លោក សន សៀប បន្តជាប់ឆ្នោតជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា CVEA សម្រាប់អាណត្តិទី២ ឆ្នាំ២០២៥- ២០២៦ ជាមួយនឹងការប្តេជ្ញាចិត្តលើកកំពស់វិជ្ជាជីវៈ និងពង្រឹងវិស័យអចលនទ្រព្យ។
កាលនៅថ្ងៃទី២៩ ខែវិច្ឆិកា ឆ្នាំ២០២៤ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានរៀបចំមហាសន្និបាតលើកទី១៤ បោះឆ្នោតជ្រើសរើសប្រធានក្រុមប្រឹក្សាភិបាល-ប្រធានសមាគម និងសមាជិកក្រុមប្រឹក្សាភិបាល អាណត្តិទី០៩ ព្រមទាំងសន្និបាតបូកសរុបលទ្ធផលការងារប្រចាំឆ្នាំ២០២៤ ក្នុងនោះ លោក សន សៀប បន្តដឹកនាំសមាគម CVEA សម្រាប់អាណត្តិទី២របស់ខ្លួន។
Million Times 
លើបណ្តាញសង្គមហ្វេសប៊ុកលោក សន សៀប បានប្រកាសអរគុណដល់សមាជិកសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលបានគាំទ្របោះឆ្នោតជ្រើសរើសរូបលោកឲ្យបន្តធ្វើជាប្រធានសមាគមសម្រាប់អាណត្តិថ្មី ២០២៥-២០២៦ និងបានប្រកាសរួមគ្នា នឹងលើកកំពស់វិជ្ជាជីវៈ និងពង្រឹងវិស័យអចលនទ្រព្យ។
គួររំលឹកថា កាលថ្ងៃទី២២ ខែធ្នូ ឆ្នាំ២០២២ លោក សន សៀប បានជាប់ឆ្នោតក្លាយជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នៅអាណត្តិទី៨ ឆ្នាំ២០២៣-២០២៤ ជំនួសលោក ច្រឹក សុខនីម ដែលបានចប់អាណត្តិ។ ក្រៅពីកាន់តួនាទីប្រធាន CVEA លោក សន សៀប មានអាយុ៤៣ឆ្នាំក៏ជាប្រធានក្រុមប្រឹក្សាភិបាលក្រុមហ៊ុនអចលនទ្រព្យចំនួន២ទៀត បន្ទាប់ពីបានចូលប្រឡូកវិស័យនេះប្រមាណ២០ឆ្នាំ។
អត្ថបទ៖ សាងតេជៈ រូបភាព៖ CVEA