លោក ដូណាល់ ត្រាំ និងលោកស្រី កាម៉ាឡា ហារីស សុទ្ធតែជាបេក្ខភាពប្រធានាធិបតីមានប្រជាប្រិយភាពខ្លាំង ដោយទទួលបានសម្លេងគាំទ្រប្រកៀកប្រកិតគ្នាមែនទែន សម្រាប់ការបោះឆ្នោតនៅថ្ងៃទី០៥ ខែវិច្ឆិកាខាងមុខ។

ដ្បិតបេក្ខភាពប្រធានាធិបតីអាមេរិកទាំង២ មានសម្លេងគាំទ្រប្រហាក់ប្រហែលគ្នា ក៏ប៉ុន្តែបើក្រឡេកទៅមើលទំហំទ្រព្យសម្បត្តិរបស់អ្នកទាំង២ វិញ គឺមានភាពខុសគ្នាដល់ទៅ ១០០០ដងឯណោះ។

យោងតាមរបាយការណ៍បង្ហាញដោយគេហទំព័រ Forbes បានឲ្យដឹងថា គិតត្រឹមចុងខែតុលា ទ្រព្យសម្បត្តិរបស់លោកត្រាំ មានប្រមាណ ៨ពាន់លានដុល្លារ ដោយសារតម្លៃហ៊ុននៃក្រុមហ៊ុន Trump Media & Technology Group កើនឡើងជាបន្តបន្ទាប់នៅក្នុងខែតុលា ប្រមាណ ២៥០%។

ចំណែកឯទ្រព្យសម្បត្តិរបស់លោកស្រីហារីស និងស្វាមីលោក Doug Emhoff វិញ គឺមានប្រហែល ៨លានដុល្លារ និងមានអចលនទ្រព្យតម្លៃខ្ទង់លានដុល្លារនៅក្នុងទីក្រុង Los Angeles។

អនុប្រធានាធិបតីអាមេរិកស្រីរូបនេះ ក៏មានប្រាក់ចំណូលពីការបណ្ដាក់ទុនលើមូលបត្របំណុល ប្រាក់សោធន៍ មានភាគហ៊ុនលើផ្សារហ៊ុន ក៏ដូចជាប្រាក់ខែពីរដ្ឋាភិបាលប្រមាណ ២៣៥ ០០០ដុល្លារប្រចាំឆ្នាំផងដែរ៕

អត្ថបទ៖ Luffy រូបភាព៖ Washington Post