នាយករដ្ឋមន្ត្រី Paetongtarn Shinawatra សម្រេចលុបចោលផែនការដំឡើងពន្ធលើតម្លៃបន្ថែម (VAT) បន្ទាប់ពីកើតមានប្រតិកម្មពីប្រជាជនថៃ។ លោកស្រីបានបង្ហោះលើបណ្តាញសង្គម X កាលពីថ្ងៃសុក្រថា “គ្មានការកែសម្រួលពន្ធលើតម្លៃបន្ថែមដល់ ១៥%នោះទេ”។
ការសម្រេចចិត្តរបស់លោកស្រីធ្វើឡើងបន្ទាប់ពីជំនួបជាមួយរដ្ឋមន្ត្រីក្រសួងហិរញ្ញវត្ថុលោក Pichai Chunhavajira និងក្រុមប្រឹក្សារបស់លោកស្រីនៅវិមានរដ្ឋាភិបាល។
Million Times 
រដ្ឋាភិបាលលោកស្រី Paetongtarn ទទួលរងនូវការរិះគន់យ៉ាងចាស់ដៃពីប្រជាពលរដ្ឋថៃ បន្ទាប់ពីលោក Pichai ដែលជាឧបនាយករដ្ឋមន្ត្រីបានស្នើកាលពីថ្ងៃអង្គារ ក្នុងការដំឡើងពន្ធលើតម្លៃបន្ថែម VAT ដែលអាចកើនឡើងពី ៧% ដល់ ១៥%។ រំលងបានប៉ុន្មានថ្ងៃប៉ុណ្ណោះ លោកស្រីក៏បានសម្រេចលុបចោលផែនការនេះភ្លាមៗ។
នាយករដ្ឋមន្ត្រីថៃបាននិយាយថា ក្រសួងហិរញ្ញវត្ថុនៅតែពិនិត្យមើលកំណែទម្រង់ប្រព័ន្ធពន្ធ ដើម្បីដោះស្រាយវិសមភាពសង្គម និងលើកកម្ពស់ការប្រកួតប្រជែង ទោះបីជាលោកស្រីមិនបានផ្តល់ព័ត៌មានលម្អិតបន្ថែមក៏ដោយ។
អាករលើតម្លៃបន្ថែម ដែលជាប្រភពចំណូលដ៏សំខាន់របស់រដ្ឋាភិបាល នៅតែមានកម្រិត ៧% ចាប់តាំងពីឆ្នាំ ១៩៩២ ខណៈដែលនាពេលកន្លងទៅ រដ្ឋបាលជាច្រើនបានស្នើឱ្យបង្កើនវាដល់កម្រិត ១០%។
រដ្ឋមន្ត្រីក្រសួងហិរញ្ញវត្ថុ ក៏បានបង្ហាញពីការគាំទ្រសម្រាប់ការកាត់បន្ថយពន្ធលើប្រាក់ចំណូលសាជីវកម្មពី ២០% ទៅ ១៥% ដើម្បីឲ្យស្មើជាមួយប្រទេសផ្សេងទៀត និងកាត់បន្ថយពន្ធលើប្រាក់ចំណូលរូបវន្តបុគ្គលពី ៣៥% ដើម្បីទាក់ទាញកម្មករជំនាញចំពេលមានការប្រកួតប្រជែងជាសកលខ្លាំង។
សមាជិកសភាមកពីគណបក្សប្រជាជន លោកស្រី Sirikanya Tansakun បាននិយាយនៅលើបណ្តាញសង្គម X ថា លោកស្រីមិនភ្ញាក់ផ្អើលទេចំពោះការផ្លាស់ប្តូរពន្ធលើតម្លៃបន្ថែម VAT របស់រដ្ឋាភិបាលលោកស្រី Paetongtarn។ លោកស្រីបានសរសេរថា “លោក Pichai គួរតែធ្វើសន្និសីទសារព័ត៌មានមួយ ដើម្បីបង្ហាញឱ្យច្បាស់នូវផែនការសម្រាប់កំណែទម្រង់ប្រព័ន្ធពន្ធដារ ដើម្បីផលប្រយោជន៍សាធារណៈ”៕
ឭអត្ថបទ៖ សារ៉ាយ រូបភាព៖ បណ្តាញសង្គម X លោកស្រី Paetongtarn