ក្នុងចំណោមបណ្តាប្រទេសអាស៊ាន ដែលប្រធានាធិបតីអាមេរិក លោក Donald Trump ប្រកាសនៅថ្ងៃព្រហស្បតិ៍នេះ កម្ពុជារងពន្ធគយខ្លាំងជាងគេ ដោយមានទំហំ ៤៩% ឯណោះ ហើយតាមពីក្រោយដោយឡាវចំនួន ៤៨%។
ឆ្លើយតបនឹងការប្រកាសដំឡើងពន្ធ ៤៩% សម្រាប់ទំនិញកម្ពុជារបស់ប្រធានាធិបតី Donald Trump ទៅកាន់អាមេរិក នៅព្រឹកនេះប្រធានសភាពាណិជ្ជកម្មអាមេរិកប្រចាំនៅកម្ពុជា បានព្រមានថា ប្រសិនបើមិនបានដោះស្រាយយ៉ាងហ្មត់ចត់ក្នុងសប្តាហ៍នេះទេ នោះនឹងបំផ្លាញសេដ្ឋកិច្ចកម្ពុជា និងបង្កើតឲ្យមានវិបត្តិការងារយ៉ាងធ្ងន់ធ្ងរ។
Million Times 
លោក Casey Barnett ប្រធានសភាពាណិជ្ជកម្មអាមេរិកប្រចាំនៅកម្ពុជា ហៅកាត់ AmCham Cambodia បានលើកឡើងលើបណ្តាញសង្គមផ្ទាល់ខ្លួនថា ប្រសិនបើមិនបានដោះស្រាយយ៉ាងហ្មត់ចត់ក្នុងសប្តាហ៍នេះទេ នោះនឹងបំផ្លាញសេដ្ឋកិច្ចកម្ពុជា និងបង្កើតឲ្យមានវិបត្តិសេដ្ឋកិច្ចយ៉ាងជ្រៅ បាត់បង់ការងាររាប់សែននាក់ អស្ថិរភាពសង្គម និងលំហូរចេញមូលធនយ៉ាងឆាប់រហ័ស។
លោកថា កម្ពុជានាំចូលទំនិញពីសហរដ្ឋអាមេរិកត្រឹមតែ ៣៥០ លានដុល្លារប៉ុណ្ណោះ វានឹងត្រូវចំណាយតិចតួចដល់រដ្ឋាភិបាលកម្ពុជាក្នុងការអនុញ្ញាតឱ្យទំនិញទាំងអស់របស់សហរដ្ឋអាមេរិកត្រូវបាននាំចូលដោយគ្មានពន្ធ និងផ្តល់អាជ្ញាប័ណ្ណយ៉ាងឆាប់រហ័សដល់អាជីវកម្មរបស់សហរដ្ឋអាមេរិកដូចជា Starlink ជាដើម។ លោកបានសង្កត់ធ្ងន់ថា «រដ្ឋាភិបាលកម្ពុជាត្រូវធ្វើកាយវិការដ៏ក្លាហាន រហ័ស»។
សូមជម្រាបថា ក្រៅពីកម្ពុជា ប្រទេសសមាជិកអាស៊ានក៏រងនូវការដំឡើងពន្ធគយដែរ ដូចជា វៀតណាមជាប់ពន្ធ ៤៦% ថៃ ៣៦% ឥណ្ឌូនេស៊ី ៣២% និងម៉ាឡេស៊ី២៤% ជាដើម៕
អត្ថបទ៖ សាងតេជៈ រូបភាព៖ បណ្តាញសង្គម