អ្នកឧកញ៉ា គិត ម៉េង Archives - Millions times

អ្នកឧកញ៉ា គិត ម៉េង ជួបពិភាក្សាអាហារថ្ងៃត្រង់ជាមួយឯកអគ្គរដ្ឋទូតសិង្ហបុរី ប្រចាំកម្ពុជា ផ្តោតលើការទាក់ទាញវិនិយោគ

Vin Chang — Wed, 16 Sep 2026 02:21:25 +0000

ប្រធានសភាពាណិជ្ជកម្មកម្ពុជាអ្នកឧកញ៉ា គិត ម៉េង បានជួបពិភាក្សាអាហារថ្ងៃត្រង់ការងារ ជាមួយឯកអគ្គរដ្ឋទូតសិង្ហបុរីប្រចាំកម្ពុជា ផ្តោតលើការទាក់ទាញវិនិយោគ និងពង្រឹងកិច្ចសហប្រតិបត្តិការថាមពល និងសន្តិសុខស្បៀង។

តាមដានជាមួយយើង៖ Million Times

កាលពីថ្ងៃ១៥ ខែកញ្ញា ឆ្នាំ ២០២៦ ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា អ្នកឧកញ៉ា គិត ម៉េង និងលោក ស្ទីវិន ផាំង (Steven Pang) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសិង្ហបុរី ប្រចាំព្រះរាជាណាចក្រកម្ពុជា បានទទួលជួបពិភាក្សាអាហារថ្ងៃត្រង់ការងារជាមួយគ្នា។

ជំនួបពិសារអាហារថ្ងៃត្រង់ការងារនេះ រៀបចំឡើងក្នុងគោលបំណងជំរុញកិច្ចសហប្រតិបត្តិការធុរកិច្ច និងវិនិយោគរវាងកម្ពុជា និងសិង្ហបុរី បានផ្លាស់ប្ដូរទស្សនៈស៊ីជម្រៅលើកាលានុវត្តភាពធុរកិច្ច សមាហរណកម្មសេដ្ឋកិច្ចតំបន់ និងការពង្រឹងភាពជាដៃគូរវាងវិស័យឯកជននៃប្រទេសទាំង២។ ជាពិសេស ស្របពេលសិង្ហបុរីនឹងត្រូវទទួលបន្ទុកធ្វើជាប្រធានប្តូរវេនអាស៊ាននៅឆ្នាំ ២០២៧ ជំនួបនេះបានគូសបញ្ជាក់យ៉ាងច្បាស់ពីសារៈសំខាន់នៃការកសាងកិច្ចសហការកាន់តែជិតស្និទ្ធរវាងវិស័យឯកជន ដើម្បីត្រៀមខ្លួនចាប់យកកាលានុវត្តភាពថ្មីៗ និងលើកកម្ពស់ភាពធន់នៃសេដ្ឋកិច្ចក្នុងតំបន់។

ភាគីទាំង ២ ក៏បានលើកយកបញ្ហាយុទ្ធសាស្ត្ររួមរបស់តំបន់អាស៊ានមកពិភាក្សា និងផ្លាស់ប្តូរទស្សនៈយ៉ាងផុលផុស ដោយផ្ដោតជាសំខាន់លើការទាក់ទាញវិនិយោគពីសិង្ហបុរី មកកម្ពុជា លើវិស័យសក្ដានុពលនានា រួមមានបណ្តាញអគ្គិសនីអាស៊ាន (ASEAN Power Grid) សំដៅលើកកម្ពស់សន្តិសុខថាមពល និងជំរុញការតភ្ជាប់ថាមពលស្អាតក្នុងតំបន់ មួយវិញទៀតសន្តិសុខស្បៀង (Food Security) ក្នុងគោលដៅពង្រឹងភាពធន់ និងធានាស្ថិរភាពនៃខ្សែច្រវាក់ផ្គត់ផ្គង់ស្បៀងអាហារ សម្រាប់ប្រជាជាតិអាស៊ានទាំងមូល៕

អត្ថបទ៖ ឆដា, រូបភាព៖ CNC

The post អ្នកឧកញ៉ា គិត ម៉េង ជួបពិភាក្សាអាហារថ្ងៃត្រង់ជាមួយឯកអគ្គរដ្ឋទូតសិង្ហបុរី ប្រចាំកម្ពុជា ផ្តោតលើការទាក់ទាញវិនិយោគ appeared first on Millions times.

ខួបកំណើតអ្នកឧកញ៉ា គិត ម៉េង រៀបចំតុបតែងពណ៌ទឹកប៊ិចចាស់ ដូចឆ្នាំមុនៗ

Vin Chang — Thu, 03 Sep 2026 09:13:50 +0000

រៀងរាល់ឆ្នាំថ្ងៃទី១ ខែកញ្ញា អ្នកឧកញ៉ា គិត ម៉េង ប្រធានក្រុមប្រឹក្សាភិបាល និង នាយកប្រតិបត្តិនៃក្រុមហ៊ុន រ៉ូយ៉ាល់គ្រុប បានប្រារព្ធកម្មវិធីខួបកំណើត ដែលមានតែភ្ញៀវជិតស្និទ្ធចូលរួមតែប៉ុណ្ណោះ។

តាមដានជាមួយយើង៖ Million Times

មិនខុសពីឆ្នាំមុនៗកម្មវិធីខួបកំណើតកំពូលមហាសេដ្ឋីស្រុកខ្មែររូបនេះ បានរៀបចំតុបតែងដោយលម្អដោយពណ៌ទឹកប៊ិច ហើយសាមីខ្លួន និងភរិយាគឺលោកជំទាវអ្នកឧកញ៉ា ម៉ៅ ចំណាន ក៏បានជ្រើសរើសឈុតប្រេន Jenny Packham Palladium Gown ពណ៌ខៀវដូចគ្នាជាគូនឹងស្វាមី។

កម្មវិធីដែលពោរពេញដោយភាពសប្បាយរីករាយនៃការជួបជុំក្រុមគ្រួសារ ជាមួយអ្នកស្និទ្ធស្នាលជាឱកាសដែលអាចបំភ្លេចបាន។ ក្នុងវ័យ ៦០ ឆ្នាំ អ្នកឧកញ៉ា គិត ម៉េង តែងតែជាបុរសគួរឲ្យគោរពទាំងក្នុងការងារ ទាំងជីវិតស្នេហាជាមួយភរិយា។

អ្នកឧកញ៉ា គិត ម៉េង តែងតែបង្កើតទ្រឹស្ដីស្នេហាជូនប្រពន្ធកូន និងតែងមានដំបូន្មានជូនដល់បុគ្គលិកក្រោមបង្គាប់ និងយុវជនជំនាន់ក្រោយ ហើយក៏បានផ្ដល់ឱកាសឲ្យអ្នកជំនាន់ក្រោយ។

ក្នុងវ័យ ៦០ ឆ្នាំអ្នកឧកញ៉ា ម៉ៅ ចំណាន និងកូនស្រីក៏បានជូនកាដូនាឡិកាដៃដ៏ទំនើបទាន់សម័យ និងមានតម្លៃថ្លៃ។ បើនិយាយពីភាពផ្អែមល្ហែមវិញ ប្រធានក្រុមប្រឹក្សាភិបាល និង នាយកប្រត្តិបត្តិនៃក្រុមហ៊ុន រ៉ូយ៉ាល់គ្រុប ព្រមទាំងភរិយា តែងតែបង្ហាញគ្រប់ពេលវេលា៕

អត្ថបទ៖ ឆដា, រូបភាព៖ The ring wedding cambodia

The post ខួបកំណើតអ្នកឧកញ៉ា គិត ម៉េង រៀបចំតុបតែងពណ៌ទឹកប៊ិចចាស់ ដូចឆ្នាំមុនៗ appeared first on Millions times.

កូនស្រីច្បងអ្នកឧកញ៉ា គិត ម៉េង បង្ហាញខ្លួនក្នុងពិធីបើកការដ្ឋានសាងសង់រោងចក្រផលិតអាហារ និងភេសជ្ជៈ របស់ ជីប ម៉ុង

Vin Chang — Wed, 05 Aug 2026 03:04:06 +0000

កូនស្រីច្បងរបស់អ្នកឧកញ៉ា គិត ម៉េង គឺកញ្ញា គិត ស៊ូរៀរង្សី កាលពីពេលថ្មីៗនេះ បានចូលរួមពិធីក្រុងពាលីបញ្ចុះបឋមសិលា និងបើកការដ្ឋានសាងសង់ រោងចក្រផលិតអាហារ និងភេសជ្ជៈ ជីប ម៉ុង (Chip Mong Food & Beverages) ជាមួយគ្រួសារ។

តាមដានជាមួយយើង៖ Million Times

ដោយមហាជន ឬអតិថិជននៃអាជីវកម្មគ្រួសារ ជីប ម៉ុង ក្ដីរ៉ូយ៉ាល់ គ្រុប ក្ដីសុទ្ធតែដឹងថា អនាគត គិត ស៊ូរៀរង្សី និងក្លាយជាចំណែកនៃគ្រួសារអ្នកឧកញ៉ា លាង ម៉េង ហើយការចូលរួមកម្មវិធីរបស់អនាគតគ្រួសារសាច់ថ្លៃ ត្រូវបានអ្នកលេងបណ្ដាញសង្គមតូចធំចាប់អារម្មណ៍ខ្លាំង។

គិត ស៊ូរៀរង្សី បានចូលរួមក្នុងឈុតប្រពៃណីជាមួយប្អូនស្រី ម្ដាយ គឺអ្នកឧកញ៉ា គិត ម៉េង ហើយទទួលបានការស្វាគមន៍ទទួលរាក់ទាក់ខ្លាំងពីសំណាក់គ្រួសារសម្ព័ន្ធ ជីប ម៉ុង។ ក្នុងនោះលោកអ្នកឧកញ៉ា ភាព ហៀក ព្រមទាំងអនាគតគ្រួសារ គឺកំលោះសង្ហា អ៊ឹង វិសាល ហៅ Bryan ដែលជាអគ្គនាយកបន្តវេននៃក្រុមហ៊ុន ជីប ម៉ុង អ៊ីនដាស្ទ្រីស៍ និង ជីប ម៉ុង ត្រេឌីង។

លោក អ៊ឹង វិសាល បាននាំ គិត ស៊ូរៀរង្សី ណែនាំដល់សាច់ញាតិ ក៏ដូចជាចាស់ទុំខ្លះៗ មុនដល់កម្មវិធីផ្លូវការ តែទទួលបានការដឹងឮពីចាស់ទុំទាំងសងខាង។ តាមរយៈសកម្មភាពដែលលេចឡើងក្នុងបណ្ដាញសង្គម ឃើញថា កូនស្រីច្បងអ្នកឧកញ៉ា គិត ម៉េង ត្រូវបានអនាគតឪពុកម្ដាយក្មេកស្រលាញ់ថ្នាក់ថ្នម យកចិត្តទុកដាក់ខ្លាំងបាត់ទៅហើយ។

រង្សី កូនស្រីសំណព្វរបស់ប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប ត្រូវបានអ្នកម្ដាយគឺលោកជំទាវអ្នកឧកញ៉ា ម៉ៅ ចំណាន បង្រៀនប្រៀបប្រដៅអប់រំបានយ៉ាងល្អ ដោយកញ្ញាមានអាកប្បកិរិយាសុភាពរាបសាររម្យទម សមសួនជាកូនស្រីនៃត្រកូលអភិជន។

បើងាកទៅមើអ្នកឧកញ៉ា គិត ម៉េង និងភរិយា ត្រូវបានអ្នកឧកញ៉ា លាង ម៉េង ហៅថាអ្នកដន្លងពេញៗមាត់បាត់ទៅហើយ ដូចនេះពិតជាមិនខុសពីការស្មានដែលកាលពីប្រមាណ ១ ខែមុន ប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប និងក្រុមគ្រួសារបានរៀបចំកម្មវិធីឡើងភូមិគ្រឹះថ្មីនៅទីក្រុងម៊ែលប៊ន ប្រទេសអូស្ត្រាលី ដោយមានវត្តមានក្រុមគ្រួសារអ្នកឧកញ៉ា លាង ម៉េង និង Bryan ចូលរួមផងដែរ៕

អត្ថបទ៖ ឆដា, រូបភាព៖ សមាគមសិល្បករខ្មែរ, Sinoun Khoeun និងអ៊ីនធឺណេត

The post កូនស្រីច្បងអ្នកឧកញ៉ា គិត ម៉េង បង្ហាញខ្លួនក្នុងពិធីបើកការដ្ឋានសាងសង់រោងចក្រផលិតអាហារ និងភេសជ្ជៈ របស់ ជីប ម៉ុង appeared first on Millions times.

ខួបកំណើតគម្រប់ ១៨ ឆ្នាំកូនស្រីទី៣ អ្នកឧកញ៉ា គិត ម៉េង កញ្ញា គិត ស៊ូណាវីន អញ្ជើញតែអ្នកជិតស្និទ្ធប៉ុណ្ណោះ

Vin Chang — Fri, 03 Jul 2026 07:17:13 +0000

កាលពីថ្ងៃ ២ ខែកក្កដា ឆ្នាំ ២០២៦ ម្សិលមិញ អ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន បានរៀបចំកម្មវិធីខួបកំណើតយ៉ាងស្រស់បំព្រងឲ្យកូនស្រីទី៣ ឈ្មោះកញ្ញាថា គិត ស៊ូណាវីន។

តាមដានជាមួយយើង៖ Million Times

សម្រាប់ការរៀបចំខ្លួនរបស់ គិត ស៊ូណាវីន និងអ្នកម្ដាយពិតជាស្រស់ស្អាត និងស្រស់ស្រាយតែម្ដង ព្រោះថាជាការអបអរដែលកូនស្រីបណ្ដូលចិត្តក្លាយជាមនុស្សពេញវ័យ និងមានសិទ្ធិសម្រេចគ្រប់បែបយ៉ាង។

ប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប និងក្រុមហ៊ុន រ៉ូយ៉ាល់ គ្រុប អ្នកឧកញ៉ា ម៉ៅ ចំណាន អនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប បានអញ្ជើញតែមនុស្សជំនិត និងមិត្តអ្នកជំនួញជាមួយគ្នាប៉ុណ្ណោះ។

ចំណែកសាមីខ្លួន កញ្ញា គិត ស៊ូណាវីន ក៏បានអញ្ជើញមិត្តភ័ក្ដិ ដើម្បីជប់លៀងនៅភូមិគ្រឹះដ៏ធំស្កឹមស្កៃ នៅលើវិថីព្រះនរោត្តម ស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយបង្ហាញពីសម្ភារមានតម្លៃជាច្រើនដាក់តាំងបង្ហាញ

ដោយកញ្ញា គិត ស៊ូណាវីន ទើបបញ្ចប់ការសិក្សាថ្នាក់មធ្យមសិក្សាទុតិយភូមិនៅសាលាអន្តរជាតិសៅប្រ៊ីដកម្ពុជា ដែលជាបុត្រសម្ព័ន្ធរបស់រ៉ូយ៉ាល់ គ្រុប របស់ឪពុកផ្ទាល់តែម្ដង៕

អត្ថបទ៖ ឆដា, រូបភាព៖ The ring wedding cambodia

The post ខួបកំណើតគម្រប់ ១៨ ឆ្នាំកូនស្រីទី៣ អ្នកឧកញ៉ា គិត ម៉េង កញ្ញា គិត ស៊ូណាវីន អញ្ជើញតែអ្នកជិតស្និទ្ធប៉ុណ្ណោះ appeared first on Millions times.

អ្នកឧកញ៉ា គិត ម៉េង និងអ្នកឧកញ៉ា លាង ម៉េង ជិតមានដំណឹងល្អឬ?

Vin Chang — Thu, 25 Jun 2026 07:39:20 +0000

កាលពីសប្ដាហ៍មុនអ្នកឧកញ៉ា គិត ម៉េង ប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប និងក្រុមគ្រួសារបានរៀបចំកម្មវិធីឡើងភូមិគ្រឹះថ្មីនៅទីក្រុងម៊ែលប៊ន ប្រទេសអូស្ត្រាលី ដោយមានវត្តមានភ្ញៀវទៅពីស្រុកខ្មែរ ដែលសុទ្ធសឹងតែជាមនុស្សជំនិត និងមិត្តសម្លាញ់ក្នុងវិជ័យជំនួញ។

តាមដានជាមួយយើង៖ Million Times

ក្នុងនោះដែរ គេក៏ឃើញមានវត្តមានអ្នកឧកញ៉ា លាង ម៉េង និងលោកស្រី គឹម ចាន់ណា និងកូនប្រុសទី ២ កំលោះ អ៊ឹង ប្រីយ៉ាន ដែលជាអ្នកបន្តវេនរបស់ ជីប ម៉ុង គ្រុប ចូលរួមផងដែរ។ តាមរយៈរូបភាពបានបង្ហាញឲ្យឃើញយ៉ាងច្បាស់ថា កញ្ញា គិត ស៊ូរៀ រង្សី កូនស្រីច្បងរបស់ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប ថតទន្ទឹមគ្នាជាមួយលោក អ៊ឹង ប្រីយ៉ាន។

ធ្វើឲ្យមហាជនយល់ឃើញថា អ្នកបន្តវេនគ្រួសារសេដ្ឋីទាំង ២ គិត ស៊ូរៀ រង្សី និង អ៊ឹង ប្រីយ៉ាន អាចនឹងឈានទៅដល់ការមានដំណឹងល្អក្នុងពេលឆាប់ៗនេះ។ ព្រោះក្នុងកម្មវិធីនោះ គ្រួសារ ជីប ម៉ុង មានតែអ្នកឧកញ៉ា លាង ម៉េង និងលោកស្រី គឹម ចាន់ណា និងកូនប្រុសទី ២ ព្រមជាមួយលោកអ្នកឧកញ៉ា ភាព ហៀក។ ចំណែកកូនចៅ លោកអ្នកឧកញ៉ា ភាព ហៀក មិនមានវត្តមាននៅទីនោះឡើយ។

គួរបញ្ជាក់ថា លោក អ៊ឹង ប្រីយ៉ាន កាលពីឆ្នាំ ២០២៥ បានបញ្ចប់ការសិក្សានៅសាកលវិទ្យាល័យ Suffolk និងជាសាកលវិទ្យាល័យស្រាវជ្រាវឯកជនមួយនៅទីក្រុង Boston រដ្ឋ Massachusetts សហរដ្ឋអាមេរិក៕

អត្ថបទ៖ ឆដា, រូបភាព៖ អ៊ីនធឺណិត និង Khat Vaihang

The post អ្នកឧកញ៉ា គិត ម៉េង និងអ្នកឧកញ៉ា លាង ម៉េង ជិតមានដំណឹងល្អឬ? appeared first on Millions times.

គិត ស៊ូណាវីន កូនស្រីសេដ្ឋី គិត ម៉េង បញ្ចប់ការសិក្សានៅសាលាអន្តរជាតិសៅប្រ៊ីដកម្ពុជា របស់លោកឪពុក

Vin Chang — Tue, 09 Jun 2026 06:47:26 +0000

កញ្ញា គិត ស៊ូណាវីន ដែលជាកូនស្រីទី ៣ របស់អ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន បានបញ្ចប់ការសិក្សាថ្នាក់វិទ្យាល័យហើយ នៅសាលាអន្តរជាតិសៅប្រ៊ីដកម្ពុជា ដែលជាបុត្រសម្ព័ន្ធរបស់រ៉ូយ៉ាល់ គ្រុប របស់ឪពុកផ្ទាល់តែម្ដង។

តាមដានជាមួយយើង៖ Million Times

នាថ្ងៃបញ្ចប់ការសិក្សារបស់កូនស្រីបណ្ដូលចិត្ត អ្នកឧកញ៉ា គិត ម៉េង និងគ្រួសារទាំងមូល បានទៅផ្ដល់កម្លាំងចិត្ត និងបង្ហាញការគាំទ្រដែលយុវតីរូបនេះសម្រេចបាននូវជំហានថ្មីក្នុងជីវិត។ ការអបអរសាទរការបញ្ចប់ការសិក្សាថ្នាក់វិទ្យាល័យរបស់ ស៊ូណាវីន ធ្វើឲ្យគ្រួសារសេដ្ឋីនៃរ៉ូយាល់ គ្រុប សប្បាយរីករាយមែនទែន។

ក្នុងនោះមានទាំងសមាជិកគ្រួសារទាំងអស់បានរៀបចំតុបតែងខ្លួនយ៉ាងសមសួនក្នុងនាម ចំណែកសាមីខ្លួនក៏អស្ចារ្យក្នុងទឹកមុខស្រស់ថ្លា និងសក្ដិសមជាយុវតីសម័យថ្មីក្នុងត្រកូលសេដ្ឋីប្រចាំស្រុកខ្មែរ។

គិត ស៊ូណាវីន ក៏ជាម្ចាស់សម្រង់សម្ដី “អ្នកពុំចាំបាច់ត្រូវការដឹងច្បាស់ពីអនាគតរបស់អ្នកនឹងទៅជាយ៉ាងណានោះទេ។ អ្នកគ្រាន់តែចាប់ផ្ដើមបោះជំហានទៅមុខ ហើយការបញ្ចប់ការសិក្សាថ្នាក់វិទ្យាល័យ គឺជាជំហានដំបូងរបស់អ្នកទៅកាន់ឱកាស និងបទពិសោធថ្មីៗ”៕

អត្ថបទ៖ ឆដា, រូបភាព៖ Neak Oknha Kith Meng

The post គិត ស៊ូណាវីន កូនស្រីសេដ្ឋី គិត ម៉េង បញ្ចប់ការសិក្សានៅសាលាអន្តរជាតិសៅប្រ៊ីដកម្ពុជា របស់លោកឪពុក appeared first on Millions times.

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ថ្លែងអំណរគុណឧកញ៉ា គិត ស៊ូឡា ឧបត្ថម្ភថវិកា ១ ៥៥៥ ៥៥៥ ដុល្លារ ជូនកាកបាទក្រហមកម្ពុជា

Vin Chang — Tue, 28 Apr 2026 07:17:16 +0000

ប្រធានកាកបាទក្រហមកម្ពុជា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្លែងអំណរគុណយ៉ាងជ្រាលជ្រៅបំផុតចំពោះ ឧកញ៉ា គិត ស៊ូឡា អគ្គនាយកប្រតិបត្តិក្រុមហ៊ុន Royal Group International Company និងត្រូវជាកូនប្រុសអ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន គិតម៉េង ម្ចាស់ក្រុមហ៊ុន Royal Group ដែលបានឧបត្ថម្ភថវិកា ១ ៥៥៥ ៥៥៥ដុល្លារ ជូនកាកបាទក្រហមកម្ពុជា ក្នុងឱកាសខួបទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។

តាមដានជាមួយយើង៖ Million Times

កាកបាទក្រហមកម្ពុជា បានអំពាវនាវចំពោះ សម្ដេច ឯកឧត្ដម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាងកញ្ញា សប្បុរសជន មកពីគ្រប់មជ្ឈដ្ឋានទាំងក្នុងវិស័យរដ្ឋ និងវិស័យឯកជន សូមមេត្តាបន្តចូលរួមបរិច្ចាគថវិកា សម្ភារ ជូនកាកបាទក្រហមកម្ពុជា ដោយសទ្ធាជ្រះថ្លា និងតាមការស្ម័គ្រចិត្ត។

ការចូលរួមឧបត្ថម្ភគាំទ្រការងារមនុស្សធម៌តាមរយៈកាកបាទក្រហមកម្ពុជា គឺពិតជាមានគុណតម្លៃណាស់ក្នុងការលើកកម្ពស់ស្មារតីវប្បធម៌នៃការចែករំលែក ដែលជាការផ្សារភ្ជាប់រវាងសប្បុរសជនជាមួយអ្នកទទួលផល។

កាកបាទក្រហមកម្ពុជា នឹងយកចិត្តទុកដាក់ប្រើប្រាស់អំណោយដ៏សប្បុរសនេះ ដើម្បីបម្រើសកម្មភាពមនុស្សធម៌ជួយដល់ ប្រជាពលរដ្ឋងាយរងគ្រោះបំផុត ជាពិសេសប្រជាជនភៀសសឹក និងគ្រួសារយុទ្ធជនរបួស និងពលីក្នុងសមរភូមិ៕

អត្ថបទ៖ ឆដា, រូបភាព៖ អ៊ីនធឺណេត

The post សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ថ្លែងអំណរគុណឧកញ៉ា គិត ស៊ូឡា ឧបត្ថម្ភថវិកា ១ ៥៥៥ ៥៥៥ ដុល្លារ ជូនកាកបាទក្រហមកម្ពុជា appeared first on Millions times.

អ្នកឧកញ៉ា គិត ម៉េង ដឹកនាំកិច្ចប្រជុំវិស័យឯកជន ស្វែងរកដំណោះស្រាយបង្កើនប្រសិទ្ធភាព វិស័យថាមពលនៅកម្ពុជា ខណៈតម្លៃប្រេងឥន្ធនៈ និងឧស្ម័ន កើនឡើងជាសកល

Vin Chang — Wed, 08 Apr 2026 09:45:32 +0000

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួលក្រុមការងារផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.ឯ.រ .ជ) បានដឹកនាំកិច្ចប្រជុំជាមួយតំណាងវិស័យឯកជន ដើម្បីពិភាក្សា «បញ្ហាប្រឈម និងដំណោះស្រាយយុទ្ធសាស្ត្រ ក្នុងការបង្កើនប្រសិទ្ធភាពវិស័យប្រេងឥន្ធនៈ ឧស្ម័ន និងថាមពលនៅកម្ពុជា» ខណៈដែលតម្លៃប្រេងឥន្ធនៈ និងឧស្ម័នកើនឡើងជាសកល។

តាមដានជាមួយយើង៖ Million Times

កិច្ចប្រជុំនេះ ត្រូវបានរៀបចំឡើងនៅព្រឹកថ្ងៃ ៨ ខែមេសា ឆ្នាំ២០២៦ នៅអគារវីងថាវើ មានការចូលរួមពីអនុប្រធានសភាពាណិជ្ជកម្មកម្ពុជា ប្រធានសភាពាណិជ្ជកម្មតាមបណ្ដាខេត្ត តំណាងក្រុមការងារទាំង ១៦ ផ្នែកឯកជន ក៏ដូចជាតំណាងសហគមន៍ធុរកិច្ចជាតិ និងអន្តរជាតិ និងម្ចាស់ក្រុមហ៊ុនមកពីវិស័យថាមពល ដឹកជញ្ជូន វាយនភណ្ឌ និងវិស័យពាក់ព័ន្ធផ្សេងៗទៀត។

ក្នុងកិច្ចប្រជុំនេះ វិស័យឯកជន បានលើកឡើងពីបញ្ហាប្រឈមជាចម្បង ដែលបណ្ដាលមកពីការកើនឡើងនៃតម្លៃប្រេង និងឧស្ម័ន បានប៉ះពាល់ដល់ថ្លៃដើមផលិតកម្ម និងការប្រកួតប្រជែងអាជីវកម្ម។ ពួកគេបានស្នើឲ្យសភាពាណិជ្ជកម្មកម្ពុជា ជួយស្វែងរកដំណោះស្រាយ និងនាំយកបញ្ហាទាំងនេះទៅដល់ក្រសួងស្ថាប័នពាក់ព័ន្ធ និងរាជរដ្ឋាភិបាល ដើម្បីពិចារណាដាក់ចេញវិធានការសមស្របក្នុងអំឡុងពេលមានសម្ពាធតម្លៃសកល។

តំណាងក្រុមហ៊ុនមួយចំនួន ក៏បានស្នើឲ្យរាជរដ្ឋាភិបាល តាមរយៈសភាពាណិជ្ជកម្មកម្ពុជា ពិចារណាព្យួរការយកថ្លៃសេវាប្រើប្រាស់អគ្គិសនីសម្រាប់រោងចក្រដែលប្រើប្រាស់ថាមពលពន្លឺព្រះអាទិត្យ (សូឡា) ជាបណ្ដោះអាសន្ន និងពិចារណាបង្កើនទម្ងន់ផ្ទុកទំនិញ សម្រាប់ការដឹកជញ្ជូន ដើម្បីកាត់បន្ថយចំណាយលើការដឹកជញ្ជូនទំនិញ និងកសិផល។

ក្នុងឱកាសនោះ អ្នកឧកញ៉ា គិត ម៉េង បានជំរុញឲ្យវិស័យឯកជនចូលរួមយ៉ាងសកម្មក្នុងការស្វែងរកដំណោះស្រាយ ដើម្បីពង្រឹងសន្តិសុខថាមពល និងភាពធន់សេដ្ឋកិច្ចរបស់កម្ពុជា ខណៈកម្ពុជា កំពុងប្រឈមនឹងភាពមិនប្រាកដប្រជាជាសកល និងបញ្ហាប្រឈមក្នុងតំបន់។

អ្នកឧកញ៉ា បានបញ្ជាក់ថា វិស័យថាមពល គឺជាសសរស្ដម្ភសំខាន់នៃសេដ្ឋកិច្ចកម្ពុជា ប៉ុន្តែកំពុងប្រឈមនឹងសម្ពាធពីការប្រែប្រួលតម្លៃសកល និងការរំខានខ្សែសង្វាក់ផ្គត់ផ្គង់។ ការកើនឡើងតម្លៃប្រេង និងឧស្ម័ន ដោយសារជម្លោះនៅតំបន់មជ្ឈិមបូព៌ា បានប៉ះពាល់ដោយផ្ទាល់ដល់ថ្លៃដើមផលិតកម្ម និងសកម្មភាពអាជីវកម្មនៅក្នុងប្រទេស៕

អត្ថបទ៖ ឆដា, រូបភាព៖ cnc

The post អ្នកឧកញ៉ា គិត ម៉េង ដឹកនាំកិច្ចប្រជុំវិស័យឯកជន ស្វែងរកដំណោះស្រាយបង្កើនប្រសិទ្ធភាព វិស័យថាមពលនៅកម្ពុជា ខណៈតម្លៃប្រេងឥន្ធនៈ និងឧស្ម័ន កើនឡើងជាសកល appeared first on Millions times.

២ខែដើមឆ្នាំ តំបន់សេដ្ឋកិច្ចពិសេសរ៉ូយ៉ាល់ គ្រុប នាំចេញបានជាង ៣០០លានដុល្លារ កើនឡើងជិត១៤%

Virak វីរៈ — Thu, 26 Mar 2026 06:04:25 +0000

ក្នុងរយៈពេល ២ខែ (មករា-កុម្ភៈ) ដើមឆ្នាំ២០២៦នេះ ការនាំចេញផលិតផលពីតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) មានចំនួន ៣២៥,៣៦លានដុល្លារ កើនឡើង១៣,៨% ឬស្មើជាង ៤០លានដុល្លារ បើប្រៀបធៀបនឹងរយៈពេលដូចគ្នា កាលពីឆ្នាំ២០២៥ ដែលការនាំចេញមានចំនួន ២៨៥,៨៧ដុល្លារ។

តាមដានជាមួយយើង៖ Million Times

កាលពីឆ្នាំ២០២៥ តំបន់សេដ្ឋកិច្ចពិសេសមួយនេះ បានកត់ត្រាចំណូលសរុបចំនួនទឹកប្រាក់ ៤១,២ លានដុល្លារអាមេរិក និងប្រាក់ចំណេញសុទ្ធចំនួន ៨,១លានដុល្លារអាមេរិក ដែលស្មើនឹងអត្រាផលចំណេញសុទ្ធ ១៩,៧% ដ៏ល្អប្រសើរ។

ចំពោះនិន្នាការកើនឡើង នេះឆ្លុះបញ្ចាំងពីការពង្រីកសមត្ថភាពផលិតកម្មជាបន្តបន្ទាប់ និងការពង្រឹងសកម្មភាពខ្សែសង្វាក់ផ្គត់ផ្គង់នៅក្នុងតំបន់។ នេះបើតាមការបង្ហោះនៅលើហ្វេសប៊ុក Royal Group Phnom Penh SEZ កាលពីថ្ងៃទី២៤ ខែមីនាកន្លងទៅនេះ។

RGPPSEZ នៅតែជាអ្នករួមចំណែកដ៏សំខាន់មួយ ចំពោះការបង្កើតឱកាសការងារ និងការអភិវឌ្ឍសេដ្ឋកិច្ចសង្គម នៅក្នុងប្រទេសកម្ពុជា។ គិតត្រឹមខែកុម្ភៈ ឆ្នាំ២០២៦ តំបន់សេដ្ឋកិច្ចពិសេស បានផ្តល់ឱកាសការងារដល់កម្មករ-កម្មការិនីចំនួន ៥៥ ៩៣៥នាក់ ដែលគាំទ្រដល់ជីវភាពរស់នៅ និងរួមចំណែកដល់ការអភិវឌ្ឍកម្លាំងពលកម្មជំនាញ។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក បានមានប្រសាសន៍ថា ការរីកចម្រើនជាបន្តបន្ទាប់ និងប្រតិបត្តិការឈានទៅមុខជាលំដាប់របស់ RGPPSEZ គឺបានឆ្លុះបញ្ចាំងពីទំនុកចិត្តដែលតំបន់សេដ្ឋកិច្ចពិសេសរបស់លោក បានទទួលពីវិនិយោគិន និងការខិតខំប្រឹងប្រែងរបស់ភាគីពាក់ព័ន្ធទាំងអស់ នៅក្នុងតំបន់នេះ។

ក្នុងនាមជាអ្នកជំនួញមួយរូប អ្នកឧកញ៉ា គិត ម៉េង មោទនភាពជាខ្លាំងក្នុងការចូលរួមចំណែកដល់ការអភិវឌ្ឍសេដ្ឋកិច្ចរបស់ប្រទេសកម្ពុជា ដោយការគាំទ្រដល់ការពង្រីកវិស័យឧស្សាហកម្ម កំណើនពាណិជ្ជកម្ម និងការបង្កើតឱកាសការងារ។

ដោយសម្លឹងទៅមុខជានិច្ច អ្នកឧកញ៉ា បានប្តេជ្ញាចិត្តក្នុងការកែលម្អហេដ្ឋារចនាសម្ព័ន្ធរបស់ខ្លួនបន្ថែមទៀត ពង្រឹងគុណភាព សេវាកម្ម និងទាក់ទាញការវិនិយោគ ដែលមានតម្លៃបន្ថែមខ្ពស់៕

អត្ថបទ៖ វីរៈ រូបភាព៖ Royal Group Phnom Penh SEZ

The post ២ខែដើមឆ្នាំ តំបន់សេដ្ឋកិច្ចពិសេសរ៉ូយ៉ាល់ គ្រុប នាំចេញបានជាង ៣០០លានដុល្លារ កើនឡើងជិត១៤% appeared first on Millions times.

អ្នកឧកញ៉ា គិត ម៉េង មានមោទនភាពចំពោះវឌ្ឍនភាពទូរទស្សន៍ CTN បង្កើតឡើងកាលពី ២៣ឆ្នាំមុន

Virak វីរៈ — Tue, 03 Mar 2026 05:59:33 +0000

អ្នកឧកញ៉ា គិត ម៉េង បានបង្ហាញមោទនភាពចំពោះវឌ្ឍនភាពរបស់ស្ថានីយទូរទស្សន៍ CTN ដែលលោកបានបង្កើតឡើងកាលពីខែមីនា ឆ្នាំ២០០៣កន្លងទៅនេះ។

តាមដានជាមួយយើង៖ Million Times

តាមរយៈហ្វេសប៊ុកផ្លូវការ នៅថ្ងៃទី៣ ខែមីនានេះ អ្នកឧកញ៉ា បានសរសេរថា កាលពី ២៣ឆ្នាំមុន CTN បានចាប់ផ្តើមពីស្ថានីយទូរទស្សន៍តូចមួយក្នុងស្រុក ដោយ CTN ធ្លាប់ត្រូវបានទទួលស្គាល់ថា ជាស្ថាប័នប្រព័ន្ធផ្សព្វផ្សាយដំបូងគេបង្អស់របស់ប្រទេសកម្ពុជា ដែលផ្សាយទៅកាន់ពិភពលោក។

ដំណើរប្រតិបត្តិការដ៏វែងឆ្ងាយនេះបានរំឭកអ្នកឧកញ៉ា ពីសមិទ្ធផលដែលទូរទស្សន៍មួយនេះសម្រេចបាន មិនត្រឹមតែជាក្រុមហ៊ុនមួយប៉ុណ្ណោះទេ។ ប៉ុន្តែក៏ជាប្រទេសមួយដែលពិភពលោកបានឮ និងមើលឃើញផងដែរ។

អគ្គនាយករូបនេះ បានបន្ថែមថា CTN បានក្លាយជាសមាជិកនៃសម្ព័ន្ធទូរទស្សន៍កម្ពុជា និងក្រុមហ៊ុនបណ្តាញផ្សព្វផ្សាយកម្ពុជា (CBS) ហើយមានកម្មវិធីអប់រំ បំផុសគំនិត និងបានក្លាយជាផ្នែកមួយនៃជីវិតប្រចាំថ្ងៃរបស់គ្រួសារខ្មែររាប់លាននាក់។

អ្នកឧកញ៉ា គិត ម៉េង បានបន្ថែមទៀតថា សមិទ្ធផលទាំងនេះមិនមែនសម្រេចបានដោយសារតែមនុស្សម្នាក់នោះទេ ប៉ុន្តែដោយសារការខិតខំទាំងកម្លាំងកាយ កម្លាំងចិត្តរបស់ក្រុមការងារទាំងអស់ ប្រកបដោយភាពស្ងប់ស្ងាត់ ដោយទំនុកចិត្តពីដៃគូ និងភក្តីភាពរបស់ទស្សនិកជន ដោយអ្នកឧកញ៉ាពិតជាដឹងគុណយ៉ាងជ្រាលជ្រៅ។

ជាមួយគ្នានេះ ក្នុងនាមជាអគ្គនាយក អ្នកឧកញ៉ា គិត ម៉េង មានមោទនភាពចំពោះវឌ្ឍនភាពរបស់ស្ថានីយទូរទស្សន៍ CTN ភាពឱនលំទោនក្នុងការទទួលខុសត្រូវ ហើយអ្នកឧកញ៉ាមានទំនុកចិត្តលើភាពរីកចម្រើននៃប្រព័ន្ធផ្សព្វផ្សាយកម្ពុជា។

អគ្គនាយកស្ថានីយទូរទស្សន៍ CTN បានលើកឡើងថា «គោលដៅអនាគតរបស់យើង គឺបន្តភាពរីកចម្រើនប្រកបដោយអត្ថន័យ ភាពច្នៃប្រឌិតចេញពីបេះដូង និងចែករំលែករឿងរ៉ាវដែលលើកតម្កើងប្រជាជនយើង និងបង្ហាញពីអត្តសញ្ញាណរបស់យើង»។

អ្នកឧកញ៉ា គិត ម៉េង លើកឡើងទៀតថា ស្ថានីយទូរទស្សន៍ CTN សម្រេចបានសមិទ្ធផលជាច្រើនក្នុងដំណើរកន្លងមក ហើយ CTN រក្សាការខិតខំប្រឹងប្រែងដ៏មានអត្ថន័យទៅថ្ងៃអនាគតបន្តទៀត៕

អត្ថបទ៖ វីរៈ រូបភាព៖ ហ្វេសប៊ុកអ្នកឧកញ៉ា គិត ម៉េង

The post អ្នកឧកញ៉ា គិត ម៉េង មានមោទនភាពចំពោះវឌ្ឍនភាពទូរទស្សន៍ CTN បង្កើតឡើងកាលពី ២៣ឆ្នាំមុន appeared first on Millions times.

អ្នកឧកញ៉ា គិត ម៉េង Archives - Millions times

ខួបកំណើតអ្នកឧកញ៉ា គិត ម៉េង រៀបចំតុបតែង​ពណ៌ទឹកប៊ិច​ចាស់ ដូចឆ្នាំមុនៗ

ខួបកំណើតគម្រប់ ១៨ ឆ្នាំកូនស្រីទី៣ អ្នកឧកញ៉ា គិត ម៉េង កញ្ញា គិត ស៊ូណាវីន អញ្ជើញតែអ្នកជិតស្និទ្ធប៉ុណ្ណោះ

អ្នកឧកញ៉ា គិត ម៉េង និងអ្នកឧកញ៉ា លាង ម៉េង ជិតមានដំណឹងល្អឬ?

គិត ស៊ូណាវីន កូនស្រីសេដ្ឋី គិត ម៉េង បញ្ចប់ការសិក្សានៅសាលាអន្តរជាតិសៅប្រ៊ីដកម្ពុជា របស់លោកឪពុក

២ខែដើមឆ្នាំ តំបន់សេដ្ឋកិច្ចពិសេសរ៉ូយ៉ាល់ គ្រុប នាំចេញបានជាង ៣០០លានដុល្លារ កើនឡើងជិត១៤%

អ្នកឧកញ៉ា គិត ម៉េង មានមោទនភាពចំពោះវឌ្ឍនភាពទូរទស្សន៍ CTN បង្កើតឡើងកាលពី ២៣ឆ្នាំមុន

ខួបកំណើតអ្នកឧកញ៉ា គិត ម៉េង រៀបចំតុបតែងពណ៌ទឹកប៊ិចចាស់ ដូចឆ្នាំមុនៗ