ឆ្លើយតបទៅនឹងក្តីកង្វល់របស់ប្រជាពលរដ្ឋ ប្រមុខរាជរដ្ឋាភិបាលកម្ពុជា បានប្រាប់ប្រជាពលរដ្ឋកុំព្រួយឱ្យសោះ រដ្ឋមិនអនុញ្ញាតឱ្យក្រុមហ៊ុនធំ អភិវឌ្ឍគម្រោងតំបន់ទេសចរណ៍ធម្មជាតិ រហូតប៉ះពាល់ប្រជាពលរដ្ឋឡើយ និងថាណែនាំទៅអ្នកវិនិយោគសុំកុំកសាងអគារខ្ពស់ និងបុរីនៅលើភ្នំ ដែលជាគោលដៅទេសចរណ៍ធម្មជាតិបន្ថែមទៀត ពីព្រោះភ្ញៀវទេសចរណ៍ចង់មកទស្សនានៅតាមគោលដៅសាមញ្ញៗ។

ថ្លែងចេញពីពិធីបុណ្យទន្លេលើកទី៩ នៅក្នុងខេត្តតាកែវ នាល្ងាចថ្ងៃសៅរ៍ ទី២២ ខែមីនា សម្ដេច ហ៊ុន ម៉ាណែត នាយករដ្ឋមន្រ្តី មានប្រសាសន៍ថា ពលរដ្ឋនៅតាមសហគមន៍តែងតែបង្ហាញក្ដីព្រួយបារម្ភនៅចំពោះមុខសម្ដេច ខ្លាចពេលក្រុមហ៊ុនចូលវិនិយោគនៅតំបន់ទេសចរណ៍ធម្មជាតិ គឺបាត់បង់ចំណូលរបស់ពួកគាត់ និងបាត់បង់អ្វីដែលជាតំបន់ទេសចរណ៍ធម្មជាតិ។ កន្លងមក មានសំណើរសុំឱ្យក្រុមហ៊ុន ឬវិស័យឯកជន ចូលវិនិយោគនៅតាមតំបន់ទេសចរណ៍ធម្មជាតិមួយចំនួន ប៉ុន្តែត្រូវបានសម្ដេចបដិសេធ ហើយណែនាំឱ្យបង្រៀនពលរដ្ឋ ពីរបៀបបដិសណ្ឋារកិច្ចភ្ញៀវ និងសាងសង់កន្លែងលក់អាហារ កន្លែងសង្គ្រោះបន្ទាន់ បង្គន់អនាម័យបន្ថែមជូន។

ជាមួយគ្នានេះ សម្ដេចបានស្នើឱ្យធនាគារពាណិជ្ជកម្មជួយវិស័យទេសចរណ៍តាមសហគមន៍តាមរយៈការពង្រឹងសមត្ថភាពសហគមន៍។ ត្បិតថា រដ្ឋាភិបាលផ្ដល់អាទិភាពឱ្យសហគមន៍អភិវឌ្ឍន៍លើតំបន់ទេសចរណ៍ធម្មជាតិ ប៉ុន្តែសម្ដេចអះអាងថា មិនមែនរដ្ឋាភិបាលបិទមិនឱ្យក្រុមហ៊ុន វិស័យឯកជនអភិវឌ្ឍន៍លើគម្រោងឡើយ ក្នុងន័យនេះ គឺក្រុមហ៊ុនអាចអភិវឌ្ឍលើគម្រោងធំៗទាំងមូល។

សម្ដេចបានប្រាប់ប្រជាពលរដ្ឋតាមសហគមន៍ថា កុំព្រួយ រដ្ឋមិនអនុញ្ញាតឱ្យក្រុមហ៊ុនធំ អភិវឌ្ឍគម្រោងតំបន់ទេសចរណ៍ធម្មជាតិ រហូតប៉ះពាល់ពលរដ្ឋឡើយ ព្រោះរដ្ឋតម្រូវឱ្យក្រុមហ៊ុនអភិវឌ្ឍក្នុងកម្រិតមួយ ដែលជួយបានទាំងសហគមន៍។

សម្តេច ហ៊ុន ម៉ាណែត បានថ្លែងថា៖ «កុំ Copy ពិបាកបំផុត គឺ Copy ឃើញកន្លែងហ្នឹងតំបន់ភ្នំល្អ ទៅ Copy យកមកម៉ូឌែលពី កំពង់សោម ឬរាជធានីភ្នំពេញ ទៅធ្វើអគារ ២០ជាន់ បាត់អស់ហើយ គឺអត់ចង់ទៅភ្នំមួយហ្នឹង ដែលមានសុទ្ធតែបុរី ពេញលើហ្នឹងទៀតទេ គេចង់ទៅកន្លែងណាដែលមានលក្ខណៈសាមញ្ញ»។

សម្តេចមានប្រសាសន៍បន្ថែមថា ប្រសិនបើធ្វើជារីសត សុំឱ្យធ្វើជាទម្រង់នៃស្ថាបត្យកម្ម ស្របតាមស្ថានភាពភូមិសាស្ត្រ ចំណុចនេះជាចំណុចសំខាន់បញ្ជាក់ពីភូមិសាស្ត្រតាមគោលដៅទេសចរណ៍នានា ជាក់ស្តែងនៅកោះបាលី, ហ្សារកាតា ជាចំណុចគោលដៅទេសចរណ៍ដ៏សំខាន់ជាដើម។ ក្នុងន័យនេះ សម្ដេចបានណែនាំឱ្យអភិវឌ្ឍតំបន់ទេសចរណ៍ដោយដាច់ខាតមិនឱ្យបាត់បង់ភាពដើម ជាពិសេសគឺភាពបៃតង ដូចជាការសាងសង់សំណងថ្ម ផ្ទះថ្ម រហូតបាត់បង់ភាពដើម៕

អត្ថបទ៖ សាងតេជៈ រូបភាព៖ ក្រុមព័ត៌មានសម្តេចធិបតី