អ្នកអភិវឌ្ឍន៍អចលនទ្រព្យ Bitexco Group បានប្រាប់តុលាការថា ប្រាក់ចំនួន ១៥.៧ពាន់ពាន់លានដុង ឬស្មើ ៦៣២លានដុល្លារអាមេរិកដែលខ្លួនទទួលបានពីលោកស្រី Truong My Lan ដើម្បីអភិវឌ្ឍគម្រោងគឺស្របច្បាប់ ហើយមិនពាក់ព័ន្ធនឹងឧក្រិដ្ឋកម្មដែលត្រូវបានចោទប្រកាន់របស់លោកស្រីនោះទេ។

មេធាវីតំណាងឱ្យក្រុមហ៊ុនកាលពីថ្ងៃព្រហស្បតិ៍ បានស្នើឱ្យតុលាការមិនអនុម័តអនុសាសន៍របស់អ្នកស៊ើបអង្កេតក្នុងការរឹបអូសប្រាក់សរុបរបស់ក្រុមហ៊ុន។

ក្រុមអ្នកស៊ើបអង្កេតបានរកឃើញថា ក្នុងឆ្នាំ២០១៨ Bitexco បានយល់ព្រមលក់គម្រោងអចលនទ្រព្យមួយដែលមានឈ្មោះថា The Spirit of Saigon ក្នុងតំបន់ ១ នៃទីក្រុងហូជីមិញ ទៅឱ្យក្រុមហ៊ុនរបស់លោកស្រី Truong My Lan ដែលជាក្រុមហ៊ុន Van Thinh Phat Group ក្នុងតម្លៃ ២២លានលានដុង។

លោកស្រី Lan រហូតមកដល់បច្ចុប្បន្នបានផ្ទេរប្រាក់ ១៥.៧ ពាន់ពាន់លានដុងទៅឱ្យក្រុមហ៊ុន Bitexco ។ ដោយសារប្រតិបត្តិការមិនទាន់បានបញ្ចប់ ភាគីទាំងពីរមិនបានចុះហត្ថលេខាលើកិច្ចសន្យាចុងក្រោយដើម្បីផ្ទេរគម្រោងនេះទេ ដែលមានទំហំ ៨,៦០០ ម៉ែត្រការ៉េនៅក្នុងទីតាំងសំខាន់មួយនៅទីក្រុងធំបំផុតរបស់ប្រទេសវៀតណាម។

បន្ទាប់ពី លោកស្រី Lan ត្រូវបានចាប់ខ្លួន ប៉ូលីសបានរឹបអូសគណនីជាច្រើនរបស់ Bitexco និងក្រុមហ៊ុនដែលជាប់ពាក់ព័ន្ធ ដោយសារតែមានការសង្ស័យថា វាមានជាប់ពាក់ព័ន្ធក្នុងឧក្រិដ្ឋកម្មដែលត្រូវបានចោទប្រកាន់របស់លោកស្រី។

ទោះបីជាយ៉ាងណាក៏ដោយ មេធាវីតំណាងឱ្យ Bitexco បានប្រាប់តុលាការកាលពីថ្ងៃព្រហស្បតិ៍ថា ក្រុមហ៊ុនបានទទួលប្រាក់នេះដោយស្របច្បាប់ ហើយខ្លួនបានធ្វើការស៊ើបអង្កេតដោយខ្លួនឯងដើម្បីបញ្ជាក់ថា ប្រាក់នេះមិនបានមកធនាគារ Saigon Commercial Bank ដែលជាកន្លែងលោកស្រី Lan ត្រូវបានគេរកឃើញថាមានទោសពីបទកេងបន្លំ ឬពីលោកស្រី ដែលត្រូវ​បាន​ចោទ​ប្រកាន់ចេញ​មូលបត្រ​បំណុល​ក្លែង​បន្លំ​។

មេធាវីបានបន្ថែមថា ដោយសារតែការចាប់ខ្លួន លោកស្រី Lan ក្នុងអំឡុងពេលដំណើរការផ្ទេរនេះ ក្រុមហ៊ុនបានខាតបង់ចំនួន ១២ពាន់ពាន់លានដុងនៅក្នុងគម្រោងនេះ។ ឥឡូវនេះក្រុមហ៊ុនកំពុងស្វែងរកការយល់ព្រមពីតុលាការដើម្បីលុបគណនីរបស់ខ្លួន។

លោកស្រី Lan ស្ថិតក្នុងការកាត់ក្តីលើកទីពីររបស់លោកស្រីនៅឆ្នាំនេះ ដែលនៅក្នុងនោះ ព្រះរាជអាជ្ញាបានផ្តល់អនុសាសន៍ឱ្យជាប់គុកមួយជីវិតដោយសារការចោទប្រកាន់ពីបទក្លែងបន្លំទ្រព្យសម្បត្តិ ការលាងលុយកខ្វក់ និងការផ្ទេរប្រាក់ឆ្លងដែនខុសច្បាប់។

នៅក្នុងការកាត់ក្តីលើកដំបូងក្នុងខែមេសា លោកស្រី Lan ត្រូវបានកាត់ទោសប្រហារជីវិតពីបទកេងបន្លំប្រាក់ ៦៧៧ ពាន់ពាន់លានដុងពីធនាគារ Saigon Commercial Bank។ ប៉ុន្តែលោកស្រី​បាន​ប្តឹង​ឧទ្ធរណ៍​ចំពោះ​សាលក្រម​នេះ៕

អត្ថបទ៖ សារ៉ាយ រូបភាព៖ VnExpress/Quynh Tran