គម្រោង ខេខេ ដឹរេស៊ីដិន ៥៩៨ (KK The Residence 598) របស់អ្នកជំនួញដ៏មានភាពប៉ិនប្រសព្វ នោះគឺអ្នកឧកញ៉ា គឹម សុខអេង កំពុងតែឈានដល់កម្រិតអន្តរជាតិ ដោយមានក្រុមហ៊ុនបរទេសជាច្រើនចង់ក្លាយដៃគូសហការជាមួយ។
Million Times 
ដូចថ្មីៗនេះ ខេខេ ដឹរេស៊ីដេន ៥៩៨ បានចុះអនុស្សរណៈនៃការយោគយល់គ្នា (MOU) ជាមួយ iBlooming Global iLearning Movement (GiM) ដែលជាកម្មវិធីសិក្សាតាមប្រព័ន្ធអ៊ីនធឺណិតដ៏ធំ និងល្បីល្បាញពេលបច្ចុប្បន្ន។ កម្មវិធីចុះអនុស្សរណៈនៃការយោគយល់គ្នាឡើងកាលពីថ្ងៃទី១៩ ខែធ្នូ ឆ្នាំ ២០២៤ ស្ថិតនៅទីតាំងគម្រោង KK The Residence 598 ភូមិបឹងឈូក សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។
នៅចំពោះមុខអ្នកចូលរួមទាំង ២ភាគី ម្ចាស់គម្រោង ខេខេ ដឹរេស៊ីដេន ៥៩៨ អ្នកឧកញ៉ា គឹម សុខអេង និងលោក Ken Bay អ្នកតំណាង iBlooming បានចុះហត្ថលេខាលើ MoU ជាមួយគ្នាដោយក្ដីរីករាយ។ អ្នកឧកញ៉ា គឹម សុខអេង បានថ្លែងចំពោះមុខអ្នកចូលរួមដោយអរគុណទៅកាន់មិត្តភ័ក្ដិលោកនៅទូទាំងពិភពលោកទាំងនៅប្រទេសឥណ្ឌូណេស៊ី សិង្ហបុរី ហុងកុង ទីក្រុងឌូបៃ និងឥណ្ឌា ជាពិសេសគឺមិត្តជិតស្និទ្ធលោក គឺអ្នកឧកញ៉ាបណ្ឌិត សំ សុខនឿន អ្នកជំនួញផ្នែកអចលនទ្រព្យដូចគ្នា ដែលបាននាំយកកម្មវិធី iLearning របស់ផ្លេតហ្វម iBlooming មកកម្ពុជា ដើម្បីសិក្សាឲ្យកាន់តែស៊ីជម្រៅចំពោះវិស័យអចលនទ្រព្យ។
លោក Ken Bay តំណាងឲ្យប្រធានផ្នែកអភិវឌ្ឍធុរកិច្ចប្រចាំ iBlooming ថ្លែងក្នុងកម្មវិធីចុះអនុស្សរណៈនៃការយោគយល់គ្នារវាង iBlooming និង ខេខេ ដឹរេស៊ីដេន ៥៩៨ ដោយទឹកមុខញញឹមស្រស់ថ្លា។ លោកអះអាងថា ការចុះ MOU អំពីកិច្ចសហប្រតិបត្តិការមួយនេះគឺជារឿងដ៏ល្អ ហើយបច្ចុប្បន្ន iBlooming កាន់តែមានឱកាសពង្រីកអាជីវកម្មឲ្យកាន់តែធំ ដោយផ្ដល់សេវាកម្មទៅកាន់ប្រទេសឥណ្ឌា ឌូបៃ ហុងកុង ពីប្រទេសកម្ពុជាផ្ទាល់។
Ken Bay ឆ្លៀតបន្ថែមពីប្រវត្តិ ក៏ដូចជាណែនាំអំពីកម្មវិធី iBlooming ថាជាផ្លេតហ្វមសិក្សាមួយ ដែលផ្ដោតសំខាន់លើ AI ហើយ iBlooming មានអ្នកបង្រៀនជាវិនិយោគិន, សាស្ត្រាចារ្យ និងអ្នកជំនាញជាច្រើនឆ្នាំ។
MOU រវាង ខេខេ ដឹរេស៊ីដេន ៥៩៨ និង iBlooming បានបង្កើតកម្មវិធីថ្មីមានឈ្មោះថា iLearn Property ដែលផ្ដល់ភាពងាយស្រួល ដល់ក្រុមវិនិយោគិនមានបំណងមកបណ្ដាក់ទុននៅកម្ពុជា។ តាមរយៈកម្មវិធីមួយនេះ ក្រុមវិនិយោគិន នឹងទទួលបានព័ត៌មានជាក់លាក់ ស្ថានភាពទីផ្សារអចលនទ្រព្យច្បាស់លាស់ ពោលគឺធានាបានការបណ្ដាក់ទុនជាមួយការជឿទុកចិត្ត ក្នុងការបោះជំហានមកវិនិយោគក្នុងវិស័យអចលនទ្រព្យនៅកម្ពុជា។
ក្រុមហ៊ុនផ្លេតហ្វមអន្តរជាតិ iBlooming សង្ឃឹមថា កម្មវិធី iLearn Property នឹងអូសទាញវិនិយោគិនមកបណ្ដាក់ទុននៅកម្ពុជាកាន់តែច្រើនជាងមុន ដ្បិតស្ថានភាពសេដ្ឋកិច្ចនៅទីនេះ កំពុងមានសន្ទុះគួរឲ្យកត់សម្គាល់៕
អត្ថបទ៖ មេរ៉ា, រូបភាព៖ ផ្ដល់ឲ្យ