ឧបនាយករដ្ឋមន្ត្រី ស៊ុន ចាន់ថុល Archives - Millions times

ប្រតិភូរាជរដ្ឋាភិបាលកម្ពុជា ទៅទស្សនកិច្ចក្រុមហ៊ុន BYD នៅចិន ស្វែងយល់ពីបច្ចេកវិទ្យាយានយន្តអគ្គិសនី

Vin Chang — Mon, 14 Sep 2026 09:03:24 +0000

កាលពីពេលថ្មីៗកន្លងទៅនេះ ប្រតិភូរាជរដ្ឋាភិបាល បានអញ្ជើញទស្សនកិច្ចក្រុមហ៊ុន BYD ដើម្បីស្វែងយល់ពីបច្ចេកវិទ្យាយានយន្តអគ្គិសនី និងពង្រឹងកាលានុវត្តភាពវិនិយោគនៅកម្ពុជា។

តាមដានជាមួយយើង៖ Million Times

ក្នុងឱកាសនៃការបន្តបេសកកម្មគោះទ្វារ ដើម្បីទាក់ទាញ និងជំរុញការវិនិយោគនៅលើទឹកដីខេត្តក្វាងទុង សាធារណរដ្ឋប្រជាមានិតចិន លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អញ្ជើញបំពេញទស្សនកិច្ចនៅទីស្នាក់ការកណ្តាលក្រុមហ៊ុន BYD ស្ថិតក្នុងតំបន់ភីងសាន ក្រុងស៊ិនជិន ខេត្តក្វាងទុង។

ដំណើរទស្សនកិច្ចនេះ ត្រូវបានទទួលបដិសណ្ឋារកិច្ចយ៉ាងកក់ក្តៅពីថ្នាក់ដឹកនាំជាន់ខ្ពស់របស់ក្រុមហ៊ុន ដឹកនាំដោយ លោក Wang Chuanfu ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន BYD Co., Ltd.។ ទស្សនកិច្ចនេះមានគោលបំណងសិក្សា និងឈ្វេងយល់ពីភាពរីកចម្រើននៃបច្ចេកវិទ្យាយានយន្តអគ្គិសនី (EV) ហេដ្ឋារចនាសម្ព័ន្ធគាំទ្រ និងដំណោះស្រាយបច្ចេកវិទ្យាទំនើបរបស់ BYD ព្រមទាំងស្វែងរកកាលានុវត្តភាពសម្រាប់ការពង្រឹងកិច្ចសហប្រតិបត្តិការផ្នែកបច្ចេកវិទ្យា និងការវិនិយោគរវាងកម្ពុជា និងក្រុមហ៊ុនឈានមុខក្នុងវិស័យយានយន្តអគ្គិសនី។

ទស្សនកិច្ចនាឱកាសនោះ ត្រូវបានរៀបចំឡើងក្នុងគោលបំណងដើម្បីសិក្សាស្វែងយល់អំពី ភាពរីកចម្រើននៃបច្ចេកវិទ្យាយានយន្តអគ្គិសនី (EV) និងហេដ្ឋារចនាសម្ព័ន្ធគាំទ្រដ៏ទំនើបរបស់ក្រុមហ៊ុន BYD ជាពិសេសបច្ចេកវិទ្យានៃស្ថានីយបញ្ចូលថាមពលយានយន្តអគ្គិសនីល្បឿនលឿនបំផុតរបស់ BYD (Flash Charging Flagship Station) ដែលជាដំណោះស្រាយដ៏មានប្រសិទ្ធភាពក្នុងការកាត់បន្ថយរយៈពេលបញ្ចូលថាមពល និងឆ្លើយតបទៅនឹងតម្រូវការប្រើប្រាស់ជាក់ស្តែង ដែលល្បឿននៃការបញ្ចូលថាមពល ប្រើប្រាស់រយៈពេលត្រឹមតែប្រមាណ ១០ នាទីប៉ុណ្ណោះ។

ជាមោទនភាពកម្ពុជា គឺជាប្រទេសទី ១ នៅក្រៅប្រទេសចិន ដែលទទួលបានសិទ្ធិនាំយកបច្ចេកវិទ្យាស្ថានីយបញ្ចូលថាមពលយានយន្តអគ្គិសនីល្បឿនលឿនបំផុតនេះមកអនុវត្ត និងដំឡើងជាផ្លូវការ។ បច្ចុប្បន្ននេះ ដំណើរការរៀបចំនិងដំឡើងស្ថានីយ Flash Charging ទាំងនេះ កំពុងតែប្រព្រឹត្តទៅយ៉ាងសកម្មនៅក្នុងប៉ូលសេដ្ឋកិច្ច និងទេសចរណ៍សំខាន់ៗ ៣ របស់កម្ពុជា រួមមាន៖ រាជធានីភ្នំពេញ, ខេត្តព្រះសីហនុ, និង ខេត្តសៀមរាប ហើយរំពឹងថាត្រឹមបំណាច់ឆ្នាំ២០២៦ ស្ថានីយ ១៨ ទីតាំង នឹងបើកឲ្យដំណើរការផ្តល់នូវសេវាកម្មបញ្ចូលថាមពលយានយន្តអគ្គិសនីល្បឿនលឿនបំផុតនេះ៕

អត្ថបទ៖ ឆដា, រូបភាព៖ ក្រុមប្រឹក្សាអភិវឌ្ឍន៍កម្ពុជា

The post ប្រតិភូរាជរដ្ឋាភិបាលកម្ពុជា ទៅទស្សនកិច្ចក្រុមហ៊ុន BYD នៅចិន ស្វែងយល់ពីបច្ចេកវិទ្យាយានយន្តអគ្គិសនី appeared first on Millions times.

មង្គលការកូនស្រីឧបនាយករដ្ឋមន្ត្រី ស៊ុន ចាន់ថុល ជាមួយកូនប្រុសនៃសម្ព័ន្ធ ជីប ម៉ុង លើទឹកដីអ៊ីតាលី

Vin Chang — Mon, 01 Jun 2026 02:49:47 +0000

ក្រោយភ្ជាប់ពាក្យតាមបែបប្រពៃណីខ្មែរកាលពីឆ្នាំ ២០២៣ កន្លងទៅ ពេលនេះកូនប្រុសច្បងលោកអ្នកឧកញ៉ា លាង ឃុន ដែលអ្នកនៅក្នុងវិស័យជំនួញស្គាល់ថា ប្រធានបន្តវេនរបស់ក្រុមហ៊ុន Khmer Beverages អ៊ឹង វីរៈ បានដឹកដៃកូនក្រមុំលោក លោក ស៊ុន ចាន់ថុល រៀបការតាមបែបអឺរ៉ុប នៅអ៊ីតាលី។

តាមដានជាមួយយើង៖ Million Times

មង្គលការ Young CEO អ៊ឹង វីរៈ ដែលជាកូនប្រុសច្បងលោកអ្នកឧកញ៉ា លាង ឃុន និងកូនក្រមុំ ស៊ុន ស៊ីមុនី ដែលជាកូនស្រីរបស់របស់ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍកម្ពុជា លោក ស៊ុន ចាន់ថុល កាលពីអំឡុងចុងសប្ដាហ៍មុននៅលើទឹកដីអឺរ៉ុប ទទួលបានការចាប់អារម្មណ៍ច្រើន។

មង្គលការដែលមានតែសាច់ញាតិខាងប្រុសស្រី ធ្វើឡើងយ៉ាងកក់ក្ដៅក្នុងក្រុមគ្រួសារទាំងសងខាង ដែលរៀបចំឡើងនៅបឹង Como ប្រទេសអ៊ីតាលី និងជាទីកន្លែងល្បីបំផុតក្នុងការរៀបចំមង្គលការបែបអភិជន ត្រូវបានគ្រួសារមហាសេដ្ឋី ជីប ម៉ុង និងគ្រួសារមន្រ្តីរាជការ កក់រៀបចំឲ្យកូនប្រុសស្រីទាំង ២។

ទាំងសាច់ញាតិកូនកំលោះ និងកូនក្រមុំបានបណ្ដើរគ្នាជាគូៗ សំដៅទៅកន្លែងរៀបចំកម្មវិធី។ គូខ្លះជាស្វាមីភរិយា ខ្លះជាគូដណ្ដឹង និងខ្លះទៀតជាសង្សារ។ កម្មវិធីសច្ចាប្រណិធាន ស្បថស្បែ បែបបរទេស នៅមាត់សមុទ្រ ជាមួយខ្យល់បក់រំភើយ បានធ្វើឲ្យបរិយាកាសកាន់តែរ៉ូមែនទិកស័ក្ដិសមជាមួយគូស្នេហ៍យុវវ័យសម័យថ្មី។

មង្គលការគូស្នេហ៍ដែលសមឥតខ្ចោះទាំងគ្រួសារ ចំណេះដឹង និងទ្រព្យធន បានធ្វើឲ្យកក្រើកបណ្ដាញសង្គម។ ក្រៅពីរៀបចំមង្គលការឲ្យគូស្វាមីភរិយាថ្មី ក្រុមគ្រួសារទាំងសងខាងក៏ឆ្លៀតធ្វើដំណើរកម្សាន្តយ៉ាងសប្បាយរីករាយផងដែរ៕

អត្ថបទ៖ ឆដា, រូបភាព៖ អ៊ីនធឺណេត

The post មង្គលការកូនស្រីឧបនាយករដ្ឋមន្ត្រី ស៊ុន ចាន់ថុល ជាមួយកូនប្រុសនៃសម្ព័ន្ធ ជីប ម៉ុង លើទឹកដីអ៊ីតាលី appeared first on Millions times.

ក្រុមប្រឹក្សាអភិវឌ្ឍន៍កម្ពុជា ជួបលោក Takahashi Fumiaki ប្រធានសមាគម និងជាអតីតឯកអគ្គរាជទូតជប៉ុនប្រចាំកម្ពុជា

Vin Chang — Thu, 02 Apr 2026 06:25:47 +0000

កាលពីរសៀលថ្ងៃ ១ ខែមេសា ឆ្នាំ ២០២៦ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូនៃសមាគមជប៉ុន-កម្ពុជា (JCA) ដឹកនាំដោយ លោក Takahashi Fumiaki ប្រធានសមាគម និងជាអតីតឯកអគ្គរាជទូតជប៉ុនប្រចាំកម្ពុជា។

តាមដានជាមួយយើង៖ Million Times

ក្នុងជំនួបដ៏មានសារៈសំខាន់នេះ ភាគីទាំងពីរបានពិភាក្សាយ៉ាងស៊ីជម្រៅលើវឌ្ឍនភាពនៃកិច្ចសហប្រតិបត្តិការសេដ្ឋកិច្ច ការជំរុញការវិនិយោគ និងការរឹតចំណងមិត្តភាពរវាងប្រទេសទាំងពីរឲ្យកាន់តែរឹងមាំថែមទៀត។

ទន្ទឹមនឹងនេះ ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងអំពីបច្ចុប្បន្នភាពនៃគម្រោងពង្រីកវិសាលភាព កំពង់ផែសមុទ្រទឹកជ្រៅក្រុងព្រះសីហនុ ក្រោមជំនួយហិរញ្ញប្បទានរបស់ទីភ្នាក់ងារសហប្រតិបត្តិការអន្តរជាតិនៃជប៉ុន (JICA) ដែលនឹងក្លាយជាច្រកទ្វារសេដ្ឋកិច្ចដ៏សំខាន់ក្នុងការលើកកម្ពស់សមត្ថភាពប្រកួតប្រជែងរបស់កម្ពុជាក្នុងតំបន់។

គណៈប្រតិភូជប៉ុន បានជម្រាបជូនពីជោគជ័យនៃគម្រោងវិនិយោគ កសិដ្ឋានចិញ្ចឹមត្រីទីឡាប់ព្យា ដែលបច្ចុប្បន្នកំពុងផ្គត់ផ្គង់ក្នុងផ្សារទំនើប AEON និងភោជនីយដ្ឋានល្បីៗ ហើយកំពុងសិក្សាលទ្ធភាពពង្រីកផលិតកម្ម ដើម្បីនាំចេញទៅទីផ្សារអន្តរជាតិ។ ជាការឆ្លើយតប ឧបនាយករដ្ឋមន្ត្រី បានសម្ដែងការកោតសរសើរ និងលើកទឹកចិត្តឲ្យសមាគមពិនិត្យឱកាសវិនិយោគបន្ថែមលើ កសិដ្ឋានចិញ្ចឹមបង្គា និងមច្ឆជាតិផ្សេងៗទៀតដែលមានតម្រូវការទីផ្សារខ្ពស់។

គោលដៅបន្តសន្ទុះនៃការទាក់ទាញវិនិយោគ ឧបនាយករដ្ឋមន្ត្រី បានគូសបញ្ជាក់ពីផែនការរៀបចំ បេសកកម្មគោះទ្វារវិនិយោគនៅជប៉ុន នាពេលខាងមុខ ក៏ដូចជាការរៀបចំកម្មវិធីអាហារពេលព្រឹកធុរកិច្ច (Business Breakfast) ដើម្បីផ្ដល់វេទិកាពិភាក្សាដោយផ្ទាល់ និងដោះស្រាយបញ្ហាប្រឈមផ្សេងៗជូនវិនិយោគិន៕

អត្ថបទ៖ ឆដា, រូបភាព៖ Chanthol Sun DPM

The post ក្រុមប្រឹក្សាអភិវឌ្ឍន៍កម្ពុជា ជួបលោក Takahashi Fumiaki ប្រធានសមាគម និងជាអតីតឯកអគ្គរាជទូតជប៉ុនប្រចាំកម្ពុជា appeared first on Millions times.

បេសកកម្មគណៈប្រតិភូសមាគមឧកញ៉ាកម្ពុជាទៅអាម៉េរិក និងកាណាដា ទទួលផ្លែផ្កាច្រើនចំណុច

Vin Chang — Fri, 14 Nov 2025 08:19:41 +0000

កាលពីចុងខែតុលា រហូតដល់ដើមខែវិច្ឆិកា ឆ្នាំ ២០២៥ កន្លងទៅ គណៈប្រតិភូសមាគមឧកញ៉ាកម្ពុជា បានអមដំណើរឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជាលោក ស៊ុន ចាន់ថុល ក្នុងបេសកកម្មទាក់ទាញ និងជំរុញវិនិយោគទៅកាន់សហរដ្ឋអាម៉េរិក និងប្រទេសកាណាដា។

តាមដានជាមួយយើង៖ Million Times

ក្នុងបេសកកម្មទាក់ទាញ និងជំរុញវិនិយោគនៅសហរដ្ឋអាម៉េរិក និងប្រទេសកាណាដា លោកអ្នកឧកញ៉ា លី យ៉ាងផាត់ ប្រធានសមាគមឧកញ៉ាកម្ពុជា បានចាត់តាំងអ្នកឧកញ៉ា សៀ ឬទ្ធី អនុប្រធាន និងជាប្រធានគណៈកម្មការទំនាក់ទំនងសាធារណៈ អន្តរជាតិ និងទេសចរណ៍ធ្វើជាតំណាង ដើម្បីដឹកនាំគណៈប្រតិភូសមាគមឧកញ៉ាកម្ពុជា រួមមានអ្នកឧកញ៉ា លី សុភាព, អ្នកឧកញ៉ា លីម តារារិទ្ធ និងលោក អ៊ឹង វីរៈ អមដំណើរឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា។

សម្រាប់បេសកកម្មដែលគណៈប្រតិភូសមាគមឧកញ៉ាកម្ពុជាបានបំពេញនៅទីក្រុងឡូសអែនជឺឡេស, ឈីកាហ្គោ និងរដ្ឋធានីវ៉ាស៊ីនតោននៃសហរដ្ឋអាម៉េរិក បានចូលរួមកិច្ចពិភាក្សា សំណេះសំណាល និងសម្ដែងការគួរសម ១១ សកម្មភាពសំខាន់ៗ។

ដោយឡែកក្នុងពេលបំពេញ បេសកកម្មទៅកាន់ប្រទេសកាណាដា គណៈប្រតិភូសមាគមឧកញ៉ាកម្ពុជាបាចូលរួមសកម្មភាពសំខាន់ ១០។

តាមរយៈបេសកកម្មទៅកាន់អាម៉េរិក និងកាណាដា គណៈប្រតិភូសមាគមឧកញ៉ាកម្ពុជាទទួលបានផ្លែផ្កា ២ ធំៗ ទី១អ្នកឧកញ៉ា សួរ វីរៈ ទទួលបានការព្រមព្រៀង និងគ្រោងនាំអង្ករកម្ពុជា ដើម្បីនាំយកទៅលក់សាកល្បងនៅលើទីផ្សារអាម៉េរិក និងកាណាដា ហើយធុរជនប្រទេសទាំង ២ បង្ហាញការគាំទ្រក្នុងការទទួលទិញយករាល់ផលិតផលខ្មែរទាំងអស់ អាចនាំចេញបានដូចជាស្វាយចន្ទី និងផលិតផលអាហារផ្សេងៗទៀត។

ចំណែកទី២ បានចែករំលែកអំពីសាវតារបេសកកម្ម និងតួនាទីស្នូលរបស់សមាគម ដែលជាបណ្ដុំធុរជនមានសក្ដានុពល ព្រមទាំងកសាងបណ្ដាញការបង្កើតយន្តការទំនាក់ទំនង និងផ្គូផ្គងធុរកិច្ចជាមួយស្ថាប័ន/ សភាពពាណិជ្ជកម្ម/វិស័យឯកជន៕

អត្ថបទ៖ឆដា, រូបភាព៖ សមាគមឧកញ៉ាកម្ពុជា

The post បេសកកម្មគណៈប្រតិភូសមាគមឧកញ៉ាកម្ពុជាទៅអាម៉េរិក និងកាណាដា ទទួលផ្លែផ្កាច្រើនចំណុច appeared first on Millions times.

ឧបនាយករដ្ឋមន្ត្រី ស៊ុន ចាន់ថុល ជួបប្រជុំជាមួយតំណាងពាណិជ្ជកម្មអាមេរិក ពិភាក្សាបង្កើនកិច្ចសហប្រតិបត្តិការពាណិជ្ជកម្មទ្វេភាគី

Virak វីរៈ — Fri, 10 Oct 2025 11:55:04 +0000

ឯកឧត្តម ស៊ុន ចាន់ថុល ឧបនាយករដ្ឋមន្ត្រី និជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា អមដោយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានជួបប្រជុំជាមួយឯកអគ្គរដ្ឋទូត Jamieson GREER ប្រធានតំណាងពាណិជ្ជកម្មសហរដ្ឋអាមេរិក នៅរដ្ឋធានីវ៉ាស៊ីនតោន ចាប់ពីថ្ងៃទី ៦ ដល់ ថ្ងៃទី ៩ ខែតុលា ឆ្នាំ ២០២៥។

តាមដានជាមួយយើង៖ Million Times

យោងតាមសេចក្ដីប្រកាសព័ត៌មាន របស់អង្គភាពអ្នកនាំពាក្យរាជរដ្ឋាភិបាលកម្ពុជា បានឱ្យដឹងថា កិច្ចប្រជុំនេះ បានវាយតម្លៃខ្ពស់លើវឌ្ឍនភាពជាវិជ្ជមាន នៃការចរចាកិច្ចព្រមព្រៀងពាណិជ្ជកម្មបដិការ និងបានពិភាក្សាអំពីការបង្កើនកិច្ចសហប្រតិបត្តិការពាណិជ្ជកម្មទ្វេភាគី បន្ថែមទៀត។

អង្គភាពអ្នកនាំពាក្យរាជរដ្ឋាភិបាលកម្ពុជា បានឱ្យដឹងបន្តថា រាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជា នាយករដ្ឋមន្ត្រី នឹងបន្តធ្វើកិច្ចការងារនេះដោយយកចិត្តទុកដាក់បំផុត។

គួររំលឹកថា កាលពីថ្ងៃទី ៣១ ខែកក្កដា ឆ្នាំ ២០២៥ ប្រទេសកម្ពុជា ទទួលបានអត្រាពន្ធគយបដិការត្រឹម ១៩ភាគរយ ពោលគឺបានចុះពីអត្រាពន្ធគយបដិការដំបូង ដែលមានរហូតដល់ ៤៩ភាគរយ។ លទ្ធផលនៃការកាត់បន្ថយអត្រាពន្ធគយបដិការនេះ សម្រេចបានបន្ទាប់ពីការចរចាយ៉ាងស្វិតស្វាញ ដែលបានប្រព្រឹត្តទៅតាមរយៈប្រព័ន្ធវីដេអូចំនួន ៧លើក និងជួបផ្ទាល់ចំនួន ៣ជុំ។

ឯកឧត្តម ស៊ុន ចាន់ថុល ធ្លាប់បានលើកឡើងកាលពីថ្ងៃទី ១ ខែសីហាថា បើទោះបីជាទទួលបានអត្រាពន្ធ ១៩ភាគរយក៏ដោយ ក៏រាជរដ្ឋាភិបាលនៅតែបន្តចរចាបន្ថែមទៀត ដើម្បីឱ្យបានទាបជាងនេះនៅលើទំនិញផ្សេងៗទៀត ដែលជាទំនិញអាទិភាពរបស់កម្ពុជា។

ឯកឧត្តមឧបនាយករដ្ឋមន្ត្រី បង្ហាញសុទិដ្ឋិនិយមថា សហរដ្ឋអាមេរិក នឹងបន្តបញ្ចុះអត្រាពន្ធដល់ប្រទេសកម្ពុជាបន្ថែមទៀត ស្របពេលដែលកម្ពុជាបានសម្រេចយកពន្ធ ០ភាគរយ ពីទំនិញនាំចូលពីសហរដ្ឋអាមេរិកវិញ៕

អត្ថបទ៖ វីរៈ រូបភាព៖ បណ្ដាញសង្គមឯកឧត្តម ស៊ុន ចាន់ថុល

The post ឧបនាយករដ្ឋមន្ត្រី ស៊ុន ចាន់ថុល ជួបប្រជុំជាមួយតំណាងពាណិជ្ជកម្មអាមេរិក ពិភាក្សាបង្កើនកិច្ចសហប្រតិបត្តិការពាណិជ្ជកម្មទ្វេភាគី appeared first on Millions times.

លោក ស៊ុន ចាន់ថុល៖ ជំនួយចិនឲ្យកម្ពុជា រួមចំណែកជួយដល់ការអភិវឌ្ឍសេដ្ឋកិច្ច និងពង្រឹងឯករាជ្យភាពខាងនយោបាយ

Vin Chang — Tue, 29 Apr 2025 07:17:32 +0000

លោក ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ថា ការផ្ដល់ហិរញ្ញប្បទាន និងជំនួយផ្សេងៗរបស់ភាគីចិនដល់កម្ពុជា រួមទាំងនៅក្នុងកិច្ចសហប្រតិបត្តិការនៃគំនិតផ្តួចផ្តើមខ្សែក្រវាត់ និងផ្លូវ បានរួមចំណែកយ៉ាងសំខាន់ ក្នុងការជួយដល់ការអភិវឌ្ឍសេដ្ឋកិច្ច-សង្គម និងជួយពង្រឹងឯករាជ្យភាពខាងនយោបាយរបស់កម្ពុជា។

តាមដានជាមួយយើង៖ Million Times

លោក ស៊ុន ចាន់ថុល បានថ្លែងយ៉ាងដូចនេះនាថ្ងៃទី២៨ ខែមេសា ឆ្នាំ២០២៥នេះ នាឱកាសដែលលោក និងលោក Wang Wenbin ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំកម្ពុជា អញ្ជើញក្នុងពេលចូលរួមបើកការដ្ឋានសាងសង់រោងចក្រដំឡើង យានយន្តរបស់ក្រុមហ៊ុន ប៊ី វ៉ាយ ឌី ខេមបូឌា ឯ.ក BYD CAMBODIA CO., LTD. នៅខេត្តព្រះសីហនុ។

អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានថ្លែងថា លទ្ធផលប្រកបដោយផ្លែផ្កានៃជំនួបរវាងថ្នាក់ដឹកនាំកំពូល នៃប្រទេសទាំងពីរកម្ពុជា-ចិន នឹងបន្តរឹតចំណងមិត្តភាពទំនាក់ទំនងការទូតកម្ពុជា និងមិត្តចិន ឱ្យកាន់តែមាន ភាពល្អ ប្រសើរឡើង ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប រួមទាំងសម្រេចឱ្យបាននូវការកសាងសហគមន៍វាសនារួម កម្ពុជា-ចិន ក្នុងយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់ ជាមួយនឹងការបន្តពង្រឹងទំនុកចិត្តគ្នាជាយុទ្ធសាស្ត្រ កិច្ចសហប្រតិបត្តិការផ្លែផ្កា ការផ្លាស់ប្តូររវាងប្រជាជននិងប្រជាជន និងកិច្ចសហប្រតិបត្តិការពហុភាគីកាន់តែជិតស្និទ្ធ បង្កើតគំរូល្អថ្មី នៃទំនាក់ទំនងអន្តរជាតិ និងសហគមន៍វាសនារួមសម្រាប់មនុស្សជាតិ។

លោកបានថ្លែងបន្តថា ការផ្ដល់ហិរញ្ញប្បទាន និងជំនួយផ្សេងៗរបស់មិត្តចិនដល់កម្ពុជា រួមទាំងនៅក្នុងកិច្ចសហប្រតិបត្តិការ នៃគំនិតផ្តួចផ្តើមខ្សែក្រវាត់ និងផ្លូវ ដែលបានដាក់ចេញដោយប្រធានាធិបតីចិន ស៊ី ជីនពីង មិនត្រឹមតែបានជួយរួមចំណែកដល់ការអភិវឌ្ឍសេដ្ឋកិច្ច-សង្គមកម្ពុជាប៉ុណ្ណោះទេ តែថែមទាំងជួយពង្រឹងឯករាជ្យភាព ខាងនយោបាយរបស់កម្ពុជាទៀតផង។

លោកបន្ថែមថា បើនិយាយតែនៅក្នុងក្របខណ្ឌនៃការកសាង និងអភិវឌ្ឍន៍ ហេដ្ឋារចនាសម្ព័ន្ធដឹកជញ្ជូននៅកម្ពុជាវិញ មិត្តចិនឈរជាប្រទេសលំដាប់ទី១ ដែលបាននិងកំពុងផ្តល់ឥណទានសម្បទាន និងជំនួយជាច្រើនសរុបប្រមាណជាង ៣ពាន់លានដុល្លារអាម៉េរិក និងសាងសង់ខ្សែផ្លូវប្រវែងសរុបប្រមាណជិត ៤ពាន់គីឡូម៉ែត្រ រួមទាំងស្ពានធំៗសរុបប្រមាណ ១៦ស្ពាន ប្រវែងសរុបប្រមាណជាង ១៤ពាន់ម៉ែត្រ។

លោកឧបនាយករដ្ឋមន្រ្តីបានបន្ថែមថា គម្រោងព្រែកជីកហ្វូណនតេជោ ដែលជាគម្រោងប្រវត្តិសាស្ត្រ ត្រូវបានចុះហត្ថលេខាជាផ្លូវការ លើកិច្ចសន្យាភាព ជាដៃគូរវាងរដ្ឋ និងឯកជន និងឯកសារពាក់ព័ន្ធមួយចំនួនទៀត នៅថ្ងៃទី១៧ ខែមេសា ឆ្នាំ២០២៥ និងទទួលបានការប្រកាសគាំទ្រពីលោក ស៊ី ជីនពីង ប្រធានាធិបតីចិន នៅក្នុងដំណើរទស្សនកិច្ចផ្លូវរដ្ឋកាលពីថ្ងៃទី១៧-១៨ ខែមេសា ឆ្នាំ២០២៥ ដែលទើបតែកន្លងទៅថ្មីៗនេះផងដែរ៕

អត្ថបទ៖ សាងតេជៈ រូបភាព៖ CDC

The post លោក ស៊ុន ចាន់ថុល៖ ជំនួយចិនឲ្យកម្ពុជា រួមចំណែកជួយដល់ការអភិវឌ្ឍសេដ្ឋកិច្ច និងពង្រឹងឯករាជ្យភាពខាងនយោបាយ appeared first on Millions times.

អ្នកជំនួញធំៗច្រើនចូលរួមពិធីសម្ពោធដាក់ឲ្យ ប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា «cdcIPM»

Vin Chang — Thu, 28 Nov 2024 03:49:44 +0000

នៅព្រឹកថ្ងៃ ២៧ ខែវិច្ឆិកាម្សិលមិញ ក្រុមប្រឹក្សាអភិវឌ្ឍន៍កម្ពុជា បានបោះជំហានទៅមុខបន្ថែមទៀត លើទំនើបកម្មបច្ចេកវិទ្យាឌីជីថល ដោយផ្ដល់សេវាសាធារណៈ ដាក់ឲ្យប្រើប្រាស់ជាផ្លូវការ ប្រព័ន្ធគ្រប់គ្រងគម្រោងវិនិយោគកម្ពុជា (ប្រព័ន្ធ cdcIPM) ជាផ្លូវការ ក្រោមវត្តមានឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ព្រមជាមួយវត្តមានមន្ត្រីក្រសួងពាក់ព័ន្ធ អ្នកធុរកិច្ច និងវិនិយោគិនក្នុងស្រុក និងក្រៅស្រុក។

តាមដានជាមួយយើង៖ Million Times

ក្នុងពិធីសម្ពោធដាក់ឲ្យប្រើប្រាស់ផ្លូវការប្រព័ន្ធគ្រប់គ្រងគម្រោងវិនិយោគកម្ពុជា “ប្រព័ន្ធ cdcIPM” មានការចូលរួមពីសំណាក់តំណាងក្រសួងស្ថាប័ននានាអគ្គរាជទូត ឯកអគ្គរដ្ឋទូត តំណាងអង្គទូត អង្គការជាតិ អន្តរជាតិ វិស័យឯកជន អ្នកជំនួញធំៗ សេដ្ឋីល្បីៗ និងបណ្ដាញសារព័ត៌មានសរុបប្រមាណ ៣៥០ នាក់។

បើតាមលោក ស៊ុន ចាន់ថុល ប្រព័ន្ធ cdcIPM នេះ ផ្ដល់លទ្ធភាពឲ្យវិនិយោគិនដាក់ពាក្យដោយផ្ទាល់ពីគ្រប់ទីកន្លែង និងគ្រប់ពេលវេលា សម្រួលកិច្ចវិនិយោគឲ្យកាន់តែមានភាពងាយស្រួល កាត់បន្ថយពេលវេលា ធានាបានតម្លាភាព សុក្រឹតភាព និងប្រសិទ្ធភាព ព្រមទាំង ចូលរួមកសាងសេដ្ឋកិច្ច និងសង្គមឌីជីថល និងរដ្ឋាភិបាលឌីជីថលនៅកម្ពុជា។

ប្រព័ន្ធថ្មីនេះនឹងចូលរួមពន្លឿនការផ្ដល់សេវាចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (QIP) ដោយប្ដូរពីការធ្វើលើឯកសាររឹង ទៅជាការធ្វើតាមប្រព័ន្ធឌីជីថលទាំងស្រុង កាត់បន្ថយតម្រូវការនៃការជួបផ្ទាល់រវាងវិនិយោគិន និងអ្នកផ្ដល់សេវា បង្កើនភាពងាយស្រួល ដោយធ្វើឲ្យបរិយាកាសវិនិយោគនៅកម្ពុជាកាន់តែទទួលបានទំនុកចិត្តពីវិនិយោគិនមួយកម្រិតថែមទៀត៕

អត្ថបទ៖ មេរ៉ា រូបភាព៖ FB Chanthol Sun DPM

The post អ្នកជំនួញធំៗច្រើនចូលរួមពិធីសម្ពោធដាក់ឲ្យ ប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា «cdcIPM» appeared first on Millions times.

​ឧបនាយករដ្ឋមន្ត្រី ស៊ុន ចាន់ថុល Archives - Millions times

ប្រតិភូរាជរដ្ឋាភិបាលកម្ពុជា ទៅទស្សនកិច្ចក្រុមហ៊ុន BYD នៅចិន ស្វែងយល់ពីបច្ចេកវិទ្យាយានយន្តអគ្គិសនី

មង្គលការកូនស្រីឧបនាយករដ្ឋមន្ត្រី ស៊ុន ចាន់ថុល ជាមួយកូនប្រុសនៃសម្ព័ន្ធ ជីប ម៉ុង លើទឹកដីអ៊ីតាលី

ក្រុមប្រឹក្សាអភិវឌ្ឍន៍កម្ពុជា ជួបលោក Takahashi Fumiaki ប្រធានសមាគម និងជាអតីតឯកអគ្គរាជទូតជប៉ុនប្រចាំកម្ពុជា

បេសកកម្មគណៈប្រតិភូសមាគមឧកញ៉ាកម្ពុជាទៅអាម៉េរិក និងកាណាដា ទទួលផ្លែផ្កាច្រើនចំណុច

លោក ស៊ុន ចាន់ថុល៖ ជំនួយចិនឲ្យកម្ពុជា រួមចំណែកជួយដល់ការអភិវឌ្ឍសេដ្ឋកិច្ច និងពង្រឹងឯករាជ្យភាពខាងនយោបាយ

អ្នកជំនួញធំៗច្រើនចូលរួមពិធីសម្ពោធដាក់ឲ្យ ប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា «cdcIPM»

ឧបនាយករដ្ឋមន្ត្រី ស៊ុន ចាន់ថុល Archives - Millions times