រយៈពេលប៉ុន្មានថ្ងៃនេះ កម្មវិធី AI របស់ចិនមួយមានឈ្មោះថា DeepSeek កំពុងបង្កភាពចលាចលនពេញទីផ្សារបច្ចេកវិទ្យាពិភពលោក ដោយសារទើបតែបង្កើត ប៉ុន្តែមានសមត្ថភាពអស្ចារ្យ អាចប្រកួតប្រជែងជាមួយក្រុមហ៊ុនខ្នាតយក្សដទៃដូចជា OpenAI និង Meta AI បានយ៉ាងងាយស្រួល។
Million Times 
ទីភ្នាក់ងារព័ត៌មាន Bloomberg បានចុះផ្សាយថា វត្តមានរបស់កម្មវិធី DeepSeek បានធ្វើឲ្យទីផ្សារភាគហ៊ុនបច្ចេកវិទ្យានៅអាមេរិកដាំក្បាលចុះខ្លាំងកាលពីថ្ងៃទី២៧ ខែមករា ដោយក្រុមហ៊ុន Nvidia ខាតលុយរាប់សិបពាន់លានដុល្លារ។
កម្មវិធី DeepSeek ត្រូវបានបង្កើតឡើងក្នុងឆ្នាំ២០២៣ និងមានមុខងារស្រដៀងជាមួយ ChatGPT របស់ក្រុមហ៊ុន OpenAI ដោយអនុញ្ញាតឲ្យអ្នកប្រើប្រាស់អាចស្រាវជ្រាវព័តមានបានដោយសេរី ដោយគ្រាន់តែផ្ញើសារនៅក្នុងកម្មវិធីមួយនេះ។
ហេតុផលចំបងដែលធ្វើឲ្យកម្មវិធីរបស់ចិនផ្ទុះការគាំទ្រខ្លាំងបែបនេះ គឺដោយសារដើមទុននៃការផលិតកម្មវិធី គឺមានតិចតួចបំផុត បើធៀបនឹងក្រុមហ៊ុនគូប្រជែងរកស៊ីលើវិស័យដូចគ្នា។ DeepSeek ត្រូវបានបង្កើតឡើងដោយលោក Liang អតីតនិស្សិតសកលវិទ្យាល័យ Zhejiang University ជាមួយដើមទុន ១០លានយ៉ន់ (១,៤លានដុល្លារ) និងក្រោយមកទទួលបានការបណ្ដាក់ទុនពីក្រុមហ៊ុនដទៃ រហូតដល់ខ្ទង់ ៦លានដុល្លារ។
ការចំណាយរបស់ DeepSeek បានធ្វើឲ្យពិភពលោកភ្ញាក់ផ្អើលជាខ្លាំង ដ្បិតចាយលុយអស់តិច តែមានសមត្ថភាពអាចប្រើប្រាស់បាន ល្អដូចកម្មវិធី ChapGPT ដែលមានដើមទុនខ្ទង់ ២៥០លានដុល្លារ និងកម្មវិធី Meta AI ចាយអស់រហូតខ្ទង់ពាន់លានដុល្លារឯណោះ។
បច្ចុប្បន្ន កម្មវិធី DeepSeek កំពុងទទួលបានការគាំទ្រខ្លាំងទូទាំងពិភពលោក ដោយឈរនៅកំពូលតារាងសម្រាប់កម្មវិធីមានអ្នកទាញយកច្រើនបំផុត នៅក្នុង App Store និង Play Store នៅសហរដ្ឋអាមេរិក កាណាដា និងអូស្ត្រាលី៕
អត្ថបទ៖ Luffy រូបភាព៖ SCMP/