។ កិច្ចខិតខំប្រឹងប្រែងជាបន្ត​បន្ទាប់ក្នុងការធ្វើពិពិធកម្មសេដ្ឋកិច្ច ការបង្កើនសមត្ថភាពប្រកួតប្រជែង ការគាំទ្រគ្រួសារងាយរងគ្រោះ ក៏ដូចជាការពង្រឹងភាពធន់នឹងការប្រែប្រួលអាកាសធាតុ មានសារៈសំខាន់ណាស់​ សម្រាប់ការទ្រទ្រង់កំណើនប្រកបដោយបរិយាបន្ន»៕

អត្ថបទ៖ ប៊ី

តាមដានជាមួយយើង៖ Million Times

second...

x

The post IMF ព្យាករថា សេដ្ឋកិច្ចកម្ពុជានឹងមានកំណើនត្រឹម ៣% ក្នុងឆ្នាំ ២០២៦ appeared first on Millions times.

ភ្នំពេញ៖ កម្ពុជា និងនូវែលសេឡង់ បានពិភាក្សាស្វែងរកកាលានុវត្តភាពថ្មីៗ ដើម្បីពង្រីកកិច្ចសហប្រតិបត្តិការលើវិស័យសំខាន់ៗ រួមមាន សេដ្ឋកិច្ច ពាណិជ្ជកម្ម វិនិយោគ បច្ចេកវិទ្យាថ្មី ថាមពលកកើតឡើងវិញ និងទេសចរណ៍ ខណៈឯកអគ្គរដ្ឋទូតថ្មីនូវែលសេឡង់ប្រចាំកម្ពុជា ប្ដេជ្ញាជំរុញទំនាក់ទំនងរវាងប្រទេសទាំងពីរឱ្យកាន់តែរីកចម្រើន និងរឹងមាំ។

ការលើកឡើងនេះធ្វើឡើងក្នុងជំនួបរវាងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវ Raylene Siale Tagaloa Liufalani ឯកអគ្គរដ្ឋទូតថ្មីនូវែលសេឡង់ប្រចាំកម្ពុជា នៅវិមានសន្តិភាព នាព្រឹកថ្ងៃទី២៨ ខែកញ្ញា ឆ្នាំ២០២៦ ក្នុងឱកាសដែលលោកជំទាវចូលជួបសម្ដែងការគួរសម និងពិភាក្សាការងារ។

ក្នុងជំនួបនេះ លោកជំទាវឯកអគ្គរដ្ឋទូតបានសម្ដែងសេចក្ដីសោមនស្សរីករាយ ដែលត្រូវបានតែងតាំងជាឯកអគ្គរដ្ឋទូតថ្មីនូវែលសេឡង់ប្រចាំកម្ពុជា និងបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។

លោកជំទាវបានគូសបញ្ជាក់ថា នូវែលសេឡង់ និងកម្ពុជា គឺជាប្រទេសជាមិត្ត និងជាដៃគូយូរលង់ ហើយនូវែលសេឡង់មានមោទនភាពចំពោះការចូលរួមចំណែកគាំទ្រដល់ដំណើរការស្ដារ កសាង និងអភិវឌ្ឍសង្គម-សេដ្ឋកិច្ចកម្ពុជាកន្លងមក។

កិច្ចសហប្រតិបត្តិការទ្វេភាគីរវាងប្រទេសទាំងពីរ ត្រូវបានលើកឡើងថាមានភាពល្អប្រសើរលើវិស័យសំខាន់ៗ រួមមាន ការបោសសម្អាតគ្រាប់មីន និងគ្រាប់យុទ្ធភណ្ឌមិនទាន់ផ្ទុះ ការគ្រប់គ្រងធនធានទឹក ការប្រែប្រួលអាកាសធាតុ បរិស្ថាន កសិកម្ម ការលើកកម្ពស់ស្ត្រី និងយុវជន ព្រមទាំងការផ្ដល់អាហារូបករណ៍ដល់និស្សិតកម្ពុជាទៅសិក្សានៅប្រទេសនូវែលសេឡង់។

លោកជំទាវឯកអគ្គរដ្ឋទូតក៏បានទទួលស្គាល់តួនាទីសំខាន់របស់កម្ពុជានៅក្នុងតំបន់ និងថ្លែងអំណរគុណដល់កម្ពុជាដែលបានគាំទ្រដល់ការដំឡើងកម្រិតទំនាក់ទំនងនូវែលសេឡង់-អាស៊ាន ទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ»។

លោកជំទាវបានសង្កត់ធ្ងន់ថា ក្នុងអាណត្តិការទូតរបស់លោកជំទាវ នឹងបន្តកិច្ចខិតខំប្រឹងប្រែងក្នុងការជំរុញទំនាក់ទំនង និងកិច្ចសហប្រតិបត្តិការនូវែលសេឡង់-កម្ពុជា ឱ្យកាន់តែរីកចម្រើន និងរឹងមាំបន្ថែមទៀត ទាំងក្នុងក្របខ័ណ្ឌទ្វេភាគី និងតំបន់។

ជាការឆ្លើយតប សម្ដេចធិបតីបានសម្ដែងការអបអរសាទរចំពោះលោកជំទាវ ដែលត្រូវបានតែងតាំងជាឯកអគ្គរដ្ឋទូតថ្មីនូវែលសេឡង់ប្រចាំកម្ពុជា និងបានបង្ហាញជំនឿថា ក្នុងអាណត្តិការទូតរបស់លោកជំទាវ ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ នឹងត្រូវបានបន្តពូនជ្រំឱ្យកាន់តែរីកចម្រើន និងរឹងមាំបន្ថែមទៀត។

សម្ដេចធិបតីបានគូសបញ្ជាក់ថា ប្រទេសទាំងពីរនៅមានសក្តានុពលជាច្រើនទៀត ដើម្បីបន្តពង្រឹង និងពង្រីកទំនាក់ទំនង និងកិច្ចសហប្រតិបត្តិការ។ សម្ដេចធិបតីក៏បានសម្ដែងការអរគុណចំពោះការរួមចំណែករបស់នូវែលសេឡង់ ក្នុងដំណើរការស្ដារ កសាង និងអភិវឌ្ឍសង្គម-សេដ្ឋកិច្ចកម្ពុជា ការបន្តផ្ដល់អាហារូបករណ៍ដល់និស្សិតកម្ពុជាទៅសិក្សានៅនូវែលសេឡង់ និងកិច្ចសហប្រតិបត្តិការលើការបោសសម្អាតគ្រាប់មីន និងគ្រាប់យុទ្ធភណ្ឌមិនទាន់ផ្ទុះ។

ជាមួយគ្នានេះ សម្ដេចធិបតីបានថ្លែងអំណរគុណចំពោះកិច្ចសហប្រតិបត្តិការរបស់នូវែលសេឡង់ពាក់ព័ន្ធនឹងកងកម្លាំងរក្សាសន្តិភាព សម្រាប់បេសកកម្មមនុស្សធម៌ និងរក្សាសន្តិភាពអន្តរជាតិក្រោមឆត្ររបស់អង្គការសហប្រជាជាតិ។

ក្នុងជំនួបនេះ សម្ដេចធិបតី និងលោកជំទាវឯកអគ្គរដ្ឋទូត ក៏បានបន្តពិភាក្សា និងផ្លាស់ប្ដូរយោបល់គ្នា លើការស្វែងរកកាលានុវត្តភាពថ្មីៗបន្ថែមទៀត ដើម្បីជំរុញកិច្ចសហប្រតិបត្តិការទ្វេភាគីឱ្យកាន់តែរីកចម្រើនលើវិស័យដែលមានសក្តានុពល។

វិស័យទាំងនោះរួមមាន សេដ្ឋកិច្ច ពាណិជ្ជកម្ម និងការវិនិយោគ ការផ្ទេរបច្ចេកវិទ្យាថ្មី ថាមពលកកើតឡើងវិញ ទេសចរណ៍ ការអភិវឌ្ឍធនធានមនុស្សតាមរយៈការបណ្ដុះបណ្ដាលជំនាញបច្ចេកទេស និងជំនាញវិជ្ជាជីវៈ ព្រមទាំងការតភ្ជាប់ប្រជាជន និងប្រជាជន។

មុនបញ្ចប់ សម្ដេចធិបតីបានលើកទឹកចិត្តឱ្យលោកជំទាវឯកអគ្គរដ្ឋទូតបន្តកិច្ចសហការ និងភ្ជាប់ទំនាក់ទំនងឱ្យកាន់តែជិតស្និទ្ធជាមួយក្រសួង និងស្ថាប័នកម្ពុជា ដើម្បីបន្តពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរីកចម្រើន និងរឹងមាំបន្ថែមទៀត៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជា និងនូវែលសេឡង់ ជំរុញកិច្ចសហប្រតិបត្តិការលើសេដ្ឋកិច្ច ពាណិជ្ជកម្ម វិនិយោគ និងទេសចរណ៍ appeared first on Millions times.

ភ្នំពេញ៖ ធនាគារអភិវឌ្ឍន៍អាស៊ី (ADB) ព្យាករថា សេដ្ឋកិច្ចកម្ពុជានឹងកើនឡើង ៣,៩% ក្នុងឆ្នាំ២០២៦ ធ្លាក់ចុះពីការព្យាករ ៤,១% កាលពីខែកក្កដា ដោយសារសកម្មភាពក្នុងវិស័យទេសចរណ៍ និងសេវាកម្មពាក់ព័ន្ធមានភាពខ្សោយជាងការរំពឹងទុក។

យោងតាម របាយការណ៍ទស្សនវិស័យអភិវឌ្ឍន៍អាស៊ី ខែមិថុនា ឆ្នាំ២០២៦ ដែល ADB ចេញផ្សាយនៅថ្ងៃទី២៣ ខែកញ្ញា កំណើនសេដ្ឋកិច្ចកម្ពុជាត្រូវបានរំពឹងថានឹងស្ទុះឡើងដល់ ៤,៧% នៅឆ្នាំ២០២៧ ដោយមានការគាំទ្រពីភាពធន់នៃវិស័យកម្មន្តសាល ការធ្វើពិពិធកម្មការនាំចេញ និងលំហូរវិនិយោគផ្ទាល់ពីបរទេសដែលបន្តមាន។

លោកស្រី Yasmin Siddiqi នាយិកាប្រចាំប្រទេសកម្ពុជារបស់ ADB មានប្រសាសន៍ថា សេដ្ឋកិច្ចកម្ពុជាបន្តបង្ហាញភាពធន់ ដោយការនាំចេញផលិតផលកម្មន្តសាលដ៏រឹងមាំ និងលំហូរទុនវិនិយោគពីបរទេសកំពុងជួយប៉ះប៉ូវបញ្ហាប្រឈមក្នុងវិស័យទេសចរណ៍។

លោកស្រីបានលើកឡើងថា កិច្ចខិតខំប្រឹងប្រែងបន្តក្នុងការធ្វើពិពិធកម្មសេដ្ឋកិច្ច ការបង្កើនសមត្ថភាពប្រកួតប្រជែង ការគាំទ្រគ្រួសារងាយរងគ្រោះ និងការពង្រឹងភាពធន់នឹងការប្រែប្រួលអាកាសធាតុ មានសារៈសំខាន់សម្រាប់ការទ្រទ្រង់កំណើនប្រកបដោយបរិយាបន្ន។

ទន្ទឹមនឹងនេះ ADB បានកែសម្រួលការព្យាករអតិផរណាឡើង ដោយសារការកើនឡើងនៃថ្លៃប្រេងពិភពលោក និងថ្លៃដើមនៃការនាំចូល។ អតិផរណាបានកើនពី ២,៦% ក្នុងខែកុម្ភៈ ដល់ ៧,២% ក្នុងខែឧសភា មុនថយមក ៥,៥% ក្នុងខែកក្កដា។

ADB ព្យាករថា អតិផរណាជាមធ្យមនឹងស្ថិតនៅប្រមាណ ៤,៧% ក្នុងឆ្នាំ២០២៦ មុនថយមក ២,៨% នៅឆ្នាំ២០២៧។ វិធានការបន្ធូរបន្ថយពន្ធលើប្រេងឥន្ធនៈ និងតម្លៃប្រាក់រៀលដែលមានស្ថិរភាពជាទូទៅ ត្រូវបានរំពឹងថានឹងជួយបន្ធូរបន្ថយសម្ពាធលើថ្លៃទំនិញ។

គោលនយោបាយសារពើពន្ធត្រូវបានរំពឹងថានឹងបន្តគាំទ្រកំណើន តាមរយៈការវិនិយោគលើហេដ្ឋារចនាសម្ព័ន្ធ មូលធនមនុស្ស និងកម្មវិធីគាំពារសង្គម ព្រមទាំងការអនុវត្តកម្មវិធីអន្តរាគមន៍របស់រាជរដ្ឋាភិបាល។

ADB ក៏រំពឹងថា ឱនភាពគណនីចរន្តរបស់កម្ពុជានឹងកើនឡើងក្នុងឆ្នាំ២០២៦ ដោយសារថ្លៃនាំចូលខ្ពស់ជាងមុន និងចំណូលទេសចរណ៍ខ្សោយ។ ទោះជាយ៉ាងណា លំហូរវិនិយោគផ្ទាល់ពីបរទេសដ៏រឹងមាំ ត្រូវបានរំពឹងថានឹងបន្តគាំទ្រដល់ទុនបម្រុងអន្តរជាតិរបស់កម្ពុជា។

វិស័យឧស្សាហកម្មនៅតែជាកត្តាជំរុញសំខាន់នៃកំណើនសេដ្ឋកិច្ច។ ការនាំចេញផលិតផលកម្មន្តសាលក្រៅពីសម្លៀកបំពាក់បានកើនឡើង ៣៨,៤% នៅឆមាសទី១ ឆ្នាំ២០២៦ ដោយមានការកើនឡើងនៃការនាំចេញផលិតផលមានតម្លៃបន្ថែមខ្ពស់ ដូចជា គ្រឿងបង្គុំអគ្គិសនី គ្រឿងបន្លាស់រថយន្ត សំបកកង់រថយន្ត និងសម្ភារៈនិងគ្រឿងសង្ហារឹមធ្វើពីឈើ។

ការនាំចេញសម្លៀកបំពាក់ក៏បានកើនឡើង ៦,៣% ដល់ ៨ ពាន់លានដុល្លារ ខណៈវិស័យសំណង់ និងអចលនទ្រព្យនៅតែមានភាពទន់ខ្សោយ។

ផ្ទុយទៅវិញ កំណើនវិស័យសេវាកម្មត្រូវបានរំពឹងថានឹងខ្សោយជាងការរំពឹងទុក ដោយសារសកម្មភាពទេសចរណ៍ធ្លាក់ចុះ។ ការមកដល់របស់ភ្ញៀវទេសចរអន្តរជាតិក្នុងឆមាសទី១ ឆ្នាំ២០២៦ បានធ្លាក់ចុះ ៤៧,៩% មកនៅត្រឹម ១,៨ លាននាក់ ដែលស្មើជាងពាក់កណ្តាលបន្តិចនៃកម្រិតមុនពេលកូវីដ១៩។

ADB បានឱ្យដឹងថា ភាពតានតឹងភូមិសាស្ត្រនយោបាយ និងការបិទព្រំដែនគោកកម្ពុជា-ថៃ បានបន្ថែមសម្ពាធលើសកម្មភាពដែលពាក់ព័ន្ធនឹងទេសចរណ៍ រួមមានការដឹកជញ្ជូន បដិសណ្ឋារកិច្ច និងពាណិជ្ជកម្ម។

សម្រាប់វិស័យកសិកម្ម ADB រំពឹងថានឹងរួមចំណែកតិចតួចដល់កំណើនសេដ្ឋកិច្ច ប៉ុន្តែទទួលបានការគាំទ្រពីតម្រូវការនាំចេញផលិតផលដូចជា គ្រាប់ស្វាយចន្ទី ដំឡូងមី និងអង្ករ។

ទស្សនវិស័យសេដ្ឋកិច្ចរបស់កម្ពុជានៅតែប្រឈមនឹងហានិភ័យអវិជ្ជមាន រួមទាំងការរំខានពីអាកាសធាតុអាក្រក់ដែលបង្កដោយបាតុភូតអែលនីញ៉ូ (El Niño) ដែលអាចកើតមាននៅចុងឆ្នាំ២០២៦ និងដើមឆ្នាំ២០២៧៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ADB ព្យាករកំណើនសេដ្ឋកិច្ចកម្ពុជាត្រឹម ៣,៩% ក្នុងឆ្នាំ ២០២៦   appeared first on Millions times.

ភ្នំពេញ៖ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា កំពុងពិនិត្យគម្រោងស្នើសុំបង្កើតតំបន់សេដ្ឋកិច្ចពិសេស មេនហាតធេន ទី២ នៅខេត្តស្វាយរៀង ខណៈតំបន់សេដ្ឋកិច្ចពិសេសនៅទូទាំងប្រទេសបានទាក់ទាញទុនវិនិយោគ ១៣.៨ ពាន់លានដុល្លារ និងបង្កើតការងារប្រមាណ ២៤៦,០០០ កន្លែង គិតត្រឹមពាក់កណ្ដាលឆ្នាំ២០២៦។

គម្រោងនេះត្រូវបានលើកមកពិនិត្យ និងពិភាក្សាក្នុង «កិច្ចប្រជុំច្រកចេញ-ចូលតែមួយ» លើកទី៥ ក្នុងឆ្នាំ២០២៦ ដែលរៀបចំឡើងដោយគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា កាលពីរសៀលថ្ងៃទី៧ ខែកញ្ញា ឆ្នាំ២០២៦។

កិច្ចប្រជុំធ្វើឡើងក្រោមអធិបតីភាព ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដោយមានការចូលរួមពីតំណាងក្រសួង-ស្ថាប័ន និងតំណាងអភិបាលនៃគណៈអភិបាលខេត្តស្វាយរៀង ដើម្បីពិនិត្យពិភាក្សាលើគម្រោងស្នើសុំបង្កើតតំបន់សេដ្ឋកិច្ចពិសេស មេនហាតធេន ទី២។

គម្រោងតំបន់សេដ្ឋកិច្ចពិសេស មេនហាតធេន ទី១ បានដំណើរការដោយទទួលបានជោគជ័យ លើផ្ទៃដី ៣១៥ ហិកតា និងត្រូវបានបង្កើតឡើងតាំងពីឆ្នាំ២០០៤។

យោងតាមក្រុមប្រឹក្សាអភិវឌ្ឍន៍កម្ពុជា តំបន់សេដ្ឋកិច្ចពិសេស គឺជាតំបន់ស្ថិតនៅទីតាំងប្រកបដោយយុទ្ធសាស្ត្រ សក្ដានុពល និងមានហេដ្ឋារចនាសម្ព័ន្ធគាំទ្រត្រៀមរួចជាស្រេច ដែលផ្ដល់ភាពងាយស្រួលដល់សកម្មភាពវិនិយោគ។ ជាទូទៅ តំបន់ទាំងនេះស្ថិតនៅទីតាំងសមស្រប ដើម្បីជួយឱ្យការធ្វើធុរកិច្ចរបស់វិនិយោគិនមានភាពរីកចម្រើន និងទទួលបានជោគជ័យ។

ក្នុងរយៈពេលជិត ២០ ឆ្នាំកន្លងមក តំបន់សេដ្ឋកិច្ចពិសេសបានរួមចំណែកសំខាន់ក្នុងការធ្វើពិពិធកម្មឧស្សាហកម្ម និងប្រភពទុនវិនិយោគនៅកម្ពុជា។ បច្ចុប្បន្ន មានឧស្សាហកម្មគ្រឿងសង្ហារិម ឈើ Veneer និងផលិតផលធ្វើពីឈើ ឧស្សាហកម្មយានយន្ត និងគ្រឿងអេឡិចត្រូនិក ព្រមទាំងឧស្សាហកម្មធុនធ្ងន់ ដូចជារោងចក្រផលិតសំបកកង់យានយន្ត ដែលមានទីតាំងនៅក្នុងតំបន់សេដ្ឋកិច្ចពិសេស។

របាយការណ៍ស្រាវជ្រាវរបស់ក្រុមហ៊ុនអចលនទ្រព្យអន្តរជាតិ APS បានឱ្យដឹងថា ចាប់តាំងពីកម្ពុជាបង្កើតតំបន់សេដ្ឋកិច្ចពិសេសលើកដំបូងក្នុងឆ្នាំ ២០០៥ រហូតដល់ឆ្នាំ២០២៦ តំបន់សេដ្ឋកិច្ចពិសេសទាំងអស់បានទាក់ទាញទុនវិនិយោគប្រមាណជិត ១៤ ពាន់លានដុល្លារអាម៉េរិក និងបង្កើតការងារបានរាប់ម៉ឺននាក់។

បើតាមរបាយការណ៍របស់ APS ដកស្រង់ពីរបាយការណ៍របស់ក្រុមប្រឹក្សាអភិវឌ្ឍន៍កម្ពុជា គិតត្រឹមពាក់កណ្ដាលឆ្នាំ២០២៦ តំបន់សេដ្ឋកិច្ចពិសេសនៅកម្ពុជាមានសរុប ៦៥ តំបន់ ក្នុងនោះ ៣៥ តំបន់កំពុងដំណើរការ។ តំបន់ទាំង៣៥នេះបានទាក់ទាញវិនិយោគប្រមាណ ១៣.៨ ពាន់លានដុល្លារអាម៉េរិក តាមរយៈគម្រោងវិនិយោគចំនួន ១,០៧២ គម្រោង។

តំបន់សេដ្ឋកិច្ចពិសេសទាំង៣៥ដែលកំពុងដំណើរការ មានផ្ទៃដីសរុបប្រមាណ ៨,៣០៤ ហិកតា និងបានបង្កើតការងារប្រមាណ ២៤៦,០០០ កន្លែង ជាមួយនឹងប្រាក់បៀវត្សរ៍សមរម្យសម្រាប់ផ្គត់ផ្គង់ជីវភាពគ្រួសារ។

របាយការណ៍បង្ហាញថា ខេត្តព្រះសីហនុមានតំបន់សេដ្ឋកិច្ចពិសេសច្រើនជាងគេ សរុប ១៤ តំបន់ ប៉ុន្តែមាន៧តំបន់ប៉ុណ្ណោះកំពុងដំណើរការ។ ចំណែកខេត្តស្វាយរៀងមានតំបន់សេដ្ឋកិច្ចពិសេសសរុប ១៣ តំបន់ ហើយទាំង១៣តំបន់កំពុងដំណើរការ។

ក្រៅពីនេះ ខេត្តកោះកុងមានតំបន់សេដ្ឋកិច្ចពិសេសចំនួន៥ ក្នុងនោះ២តំបន់កំពុងដំណើរការ ខេត្តកំពតមាន ៦ តំបន់ ក្នុងនោះ១តំបន់កំពុងដំណើរការ និងខេត្តបន្ទាយមានជ័យមាន ៤ តំបន់ ក្នុងនោះ៣តំបន់កំពុងដំណើរការ។

ដោយឡែក ខេត្តកណ្ដាល ភ្នំពេញ និងកំពង់ស្ពឺ មានតំបន់សេដ្ឋកិច្ចពិសេសសរុបចំនួន ១២ តំបន់ ក្នុងនោះ ៦ តំបន់កំពុងដំណើរការ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ស្វាយរៀង គ្រោងបង្កើតតំបន់សេដ្ឋកិច្ចពិសេស មេនហាតធេន ទី២ appeared first on Millions times.

ភ្នំពេញ៖ រាជរដ្ឋាភិបាលកម្ពុជា គ្រោងចំណាយថវិកាប្រមាណ ១.២២ ពាន់លានដុល្លារអាម៉េរិក លើកញ្ចប់អន្តរាគមន៍ចំនួន ៣ ដែលមានវិធានការសរុប ២៧ ដើម្បីឆ្លើយតបនឹងសភាពការណ៍ពហុវិបត្តិ រក្សាលំនឹងជីវភាពប្រជាពលរដ្ឋ និងគាំទ្រកំណើនសេដ្ឋកិច្ចជាតិក្នុងឆ្នាំ ២០២៦ ព្រមទាំងដាក់ជាមូលដ្ឋានសម្រាប់កំណើនប្រកបដោយចីរភាពនៅឆ្នាំខាងមុខ។

ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បានថ្លែងក្នុងពិធីប្រកាសដាក់ឲ្យអនុវត្តជាផ្លូវការនូវ «កម្មវិធីអន្តរាគមន៍គ្រប់ជ្រុងជ្រោយឆ្លើយតបនឹងសភាពការណ៍ពហុវិបត្តិ» កាលពីថ្ងៃទី៤ ខែកញ្ញា ឆ្នាំ២០២៦ ថា កម្មវិធីនេះត្រូវបានបែងចែកជា ៣ កញ្ចប់អន្តរាគមន៍។

តាមប្រសាសន៍របស់ឯកឧត្តម កញ្ចប់នីមួយៗរួមមានវិធានការជាក់លាក់ពីរប្រភេទ គឺវិធានការដែលមានវិបាកភ្លាមៗ (Immediate Relief Measures) និងវិធានការគោលនយោបាយដែលមានវិបាកក្នុងរយៈពេលខ្លី និងមធ្យម (Short- and Medium-Term Policy Measures)។​

វិធានការទាំង ២៧ មានទំហំចំណាយសរុបប្រមាណ ១,២២៤.២ លានដុល្លារអាម៉េរិក ដែលរាជរដ្ឋាភិបាលរំពឹងថានឹងជួយទប់ទល់នឹងសម្ពាធសេដ្ឋកិច្ចក្នុងរយៈពេលបច្ចុប្បន្ន និងគាំទ្រដល់ការបន្តកំណើននៅបណ្តាឆ្នាំខាងមុខ។

ក្នុងចំណោមកញ្ចប់ទាំង ៣ កញ្ចប់ទី១ ផ្តោតលើ ការរក្សាលំនឹងជីវភាព ដោយផ្សារភ្ជាប់នឹងការបង្កើតការងារ និងផ្តោតជាសំខាន់លើប្រជាជនក្រីក្រ និងងាយរងហានិភ័យ ព្រមទាំងអាជីវករខ្នាតមីក្រូ តូច និងមធ្យម ទាំងក្នុង និងក្រៅប្រព័ន្ធ។

វិធានការសំខាន់មួយ គឺការបន្តអនុវត្តវិធានការចំណាយសារពើពន្ធលើផលិតផលតេលសិលា រហូតដល់ខែវិច្ឆិកា ឆ្នាំ ២០២៦។ វិធានការនេះរួមមានការចាត់ជាបន្ទុករបស់រដ្ឋនូវអាករបន្ថែមលើប្រេងសាំង និងប្រេងម៉ាស៊ូត ការបញ្ចុះអាករពិសេស និងអាករលើតម្លៃបន្ថែមលើប្រេងសាំង និងប្រេងម៉ាស៊ូត ព្រមទាំងការចាត់ជាបន្ទុករបស់រដ្ឋនូវអាករលើតម្លៃបន្ថែមទាំងស្រុងចំពោះការផ្គត់ផ្គង់ឧស្ម័នឥន្ធនៈ LPG។

ឯកឧត្តម អូន ព័ន្ធមុនីរ័ត្ន បានបញ្ជាក់ថា វិធានការទាំងនេះត្រូវបានប្រកាសដាក់ឲ្យអនុវត្តភ្លាមៗ និងជាដំណាក់កាល ចាប់តាំងពីពាក់កណ្តាលខែមីនា ឆ្នាំ ២០២៦ ដើម្បីបន្ធូរបន្ថយការឡើងថ្លៃប្រេងឥន្ធនៈ និងឧស្ម័នឥន្ធនៈ ព្រមទាំងធានានិរន្តរភាពនៃការផ្គត់ផ្គង់។

ជារួម រាជរដ្ឋាភិបាលត្រូវលះបង់ចំណូលប្រមាណ ជាង ៥០ លានដុល្លារអាម៉េរិកក្នុងមួយខែ ក្នុងការអនុវត្តវិធានការនេះ។

ឯកឧត្តមបានពន្យល់ថា ការសម្រេចបន្តវិធានការចំណាយសារពើពន្ធនេះ ត្រូវបានថ្លឹងថ្លែងរវាងប្រសិទ្ធភាព និងភាពរហ័សក្នុងការកាត់បន្ថយសម្ពាធអតិផរណា ជាមួយនឹងការបាត់បង់ចំណូលពន្ធរបស់រាជរដ្ឋាភិបាល។

ការកើនឡើងខ្លាំងនៃថ្លៃប្រេងឥន្ធនៈអាចជំរុញឲ្យថ្លៃដឹកជញ្ជូន ថ្លៃដើមផលិតកម្ម និងថ្លៃទំនិញប្រើប្រាស់ទូទៅកើនឡើងយ៉ាងឆាប់រហ័ស ដែលបង្កើនសម្ពាធលើជីវភាពប្រជាពលរដ្ឋ ជាពិសេសគ្រួសារដែលមានចំណូលទាប និងមធ្យម អ្នកប្រកបរបរក្រៅប្រព័ន្ធ និងសហគ្រាសធុនមីក្រូ តូច និងមធ្យម។

ឯកឧត្តម បានចាត់ទុកការលើកលែងពន្ធនាំចូលលើផលិតផលតេលសិលា ក្នុងស្ថានភាពមិនប្រាកដប្រជា ថាជា «ខែលការពារចរន្តសេដ្ឋកិច្ច» ដែលអាចជួយកាត់បន្ថយសម្ពាធបានឆាប់រហ័ស និងរួមចំណែកធានាសមធម៌សង្គម ទោះបីរាជរដ្ឋាភិបាលត្រូវបាត់បង់ចំណូលថវិកាជាតិមួយផ្នែកក្នុងរយៈពេលខ្លីក៏ដោយ។

វិធានការទី២ ក្នុងកញ្ចប់នេះ គឺ កម្មវិធីឧបត្ថម្ភសាច់ប្រាក់ ជូនគ្រួសារក្រីក្រ គ្រួសារងាយរងហានិភ័យ និងអ្នកប្រកបរបររត់រ៉ឺម៉កកង់បី ក្នុងអំឡុងមានសម្ពាធថ្លៃប្រេងឥន្ធនៈ និងឧស្ម័នឥន្ធនៈ។

កម្មវិធីនេះនឹងបើកផ្តល់ប្រាក់ឧបត្ថម្ភចំនួន ៤ លើក ដោយមួយខែម្តង។ រាជរដ្ឋាភិបាលបានសម្រេចបើកផ្តល់ប្រាក់ឧបត្ថម្ភលើកដំបូងក្នុងខែកញ្ញា ឆ្នាំ ២០២៦ ខណៈការរៀបចំអនុវត្តជាក់ស្តែងនឹងត្រូវប្រកាសជាផ្លូវការនាពេលដ៏ខ្លីខាងមុខ។

ឯកឧត្តម អូន ព័ន្ធមុនីរ័ត្ន បានឲ្យដឹងថា កម្មវិធីនេះមានលក្ខណៈស្រដៀងនឹង «កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ក្នុងអំឡុងមានសម្ពាធអតិផរណា» ដែលត្រូវបានអនុវត្តកាលពីឆ្នាំ ២០២២-២០២៣ ហើយមានគោលដៅបន្ធូរបន្ទុកជីវភាពរបស់ប្រជាជនក្រីក្រ ខណៈអត្រាអតិផរណាបានកើនឡើងជាបន្តបន្ទាប់ក្នុងរយៈពេលប៉ុន្មានខែកន្លងមក។

វិធានការទី៣ គឺ កម្មវិធីកសាងហេដ្ឋារចនាសម្ព័ន្ធនៅមូលដ្ឋាន ដោយមានការចូលរួមពីសហគមន៍ ដែលផ្តោតលើការកសាង និងស្តារហេដ្ឋារចនាសម្ព័ន្ធនានា រួមមានសាលារៀន ផ្លូវជនបទ និងប្រព័ន្ធធារាសាស្ត្រ។

កម្មវិធីនេះអាចបង្កើតការងារសម្រាប់ប្រជាពលរដ្ឋនៅតាមសហគមន៍ក្នុងរង្វង់ប្រមាណ ២២ ម៉ឺននាក់។ ក្រៅពីការគាំទ្រដល់ជីវភាពប្រចាំថ្ងៃ វាក៏មានគោលដៅលើកកម្ពស់ផលិតភាពកសិកម្ម ពង្រឹងវិស័យអប់រំ និងជួយអភិវឌ្ឍជំនាញ ដើម្បីបង្កើតមុខរបរ និងប្រភពចំណូលបន្ថែមសម្រាប់ប្រជាពលរដ្ឋនៅតាមមូលដ្ឋាន។

កម្មវិធីនេះត្រូវបានដាក់ឲ្យអនុវត្តក្រោមក្របខណ្ឌហិរញ្ញប្បទានពីធនាគារពិភពលោក។

តាមរយៈកញ្ចប់អន្តរាគមន៍ទាំង ៣ រាជរដ្ឋាភិបាលមានគោលដៅឆ្លើយតបចំពោះសម្ពាធដែលកំពុងកើតមានលើជីវភាពប្រជាពលរដ្ឋ និងសកម្មភាពសេដ្ឋកិច្ច ព្រមទាំងបង្កើតលក្ខខណ្ឌគាំទ្រដល់ការងារ ការប្រើប្រាស់ និងផលិតកម្ម ដើម្បីឱ្យសេដ្ឋកិច្ចកម្ពុជាបន្តស្ថិតលើមាគ៌ានៃកំណើនប្រកបដោយចីរភាពនៅបណ្តាឆ្នាំខាងមុខ៕

ភ្នំពេញ៖ រាជរដ្ឋាភិបាលកម្ពុជា គ្រោងចំណាយថវិកាប្រមាណ ១.២២ ពាន់លានដុល្លារអាម៉េរិក លើកញ្ចប់អន្តរាគមន៍ចំនួន ៣ ដែលមានវិធានការសរុប ២៧ ដើម្បីឆ្លើយតបនឹងសភាពការណ៍ពហុវិបត្តិ រក្សាលំនឹងជីវភាពប្រជាពលរដ្ឋ និងគាំទ្រកំណើនសេដ្ឋកិច្ចជាតិក្នុងឆ្នាំ ២០២៦ ព្រមទាំងដាក់ជាមូលដ្ឋានសម្រាប់កំណើនប្រកបដោយចីរភាពនៅឆ្នាំខាងមុខ។

ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បានថ្លែងក្នុងពិធីប្រកាសដាក់ឲ្យអនុវត្តជាផ្លូវការនូវ «កម្មវិធីអន្តរាគមន៍គ្រប់ជ្រុងជ្រោយឆ្លើយតបនឹងសភាពការណ៍ពហុវិបត្តិ» កាលពីថ្ងៃទី៤ ខែកញ្ញា ឆ្នាំ២០២៦ ថា កម្មវិធីនេះត្រូវបានបែងចែកជា ៣ កញ្ចប់អន្តរាគមន៍។

តាមប្រសាសន៍របស់ឯកឧត្តម កញ្ចប់នីមួយៗរួមមានវិធានការជាក់លាក់ពីរប្រភេទ គឺវិធានការដែលមានវិបាកភ្លាមៗ (Immediate Relief Measures) និងវិធានការគោលនយោបាយដែលមានវិបាកក្នុងរយៈពេលខ្លី និងមធ្យម (Short- and Medium-Term Policy Measures)។​

វិធានការទាំង ២៧ មានទំហំចំណាយសរុបប្រមាណ ១,២២៤.២ លានដុល្លារអាម៉េរិក ដែលរាជរដ្ឋាភិបាលរំពឹងថានឹងជួយទប់ទល់នឹងសម្ពាធសេដ្ឋកិច្ចក្នុងរយៈពេលបច្ចុប្បន្ន និងគាំទ្រដល់ការបន្តកំណើននៅបណ្តាឆ្នាំខាងមុខ។

ក្នុងចំណោមកញ្ចប់ទាំង ៣ កញ្ចប់ទី១ ផ្តោតលើ ការរក្សាលំនឹងជីវភាព ដោយផ្សារភ្ជាប់នឹងការបង្កើតការងារ និងផ្តោតជាសំខាន់លើប្រជាជនក្រីក្រ និងងាយរងហានិភ័យ ព្រមទាំងអាជីវករខ្នាតមីក្រូ តូច និងមធ្យម ទាំងក្នុង និងក្រៅប្រព័ន្ធ។

វិធានការសំខាន់មួយ គឺការបន្តអនុវត្តវិធានការចំណាយសារពើពន្ធលើផលិតផលតេលសិលា រហូតដល់ខែវិច្ឆិកា ឆ្នាំ ២០២៦។ វិធានការនេះរួមមានការចាត់ជាបន្ទុករបស់រដ្ឋនូវអាករបន្ថែមលើប្រេងសាំង និងប្រេងម៉ាស៊ូត ការបញ្ចុះអាករពិសេស និងអាករលើតម្លៃបន្ថែមលើប្រេងសាំង និងប្រេងម៉ាស៊ូត ព្រមទាំងការចាត់ជាបន្ទុករបស់រដ្ឋនូវអាករលើតម្លៃបន្ថែមទាំងស្រុងចំពោះការផ្គត់ផ្គង់ឧស្ម័នឥន្ធនៈ LPG។

ឯកឧត្តម អូន ព័ន្ធមុនីរ័ត្ន បានបញ្ជាក់ថា វិធានការទាំងនេះត្រូវបានប្រកាសដាក់ឲ្យអនុវត្តភ្លាមៗ និងជាដំណាក់កាល ចាប់តាំងពីពាក់កណ្តាលខែមីនា ឆ្នាំ ២០២៦ ដើម្បីបន្ធូរបន្ថយការឡើងថ្លៃប្រេងឥន្ធនៈ និងឧស្ម័នឥន្ធនៈ ព្រមទាំងធានានិរន្តរភាពនៃការផ្គត់ផ្គង់។

ជារួម រាជរដ្ឋាភិបាលត្រូវលះបង់ចំណូលប្រមាណ ជាង ៥០ លានដុល្លារអាម៉េរិកក្នុងមួយខែ ក្នុងការអនុវត្តវិធានការនេះ។

ឯកឧត្តមបានពន្យល់ថា ការសម្រេចបន្តវិធានការចំណាយសារពើពន្ធនេះ ត្រូវបានថ្លឹងថ្លែងរវាងប្រសិទ្ធភាព និងភាពរហ័សក្នុងការកាត់បន្ថយសម្ពាធអតិផរណា ជាមួយនឹងការបាត់បង់ចំណូលពន្ធរបស់រាជរដ្ឋាភិបាល។

ការកើនឡើងខ្លាំងនៃថ្លៃប្រេងឥន្ធនៈអាចជំរុញឲ្យថ្លៃដឹកជញ្ជូន ថ្លៃដើមផលិតកម្ម និងថ្លៃទំនិញប្រើប្រាស់ទូទៅកើនឡើងយ៉ាងឆាប់រហ័ស ដែលបង្កើនសម្ពាធលើជីវភាពប្រជាពលរដ្ឋ ជាពិសេសគ្រួសារដែលមានចំណូលទាប និងមធ្យម អ្នកប្រកបរបរក្រៅប្រព័ន្ធ និងសហគ្រាសធុនមីក្រូ តូច និងមធ្យម។

ឯកឧត្តម បានចាត់ទុកការលើកលែងពន្ធនាំចូលលើផលិតផលតេលសិលា ក្នុងស្ថានភាពមិនប្រាកដប្រជា ថាជា «ខែលការពារចរន្តសេដ្ឋកិច្ច» ដែលអាចជួយកាត់បន្ថយសម្ពាធបានឆាប់រហ័ស និងរួមចំណែកធានាសមធម៌សង្គម ទោះបីរាជរដ្ឋាភិបាលត្រូវបាត់បង់ចំណូលថវិកាជាតិមួយផ្នែកក្នុងរយៈពេលខ្លីក៏ដោយ។

វិធានការទី២ ក្នុងកញ្ចប់នេះ គឺ កម្មវិធីឧបត្ថម្ភសាច់ប្រាក់ ជូនគ្រួសារក្រីក្រ គ្រួសារងាយរងហានិភ័យ និងអ្នកប្រកបរបររត់រ៉ឺម៉កកង់បី ក្នុងអំឡុងមានសម្ពាធថ្លៃប្រេងឥន្ធនៈ និងឧស្ម័នឥន្ធនៈ។

កម្មវិធីនេះនឹងបើកផ្តល់ប្រាក់ឧបត្ថម្ភចំនួន ៤ លើក ដោយមួយខែម្តង។ រាជរដ្ឋាភិបាលបានសម្រេចបើកផ្តល់ប្រាក់ឧបត្ថម្ភលើកដំបូងក្នុងខែកញ្ញា ឆ្នាំ ២០២៦ ខណៈការរៀបចំអនុវត្តជាក់ស្តែងនឹងត្រូវប្រកាសជាផ្លូវការនាពេលដ៏ខ្លីខាងមុខ។

ឯកឧត្តម អូន ព័ន្ធមុនីរ័ត្ន បានឲ្យដឹងថា កម្មវិធីនេះមានលក្ខណៈស្រដៀងនឹង «កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ក្នុងអំឡុងមានសម្ពាធអតិផរណា» ដែលត្រូវបានអនុវត្តកាលពីឆ្នាំ ២០២២-២០២៣ ហើយមានគោលដៅបន្ធូរបន្ទុកជីវភាពរបស់ប្រជាជនក្រីក្រ ខណៈអត្រាអតិផរណាបានកើនឡើងជាបន្តបន្ទាប់ក្នុងរយៈពេលប៉ុន្មានខែកន្លងមក។

វិធានការទី៣ គឺ កម្មវិធីកសាងហេដ្ឋារចនាសម្ព័ន្ធនៅមូលដ្ឋាន ដោយមានការចូលរួមពីសហគមន៍ ដែលផ្តោតលើការកសាង និងស្តារហេដ្ឋារចនាសម្ព័ន្ធនានា រួមមានសាលារៀន ផ្លូវជនបទ និងប្រព័ន្ធធារាសាស្ត្រ។

កម្មវិធីនេះអាចបង្កើតការងារសម្រាប់ប្រជាពលរដ្ឋនៅតាមសហគមន៍ក្នុងរង្វង់ប្រមាណ ២២ ម៉ឺននាក់។ ក្រៅពីការគាំទ្រដល់ជីវភាពប្រចាំថ្ងៃ វាក៏មានគោលដៅលើកកម្ពស់ផលិតភាពកសិកម្ម ពង្រឹងវិស័យអប់រំ និងជួយអភិវឌ្ឍជំនាញ ដើម្បីបង្កើតមុខរបរ និងប្រភពចំណូលបន្ថែមសម្រាប់ប្រជាពលរដ្ឋនៅតាមមូលដ្ឋាន។

កម្មវិធីនេះត្រូវបានដាក់ឲ្យអនុវត្តក្រោមក្របខណ្ឌហិរញ្ញប្បទានពីធនាគារពិភពលោក។

តាមរយៈកញ្ចប់អន្តរាគមន៍ទាំង ៣ រាជរដ្ឋាភិបាលមានគោលដៅឆ្លើយតបចំពោះសម្ពាធដែលកំពុងកើតមានលើជីវភាពប្រជាពលរដ្ឋ និងសកម្មភាពសេដ្ឋកិច្ច ព្រមទាំងបង្កើតលក្ខខណ្ឌគាំទ្រដល់ការងារ ការប្រើប្រាស់ និងផលិតកម្ម ដើម្បីឱ្យសេដ្ឋកិច្ចកម្ពុជាបន្តស្ថិតលើមាគ៌ានៃកំណើនប្រកបដោយចីរភាពនៅបណ្តាឆ្នាំខាងមុខ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជា គ្រោងចំណាយ ១.២២ ពាន់លានដុល្លារ លើកញ្ចប់អន្តរាគមន៍ ៣ ជំរុញកំណើនសេដ្ឋកិច្ច appeared first on Millions times.

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងធនាគារនីហរ័ណ-អាហរ័ណនៃប្រទេសចិន (China EXIM Bank – CEXIM) បានពិភាក្សាពីការពង្រឹងកិច្ចសហប្រតិបត្តិការហិរញ្ញប្បទាន និងការវិនិយោគ ដើម្បីជំរុញការអភិវឌ្ឍគម្រោងហេដ្ឋារចនាសម្ព័ន្ធយុទ្ធសាស្ត្រនានានៅកម្ពុជា ជាពិសេសការអភិវឌ្ឍរបៀងសេដ្ឋកិច្ចអមសងខាងគម្រោងគ្រប់គ្រងធនធានទឹកចម្រុះហ្វូណនតេជោ។

នាព្រឹកថ្ងៃទី២៥ ខែសីហា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងអនុប្រធានទី១ ក.អ.ក. បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូជាន់ខ្ពស់ CEXIM ដឹកនាំដោយលោក Chen Huaiyu ប្រធានក្រុមប្រឹក្សាភិបាល CEXIM អំពីកិច្ចសហប្រតិបត្តិការរវាងប្រទេសទាំងពីរ ក្នុងការជំរុញការអភិវឌ្ឍគម្រោងហេដ្ឋារចនាសម្ព័ន្ធយុទ្ធសាស្ត្រនៅកម្ពុជា។

ក្នុងជំនួប ឯកឧត្តម ស៊ុន ចាន់ថុល បានរំលឹក និងថ្លែងអំណរគុណចំពោះមិត្តភាពយ៉ាងជិតស្និទ្ធជាមួយប្រទេសចិន ដែលជាមិត្តដែកថែបរបស់កម្ពុជា និងតែងផ្តល់ការគាំទ្រយ៉ាងសកម្ម និងទាន់ពេលវេលាក្នុងការកសាងគម្រោងហេដ្ឋារចនាសម្ព័ន្ធរូបវន្តធំៗនៅកម្ពុជា។

ឯកឧត្តមបានធ្វើបច្ចុប្បន្នភាពអំពីវឌ្ឍនភាពការងារនៃគម្រោងគ្រប់គ្រងធនធានទឹកចម្រុះហ្វូណនតេជោ ព្រមទាំងបង្ហាញចក្ខុវិស័យក្នុងការអភិវឌ្ឍរបៀងសេដ្ឋកិច្ចអមសងខាងគម្រោង និងការតភ្ជាប់បណ្តាញហេដ្ឋារចនាសម្ព័ន្ធពាក់ព័ន្ធ។

គោលដៅគឺដើម្បីបង្កើនភាពប្រកួតប្រជែងរបស់កម្ពុជាក្នុងវិស័យដឹកជញ្ជូន និងភស្តុភារកម្ម ខណៈដែលការអភិវឌ្ឍក៏ត្រូវគិតគូរខ្ពស់ដល់បរិស្ថាន និងប្រព័ន្ធជីវៈចម្រុះ ដើម្បីទាញយកប្រយោជន៍ជូនប្រជាពលរដ្ឋដែលរស់នៅតាមដងព្រែក។

ឯកឧត្តម ស៊ុន ចាន់ថុល ក៏បានជម្រាបជូនគណៈប្រតិភូអំពីបេសកកម្មផ្សព្វផ្សាយ និងទាក់ទាញការវិនិយោគ ដែលនឹងប្រព្រឹត្តទៅនាពេលខាងមុខនៅទីក្រុង Xiamen និងទីក្រុង Shenzhen ប្រទេសចិន។

ក្នុងនោះ ឯកឧត្តមបានគាំទ្រគំនិតផ្តួចផ្តើមរបស់លោក Chen Huaiyu ក្នុងការរៀបចំវេទិកាផ្សព្វផ្សាយ និងទាក់ទាញការវិនិយោគរួមគ្នា ដើម្បីទាក់ទាញវិនិយោគិនឱ្យមកបណ្តាក់ទុនអភិវឌ្ឍក្នុងតំបន់របៀងសេដ្ឋកិច្ចអមសងខាងគម្រោងហ្វូណនតេជោ។

ឯកឧត្តមក៏បានបញ្ជាក់ពីការប្តេជ្ញាចិត្តរបស់រាជរដ្ឋាភិបាលក្នុងការបន្តកែលម្អបរិយាកាសធុរកិច្ច និងការវិនិយោគ ដើម្បីធ្វើឱ្យកម្ពុជាក្លាយជាគោលដៅវិនិយោគដែលមានភាពប្រកួតប្រជែងខ្ពស់ក្នុងតំបន់អាស៊ាននាពេលខាងមុខ។

ជាការឆ្លើយតប លោក Chen Huaiyu បានរំលឹកដោយក្តីរីករាយអំពីជំនួប និងកិច្ចសន្ទនាជាមួយឯកឧត្តម ស៊ុន ចាន់ថុល កាលពីឆ្នាំកន្លងទៅនៅទីក្រុង Xiamen និងបានសម្តែងការចាប់អារម្មណ៍ជាថ្មីចំពោះគម្រោងគ្រប់គ្រងធនធានទឹកចម្រុះហ្វូណនតេជោ បន្ទាប់ពីបានសិក្សាស្វែងយល់យ៉ាងលម្អិត និងបានឃើញវឌ្ឍនភាពការងារដែលកំពុងអនុវត្ត។

លោកបានគូសបញ្ជាក់ថា ទំនាក់ទំនងទ្វេភាគីរវាងកម្ពុជា និងចិន កាន់តែមានភាពរឹងមាំ និងស៊ីជម្រៅពីមួយថ្ងៃទៅមួយថ្ងៃ ដោយសារមិត្តភាពពិតប្រាកដ និងការប្តេជ្ញាចិត្តនយោបាយខ្ពស់ពីរដ្ឋាភិបាលនៃប្រទេសទាំងពីរ។

លោកបានបន្ថែមថា ក្រោមចក្ខុវិស័យវែងឆ្ងាយរបស់ថ្នាក់ដឹកនាំកំពូល ភាគីទាំងពីរកម្ពុជា-ចិន មានកាតព្វកិច្ចរួមគ្នាក្នុងការបន្តពង្រឹង និងពង្រីកទំនាក់ទំនងនេះឱ្យកាន់តែរឹងមាំបន្ថែមទៀត។

លោក Chen Huaiyu បានជម្រាបថា ក្នុងរយៈពេលពីរទសវត្សរ៍ចុងក្រោយ CEXIM បានបំពេញបេសកកម្មយ៉ាងសកម្មក្នុងការចូលរួមអភិវឌ្ឍសេដ្ឋកិច្ចជាមួយបណ្តាប្រទេសជាដៃគូ រួមទាំងប្រទេសកម្ពុជាផងដែរ។

លោកក៏បានសម្តែងការកោតសរសើរចំពោះការអភិវឌ្ឍរបស់កម្ពុជា បន្ទាប់ពីបានធ្វើដំណើរមកដល់ប្រទេស ហើយបានគូសបញ្ជាក់ថា ស្ថិរភាពនយោបាយ លំនឹងម៉ាក្រូសេដ្ឋកិច្ច និងទំនាក់ទំនងដ៏រឹងមាំរវាងកម្ពុជា និងចិន គឺជាកត្តាស្នូលក្នុងការគាំទ្រដល់ការអភិវឌ្ឍប្រកបដោយចីរភាព។

ជំនួបពិភាក្សាការងារបានបញ្ចប់ក្រោមបរិយាកាសយោគយល់គ្នា ទំនុកចិត្តខ្ពស់ និងការប្តេជ្ញាចិត្តរួមគ្នា ក្នុងការបន្តពង្រឹងកិច្ចសហប្រតិបត្តិការហិរញ្ញប្បទាន និងការវិនិយោគ ដើម្បីជំរុញការអភិវឌ្ឍសេដ្ឋកិច្ច និងសង្គមជាតិ ព្រមទាំងលើកកម្ពស់ជីវភាពប្រជាជននៃប្រទេសទាំងពីរ កម្ពុជា-ចិន ឱ្យកាន់តែប្រសើរឡើង៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជា-ចិន ជំរុញកិច្ចសហប្រតិបត្តិការលើគម្រោងហេដ្ឋារចនាសម្ព័ន្ធ និងតំបន់សេដ្ឋកិច្ចតាមព្រែកហ្វូណនតេជោ appeared first on Millions times.

ខេត្តបាត់ដំបងបានបង្ហាញពីសក្តានុពលកសិ-ឧស្សាហកម្ម និងឱកាសវិនិយោគក្នុងការពង្រីកការកែច្នៃកសិផល និងផលិតកម្មដែលមានតម្លៃបន្ថែម ខណៈវិស័យកសិកម្មមានចំណែក ៦២,៣២% នៃសេដ្ឋកិច្ចខេត្ត។

ការបង្ហាញនេះធ្វើឡើងក្នុងឱកាសដែលឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងឯកឧត្តម វ៉ាង វិនពីន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា បានចុះទស្សនកិច្ចនៅខេត្តបាត់ដំបង កាលពីថ្ងៃទី២២ ខែសីហា ដើម្បីស្វែងយល់ពីសក្តានុពលសេដ្ឋកិច្ច និងវិនិយោគរបស់ខេត្ត ពិសេសឱកាសពង្រីកការកែច្នៃកសិផល និងផលិតកម្មដែលមានតម្លៃបន្ថែម។

អមដំណើរដំណើរទស្សនកិច្ចនេះមានឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងឯកឧត្តម សុខ លូ អភិបាលនៃគណៈអភិបាលខេត្តបាត់ដំបង ព្រមទាំងថ្នាក់ដឹកនាំ និងមន្ត្រីរាជការពាក់ព័ន្ធ។

ក្នុងឱកាសនោះ រដ្ឋបាលខេត្តបានធ្វើបទបង្ហាញអំពីសក្តានុពលសេដ្ឋកិច្ច ហេដ្ឋារចនាសម្ព័ន្ធ និងឱកាសវិនិយោគរបស់ខេត្ត។ តាមការបង្ហាញនេះ វិស័យកសិកម្មមានចំណែក ៦២,៣២% នៃសេដ្ឋកិច្ចខេត្ត ខណៈក្នុងឆ្នាំ២០២៥ ខេត្តមានបរិមាណស្រូវលើសតម្រូវការជាង ១,៦៧លានតោន។

បរិមាណស្រូវលើសតម្រូវការនេះត្រូវបានចាត់ទុកជាមូលដ្ឋានសំខាន់សម្រាប់ការពង្រីកឧស្សាហកម្មកែច្នៃកសិផលនៅក្នុងខេត្ត។ បច្ចុប្បន្ន ខេត្តបាត់ដំបងមានរោងចក្រ និងសហគ្រាសសរុប ៦២៨មូលដ្ឋាន ក្នុងនោះមានរោងម៉ាស៊ីនកិនស្រូវចុះបញ្ជីចំនួន ១៨៤មូលដ្ឋាន។

ក្នុងដំណើរទស្សនកិច្ច គណៈប្រតិភូបានចុះស្វែងយល់ពីប្រតិបត្តិការកិន និងកែច្នៃស្រូវអង្កររបស់ក្រុមហ៊ុន City Rice ព្រមទាំងតួនាទីរបស់ក្រុមហ៊ុនក្នុងការតភ្ជាប់ខ្សែច្រវាក់ផលិតកម្មស្រូវរបស់កសិករទៅកាន់ទីផ្សារអន្តរជាតិ។

ក្រុមហ៊ុន City Rice ត្រូវបានបង្កើតឡើងក្នុងឆ្នាំ២០១២ ក្នុងគោលដៅចូលរួមលើកកម្ពស់ខ្សែច្រវាក់តម្លៃស្រូវអង្ករកម្ពុជា និងកេរ្តិ៍ឈ្មោះអង្ករកម្ពុជានៅលើឆាកអន្តរជាតិ។

គណៈប្រតិភូក៏បានបន្តទស្សនកិច្ចនៅក្រុមហ៊ុន Misota Food ដែលជាក្រុមហ៊ុនកែច្នៃផ្លែឈើ និងកសិផលក្នុងស្រុកទៅជាផលិតផលអាហារដែលមានតម្លៃបន្ថែមខ្ពស់។ ក្រុមហ៊ុនកំពុងធ្វើទំនើបកម្មផលិតកម្ម ដើម្បីបង្កើនផលិតភាព ប្រសិទ្ធភាព និងពង្រីកសមត្ថភាពផលិតឱ្យស្របតាមតម្រូវការទីផ្សារ។

ដំណើរទស្សនកិច្ចនេះបានបង្ហាញពីឱកាសក្នុងការប្រើប្រាស់សក្តានុពលកសិកម្មរបស់ខេត្តបាត់ដំបង ដើម្បីទាក់ទាញការវិនិយោគ ពង្រឹងការតភ្ជាប់រវាងវិស័យកសិកម្ម និងឧស្សាហកម្ម ពង្រីកការកែច្នៃក្នុងស្រុក និងបង្កើនតម្លៃបន្ថែម និងភាពប្រកួតប្រជែងរបស់ផលិតផលកម្ពុជានៅលើទីផ្សារជាតិ និងអន្តរជាត៕

អត្ថបទ៖ ប៊ី

តាមដានជាមួយយើង៖ Million Times

second...

x

The post បាត់ដំបងបង្ហាញសក្តានុពលកសិ-ឧស្សាហកម្ម ខណៈវិស័យកសិកម្មរួមចំណែកជាង ៦០% នៃសេដ្ឋកិច្ចខេត្ត appeared first on Millions times.

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានបិទវគ្គបណ្តុះបណ្តាលតម្រង់ទិសជាស៊េរី ស្តីពី «ការគ្រប់គ្រងសេដ្ឋកិច្ច និងហិរញ្ញវត្ថុសាធារណៈ» ជូនមន្ត្រីរាជការក្របខ័ណ្ឌថ្មី ឆ្នាំ២០២៣ និងឆ្នាំ២០២៤ ដោយផ្តោតលើការពង្រឹងចំណេះដឹង និងជំនាញវិជ្ជាជីវៈ ដើម្បីចូលរួមគាំទ្រកំណែទម្រង់ការគ្រប់គ្រងហិរញ្ញវត្ថុសាធារណៈ។

ពិធីបិទវគ្គនេះធ្វើឡើងនៅរសៀលថ្ងៃទី២១ ខែសីហា ឆ្នាំ២០២៦ នៅសាលាជាតិគយ នៃអគ្គនាយកដ្ឋានគយ និងរដ្ឋាករកម្ពុជា ក្រោមការដឹកនាំរបស់ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និងជាប្រធានក្រុមការងារកសាងសមត្ថភាព នៃក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមពីថ្នាក់ដឹកនាំក្រសួង មន្ត្រីរាជការ ឧទ្ទេសាចារ្យ និងសិក្ខាកាម សរុបប្រមាណ ៤៨០នាក់។

ក្នុងពិធីនេះ ឯកឧត្តមបណ្ឌិតសភាចារ្យ ហ៊ាន សាហ៊ីប បានអបអរសាទរដល់សិក្ខាកាមដែលបានខិតខំរៀនសូត្រ និងបញ្ចប់វគ្គបណ្តុះបណ្តាលដោយជោគជ័យ។ លោកបានចាត់ទុកវិញ្ញាបនបត្រដែលសិក្ខាកាមទទួលបានថា ជាសក្ខីភាពនៃចំណេះដឹងដែលទទួលបានពីវគ្គសិក្សា និងជាគ្រឹះសម្រាប់ការកសាងចំណេះដឹង ចំណេះធ្វើ និងអនាគតអាជីពជាមន្ត្រីរាជការ។

ឯកឧត្តបានគូសរំលេចថា កំណែទម្រង់ការគ្រប់គ្រងហិរញ្ញវត្ថុសាធារណៈបានចាប់ផ្តើមតាំងពីឆ្នាំ២០០៤ ហើយបច្ចុប្បន្នកំពុងស្ថិតក្នុងដំណាក់កាលទី៤ ដោយមានគោលដៅឆ្ពោះទៅរក «គណនេយ្យភាពសមិទ្ធកម្ម» តាមរយៈការអនុវត្តអង្គភាពថវិកា និងថវិកាព័ត៌មានសមិទ្ធកម្ម ព្រមទាំងការប្រើប្រាស់ប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុ (FMIS) ដើម្បីធ្វើឌីជីថលូបនីយកម្មការអនុវត្តថវិកា។

ឯកឧត្តបានបញ្ជាក់ថា សមិទ្ធផលដែលសម្រេចបានកន្លងមក មិនមានន័យថាការងារកែទម្រង់ត្រូវបានបញ្ចប់ទាំងស្រុងនោះទេ។ កម្ពុជានៅតែត្រូវបន្តពង្រឹងភាពជឿទុកចិត្តនៃថវិកា គណនេយ្យភាពហិរញ្ញវត្ថុ និងការផ្សារភ្ជាប់ថវិកាទៅនឹងគោលនយោបាយ ខណៈសិទ្ធិអំណាច ភាពជាម្ចាស់ និងការទទួលខុសត្រូវកាន់តែច្រើនត្រូវបានផ្ទេរទៅកាន់អង្គភាពថវិកា ក្រសួង ស្ថាប័ន និងរដ្ឋបាលថ្នាក់ក្រោមជាតិ។ ក្នុងបរិបទនេះ ការកសាងសមត្ថភាពមន្ត្រីដែលអនុវត្តការងារហិរញ្ញវត្ថុសាធារណៈ គឺជាការងារដែលត្រូវបន្តយកចិត្តទុកដាក់។

ឯកឧត្តមបណ្ឌិតសភាចារ្យក៏បានលើកឡើងពីបរិយាកាសពិភពលោកដែលកំពុងពោរពេញដោយភាពមិនប្រាកដប្រជា ដោយសារការរង្គោះរង្គើផ្នែកសេដ្ឋកិច្ច ការផ្លាស់ប្តូរភូមិសាស្ត្រនយោបាយ ការចុះខ្សោយនៃប្រព័ន្ធច្បាប់ និងសណ្ដាប់ធ្នាប់ពិភពលោក ការរីកចម្រើនយ៉ាងឆាប់រហ័សនៃបច្ចេកវិទ្យាព័ត៌មាន និងឌីជីថល និងការប្រែប្រួលអាកាសធាតុ។

ឯកឧត្តបានសង្កត់ធ្ងន់ថា បរិបទទាំងនេះកើតឡើងក្នុងល្បឿនលឿន និងមិនអាចព្យាករបានជាមុន ដូច្នេះកម្ពុជាត្រូវការមូលធនមនុស្សដែលមានសមត្ថភាព ចំណេះដឹង និងជំនាញវិជ្ជាជីវៈ ដើម្បីឆ្លើយតបនឹងបញ្ហាប្រឈមបានទាន់ពេល និងមានប្រសិទ្ធភាព ជាពិសេសក្នុងការជំរុញកំណើនសេដ្ឋកិច្ច និងពង្រឹងភាពធន់របស់សេដ្ឋកិច្ច។

ក្នុងបរិការណ៍ដែលកម្ពុជាកំពុងប្រឈមនឹងបញ្ហាប្រឈមទាំងក្នុង និងក្រៅប្រទេស លោកបានលើកឡើងថា កម្ពុជាចាំបាច់ត្រូវបង្កើនសមត្ថភាព ដើម្បីជំរុញសន្ទុះអភិវឌ្ឍសេដ្ឋកិច្ចឱ្យកាន់តែលឿន និងទូលំទូលាយ សំដៅប្រែក្លាយពីប្រទេសចំណូលមធ្យមកម្រិតទាប ឆ្ពោះទៅជាប្រទេសចំណូលខ្ពស់ ស្របតាមចក្ខុវិស័យកម្ពុជាឆ្នាំ២០៥០។

ឯកឧត្តបានអំពាវនាវឱ្យមន្ត្រីរាជការគ្រប់រូបបន្តបង្កើនសមត្ថភាព ចំណេះដឹង និងជំនាញវិជ្ជាជីវៈជាប្រចាំ ព្រមទាំងអនុវត្តការងារក្នុងស្មារតី «ឧត្តមនិយម» នៃផលប្រយោជន៍ជាតិ និងផ្តើមចេញពីការបំពេញភារកិច្ចឱ្យបានល្អប្រសើរ។

ទន្ទឹមនេះ រាជរដ្ឋាភិបាលកម្ពុជាកំពុងអនុវត្តយុទ្ធសាស្ត្របញ្ចកោណ ដំណាក់កាលទី១ ដែលដាក់ការអភិវឌ្ឍមូលធនមនុស្សជាបញ្ចកោណទី១ ក្នុងចំណោមអាទិភាពទាំង៥ ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០។

ផ្អែកលើច្បាប់ស្តីពីប្រព័ន្ធហិរញ្ញវត្ថុសាធារណៈឆ្នាំ២០២៣ និងអនុក្រឹត្យលេខ៤៥ ស្តីពីគុណវុឌ្ឍិវិជ្ជាជីវៈជំនាញហិរញ្ញវត្ថុសាធារណៈ ក្រសួងសេដ្ឋកិច្ច និងហិរញ្ញវត្ថុ បាននិងកំពុងអនុវត្តកម្មវិធីបណ្តុះបណ្តាលកម្រិតវិញ្ញាបនបត្រផ្សារភ្ជាប់មុខតំណែងលើជំនាញសម្រាប់ការគ្រប់គ្រងហិរញ្ញវត្ថុសាធារណៈ ចាប់តាំងពីឆ្នាំ២០២៣ ដើម្បីកសាងគុណវុឌ្ឍិវិជ្ជាជីវៈជំនាញហិរញ្ញវត្ថុសាធារណៈ សម្រាប់ចូលរួមគាំទ្រ និងអនុវត្តការងារកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤។

ជាមួយគ្នានេះ ឯកឧត្តមបណ្ឌិតសភាចារ្យបានបញ្ជាក់ថា សិក្ខាកាមជ័យលាភីលេខ១ លេខ២ និងលេខ៣ នៃកម្មវិធីបណ្តុះបណ្តាលកម្រិតវិញ្ញាបនបត្រផ្សារភ្ជាប់មុខតំណែង ដែលជាមន្ត្រីវ័យក្មេង មានឆន្ទៈកែទម្រង់ និងមានសក្ដានុពលក្នុងការអភិវឌ្ឍសមត្ថភាព នឹងទទួលបានអាហារូបករណ៍សម្រាប់បន្តការសិក្សាថ្នាក់បរិញ្ញាបត្រជាន់ខ្ពស់ តាមកម្មវិធីសហប្រតិបត្តិការរបស់វិទ្យាស្ថានសេដ្ឋកិច្ច និងហិរញ្ញវត្ថុ ជាមួយសាកលវិទ្យាល័យដៃគូជាតិ និងអន្តរជាតិ។

ក្នុងឱកាសនៃពិធីបិទវគ្គ ឯកឧត្តមបណ្ឌិតសភាចារ្យ ហ៊ាន សាហ៊ីប ក៏បានធ្វើបាឋកថាស្តីពី «ទ្រឹស្តីមូលដ្ឋានសេដ្ឋកិច្ច និងហិរញ្ញវត្ថុ និងសភាពការណ៍សេដ្ឋកិច្ចកម្ពុជាបច្ចុប្បន្ន» ជូនសិក្ខាកាម និងអ្នកចូលរួម។

បាឋកថានេះបានលើកឡើងពីដំណើរវិវត្តនៃសង្គម និងសេដ្ឋកិច្ច ចាប់ពីការកកើតសង្គមមនុស្ស និងសកម្មភាពសេដ្ឋកិច្ច រហូតដល់ការអភិវឌ្ឍជាគោលគំនិត ទស្សនៈ រូបមន្ត គំរូ និងទ្រឹស្តីសេដ្ឋកិច្ច។

ឯកឧត្តមបណ្ឌិតសភាចារ្យក៏បានពន្យល់អំពីតួនាទីរដ្ឋ និងសេដ្ឋកិច្ច ប្រព័ន្ធសេដ្ឋកិច្ចសំខាន់ៗ និងការវិវត្តនៃប្រព័ន្ធសេដ្ឋកិច្ចនីមួយៗ ដែលផ្សារភ្ជាប់ជាមួយបរិបទសង្គម និងនិន្នាការនយោបាយក្នុងតំបន់ និងពិភពលោក។

ឯកឧត្តបានចែករំលែកបន្ថែមអំពីការវិវត្តនៃប្រព័ន្ធ និងដំណើរការសេដ្ឋកិច្ច រួមទាំងសភាពការណ៍សេដ្ឋកិច្ចកម្ពុជារហូតដល់បច្ចុប្បន្ន ដោយឆ្លុះបញ្ចាំងពីតួនាទី និងការចូលរួមចំណែករបស់មន្ត្រីអនុវត្តការងារហិរញ្ញវត្ថុសាធារណៈ ក្នុងការគ្រប់គ្រងថវិកាជាតិ និងការអភិវឌ្ឍសង្គម-សេដ្ឋកិច្ច៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ក្រសួងសេដ្ឋកិច្ច ពង្រឹងសមត្ថភាពមន្ត្រីថ្មី សម្រាប់គាំទ្រកំណែទម្រង់ហិរញ្ញវត្ថុសាធារណៈ appeared first on Millions times.

​កំពង់ធំ​៖ ​ឯកឧត្តម​ វង្សី ​វិស្សុត ​ឧប​នាយក​រដ្ឋមន្ត្រី​ប្រចាំ​ការ​ រដ្ឋមន្ត្រី​ទទួលបន្ទុក​ទីស្តីការ​គណៈ​រដ្ឋមន្ត្រី​ ​និង​ជា​ប្រធាន​ក្រុមការងារ​រាជ​រដ្ឋាភិបាល​ចុះ​មូលដ្ឋាន​ខេត្ត​កំពង់ធំ​ បាន​លើកឡើង​ថា​ ​អនាគត​សេដ្ឋកិច្ច​របស់​ខេត្ត​កំពង់ធំ​ ​ពឹងផ្អែក​យ៉ាង​សំខាន់​លើ​ការ​ផ្លាស់ប្តូរ​ពី​សេដ្ឋកិច្ច​ដែល​មាន​មូលដ្ឋាន​លើកសិកម្ម​ ​ទៅជា​សេដ្ឋកិច្ច​ដែល​មាន​មូលដ្ឋាន​លើក​សិ-​ឧស្សាហកម្ម ​ដោយ​ប្រើប្រាស់​សក្តានុពល​កសិកម្ម​ដ៏​ធំ​របស់​ខេត្ត​ ​ដើម្បី​បង្កើត​តម្លៃ​បន្ថែម​ ​ជំរុញ​សេវាកម្ម​ ​និង​ការ​វិនិយោគ​។

​ការ​លើកឡើង​នេះ​ធ្វើឡើង​ កាលពីថ្ងៃទី​១៥​ ​ខែសីហា ​ឆ្នាំ​២០២៦​ ក្នុង​ពិធី​បើក​ និង​ដឹកនាំ​សិក្ខាសាលា​ពិគ្រោះយោបល់​ស្តីពី​ «​ផែនការ​យុទ្ធសាស្ត្រ​អភិវឌ្ឍន៍​កសិកម្ម​ខេត្ត​កំពង់ធំ​ ឆ្នាំ​២០២៦​-​២០៣០​» ​នៅ​សាលា​ខេត្ត​កំពង់ធំ​។

​សិក្ខាសាលា​នេះ​ត្រូវបាន​សហការ​រៀបចំ​ដោយ​ក្រុមប្រឹក្សា​សេដ្ឋកិច្ច​ ​សង្គមកិច្ច​ ​និង​វប្បធម៌​ ​នៃ​ទីស្តីការ​គណៈ​រដ្ឋមន្ត្រី​ ​និង​រដ្ឋបាល​ខេត្ត​កំពង់ធំ ​ដោយ​មាន​ការ​ចូលរួម​ពី​តំណាង​ និង​មន្ត្រី​ជំនាញ​នៃ​ក្រសួង​-​ស្ថាប័ន​ពាក់ព័ន្ធ​ ​អាជ្ញាធរ​មូលដ្ឋាន​ ​ក្រុមហ៊ុន​ចម្ការ​កៅស៊ូ ​ក្រុមហ៊ុន​ដឹកជញ្ជូន​ ​និង​ជី​កសិកម្ម​ ​ក្រុមហ៊ុន​នាំចេញ​អង្ករ​ សមាគម​អ្នក​ដាំ​ស្វាយចន្ទី ​សមាគម​ដំឡូង​មី​កម្ពុជា​ សហគមន៍​កសិកម្ម​ សហគមន៍​នេសាទ ​គ្រឹះស្ថាន​ធនាគារ​ ​និង​ហិរញ្ញវត្ថុ​ ​គ្រឹះស្ថាន​បណ្តុះបណ្តាល​ ​និង​ស្ថាប័ន​ស្រាវជ្រាវ​ ព្រមទាំង​ដៃគូ​អភិវឌ្ឍ​ សរុប​ប្រមាណ​ជិត​ ​៤០០​នាក់​។​

ក្នុង​សុន្ទរកថា​ ​ឯកឧត្តម​ វង្សី ​វិស្សុត ​បាន​មានប្រសាសន៍​ថា​ ​សិក្ខាសាលា​ពិគ្រោះយោបល់​នេះ​ ​គឺជា​ការ​គិតគូរ​រួមគ្នា​រវាង​ក្រុមការងារ​រាជ​រដ្ឋាភិបាល​ចុះ​មូលដ្ឋាន​ខេត្ត​កំពង់ធំ​ រដ្ឋបាល​ខេត្ត​ ​និង​គ្រប់​តួអង្គ​ពាក់ព័ន្ធ​ ​ដើម្បី​រៀបចំ​ជា​ត្រីវិស័យ​ក្នុង​ការ​លើកកម្ពស់​សេដ្ឋកិច្ច​ ​និង​ជីវភាព​រស់​នៅ​របស់​ប្រជាជន​ខេត្ត​កំពង់ធំ​។

​​ឯកឧត្តម​បាន​បញ្ជាក់​ថា​ ​វត្តមាន​របស់​តួអង្គ​ពាក់ព័ន្ធ​ទាំងអស់​ឆ្លុះបញ្ចាំង​ពី​ឆន្ទៈ​ ​និង​ការ​ប្តេជ្ញាចិត្ត​ក្នុង​ការ​អភិវឌ្ឍ​ខេត្ត​ ​ជាពិសេស​វិស័យ​កសិកម្ម​ ​ដែល​ជា​វិស័យ​មាន​សក្តានុពល​ធំ​ ស្រប​តាម​ស្មារតី​ «​រួម​គិត​ ​រួម​ធ្វើ​ ​និង​រួម​ទទួលខុសត្រូវ​» ​ដើម្បី​រៀបចំ​សក្តានុពល​វិស័យ​នេះ​ឱ្យ​ក្លាយជា​ប្រព័ន្ធ​សេដ្ឋកិច្ច​ដែល​មាន​ប្រសិទ្ធភាព​ និង​ប្រទាក់​ក្រឡា​គ្នា​ ​ព្រមទាំង​ជា​មជ្ឈមណ្ឌល​កសិ-​ឧស្សាហកម្ម​ដ៏​រឹងមាំ​ ​និង​ជា​តំបន់​ភស្តុភារកម្ម​របស់​កម្ពុជា​។

​ឯកឧត្តម​ វង្សី ​វិស្សុត ​បាន​បន្ត​ថា​ ​ក្នុង​បរិការណ៍​សកលលោក​បច្ចុប្បន្ន ​ការ​ពង្រឹង​សន្តិសុខ​សេដ្ឋកិច្ច​ កសិកម្ម​ ស្បៀង ​ថាមពល​ ​និង​ទឹក​ សុទ្ធតែ​ជា​កត្តា​សំខាន់​ដែល​មិន​អាច​មើល​រំលង​បាន​។​ ក្នុង​បរិការណ៍​នេះ​ វិស័យ​កសិកម្ម​នឹង​កាន់តែ​មាន​សារៈសំខាន់​ ​ព្រោះ​អាច​ភ្ជាប់​កំណើន​សេដ្ឋកិច្ច​ទៅនឹង​ការងារ​ ប្រាក់​ចំណូល​ ​និង​ជីវភាព​របស់​ប្រជាជន​នៅ​មូលដ្ឋាន​ដោយ​ផ្ទាល់​ ​ព្រមទាំង​រួមចំណែក​ធានា​សន្តិសុខ​សេដ្ឋកិច្ច​ ​និង​សន្តិសុខ​ជាតិ​។

​​ឯកឧត្តម​បាន​លើកឡើង​ថា​ រាជ​រដ្ឋាភិបាល​នីតិកាល​ទី​៧​ ​ក្រោម​ការ​ដឹកនាំ​របស់​ ​សម្តេច​ធិបតី​ ហ៊ុន​ ​ម៉ាណែត ​បាន​ចាត់ទុក​វិស័យ​កសិកម្ម​ ​និង​កសិ-​ឧស្សាហកម្ម​ជា​វិស័យ​អាទិភាព​ ​ដោយ​មាន​ទិសដៅ​ជំរុញ​ការ​ផ្លាស់ប្តូរ​ពី​កសិកម្ម​បែប​ប្រពៃណី​ទៅជា​កសិ-​ឧស្សាហកម្ម​ទំនើប​ ​ដែល​មាន​ផលិតភាព​ ​ប្រាក់​ចំណេញ​ ​ទីផ្សារ​ ភាព​ធន់ ​និរន្តរភាព​ ​និង​តម្លៃ​បន្ថែម​ខ្ពស់​។

​ទិសដៅ​នេះ​ផ្អែក​លើ​សសរ​ស្តម្ភ​គន្លឹះ​ចំនួន​៤​ ​រួមមាន​ ​ផលិតភាព​ ​(​Productivity​) ​ការ​ធ្វើ​ពិពិធកម្ម​ផលិតផល​ និង​ទីផ្សារ​កសិកម្ម​ ​(​Diversification​) ​ភាព​ប្រកួតប្រជែង​ ​(​Competitiveness​) ​និង​ពាណិជ្ជូបនីយកម្ម ​(​Commercialization​)​។

​តាម​ការ​លើកឡើង​របស់​ឯកឧត្តម​ វង្សី ​វិស្សុត ​សេដ្ឋកិច្ច​ខេត្ត​កំពង់ធំ​មាន​ចំណែក​ពី​វិស័យ​កសិកម្ម​រហូតដល់​ប្រមាណ​ ​៧៤​ ​ភាគរយ ​ខណៈ​វិស័យ​ឧស្សាហកម្ម​មាន​ត្រឹម​ ​៦.៣​ ​ភាគរយ​។ ​ប្រជាជន​ខេត្ត​កំពង់ធំ​មាន​ប្រមាណ​ ​៥​ ​ភាគរយ​នៃ​ចំនួន​ប្រជាជន​កម្ពុជា​ទាំងមូល ​ខណៈ​ទំហំ​សេដ្ឋកិច្ច​របស់​ខេត្ត​មាន​ប្រមាណ​តែ​ ​៣​ ​ភាគរយ​នៃ​ទំហំ​សេដ្ឋកិច្ច​ជាតិ​។

​​ឯកឧត្តម​បាន​ចាត់ទុក​តួលេខ​ទាំងនេះ​ថា​ ​ជា​សារ​យុទ្ធសាស្ត្រ​ច្បាស់​ថា​ ​ការ​រៀបចំ​អនាគត​វិស័យ​កសិកម្ម​ ​គឺជា​ការ​រៀបចំ​អនាគត​សេដ្ឋកិច្ច​របស់​ខេត្ត​កំពង់ធំ​ទាំងមូល​។

​​ឯកឧត្តមបាន​គូសបញ្ជាក់​ថា​ ​ចក្ខុវិស័យ​សម្រាប់​ខេត្ត​កំពង់ធំ​ គឺ​ត្រូវ​ឈាន​ពី​សេដ្ឋកិច្ច​ដែល​មាន​មូលដ្ឋាន​កសិកម្ម​ ​ទៅជា​សេដ្ឋកិច្ច​ដែល​មាន​មូលដ្ឋាន​កសិ-​ឧស្សាហកម្ម​។ ​គោលដៅ​មិន​មែន​ធ្វើឱ្យ​ខេត្ត​កំពង់ធំ​ពឹងផ្អែក​លើ​កសិកម្ម​តែ​ប៉ុណ្ណោះ​ទេ​ ​ប៉ុន្តែ​ត្រូវ​ប្រើ​មូលដ្ឋាន​កសិកម្ម​ដ៏​ធំ​នេះ​ ​ដើម្បី​ជំរុញ​វិស័យ​កសិ-​ឧស្សាហកម្ម ​សេវាកម្ម​ ​ការ​វិនិយោគ​ ​និង​ការ​បង្កើត​តម្លៃ​បន្ថែម​ឱ្យ​កាន់តែ​ខ្ពស់​។

​សម្រាប់​ផែនការ​យុទ្ធសាស្ត្រ​ឆ្នាំ​២០២៦​-​២០៣០​ ​​ឯកឧត្តមបាន​សង្កត់ធ្ងន់​ថា​ ​ត្រូវ​ស្វែងរក​ឱ្យ​ឃើញ​បញ្ហា​ ​និង​ដំណោះស្រាយ​ឱ្យ​បាន​ច្បាស់​ ​ជាពិសេស​មូលហេតុ​ដែល​ការ​ស្តុក ​ការ​កែច្នៃ​ ​ការ​វេច​ខ្ចប់​ ​និង​សេវា​ភ្ជាប់​ ​មិន​ទាន់​រីក​ធំ​ស្រប​តាម​ផលិតកម្ម​កសិកម្ម​។ ​ទន្ទឹម​នេះ​ ត្រូវ​កំណត់​អាទិភាព​ថា​ ​អ្វី​ត្រូវ​ធ្វើ​មុន​ ​អ្វី​ត្រូវ​ធ្វើ​ក្រោយ​ ​អ្នកណា​ជា​អ្នកធ្វើ​ ​និង​ការ​ផ្លាស់ប្តូរ​នោះ​នឹង​ធ្វើឱ្យ​ប្រាក់​ចំណូល​ ​និង​ជីវភាព​របស់​ប្រជាជន​ប្រសើរឡើង​យ៉ាង​ដូចម្តេច​។

​ឯកឧត្តម​ វង្សី ​វិស្សុត ​បាន​សង្កត់ធ្ងន់​ថា​ ក​សិផល​សំខាន់​ៗ​ដូចជា​ ​ស្រូវ​ ស្វាយចន្ទី ​ដំឡូង​មី ​កៅស៊ូ ​ដំណាំ​សក្តានុពល ​វារី​វប្បកម្ម​ ​និង​ការ​ចិញ្ចឹម​សត្វ​ ​មិន​ត្រូវ​បញ្ចប់​ត្រឹម​ការ​លក់​ជា​វត្ថុធាតុ​ដើម​ឆៅ​នោះ​ឡើយ​ ​ប៉ុន្តែ​ត្រូវ​បង្កើត​ឱ្យ​មាន​ខ្សែ​ច្រវាក់​កែច្នៃ​ បច្ចេកវិទ្យា ​ភស្តុភារកម្ម ​និង​ទីផ្សារ​ក្នុង​ខេត្ត​។​

ឈរ​លើ​មូលដ្ឋាន​នេះ​ ​ឯកឧត្តម​បាន​ផ្តល់​គោលការណ៍​តម្រង់​ទិស​ចំនួន​៤​ ​សម្រាប់​ដំណើរការ​ពិភាក្សា​ ​រួមមាន​ ​ផលិតភាព​ និង​ប្រាក់​ចំណេញ​; ​តម្លៃ​បន្ថែម​ និង​ទីផ្សារ​; ​ការ​កសាង​ប្រព័ន្ធ​អេកូឡូស៊ី​គាំទ្រ​; ​និង​ការ​អនុវត្ត​ ​ការ​ទទួលខុសត្រូវ​ និង​ភាព​ធន់​។

​គោលការណ៍​ទាំងនេះ​ផ្តោត​លើ​ការ​បង្កើន​ផលិតភាព​ និង​ប្រាក់​ចំណេញ​ ​ការ​គិតគូរ​ទីផ្សារ​ជាមុន​ ​ការ​លើកកម្ពស់​ស្តង់ដារ ​គុណភាព​ ​សុវត្ថិភាព​ ​និង​តម្លៃ​ប្រកួតប្រជែង​ ការ​តភ្ជាប់​ហេដ្ឋារចនាសម្ព័ន្ធ​ ​ហិរញ្ញប្បទាន​ បច្ចេកវិទ្យា​ ​និង​ការ​ពង្រឹង​សមត្ថភាព​សហគមន៍​កសិកម្ម​ ​ព្រមទាំង​ការ​គ្រប់គ្រង​ហានិភ័យ​អាកាសធាតុ​ ​ទីផ្សារ​ និង​តម្លៃ​តាំងពី​ដើម​។

​ទន្ទឹម​នេះ​ ​ឯកឧត្តម​បាន​ដាក់​ជា​វិញ្ញាសា​គន្លឹះ​ចំនួន​៥​ ​ជូន​ដល់​វាគ្មិន​ ​និង​ក្រុម​ពិភាក្សា​តាម​ខ្សែ​ច្រវាក់​តម្លៃ​អាទិភាព​ចំនួន​៦​ ​រួមមាន​ ​ស្រូវ​ ស្វាយចន្ទី ​ដំឡូង​មី ​កៅស៊ូ ​និង​ដំណាំ​សក្តានុពល ​វារី​វប្បកម្ម​ ​និង​ការ​ចិញ្ចឹម​សត្វ​។

​វិញ្ញាសា​សំខាន់​ៗ​រួមមាន​ ​ការ​ជ្រើសរើស​ផលិតផល​យុទ្ធសាស្ត្រ​ ​និង​តំបន់​អាទិភាព​ ​ការ​ស្វែងរក​ឫសគល់​នៃ​បញ្ហា​ ​និង​ចំណុច​រាំងស្ទះ​ ​ការ​កំណត់​កន្លែង​បាត់បង់​តម្លៃ​បន្ថែម​ក្នុង​ខ្សែ​ច្រវាក់​តម្លៃ​ ​ការ​បែងចែក​តួនាទី​របស់​តួអង្គ​ពាក់ព័ន្ធ​ ​និង​ការ​កំណត់​គោលដៅ​ជាក់លាក់​ដែល​អាច​វាស់វែង​បាន​។

​ឯកឧត្តម​ វង្សី ​វិស្សុត ​ក៏​បាន​ស្នើ​ដល់​វាគ្មិន​ ​និង​ក្រុម​ពិភាក្សា​ឱ្យ​គិតគូរ​ជា​ខ្សែ​ច្រវាក់​តម្លៃ​ ​ដោយសារ​ការ​យក​គោលការណ៍​នេះ​មក​ពិចារណា​ ​នឹង​អាច​ជួយ​ដោះស្រាយ​បញ្ហា​បាន​ពេញ​មួយ​ខ្សែ​ច្រវាក់​។

​​ឯកឧត្តម​បាន​សង្កត់ធ្ងន់​ថា​ ​ការ​អភិវឌ្ឍ​ត្រូវ​មិន​ភ្លេច​គោល​តម្លៃ​យុទ្ធសាស្ត្រ​របស់​រាជ​រដ្ឋាភិបាល​ ​គឺ​ «​ការ​យក​ប្រជាជន​ជា​ស្នូល​» ​ដោយ​ម៉ែត្រ​វាស់​សំខាន់​ចុងក្រោយ​ ​គឺ​ប្រជាជន​ទទួលបាន​ផលប្រយោជន៍​ កសិករ​មាន​ជីវភាព​ធូរធារ ​និង​មុខរបរ​រឹងមាំ​ ​ប្រាក់​ចំណូល​កើនឡើង​ ​មាន​សុខុមាលភាព​ និង​កូន​ចៅ​ទទួលបាន​ការ​អប់រំ ​និង​សុខាភិបាល​ ​ដោយ​មិន​ធ្លាក់​ក្នុង​បំណុល​វ័ណ្ឌ​ក​៕

អត្ថបទ៖ ប៊ី

តាមដានជាមួយយើង៖ Million Times

second...

x

The post អនាគត​សេដ្ឋកិច្ច​កំពង់ធំ​ ​ពឹងផ្អែក​លើ​ការ​ផ្លាស់ប្តូរ​កសិកម្ម​ទៅជា​កសិ-​ឧស្សាហកម្ម​ appeared first on Millions times.