២០២៦ Archives - Millions times

ទីផ្សារមូលធនកម្ពុជាបង្ហាញសញ្ញាវិជ្ជមាន ខណៈការកៀរគរទុនឆ្នាំ២០២៦ រំពឹងឈានដល់ ២ ប៊ីលានដុល្លារ

Manuk Bee — Thu, 06 Aug 2026 09:11:23 +0000

ភ្នំពេញ៖ ការកៀរគរទុនតាមរយៈទីផ្សារមូលបត្រកម្ពុជាក្នុងឆ្នាំ២០២៦ ត្រូវបានរំពឹងថា នឹងកើនដល់ប្រមាណ ២ ប៊ីលានដុល្លារអាម៉េរិក ទាំងការបោះផ្សាយលក់មូលបត្រជាសាធារណៈ និងជាឯកជន ដែលត្រូវបានចាត់ទុកថាជាសញ្ញាវិជ្ជមានសម្រាប់ការរីកចម្រើននៃទីផ្សារមូលធនកម្ពុជា។

ការលើកឡើងនេះ ធ្វើឡើងដោយ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) ក្នុងពិធីបើក វេទិកាវិនិយោគិនលើកទី៦ ស្តីពី «ការសន្សំមូលបត្រ» ដែលរៀបចំឡើងនៅថ្ងៃទី៥ ខែសីហា ឆ្នាំ២០២៦ ដោយ ន.ម.ក. សហការជាមួយក្រុមហ៊ុនមូលបត្រ រ៉ូយ៉ាល់គ្រុប ម.ក. និងមានការចូលរួមពីផ្សារមូលបត្រកម្ពុជា (ផមក.)។

វេទិកានេះមានការចូលរួមពីថ្នាក់ដឹកនាំ និងមន្ត្រីប្រមាណ ១០០នាក់ មកពីនិយ័តករ និងអង្គភាពក្រោមឱវាទនៃអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) ក្នុងគោលបំណងបង្ហាញពីវឌ្ឍនភាពនៃវិស័យមូលបត្រ និងលើកកម្ពស់ការយល់ដឹងអំពីឱកាសវិនិយោគនៅក្នុងទីផ្សារមូលបត្រកម្ពុជា។

ឯកឧត្តម ស៊ូ សុជាតិ បានមានប្រសាសន៍ថា ការដាក់ឱ្យដំណើរការទីផ្សារមូលបត្ររដ្ឋ បានចូលរួមជំរុញការអភិវឌ្ឍ និងពង្រឹងទីផ្សារមូលធនកម្ពុជាឱ្យកាន់តែរឹងមាំ។ ឯកឧត្តមក៏បានលើកទឹកចិត្តឱ្យសាធារណជនសាកល្បងចូលរួមទិញមូលបត្រ ឬតាមដានការចុះបញ្ជីមូលបត្រថ្មី ជាពិសេសក្នុងដំណាក់កាល IPO ដើម្បីស្វែងយល់ពីអត្ថប្រយោជន៍ និងទទួលបានបទពិសោធន៍វិនិយោគជាក់ស្តែង។

ឯកឧត្តមបន្តថា កម្មវិធីនេះនឹងជួយឱ្យសិក្ខាកាមទទួលបានចំណេះដឹង និងបទពិសោធន៍បន្ថែមអំពីការវិនិយោគ និងការជួញដូរភាគហ៊ុន តាមរយៈការអនុវត្តជាក់ស្តែងលើកម្មវិធី CSX Trade ព្រមទាំងរួមចំណែកលើកកម្ពស់ការចូលរួមរបស់សាធារណជនក្នុងទីផ្សារមូលធន និងពង្រីកសក្តានុពលវិស័យមូលបត្រនៅកម្ពុជា។

ជាមួយគ្នានេះ លោក សេង ចាន់ធឿន នាយកប្រតិបត្តិនៃក្រុមហ៊ុនមូលបត្រ រ៉ូយ៉ាល់គ្រុប ម.ក. បានឱ្យដឹងថា វិនិយោគិនដែលបើកគណនីជាមួយក្រុមហ៊ុន អាចធ្វើការជួញដូរផលិតផលនៅក្នុងផ្សារមូលបត្រកម្ពុជា ហើយនាពេលខាងមុខ នឹងអាចជួញដូរនៅក្នុងទីផ្សារមូលបត្រអន្តរជាតិផងដែរ។

លោកបានផ្តល់អនុសាសន៍ថា វិនិយោគិនគួរសិក្សាឱ្យបានច្បាស់ពីហានិភ័យ និងផលចំណេញ ស្វែងយល់ពីស្ថានភាពក្រុមហ៊ុនចុះបញ្ជី និងទិសដៅវិនិយោគ ព្រមទាំងគួរប្រើប្រាស់ប្រាក់ដែលនៅសេសសល់សម្រាប់វិនិយោគ ដោយចៀសវាងការខ្ចីបំណុល ឬយកប្រាក់ចំណាយប្រចាំថ្ងៃមកវិនិយោគ។ លោកបន្ថែមថា ការវិនិយោគអាចចាប់ផ្តើមពីទុនតិចតួច ដើម្បីសិក្សាពីចលនាទីផ្សារ មិនចាំបាច់ត្រូវមានប្រាក់រាប់ម៉ឺនដុល្លារនោះទេ។

ក្នុងវេទិកានេះផងដែរ សិក្ខាកាមបានចូលរួមពិភាក្សាសួរដេញដោលជាមួយវាគ្មិន និងអនុវត្តការវិនិយោគជាក់ស្តែងតាមរយៈកម្មវិធី CSX Trade បន្ទាប់ពីទទួលបានលេខអត្តសញ្ញាណវិនិយោគិន និងគណនីជួញដូរភ្លាមៗ៕

អត្ថបទ៖ ប៊ី

តាមដានជាមួយយើង៖ Million Times

The post ទីផ្សារមូលធនកម្ពុជាបង្ហាញសញ្ញាវិជ្ជមាន ខណៈការកៀរគរទុនឆ្នាំ២០២៦ រំពឹងឈានដល់ ២ ប៊ីលានដុល្លារ appeared first on Millions times.

កំណើនសេដ្ឋកិច្ចកម្ពុជារំពឹងថានឹងកើនដល់ជិត ៥ ភាគរយ ក្នុងឆ្នាំ ២០២៦ នេះ

Manuk Bee — Tue, 07 Apr 2026 08:11:28 +0000

កំណើនសេដ្ឋកិច្ចរបស់ប្រទេសកម្ពុជាត្រូវបានព្យាករថានឹងកើនឡើងត្រឹម ៤,៩ ភាគរយ ជាមួយនឹងអត្រាអតិផរណា ២,៩ ភាគរយនៅឆ្នាំ ២០២៦ ដោយសារភាពមិនប្រាកដប្រជាពីខាងក្រៅបានជះឥទ្ធិពលដល់សន្ទុះកំណើន។ នេះបើយោងតាមទស្សនវិស័យសេដ្ឋកិច្ចតំបន់អាស៊ាន+៣ ចុងក្រោយបង្អស់របស់ AMRO។

កំណើនសេដ្ឋកិច្ចកម្ពុជារំពឹងថានឹងមានការថមថយបន្តិចក្នុងឆ្នាំ ២០២៦ ធៀបនឹងកំណើនប្រមាណ ៥,២ ភាគរយនៅឆ្នាំ ២០២៥។ ទោះបីជាបីយ៉ាងណាក៏ដោយ ទស្សនវិស័យនេះបង្ហាញថា សេដ្ឋកិច្ចរបស់ប្រទេសកម្ពុជានៅតែស្ថិតក្នុងស្ថានភាពស្ថិរភាព និងមានការព្យាករណ៍ថាកំណើននឹងងើបឡើងវិញដល់ ៥,២ ភាគរយនៅឆ្នាំ ២០២៧ ដែលគាំទ្រដោយកំណើននៃការវិនិយោគជាបន្តបន្ទាប់ និងការធ្វើពិពិធកម្មនាំចេញ។

កំណើនសេដ្ឋកិច្ចរបស់កម្ពុជា នៅតែបន្តគាំទ្រដោយវិស័យផលិតកម្ម ដែលផ្តោតលើការនាំចេញរបស់ខ្លួន ទោះបីជាតម្រូវការសកលកាន់តែទន់ខ្សោយ និងវិស័យពាណិជ្ជកម្មត្រូវបានរំពឹងថានឹងទទួលបានរងផលប៉ះពាល់ ដោយសារវិបត្តិសង្គ្រាមនៅមជ្ឈិមបូព៌ា ក្នុងរយៈពេលដ៏ខ្លីខាងមុខនេះក៏ដោយ។

តាមដានជាមួយយើង៖ Million Times

ក្នុងពេលជាមួយគ្នានេះ ការកើនឡើងនៃលំហូរចូលនៃការវិនិយោគផ្ទាល់ពីបរទេស ជាពិសេសទៅក្នុងឧស្សាហកម្មមិនមែនកាត់ដេរ កំពុងជួយពង្រីកមូលដ្ឋានឧស្សាហកម្មរបស់ប្រទេសកម្ពុជា និងកាត់បន្ថយការពឹងផ្អែកលើវិស័យប្រពៃណី។

ទន្ទឹមនឹងនេះ អតិផរណាត្រូវបានព្យាករថានឹងកើនឡើងដល់ ២.៩ ភាគរយនៅឆ្នាំ ២០២៦ កើនឡើងពី ២.៥ ភាគរយនៅឆ្នាំ ២០២៥ ដែលឆ្លុះបញ្ចាំងពីការកើនឡើងនៃតម្លៃថាមពលសកល និងភាពតានតឹងភូមិសាស្ត្រនយោបាយដែលកំពុងបន្ត។ ទោះបីជាមានការកើនឡើងនេះក៏ដោយ សម្ពាធតម្លៃនៅតែមានកម្រិតមធ្យម ដែលបង្ហាញថាលក្ខខណ្ឌតម្រូវការក្នុងស្រុកមានស្ថេរភាព ហើយហានិភ័យអតិផរណាអាចគ្រប់គ្រងបាន។

ការកើនឡើងកម្រិតមធ្យមនៃអតិផរណាទំនងជាមិនធ្វើឱ្យប៉ះពាល់ដល់អំណាចទិញយ៉ាងខ្លាំងនោះទេ ប៉ុន្តែវាបង្ហាញពីការងាយនឹងរងផលប៉ះពាល់របស់ប្រទេសកម្ពុជាទៅនឹងផលប៉ះពាល់ខាងក្រៅ ជាពិសេសការប្រែប្រួលនៃតម្លៃប្រេងឥន្ធនៈ និងនាំចូល។

យ៉ាងណាក៏ដោយ ទស្សនវិស័យរយៈពេលមធ្យមរបស់ប្រទេសកម្ពុជានៅតែវិជ្ជមាន។ ការរួមបញ្ចូលគ្នានៃលំហូរចូលវិនិយោគដែលមានស្ថិរភាព ការធ្វើពិពិធកម្មសេដ្ឋកិច្ចបន្តិចម្តងៗ និងការនាំចេញដែលមានភាពធន់ ត្រូវបានគេរំពឹងថានឹងគាំទ្រដល់ការវិលត្រឡប់ទៅរកកំណើនដ៏រឹងមាំជាងក្រោយឆ្នាំ ២០២៦ ដែលពង្រឹងជំហររបស់ប្រទេសកម្ពុជាជាសេដ្ឋកិច្ចដែលកំពុងរីកចម្រើនខ្លាំងមួយនៅក្នុងតំបន់៕

អត្ថបទ៖ ប៊ី

The post កំណើនសេដ្ឋកិច្ចកម្ពុជារំពឹងថានឹងកើនដល់ជិត ៥ ភាគរយ ក្នុងឆ្នាំ ២០២៦ នេះ appeared first on Millions times.

កម្ពុជាទាក់ទាញទុនវិនិយោគជាង ៧៥០ លានដុល្លារ ក្នុងខែមករា ឆ្នាំ២០២៦

Manuk Bee — Tue, 10 Feb 2026 09:00:12 +0000

ក្នុងខែមករា ឆ្នាំ២០២៦ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេច ចុះបញ្ជីគម្រោងវិនិយោគសរុបចំនួន ៤៣ គម្រោង ក្នុងទំហំទុនវិនិយោគសរុបប្រមាណ ៧៥២ លានដុល្លារអាម៉េរិក និងអាចបង្កើតការងារបានប្រមាណ ២៦ ពាន់កន្លែង។ នេះបើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ដែលចេញផ្សាយនៅថ្ងៃទី១០ ខែកុម្ភៈ ឆ្នាំ២០២៦។

ក្នុងចំណោមគម្រោងវិនិយោគសរុប គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ៣៥ គម្រោង និងគម្រោង វិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ៨ គម្រោង។

ក្នុងខែមករា ឆ្នាំ២០២៦ នេះ ការចុះបញ្ជីគម្រោងវិនិយោគមានការថយចុះចំនួន ២៥ គម្រោង ស្មើនឹងប្រមាណ ៣៧% ខណៈទំហំទុនវិនិយោគមានការកើនឡើងប្រមាណ ៣,៤ លានដុល្លារអាមេរិក ស្មើនឹងប្រមាណ ០,៤៥% ធៀបនឹងរយៈពេល ដូចគ្នាក្នុងឆ្នាំ២០២៥។

តាមដានជាមួយយើង៖ Million Times

យ៉ាងណាមិញ ជាការកត់សម្គាល់ ក្នុងខែមករា ឆ្នាំ២០២៦ គណៈកម្មាធិការវិនិយោគ កម្ពុជាបានចុះបញ្ជីគម្រោងវិនិយោគធំៗមួយចំនួនដូចជា គម្រោងវិនិយោគបង្កើតតំបន់សេដ្ឋកិច្ចពិសេសចំនួន ៣ តំបន់ ក្នុងទំហំទុនវិនិយោគដល់ទៅ ២៦០ លានដុល្លារអាម៉េរិក និងគម្រោងវិនិយោគអភិវឌ្ឍន៍ស្ថានីយផលិត អគ្គិសនីដើរដោយថាមពលខ្យល់ អានុភាព ១៥០មេហ្គាវ៉ាត់ ក្នុងទំហំទុនវិនិយោគប្រមាណ ២០០លានដុល្លារ អាមេរិក។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានថ្លែងកាលពីថ្មីៗនេះថា កម្ពុជាមានបរិយាកាសវិនិយោគដ៏ទាក់ទាញ ក្រោមចំណុចគន្លឹះមួយចំនួន រួមមាន៖ (១)កិច្ចខិតខំប្រឹងប្រែងរបស់ប្រមុខរាជរដ្ឋាភិបាល ក្នុងការរក្សាសន្តិភាព និងស្ថិរភាពនយោបាយ, (២)ច្បាប់ស្តីពីវិនិយោគ ដែលផ្តល់នូវការលើកទឹកចិត្តជាអតិបរមា មានតម្លាភាព និងយន្តការសម្របសម្រួលវិនិយោគនានា, (៣)សក្តានុពលភូមិសាស្ត្រនយោបាយ ដែលកម្ពុជាជាសមាជិកអាស៊ាន និងជាច្រកតភ្ជាប់ដ៏សំខាន់ក្នុងតំបន់, (៤)មូលធនមនុស្សមានវ័យក្មេង ដែលងាយក្នុងការបណ្តុះបណ្តាល, (៥)លំនឹងម៉ាក្រូសេដ្ឋកិច្ច, (៦) កិច្ចព្រមព្រៀងពាណិជ្ជកម្មសេរីរួមមានកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA)ជាដើម, និង (៧)ការអភិវឌ្ឍហេដ្ឋារចនាសម្ព័ន្ធជាមួយនឹងគម្រោងធំៗដូចជា ផ្លូវល្បឿនលឿន កំពង់ផែទឹកជ្រៅ និងអាកាសយានដ្ឋានអន្តរជាតិថ្មី ដែលជួយសម្រួលដល់ការដឹកជញ្ជូន និងកាត់បន្ថយថ្លៃដើមប្រតិបត្តិការ។

ឯកឧត្តមឧបនាយករដ្ឋមន្ត្រី បានបន្ថែមថា កម្ពុជា គឺជាប្រទេសទី១ ក្នុងពិភពលោក ដែលបានចុះកិច្ចព្រមព្រៀងពាណិជ្ជកម្មបដិការជាផ្លូវការ ជាមួយសហរដ្ឋអាម៉េរិក វាបានបង្ហាញពីភាពប្រាកដប្រជា និងបង្កើនទំនុកចិត្តសម្រាប់ការវិនិយោគ និងការនាំចេញទៅកាន់ទីផ្សារដ៏ធំរបស់អាម៉េរិកផងដែរ៕

អត្ថបទ៖ ប៊ី

The post កម្ពុជាទាក់ទាញទុនវិនិយោគជាង ៧៥០ លានដុល្លារ ក្នុងខែមករា ឆ្នាំ២០២៦ appeared first on Millions times.

ផ.ស.ស. របស់កម្ពុជា រំពឹងថានឹងកើនដល់ជាង ៥៣ ពាន់លានដុល្លារនៅឆ្នាំ ២០២៦

Manuk Bee — Wed, 31 Dec 2025 06:38:00 +0000

ផលិតផលសរុបក្នុងស្រុក (ផ.ស.ស.) ឆ្នាំ ២០២៦ រំពឹងថានឹងមានទំហំទឹកប្រាក់ប្រមាណ ២១៧ ០៦៣ប៊ីលានរៀល ស្មើនឹងនឹងជាង ៥៣ ពាន់លានដុល្លារ ស្របពេលដែល ផ.ស.ស. សម្រាប់មនុស្សម្នាក់ នឹងកើនឡើងដល់ ៣ ០២០ដុល្លារ។ នេះបើយោងតាមសេចក្ដីថ្លែងហេតុ អំពី សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ ដែលក្រសួងសេដ្ឋកិច្ច និងហិរញ្ញវត្ថុ ចេញផ្សាយកាលពីថ្មីៗនេះ។

សេចក្តីថ្លែងហេតុខាងលើ បានឱ្យដឹងថា សម្រាប់កម្ពុជា តាមការវាយតម្លៃឡើងវិញសម្រាប់រយៈពេល ៩ ខែ ឆ្នាំ ២០២៥ ដោយផ្អែក លើការវិវត្តនៃកត្តាចម្បងពីរគឺ (ទី១)-ការចាប់ផ្តើមអនុវត្តជាអចិន្ត្រៃយ៍នូវពន្ធគយបដិការក្នុងអត្រា ១៩% ចាប់ពីខែសីហា ឆ្នាំ២០២៥ និង (ទី២)-ភាពតានតឹងនៃបញ្ហាព្រំដែនកម្ពុជា-ថៃ បណ្តាលមកពីការឈ្លានពានរបស់ថៃមកលើអធិបតេយ្យកម្ពុជា និងការបិទខ្ទប់ព្រំដែនគោកកម្ពុជា-ថៃ បានបន្ទច់ បង្អាក់ដល់ផ្នែកមួយចំនួននៃចរន្តសេដ្ឋកិច្ច ហើយស្ថានភាពនេះក៏អាចបន្តអូសបន្លាយដល់ឆ្នាំ២០២៦ ខាងមុខ។

តាមរយៈការវាយតម្លៃឡើងវិញនេះ សេដ្ឋកិច្ចកម្ពុជាត្រូវបានព្យាករថានឹងសម្រេចបានកំណើន ក្នុងរង្វង់ ៥,២% សម្រាប់ឆ្នាំ២០២៥ និងប្រមាណ ៥,០% សម្រាប់ឆ្នាំ២០២៦ ដែលអត្រាកំណើននេះ គឺប្រហាក់ប្រហែលនឹងការវាយតម្លៃនៅពេលរៀបចំក្របខ័ណ្ឌហិរញ្ញវត្ថុសាធារណៈរយៈពេលមធ្យម ២០២៦-២០២៨ ដោយគ្រាន់តែមានការកែតម្រូវអត្រាកំណើនតាមវិស័យនិងអនុវិស័យ។

តាមដានជាមួយយើង៖ Million Times

លើមូលដ្ឋាននៃការវាយតម្លៃនេះដែរ ផ.ស.ស. ថ្លៃបច្ចុប្បន្នឆ្នាំ ២០២៦ នឹងស្ថិតក្នុងរង្វង់ ២១៧ ០៦៣ប៊ីលានរៀល សមមូលនឹងប្រមាណ ៥៣ ៧៩៥ លានដុល្លារអាមេរិក ស្របពេលដែល ផ.ស.ស. សម្រាប់មនុស្សម្នាក់ ត្រូវបានរំពឹងថានឹងកើនឡើងដល់៣ ០២០ដុល្លារអាម៉េរិក បើធៀបនឹងប្រមាណ ២ ៨៥៨ ដុល្លារ អាមេរិកក្នុងឆ្នាំ២០២៥។

អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ, និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ នូវ «យុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ ២០២៥-២០៣០» កាលពីថ្ងៃទី១៧ ខែធ្នូ ឆ្នាំ២០២៥ ថា ក្នុងរយៈពេលជិត ៣ ទសវត្សរ៍ ចុងក្រោយនេះ តាមរយៈការខិតខំឥតស្រាកស្រាន្ត និងការកែទម្រង់មុតស្រួចឥតងាករេលើគ្រប់វិស័យរបស់រាជរដ្ឋាភិបាល កម្ពុជា បន្តសម្រេចបាននូវសមិទ្ធផលដ៏ធំធេងជាច្រើន និងបានផ្លាស់ប្តូរមុខមាត់គួរជាទីមោទនៈ ដោយរក្សាបានយ៉ាងគត់មត់ នូវស្ថិរភាពនយោបាយ សណ្តាប់ធ្នាប់សង្គម សន្តិសុខ សុវត្ថិភាព ព្រមទាំងធានាបានយ៉ាងរឹងមាំនូវការអភិវឌ្ឍសង្គម-សេដ្ឋកិច្ច និងស្ថិរភាពម៉ាក្រូសេដ្ឋកិច្ច និង ហិរញ្ញវត្ថុសាធារណៈ។

អគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងថា បន្ថែមលើនេះ សេដ្ឋកិច្ចកម្ពុជា បានស្ទុះងើបឡើងវិញយ៉ាងរហ័ស និងបន្តឈរលើមាគ៌ានៃកំណើនដ៏រឹងមាំ បន្ទាប់ពីវិបត្តិនៃជំងឺកូវីដ-១៩ ជាសកល ទោះបីជាត្រូវបន្តពុះពារជម្នះនូវបញ្ហាប្រឈម និងភាពមិនប្រាកដប្រជាខ្ពស់នៃស្ថានភាពតំបន់ និងសកល ដោយសារការបន្តប្រឈមមុខខាងភូមិសាស្ត្រនយោបាយកាន់តែស្រួចស្រាល់ ការបែកខ្ញែកនៃសេដ្ឋកិច្ចសកល ដែលប៉ះពាល់ដល់កិច្ចសហប្រតិបត្តិការ និងពាណិជ្ជកម្មអន្តរជាតិ ការងើបមកវិញនៃនិន្នាការឯកតោភាគីនិយម ភាពមិនច្បាស់លាស់នៃទស្សនវិស័យកំណើនសេដ្ឋកិច្ច នៃបណ្តាប្រទេស និងតំបន់ ជាដៃគូពាណិជ្ជកម្មសំខាន់ៗរបស់កម្ពុជា ការប្រែប្រួលអាកាសធាតុ ។ល។

អគ្គបណ្ឌិតសភាចារ្យ បានបញ្ជាក់ថា ៖«បច្ចុប្បន្ននេះ ទោះបីត្រូវប្រឈមនឹងការដាក់ពន្ធគយបដិការ និងការឈ្លានពានលើអធិបតេយ្យជាតិ និងបូរណភាពទឹកដីយ៉ាងណាក្តី ក៏សេដ្ឋកិច្ចកម្ពុជា ត្រូវបានរំពឹងថាអាចនឹងសម្រេចបានកំណើនក្នុងរង្វង់ប្រមាណ ៥,២% ក្នុងឆ្នាំ ២០២៥ នេះ និងប្រមាណ ៥% សម្រាប់ឆ្នាំ ២០២៦ ខាងមុខ»៕

អត្ថបទ៖ ប៊ី

The post ផ.ស.ស. របស់កម្ពុជា រំពឹងថានឹងកើនដល់ជាង ៥៣ ពាន់លានដុល្លារនៅឆ្នាំ ២០២៦ appeared first on Millions times.