ការត្រៀមកញ្ចប់ឥណទាននេះ ត្រូវបានបញ្ជាក់ដោយឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ARDB ក្នុងកិច្ចប្រជុំជាមួយរោងម៉ាស៊ីនកិនស្រូវ និងក្រុមហ៊ុននាំចេញមកពីខេត្តបន្ទាយមានជ័យ ពោធិ៍សាត់ និងបាត់ដំបង កាលពីថ្ងៃទី១២ ខែកញ្ញា ឆ្នាំ២០២៦ នៅស្នាក់ការសាខា ARDB ខេត្តបាត់ដំបង។

កិច្ចប្រជុំនេះមានការចូលរួមពីឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា ឧកញ៉ា ចាន់ សុឃាំង ប្រធានក្រុមប្រឹក្សាភិបាលសហព័ន្ធស្រូវអង្ករ លោក លន់ យ៉េង អគ្គលេខាធិការសហព័ន្ធស្រូវអង្ករ ព្រមទាំងតំណាងរោងម៉ាស៊ីនកិនស្រូវ និងក្រុមហ៊ុននាំចេញសរុបជាង ២០នាក់។

ឯកឧត្តមបណ្ឌិត កៅ ថាច មានប្រសាសន៍ថា កិច្ចប្រជុំនេះធ្វើឡើងដើម្បីពិនិត្យវឌ្ឍនភាពនៃការប្រមូលទិញស្រូវ និងជំរុញការសម្រេចគោលដៅនាំចេញអង្ករកម្ពុជាចំនួន ១ លានតោន ក្នុងឆ្នាំ២០២៦។

ឯកឧត្តមបានលើកឡើងថា ក្នុងរយៈពេល ១៦ឆ្នាំចុងក្រោយ ចាប់តាំងពីការដាក់ចេញគោលនយោបាយក្នុងឆ្នាំ២០១០ វិស័យស្រូវអង្ករកម្ពុជាបានជួបបញ្ហាប្រឈមជាច្រើន រួមទាំងការធ្លាក់ចុះនៃតម្លៃស្រូវក្នុងឆ្នាំ២០១៦ និងការខ្វះហេដ្ឋារចនាសម្ព័ន្ធសម្រាប់ស្តុក និងសម្ងួតស្រូវ ព្រមទាំងកង្វះទុនបង្វិល ដែលជាកត្តាមួយធ្វើឱ្យឈ្មួញកណ្តាលទម្លាក់តម្លៃស្រូវរបស់កសិករ។

ដើម្បីរក្សាការនាំចេញអង្ករឱ្យបាន ១ លានតោនក្នុងមួយឆ្នាំ ឬលើសនេះ ឯកឧត្តមបណ្ឌិត កៅ ថាច បានបញ្ជាក់ថា ARDB នឹងបន្តគាំទ្រផ្នែកហិរញ្ញប្បទានដល់វិស័យនេះ។ ឯកឧត្តមបានជំរុញឱ្យរោងម៉ាស៊ីនបង្កើនសកម្មភាពប្រមូលទិញស្រូវ និងពង្រឹងកិច្ចសហការរវាងភាគីពាក់ព័ន្ធ ដើម្បីរួមគ្នាសម្រេចគោលដៅនាំចេញអង្ករកម្ពុជាសម្រាប់ឆ្នាំ២០២៦។

ជាមួយគ្នានេះ ARDB បានត្រៀមបម្រុងកញ្ចប់ឥណទានទុនបង្វិលរហូតដល់ ២០០ លានដុល្លារ សម្រាប់រដូវកាលប្រមូលផលនេះ ដើម្បីផ្តល់លទ្ធភាពដល់រោងម៉ាស៊ីនកិនស្រូវក្នុងការប្រមូលទិញ និងស្តុកស្រូវឱ្យបានទាន់ពេលវេលា ព្រមទាំងចូលរួមរក្សាលំនឹងតម្លៃស្រូវនៅលើទីផ្សារ។

ពាក់ព័ន្ធនឹងការប្រែប្រួលទីផ្សារហ្វីលីពីន ដែលមានការបញ្ជាទិញអង្ករពីវៀតណាមក្នុងបរិមាណច្រើន ឯកឧត្តមបណ្ឌិត កៅ ថាច បានណែនាំឱ្យរោងម៉ាស៊ីនកិនស្រូវនៅតំបន់ជាប់បឹងទន្លេសាប ពិនិត្យ និងស្វែងរកឱកាសនៅទីផ្សារវៀតណាម ដែលបច្ចុប្បន្នកំពុងមានតម្រូវការអង្ករប្រណិតសម្រាប់នាំចេញ។

ឯកឧត្តមបានលើកឡើងថា រោងម៉ាស៊ីនក្នុងស្រុកអាចពិចារណាបង្កើនការប្រមូលទិញស្រូវនៅតំបន់ជាប់ព្រំដែនកម្ពុជា-វៀតណាម ដើម្បីបង្កើនសមត្ថភាពស្តុក និងនាំចេញក្នុងបរិមាណកាន់តែច្រើន។

ឯកឧត្តមបណ្ឌិត កៅ ថាច ក៏បានជំរុញឱ្យរោងម៉ាស៊ីន និងក្រុមហ៊ុននាំចេញអង្ករ បន្តខិតខំប្រឹងប្រែង និងធ្វើការរួមគ្នារវាងស្ថាប័នរដ្ឋ និងវិស័យឯកជន ដើម្បីពង្រឹងខ្សែច្រវាក់តម្លៃស្រូវអង្ករកម្ពុជា និងការពារផលប្រយោជន៍របស់កសិករ តាមរយៈការរក្សាតម្លៃស្រូវឱ្យមានចីរភាព និងបង្កើនតម្លៃបន្ថែមក្នុងវិស័យនេះ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ARDB ត្រៀមកញ្ចប់ឥណទានទុនបង្វិល ២០០ លានដុល្លារ គាំទ្ររោងម៉ាស៊ីនប្រមូលទិញស្រូវរដូវកាលនេះ appeared first on Millions times.

ពិធីចុះហត្ថលេខានេះធ្វើឡើងនៅទីស្ដីការក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១១ ខែសីហា ឆ្នាំ២០២៦ ដោយឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដែលទទួលបានបុព្វសិទ្ធិដ៏ខ្ពង់ខ្ពស់ពី ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាភាគីហត្ថលេខី ជាមួយលោក SANUI Kazumasa ប្រធានទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា (JICA Cambodia Office)។

តាមកិច្ចព្រមព្រៀង ឥណទានសម្បទានបន្ថែមនេះ នឹងគាំទ្រដល់ការអភិវឌ្ឍហេដ្ឋារចនាសម្ព័ន្ធចំណតកុងតឺន័រថ្មី ដែលរួមមានការសាងសង់ចំណតផែប្រវែង ៣៥០ម៉ែត្រ ជម្រៅទឹក ១៤,៥ម៉ែត្រ ព្រមទាំងការផ្គត់ផ្គង់គ្រឿងចក្រសម្រាប់លើកដាក់កុងតឺន័រ និងការសាងសង់អគារជួសជុល និងថែទាំ។

គម្រោងនេះមានគោលបំណងបង្កើនសមត្ថភាពលើកដាក់ទំនិញរបស់កំពង់ផែស្វយ័តក្រុងព្រះសីហនុ ដែលជាកំពង់ផែសមុទ្រទឹកជ្រៅអន្តរជាតិដំបូងរបស់កម្ពុជា ព្រមទាំងលើកកម្ពស់ប្រសិទ្ធភាពនៃបណ្ដាញភស្តុភារកម្មនៅក្នុងប្រទេស។

គម្រោងអភិវឌ្ឍន៍ចំណតកុងតឺន័រថ្មីនេះ ត្រូវបានរំពឹងថានឹងចូលរួមចំណែកដល់ការសម្រួលពាណិជ្ជកម្ម និងការបង្កើនសមត្ថភាពប្រកួតប្រជែងរបស់សេដ្ឋកិច្ចកម្ពុជា។ ជាមួយគ្នានេះ គម្រោងក៏ត្រូវបានរំពឹងថានឹងគាំទ្រដល់ការអភិវឌ្ឍសង្គម-សេដ្ឋកិច្ចរបស់កម្ពុជាប្រកបដោយចីរភាព។

ក្នុងពិធីចុះហត្ថលេខា ឯកឧត្តម រស់ សីលវ៉ា ក្នុងនាមរាជរដ្ឋាភិបាលកម្ពុជា ក្រសួងសេដ្ឋកិច្ច និងហិរញ្ញវត្ថុ និងប្រជាជនកម្ពុជា បានថ្លែងអំណរគុណដល់រដ្ឋាភិបាល និងប្រជាជនជប៉ុន ព្រមទាំងស្ថាប័នពាក់ព័ន្ធរបស់រដ្ឋាភិបាលជប៉ុន ជាពិសេស JICA Cambodia Office ចំពោះកិច្ចសហប្រតិបត្តិការដ៏ល្អប្រសើរ និងការគាំទ្រដល់ការអភិវឌ្ឍសេដ្ឋកិច្ច និងសង្គមកម្ពុជា តាមរយៈហិរញ្ញប្បទានសហប្រតិបត្តិការ (ODA)។

ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា កិច្ចសហប្រតិបត្តិការតាមរយៈហិរញ្ញប្បទាន ODA របស់ជប៉ុន បានឆ្លើយតបនឹងទិសដៅនៃកម្មវិធីនយោបាយអាទិភាពរបស់រាជរដ្ឋាភិបាលកម្ពុជា និងយុទ្ធសាស្ត្របញ្ចកោណ ដំណាក់កាលទី១ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ការចុះហត្ថលេខាលើកិច្ចព្រមព្រៀងហិរញ្ញប្បទាននេះ ត្រូវបានចាត់ទុកថាជាការឆ្លុះបញ្ចាំងពីមិត្តភាពដ៏យូរអង្វែង និងកិច្ចសហប្រតិបត្តិការអភិវឌ្ឍន៍ដ៏រឹងមាំរវាងរាជរដ្ឋាភិបាលកម្ពុជា និងរដ្ឋាភិបាលជប៉ុន៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជា-ជប៉ុន ចុះកិច្ចព្រមព្រៀងឥណទាន ១១៤លានដុល្លារ អភិវឌ្ឍចំណតកុងតឺន័រថ្មីនៅក្រុងព្រះសីហនុ appeared first on Millions times.

​ទិន្នន័យ​ស្តីពី​សមិទ្ធផល​ឥណទាន​លក្ខណៈ​បុគ្គល​សម្រាប់​ប្រើប្រាស់​ផ្ទាល់ខ្លួន​ ​បង្ហាញ​ថា​ ​សមតុល្យ​ឥណទាន​បាន​កើនឡើង​ ​១,០៥​% ​បើ​ធៀប​នឹង​ត្រីមាស​មុន ​ខណៈ​ចំនួន​គណនី​ឥណទាន​កើនឡើង​ ​៧,០៥​%​។ ​កំណើន​នៃ​ចំនួន​គណនី​ត្រូវបាន​កត់ត្រា​នៅ​គ្រប់​តំបន់​នៃ​ប្រទេស​។

​ក្នុង​ចំណោម​គណនី​ឥណទាន​សរុប​ ​២,៨៤​ ​លាន​គណនី ​ឥណទាន​សម្រាប់​ប្រើប្រាស់​ផ្ទាល់ខ្លួន​មាន​ចំណែក​ ​៨៥,៦៧​%​ កម្ចី​អចលន​ទ្រព្យ​មាន​ ​៧,៤៧​% ​និង​ប័ណ្ណ​ឥណទាន​មាន​ ​៦,៨៦​%​។

​ទោះជា​យ៉ាងណា​ ​តម្រូវការ​ស្នើសុំ​ឥណទាន​លក្ខណៈ​បុគ្គល​សម្រាប់​ប្រើប្រាស់​ផ្ទាល់ខ្លួន​បាន​ថយចុះ​ ​៩​% ​ក្នុង​ត្រីមាស​ទី​២​ ​បើ​ធៀប​នឹង​ត្រីមាស​មុន​។​ ក្នុង​នោះ​ ​ការ​ស្នើសុំ​កម្ចី​ប្រើប្រាស់​ផ្ទាល់ខ្លួន​ថយចុះ​ ​៩​% ​ខណៈ​ការ​ស្នើសុំ​កម្ចី​អចលន​ទ្រព្យ​ថយចុះ​ ​៩​%​។ ​ផ្ទុយទៅវិញ​ ​ការ​ស្នើសុំ​ប័ណ្ណ​ឥណទាន​បាន​កើនឡើង​ ​១៥​%​។

​ទំហំ​ទឹកប្រាក់​នៃ​ការ​ស្នើសុំ​ឥណទាន​បាន​កើនឡើង​ ​៤​% ​ខណៈ​ត្រីមាស​មុន​កើនឡើង​ ​៧​%​។ ​ការ​ប្រែប្រួល​នេះ​ត្រូវបាន​ជំរុញ​ដោយ​ការ​ថយចុះ​នៃ​ទំហំ​ទឹកប្រាក់​កម្ចី​ផ្ទាល់ខ្លួន​ ​៥​% ​និង​ប័ណ្ណ​ឥណទាន​ ​៧​% ​ខណៈ​កម្ចី​អចលន​ទ្រព្យ​កើនឡើង​ ​២​%​។

​ជាមួយគ្នា​នេះ​ ​គុណភាព​ឥណទាន​បាន​ធ្លាក់ចុះ​ ​ដោយ​អនុបាត​ឥណទាន​សង​យឺត​លើស​ពី​ ​៩០​ ​ថ្ងៃ​ ​(​៩០​+​ ​DPD​) ​បាន​កើន​ដល់​ ​៧,៣២​% ​ពី​ ​៥,៩០​%​ ​ក្នុង​ត្រីមាស​ទី​១​ ​ឆ្នាំ​២០២៦​។ ​ក្នុង​ចំណោម​ផលិតផល​ឥណទាន​ទាំង​បី​ ​ឥណទាន​ប្រើប្រាស់​ផ្ទាល់ខ្លួន​មាន​អនុបាត​ ​៩០​+ ​DPD​ ​ខ្ពស់​ជាង​គេ​ ​គឺ​ ​១៣,១៥​%​។

​សមតុល្យ​ឥណទាន​មិន​ដំណើរការ​លើស​ពី​ ​៩០​ ​ថ្ងៃ​បាន​កើនឡើង​ជា​រួម​ ​២៦,១​% ​នៅ​ទូទាំង​តំបន់​។ ​ការ​កើនឡើង​ខ្ពស់​បំផុត​ត្រូវបាន​កត់ត្រា​នៅ​តំបន់​ឆ្នេរ​ ​៨០​% ​តំបន់​ទំនាប​ ​២១​% ​តំបន់​ទន្លេ​សាប​ ​២៦​% ​និង​តំបន់​ខ្ពង់រាប​ ​២៨​%​។

​លោក​ ​អឿ ​សុធារ័ត្ន ​ប្រធាន​នាយក​ប្រតិបត្តិ​នៃ​ក្រុមហ៊ុន​ក្រេឌីត ​យូរ៉ូ ​ខេមបូឌា ​ខូ ​អិលធីឌី ​បាន​មានប្រសាសន៍​ថា​ តម្រូវការ​ស្នើសុំ​ឥណទាន​លក្ខណៈ​បុគ្គល​សម្រាប់​ប្រើប្រាស់​ផ្ទាល់ខ្លួន​មាន​ការ​ថយចុះ​ ​ខណៈ​សមិទ្ធផល​ឥណទាន​នៅតែ​វិជ្ជមាន​ ​ដោយ​ចំនួន​គណនី ​និង​សមតុល្យ​កម្ចី​ក្នុង​ត្រីមាស​ទី​២​ ​បាន​កើនឡើង​បើ​ធៀប​នឹង​ត្រីមាស​មុន​។

​លោក​បាន​បន្ថែម​ថា​ ​គុណភាព​ឥណទាន​មាន​ការ​ធ្លាក់ចុះ​បើ​ធៀប​នឹង​ត្រីមាស​មុន ​ដោយ​អនុបាត​គណនី​កម្ចី​ដែល​សង​យឺត​លើស​ពី​ ​៩០​ ​ថ្ងៃ​ ​បាន​កើនឡើង​ពី​ ​៥,៨៧​%​ ក្នុង​ត្រីមាស​ទី​១​ ​ឆ្នាំ​២០២៦​ មក​ ​៧,៣២​% ​ក្នុង​ត្រីមាស​ទី​២​៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ឥណទាន​បុគ្គល​នៅ​កម្ពុជា​ ​កើន​ដល់​ជាង​ ​១៦​ ​ពាន់​លាន​ដុល្លារ​ ​គិត​ត្រឹម​ចុង​ត្រីមាស​ទី​២​ appeared first on Millions times.

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ចេញផ្សាយថ្ងៃទី៣ ខែសីហា បានឱ្យដឹងថា កិច្ចព្រមព្រៀងនេះត្រូវបានចុះហត្ថលេខានៅថ្ងៃទី៣១ ខែកក្កដា នៅទីស្តីការក្រសួងសេដ្ឋកិច្ច និងហិរញ្ញវត្ថុ ដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន  ឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី យ៉សមីន ស៊ីឌីគី នាយិកាស្ថានតំណាង ADB ប្រចាំកម្ពុជា។ ពិធីនេះក៏មានការចូលរួមពីលោក Nianshan Zhang អគ្គនាយកទទួលបន្ទុកនាយកដ្ឋានអាស៊ីអាគ្នេយ៍ នៃ ADB។

ហិរញ្ញប្បទាននេះត្រូវបានផ្តល់ក្រោមក្របខណ្ឌ Countercyclical Support Facility (CSF) របស់ ADB និងមានគោលបំណងគាំទ្រការអនុវត្ត “កម្មវិធីអន្តរាគមន៍គ្រប់ជ្រុងជ្រោយ ឆ្លើយតបនឹងសភាពការណ៍ពហុវិបត្តិ” របស់រាជរដ្ឋាភិបាលកម្ពុជា។

កម្មវិធី RISE ផ្តោតលើសមិទ្ធផលគន្លឹះចំនួន៣ រួមមាន ការកាត់បន្ថយជាបណ្តោះអាសន្ននូវផលប៉ះពាល់ពីការប្រែប្រួលខ្លាំងនៃតម្លៃប្រេងឥន្ធនៈលើសេដ្ឋកិច្ច ការផ្តល់ជំនួយហិរញ្ញវត្ថុចំគោលដៅ និងការគាំទ្រសកម្មភាពកសិកម្មដល់គ្រួសារងាយរងគ្រោះ និងការពន្លឿនអន្តរកាលបៃតង ដើម្បីពង្រឹងភាពធន់ និងសមត្ថភាពឆ្លើយតបចំពោះវិបត្តិថាមពលដែលអាចកើតមាននាពេលអនាគត។

ក្រសួងបានបញ្ជាក់ថា ហិរញ្ញប្បទានក្រោមយន្តការ CSF មិនត្រឹមតែជាការគាំទ្រផ្នែកហិរញ្ញវត្ថុប៉ុណ្ណោះទេ ប៉ុន្តែជាការឆ្លើយតបទាន់ពេលវេលា ដើម្បីជួយទ្រទ្រង់សេដ្ឋកិច្ចកម្ពុជាឱ្យឆ្លងកាត់កាលៈទេសៈលំបាក និងរក្សាសន្ទុះកំណើនសេដ្ឋកិច្ចប្រកបដោយចីរភាព។

កម្ពុជាគឺជាប្រទេសសមាជិកទី១ ដែលទទួលបានការគាំទ្រពី ADB ក្រោមកម្មវិធី RISE ដែលត្រូវបានក្រុមប្រឹក្សាភិបាល ADB អនុម័តកាលពីថ្ងៃទី៣០ ខែកក្កដា និងចុះហត្ថលេខាលើកិច្ចព្រមព្រៀងឥណទាននៅថ្ងៃទី៣១ ខែកក្កដា ឆ្នាំ២០២៦។

ក្នុងពិធីចុះហត្ថលេខា ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងអំណរគុណចំពោះលោក Masato Kanda ប្រធាន ADB ដែលបានដាក់ចេញកញ្ចប់អន្តរាគមន៍ក្រោមក្របខណ្ឌ CSF ជាការឆ្លើយតបយ៉ាងឆាប់រហ័សរបស់ ADB ចំពោះវិបត្តិនៅមជ្ឈិមបូព៌ា។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន  ក៏បានថ្លែងអំណរគុណដល់ស្ថានតំណាង ADB ប្រចាំកម្ពុជា និងក្រុមបេសកកម្មរបស់ ADB សម្រាប់កិច្ចសហការយ៉ាងជិតស្និទ្ធជាមួយរាជរដ្ឋាភិបាល ក្នុងការរៀបចំ និងបំពេញនីតិវិធីរហូតឈានដល់ការចុះហត្ថលេខាលើកិច្ចព្រមព្រៀងនេះ។

ឯកឧត្តមអគ្គបណ្ឌិតសភាចារ្យ បានចាត់ទុកកម្មវិធីនេះថា ជាការបង្ហាញពីការពង្រឹងកិច្ចសហប្រតិបត្តិការ ការគាំទ្រ និងការជឿទុកចិត្តរបស់ ADB ចំពោះរាជរដ្ឋាភិបាលកម្ពុជា ព្រមទាំងបានលើកឡើងពីតួនាទីរបស់ ADB ជាកាតាលីករក្នុងការកៀរគរហិរញ្ញប្បទានបន្ថែមសម្រាប់កម្ពុជា នៅពេលប្រទេសជួបប្រទះវិបត្តិធំៗ ដូចជាវិបត្តិទឹកជំនន់ឆ្នាំ២០០០-២០០១ វិបត្តិសេដ្ឋកិច្ចឆ្នាំ២០០៨ និងវិបត្តិកូវីដ-១៩។

លោក Nianshan Zhang បានវាយតម្លៃខ្ពស់ចំពោះភាពជាម្ចាស់ និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការរក្សាស្ថិរភាពសេដ្ឋកិច្ច និងលំនឹងជីវភាពប្រជាជនក្នុងកាលៈទេសៈលំបាក។

លោកបានបញ្ជាក់ថា ADB នឹងបន្តផ្តល់ការគាំទ្រយ៉ាងពេញទំហឹងដល់កម្ពុជា ដើម្បីរួមគ្នាដោះស្រាយបញ្ហាប្រឈម និងធានាការអភិវឌ្ឍប្រកបដោយចីរភាព។

ជាមួយគ្នានេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន  បានស្នើឱ្យ ADB បន្តផ្តល់ហិរញ្ញប្បទានសម្បទានដែលមានភាពបត់បែនខ្ពស់ដល់កម្ពុជា ក្នុងដំណាក់កាលអន្តរកាលបន្ទាប់ពីកម្ពុជាចាកចេញពីចំណាត់ថ្នាក់ប្រទេសអភិវឌ្ឍន៍តិចតួច (LDC) ដើម្បីគាំទ្រការវិនិយោគលើវិស័យអាទិភាព និងរក្សាសន្ទុះនៃការអភិវឌ្ឍប្រកបដោយចីរភាព៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ADB ផ្តល់ឥណទានសម្បទាន ២៥០លានដុល្លារ ដល់កម្ពុជា ដើម្បីរក្សាស្ថិរភាពសេដ្ឋកិច្ច appeared first on Millions times.

នៅរសៀលថ្ងៃទី១៣ ខែកក្កដា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តម UENO Atsushi ឯកអគ្គរាជទូតវិសាមញ្ញនិងពេញសមត្ថភាពនៃប្រទេសជប៉ុនប្រចាំព្រះរាជាណាចក្រកម្ពុជា បានចុះហត្ថលេខាលើលិខិតប្ដូរសារ និងឯកសារពាក់ព័ន្ធ ស្តីពីការផ្តល់ឥណទានសម្បទានប្រាក់យ៉េនរបស់រដ្ឋាភិបាលជប៉ុន ដែលមានទឹកប្រាក់សរុបចំនួន ១៧.៧៧៦ លានយ៉េន​ (ប្រមាណ១១៩ លានដុល្លារអាម៉េរិក) សម្រាប់អនុវត្តគម្រោងអភិវឌ្ឍន៍ចំណតផែកុងតឺន័រថ្មី កំពង់ផែស្វយ័តក្រុងព្រះសីហនុ (កញ្ចប់ឥណទានទី២)។

គម្រោងនេះមានគោលបំណងធ្វើឱ្យប្រសើរឡើងនូវសមត្ថភាពដោះស្រាយទំនិញកុងតឺន័រនៅកំពង់ផែក្រុងព្រះសីហនុ ដែលជាកំពង់ផែទឹកជ្រៅអន្តរជាតិតែមួយគត់របស់កម្ពុជា ក៏ដូចជាបង្កើនប្រសិទ្ធភាពប្រព័ន្ធភស្តុភារកម្មរបស់កម្ពុជា តាមរយៈការអភិវឌ្ឍចំណតផែកុងតឺន័រថ្មី និងហេដ្ឋារចនាសម្ព័ន្ធពាក់ព័ន្ធនានា។

ជំនួយហិរញ្ញវត្ថុជាបន្តបន្ទាប់នេះបង្ហាញពីការប្តេជ្ញាចិត្តយ៉ាងមុតមាំរបស់ប្រទេសជប៉ុន ក្នុងការលើកកម្ពស់វិស័យពាណិជ្ជកម្ម និងការអភិវឌ្ឍសង្គម-សេដ្ឋកិច្ចរបស់កម្ពុជា ក៏ដូចជាពង្រឹងបន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ជប៉ុន។

គួរបញ្ជាក់ផងដែរថា សម្រាប់ត្រីមាសទី១ ឆ្នាំ២០២៦នេះ បរិមាណទំនិញឆ្លងកាត់កំពង់ផែ ក្រុងព្រះសីហនុ  មានការកើន​ឡើង​យ៉ាងគំហុកពោលគឺសម្រេចបានកំណើន ៣៨% ធៀបទៅនឹងរយៈពេល​ដូចគ្នា​ឆ្នាំ​២០២៥។ ជាមួយគ្នានេះ កំពង់ផែក៏បានគិតគូរអំពីវិធានការដោះស្រាយបន្ទាន់ថ្មីៗ​បន្ថែមទៀត ដើម្បីឆ្លើយតបទៅនឹងកំណើនកុងតឺន័រសម្រាប់ឆ្នាំ២០២៦ ក្នុងពេល​ដែល​សមត្ថភាពផែនៅមានកម្រិតផងដែរ។

ការណ៍នេះ ពិតជាបានបង្ហាញឱ្យឃើញថា ក្រោយ​​ពីការបង្កើនសមត្ថភាពផែនៅក្នុងឆ្នាំ២០២៤ ឱ្យឡើងដល់ ១លានTEUs បរិមាណកុងតឺន័រឆ្លងកាត់ជាក់ស្ដែងបានកើនលើសពី ១លានTEUs ក្នុងមួយឆ្នាំ និង​នៅក្នុងឆ្នាំ២០២៥ នៅពេលសមត្ថភាពផែបានបង្កើនឡើងដល់ ១,៣លានTEUs បរិមាណកុងតឺន័រឆ្លងកាត់ជាក់ស្ដែងបានកើនដល់ជាង ១,៣៤លាន TEUs។

តាមរយៈកំណើននេះ កំពង់ផែស្វយ័តក្រុងព្រះសីហនុ បានចូលរួមកាត់បន្ថយ​ថ្លៃដឹក​ជញ្ជូនសរុបតាមផ្លូវសមុទ្រដោយហេតុថា ចំណែកភាគច្រើននៃការដឹកជញ្ជូន ឬពាណិជ្ជ​កម្ម​អន្ដរជាតិជាង ៨០% ត្រូវបានដឹកជញ្ជូនតាមសមុទ្រដែលជាមធ្យោបាយដឹក​ជញ្ជូន​មា​នតម្លៃថោកជាងគេបើធៀបនឹងមធ្យោបាយដឹកជញ្ជូនផ្សេងៗទៀត។

បន្ថែមពីនេះ ដើម្បីរួមចំណែកគាំទ្រនិងជំរុញកំណើនសេដ្ឋកិច្ចជាតិ កំពង់ផែស្វយ័តក្រុង​ព្រះសីហនុ បាននិងកំពុងបន្តអភិវឌ្ឍនិងពង្រីកសមត្ថភាពរបស់ខ្លួនតាមរយៈការ​សាង​សង់ចំណតផែកុងតឺន័រទឹកជ្រៅថ្មីចំនួន ៣ជំហាន ក្រោមក្របខណ្ឌនៃកិច្ចសហប្រតិ​បត្តិ​ការ ​និងការជួយជ្រោមជ្រែងពីរដ្ឋាភិបាលនៃប្រទេសជប៉ុន។ ការអភិវឌ្ឍទាំង៣ជំហាន​ បានប្រព្រឹត្តតាមដំណាក់កាលដូចខាងក្រោម៖

១៖ គម្រោងសាងសង់ចំណតផែកុងតឺន័រថ្មី ជំហានទី១ មានប្រវែង ៣៥០ម៉ែត្រ ជម្រៅ​ទឹក ១៤,៥ម៉ែត្រ ដែលនឹងអនុញ្ញាតឱ្យនាវាក្នុងតំបន់អាស៊ីប៉ាស៊ីហ្វិកប្រមាណ ៩៣% ចូល​ចតបាន និងជួយកាត់បន្ថយតម្លៃដឹកជញ្ជូនតាមសមុទ្រប្រមាណ ២០០ដុល្លារអា​ម៉េរិក/TEU។ គិតត្រឹមខែមេសា ឆ្នាំ២០២៦ គម្រោងទាំងមូលសម្រេចវឌ្ឍនភាពបាន ៦៦,៧% និងគ្រោងបញ្ចប់ការសាងសង់នៅដើមឆ្នាំ២០២៧ខាងមុខ ដែល​នឹងជួយ​បង្កើន​សមត្ថភាពផែដល់ ១ ៤៥០ ០០០ TEUs/ឆ្នាំ។

២៖ គម្រោងពង្រីកចំណតផែកុងតឺន័រទឹកជ្រៅថ្មី ជំហានទី២ មានប្រវែង ៤០០ម៉ែត្រ ជម្រៅ​ទឹក ១៦,៥ម៉ែត្រ ដែលនឹងអនុញ្ញាតឱ្យនាវាមានផ្លូវរត់ក្នុងតំបន់​ឥណ្ឌូប៉ាស៊ីហ្វិក​ចូលចតបាន។ គម្រោងនេះ គ្រោងនឹងចាប់ផ្តើមអនុវត្តការសាងសង់នៅក្នុង​អំឡុង​ខែ​កញ្ញា ឆ្នាំ២០២៦ ខាងមុខនេះ និងដាក់ឱ្យប្រើប្រាស់នៅក្នុងឆ្នាំ២០២៩ ដែលនឹង​ជួយ​បង្កើនសមត្ថភាពផដល់២ ០២០ ០០០ TEUs/ឆ្នាំ។

៣៖ គម្រោងពង្រីកចំណតផែកុងតឺន័រទឹកជ្រៅថ្មី ជំហានទី៣ មានប្រវែង៤៣០ម៉ែត្រ ជម្រៅ​ទឹក ១៧,៥ម៉ែត្រ ដែលអនុញ្ញាតឱ្យនាវាមានផ្លូវដឹកជញ្ជូនក្នុងពិភពលោកទៅមក​កំពង់ផែស្វយ័តក្រុងព្រះសីហនុបានដោយផ្ទាល់។ គម្រោងនេះ បច្ចុប្បន្នកំពុង​រៀបចំឯក​សារ​ដេញថ្លៃ និងចាប់ផ្តើមអនុវត្តការសាងសង់នៅដើមឆ្នាំ២០២៧ ខាងមុខ និងគ្រោង​ដាក់​ឱ្យប្រើប្រាស់នៅក្នុងឆ្នាំ២០៣០ ដែលនឹងជួយបង្កើនសមត្ថភាពផៃដល់ ២ ៦៣៧ ០០០ TEUs/ឆ្នាំ។

ទន្ទឹមគ្នានេះ កំពង់ផែក៏បានសាងសង់ប្រព័ន្ធគ្រប់គ្រងចរាចរនាវា ដែលជាជំនួយឥត​សំណង​​ពីរដ្ឋាភិបាល​ជប៉ុន ដែលបានផ្តល់ជូនកំពង់ផែនៅដើមឆ្នាំ២០២៦។ ប្រព័ន្ធនេះ នឹងត្រូវដាក់ឱ្យប្រើប្រាស់នៅដើមឆ្នាំ២០២៧ ដែលអាចគ្រប់គ្រងនាវាធ្វើនាវាចរ ក្នុងរង្វង់ ៦០ Miles ឬ ប្រមាណ ៩៧ គ.ម ព្រមទាំងសម្រួលចរាចរនាវា ធានាសុវត្ថិភាព និងជួយសង្គ្រោះនាវាដែលជួប​ឧបទ្ទវហេតុផ្សេងៗ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ជប៉ុនផ្តល់ឥណទានប្រមាណ ១១៩ លានដុល្លារ សម្រាប់អនុវត្តគម្រោងអភិវឌ្ឍន៍ចំណតផែកុងតឺន័រថ្មី កំពង់ផែស្វយ័តក្រុងព្រះសីហនុ appeared first on Millions times.

នេះជាការបង្ហាញឱ្យដឹងក្នុងជំនួបសម្តែងការគួសមរវាងឯកឧត្ដមឃួង ស្រេង អភិបាលនៃ     គណៈអភិបាលរាជធានីភ្នំពេញ និងលោកស្រី សាន់ឌ្រីន ប៊ូឆ័រ (Sandrine BOUCHER) នាយិកាទីភ្នាក់ងារបារាំងសម្រាប់អភិវឌ្ឍន៍ AFD ប្រចាំប្រទេសកម្ពុជា នារសៀលថ្ងៃទី០៦​ ខែកក្កដា​ ឆ្នាំ២០២៦នេះ នៅសាលារាជធានីភ្នំពេញ។

ឯកឧត្ដម ឃួង ស្រេង ក្នុងឱកាសនោះបានលើកឡើងពីភូមិសាស្ត្ររាជធានីភ្នំពេញ ដែលមានប្រជាពលរដ្ឋរស់នៅចេញចូលទាំងការស្នាក់នៅប្រមាណជា៣លាននាក់។ ទន្ទឹមនិងកំណើនប្រជាពលរដ្ឋនិងលំនៅដ្ឋានកើនឡើង បានធ្វើឱ្យរាជធានីភ្នំពេញប្រឈមនឹងបញ្ហាសំណល់រាវដែលទាមទារឱ្យមានការដោះស្រាយ។ ពាក់ព័ន្ធនឹងបញ្ហានេះ AFD ប្រចាំប្រទេសកម្ពុជាបានជួយរាជធានីភ្នំពេញជាច្រើន ទាំងអគ្គិសនី ទឹកស្អាតផងដែរ។

ឯកឧត្ដម ឃួង ស្រេង បានបន្តថា នៅរាជធានីភ្នំពេញ ប្រជាពលរដ្ឋមានទឹកស្អាតប្រើប្រាស់ប្រមាណ ៩០% ហើយ។ ដោយមានកម្ចីពី AFD​ យើងបានពង្រីកស្ថានីយផលិតទឹកស្អាតប្រើប្រាស់ជាបន្តបន្ទាប់ យើងសង្ឃឹមថានៅឆ្នាំ២០៣០ នៅរាជធានីភ្នំពេញ នឹងមានទឹកស្អាតប្រើប្រាស់គ្រប់គ្រាន់។ ក្រោមជំនួយពីទីក្រុងប៉ារីស និងជៃកា (JICA) របស់ជប៉ុន រាជធានីភ្នំពេញបានដោះស្រាយបញ្ហាប្រឈមនិងសំណល់រាវ បានល្អប្រសើរ។ ជាងនេះទៅទៀតសម្ដេចបវរធិបតីហ៊ុនម៉ាណែតបានបង្កើតនូវគម្រោងឥណទានមួយ ដោយប្រើប្រាស់ថវិកាប្រមាណជាង១០០លានដុល្លារ ដើម្បីដោះស្រាយបញ្ចៀសនូវការលិចលង់ទៀតផង។

ឯកឧត្ដម ឃួង ស្រេង ក្នុងឱកាសនោះ ក៏បានថ្លែងនូវការអរគុណចំពោះ AFD ដែលមានគម្រោងជួយកសាងអាងប្រព្រឹត្តកម្មទឹកកខ្វក់មួយនៅខាងជើងរាជធានីភ្នំពេញ។

លោកស្រី សាន់ឌ្រីន ប៊ូឆ័រ នាយិកាទីភ្នាក់ងារបារាំងសម្រាប់អភិវឌ្ឍន៍ AFD បានមានប្រសាសន៍ថា៖ AFD បានជួយរាជធានីភ្នំពេញប្រមាណ ៣០ ឆ្នាំហើយ ទាំងហេដ្ឋារចនាសម្ព័ន្ធ និងនវានុវត្តន៍ ដោយការផ្តល់សេវាតំបូងគេនៅរាជធានីភ្នំពេញ គឺទឹកស្អាតនិងអគ្គិសនី។ បន្ថែមពីនេះ AFD​ នឹងជួយកសាង   សមត្ថភាពក្មេងជំនាន់ក្រោយបន្ថែមទៀត ដូចជាការកសាងសាលាបណ្តុះបណ្តាលវិជ្ជាជីវៈ ជួយបណ្តុះបណ្តាល ជំនាញទឹកស្អាត ការជួយរៀបចំហេដ្ឋារចនាសម្ព័ន្ធ និងនវានុវត្តន៍ក្នុងកម្រិតខ្ពស់។

លោកស្រី សាន់ឌ្រីន ប៊ូឆ័រ បានបញ្ជាក់ថា អ្វីដែល AFD​ និងរដ្ឋបាលរាជធានីភ្នំពេញ កំពុងធ្វើការសិក្សាលើគម្រោងសាងសង់ អាងប្រព្រឹត្តកម្មទឹកកខ្វក់ នៅភាគខាងជើងរាជធានីភ្នំពេញ គម្រោងនេះនឹងឃើញពន្លឺនៅពេលឆាប់ៗនេះ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ទីភ្នាក់ងារបារាំង AFD នឹងផ្តល់ឥណទាន សាងសង់អាងប្រព្រឹត្តកម្មទឹកកខ្វក់ នៅភាគខាងជើងរាជធានីភ្នំពេញ appeared first on Millions times.

យោងតាមសេចក្តីប្រកាសព័ត៌មានរបស់ធនាគារពិភពលោកនៅថ្ងៃទី២៧ ខែមិថនា ឆ្នាំ២០២៦ បានឱ្យដឹងថា គម្រោងនេះនឹងជួយកម្ពុជាក្នុង​ការ​ធ្វើ​អន្តរកាលឆ្ពោះទៅសេដ្ឋកិច្ចបៃតង តាមរយៈការគាំទ្រ​ហិរញ្ញប្បទានជាឥណទាន​ចំនួន ១១០ លានដុល្លារអាម៉េរិក ពីសមាគមអភិវឌ្ឍន៍អន្តរជាតិរបស់ធនាគារពិភពលោក រួមជាមួយជំនួយឥតសំណង ៥ លានដុល្លារអាម៉េរិក ពីកម្មវិធីជំនួយគ្រប់គ្រងវិស័យ​ថាមពល (ESMAP)។

ការវិនិយោគនេះ នឹង​ផ្តល់​​​​អត្ថប្រយោជន៍ដល់អ្នកប្រើប្រាស់អគ្គិសនី, ស្ថាប័នសាធារណៈ, សហគ្រាសឧស្សាហកម្ម, អ្នកអភិវឌ្ឍន៍ថាមពលកកើតឡើងវិញ, អ្នកផ្តល់សេវាកម្ម, និងអ្នកផ្គត់ផ្គង់ឧបករណ៍ប្រសិទ្ធភាពថាមពល ដោយបង្កើតការងារកាន់តែច្រើន និងប្រសើរជាងមុននៅក្នុងវិស័យនេះ។

លោកស្រី Tania Meyer ប្រធាន​គ្រប់គ្រងប្រចាំប្រទេសរបស់ធនាគារពិភពលោក មានប្រសាសន៍ថា៖ «កម្ពុជា​ទទួលបានការតភ្ជាប់បណ្តាញប្រើប្រាស់អគ្គីសនីគួរឲ្យកត់សម្គាល់។ ដោយការពង្រឹងបណ្តាញអគ្គិសនី និងជួយឲ្យអាជីវកម្មប្រើប្រាស់ថាមពលឲ្យមានប្រសិទ្ធភាពប្រសើរឡើង គម្រោងនេះនឹងជួយគាំទ្រការប្រែប្រួលទៅរកថាមពលស្អាត ដែលនឹងជួយការពារសេដ្ឋកិច្ចពីភាពប្រែប្រួលតម្លៃថាមពលនៅលើពិភពលោក ជំរុញឱ្យកំណើន បង្កើនសមត្ថភាពប្រកួតប្រជែង និងបង្កើតការងារដែលមានគុណភាព។

តម្រូវការអគ្គិសនីរបស់ប្រទេសកម្ពុជាបានកើនឡើងយ៉ាងឆាប់រហ័ស ដោយសារតែឧស្សាហូបនីយកម្ម នគរូបនីយកម្ម និងស្តង់ដាជីវភាពកើនឡើង។ បច្ចុប្បន្ន លទ្ធភាពទទួលបានអគ្គិសនីបានគ្រប​ដណ្តប់​ស្ទើរពេញផ្ទៃ​ប្រទេសហើយ​​ ប៉ុន្តែ​បញ្ហាប្រឈមថាមពលបន្ទាប់របស់កម្ពុជា គឺការធ្វើឱ្យបណ្តាញថាមពលកាន់តែអាចទុកចិត្តបាន មានតម្លៃសមរម្យ ធន់ និងកាន់តែស្អាត។ គម្រោងនេះគឺជាដំណាក់កាលទី ៧ នៃ អភិក្រម​កម្មវិធីពហុដំណាក់កាលបង្កើនល្បឿនអន្តរកាលថាមពលប្រកបដោយនិរន្តរភាព (MPA) នៅក្នុងតំបន់អាស៊ីបូព៌ា និងប៉ាស៊ីហ្វិក។

ឯកឧត្តម កែវ រតនៈ រដ្ឋមន្ត្រីក្រសួង​រ៉ែ និង​ថាមពល មានប្រសាសន៍ថា៖ «ឈរលើគោលការណ៍ ថាមពល​ស្អាត, មានតម្លៃសមរម្យ, អាចទុកចិត្តបាន និង​សមធម៌ (CARE) កម្ពុជា​មាន​ការ​ប្តេជ្ញាចិត្ត​ក្នុង​ការ​ធ្វើ​អន្តរកាល​ថាមពល​ដែល​មាន​ភាពត្រឹមត្រូវ ដែល​ជួយ​ដល់​ប្រជាជន, អាជីវកម្ម និង​ការអភិវឌ្ឍជាតិ​យូរអង្វែង។» 

អត្ថបទ៖ ប៊ី

តាមដានជាមួយយើង៖ Million Times

second...

x

The post World Bank សម្រេចអនុម័តឥណទាន​ចំនួន ១១០ លានដុល្លារ សម្រាប់គម្រោងអន្តរកាលថាមពលប្រកបដោយនិរន្តភាពនៅកម្ពុជា appeared first on Millions times.

ការចុះហត្ថលេខាលើលិខិតនេះ ត្រូវបានធ្វើឡើងដោយ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនៃកម្ពុជា និងឯកឧត្តម UENO Atsushi ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា នៅថ្ងៃទី២២ ខែមិថុនា ឆ្នាំ២០២៦។

ក្រសួងការបរទេសកម្ពុជា បានឱ្យដឹងថា គម្រោងនេះមានគោលបំណងលើកកម្ពស់ផលិតភាពកសិកម្មនៅតំបន់ជនបទ និងកាត់បន្ថយការខូចខាតដោយគ្រោះទឹកជំនន់ តាមរយៈការស្តារនិងកែលម្អប្រព័ន្ធស្រោចស្រព និងប្រព័ន្ធរំដោះទឹកដែលមានស្រាប់ នៅច្រករបៀងភាគនិរតីនៃរាជធានីភ្នំពេញ។

ការបន្តផ្តល់ជំនួយហិរញ្ញវត្ថុនេះឆ្លុះបញ្ចាំងពីការប្តេជ្ញាចិត្តដ៏មុតមាំរបស់ជប៉ុន ក្នុងការលើកកម្ពស់ការ អភិវឌ្ឍសង្គម-សេដ្ឋកិច្ចរបស់កម្ពុជា និងភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ជប៉ុន។

លោកបណ្ឌិត ស៊ឺន សំ អ្នកវិភាគគោលនយោបាយនៃរាជបណ្ឌិត្យសភាកម្ពុជា បានឱ្យដឹងថា កម្ពុជា និងជប៉ុន មានទំនាក់ទំនងល្អជាមួយគ្នាលើគ្រប់វិស័យ ពិសេសដូចជា វិស័យសេដ្ឋកិច្ច វិនិយោគ ពាណិជ្ជកម្ម និងអប់រំជាដើម។

លោកបណ្ឌិត បានថ្លែងដូច្នេះថា ជប៉ុនមិនត្រឹមតែជាដៃគូររកស៊ីសំខាន់របស់កម្ពុជានោះទេ ប៉ុន្តែអ្នកផ្តល់ជំនួយដ៏សំខាន់សម្រាប់កម្ពុជា ក្នុងការអភិវឌ្ឍន៍ប្រទេសជាតិផងដែរ៕

តាមដានជាមួយយើង៖ Million Times

អត្ថបទ៖ ប៊ី

second...

x

The post ជប៉ុនផ្តល់ឥណទានជាង ១៦០ លានដុល្លារ ដើម្បីស្តារឡើងវិញប្រព័ន្ធស្រោចស្រព និងរំដោះទឹកនៅភ្នំពេញ appeared first on Millions times.

តាមដានជាមួយយើង៖ Million Times

គ្រឹះស្ថានមីក្រូហិរញ្ញវត្ថុ​នោះ មានឈ្មោះថា អិលអូអិលស៊ី​ ដោយបានបើកសម្ពោធដំណើរការជាផ្លូវការនូវ “ឥណទានមាសកើនទ្រព្យ” ដែលជាផលិតផលឥណទានថ្មី ដំបូងគេបង្អស់ក្នុងទីផ្សារធនាគារ និងហិរញ្ញវត្ថុនៅកម្ពុជា នាថ្ងៃទី២ ខែមីនា ឆ្នាំ២០២៦នេះ។

នៅក្នុងឱកាសនោះ លោក សុខ វឿន ប្រធាននាយកប្រតិបត្តិ អិលអូអិលស៊ី បានឱ្យដឹងថា ការបង្កើតឥណទានមាសកើនទ្រព្យនេះឡើង គឺក្នុងគោលបំណងផ្តល់ជូននូវដំណោះស្រាយហិរញ្ញវត្ថុដ៏ល្អបំផុតជូនដល់អតិថិជន ដែលមានតម្រូវការសាច់ប្រាក់បន្ទាន់ ដោយពួកគាត់អាចប្រើប្រាស់គ្រឿងមាសធ្វើជាទ្រព្យធានា ក្នុងការស្នើឥណទានពីអិលអូអិលស៊ី បានរហូតដល់ ៧០% នៃតម្លៃមាស។

លោកថា ឥណទានមាសកើនទ្រព្យនេះ ធ្វើឡើងប្រកបដោយទំនុកចិត្ត និងសុវត្ថិភាពខ្ពស់ ជាមួយនឹងការអនុម័តរហ័ស អត្រាការប្រាក់ល្អបំផុត ព្រមទាំងផ្តល់ជម្រើសក្នុងការបង់សងត្រឡប់តាមតម្រូវការរបស់អតិថិជន។

បើតាម អិលអូអិលស៊ី ឥណទានមាសកើនទ្រព្យ គឺអតិថិជនទទួលបានសាច់ប្រាក់រហ័ស ការវាយតម្លៃមាសប្រកបដោយតម្លាភាព ផ្អែកលើតម្លៃទីផ្សារប្រចាំថ្ងៃ និងអាចស្នើសុំបន្ថែមសាច់ប្រាក់ ដោយផ្អែកលើតម្លៃទីផ្សារមាសជាក់ស្តែង ព្រមទាំងអាចបង់ផ្តាច់ ឬបង់រំលស់ដើម មុនកាលកំណត់ពេលណាក៏បាន ដោយមិនមានពិន័យឡើយ។

ជាមួយគ្នានេះ អិលអូអិលស៊ី សង្ឃឹម និងជឿជាក់ថា ឥណទានមាសកើនទ្រព្យ នេះនឹងក្លាយជាជម្រើសក្នុងការបំពេញតម្រូវការហិរញ្ញវត្ថុឆាប់រហ័ស ងាយស្រួល និងពោរពេញដោយទំនុកចិត្តជូនអតិថិជនគ្រប់រូ​ប៕

អត្ថបទ៖ វីរៈ រូបភាព៖ អិលអូអិលស៊ី

second...

x

The post ផលិតផលឥណទានថ្មី អាចយកគ្រឿងមាសធ្វើជាទ្រព្យធានាស្នើកម្ចីបានរហូតដល់ ៧០% appeared first on Millions times.

ការដាក់សម្ពោធជាផ្លូវការនេះ ត្រូវបានធ្វើឡើង កាលពីថ្ងៃទី២៧ ខែមករា ឆ្នាំ២០២៦ នាឱកាសក្រសួងសេដ្ឋកិច្ច និងហិរញ្ញវត្ថុ និងសាជីវកម្មធានាឥណទានកម្ពុជា (CGCC) បានសហការរៀបចំខួប ៥ ឆ្នាំ របស់ CGCC ក្រោមប្រធានបទ “៥ឆ្នាំ នៃការធានាឥណទានជាយុទ្ធសាស្រ្ដ សម្រាប់ការអភិវឌ្ឍសេដ្ឋកិច្ចប្រកបដោយបរិយាបន្ន” ក្រោមអធិបតីភាពដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ។

នៅក្នុងពិធីនេះ ឯកឧត្តមអគ្គបណ្ឌិតសភាចារ្យ បានដាក់សម្ពោធជាផ្លូវការនូវ “គម្រោងធានាឥណទានឯកត្តឥណទានពិសេស” ដែលត្រូវបានបង្កើតឡើង ដើម្បីគាំទ្រគោលនយោបាយ, យុទ្ធសាស្រ្ដ, និងវិស័យអាទិភាពរបស់រាជរដ្ឋាភិបាល ដូចជា វិស័យស្រូវអង្ករ, ស្វាយចន្ទី, កម្មន្ដសាល, ការអភិវឌ្ឍលំនៅឋានសង្គម និងលំនៅឋានតម្លៃសមរម្យ ។ល។

តាមដានជាមួយយើង៖ Million Times

ឯកឧត្តម អូន ព័ន្ធមុនីរ័ត្ន បានថ្លែងថា គម្រោងនេះ អនុញ្ញាតឱ្យម្ចាស់អាជីវកម្ម អាចដាក់ពាក្យបង្ហាញចំណាប់អារម្មណ៍ មក CGCC ដោយផ្ទាល់ ក្នុងការទទួលបានការធានាឥណទានលើកម្ចីរហូតដល់ ១០ លានដុល្លារ ក្នុងមួយកម្ចី  សម្រាប់​ការប្រើប្រាស់ជាទុនបង្វិល និងពង្រីកអាជីវកម្ម និងអនុញ្ញាតឱ្យ CGCC ចូលរួមវាយតម្លៃលទ្ធភាពសងរបស់អ្នកខ្ចី រួមជាមួយគ្រឹះស្ថានហិរញ្ញវត្ថុចូលរួម ដើម្បីធានាបាននូវប្រសិទ្ធភាពនៃការផ្តល់ហិរញ្ញប្បទាន។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានលើកឡើងថា៖ “ការបង្កើត CGCC នេះឡើង គឺជាការគិតគូរជាយុទ្ធសាស្ត្រ ដ៏ល្អិតល្អន់ និង ដ៏ត្រឹមត្រូវ របស់រាជរដ្ឋាភិបាល, ក្នុងនីតិកាលទី ៦ នៃរដ្ឋសភា, ក្រោមការដឹកនាំ ប្រកបដោយគតិបណ្ឌិតដ៏ខ្ពង់ខ្ពស់ និង ចក្ខុវិស័យវែងឆ្ងាយ របស់ សម្តេចអគ្គមហាសេនាបតីតេជោ ហ៊ុន សែន, អតីតនាយករដ្ឋមន្រ្តី និង បច្ចុប្បន្នជា ប្រធានព្រឹទ្ធសភា, ក្នុងការអនុវត្តវិធានការអន្តរាគមន៍ តាមរយៈយន្តការធានាឥណទាន, សំដៅស្តារ និង ជំរុញកំណើនសេដ្ឋកិច្ច,​​​ ជាពិសេស ក្នុងអំឡុងវិបត្តិនៃជំងឺកូវីដ-១៩ ជាសកល, ដោយផ្អែកលើឧត្តមានុវត្តជាអន្តរជាតិ ក៏ដូចជា ការវិវត្តនៃបរិបទសង្គម-សេដ្ឋកិច្ចជាក់ស្តែង​ របស់កម្ពុជា។

យន្តការធានាឥណទាន បានចូលរួមចំណែកយ៉ាងសំខាន់ ក្នុងការអនុវត្តគោល-នយោបាយគន្លឹះនានា របស់រាជរដ្ឋាភិបាល រួមមាន៖ ទី១. ការលើកកម្ពស់បរិយាបន្នហិរញ្ញវត្ថុ, ជាពិសេស សម្រាប់សហគ្រាសធុន តូច និង មធ្យម, តាមរយៈ ការបង្កើនលទ្ធភាពទទួលបាននូវហិរញ្ញប្បទាន; ទី២. ការពង្រឹងការអភិវឌ្ឍវិស័យឯកជន តាមរយៈ ការគាំទ្រឲ្យមានការវិនិយោគ, ការពង្រីកប្រតិបត្តិការអាជីវកម្ម, និង ការបង្កើតការងារបន្ថែម ឲ្យបាន កាន់តែច្រើន, ជាពិសេស សម្រាប់យុវជន; និង ទី៣. ការពង្រឹងភាពធន់នៃសេដ្ឋកិច្ច តាមរយៈ ការបង្កើនទំនុកចិត្តក្នុងទីផ្សារ និង ការរួមគ្នាគ្រប់គ្រងហានិភ័យ, ជាពិសេស ក្នុងអំឡុងវិបត្តិ ឬ បញ្ហាប្រឈមពីកត្តាខាងក្រៅ, ដែលមិនចំណុះនឹងការគ្រប់គ្រងរបស់កម្ពុជា។

CGCC គឺជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ ដែលមានបេសកកម្មចម្បងក្នុងការផ្ដល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និងរួមចំណែក ដល់កំណើនសេដ្ឋកិច្ច។

នៅក្នុងរយៈពេល ៥ឆ្នាំ កន្លងមកនេះ CGCC បានដាក់ឱ្យដំណើរការការធានាឥណទាន ឯកត្តឥណទាន ចំនួន ៧ គម្រោង, ការធានាឥណទានជាកញ្ចប់ ចំនួន ១៧ កិច្ចព្រមព្រៀង,  ការធានាលើ​ការបោះផ្សាយ​សញ្ញាបណ្ណរបស់ក្រុមហ៊ុនចំនួន ១ , និងការធានាឥណទានបោះដុំចំនួន ៣ កិច្ចព្រមព្រៀង ព្រមទាំងបានដាក់ឱ្យដំណើរការកម្មវិធីកសាងសមត្ថភាពសហគ្រិនរបស់ CGCC (EPIC)។ តាមរយៈគម្រោងទាំងអស់នេះ CGCC បាន​អនុម័តការធានាឥណទាន ចំនួន ៩.៥៥៦ គណនី លើកម្ចី ប្រមាណ ៥២១,២៨ លានដុល្លារ គិតត្រឹមថ្ងៃទី៣១ ខែធ្នូ ឆ្នាំ២០២៥៕

អត្ថបទ៖ ប៊ី

second...

x

The post ម្ចាស់អាជីវកម្ម អាចទទួលបានការធានាឥណទានលើកម្ចីរហូតដល់ ១០ លានដុល្លារពី “គម្រោងធានាឥណទានឯកត្តឥណទានពិសេស” appeared first on Millions times.