វិស័យអចលនទ្រព្យជាវិស័យមួយដែលរួមចំណែកយ៉ាងសំខាន់ក្នុងសេដ្ឋកិច្ចនៃប្រទេសកម្ពុជា។ នៅក្នុងឆ្នាំ២០២៥នេះ បើទោះអចលនទ្រព្យមិនទាន់មានសកម្មភាពរស់ឡើងវិញខ្លាំងក៏ពិតមែន មហាសេដ្ឋីកម្ពុជាមួយចំនួននៅតែបន្តគម្រោងវិនិយោគរបស់ខ្លួនឥតបន្ធូរដៃឡើយ។
អត្ថបទនេះគេហទំព័រ Million Times សូមបង្ហាញមុខមហាសេដ្ឋីកម្ពុជា ពុង ឃាវសែ ដែលជាស្តេចក្រាញ់ក្នុងវិស័យអចលនទ្រព្យកម្ពុជា ហើយក៏ជាពាណិជ្ជករដ៏មានឥទ្ធិពលខ្លាំងក្លាណាស់ក្នុងសេដ្ឋកិច្ច ពាណិជ្ជកម្ម និងវិនិយោគកម្ពុជា។
Million Times 
លោកអ្នកឧកញ៉ា ពុង ឃាវសែ គឺជាអ្នកវិនិយោគចាស់វស្សាមួយរូបដ៏មានឥទ្ធិពលដែលកំពុងវិនិយោគអចលនទ្រព្យស្ថិតក្នុងតំបន់សំខាន់ៗនៃសេដ្ឋកិច្ច ជាពិសេសនៅក្នុងក្រុង និងនៅជាយរាជធានីភ្នំពេញ។
លោក ពុង ឃាវសែ កំពុងអភិវឌ្ឍន៍តំបន់កោះពេជ្រ កោះនរា គម្រោងផ្សារទំនើប អគារពាណិជ្ជកម្ម ខុនដូរនៅតំបន់ជុំវិញស្តារអូឡាំពិក តំបន់ OCIC ជ្រោយចង្វារ ដែលមានតម្លៃរាប់ពាន់លានដុល្លារសហរដ្ឋអាមេរិក ដែលបច្ចុប្បន្នកំពុងក្លាយជាមជ្ឈមណ្ឌលពាណិជ្ជកម្ម ទេសចរណ៍ ដ៏ទាក់ទាញបំផុតសម្រាប់រាជធានីភ្នំពេញ ជាទីកន្លែងបណ្តុំទៅដោយអគារពាណិជ្ជកម្មធំៗ ខ្ពស់ៗ ហើយភាគច្រើនវិនិយោគដោយជនជាតិចិន។
ក្រៅពីវិនិយោគតំបន់អចលនទ្រព្យសំខាន់ទាំងអស់នោះហើយ លោក ពុង ឃាវសែ ដែលត្រូវបានមជ្ឈដ្ឋានទូទៅកត់សម្គាល់ថាជា «សន្លឹកអាត់មួយក្នុងចំណោមសន្លឹកទាំងបួនកំពុងរះនៅប្រទេសកម្ពុជា» ក៏កំពុងអភិវឌ្ឍន៍គម្រោងប្រវត្តិសាស្រ្តរបស់ជាតិទៀតផង គឺគម្រោងអាកាសយានដ្ឋានអន្តរជាតិតេជោតាខ្មៅ ក្នុងទំហំទុនវិនិយោគ ១ ៥០០ លានដុល្លារអាមេរិកលើទំហំផ្ទៃដី ២ ៦០០ហិកតា គឺជាការវិនិយោគរួមគ្នារវាងរដ្ឋាភិបាលកម្ពុជា និងក្រុមហ៊ុន OCIC ។
លោក ពុង ឃាវសែ ជាស្ថាបនិកប្រធានក្រុមប្រឹក្សាភិបាលនៃធនាគារកាណាឌីយ៉ា ដែលកកើតឡើងពីប្រាក់សន្សំកាលលោករស់នៅទីក្រុង ម៉ុង រ៉េ អាល់ ប្រទេសកាណាដា ហើយក្រោយមកលោកបន្តបោះទុនបង្កើតធនាគារប្រៃសណីយ៍កម្ពុជា និងក្រុមហ៊ុនវិនិយោគទុនអាណិកជនកម្ពុជា ហៅកាត់ជាភាសាអង់គ្លេស OCIC ។
សារព័ត៌មានបរទេសជាច្រើនចុះផ្សាយថា លោក ពុង ឃាវស គឺជា «អ្នកត្រួសត្រាយផ្នែកធនាគារ» ដោយកាលណោះលោករកស៊ីចំណេញប្រាក់ជាច្រើនក្នុងប្រទេសកាណាដា មុនពេលបង្កើតធនាគារកាណាឌីយ៉ាដែលជាធនាគារដំបូងបំផុតមួយក្នុង ចំណោមធនាគារធំៗជាច្រើនទៀតនៅកម្ពុជា។
អ្វីដែលគួរឲ្យកត់សម្គាល់ជាងនេះទៅទៀតនោះ គឺលោក ពុង ឃាវសែ បានបោះទុនវិនិយោគរាប់ពាន់លានដុល្លារអាមេរិក ទៅលើគម្រោងបុរីលំនៅដ្ឋាន និងអគារពាណិជ្ជកម្មធំៗ ជាច្រើននៅក្នុងរាជធានីភ្នំពេញ ដូចជា បុរីទន្លេបាសាក់ បុរីចម្ការមន បុរីវរជន សាន់វ៉េ ស៊ីធី ទួលគោក លំនៅឋានជាច្រើននៅជុំវិញផ្សារទំនើបរតនាផ្លាហ្សា និងទល់មុខព្រលានយន្តហោះអន្តរជាតិភ្នំពេញ អគារផ្សារទំនើបសូរិយា សុវណ្ណា អគារខុនដូរ និងបុរីលំនៅឋាន នៅតាមបណ្តាខេត្តមួយចំនួន ដូចជា សៀមរាប បាត់ដំបង និងខេត្តព្រះសីហនុ៕
អត្ថបទ៖ ពិសិដ្ឋ រូបភាព៖ បណ្តាញសង្គម