អ្នកឧកញ៉ា លាង ឃុន Archives - Millions times

ថ្ងៃភ្ជាប់ពាក្យចៅប្រុសម្នាក់ទៀត សេដ្ឋិនី ភាព ហៀក ញញឹមស្រស់ស្រាយពេលកូនចៅមកជួបជុំគ្នា

Vin Chang — Fri, 02 Jan 2026 06:50:13 +0000

ស្ថាបនិកក្រុមហ៊ុន ជីប ម៉ុង គ្រុប លោកអ្នកឧកញ៉ា ភាព ហៀក បានបង្ហាញទឹកមុខស្រស់បំព្រង នាថ្ងៃភ្ជាប់ពាក្យចៅប្រុសឈ្មោះ អ៊ឹង ពិសិដ្ឋ ដែលជាកូនប្រុសរបស់លោកអ្នកឧកញ៉ា លាង ឃុន។

តាមដានជាមួយយើង៖ Million Times

កូនកំលោះ អ៊ឹង ពិសិដ្ឋ និងកូនក្រមុំ សុខ ឡារីតា ពិតជាស្រស់សង្ហា និងស្រស់សោភា ស័ក្តិសមជាគូនឹងគ្នាពិតៗទាំងរូបសម្បត្តិ ចរិយាសម្បត្តិ និងចំណេះដឹង។ អ្នកទាំង ២ បានភ្ជាប់ពាក្យកាលពីថ្ងៃ ២៣ ខែធ្នូ ឆ្នាំ ២០២៥ កន្លងទៅ

ថ្ងៃសិរីសួស្ដី និងជ័យមង្គលក្នុងក្រុមគ្រួសារយ៉ាងសប្បាយរីករាយ ក៏ជាពេលវេលាជួបជុំកូនចៅទាំងអស់គ្នាផងដែរ។ មិនថាជាកូនកំលោះ និងកូនក្រមុំប៉ុណ្ណោះទេ ដែលបានរៀបចំតុបតែងខ្លួនយ៉ាងស្រស់ឆើតឆាយ សូម្បីតែភ្ញៀវដែលចូលរួមក៏សុទ្ធសឹងតែរៀបរយក្នុងស្លៀកបំពាក់បែបប្រពៃណី និងសម័យ។

ក្នុងនាមជាជីដូនម្នាក់ ពិតជារំភើប និងឃើញចៅៗរកឃើញគូគ្រងបានល្អ និងស្រលាញ់ ថែរក្សាគ្នា។ រូបភាព១សន្លឹកដែលមានទាំងកូនប្រុសស្រី និងចៅបង្កើតជាច្រើនឈរជុំអម ស្ថាបនិកក្រុមហ៊ុន ជីប ម៉ុង គ្រុប លោកអ្នកឧកញ៉ា ភាព ហៀក បង្ហាញពីភាពសប្បាយរីករាយ ព្រមទាំងសុភមង្គលក្នុងគ្រួសារធំមួយ។

មិនត្រឹមតែមានភ្ញៀវកិត្តិយសជាអ្នកជំនួញធំៗលំដាប់ប្រទេសប៉ុណ្ណោះទេ អ្នកមុខអ្នកការ មន្រ្តីរាជការជើងចាស់ជាច្រើនរូប ក៏បានបង្ហាញវត្តមានជាចាស់ទុំក្នុងកម្មវិធីនោះផងដែរ៕

អត្ថបទ៖ ឆដា, រូបភាព៖ one memory

The post ថ្ងៃភ្ជាប់ពាក្យចៅប្រុសម្នាក់ទៀត សេដ្ឋិនី ភាព ហៀក ញញឹមស្រស់ស្រាយពេលកូនចៅមកជួបជុំគ្នា appeared first on Millions times.

ដឹងអត់ថាក្រុមហ៊ុនណាខ្លះ បានចុះ MOU បង្កើត«មន្ទីរពេទ្យកម្ពុជា» ដ៏ធំ និងទំនើបនោះ?

Vin Chang — Mon, 21 Apr 2025 09:08:22 +0000

នៅថ្ងៃនេះផ្ទុះកក្រើកព័ត៌មានដែលមហាសេដ្ឋីស្រុកខ្មែរច្រើនរូប បានចុះអនុស្សរណៈយោគយល់គ្នាបង្កើត «មន្ទីរពេទ្យកម្ពុជា» ដ៏ធំ និងទំនើប។ មានក្រុមហ៊ុនធំៗជិត ១០ ឯណោះបានរួមគ្នា បោះទុនដល់ទៅជាង ៣០០ លានដុល្លារ សាងសង់មន្ទីរពេទ្យកម្ពុជា។ ក្នុងនោះ៖

តាមដានជាមួយយើង៖ Million Times

១. អ្នកឧកញ៉ា គិត ម៉េង ប្រធានក្រុមប្រឹក្សាភិបាល និងជាអគ្គនាយកប្រតិបត្តិ ក្រុមហ៊ុន រ៉ូយ៉ាល់ គ្រុប ២៣%

២. លោកអ្នកឧកញ៉ា លាង ឃុន និង អ្នកឧកញ៉ា លាង ម៉េង សហស្ថាបនិកក្រុមហ៊ុន ជីប ម៉ុង ២៣%

៣. អ្នកឧកញ៉ា ថៃ ជាហួត ស្ថាបនិក និងជាប្រធានក្រុមប្រឹក្សាភិបាល និងឧកញ៉ា ហៀង ប៊ុនប៉េង សហស្ថាបនិក និងជាអនុប្រធាន ក្រុមហ៊ុន ប៉េង ហួត គ្រុប ២៣%

៤. អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាល ក្រុមហ៊ុន វើលដ៏ប្រ៊ីដ គ្រុប ១០%

៥. អ្នកឧកញ៉ា ជាម ឃុនណាត ប្រធានក្រុមប្រឹក្សាភិបាល ក្រុមហ៊ុន មេគង្គ លែន ឌីវេឡុបម៉ិន ឯ.ក ៦%

៦. អ្នកឧកញ៉ា ប៊ុន ហៃ ប្រធានក្រុមប្រឹក្សាភិបាល ក្រុមហ៊ុន បុរីភ្នំពេញថ្មី ៥%

៧. អ្នកឧកញ៉ា លី ហុង ប្រធានក្រុមប្រឹក្សាភិបាល ក្រុមហ៊ុន បុរីអង្គរ ផាលេស ៥%

៨. ឧកញ៉ា ថៃ ស៊ាង ប្រធានក្រុមហ៊ុន ធី អេស អិន អ ឌីស្ទ្រីតប្យូសិន ខូ អិលធីឌី ៥%

គោលបំណងនៃការផ្ដួចផ្ដើមគម្រោងសុខាភិបាលនេះ គឺដើម្បីផ្ដល់សេវាវេជ្ជសាស្ត្រលំដាប់ស្តង់ដារពិភពលោកនៅក្នុងស្រុក និងកាត់បន្ថយការទទួលសេវាព្យាបាលនៅប្រទេសដទៃរបស់ប្រជាជនកម្ពុជាផងដែរ។

គួរបញ្ជាក់ថា «មន្ទីរពេទ្យកម្ពុជា» នឹងក្លាយជាបណ្ដុំសេវាវេជ្ជសាស្ត្រដ៏ទូលំទូលាយ រួមបញ្ចូលទាំងសេវាវេជ្ជសាស្ត្រទូទៅ ការវះកាត់ផ្នែកបេះដូង និងសរសៃឈាម ផ្នែកជំងឺមហារីក ផ្នែកជំងឺុមារទូទៅ ផ្នែកឆ្អឹងសន្លាក់ និងសេវាកម្មវេជ្ជសាស្ត្រជាច្រើនផ្សេងទៀត។

ចំណែកការសាងសង់គ្រោងនឹងចាប់ផ្ដើមនៅឆ្នាំ ២០២៦ ខាងមុខ ហើយគ្រោងនឹងសម្ពោធដាក់ឲ្យប្រើប្រាស់ នៅឆ្នាំ ២០២៨៕

អត្ថបទ៖ មេរ៉ា, រូបភាព៖ ផ្ដល់ឲ្យ

The post ដឹងអត់ថាក្រុមហ៊ុនណាខ្លះ បានចុះ MOU បង្កើត«មន្ទីរពេទ្យកម្ពុជា» ដ៏ធំ និងទំនើបនោះ? appeared first on Millions times.

ភរិយាសេដ្ឋី លាង ឃុន ទៅសួរសុខទុក្ខលោកតាបណ្ឌិត កុល ផេង ដល់គេហដ្ឋានផ្ទាល់

Vin Chang — Tue, 11 Feb 2025 09:08:12 +0000

លោកស្រី តែ សុវណ្ណី គឺជាអគ្គនាយិកាពហុពាណិជ្ជកម្ម និងសមាជិកក្រុមប្រឹក្សាភិបាលក្រុមហ៊ុន ជីប ម៉ុង ដែលក្នុងពិភពជំនួញស្គាល់យ៉ាងច្បាស់ថាជាភរិយាសេដ្ឋី លាង ឃុន។

តាមដានជាមួយយើង៖ Million Times

កាលពីថ្ងៃ៣ ខែកុម្ភៈ ឆ្នាំ ២០២៥ សប្ដាហ៍មុន លោកស្រីបានទៅសួរសុខទុក្ខបណ្ឌិត កុល ផេង ជាបិតាស្ថាបនិកសាកលវិទ្យាល័យបញ្ញាសាស្ត្រ និងត្រូវបានចាត់ទុកជាធនធាននុស្សដ៏សំខាន់ក្នុងវិស័យអប់រំ។

អគ្គនាយិកាពហុពាណិជ្ជកម្មនៃក្រុមហ៊ុន ជីប ម៉ុង និងត្រូវជាភរិយាសេដ្ឋី លាង ឃុន បានទៅសួរសុខទុក្ខ លោកតាបណ្ឌិត កុល ផេង នៅគេហដ្ឋានផ្ទាល់តែម្ដង ដែលជាការបង្ហាញពីក្ដីគោរព ហើយក៏បានកោតសរសើរដល់លោកតាបណ្ឌិតក្នុងការរួមចំណែកលើកស្ទួយ អភិវឌ្ឍវិស័យអប់រំនៅកម្ពុជា តាមរយៈការបង្កើតសាកលវិទ្យាល័យបញ្ញាសាស្ត្រកម្ពុជា និងការចែករំលែក ចំណេះដឹង ទាំងជំនាញរឹង និងជំនាញទន់ដល់សិស្សានុសិស្សជំនាន់ក្រោយ។

ក្រោយឃើញលោកស្រី តែ សុវណ្ណី ដែលជាអ្នកជំនួញស្ត្រីជួយលើកស្ទួយវិស័យអប់រំនៅកម្ពុជាអញ្ជើញដល់គេហដ្ឋាន លោកតាបណ្ឌិត កុល ផេង ក៏បានអរគុណចំពោះការចំទៅសួរសុខទុក្ខផ្ទាល់។ ការអញ្ជើញមកសួរសុខទុក្ខរបស់លោកស្រីអគ្គនាយិកាពហុពាណិជ្ជកម្ម ជាការលើកតម្កើងព្រឹទ្ធាចារ្យ ទោះបីជាប់រវល់ភារកិច្ចដ៏មមាញឹកយ៉ាងណាក៏ដោយ។

លើសពីនេះទៅទៀតលោកតា បណ្ឌិតក៏បានលើកឡើងពីសារៈសំខាន់ នៃការចងសាមគ្គីរវាងវិស័យអប់រំ និងវិស័យឯកជនក្នុងការចូលរួមអភិវឌ្ឍប្រទេសជាតិ៕

អត្ថបទ៖ មេរ៉ា,រូបភាព៖ Dr. Kol Pheng

The post ភរិយាសេដ្ឋី លាង ឃុន ទៅសួរសុខទុក្ខលោកតាបណ្ឌិត កុល ផេង ដល់គេហដ្ឋានផ្ទាល់ appeared first on Millions times.

ក្រុមអ្នកមានកំពូលនៅកម្ពុជា-ចិន ជជែកគ្នាពង្រឹងកិច្ចសហប្រតិបត្តិការទំនាក់ទំនង និងផ្គូផ្គងពាណិជ្ជកម្ម

Vin Chang — Mon, 04 Nov 2024 02:41:08 +0000

ថ្មីៗនេះ ថ្នាក់ដឹកនាំសមាគមឧកញ៉ាកម្ពុជា និងសមាគមអភិវឌ្ឍន៍សេដ្ឋកិច្ចចិន-អាស៊ី ដែលបណ្តុំទៅក្រុមហ៊ុនធំៗ អ្នកមានកំពូលៗ បានជជែកពិភាក្សាគ្នាពង្រឹងកិច្ចសហប្រតិបត្តិការដើម្បីផ្សារភ្ជាប់ទំនាក់ទំនងជាមួយគ្នាទៅវិញទៅមក ការផ្គូផ្គងពាណិជ្ជកម្ម ឬការចាប់ដៃគូរវាងសមាជិកនៃភាគីទាំងពីរ។

លោកអ្នកឧកញ៉ា លាង ឃុន អនុប្រធានសមាគមឧកញ៉ាកម្ពុជា បានប្រាប់ប្រតិភូសមាគមអភិវឌ្ឍន៍សេដ្ឋកិច្ចចិន-អាស៊ីអំពីចក្ខុវិស័យក៏ដូចជាបេសកកម្មរបស់សមាគមឧកញ៉ាកម្ពុជាដែលប្រមូលផ្តុំដោយសមាជិកដែលសុទ្ធសឹងជាពាណិជ្ជករដ៏មានសក្តានុពលហើយកំពុងគ្រប់គ្រងអាជីវកម្មលើពហុវិស័យហើយបានរួមចំណែកជាច្រើនក្នុងការអភិវឌ្ឍសេដ្ឋកិច្ចជាតិតាមរយៈការបង្កើតការងារ និងសកម្មភាពពាណិជ្ជកម្មក៏ដូចជាការវិនិយោគផងដែរ។

តាមដានជាមួយយើង៖ Million Times

លោកបានគូសបញ្ជាក់ថា តាមរយៈជំនួបនេះនឹងបើកនូវទំព័រថ្មីសម្រាប់សមាគមទាំងពីរក្នុងការពង្រឹងកិច្ចសហប្រតិបត្តិការដើម្បីផ្សារភ្ជាប់ទំនាក់ទំនងជាមួយគ្នាទៅវិញទៅមកឈានទៅរកការផ្គូផ្គងពាណិជ្ជកម្មឬការចាប់ដៃគូរវាងសមាជិកនៃភាគីទាំងពីរ ខណៈដែលប្រទេសកម្ពុជា និងចិន គឺជាដៃគូដែកថែបនិងជាទីផ្សារដ៏ធំសម្រាប់កម្ពុជា។

លោក Chen Jun អនុប្រធានប្រតិបត្តិ និងជាអគ្គលេខាធិការនៃសមាគមអភិវឌ្ឍន៍សេដ្ឋកិច្ចចិន-អាស៊ី បានលើកឡើងថា ជំនួបពិភាក្សាការងារនេះធ្វើឡើងដើម្បីស្វែងរកកិច្ចសហប្រតិបត្តិការលើផ្នែកធុរកិច្ចរវាងសា្ថប័នទាំងពីរ ខណៈដែលសមាគមអភិវឌ្ឍន៍សេដ្ឋកិច្ចចិន-អាស៊ី មានសមាជិកជាង ២ម៉ឺននាក់ និងមានសាខាជាង ៦០នៅក្នុងប្រទេសចិន និងមានការិយាល័យតំណាងចំនួន ១៥នៅក្នុងទ្វីបអឺរ៉ុប អាស៊ី និងសហរដ្ឋអាម៉េរិក។

លោកបានបញ្ជាក់ថា សម្រាប់ដំណើរទស្សនកិច្ចលើកនេះ មានការចូលរួមពីថ្នាក់ដឹកនាំនៃក្រុមហ៊ុនធំៗដែលកំពុងវិនិយោគលើវិស័យបច្ចេកវិទ្យា និងនវានុវត្តន៍សម្រាប់ប្រើប្រាស់ក្នុងវិស័យកសិកម្ម ដោយវិនិយោគិនទាំងនេះសុទ្ធតែមានចំណាប់អារម្មណ៍លើវិស័យកសិកម្មនៅកម្ពុជាដែលមានសក្តានុពលខ្ពស់ក្នុងវិស័យកសិ-ឧស្សាហកម្មនិងមានផលិតផលកសិកម្មដែលមានសក្តានុពលជាច្រើនដូចជា ស្រូវ កៅស៊ូ ដំឡូងមី ស្វាយចន្ទី ចេក និងម្រេចជាដើម។

លោកមានសុទិដ្ឋិនិយមថា សមាគមទាំងពីរនឹងអាចសម្រេចបានកិច្ចសហការនាពេលដ៏ខ្លីខាងមុខតាមរយៈការបង្កើតនូវយន្តការពិភាក្សាបន្ថែមទៀត ការបង្កើតកិច្ចសហប្រតិបត្តិការលើវិស័យកសិកម្ម និងការបង្កើតឱ្យមានវេទិកាធុរកិច្ចយ៉ាងតិច ១ឆ្នាំម្តងដើម្បីឱ្យសមាជិកនៃសមាគមទាំងពីរបានជួបពិភាក្សា និងចាប់ដៃគូធុរកិច្ចជាមួយគ្នាទៅវិញទៅមក។

ភាគីប្រតិភូចិន បង្ហាញនូវជំនឿចិត្តថា សមាគមឧកញ៉ាកម្ពុជា នឹងផ្តល់ការគាំទ្រយ៉ាងពេញទំហឹងចំពោះបេសកកម្មរបស់សមាគមអភិវឌ្ឍន៍សេដ្ឋកិច្ចចិន-អាស៊ីប្រចាំនៅកម្ពុជាហើយជាពិសេសនឹងមានកិច្ចសន្ទនាជាមួយគ្នាជាប្រចាំដើម្បីផ្លាស់ប្តូរព័ត៌មាន និងកាលានុវត្តភាពពាណិជ្ជកម្ម និងការវិនិយោគតាមរយៈការផ្គូផ្គងធុរកិច្ចរវាងសមាជិកនៃសមាគមទាំងពីរ៕

អត្ថបទ៖ ផល កុសល រូបភាព៖ សមាគមឧកញ៉ាកម្ពុជា

The post ក្រុមអ្នកមានកំពូលនៅកម្ពុជា-ចិន ជជែកគ្នាពង្រឹងកិច្ចសហប្រតិបត្តិការទំនាក់ទំនង និងផ្គូផ្គងពាណិជ្ជកម្ម appeared first on Millions times.

លោក លាង ឃុន នាំសារគណៈប្រតិភូ Gumball3000 ថា កម្ពុជាជាម្ចាស់ផ្ទះរៀបចំព្រឹត្តិការណ៍ល្អបំផុតក្នុងរយ:ពេល ២៥ឆ្នាំ

Vin Chang — Mon, 30 Sep 2024 07:17:01 +0000

លោក លាង ឃុន ដែលជាម្ចាស់ក្រុមហ៊ុន ជីប ម៉ុង គ្រុប ជាអ្នករៀបចំព្រឹត្តិការណ៍ Gumball 3000 បានប្រាប់ប្រមុខរាជរដ្ឋាភិបាលអំពីជោគជ័យនៃការរៀបចំព្រឹត្តិការណ៍ Gumball 3000 នៅកម្ពុជា ហើយជាប្រទេសដែលរៀបចំព្រឹត្តិការណ៍នេះបានល្អបំផុតក្នុងរយ:ពេល ២៥ឆ្នាំនៃការរៀបចំព្រឹត្តិការណ៍នេះ។

ក្នុងជំនួបជាមួយសម្ដេច ហ៊ុន ម៉ាណែត នាយករដ្ឋមន្ត្រី នាព្រឹកថ្ងៃទី ៣០ ខែកញ្ញានេះ លោកអ្នកឧកញ៉ា លាង ឃុន ម្ចាស់ក្រុមហ៊ុន ជីប ម៉ុង គ្រុប បានបញ្ជាក់អំពីជោគជ័យនៃការរៀបចំព្រឹត្តិការណ៍ Gumball 3000 នៅកម្ពុជា ដែលព្រឹត្តិការណ៍នេះទទួលបានការកោតសរសើរពីគណៈប្រតិភូ Gumball 3000 ផ្ទាល់ និងបានបញ្ជាក់ថា «កម្ពុជាជាម្ចាស់ផ្ទះរៀបចំព្រឹត្តិការណ៍Gumball 3000 ល្អបំផុតក្នុងរយ:ពេល ២៥ ឆ្នាំនៃការរៀបចំព្រឹត្តិការណ៍នេះ»។

តាមដានជាមួយយើង៖ Million Times

លោកថា ព្រឹត្តិការណ៍ Gumball 3000 ត្រូវបានផ្សព្វផ្សាយយ៉ាងទូលំទូលាយនៅលើបណ្ដាញសារព័ត៌មាន និងបណ្ដាញសង្គមនានា ដោយមានអ្នកចូលរួមទស្សនាសរុបប្រមាណជាង ១០០០ លាននាក់ ហើយនឹងបន្តកើនឡើងថែមទៀត។

លោកបានប្រាប់សម្ដេចនាយករដ្ឋមន្រ្តីបន្ថែមថា ព្រឹត្តិការណ៍នេះក៏បានរួមចំណែកដល់ការងារមនុស្សធម៌ តាមរយៈការកៀរគរថវិកាសប្បុរសធម៌ដើម្បីបរិច្ចាគជូនមន្ទីរពេទ្យកុមារអង្គរខេត្តសៀមរាប ដោយបានទទួលថវិកាសរុបចំនួន ៤៥ម៉ឺនដុល្លារអាម៉េរិក។

សម្ដេច ហ៊ុន ម៉ាណែត បានគូសបញ្ជាក់ថា ជោគជ័យនៃការរៀបចំព្រឹត្តិការណ៍ Gumball 3000 ផ្ដល់អត្ថប្រយោជន៍សំខាន់ ៣សម្រាប់កម្ពុជា៖ (១) ចូលរួមផ្សព្វផ្សាយពីអត្តសញ្ញាណជាតិខ្មែរ, ផ្សព្វផ្សាយពីវប្បធម៌សម្បូណ៌បែបរបស់កម្ពុជាទៅកាន់ពិភពលោក, (២)ទាក់ទាញភ្ញៀវទេសចរណ៍អន្តរជាតិកាន់តែច្រើនមកទស្សនាកម្ពុជា ជាពិសេសតំបន់រមណីយដ្ឋានអង្គរ ខេត្តសៀមរាប និង (៣) បង្ហាញដល់ពិភពលោកថា កម្ពុជាមានសមត្ថភាពខ្ពស់រៀបចំព្រឹត្តិការណ៍លំដាប់អន្តរជាតិប្រកបដោយសុវត្ថិភាព ជោគជ័យ តាមរយៈការធានាបានូវសុខសុវត្ថិភាព និងសមត្ថភាពនៃការទទួលបដិសណ្ឋារកិច្ចដ៏ល្អចំពោះភ្ញៀវអន្តរជាតិ ជាមួយការអភិវឌ្ឍដ៏ឆាប់រហ័សរបស់កម្ពុជា។

សម្ដេចក៏បានគូសបញ្ជាក់ថា រាជរដ្ឋាភិបាលនឹងបន្តគាំទ្រចំពោះការរៀបចំព្រឹត្តិការណ៍អន្តរជាតិនានា និងលើកទឹកចិត្តដល់ក្រុមហ៊ុន ជីប ម៉ុង គ្រុប បន្តសហការជាមួយក្រសួង-ស្ថាប័នពាក់ព័ន្ធរបស់រាជរដ្ឋាភិបាលដើម្បីរៀបចំព្រឹត្តិការណ៍ថ្មីៗបន្ថែមទៀតនាថ្ងៃអនាគត៕

អត្ថបទ៖ សាងតេជៈ រូបភាព៖ ក្រុមព័ត៌មានសម្តេចធិបតី

The post លោក លាង ឃុន នាំសារគណៈប្រតិភូ Gumball3000 ថា កម្ពុជាជាម្ចាស់ផ្ទះរៀបចំព្រឹត្តិការណ៍ល្អបំផុតក្នុងរយ:ពេល ២៥ឆ្នាំ appeared first on Millions times.

ក្រុមហ៊ុនរបស់លោកអ្នកឧកញ៉ា លាង ឃុន បរិច្ចាគថវិកា ១លានដុល្លារដល់មូលនិធិកសាងហេដ្ឋារចនាសម្ព័ន្ធតាមព្រំដែន

Vin Chang — Mon, 26 Aug 2024 06:40:23 +0000

ក្រុមហ៊ុន ជីប ម៉ុង របស់លោកអ្នកឧកញ៉ា លាង ឃុន បានប្រកាសថវិកាចំនួន ១លានដុល្លារដល់ «មូលនិធិកសាងហេដ្ឋារចនាសម្ព័ន្ធតាមព្រំដែន» ដើម្បីចូលរួមជាមួយរាជរដ្ឋាភិបាល ដើម្បីកសាងហេដ្ឋារចនាសម្ព័ន្ធនានា នៅតាមបណ្តោយព្រំដែន។

ការប្រកាសបរិច្ចាគរបស់ក្រុមហ៊ុន ជីប ម៉ុង គ្រុប ធ្វើឡើងតបតាមការប្រកាសរបស់សម្តេច ហ៊ុន ម៉ាណែត នាយករដ្ឋមន្រ្តី ដែលបានបង្កើត «មូលនិធិកសាងហេដ្ឋារចនាសម្ព័ន្ធតាមព្រំដែន» ក្នុងគោលបំណងដើម្បីកៀរគរថវិកាបន្ថែម សម្រាប់កសាងហេដ្ឋារចនាសម្ព័ន្ធនានា នៅតាមបណ្តោយព្រំដែន ព្រមទាំងបានផ្តល់ឱកាសឱ្យប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុង និងក្រៅប្រទេស បានចូលរួមចំណែកដោយផ្ទាល់ជាមួយ រាជរដ្ឋាភិបាលនៅក្នុងបុព្វហេតុការពារ និងអភិវឌ្ឍជាតិ ក្នុងស្មារតីមហាសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍ នៅតាមតំបន់ព្រំដែនឱ្យបានកាន់តែរឹងមាំ និងប្រកបដោយចីរភាព។

គួរឲ្យដឹងថា ក្រុមហ៊ុន ជីប ម៉ុង គឺជាសាជីវកម្មដ៏ធំដែលតែងតែចេញមុខជួយឧបត្ថម្ភដល់រាជរដ្ឋាភិបាលកម្ពុជា កាកបាទក្រហមកម្ពុជា ព្រមទាំងចូលរួមឧបត្ថម្ភលើកិច្ចការងារជាច្រើនទៀតពាក់ព័ន្ធវិស័យសង្គមកិច្ច អប់រំ សុខាភិបាល និងមនុស្សធម៌៕

The post ក្រុមហ៊ុនរបស់លោកអ្នកឧកញ៉ា លាង ឃុន បរិច្ចាគថវិកា ១លានដុល្លារដល់មូលនិធិកសាងហេដ្ឋារចនាសម្ព័ន្ធតាមព្រំដែន appeared first on Millions times.

ថ្នាក់ដឹកនាំកំពូលសម្ព័ន្ធ ជីបម៉ុង គ្រុប អមស្ថាបនិកអ្នករៀបចំព្រឹត្តិការណ៍ Gumball 3000 ជួបសម្តេច ហ៊ុន ម៉ាណែត

Vin Chang — Fri, 09 Aug 2024 07:37:26 +0000

នាព្រឹកថ្ងៃសុក្រ ទី៩ ខែសីហានេះ ថ្នាក់ដឹកនាំកំពូលៗរបស់សម្ព័ន្ធក្រុមហ៊ុន ជីបម៉ុង គ្រុប ដែលមានអ្នកឧកញ៉ា លាង ឃុង អ្នកឧកញ៉ា លាង ម៉េង ឧកញ៉ា លាង ហួង និងឧកញ៉ា លាង ពៅ អមដំណើរលោក Maximillion Cooper ស្ថាបនិក និងជានាយកប្រតិបត្តិនៃក្រុមហ៊ុន Gumball 3000 ចូលជួបសម្ដែងការគួរសម និងពិភាក្សាការងារជាមួយសម្តេច ហ៊ុន ម៉ាណែត នាយករដ្ឋមន្រ្តី នៅវិមានសន្តិភាព។

ដំណើរអញ្ជើញមកប្រទេសកម្ពុជារបស់ស្ថាបនិក Gumball 3000 គឺដើម្បីចូលរួមរៀបចំព្រឹត្តិការណ៍ GUMBALL3000 នៅលើទឹកដីកម្ពុជា នាខែកញ្ញាខាងមុខនេះ ដែលរៀបចំសម្របសម្រួលដោយ ក្រសួងទេសចរណ៍ សហការជាមួយក្រុមហ៊ុន ជីប ម៉ុង និងស្ថាប័នពាក់ព័ន្ធនានា។ ព្រឹត្តិការណ៍នេះ នឹងមានភ្ញៀវទេសចរណ៍អន្តរជាតិ បុគ្គលមានឥទ្ធិពល មហាសេដ្ឋី តារាល្បីៗ និង កីឡាករល្បីៗរាប់ពាន់នាក់ ដែលមកពីជុំវិញពិភពលោកមកចូលរួមតាមរយៈព្រឹត្តិការណ៍ GUMBALL3000 នេះ។

តាមដានជាមួយយើង៖ Million Times

បណ្តាញសង្គមផ្លូវការសម្តេចនាយករដ្ឋមន្រ្តី បានឲ្យដឹងថា ក្រុមហ៊ុន Gumball 3000 ត្រូវបានបង្កើតឡើងក្នុងឆ្នាំ១៩៩៩ ដោយជនជាតិអង់គ្លេស គឺជាម៉ាកយីហោដ៏ល្បីផ្តោតលើការរៀបចំព្រឹត្តិការណ៍ ការកម្សាន្ត និងរបៀបរស់នៅបែបប្រណិតភាព។ ទន្ទឹមនឹងនេះការរៀបចំព្រឹត្តិការណ៍ “Gumball 3000 Rally in Cambodia” នឹងចូលរួមចំណែកលើកកម្ពស់វិស័យទេសចរណ៍របស់កម្ពុជា ជាពិសេសទេសចរណ៍ទៅក្នុងខេត្តសៀមរាប។

លើទំព័រហ្ងេសប៊ុករបស់ក្រុមហ៊ុន ជីបម៉ុង គ្រុប សម្រាប់ម្ចាស់រថយន្ត Supercar, Hypercar, Luxurycar ទាំងអស់ក៏អាចចូលរួមជាមួយ GUMBALL3000 ក្នុងការរួមចំណែកសប្បុរសធម៌ទៅមន្ទីពេទ្យកុមារអង្គរនៅខេត្តសៀមរាប ក៏ដូចជាមានសិទ្ធិក្នុងការដាក់តាំងរថយន្តនៅខាងមុខប្រាសាទអង្គរ ដើម្បីចូលរួមក្នុងការបង្កើតកំណត់ត្រាពិភពលោក GUNNIES WORLD RECORD ផងដែរ៕

អត្ថបទ៖ ផល កុសល រូបភាព៖ ក្រុមព័ត៌មានសម្តេចធិបតី

The post ថ្នាក់ដឹកនាំកំពូលសម្ព័ន្ធ ជីបម៉ុង គ្រុប អមស្ថាបនិកអ្នករៀបចំព្រឹត្តិការណ៍ Gumball 3000 ជួបសម្តេច ហ៊ុន ម៉ាណែត appeared first on Millions times.

អ្នកឧកញ៉ា លាង ឃុន ចាយលុយអស់ ២៣០លានដុល្លារក្នុងការសាងសង់អគារកម្ពស់ ៤៥ជាន់

Vin Chang — Fri, 09 Aug 2024 02:10:44 +0000

ក្រុមហ៊ុន ជីបម៉ុង គ្រុប ដែលជាសាជីវកម្មឈានមុខមួយមានភាគហ៊ុនខ្មែរ ១០០% បានបោះទុនវិនិយោគប្រមាណ ២៣០លានដុល្លារ លើការសាងសង់អគារខ្ពស់កប់ពពកកណ្តាលទីក្រុងភ្នំពេញ ដែលមានឈ្មោះថា ជីបម៉ុង ថៅវើ (Chip Mong Tower) ស្ថិតនៅតាមបណ្តោយមហាវិថីសហព័ន្ធរុស្សុី។

អគារនេះ ជីបម៉ុង ថៅវើ ជាអគារពាណិជ្ជកម្មចម្រុះលំដាប់អន្តរជាតិ មានកម្ពស់ មានកម្ពស់១៨៥ម៉ែត្រ ស្មើនឹង ៤៥ជាន់ សាងសង់លើផ្ទៃដីទំហំ ១៤ ០៤២ ម៉ែត្រការ៉េដែលបម្រើដល់វិស័យសំខាន់ៗ ដូចជាផ្នែកបដិសណ្ឋារកិច្ច ការិយាល័យសម្រាប់ក្រុមហ៊ុនសហគ្រាស ផ្សារទំនើប និងការកម្សាន្តជាដើម។

តាមដានជាមួយយើង៖ Million Times

អ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុង ធ្លាប់មានប្រសាសន៍ថា ការសាងសង់អគារ ជីបម៉ុង ថៅវើ គឺជាសមិទ្ធផលដ៏សំខាន់មួយរបស់ក្រុមហ៊ុន ជីប ម៉ុង ក្រោមចក្ខុវិស័យវែងឆ្ងាយ និងយុទ្ធសាស្រ្តច្បាស់លាស់ ដើម្បីរួមចំណែកក្នុងការអភិវឌ្ឍសង្គម និងសេដ្ឋកិច្ច។

ក្រោយបញ្្ចប់ការសាងសង់អគារទាំងស្រុងកាលពីចុងឆ្នាំ២០២២ ក្រុមហ៊ុន ជីបម៉ុង ក៏បាននាំយកយីហោ Fairfield by Marriott Phnom Penh មកកម្ពុជា គឺជាសណ្ឋាគារដែលមានរចនាបថដ៏ប្រណិត និងស៊ីវិល័យតាមស្ដង់ដាអន្ដរជាតិ ហើយត្រូវសម្ពោធជាផ្លូវការនៅថ្ងៃទី៣១ ខែមីនា ឆ្នាំ២០២៣។

សណ្ឋាគារលំដាប់អន្តរជាតិនេះ មានបន្ទប់គេងចំនួន៣០០ អាងទឹកលើអាកាស សាលប្រជុំដ៏ប្រណីត ភោជនីយដ្ឋាន ស្កាយបារដ៏ទំនើប ដែលគ្របដណ្ដប់១៩ជាន់ខាងលើ នៃអគារជីប ម៉ុង ថៅវើ មានកម្ពស់៤៥ជាន់នៃអាគារដ៏ទំនើបនេះ៕

អត្ថបទ៖ សេដ្ឋានី រូបភាព៖ ផេកសម្តេចធិបតី និងបណ្តាញសង្គម

The post អ្នកឧកញ៉ា លាង ឃុន ចាយលុយអស់ ២៣០លានដុល្លារក្នុងការសាងសង់អគារកម្ពស់ ៤៥ជាន់ appeared first on Millions times.

អ្នកឧកញ៉ា លាង ឃុន Archives - Millions times

ថ្ងៃភ្ជាប់ពាក្យចៅប្រុសម្នាក់ទៀត សេដ្ឋិនី ភាព ហៀក ញញឹមស្រស់ស្រាយពេលកូនចៅមកជួបជុំគ្នា

ដឹងអត់ថាក្រុមហ៊ុនណាខ្លះ បានចុះ MOU បង្កើត«មន្ទីរពេទ្យកម្ពុជា» ដ៏​ធំ និង​ទំនើបនោះ?

ភរិយាសេដ្ឋី លាង ឃុន ទៅសួរសុខទុក្ខលោកតាបណ្ឌិត កុល ផេង ដល់គេហដ្ឋានផ្ទាល់

ក្រុមអ្នកមានកំពូលនៅកម្ពុជា-ចិន ជជែកគ្នាពង្រឹងកិច្ចសហប្រតិបត្តិការទំនាក់ទំនង និងផ្គូផ្គងពាណិជ្ជកម្ម

លោក លាង ឃុន នាំសារគណៈប្រតិភូ Gumball3000 ថា កម្ពុជាជាម្ចាស់ផ្ទះរៀបចំព្រឹត្តិការណ៍ល្អបំផុតក្នុងរយ:ពេល ២៥ឆ្នាំ

ក្រុមហ៊ុនរបស់លោកអ្នកឧកញ៉ា លាង ឃុន បរិច្ចាគថវិកា ១លានដុល្លារដល់មូលនិធិកសាងហេដ្ឋារចនាសម្ព័ន្ធតាមព្រំដែន

ថ្នាក់ដឹកនាំកំពូលសម្ព័ន្ធ ជីបម៉ុង គ្រុប អមស្ថាបនិកអ្នករៀបចំព្រឹត្តិការណ៍ Gumball 3000 ជួបសម្តេច ហ៊ុន ម៉ាណែត

អ្នកឧកញ៉ា លាង ឃុន ចាយលុយអស់ ២៣០លានដុល្លារក្នុងការសាងសង់អគារកម្ពស់ ៤៥ជាន់

ដឹងអត់ថាក្រុមហ៊ុនណាខ្លះ បានចុះ MOU បង្កើត«មន្ទីរពេទ្យកម្ពុជា» ដ៏ធំ និងទំនើបនោះ?