ក្រោយប្រធានាធិបតីអាមេរិក Donald Trump ប្រកាសពីផែនការទារពន្ធសងសឹក ចំពោះគ្រប់បណ្ដាប្រទេសទូទាំងពិភពលោក រួមទាំងសមាជិកអាស៊ានផងនោះ នាយករដ្ឋមន្ត្រីថៃ Paetongtarn Shinawatra បានកោះហៅកិច្ចប្រជុំបន្ទាន់មួយ ដើម្បីស្វែងរកដំណោះស្រាយចំពោះបញ្ហាមួយនេះ។
Million Times 
កាសែត BangkokPost បានចុះផ្សាយថា លោកស្រីនាយករដ្ឋមន្ត្រីថៃបានរៀបចំផែនការចរចា ជាមួយភាគីអាមេរិក ដោយត្រៀមបញ្ជូនគណៈប្រតិភូទៅសហរដ្ឋអាមេរិក ដើម្បីចរចាផ្ទាល់ជាមួយមហាអំណាចសេដ្ឋកិច្ចធំបំផុតលើលោក។
«ពួកយើងនឹងមិនឈរអោបដៃមើលបញ្ហានេះឡើយ ដ្បិតវានឹងធ្វើឲ្យប៉ះពាល់ដល់សេដ្ឋកិច្ចយើងជាខ្លាំង។ ខ្ញុំនឹងបញ្ជូនលេខាធិការអចិន្ត្រៃយ៍របស់យើង ទៅចរចាជាមួយពួកគេ…ខ្ញុំគិតថា ពួកយើងនៅតែអាចចរចាគ្នាបានចំពោះបញ្ហាមួយនេះ»។ នេះបើតាមការអះអាងរបស់លោកស្រី Paetongtarn។
យោងតាមក្រុមហ៊ុនផ្ដល់សេវាកម្មហិរញ្ញវត្ថុថៃ InnovestX Securities បានឲ្យដឹងថា វិធានការទារពន្ធសងសឹងរបស់អាមេរិក នឹងកាត់បន្ថយកំណើន GDP របស់ថៃរហូតដល់ ១,២% ពីផែនការសម្រេចកំណើនសេដ្ឋកិច្ចក្នុងឆ្នាំនេះ ២,៥% របស់បងធំសេដ្ឋកិច្ចអាស៊ានទី២។
គួរជម្រាបដែរថា នាព្រឹកថ្ងៃទី០៣ ខែមេសានេះ ប្រធានាធិបតី Donald Trump បានប្រកាសពីផែនការទារពន្ធសងសឹក ចំពោះ ១០០ប្រទេស ដោយក្នុងនោះតំបន់អាស៊ានរងឥទ្ធិពលខ្លាំងជាងគេ ដោយអាមេរិកបង្កើនពន្ធទំនិញនាំចូលពីកម្ពុជា ៤៩% ឡាវ ៤៨% វៀតណាម ៤៦% ថៃ ៣៦% ឥណ្ឌូណេស៊ី ៣២% និងម៉ាឡេស៊ី ២៤%៕
អត្ថបទ៖ Luffy រូបភាព៖ Bloomberg