កម្ពុជាកំពុងរៀបចំគោលនយោបាយអភិវឌ្ឍន៍វិស័យឧស្សាហកម្មសម្រាប់ឆ្នាំ២០២៦-២០៣៥ ដោយផ្តោតលើការធ្វើទំនើបកម្មរចនាសម្ព័ន្ធឧស្សាហកម្ម ពង្រឹងភាពប្រកួតប្រជែង ពិពិធកម្មផលិតកម្ម និងការតភ្ជាប់រវាងការវិនិយោគបរទេសជាមួយសហគ្រាសក្នុងស្រុក។

ឧត្តមក្រុមប្រឹក្សាសេដ្ឋកិច្ចជាតិ (កបស) បានរៀបចំកិច្ចប្រជុំអន្តរក្រសួង-ស្ថាប័ន កាលពីរសៀលថ្ងៃទី១៨ ខែកញ្ញា ដើម្បីពិនិត្យ និងពិភាក្សាលើសេចក្តីព្រាង «គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០២៦-២០៣៥» ក្រោមការដឹកនាំរបស់ ឯកឧត្តមបណ្ឌិតសភាចារ្យ ហ៊ាន សាហ៊ីប អនុប្រធានប្រចាំការកបស និងជាប្រធានក្រុមការងារគោលនយោបាយអភិវឌ្ឍន៍វិស័យឧស្សាហកម្មកម្ពុជា (IDP)។

កិច្ចប្រជុំនេះមានការចូលរួមពីសមាជិក-សមាជិកានៃកបស សមាជិក-សមាជិកាក្រុមការងារ IDP និងមន្ត្រីជំនាញពាក់ព័ន្ធ។

ឯកឧត្តមបណ្ឌិតសភាចារ្យ ហ៊ាន សាហ៊ីប បានលើកឡើងអំពីដំណើរការរៀបចំគោលនយោបាយ IDP ដែលបានចាប់ផ្តើមតាំងពីខែឧសភា ឆ្នាំ២០២៥។ ចាប់តាំងពីពេលនោះមក ក្រុមការងារបានធ្វើការពិគ្រោះយោបល់ជាមួយក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និងវិស័យឯកជន ព្រមទាំងសិក្សាបទពិសោធន៍អន្តរជាតិ ដើម្បីប្រមូលធាតុចូលសម្រាប់រៀបចំវិធានការគោលនយោបាយដែលមានភាពជាក់លាក់ និងអាចអនុវត្តបាន។

គោលនយោបាយនេះមានចក្ខុវិស័យធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពីឧស្សាហកម្មដែលពឹងផ្អែកលើអតិពលកម្ម និងជំនាញទាប ទៅជាឧស្សាហកម្មដែលផ្អែកលើជំនាញ និងបច្ចេកវិទ្យាខ្ពស់។

សម្រាប់ការសម្រេចបាននូវចក្ខុវិស័យនេះ គោលនយោបាយបានកំណត់គោលបំណងសំខាន់ចំនួន៤។ ទី១ គឺបង្កើនការវិនិយោគដែលមានគុណភាព និងបង្កើតការងារដែលមានជំនាញ បច្ចេកវិទ្យា ផលិតភាព និងប្រាក់ចំណូលកាន់តែប្រសើរ។ ទី២ គឺរក្សា និងជំរុញការចាក់ឫសឱ្យកាន់តែស៊ីជម្រៅនូវរចនាសម្ព័ន្ធឧស្សាហកម្មកម្ពុជា ដើម្បីទ្រទ្រង់កំណើនសេដ្ឋកិច្ចរយៈពេលវែង។

គោលបំណងទី៣ គឺកសាងវិស័យដែលគាំទ្រដល់ការបង្កើនផលិតភាពនៃវិស័យឧស្សាហកម្មផ្សេងៗទៀត និងទី៤ គឺតម្រង់ទិសវិស័យពាក់ព័ន្ធឱ្យមានភាពត្រៀមខ្លួនសម្រាប់និន្នាការអនាគត មានភាពធន់នឹងបរិស្ថាន និងអាចគ្រប់គ្រងផលប៉ះពាល់បរិស្ថានពីសកម្មភាពឧស្សាហកម្ម។

សេចក្តីព្រាងគោលនយោបាយ IDP ឆ្នាំ២០២៦-២០៣៥ បានកំណត់ឧស្សាហកម្មយុទ្ធសាស្ត្រជា៤ក្រុមអាទិភាព រួមមាន វិស័យឧស្សាហកម្មដែលមានស្រាប់ វិស័យឧស្សាហកម្មកំពុងលូតលាស់ វិស័យឧស្សាហកម្មយុទ្ធសាស្ត្ររយៈពេលវែង និងវិស័យឧស្សាហកម្មគាំទ្រ និងសេដ្ឋកិច្ចចក្រា។

វិធានការគោលនយោបាយត្រូវបានរៀបចំឡើងលើសសរស្តម្ភចំនួន៧ រួមមាន ការលើកកម្ពស់ និងសម្របសម្រួលការវិនិយោគ ការពង្រីក និងពិពិធកម្មទីផ្សារនាំចេញ ការពង្រឹងការតភ្ជាប់ និងការធ្វើមូលដ្ឋានីយកម្មឧស្សាហកម្ម ការកែលម្អបរិយាកាសធុរកិច្ច ការអភិវឌ្ឍហេដ្ឋារចនាសម្ព័ន្ធផ្នែករឹង និងទន់ ការពង្រឹងការអភិវឌ្ឍជំនាញ បច្ចេកវិទ្យា និងទីផ្សារការងារ និងការបង្កើនហិរញ្ញប្បទាន។

ឯកឧត្តមបណ្ឌិតសភាចារ្យបានគូសរំលេចថា គោលនយោបាយ IDP នឹងដើរតួនាទីជាត្រីវិស័យសម្រាប់តម្រង់ទិសឧស្សាហកម្មកម្ពុជាក្នុងទសវត្សរ៍ខាងមុខ តាមរយៈការដោះស្រាយបញ្ហាប្រឈមជារចនាសម្ព័ន្ធ កសាងមូលដ្ឋានឧស្សាហកម្មដែលមានសមត្ថភាពប្រកួតប្រជែង ពិពិធកម្មមុខទំនិញនាំចេញ និងពង្រឹងការតភ្ជាប់រវាងការវិនិយោគបរទេស និងសហគ្រាសក្នុងស្រុក។

គោលនយោបាយនេះក៏នឹងកំណត់ឱ្យបានលម្អិតនូវវិស័យឧស្សាហកម្មគន្លឹះដែលកម្ពុជាមានឧត្តមភាព និងផ្តោតលើការអភិវឌ្ឍសកម្មភាពឧស្សាហកម្មជាជំហានៗទៅតាមដំណាក់កាល ស្របតាមភាពប្រកួតប្រជែងជាក់ស្តែងរបស់កម្ពុជា។

ក្នុងកិច្ចប្រជុំ អង្គប្រជុំបានពិភាក្សាយ៉ាងផុសផុល និងផ្តល់មតិយោបល់បន្ថែមលើសេចក្តីព្រាង ដើម្បីធ្វើឱ្យវិធានការគោលនយោបាយកាន់តែច្បាស់លាស់ មុតស្រួច និងអាចអនុវត្តបាន។ ការពិភាក្សាក៏ផ្តោតលើការរៀបចំយន្តការស្ថាប័នដែលអាចអនុវត្តបាន ស្របតាមអភិក្រម «ជវភាពនៃប្រព័ន្ធតួអង្គតែមួយ»។

ការផ្ទេរបច្ចេកវិទ្យា និងការអភិវឌ្ឍជំនាញក៏ត្រូវបានលើកឡើងជាចំណុចសំខាន់ ដោយត្រូវបានចាត់ទុកថាជាស្ពានសម្រាប់ភ្ជាប់ការស្រាវជ្រាវ នវានុវត្តន៍ និងចំណេះដឹងថ្មីៗ ទៅនឹងការអនុវត្តជាក់ស្តែងក្នុងវិស័យឧស្សាហកម្ម និងទីផ្សារការងារ។

តាមកបស គោលនយោបាយ IDP ឆ្នាំ២០២៦-២០៣៥ បានដាក់ចេញវិធានការជាក់លាក់សម្រាប់កសាងវិស័យឧស្សាហកម្មកម្ពុជាឱ្យកាន់តែមានពិពិធកម្ម ភាពធន់ និងសមត្ថភាពប្រកួតប្រជែងខ្ពស់ ដើម្បីរួមចំណែកជំរុញកំណើនសេដ្ឋកិច្ច និងសម្រេចចក្ខុវិស័យប្រែក្លាយកម្ពុជាទៅជាប្រទេសមានប្រាក់ចំណូលខ្ពស់នៅឆ្នាំ២០៥០៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជា រៀបចំគោលនយោបាយឧស្សាហកម្ម ២០២៦-២០៣៥ ពង្រឹងភាពប្រកួតប្រជែង និងពិពិធកម្ម appeared first on Millions times.

ភ្នំពេញ៖ ក្រុមហ៊ុន JAPFA Group ដែលជាក្រុមហ៊ុនកសិ-ចំណីអាហារឈានមុខមួយនៅអាស៊ី បានបង្ហាញចំណាប់អារម្មណ៍ស្វែងយល់ពីបរិយាកាសវិនិយោគ និងស្វែងរកឱកាសបណ្តាក់ទុនក្នុងវិស័យកសិកម្ម និងកសិ-ឧស្សាហកម្មនៅកម្ពុជា។

ការបង្ហាញចំណាប់អារម្មណ៍នេះធ្វើឡើងក្នុងជំនួបរវាងឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងគណៈប្រតិភូ JAPFA Group ដឹកនាំដោយលោក Mark Gerald Eman នាយកក្រុមហ៊ុន នៅព្រឹកថ្ងៃទី១៦ ខែកញ្ញា ឆ្នាំ២០២៦។

ក្នុងជំនួបនេះ ឯកឧត្តម ជា វុទ្ធី បានជម្រាបពីច្បាប់ស្តីពីវិនិយោគរបស់កម្ពុជា ជាពិសេសរបបលើកទឹកចិត្ត និងគោលនយោបាយគាំទ្រដែលរាជរដ្ឋាភិបាលបានដាក់ចេញ ដើម្បីលើកកម្ពស់សកម្មភាពធុរកិច្ច និងវិនិយោគ។

ឯកឧត្តម ក៏បានលើកឡើងពី «ក្របខណ្ឌអភិវឌ្ឍន៍សួនកសិ-ឧស្សាហកម្មនៅកម្ពុជា» ដែលត្រូវបានដាក់ចេញកាលពីថ្ងៃទី២៩ ខែឧសភា ឆ្នាំ២០២៦ ដើម្បីទាក់ទាញការវិនិយោគឯកជន ជំរុញការកែច្នៃកសិផល និងបង្កើនតម្លៃបន្ថែមក្នុងវិស័យកសិកម្ម។

JAPFA Group ត្រូវបានបង្កើតឡើងនៅប្រទេសឥណ្ឌូនេស៊ីក្នុងឆ្នាំ១៩៧១ និងមានបទពិសោធន៍ប្រមាណ ៥៥ឆ្នាំក្នុងការផលិត និងផ្គត់ផ្គង់ផលិតផលប្រូតេអ៊ីនសំខាន់ៗ និងអាហារវេចខ្ចប់។ ក្រុមហ៊ុនមានប្រតិបត្តិការនៅឥណ្ឌូនេស៊ី វៀតណាម ឥណ្ឌា មីយ៉ាន់ម៉ា និងបង់ក្លាដែស ដោយប្រើគំរូអាជីវកម្ម «Feed–Farm–Food» គ្របដណ្តប់ចាប់ពីការផលិតចំណីសត្វ កសិដ្ឋានចិញ្ចឹមសត្វ ការកែច្នៃ រហូតដល់ផលិតកម្ម និងការចែកចាយអាហារ។

លោក Mark Gerald Eman បានកត់សម្គាល់ពីការរីកចម្រើនរបស់កម្ពុជា និងបានទទួលស្គាល់ថាច្បាប់វិនិយោគមានភាពបើកចំហ និងតម្លាភាព ខណៈរបបលើកទឹកចិត្តមានភាពប្រកួតប្រជែង និងមានគោលនយោបាយគាំទ្រដោយឡែកសម្រាប់វិស័យកសិ-ឧស្សាហកម្ម។

លោកបានបង្ហាញសុទិដ្ឋិនិយមថា កម្ពុជាអាចជាគោលដៅសម្រាប់ការបណ្តាក់ទុនរបស់ក្រុមហ៊ុន។

ឯកឧត្តម ជា វុទ្ធី បានស្វាគមន៍ និងគាំទ្រគោលបំណងវិនិយោគនេះ ដោយបញ្ជាក់ថា គណៈកម្មាធិការវិនិយោគកម្ពុជាត្រៀមសម្របសម្រួល និងគាំទ្រក្រុមហ៊ុនពេញមួយវដ្តនៃការវិនិយោគនៅកម្ពុជា៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ក្រុមហ៊ុន JAPFA Group សម្លឹងរកឱកាសវិនិយោគក្នុងវិស័យកសិកម្ម និងកសិ-ឧស្សាហកម្មនៅកម្ពុជា appeared first on Millions times.

ការអភិវឌ្ឍឧស្សាហកម្មកម្ពុជា កំពុងឈានចូលដំណាក់កាលថ្មីមួយ ជាមួយនឹងកំណើនគួរឱ្យកត់សម្គាល់ទាំងកំណើនចំនួនរោងចក្រ ទុនវិនិយោគ តម្លៃផលិតកម្ម និងចំនួនការងារ ដែលបង្ហាញពីទំនុកចិត្តរបស់អ្នកវិនិយោគចំពោះស្ថិរភាព សក្ដានុពល និងអនាគតនៃឧស្សាហកម្មកម្ពុជា។ នេះបើយោងតាមការបញ្ជាក់របស់ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ជាក់ស្តែង គិតត្រឹមខែមិថុនា ឆ្នាំ២០២៦ កម្ពុជាមានរោងចក្រធុនធ្ងន់កំពុងដំណើរការចំនួន ៣.៣១៩ ផ្តល់ការងារ ជាង ១,៣ លានកន្លែង និងទាក់ទាញទុនវិនិយោគសរុបប្រមាណ ២៧,៨ ពាន់លានដុល្លារអាមេរិក កើនឡើងជាង ២៥% ធៀបនឹងរយៈពេលដូចគ្នាកាលពីឆ្នាំមុន។

ឯកឧត្តម ហែម វណ្ណឌី បានលើកឡើងដូច្នេះ ក្នុងមហាសន្និបាតអភិវឌ្ឍន៍ឧស្សាហកម្ម និងពិព័រណ៍ឧស្សាហកម្ម ឆ្នាំ២០២៦ កាលពីថ្ងៃ១៧ ខែកក្កដា ឆ្នាំ២០២៦។ កម្មពិធីរយៈពេលពីរថ្ងៃនេះ មានចូលរួមដោយក្រុមហ៊ុនផលិត អ្នកវិនិយោគ ក្រុមហ៊ុនបច្ចេកវិទ្យា និងសមាគមធុរកិច្ច ហើយរំពឹងថានឹងជំរុញភាពជាដៃគូក្នុងវិស័យឧស្សាហកម្ម បង្ហាញបច្ចេកវិទ្យាទំនើបៗ និងគាំទ្រការធ្វើទំនើបកម្មវិស័យឧស្សាហកម្មកម្ពុជា។

ថ្លែងក្នុងពិធីបើក ឯកឧត្តម ហែម វណ្ណឌី បានសង្កត់ធ្ងន់លើការផ្លាស់ប្តូរខឿនឧស្សាហកម្មរបស់កម្ពុជាពីការប្រកួតប្រជែងផ្តោតលើថ្លៃដើមផលិតកម្មទាប ឆ្ពោះទៅការពឹងផ្អែកលើបច្ចេកវិទ្យា នវានុវត្តន៍ ផលិតភាព និងគុណភាព ដើម្បីឱ្យឧស្សាហកម្មកម្ពុជាអាចឈានចូលកាន់តែជ្រៅក្នុងខ្សែច្រវាក់តម្លៃតំបន់ និងសកល។

ឯកឧត្តម ហែម វណ្ណឌី ក៏បានលើកឡើងពីការផ្លាស់ប្តូរយ៉ាងឆាប់រហ័សនៃវិស័យផលិតកម្មសកល ដោយ​សារការរីកចម្រើននៃបញ្ញាសិប្បនិម្មិត (AI) ស្វ័យប្រវត្តិកម្ម បច្ចេកវិទ្យារ៉ូបូត និងបច្ចេកវិទ្យាឌីជីថល ដែលកំពុងក្លាយជាកត្តាកំណត់ភាពប្រកួតប្រជែងនៃឧស្សាហកម្មក្នុងប្រទេសជាច្រើន។

ឯកឧត្តមបានបន្ថែមថា៖​”សម្រាប់ការប្រកួតប្រជែងសកល កម្ពុជាមិនអាចនៅក្រៅសង្វៀនបច្ចេកវិទ្យា បានទេ។ យើងត្រូវចាប់យកបច្ចេកវិទ្យាថ្មីៗ ដើម្បីបង្កើនផលិតភាព កាត់បន្ថយថ្លៃដើម លើកកម្ពស់គុណភាពផលិតផល និងពង្រឹងភាពប្រកួតប្រជែងនៃសហគ្រាសរបស់យើង។”

មហាសន្និបាតអភិវឌ្ឍន៍ឧស្សាហកម្ម និងពិព័រណ៍ឧស្សាហកម្មឆ្នាំ២០២៦នេះ មានការចូលរួមតាំងពិព័រណ៍ពីក្រុមហ៊ុនចំនួន ១៦២ ក្នុងនោះមាន ៣៦ ក្រុមហ៊ុនមកពីប្រទេសចិន និង ១១៨ ក្រុមហ៊ុនដែលកំពុងប្រតិបត្តិការនៅកម្ពុជា ដោយដាក់តាំងបង្ហាញផលិតផល និងបច្ចេកវិទ្យាឧស្សាហកម្មតាមរយៈស្តង់ពិព័រណ៍ចំនួន ១៩៩ ស្តង់។

តំណាងស្ថានទូតចិនប្រចាំកម្ពុជា លោកស្រី Guan Wei បានលើកឡើងថា ព្រឹត្តិការណ៍នេះគឺជាវេទិកាដ៏សំខាន់មួយសម្រាប់ពង្រឹងកិច្ចសហប្រតិបត្តិការឧស្សាហកម្មរវាងប្រទេសទាំងពីរ។

លោកស្រីបានលើកឡើងថា៖ “យើងសង្ឃឹមថា សហគ្រាសនៃប្រទេសទាំងពីរនឹងចាប់យកឱកាសដែលព្រឹត្តិការណ៍នេះផ្តល់ជូន បង្កើតទំនាក់ទំនង ស្វែងរកឱកាសធុរកិច្ចតាមរយៈការផ្លាស់ប្តូរយោបល់ សម្រេចផលប្រយោជន៍រួមតាមរយៈកិច្ចសហប្រតិបត្តិការ និងរួមគ្នាបង្កើតសករាជថ្មីនៃកិច្ចសហប្រតិបត្តិការឧស្សាហកម្មកម្ពុជា-ចិន។”

លោក Lee Allen ប្រធានសមាគមលើកកម្ពស់សេដ្ឋកិច្ចឧស្សាហកម្មកម្ពុជា បានបញ្ជាក់គោលបំណងរបស់សមាគមក្នុងការធ្វើឱ្យព្រឹត្តិការណ៍នេះ ក្លាយជាវេទិកាយូរអង្វែង សម្រាប់កិច្ចសហប្រតិបត្តិការឧស្សាហកម្ម។

លោកបានលើកឡើងថា៖ “ព្រឹត្តិការណ៍នេះមិនមែនគ្រាន់តែជាចំណុចចាប់ផ្តើមប៉ុណ្ណោះទេ ប៉ុន្តែជាការប្តេជ្ញាចិត្តរយៈពេលវែងរបស់យើង។ យើងនឹងបន្តពង្រីកវិសាលភាព ពង្រឹងគុណភាព និងឥទ្ធិពលនៃព្រឹត្តិការណ៍នេះ ដើម្បីឱ្យការរៀបចំព្រឹត្តិការណ៍ក្រោយៗ ក្លាយជាអត្តសញ្ញាណនៃការអភិវឌ្ឍឧស្សាហកម្មកម្ពុជា និងជាកម្លាំងដ៏សំខាន់ក្នុងការជំរុញកិច្ចសហប្រតិបត្តិការក្នុងវិស័យឧស្សាហកម្ម។

ព្រឹត្តិការណ៍រយៈពេល២ថ្ងៃ ពីថ្ងៃ១៧-១៨ ខែកក្កដា មានការតាំងបង្ហាញបច្ចេកវិទ្យាឧស្សាហកម្ម កម្មវិធីផ្គូផ្គងធុរកិច្ច និងការកសាងបណ្តាញទំនាក់ទំនងអាជីវកម្ម សំដៅជំរុញការវិនិយោគ ការផ្ទេរបច្ចេកវិទ្យា និងពង្រឹងកិច្ចសហប្រតិបត្តិការរវាងសហគ្រាសកម្ពុជា និងសហគ្រាសពីបរទេស៕

អត្ថបទ៖ ប៊ី

តាមដានជាមួយយើង៖ Million Times

second...

x

The post វិស័យឧស្សហកម្មកម្ពុជា កំពុងឈានចូលដំណាក់កាលថ្មីមួយ ជាមួយនឹងទំនុកចិត្តពីអ្នកវិនិយោគ appeared first on Millions times.

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងលោកជំទាវ Vivian Loss Sanmartin ឯកអគ្គរដ្ឋ​ទូតប្រេស៊ីលប្រចាំកម្ពុជា បានជួបពិភាក្សា ដើម្បីស្វែងរកកិច្ចសហប្រតិបត្តិការលើការអភិវឌ្ឍឧស្សាហកម្ម កសិឧស្សាហកម្ម នវានុវត្តន៍ និងហេដ្ឋារចនាសម្ព័ន្ធគុណភាពជាតិ។

ជំនួបនេះធ្វើឡើងកាលពីថ្ងៃទី១៦ ខែកក្កដា ឆ្នាំ២០២៦ ស្របពេលដែលកម្ពុជា និងប្រេស៊ីលទើបបើកស្ថានតំណាងប្រចាំប្រទេសរបស់ខ្លួនទៅវិញទៅមក ដែលបង្កើតឱកាសថ្មីសម្រាប់ពង្រឹងកិច្ចសហប្រតិបត្តិការរវាងរដ្ឋាភិបាលនិងរដ្ឋាភិបាល សម្រួលពាណិជ្ជកម្មនិងវិនិយោគ និងពង្រឹងទំនាក់ទំនងប្រជាជននិងប្រជាជន។

ឯកឧត្តម ហែម វណ្ណឌី បានជម្រាបជូនអំពីកិច្ចខិតខំប្រឹងប្រែងរបស់កម្ពុជាក្នុងការជំរុញបរិវត្តកម្មឧស្សាហកម្ម និងភាពចាំបាច់នៃការឈានចូលកាន់តែជ្រៅទៅក្នុងខ្សែច្រវាក់តម្លៃ តាមរយៈការពង្រឹងសមត្ថភាពផលិតក្នុងស្រុក និងការកែច្នៃកសិផល។

ឯកឧត្តមរដ្ឋមន្ត្រីបានលើកឡើងថា៖ “កម្ពុជាកំពុងពន្លឿនឧស្សាហូបនីយកម្ម ខណៈយើងត្រៀមលក្ខណៈចាកចេញពីឋានៈជាប្រទេសដែលមានការអភិវឌ្ឍតិចតួចនៅចុងឆ្នាំ២០២៩។ យើងស្វាគមន៍កិច្ចសហ ការកាន់តែជិតស្និទ្ធជាមួយប្រេស៊ីលលើការកែច្នៃកសិផល គ្រឿងម៉ាស៊ីន ការចាប់យកបច្ចេកវិទ្យា ការស្រាវជ្រាវ និងនវានុវត្តន៍ ដើម្បីពង្រឹងភាពប្រកួតប្រជែងរបស់ឧស្សាហកម្ម និងសហគ្រាសធុនមីក្រូ តូច និងមធ្យមរបស់កម្ពុជា។”

ឯកឧត្តមរដ្ឋមន្ត្រីក៏បានស្នើដល់សមភាគីប្រេស៊ីលឱ្យពង្រឹងកិច្ចសហប្រតិបត្តិការរវាងស្ថាប័ន នៃប្រទេសទាំងពីរ តាមរយៈភាពជាដៃគូជាក់ស្តែង រួមទាំងជាមួយវិទ្យាស្ថានស្រាវជ្រាវ មន្ទីរពិសោធន៍ មជ្ឈមណ្ឌលមាត្រាសាស្ត្រ និងអង្គភាពបច្ចេកទេសពាក់ព័ន្ធ ព្រមទាំងលើកទឹកចិត្តឱ្យធុរកិច្ចប្រេស៊ីលស្វែងរកឱកាសវិនិយោគនៅកម្ពុជា។

លោកជំទាវឯកអគ្គរដ្ឋទូត Vivian Loss Sanmartin បានលើកឡើងថា ប្រេស៊ីលមើលឃើញសក្តានុពលដ៏ធំដែលមិនទាន់ត្រូវបានប្រើប្រាស់ពេញលេញ ក្នុងការពង្រីកកិច្ចសហប្រតិបត្តិការជាមួយកម្ពុជា ជាពិសេសលើការកែច្នៃអាហារ កសិកម្មតំបន់ត្រូពិក រដ្ឋាភិបាលឌីជីថល ថាមពលកកើតឡើងវិញ និងកិច្ចសហការបច្ចេកទេស។

លោកជំទាវ Sanmartin បានលើកឡើងថា៖ “ប្រេស៊ីលមានគ្រឿងបរិក្ខារ ជំនាញ និងបច្ចេកវិទ្យាសមស្រប ដើម្បីគាំទ្រកិច្ចខិតខំប្រឹងប្រែង ក្នុងការបន្ថែមតម្លៃដល់កសិផលរបស់កម្ពុជា។ យើងចង់អភិវឌ្ឍកិច្ចសហប្រតិបត្តិការជាក់ស្តែង មិនមែនត្រឹមតែការពិភាក្សាទេ ដើម្បីបង្កើតលទ្ធផលពិតប្រាកដសម្រាប់ប្រទេសទាំងពីរ។”

លោកជំទាវក៏បានបង្ហាញពីការត្រៀមលក្ខណៈរបស់ប្រេស៊ីលក្នុងការសម្របសម្រួលការតភ្ជាប់រវាងស្ថាប័នរបស់កម្ពុជា ជាមួយនឹងទីភ្នាក់ងាររដ្ឋាភិបាល វិទ្យាស្ថានស្រាវជ្រាវ សាកលវិទ្យាល័យ និងសមាគមឧស្សាហកម្មរបស់ប្រេស៊ីល រួមទាំងសមាគមអ្នកផលិតគ្រឿងម៉ាស៊ីនប្រេស៊ីល (ABIMAQ) គាំទ្របេសកកម្មធុរកិច្ច និងការផ្លាស់ប្តូរបច្ចេកទេសនាពេលអនាគត។

ភាគីទាំងពីរបានឯកភាពបន្តធ្វើការជិតស្និទ្ធ ដើម្បីកំណត់វិស័យអាទិភាពសម្រាប់កិច្ចសហប្រតិបត្តិការ និងតាមដានគំនិតផ្តួចផ្តើមជាក់ស្តែង ដែលអាចពង្រឹងពាណិជ្ជកម្ម វិនិយោគ និងកិច្ចសហការផ្នែកឧស្សាហកម្មរវាងប្រទេសទាំងពីរ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ប្រេស៊ីល-កម្ពុជា ស្វែងរកកិច្ចសហប្រតិបត្តិការក្នុងវិស័យកសិឧស្សាហកម្ម នវានុវត្តន៍ និងការអភិវឌ្ឍឧស្សាហកម្ម appeared first on Millions times.

ក្រុមប្រឹក្សាស្តង់ដារជាតិ បានសម្រេចអនុម័តស្តង់ដារកម្ពុជាចំនួន ៤៥ ដើម្បីពង្រឹងហេដ្ឋារចនាសម្ព័ន្ធគុណភាពជាតិ (NQI) គាំទ្រការអភិវឌ្ឍឧស្សាហកម្ម សម្រួលពាណិជ្ជកម្មអន្តរជាតិ និងលើកកម្ពស់គុណភាព សុវត្ថិភាពផលិតផល និងការការពារអ្នកប្រើប្រាស់។

កិច្ចប្រជុំលើកទី៣៣ របស់ក្រុមប្រឹក្សាស្តង់ដារជាតិ បានអនុម័តស្តង់ដារអន្តរជាតិ និងស្តង់ដារតំបន់ថ្មីចំនួន ៤៣ស្តង់ដារ និងវិសោធនកម្មចំនួន ២ស្តង់ដារ ជាស្តង់ដារកម្ពុជា។ ស្តង់ដារទាំងនេះរួមមាន ស្តង់ដារសហភាពអឺរ៉ុប (Eurocode) ចំនួន ១៣, ស្តង់ដារ ISO ចំនួន ២៦, ស្តង់ដារ IEC ចំនួន ៤, និងវិសោធនកម្មស្តង់ដារចំនួន ២ ។

ស្តង់ដារដែលបានអនុម័តគ្របដណ្តប់លើវិស័យចម្រុះ រួមមានវិស័យសំណង់និងវិស្វកម្ម សារធាតុនិងផលិតផលគីមី ប្រព័ន្ធគ្រប់គ្រង ផលិតផលអគ្គិសនីនិងអេឡិចត្រូនិក ផលិតផលកៅស៊ូ យានយន្ត គ្រឿងសម្អាង និងផលិតផលឈើ។ ស្តង់ដារទាំងអស់ត្រូវបានពិនិត្យ និងឯកភាពដោយគណៈកម្មការបច្ចេក​ទេស​ចំនួន ៨ មុននឹងដាក់ជូនក្រុមប្រឹក្សាស្តង់ដារជាតិអនុម័ត។

ថ្លែងក្នុងកិច្ចប្រជុំលើកទី៣៣ កាលពីថ្ងៃទី១៣ ខែកក្កដា ឆ្នាំ២០២៦ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាស្តង់ដារជាតិ បានបញ្ជាក់ថា ស្តង់ដារបានក្លាយជាឧបករណ៍គន្លឹះក្នុងការការពារផលប្រយោជន៍សេដ្ឋកិច្ចជាតិ ក្នុងបរិបទដែលពាណិជ្ជកម្មពិភពលោកកាន់តែមានភាពប្រទាក់ក្រឡាគ្នាយ៉ាងជិតស្និទ្ធ។

ឯកឧត្តមបានលើកឡើងថា៖ “គោលបំណងរបស់យើង គឺការពារផលប្រយោជន៍សេដ្ឋកិច្ចជាតិរបស់កម្ពុជា។ ពាណិជ្ជកម្មអន្តរជាតិកាន់តែពឹងផ្អែកលើស្តង់ដារ។ ប្រសិនបើយើងមិនចូលរួមក្នុងការរៀបចំស្តង់ដារទាំងនោះទេ យើងមិនអាចការពារផលប្រយោជន៍របស់ធុរកិច្ច និងអ្នកនាំចេញរបស់យើងប្រកប​ដោយប្រសិទ្ធភាពបានទេ។”

ឯកឧត្តមក៏បានលើកឡើងអំពីវឌ្ឍនភាពនៃការចូលរួមរបស់កម្ពុជា ក្នុងអង្គការស្តង់ដារអន្តរជាតិ ដូចជាអង្គការ ISO អង្គការ IEC និង អង្គការ Codex Alimentarius ដែលនឹងអនុញ្ញាតឱ្យកម្ពុជារួមចំណែកកាន់តែសកម្មក្នុងការអភិវឌ្ឍស្តង់ដារអន្តរជាតិ ដើម្បីធានាឧត្តមប្រយោជន៍របស់កម្ពុជាក្នុងដំណើរការរៀបចំស្តង់ដារទាំងនោះ។

ឯកឧត្តមបានបន្ថែមថា៖ “តាមរយៈការចូលជាសមាជិកពេញសិទ្ធិរបស់អង្គការ ISO កម្ពុជាមិនមែនត្រឹមតែជាអ្នកសង្កេតការណ៍នៅក្នុងដំណើរការរៀបចំស្តង់ដារអន្តរជាតិទៀតទេ។ យើងមានសិទ្ធិបោះឆ្នោត និង​មានសំឡេង ក្នុងការការពារផលប្រយោជន៍របស់កម្ពុជា និងចូលរួមកំណត់ស្តង់ដារដែលមានឥទ្ធិពលដល់សេដ្ឋកិច្ចរបស់យើង។”

ក្រៅពីអនុម័តស្តង់ដារទាំង ៤៥ ក្រុមប្រឹក្សាស្តង់ដារជាតិ ក៏បានស្នើឱ្យក្រសួង និងស្ថាប័នពាក់ព័ន្ធ ធ្វើជាតំណាងកម្ពុជានៅក្នុងគណៈកម្មាធិការបច្ចេកទេសរបស់អង្គការ ISO, IEC និង Codex ដែលជាយន្តការសំខាន់ចំពោះផលប្រយោជន៍យុទ្ធសាស្ត្រ និងសេដ្ឋកិច្ចរបស់កម្ពុជា។

ស្តង់ដារទាំងនេះនឹងបម្រើជាមូលដ្ឋានសម្រាប់ការរៀបចំបទប្បញ្ញត្តិបច្ចេកទេសក្នុងវិស័យពាក់ព័ន្ធ លើកកម្ពស់គុណភាព សុវត្ថិភាព និងភាពប្រកួតប្រជែងនៃផលិតផល និងសេវាកម្ម ពង្រឹងការការពារសុខភាព និងសុវត្ថិភាពអ្នកប្រើប្រាស់ សម្រួលពាណិជ្ជកម្ម និងរួមចំណែកដល់ការអភិវឌ្ឍសេដ្ឋកិច្ចប្រកបដោយចីរភាព ស្របតាមស្តង់ដារអន្តរជាតិ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជាអនុម័តស្តង់ដារចំនួន ៤៥ ដើម្បីជំរុញប្រកួតប្រជែងនៃឧស្សាហកម្ម និងការធ្វើពាណិជ្ជកម្មអន្តរជាតិ appeared first on Millions times.

មូលនិធិអភិវឌ្ឍន៍ជំនាញ (SDF) បានឈានដល់ការចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រជាមួយសមាគមធុរកិច្ចធំៗចំនួនបួន និងសហព័ន្ធឧស្សាហកម្មមួយ រួមទាំងសមាគមស្វាយចន្ទីកម្ពុជា (សសក) ផងដែរ ដើម្បីពង្រឹងកិច្ចសហប្រតិបត្តិការរវាងរដ្ឋនិងឯកជន ក្នុងការអភិវឌ្ឍកម្លាំងពលកម្មជំនាញឱ្យឆ្លើយតបទៅនឹងតម្រូវការដែលកំពុងវិវត្តនៃឧស្សាហកម្មនានានៅកម្ពុជា។

កិច្ចព្រមព្រៀងទាំងនេះត្រូវបានចុះហត្ថលេខាជាមួយ សមាគមភស្តុភារកម្មកម្ពុជា (CLA) សហព័ន្ធឧស្សាហកម្មយានយន្តកម្ពុជា (CAIF) សមាគមស្វាយចន្ទីកម្ពុជា (សសក) និងសមាគមអេឡិចត្រូនិក និងបច្ចេកវិទ្យាកម្ពុជា (CETA) កាលពីថ្ងៃទី០៩ ខែកក្កដា​ ឆ្នាំ ២០២៦។

ពិធីដ៏មានសារៈសំខាន់នេះ ត្រូវបានរៀបចំឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាល SDF, និង ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងជាអនុប្រធានក្រុមប្រឹក្សាបរធនបាល SDF, ព្រមទាំងមានការចូលរួមពីតំណាងធនាគារអភិវឌ្ឍន៍អាស៊ី (ADB) , និងទីភ្នាក់ងារបារាំងសម្រាប់ការអភិវឌ្ឍ (AFD) និងភ្ញៀវកិត្តិយសសរុបប្រមាណ ១២០ នាក់។

ឯកឧត្តម គី សុខគីម នាយកប្រតិបត្តិ SDF បានគូសបញ្ជាក់ថា ភាពជាដៃគូនេះនឹងផ្ដោតលើកិច្ចការគន្លឹះចំនួនបី៖ ការកំណត់អត្តសញ្ញាណតម្រូវការជំនាញជាក់លាក់តាមវិស័យនីមួយៗដើម្បីលើកកម្ពស់ផលិតភាព, ការអនុវត្តគំរូនៃការបណ្តុះបណ្តាលបែប «រួមគ្នារៀបចំទម្រង់ រួមគ្នាវិនិយោគ និងរួមគ្នាជាម្ចាស់» របស់ SDF, និងការពង្រឹងភាពជាដៃគូរវាងរដ្ឋនិងឯកជន ដើម្បីជំរុញការវិនិយោគ ការផ្ទេរបច្ចេកវិទ្យា និងឱកាសការងារដែលមានជំនាញ។

ឯកឧត្តមបានបន្ថែមថា SDF នឹងធ្វើការយ៉ាងជិតស្និទ្ធជាមួយសមាគមឧស្សាហកម្មនានា ដើម្បីរៀបចំក្របខ័ណ្ឌជំនាញជាក់លាក់តាមវិស័យ និងកម្មវិធីបណ្តុះបណ្តាលនានា ដែលឆ្លើយតបដោយផ្ទាល់ទៅនឹងតម្រូវការទីផ្សារការងារ។

នៅក្នុងប្រសាសន៍ថ្លែងក្នុងពិធីនោះដែរ ឯកឧត្តមបណ្ឌិតសភាចារ្យ ផាន់ ផល្លា បានសម្តែងនូវជំនឿចិត្តយ៉ាងមុតមាំថា ភាពជាដៃគូទាំងនេះនឹងផ្តល់នូវគ្រឹះដ៏រឹងមាំសម្រាប់អភិវឌ្ឍកម្លាំងពលកម្មដែលមានជំនាញខ្ពស់ លើកកម្ពស់សមត្ថភាពប្រកួតប្រជែងនៃវិស័យឯកជនរបស់កម្ពុជា ព្រមទាំងគាំទ្រដល់យុទ្ធសាស្ត្របញ្ចកោណរបស់រាជរដ្ឋាភិបាលផងដែរ។

ចាប់តាំងពីការបង្កើតឡើងមក មូលនិធិ SDF បានគាំទ្រដល់ការបណ្តុះបណ្តាលជំនាញដល់សិក្ខាកាមប្រមាណ ៩៣,០០០ នាក់ ដោយសម្រេចបានអត្រាបញ្ចប់ការសិក្សារហូតដល់ ៩៦ ភាគរយ, អត្រាទទួលបានការងារធ្វើ ៨៨ ភាគរយ, អត្រាការពេញចិត្តរបស់និយោជក ៨៥ ភាគរយ និងការកើនឡើងនូវផលិតភាពពលកម្ម ៨៩ ភាគរយ ក្នុងចំណោមសហគ្រាសដែលបានចូលរួម។

នៅកិច្ចប្រជុំដាច់ដោយឡែកនៃព្រឹត្តិការណ៍នេះ លោក អួន ស៊ីឡុត ប្រធានសមាគមស្វាយចន្ទីកម្ពុជា (សសក) បានជួបប្រជុំដាច់ដោយឡែកជាមួយតំណាងក្រុមហ៊ុនអន្តរជាតិចំនួនពីរ ដែលមានប្រតិបត្តិការផលិតកម្មនៅប្រទេសវៀតណាម ដើម្បីស្វែងរកឱកាសធុរកិច្ចថ្មីៗនៅក្នុងវិស័យស្វាយចន្ទីរបស់កម្ពុជា។

ក្រុមហ៊ុនកូរ៉េខាងត្បូងមួយបានសម្តែងការចាប់អារម្មណ៍ក្នុងការទិញសំបកគ្រាប់ស្វាយចន្ទីក្នុងបរិមាណដ៏ច្រើន និងមានបំណងវិនិយោគលើរោងចក្រកែច្នៃប្រេងសំបកចន្ទី (CNSL) នៅក្នុងតំបន់ឧស្សាហកម្មស្វាយចន្ទី (Cashew Industrial Park)។ ទោះជាយ៉ាងណាក៏ដោយ លោក អួន ស៊ីឡុត បានពន្យល់ថា បច្ចុប្បន្នកម្ពុជានៅមានការផ្គត់ផ្គង់សំបកចន្ទីមានកម្រិតនៅឡើយ ដោយសារសមត្ថភាពកែច្នៃក្នុងស្រុក យើងនៅមានកម្រិតទាប៕

អត្ថបទ៖ ប៊ី

តាមដានជាមួយយើង៖ Million Times

second...

x

The post មូលនិធិ SDF សហការជាមួយ សសក និងសមាគមឧស្សាហកម្មនានា ដើម្បីពង្រឹងកម្លាំងពលកម្មជំនាញរបស់កម្ពុជា appeared first on Millions times.

ឯកឧត្តម ហែម វណ្ណឌី រដ្ឋមន្ត្រីក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីម្សិលមិញ បានទទួលជួបឯកឧត្តម Steven Pang Chee Wee ឯកអគ្គរដ្ឋ​ទូត​សិង្ហបុរី ប្រចាំកម្ពុជា ដើម្បីពិភាក្សាការពង្រឹងកិច្ចសហប្រតិបត្តិការផ្នែកសុវត្ថិភាពអាហារ វិទ្យាសាស្ត្រ បច្ចេកវិទ្យា និងនវានុវត្តន៍ ដោយផ្តោតលើអត្ថប្រយោជន៍ជាក់ស្តែង និងការផ្សារភ្ជាប់ជាមួយវិស័យឯកជន។

ក្នុងជំនួបនេះ ឯកឧត្តមរដ្ឋមន្ត្រីបានលើកឡើងពីកំណើនសមត្ថភាពរបស់កម្ពុជា ក្នុងការបំពេញតាមស្តង់ដាអន្តរជាតិ ដោយរំលេចកំណើននៃផលិតផលអាហារកម្ពុជាដែលបាននិងកំពុងនាំចេញទៅទីផ្សារនៃប្រទេសអភិវឌ្ឍន៍។ ឯកឧត្តមបានលើកឡើងថា៖ “ផលិតផលអាហារកម្ពុជាកាន់តែច្រើនត្រូវបាននាំចេញទៅទីផ្សារសហភាពអឺរ៉ុប សហរដ្ឋអាមេរិក និងទីផ្សារប្រទេសធំៗផ្សេងទៀត ដែលក៏អាចជាគោលដៅសម្រាប់ទីផ្សារសិង្ហបុរីផងដែរ បន្ថែមលើកសិផលស្រស់។”

ឯកឧត្តមបានបន្ថែមថា ការពង្រឹងប្រព័ន្ធសុវត្ថិភាពអាហារ នឹងជួយពង្រីកសក្តានុពលពាណិជ្ជកម្មបន្ថែមទៀតរវាងប្រទេសទាំងពីរ។

តាមដានជាមួយយើង៖ Million Times

ឯកអគ្គរដ្ឋទូតសិង្ហបុរីបានស្វាគមន៍ចំពោះការផ្តួចផ្តើមនេះ និងបានបញ្ជាក់ពីផែនការសម្របសម្រួលកិច្ចសហការជាមួយអាជ្ញាធរសុវត្ថិភាពអាហារសិង្ហបុរី រួមទាំងការរៀបចំដំណើរទស្សនកិច្ច និងសិក្ខាសាលាសា សម្រាប់អ្នកនាំចេញផលិតផលអាហារកម្ពុជា។

ឯកឧត្តមបានលើកឡើងពីសារសំខាន់នៃការធ្វើពិពិធកម្ម ក្នុងបរិបទពិភពលោកបច្ចុប្បន្ន ដោយមានបញ្ជាក់​ថា៖ “សព្វថ្ងៃ យើងផ្តោតមិនត្រឹមតែលើបញ្ហាសន្តិសុខបែបប្រពៃណីប៉ុណ្ណោះទេ។ អ្វីៗអាចត្រូវបានប្រើជាអាវុធ រួមទាំងពាណិជ្ជកម្ម ខ្សែច្រវាក់ផ្គត់ផ្គង់ និងថាមពល។ សម្រាប់ប្រទេសតូច ពិពិធកម្មគឺពិតជាមានសារសំខាន់ណាស់ រួមទាំងក្នុងវិស័យអាហារផងដែរ។”

ក្រៅពីសុវត្ថិភាពអាហារ ភាគីទាំងពីរបានពិភាក្សាលទ្ធភាពពង្រីកកិច្ចសហការលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ពិសេសបច្ចេកវិទ្យាបញ្ញាសិប្បនិម្មិត ប្រព័ន្ធអេកូឡូស៊ីនវានុវត្តន៍ និងការអភិវឌ្ឍជំនាញឌីជីថលសម្រាប់យុវជន។ ឯកឧត្តមឯកអគ្គរដ្ឋទូតបានលើកឡើងពីកិច្ចខិតខំរបស់សិង្ហបុរី ក្នុងការអភិវឌ្ឍម៉ូដែលបច្ចេកវិទ្យា AI សម្រាប់តំបន់អាស៊ីអាគ្នេយ៍ និងបានបង្ហាញចំណាប់អារម្មណ៍សហការបង្កើតនវានុវត្តន៍រួមជាមួយកម្ពុជា។

ឯកឧត្តម ហែម វណ្ណឌី បានលើកឡើងពីសារសំខាន់នៃការប្រែក្លាយកិច្ចសហប្រតិបត្តិការ ពីគោលនយោបាយទៅជាអត្ថប្រយោជន៍ជាក់ស្តែង ជាពិសេសតាមរយៈកិច្ចសហការរវាងអ្នកស្រាវជ្រាវនិងអ្នកស្រាវជ្រាវ និងរវាងយុវជននិងយុវជន។

ឯកឧត្តមបានបន្ថែមថា៖ “នៅពេលយើងនិយាយអំពីវិទ្យាសាស្ត្រ និងបច្ចេកវិទ្យា យើងនិយាយភាសាតែមួយ ហើយកម្ពុជាអំពាវនាវឱ្យមានការពង្រឹងកិច្ចសហប្រតិបត្តិការបន្ថែមទៀតនៅកម្រិតស្ថាប័ន និងផ្តោតលើលទ្ធផលជាក់ស្តែង។”

ភាគីទាំងពីរក៏បានពិភាក្សាកិច្ចសហការក្នុងវិស័យថ្មីៗ ដូចជាកំណើនបៃតង និងការគាំទ្រយន្តការឥណទានកាបូន៕

អត្ថបទ៖ ប៊ី

second...

x

The post កម្ពុជា-សិង្ហបុរី ជំរុញកិច្ចសហប្រតិបត្តិការក្នុងឧស្សាហកម្មអាហារ និងនវានុវត្តន៍ appeared first on Millions times.

សមាគមឧស្សាហកម្មជ្រលក់ពណ៌ និងបោះពុម្ពរបស់ចិន បានសម្លឹងឃើញកម្ពុជាជាគោលដៅវិនិយោគមួយអំណោយផលបំផុត ហើយសន្យាជំរុញក្រុមហ៊ុនក្នុងឧស្សាហកម្មនេះ មកបណ្តាក់ទុននៅកម្ពុជា។

តាមដានជាមួយយើង៖ Million Times

ការលើកឡើងនេះ បានធ្វើឡើងក្នុងជំនួបពិភាក្សារវាងឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ជាមួយគណៈប្រតិភូឧស្សាហកម្មជ្រលក់ពណ៌ និងបោះពុម្ពរបស់ចិន ដឹកនាំដោយលោក លី លីងសិន នៅថ្ងៃទី២២ ខែមេសានេះ។

ក្នុងជំនួបនេះ លោក លី លីងសិន បានឱ្យដឹងថា ឧស្សាហកម្មបោះពុម្ព ជ្រលក់ពណ៌ និងវាយនភណ្ឌ នៅប្រទេសចិន បាននិងកំពុងស្វែងរកកាលានុវត្តភាពវិនិយោគនៅក្រៅប្រទេស ហើយបានសម្លឹងឃើញ កម្ពុជាជាគោលដៅមួយដែលមានភាពអំណោយផលបំផុត ព្រោះកម្ពុជារក្សាបាននូវសុខសន្តិភាព ស្ថិរភាពនយោបាយ និងរបបលើកទឹកចិត្តវិនិយោគមានភាពប្រកួតប្រជែងខ្ពស់។

លោកបានទទួលស្គាល់ពីការហានិភ័យ នៃការបំពុលបរិស្ថានដែលបណ្តាលមកពីផលិតកម្ម នៃឧស្សាហកម្មជ្រលក់ពណ៌ និងបោះពុម្ពនេះ។ ប៉ុន្តែឆ្លងកាត់បទពិសោធន៍ជាច្រើនឆ្នាំនៅប្រទេសចិន ក្រុមហ៊ុនសមាជិកសមាគមមានការយកចិត្តទុកដាក់ខ្ពស់ និងមានបច្ចេកវិទ្យាទំនើបដើម្បីដោះស្រាយបញ្ហានេះ។

ជាមួយគ្នានេះ លោក លី លីងសិន ក៏បានសន្យាថា នឹងខិតខំជំរុញឧស្សាហកម្មខ្សែទឹកខាងលើ ពិសេស ឧស្សាហកម្មបោះពុម្ព ជ្រលក់ពណ៌ និងវាយនភណ្ឌ ឱ្យមកបណ្តាក់ទុនវិនិយោគនៅកម្ពុជា។

ឯកឧត្តម ជា វុទ្ធី បានលើកទ្បើងពីការគិតគូររបស់រាជរដ្ឋាភិបាល ក្នុងការលើកកម្ពស់បរិស្ថានវិនិយោគដើម្បីទាក់ទាញឧស្សាហកម្មខ្សែទឹកខាងលើ (upstream industry) ដែលបម្រើដល់ខ្សែច្រវាក់ផ្គត់ផ្គង់ដល់ឧស្សាហកម្មកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ (GFT) ដើម្បីធានាដល់ខ្សែច្រវាក់ផ្គត់ផ្គង់ក្នុងស្រុក។

យ៉ាងណាក៏ដោយ ឯកឧត្តម ក៏បានបង្ហាញពីក្តីកង្វល់ពីហានិយភ័យនៃការបំពុលបរិស្ថាន ត្បិតផលិតកម្មនៃវិស័យនេះ មានវេទយិតភាពខ្ពស់ដល់ការបំពុលបរិស្ថាន។ បន្ថែមលើនេះ ឯកឧត្តមក៏បានចែករំលែកពីគំនិតផ្តួចផ្តើ មក្នុងការសិក្សាកំណត់ទីតាំង (zoning) សម្រាប់គម្រោងវិនិយោគបោកគក់ ជ្រលក់ពណ៌ ដែលនឹងអាចគ្រប់គ្រងបញ្ហាបំពុលបរិស្ថាន ឱ្យបានជាអតិបរមា៕

អត្ថបទ៖ វីរៈ រូបភាព៖ គណៈកម្មាធិការវិនិយោគ

second...

x

The post សមាគមឧស្សាហកម្មជ្រលក់ពណ៌ចិន សម្លឹងឃើញកម្ពុជាជាគោលដៅវិនិយោគមួយអំណោយផល appeared first on Millions times.

រាជរដ្ឋាភិបាល ដាក់ទិសដៅក្នុងការអភិវឌ្ឍ និងប្រែក្លាយខេត្តស្វាយរៀង និងបណ្តាខេត្តទិសខាងកើត ឱ្យក្លាយជាតំបន់ឧស្សាហកម្ម និង កសិ-ឧស្សាហកម្ម ប្រកបដោយសក្កានុពលខ្ពស់ ក្នុងរយៈពេល ២០ ឆ្នាំខាងមុខ។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងក្នុងពិធី សម្ពោធដាក់ឱ្យដំណើរការជាផ្លូវការរោងចក្រប្រព្រឹត្តកម្មទឹកស្អាតអណ្តូងតាសី ក្រុងស្វាយរៀង និង ពិធី បើកការដ្ឋានសាងសង់គម្រោងពង្រីកហេដ្ឋារចនាសម្ព័ន្ធទឹកស្អាតបន្ថែម សម្រាប់ខេត្តចំនួន ៥ នាព្រឹក ថ្ងៃព្រហស្បតិ៍ ទី២៦ ខែមីនា ឆ្នាំ២០២៦ ថា កម្ពុជា និងជប៉ុន បានបន្តចូលរួមអភិវឌ្ឍ ហេដ្ឋារចនា សម្ព័ន្ធ និងសមិទ្ធផលជា ច្រើនជាបន្តបន្ទាប់ដែលត្រូវបានសម្ពោធដាក់ឱ្យដំណើរការ ហើយជាក់ស្តែង ថ្ងៃនេះក៏បានរួមគ្នា សម្ពោធបើកដំណើរការជាផ្លូវការនៃវិស័យទឹកស្អាតសម្រាប់ប្រជាជន ខេត្ត ស្វាយ រៀង។

សម្តេចបានបន្តថា ខេត្តស្វាយរៀង គឺជាខេត្តប្រកបដោយសក្កានុពលសេដ្ឋកិច្ចដ៏ធំ បូក បន្ថែមលើវិស័យកសិកម្ម ដែលការណ៍នេះ រាជរដ្ឋាភិបាលបានជំរុញឱ្យមានការវិនិយោគលើវិស័យកសិ- ឧស្សាហកម្ម និងឧស្សាហកម្ម ដើម្បីនឹងក្លាយជាតំបន់សម្រាប់ការវិនិយោគលើរោងចក្រ សហគ្រាស។

តាមដានជាមួយយើង៖ Million Times

សម្តេចធិបតីនាយករដ្ឋមន្ត្រី បានគូសបញ្ជាក់បន្ថែមថា រាជរដ្ឋាភិបាលកម្ពុជា បានកំពុងរៀបចំ កម្ពុជា ឱ្យក្លាយជាប្រទេសអភិវឌ្ឍ ដោយឈរលើសមត្ថភាពរបស់ប្រជាជនខ្មែរ ពិសេសយុវជន ដែល មាន ចំណេះ និងជំនាញលើគ្រប់វិស័យ ដូចជា កសិ-ឧស្សាហកម្ម, ឧស្សាហកម្ម, កម្មន្ដសាល និង កសិកម្ម ជាដើម។

សម្តេចបានបន្ថែម ឈរលើការប្តេជ្ញាចិត្តនេះ, កម្ពុជា បាននិងកំពុងអនុវត្តយុទ្ធនាការយ៉ាងសកម្មក្នុងការ បោស សម្អាតភាពអសកម្ម និងសកម្មភាពនៃការឆបោកតាមប្រព័ន្ធបច្ចេកវិទ្យា ដើម្បីធានាឱ្យបាននូវសន្តិសុខ និង សណ្តាប់ធ្នាប់សង្គម ព្រមជាមួយនឹងការបង្កលក្ខណៈអំណោយផល និង កាន់តែល្អប្រសើរ សម្រាប់វិនិយោគិន។

សម្តេចធិបតីនាយករដ្ឋមន្ត្រី ក៏មានប្រសាសន៍បន្ថែមថា រោងចក្រប្រព្រឹត្តកម្មទឹកស្អាតអណ្តូងតាសី ក្រុងស្វាយរៀង នឹងផ្តល់អត្ថប្រយោជន៍ជាច្រើនដល់សហគមន៍ ខាងផ្នែកសុខភាពសាធារណៈ និង បរិស្ថាន, តាមរយៈការកាត់បន្ថយហានិភ័យនៃការឆ្លងមេរោគ និង ការការពារបរិស្ថាន, សំដៅចូលរួមលើកកម្ពស់សុខភាព និង សុខុមាលភាព របស់ប្រជាពលរដ្ឋ ជាពិសេស អ្នករស់នៅក្នុងខេត្តស្វាយរៀង។ ជាមួយគ្នានេះ, គម្រោងពង្រីកហេដ្ឋារចនាសម្ព័ន្ធទឹកស្អាតបន្ថែមសម្រាប់ខេត្តចំនួន៥ ៖ ស្វាយរៀង, កំពង់ធំ, មណ្ឌលគិរី, ពោធិ៍សាត់ និង កំពត នឹងចូលរួមជំរុញការអភិវឌ្ឍវិស័យទឹកស្អាត ក៏ដូចជា ពង្រឹងមូលដ្ឋានគ្រឹះសម្រាប់ការអភិវឌ្ឍប្រទេសជាតិ, ការលើកកម្ពស់សុខុមាលភាពសាធារណៈ, ការអភិវឌ្ឍសេដ្ឋកិច្ចមូលដ្ឋាន, និង ការបំពេញតម្រូវការជាសារវន្ដនៃការអភិវឌ្ឍវិស័យឧស្សាកម្ម និង សិប្បកម្ម នៅកម្ពុជា។

ជាទីបញ្ចប់, សម្តេចធិបតីនាយករដ្ឋមន្ត្រី បានគូសបញ្ជាក់បន្ថែមថា រាជរដ្ឋាភិបាលមានយុទ្ធសាស្រ្តច្បាស់លាស់សម្រាប់អភិវឌ្ឍសង្គម-សេដ្ឋកិច្ចជាតិ ដោយផ្តោតលើ ការលើកកម្ពស់សេដ្ឋកិច្ចបៃតង, ការពង្រឹងអភិបាលកិច្ចបរិស្ថាន និង ការវិនិយោគលើហេដ្ឋារចនាសម្ព័ន្ធដែលអាចឆ្លើយតបទៅនឹងសេចក្តីត្រូវការ, ទាំងពេលបច្ចុប្បន្ន និង អនាគត, ក្នុងនោះ រាជរដ្ឋាភិបាលនឹងបន្តវិនិយោគលើហេដ្ឋារចនាសម្ព័ន្ធគន្លឹះ រួមទាំង ការផ្គត់ផ្គង់ទឹកស្អាត, អនាម័យ, និង ប្រព័ន្ធគ្រប់គ្រងសំណល់ នៅទូទាំងប្រទេសកម្ពុជា, ស្របតាមទិសស្លោក «ទីណាមានទឹកស្អាត, ទីនោះនឹងមានការផ្លាស់ប្តូរជាសេដ្ឋកិច្ច», ព្រមទាំង បន្តលើកកម្ពស់ អភិបាលកិច្ច, ការថែទាំ និង ការប្រើប្រាស់ក្នុងវិស័យទឹកស្អាត៕

អត្ថបទ៖ ប៊ី

second...

x

The post រាជរដ្ឋាភិបាល ដាក់ទិសដៅអភិវឌ្ឍ និងប្រែក្លាយខេត្តស្វាយរៀង ឱ្យក្លាយជាតំបន់ឧស្សាហកម្ម appeared first on Millions times.

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី២៧ ខែកុម្ភៈ ឆ្នាំ២០២៦ បានទទួលជួបលោក Hamasaka Takashi ប្រធានការិយាល័យ ជំរុញការគ្រប់គ្រងបរិស្ថាននៃក្រសួងសេដ្ឋកិច្ច ពាណិជ្ជកម្ម និងឧស្សាហកម្ម ជប៉ុន (METI) ដើម្បីពិភាក្សា វឌ្ឍន​ភាពនៃកិច្ចសហប្រតិបត្តិការលើការគ្រប់គ្រងការបំពុល។

លោក Hamasaka Takashi បានកោតសរសើរចំពោះវឌ្ឍនភាពនៃកិច្ចសហប្រតិបត្តិការបច្ចេកទេស និង កម្មវិធីផ្លាស់ប្តូរពង្រឹងសមត្ថភាពមន្រ្តីនាពេលថ្មីៗនេះ ដែលរួមមានទាំងការបញ្ជូនមន្ត្រីកម្ពុជា​ទៅទទួលការបណ្តុះបណ្តាល​​នៅ​ប្រទេសជប៉ុនផងដែរ។

តាមដានជាមួយយើង៖ Million Times

លោក Hamasaka Takashi បានលើកឡើងថា៖ «ប្រព័ន្ធគ្រប់គ្រងការបំពុលមានសារសំខាន់ណាស់ សម្រាប់គ្រប់គ្រង​ការបំពុល​ រួមទាំងការបំពុលទឹក ហើយគួរត្រូវបានអនុវត្តឱ្យបានទូលំទូលាយនៅ​ក្នុង​គ្រប់វិស័យ»។

លោកបានបន្ថែមថា ប្រកាសដែលក្រសួងឧស្សាហកម្មដាក់ឱ្យអនុវត្តកាលពីខែមករា គឺជា​សមិទ្ធ​ផល​ជាក់​​ស្តែង​នៃកិច្ចសហប្រតិបត្តិការនេះ ហើយលោកបានបញ្ជាក់ការប្តេជ្ញាចិត្តរបស់ជប៉ុន ក្នុងការបន្ត​ផ្តល់​ការ​គាំទ្រដល់កម្ពុជា។

ឯកឧត្តម ហែម វណ្ណឌី បានថ្លែងអំណរគុណដល់ភាគីជប៉ុន ដែលបន្តគាំទ្រ​ផ្នែកបច្ចេកទេសដល់កម្ពុជា និងសង្កត់ធ្ងន់ថា ប្រកាស​ស្តីពីការគ្រប់គ្រងការបំពុល និងប្រកាសស្តីពីគោលការណ៍ណែនាំប្លង់រោង​ចក្រត្រូវបានដាក់ឱ្យអនុវត្តរួចហើយ ហើយការងារបន្ទាប់គឺត្រូវអនុវត្តប្រកាសទាំងនេះឱ្យមានប្រសិទ្ធភាព។

ឯកឧត្តមបានលើកឡើងថា៖ «ការកសាងសមត្ថភាព និងការងារអនុវត្តច្បាប់ និងបទប្បញ្ញត្តិ គឺជាកិច្ចខិត​ខំ​​ប្រឹង​ប្រែងរយៈពេលវែង ហើយការប្តេជ្ញាបន្តគាំទ្ររបស់ភាគីជប៉ុន ពិតជាសំខាន់ណាស់ ដើម្បីធានា​ថា​បទប្បញ្ញត្តិទាំងនេះ អាចសម្រេចជាផលប្រយោជន៍ជាក់ស្តែងនៅនឹងមូលដ្ឋាន»។

ឯកឧត្តមរដ្ឋមន្ត្រីក៏បានស្នើភាគីជប៉ុនឱ្យពង្រីកការគាំទ្របន្ថែមទៀត និងថា វិធានការគ្រប់គ្រងការបំពុលគួរត្រូវបានអនុវត្ត មិនត្រឹមតែសម្រាប់រោងចក្រធុនធំប៉ុណ្ណោះទេ ប៉ុន្តែសហគ្រាស​ធុន​តូច​និងមធ្យមផងដែរ ក្នុងកម្រិតអនុលោមភាពដោយឡែក ស្របតាមទំហំ និងសមត្ថភាពរបស់សហគ្រាស។

ឯកឧត្តមបានបន្ថែមថា៖ «អនុលោមភាពតាមគោលការណ៍បរិស្ថាន-សង្គម-អភិបាលកិច្ច ត្រូវចាប់ផ្តើម​ពី​ពេលនេះ ខណៈកម្ពុជាកំពុងត្រៀមខ្លួនចាកចេញពីឋានៈជាប្រទេសដែលមានការអភិវឌ្ឍតិចតួច នៅចុងឆ្នាំ២០២៩។ យើងត្រូវគាំទ្រឧស្សាហកម្មរបស់យើង រួមទាំងសហគ្រាស-សិប្បកម្មខ្នាតតូច ដើម្បី​ ពួក​គេអាចបំពេញតាមស្តង់ដាសមស្របលើការគ្រប់គ្រងការបំពុល បង្កើនភាពប្រកួតប្រជែង និងភាព​ធន់នៅ​ក្នុងទីផ្សារសាកល»៕

អត្ថបទ៖ ប៊ី, ប្រភព៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍

second...

x

The post ក្រសួងឧស្សាហកម្ម និងក្រសួង METI ជប៉ុន សហការគ្រប់គ្រងការបំពុល និងគាំទ្រឧស្សាហកម្មកម្ពុជា appeared first on Millions times.