សម្រាប់ចំណាយលើការដង្ហែអង្គកឋិនទានមហាសាមគ្គីគ្រួសារខ្មែរ ទៅកាន់វត្តពោធិគិរីវង្សារាម នៅខេត្តត្រាវិញ ប្រទេសវៀតណាម អង្គកឋិនបានចំណាយថវិកាសរុបជាង ៦០ប៊ីលានដុង ស្មើនឹងជាង២លានដុល្លារអាមេរិក។ នេះបើតាមការបញ្ជាក់ពីសម្តេច ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។

ក្នុងកិច្ចសំណេះសំណាលជាមួយប្រជាពលរដ្ឋខ្មែរក្រោម សម្តេច ប៊ុន រ៉ានី ហ៊ុនសែន បានបង្ហាញក្តីរំភើប និងសោមនស្សរីករាយក្រែលែង ដោយបានចូលរួមក្នុងពិធីដង្ហែ អង្គកឋិនទានមហាសាមគ្គីគ្រួសារខ្មែរ ដើម្បីនាំយកមកវេរប្រគេនព្រះភិក្ខុសង្ឃ ដែលបានគង់ចាំព្រះវស្សា អស់កាលត្រីមាសនៅវត្តពោធិគិរីវង្សារាមនេះ។

សម្តេចបានគូសបញ្ជាក់ថា ការគិតគូរពីការដង្ហែអង្គកឋិនទានមហាសាមគ្គីគ្រួសារខ្មែរ មកកាន់វត្តខ្មែរក្រោមនេះ មិនមែនទើបតែមានថ្មីៗនេះទេ សម្តេច ហ៊ុន សែន និងសម្តេច បានគិតគូរយូរណាស់មកហើយ ប៉ុន្តែគម្រោងនេះ ត្រូវបានផ្អាកជាច្រើនឆ្នាំដោយសារតែមានធុរៈគ្រួសារ។ 

សម្តេចថ្លែងថា៖ នៅឆ្នាំនេះ ជាពេលវេលាដ៏សមស្រប ដែលនាងខ្ញុំ រួមនឹងសម្តេចតេជោ ហ៊ុន សែន និងកូនៗ ចៅៗ បានផ្តួចផ្តើមសាជាថ្មីលើការធ្វើអង្គកឋិនទានដង្ហែមកកាន់វត្តខ្មែរក្រោម ហើយក៏បានឯកភាពគ្នា រៀបចំអង្គកឋិនទានមហាសាមគ្គីគ្រួសារខ្មែរនេះឡើងដង្ហែមក កាន់វត្តពោធិគិរីវង្សារាម នៅខេត្តត្រាវិញនេះ។

សម្ដេច ប៊ុន រ៉ានី ហ៊ុនសែន បានលើកឡើងថា សរុបថវិកា ដែលត្រូវចំណាយក្នុងអង្គកឋិនទាំងមូលចំនួន ៦០ប៊ីលាន ៥៥៦លាន ៥សែនដុង ស្មើនឹងជាង ២លាន ៣០ម៉ឺនដុល្លារអាមេរិក។ ក្នុងនោះ ទី១) ប្រគេនបច្ច័យសង្កត់ត្រៃអង្គកឋិនទានដង្ហែមកវត្តពោធិគិរីវង្សារាម ២៣ប៊ីលាន ៨៤២លានដុង, ទី២) បច្ច័យសង្កត់ត្រៃធំ ៥០លានដុង (ហាសិនលានដុង), ទី៣) បច្ច័យសង្កត់ត្រៃសូត្រស្តាំ ២៥លានដុង, ទី៤) បច្ច័យសង្កត់ត្រៃសូត្រឆ្វេង ២៥លានដុង, ទី៥) ប្រគេនបច្ច័យព្រះសង្ឃចំនួន ៥៧អង្គ គង់នៅវត្តេពោធិគិរីវង្សារាម ក្នុងមួយអង្គបច្ច័យចំនួន ១២លាន ៥សែនដុង, ទី៦) ជូនគណៈកម្មការ អាចារ្យ យាយជីតាជីចំនួន១០៤នាក់ក្នុងម្នាក់ៗ ២លាន ៥សែនដុង, ទី៧) ប្រគេនបច្ច័យដល់វត្តចំនួន ១៤២វត្ត ក្នុងខេត្តត្រាវិញ ក្នុង ១វត្ត បច្ច័យចំនួន ២៥១លានដុង៕

អត្ថបទ៖ ផល កុសល រូបភាព៖ ក្រុមព័ត៌មានសម្តេចធិបតី