មហាវិថី ឈុន គង់ ត្រូវបានប្រារព្ធពិធីបើកការដ្ឋានស្ថាបនា ក្រោមវត្តមានសម្តេច ហ៊ុន ម៉ាណែត នាយករដ្ឋមន្ត្រី កាលពីថ្ងៃទី២៩ ខែមិថុនា ឆ្នាំ២០២៣ កន្លងទៅ។ មហាវិថីមួយខ្សែនេះស្ថិតនៅចំកណ្ដាលទទឹងនៃតំបន់អភិវឌ្ឍន៍ទីក្រុងរណប ING City តភ្ជាប់ពីផ្លូវជាតិលេខ២ ក្នុងសង្កាត់ចាក់អង្រែក្រោម ឆ្ពោះទៅកាន់ផ្លូវជើងឯក(ផ្លូវលេខ២១៧) មានប្រវែង ៤.០០០ម៉ែត្រ គិតត្រឹមព្រំប្រទល់នៃតំបន់អភិវឌ្ឍន៍ និងមានលំហផ្លូវប្រវែង៥០ម៉ែត្រ ក្នុងនោះទំហំ២០ម៉ែត្រជាតួផ្លូវសម្រាប់យានជំនិះ និងចិញ្ចើមផ្លូវទំហំ ១៥ម៉ែត្រសងខាង។ មហាវិថីមួយនេះ នឹង ដើរតួនាទីយ៉ាងសំខាន់ជួយដោះស្រាយភាពកកស្ទះចរាចរណ៍ សម្រួលដល់ការដឹកជញ្ជូនទំនិញ ពិសេសជួយឱ្យប្រជាពលរដ្ឋចំណេញទាំងពេលវេលា និងថវិកាជាច្រើន។ល។

តាមដានជាមួយយើង៖ Million Times

លោក អ៉ឹង ស៊ីវខូវ អគ្គនាយកក្រុមហ៊ុន ING Holding បានឲ្យដឹងថា តាមគម្រោងការស្ថាបនាមហាវិថី ឈុន គង់  នឹងត្រូវចំណាយថវិកាសរុបជិត២២លានដុល្លារអាមេរិក និងបានប្រើប្រាស់ដីសរុបប្រមាណ ២០ហិកតា ដោយក្នុងនោះបានប្រើប្រាស់ដីកម្មសិទ្ធិរបស់ក្រុមហ៊ុន ING Holding ទំហំសរុបប្រមាណ ១៥ហិកតា។

លោកបានបញ្ជាក់ថា ក្រុមហ៊ុនបានយកចិត្តទុកដាក់ខ្លាំងលើគុណភាពផ្លូវ ស្របតាមបទដ្ឋានរបស់ក្រសួងសាធារណៈការ និងដឹកជញ្ជូន ក្នុងគោលបំណងនៃការប្រើប្រាស់បានយូរអង្វែង រាប់បញ្ចូលទាំងការចាក់បំពេញដីលើកជាតួផ្លូវ ដោយបានប្រើប្រាស់មាឌដីសរុប ១លាន ៣សែន ម៉ែត្រគូប ជាប្រភេទដីអំបិល និងការស្ថាបនាគ្រឹះដោយបានប្រើប្រាស់ល្បាយថ្មមិចប្រមាណ ៨៥.១២០ ម៉ែត្រគូប ជាពិសេសការក្រាលកៅស៊ូបេតុងកម្រាស់ស្តង់ដារ១០សង់ទីម៉ែត្រ។

លោកបន្ថែមថា គិតមកដល់បច្ចុប្បន្ននេះ ក្រុមហ៊ុនបានបញ្ចប់ទាំងស្រុងលើការចាក់បំពេញដីលើកជាតួមហាវិថី និងការងារគ្រឹះមហាវិថីផងដែរ ជាពិសេសការស្ថាបនាមហាវិថី និងស្ពានប៉ែកខាងលិច ត្រូវបានបញ្ចប់ស្ទើទាំងស្រុង និងបានដាក់ឱ្យប្រើប្រាស់ជាបណ្ដោះអាសន្នផងដែរ ដើម្បីជួយសម្រួលចរាចររបស់ប្រជាពលរដ្ឋពីមហាវិថី សម្ដេចតេជោ ហ៊ុន សែន ទៅផ្លូវជើងឯក(ផ្លូវលេខ២១៧)។

លោក អុឹង ស៊ីវខូវ បានលើកឡើងដោយសុទិដ្ឋិនិយមថា តំបន់អភិវឌ្ឍន៍ទីក្រុងរណប ING City ស្ថិតនៅភាគខាងត្បូងរាជធានីភ្នំពេញ ជាតំបន់ដែលកំពុងមានការអភិវឌ្ឍខ្លាំងបើធៀបនឹងតំបន់នានាក្នុងរាជធានីភ្នំពេញ និងទទួលបាននូវការវិនិយោគយ៉ាងគំហុក ក្លាយទៅជាតំបន់នៃចរន្តសេដ្ឋកិច្ច ពាណិជ្ជកម្មចម្រុះ និងការអភិវឌ្ឍយ៉ាងរីកចម្រើនគួរឱ្យកត់សម្គាល់ និងទាក់ទាញខ្លាំងបំផុតសម្រាប់ការវិនិយោគទាំងក្រុមហ៊ុនក្នុងស្រុកនិងក្រៅស្រុក ដោយសារមានគម្រោងធំៗជាច្រើនកំពុងតែលេចចេញរូបរាងឡើងជាបន្ដបន្ទាប់នៅតាមបណ្ដោយមហាវិថី សម្ដេចតេជោ ហ៊ុន សែន រួមមាន ផ្សារទំនើបតូចធំ ខុនដូរ គម្រោងលំនៅដ្ឋានសាលារៀន និងអគារពាណិជ្ជកម្មជាច្រើន ជាពិសេសគឺ គម្រោង «អាកាសយានដ្ឋានអន្តរជាតិតេជោ» លំដាប់ថ្នាក់ 4F ដែលនឹងទាក់ទាញអ្នកវិនិយោគកាន់តែខ្លាំង៕

អត្ថបទ៖ សាងតេជៈ រូបភាព៖ ING City 

second...

x

The post លោក អ៉ឹង ស៊ីវខូវ៖ គម្រោងមហាវិថី ឈុន គង់ នឹងត្រូវចំណាយថវិកា ២២លានដុល្លារក្នុងតំបន់អភិវឌ្ឍន៍ទីក្រុងរណប ING City appeared first on Millions times.