សកលវិទ្យាល័យ Harvard បានប្រកាសអំពីការផ្អាករើសបុគ្គលិកបណ្ដោះអាសន្ន បន្ទាប់ពីទទួលសារគំរាមកំហែងពីរដ្ឋបាលប្រធានាធិបតី Donald Trump ជុំវិញការផ្ដាច់ជំនួយ សម្រាប់សកលវិទ្យាល័យកំពូលៗនៅទូទាំងសហរដ្ឋអាមេរិក។ នេះបើតាមការចុះផ្សាយពីសារព័ត៌មាន VNExpress។

នាយកសកលវិទ្យាល័យ Harvard លោក Alan M. Garber បាននិយាយនៅក្នុងសេចក្ដីថ្លែងការណ៍សាធារណៈមួយថា «អនុវត្តពីពេលនេះតទៅ Harvard នឹងបញ្ឈប់ការរើសបុគ្គលិកគ្រប់ផ្នែក នៅក្នុងសកលវិទ្យាល័យជាបណ្ដោះអាសន្ន»។

លោក Garber បានអះអាងថា ការផ្លាស់ប្ដូរនៃគោលនយោបាយសហព័ន្ធយ៉ាងឆាប់រហ័ស គឺជាហេតុផលដែលធ្វើឲ្យមានភាពមិនច្បាស់លាស់ផ្នែកហិរញ្ញវត្ថុ សម្រាប់គ្រប់សកលវិទ្យាល័យទូទាំងអាមេរិក ហើយវាគឺជាបញ្ហាចំបង។

សេចក្ដីប្រកាសរបស់សកលវិទ្យាល័យ Harvard ធ្វើឡើងក្រោយរដ្ឋបាលលោក Trump និងគណបក្សសាធារណៈរដ្ឋ គំរាមផ្ដាច់ជំនួយក្នុងទំហំរាប់ពាន់លានដុល្លារ ដែលសហព័ន្ធធ្លាប់ផ្ដល់ឲ្យសកលវិទ្យាល័យទាំងនោះក្នុងមួយឆ្នាំ សម្រាប់កម្មវិធីអប់រំ។

តួយ៉ាងកាលពីសប្ដាហ៍មុន រដ្ឋាភិបាលអាមេរិកបានផ្ដាច់ជំនួយសហព័ន្ធ ៤០០លានដុល្លារ សម្រាប់សកលវិទ្យាល័យ Columbia ពាក់ព័ន្ធករណីរើសអើង និងមាក់ងាយនិស្សិតជនជាតិជ្វីហ្វ ក្នុងហេតុការណ៍ផ្ទុះសង្គ្រាមរវាងប្រទេសអ៊ីស្រាអែល និងក្រុមហាម៉ាស កាលពីថ្ងៃទី០៧ ខែតុលា ឆ្នាំ២០២៣។

គួរជម្រាបដែរថា សកលវិទ្យាល័យ Harvard គឺជាសកលវិទ្យាល័យមានបំផុតដាច់គេនៅអាមេរិក ជាមួយអំណោយទាន ៥៣ពាន់លានដុល្លារ ដោយកាលពីឆ្នាំទៅទទួលបានជំនួយពីសហព័ន្ធ រហូតដល់ ៧០០លានដុល្លារឯណោះ៕

អត្ថបទ៖ Luffy រូបភាព៖ Confinity