អាម៉េរិក Archives - Millions times

ការលើកលែងពន្ធគយរបស់សហរដ្ឋអាម៉េរិកផ្តល់ឱកាសសម្រាប់ឧស្សាហកម្មស្វាយចន្ទីកម្ពុជា

Manuk Bee — Sat, 25 Jul 2026 07:58:37 +0000

ឧស្សាហកម្មស្វាយចន្ទីរបស់ប្រទេសកម្ពុជា អាចទទួលបានផលប្រយោជន៍ពីការលើកលែងពន្ធគយថ្មីដែលផ្តល់ដោយសហរដ្ឋអាម៉េរិក ប៉ុន្តែក្រុមអ្នកជំនាញក្នុងវិស័យនេះបានលើកឡើងថា សមត្ថភាពកែច្នៃក្នុងស្រុកដ៏មានកម្រិតរបស់ប្រទេសកម្ពុជា នៅតែបន្តរារាំងប្រទេសនេះមិនឱ្យទាញយកផលប្រយោជន៍បានពេញលេញពីឱកាសមួយនេះ។

បន្ទាប់ពីការស៊ើបអង្កេតតាមមាត្រា ៣០១ (Section 301) ការិយាល័យតំណាងពាណិជ្ជកម្មសហរដ្ឋអាមេរិក (USTR) បានដាក់ពន្ធគយ ១០ ភាគរយ លើមុខទំនិញនាំចូលពីប្រទេសកម្ពុជា។ សហរដ្ឋអាម៉េរិកក៏បានប្រកាសដាក់ពន្ធគយរហូតដល់ ១២,៥ ភាគរយ លើមុខទំនិញនាំចូលពីប្រទេសចំនួន ៣៨ ផ្សេងទៀត រួមទាំងប្រទេសថៃ និងប្រទេសវៀតណាមផងដែរ។

ទោះបីជាមានវិធានការពន្ធគយថ្មីទាំងនេះក៏ដោយ កម្ពុជាទទួលបានការលើកលែងសម្រាប់ផលិតផលមួយចំនួនដែលមិនត្រូវ បានផលិតនៅក្នុងសហរដ្ឋអាម៉េរិក រួមទាំងគ្រាប់ស្វាយចន្ទីផងដែរ។ ទោះជាយ៉ាងណាក៏ដោយ ភាគីពាក់ព័ន្ធក្នុងឧស្សាហកម្មនេះបានកត់សម្គាល់ថា កម្ពុជានាំចេញទិន្នផលស្វាយចន្ទីភាគច្រើនជាទម្រង់វត្ថុធាតុដើម (គ្រាប់ស្ងួត) ដែលកម្រិតដល់សមត្ថភាពរបស់ខ្លួនក្នុងការទទួលបានអត្ថប្រយោជន៍ពីការអនុគ្រោះពន្ធសម្រាប់ផលិតផលកែច្នៃ ដ្បិតទីផ្សាអាមេរិកត្រូវការគ្រាប់ចន្ទីកែច្នៃ។

ទោះបីជាអង្គការក្រៅរដ្ឋាភិបាលអន្តរជាតិមួយចំនួនបានគាំទ្រដល់គម្រោងនានាដែលមានគោលបំណងពង្រីកការនាំចេញសាច់គ្រាប់ស្វាយចន្ទីកម្ពុជាទៅកាន់សហរដ្ឋអាមេរិក និងអឺរ៉ុបក៏ដោយ ក៏លទ្ធផលទទួលបាននៅតែមានកម្រិតតិចតួចនៅឡើយ។ គំនិតផ្តួចផ្តើមទាំងនេះភាគច្រើនផ្តោតលើការកែច្នៃ និងការជម្រុញការនាំចេញ ខណៈដែលសមត្ថភាពកែច្នៃក្នុងស្រុកនៅតែបន្តធ្លាក់ចុះ ដែលធ្វើឱ្យរារាំងដល់សមត្ថភាពនៃឧស្សាហកម្មនេះក្នុងការឆ្លើយតបទៅនឹងតម្រូវការដែលកំពុងកើនឡើងនៅក្នុងទីផ្សារ។

លោក អួន ស៊ីឡុត ប្រធានសមាគមស្វាយចន្ទីកម្ពុជា (សសក) ជឿជាក់ថា ការបង្កើនការកែច្នៃក្នុងស្រុកនៅតែជាវិធីសាស្ត្រមានប្រសិទ្ធភាពបំផុតសម្រាប់កម្ពុជា ក្នុងការចាប់យកតម្លៃបន្ថែមឱ្យបានកាន់តែច្រើនពីវិស័យស្វាយចន្ទីរបស់ខ្លួន បង្កើតឱកាសការងារ និងធ្វើពិពិធកម្មទីផ្សារនាំចេញ។

វិធានការពាណិជ្ជកម្មថ្មីរបស់សហរដ្ឋអាម៉េរិក ក៏រួមបញ្ចូលទាំងការលើកទឹកចិត្តពន្ធគយពិសេសសម្រាប់ឧស្សាហកម្មកាត់ដេររបស់កម្ពុជា ដោយផ្អែកលើបរិមាណកប្បាស និងក្រណាត់ផលិតនៅសហរដ្ឋអាម៉េរិកដែលត្រូវបាននាំចូលសម្រាប់សង្វាក់ផលិតកម្ម។ គោលនយោបាយនេះ មានគោលបំណងលើកទឹកចិត្តឱ្យមានការបញ្ជាទិញវត្ថុធាតុដើមពីសហរដ្ឋអាម៉េរិក ព្រមទាំងកាត់បន្ថយការពឹងផ្អែកលើវត្ថុធាតុដើមពីប្រទេសចិន។

យោងតាមទិន្នន័យពាណិជ្ជកម្មដែលមាន ក្នុងឆ្នាំ២០២៥ កម្ពុជាបាននាំចេញផលិតផលកាត់ដេរក្នុងទំហំទឹកប្រាក់ប្រមាណ ៤ ពាន់លានដុល្លារអាមេរិក ទៅកាន់សហរដ្ឋអាមេរិក។ ក្នុងអំឡុងពេលដូចគ្នានេះ កម្ពុជាបាននាំចូលកប្បាស និងក្រណាត់ក្នុងទំហំទឹកប្រាក់ប្រមាណ ២,៨ ពាន់លានដុល្លារអាមេរិក ពីប្រទេសចិន សម្រាប់ផលិតកម្មកាត់ដេរ ខណៈដែលការនាំចូលកប្បាស និងក្រណាត់ពីសហរដ្ឋអាមេរិក មានសរុបត្រឹមតែប្រមាណ ១៣៧ ០០០ ដុល្លារអាមេរិកប៉ុណ្ណោះ។

លោក Casey Barnett អតីតប្រធានសមាគមពាណិជ្ជកម្មអាម៉េរិកនៅកម្ពុជា (AmCham) បានមានប្រសាសន៍ថា កម្ពុជាប្រឈមមុខនឹងទាំងឱកាស និងបញ្ហាប្រឈម នៅពេលដែលសហរដ្ឋអាមេរិករៀបចំដាក់ចេញនូវពន្ធគយជុំទីពីរ ពាក់ព័ន្ធនឹងសមត្ថភាពផលិតកម្មលើស ក្រោមការស៊ើបអង្កេតតាមមាត្រា ៣០១។

លោកបានកត់សម្គាល់ថា ការប្រកាសពន្ធគយនាពេលខាងមុខនេះ ត្រូវបានរំពឹងថានឹងធ្វើឡើងក្នុងរយៈពេលពីរខែខាងមុខ ហើយអាចនឹងផ្តល់ឱ្យកម្ពុជានូវអត្រាពន្ធគយអំណោយផលជាងមុន។ ទោះជាយ៉ាងណាក៏ដោយ ប្រព័ន្ធអនុគ្រោះពន្ធណាមួយក៏អាចនឹងអមមកជាមួយនូវលក្ខខណ្ឌដែលលើកទឹកចិត្តឱ្យកម្ពុជាកាត់បន្ថយការពឹងផ្អែកលើវត្ថុធាតុដើមពីប្រទេសចិន និងធ្វើពិពិធកម្មខ្សែច្រវាក់ផ្គត់ផ្គង់របស់ខ្លួនផងដែរ។

លោក Barnett បានបន្ថែមថា បន្ទាប់ពីការសម្រេចចិត្តលើពន្ធសមត្ថភាពផលិតកម្មលើសនេះ ការិយាល័យ USTR ត្រូវបានរំពឹងថានឹងចាប់ផ្តើមការពិភាក្សាឡើងវិញជាមួយកម្ពុជា លើកិច្ចព្រមព្រៀងពាណិជ្ជកម្ម ដែលបានស្នើឡើង។ ការចរចានេះ មានគោលបំណងបញ្ចប់ការធ្វើវិសោធនកម្មលើកិច្ចព្រមព្រៀង និងបើកផ្លូវសម្រាប់ការពិនិត្យ និងផ្តល់សច្ចាប័នដោយរដ្ឋសភាកម្ពុជា។

សម្រាប់ឧស្សាហកម្មស្វាយចន្ទីកម្ពុជា ការវិវត្តទាំងនេះបានគូសបញ្ជាក់ពីសារៈសំខាន់នៃការពង្រីកសមត្ថភាពកែច្នៃក្នុងស្រុក។ ក្រុមអ្នកសង្កេតការណ៍ឧស្សាហកម្មបានលើកឡើងថា ប្រសិនបើគ្មានការវិនិយោគធំដុំលើរោងចក្រកែច្នៃទេនោះ ប្រទេសនេះនឹងនៅតែបន្តនាំចេញគ្រាប់ស្វាយចន្ទីឆៅភាគច្រើនរបស់ខ្លួន ខណៈដែលខកខានឱកាសក្នុងការទទួលបានផលប្រយោជន៍ពីការចូលទៅកាន់ទីផ្សារអនុគ្រោះពន្ធ និងការនាំចេញដែលមានតម្លៃបន្ថែមខ្ពស់៕

អត្ថបទ៖ ប៊ី

តាមដានជាមួយយើង៖ Million Times

The post ការលើកលែងពន្ធគយរបស់សហរដ្ឋអាម៉េរិកផ្តល់ឱកាសសម្រាប់ឧស្សាហកម្មស្វាយចន្ទីកម្ពុជា appeared first on Millions times.

សហរដ្ឋអាម៉េរិក សម្រេចដាក់ពន្ធគយអត្រាត្រឹម ១០ ភាគរយលើកម្ពុជា

Manuk Bee — Fri, 24 Jul 2026 04:17:04 +0000

សហរដ្ឋអាម៉េរិក បានសម្រេចដាក់ពន្ធគយអត្រាត្រឹម ១០ ភាគរយលើកម្ពុជា និងផ្តល់ការលើកលែងពន្ធដល់កម្ពុជា សម្រាប់បញ្ជីទំនិញដែលសហរដ្ឋអាមេរិកមិនផលិត ដូចជាគ្រាប់ស្វាយចន្ទីជាដើម។ នេះបើយោងតាមការបញ្ជាក់របស់លោក Casey Barnett អតីតប្រធានសភាពាណិជ្ជកម្មអាម៉េរិកប្រចាំកម្ពុជា នៅថ្ងៃទី ២៤ ខែមិថុនា ឆ្នាំ២០២៦។

លោក Casey Barnett បានសរសេរនៅលើបណ្តាញសង្គមថា៖ ថ្ងៃនេះ តំណាងពាណិជ្ជកម្មសហរដ្ឋអាម៉េរិក (USTR) បានដាក់ពន្ធគយអត្រា 10% លើកម្ពុជា បន្ទាប់ពីការស៊ើបអង្កេតតាមមាត្រា 301។ ក្នុងពេលជាមួយគ្នានេះ សហរដ្ឋអាមេរិកបានដាក់ពន្ធគយអត្រា 12.5% លើប្រទេសចំនួន 38 ផ្សេងទៀត រួមទាំងប្រទេសថៃ និងវៀតណាមផងដែរ។ លើសពីនេះ សហរដ្ឋអាមេរិកបានផ្តល់ការលើកលែងពន្ធដល់កម្ពុជា សម្រាប់បញ្ជីទំនិញដែលសហរដ្ឋអាម៉េរិកមិនផលិត ដូចជាគ្រាប់ស្វាយចន្ទីជាដើម។

ចំណុចសំខាន់នោះគឺ សហរដ្ឋអាមេរិកផ្តល់ជូនកម្ពុជានូវការលើកលែងពន្ធពិសេសសម្រាប់ផលិតផលសម្លៀកបំពាក់ ដោយផ្អែកលើបរិមាណកប្បាស ឬក្រណាត់កប្បាសអាម៉េរិក ដែលកម្ពុជានាំចូល។ ការលើកលែងពន្ធសម្រាប់ការនាំចូលកប្បាសអាមេរិកនេះ មានគោលបំណងជំរុញផលិតកម្មក្នុងសហរដ្ឋអាមេរិក និងកាត់បន្ថយការពឹងផ្អែកលើប្រទេសចិន។

នេះជាឱកាស ប៉ុន្តែក៏ជាហានិភ័យផងដែរ។ ក្នុងឆ្នាំ 2025 កម្ពុជាបាននាំចេញសម្លៀកបំពាក់ទៅសហរដ្ឋអាម៉េរិកក្នុងទឹកប្រាក់ 4 ពាន់លានដុល្លារ។ ក្នុងឆ្នាំដដែលនោះ កម្ពុជាបាននាំចូលកប្បាស និងក្រណាត់ពីប្រទេសចិនក្នុងទឹកប្រាក់ 2.8 ពាន់លានដុល្លារ ដែលត្រូវបានប្រើប្រាស់ដើម្បីផលិតសម្លៀកបំពាក់នាំចេញទៅសហរដ្ឋអាមេរិក និងសហភាពអឺរ៉ុប។ ចំណែកឯការនាំចូលកប្បាស និងក្រណាត់ពីសហរដ្ឋអាមេរិកវិញ មានត្រឹមតែ 137,000 ដុល្លារប៉ុណ្ណោះ ដែលជាចំនួនតូចតាចបំផុត។

ហានិភ័យនោះគឺថា ក្នុងរយៈពេលខ្លី កម្ពុជាអាចបាត់បង់ការបញ្ជាទិញទៅឱ្យប្រទេសឥណ្ឌូនេស៊ី និងបង់ក្លាដែស ដែលទទួលបានអត្រាពន្ធ 10% ពីសហរដ្ឋអាមេរិកដូចគ្នា ព្រមទាំងការលើកលែងពន្ធសម្រាប់សម្លៀកបំពាក់ផងដែរ។ ប្រទេសទាំងពីរនេះជាដៃគូប្រកួតប្រជែងរបស់កម្ពុជាក្នុងវិស័យកាត់ដេរ ហើយពួកគេមានឧស្សាហកម្មផលិតក្រណាត់ដ៏ធំស្រាប់ផងដែរ។ កម្ពុជាខ្វះរោងចក្រផលិតក្រណាត់។ ដូច្នេះ កម្ពុជាត្រូវតែធ្វើសកម្មភាពឱ្យបានឆាប់រហ័ស ដើម្បីទាក់ទាញការវិនិយោគលើផលិតកម្មក្រណាត់ បើពុំដូច្នោះទេ នឹងបាត់បង់ការបញ្ជាទិញបន្តិចម្តងៗ។ ឧបសគ្គរួមមាន តម្លៃអគ្គិសនីខ្ពស់នៅកម្ពុជា និងដំណើរការវាយតម្លៃផលប៉ះពាល់បរិស្ថានដ៏លំបាក។

កម្ពុជាក៏ប្រឈមនឹងហានិភ័យ និងឱកាសផងដែរ ចំពោះពន្ធគយសំណុំទីពីរ ដែលនឹងត្រូវប្រកាសដោយ USTR ជាការឆ្លើយតបទៅនឹងការស៊ើបអង្កេតតាមមាត្រា 301 ស្តីពីសមត្ថភាពផលិតកម្មលើស។ ពន្ធទីពីរនេះ ត្រូវបានរំពឹងថានឹងចេញក្នុងរយៈពេលពីរខែខាងមុខ។ កម្ពុជាអាចនឹងទទួលបានអត្រាអំណោយផលក្នុងពន្ធបន្ទាប់នេះ ប៉ុន្តែក៏អាចមានលក្ខខណ្ឌតម្រូវឱ្យកាត់បន្ថយការពឹងផ្អែកលើវត្ថុធាតុដើមពីប្រទេសចិនផងដែរ។ បន្ទាប់ពីពន្ធស្តីពីសមត្ថភាពផលិតកម្មលើសនេះ USTR ត្រូវបានរំពឹងថានឹងវិលត្រឡប់មកពិភាក្សាជាមួយកម្ពុជាឡើងវិញ អំពីកិច្ចព្រមព្រៀងពាណិជ្ជកម្មទៅវិញទៅមក (Agreement on Reciprocal Trade) ដើម្បីបញ្ចប់ការធ្វើវិសោធនកម្ម និងជំរុញឱ្យរដ្ឋសភាកម្ពុជាផ្តល់សច្ចាប័ន។

ឧបសគ្គមួយទៀតចំពោះឧស្សាហកម្មកាត់ដេររបស់កម្ពុជា គឺកង្វះវឌ្ឍនភាពជាសាធារណៈណាមួយ ឆ្ពោះទៅរកកិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុប។ កម្ពុជានឹងបាត់បង់ការលើកលែងក្រោមប្រព័ន្ធ EBA (អ្វីៗគ្រប់យ៉ាងលើកលែងតែអាវុធ) ពីសហភាពអឺរ៉ុបក្នុងពេលឆាប់ៗនេះ ហើយម៉ាកយីហោនានាមិនសុខចិត្តបង្កើនការបញ្ជាទិញនៅកម្ពុជាឡើយ លុះត្រាតែមានសញ្ញានៃវឌ្ឍនភាពឆ្ពោះទៅសម្រេចបាន FTA ឬរបបពន្ធអំណោយផលផ្សេងទៀត នៅពេលការលើកលែង EBA ផុតកំណត់៕

អត្ថបទ៖ ប៊ី

តាមដានជាមួយយើង៖ Million Times

The post សហរដ្ឋអាម៉េរិក សម្រេចដាក់ពន្ធគយអត្រាត្រឹម ១០ ភាគរយលើកម្ពុជា appeared first on Millions times.

បណ្ដាក្រុមហ៊ុនអាម៉េរិកមានវត្តមាននៅកម្ពុជា ប្ដេជ្ញាបន្តពង្រីកការវិនិយោគថ្មីៗបន្ថែមទៀត

Manuk Bee — Wed, 22 Jul 2026 12:30:22 +0000

បណ្ដាក្រុមហ៊ុនអាម៉េរិកនៃគណៈប្រតិភូ USABC ដែលកំពុងមានវត្តមាននៅកម្ពុជា បានបង្ហាញការប្ដេជ្ញាបន្តពង្រីក និងស្វែងរកនូវឱកាសក្នុងការវិនិយោគថ្មីៗបន្ថែមទៀត។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២២ ខែកក្កដា ឆ្នាំ២០២៦,បានអនុញ្ញាតឱ្យគណៈប្រតិភូវិនិយោគិន ដែលដឹកនាំដោយឯកឧត្តមឯកអគ្គរដ្ឋទូត (ចូលនិវត្តន៍) Brian D. McFeeters ប្រធាន និងជានាយកប្រតិបត្តិនៃក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន (USABC) ចូលជួបសម្តែងការគួរសម និងពិភាក្សាការងារនៅវិមានសន្តិភាព។

គណៈប្រតិភូ USABC មានបណ្ដាក្រុមហ៊ុនវិនិយោគក្នុងវិស័យសក្តានុពល រួមមាន៖ វិស័យយានយន្ត, គ្រឿងយន្តកសិកម្ម, សុខាភិបាល, ថាមពល, ឱសថ, កែច្នៃចំណីអាហារ, លក់រាយ, ក៏ដូចជា ធនាគារ និងហិរញ្ញវត្ថុ។ ក្នុងឱកាសនៃជំនួប, គណៈប្រតិភូ USABCបានវាយតម្លៃខ្ពស់ចំពោះភាពរីកចម្រើននៃទំនាក់ទំនង, ការគាំទ្រ និងកិច្ចសហប្រតិបត្តិការដ៏ល្អរវាងកម្ពុជា និងសហរដ្ឋអាម៉េរិក ដោយបានគូសបញ្ជាក់ថា ទំនាក់ទំនងនៃប្រទេសទាំងពីរ ស្ថិតនៅលើមាគ៌ា និង ទិសដៅយ៉ាងត្រឹមត្រូវ។

ជាមួយគ្នានោះ, គណៈប្រតិភូ USABC បានបង្ហាញបំណងបន្តជំរុញទំនាក់ទំនងពាណិជ្ជកម្ម និងវិនិយោគជាមួយកម្ពុជាឱ្យកាន់តែរឹងមាំ និងស៊ីជម្រៅបន្ថែមទៀត។

គណៈប្រតិភូ USABC ក៏បានសម្ដែងនូវការអរគុណចំពោះរាជរដ្ឋាភិបាល ក៏ដូចជាក្រសួងស្ថាប័នពាក់ព័ន្ធ ដែលតែងតែបានផ្ដល់នូវការគាំទ្រ និងកិច្ចសហការដ៏ល្អជាមួយនឹងបណ្ដាក្រុមហ៊ុនវិនិយោគអាម៉េរិកនៅកម្ពុជា ហើយក៏បានគូសបញ្ជាក់ថា បណ្ដាក្រុមហ៊ុនអាម៉េរិកដែលកំពុងមានវត្តមាននៅកម្ពុជា នឹងបន្តផ្សារភ្ជាប់ទំនាក់ទំនង, ពង្រីកការវិនិយោគ និង ស្វែងរកនូវឱកាសវិនិយោគថ្មីៗបន្ថែមទៀត នៅកម្ពុជា។

គណៈប្រតិភូ USABC ក៏បានគោរពជម្រាបជូនសម្ដេចធិបតីថា បណ្ដាក្រុមហ៊ុនអាម៉េរិកដែលកំពុងវិនិយោគនៅកម្ពុជានេះ បានចូលរួមចំណែកដល់កិច្ចការសង្គមនៅកម្ពុជា ដែលទាក់ទងទៅនឹងវិស័យសុខាភិបាល, អប់រំ និងវិស័យជាច្រើនទៀត ក៏ដូចជាការចូលរួមចំណែកការកសាងសមត្ថភាព និងបណ្ដុះបណ្ដាលធនធានមនុស្សនៅកម្ពុជា ព្រមទាំងវិស័យ SMEs ផងដែរ។

ជាមួយគ្នានោះ, បណ្ដាក្រុមហ៊ុននៃគណៈប្រតិភូ USABC ដែលកំពុងវិនិយោគនៅកម្ពុជា ក៏បានបញ្ជាក់សាជាថ្មីអំពីការបន្តពង្រឹងភាពជាដៃគូឱ្យកាន់តែជិតស្និទ្ធ និងរឹងមាំ ជាមួយកម្ពុជាបន្ថែមទៀត ដើម្បីបន្តចូលរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា។

ជាការឆ្លើយតប, សម្ដេចធិបតីបានសម្ដែងនូវការអរគុណចំពោះបណ្ដាក្រុមហ៊ុនវិនិយោគអាម៉េរិក ដែលបានជឿជាក់ និងទុកចិត្តក្នុងការបោះទុនវិនិយោគនៅកម្ពុជា ដែលការណ៍នេះមិនត្រឹមតែបានចូលរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា ប៉ុន្តែថែមទាំងបានចូលរួមចំណែកដល់ការពង្រឹងទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរីកចម្រើនថែមទៀត។

បន្ថែមលើនោះ, សម្ដេចធិបតីក៏បានស្វាគមន៍ចំពោះការប្ដេជ្ញាចិត្តរបស់បណ្ដាក្រុមហ៊ុនអាម៉េរិកក្នុងការបន្តផ្សារភ្ជាប់ទំនាក់ទំនង និងការពង្រឹង និងពង្រីកការវិនិយោគរបស់ខ្លួន ក៏ដូចជាការស្វែងរកឱកាសវិនិយោគលើវិស័យសក្តានុពលថ្មីៗបន្ថែមទៀតនៅកម្ពុជា។

ទន្ទឹមនឹងនេះ, សម្ដេចធិបតីក៏បានគូសបញ្ជាក់ជូនគណៈប្រតិភូ USABC អំពីការដាក់ចេញនូវគោលនយោបាយ និងវិធានការចាំបាច់របស់រាជរដ្ឋាភិបាលកម្ពុជា ក្នុងការគាំទ្រទៅដល់ភាពជោគជ័យរបស់បណ្ដាវិនិយោគិននៅកម្ពុជា ដោយក្នុងនោះ សម្ដេចធិបតីបានគូសរំលេចអំពីការដាក់ចេញនូវគោលនយោបាយលើកទឹកចិត្ត និងការអនុគ្រោះពន្ធ, ការកែទម្រង់ស្ថាប័ន, និងការធ្វើសាមញ្ញកម្មនីតិវិធី ដើម្បីសម្រួលទៅដល់ប្រតិបត្តិការអាជីវកម្មរបស់វិនិយោគិន ក៏ដូចជារក្សានូវភាពប្រកួតប្រជែងរបស់កម្ពុជា ទាំងក្នុងតំបន់ និងសកលលោក។

សម្ដេចធិបតីក៏បានសង្កត់ធ្ងន់អំពីការប្ដេជ្ញាចិត្តរបស់រាជរដ្ឋាភិបាលកម្ពុជាក្នុងការថែរក្សាបរិយាកាសវិនិយោគនៅកម្ពុជា ប្រកបដោយភាពអំណោយផលខ្ពស់ និងការប្រកួតប្រជែងដោយស្មើភាពរបស់បណ្ដាក្រុមហ៊ុនវិនិយោគនៅកម្ពុជា។

ជាទីបញ្ចប់, សម្ដេចធិបតីបានលើកទឹកចិត្តឱ្យគណៈប្រតិភូ USABC បន្តផ្សារភ្ជាប់ជាមួយនឹងក្រសួងស្ថាប័នពាក់ព័ន្ធ ដើម្បីចាប់យកឱកាសពង្រីកការវិនិយោគរបស់ខ្លួននៅកម្ពុជាបន្ថែមទៀត៕

អត្ថបទ៖ ប៊ី

តាមដានជាមួយយើង៖ Million Times

The post បណ្ដាក្រុមហ៊ុនអាម៉េរិកមានវត្តមាននៅកម្ពុជា ប្ដេជ្ញាបន្តពង្រីកការវិនិយោគថ្មីៗបន្ថែមទៀត appeared first on Millions times.

កម្ពុជា-អាម៉េរិក បន្តជំរុញទំហំពាណិជ្ជកម្មទ្វេភាគី និងលំហូរទុនវិនិយោគពីអាម៉េរិកមកកម្ពុជា

Manuk Bee — Tue, 21 Jul 2026 04:54:52 +0000

កម្ពុជា និងសហរដ្ឋអាម៉េរិក បានបន្តជំរុញទំហំពាណិជ្ជកម្មទ្វេភាគី និងលើកកម្ពស់លំហូរទុនវិនិយោគពីអាម៉េរិកមកកម្ពុជា តាមរយៈកិច្ចពិភាក្សាការងាររវាងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងលោកស្រី Aleksandra Zittle ភារធារីថ្មី នៃស្ថានទូតសហរដ្ឋអាម៉េរិក ប្រចាំកម្ពុជា។

កិច្ចពិភាក្សានេះ ត្រូវបានធ្វើឡើង កាលពីថ្ងៃចន្ទ ទី២០ ខែកក្កដា ឆ្នាំ២០២៦ ក្នុងឱកាសដែលលោកស្រី Aleksandra Zittle ទើបទទួលបានការចាត់តាំងឱ្យមកបំពេញបេសកកម្មការទូតនៅកម្ពុជ។

ជាកិច្ចចាប់ផ្តើម ឯកឧត្តមឧបនាយករដ្ឋមន្ត្រី បានរំលេចអំពីទំនាក់ទំនងកិច្ចសហប្រតិបត្តិការនានារវាងប្រទេសកម្ពុជា និងសហរដ្ឋអាម៉េរិក ដោយបានរំលេចជាពិសេសលើ ការចុះហត្ថលេខាលើកិច្ចព្រមព្រៀងពាណិជ្ជកម្មបដិការ (Agreement on Reciprocal Trade – ART) ដែលកម្ពុជាគឺជាប្រទេសទី១ ក្នុងតំបន់ដែលបានសម្រេចការចុះហត្ថលេខាលើកិច្ចព្រមព្រៀងដ៏មានសារៈសំខាន់នេះ ក្នុងគោលដៅលើកកម្ពស់ភាពប្រាកដប្រជានៃបរិយាកាសធុរកិច្ច និងការបើកចំហទីផ្សារសេរីរវាងប្រជាជាតិទាំងពីរ។

ទន្ទឹមនឹងនេះ ឯកឧត្តមឧបនាយករដ្ឋមន្ត្រី ក៏បានលើកឡើងអំពីការចុះកិច្ចសន្យាហោះហើរតាមផ្លូវអាកាសជាប្រវត្តិសាស្ត្រ (Air Transport Agreement / Open Skies) ដែលភាគីទាំងពីរទើបតែបានសម្រេចការចុះហត្ថលេខាកាលពីថ្ងៃទី៣០ ខែមិថុនា ឆ្នាំ២០២៦ កន្លងទៅ នៅរដ្ឋធានីវ៉ាស៊ីនតោន ដែលជាកិច្ចព្រមព្រៀងបើកចំហជើងហោះហើរទ្វេភាគីលើកដំបូងបំផុត សំដៅធ្វើទំនើបកម្មវិស័យអាកាសចរណ៍ស៊ីវិល បង្កើតបណ្តាញតភ្ជាប់ជើងហោះហើរត្រង់ និងលើកកម្ពស់សេវាដឹកជញ្ជូនទំនិញតាមផ្លូវអាកាសរវាងប្រទេសទាំងពីរ។

ឆ្លើយយតបទៅនឹង បដិសណ្ឋារកិច្ចស្វាគមន៍ដ៏កក់ក្តៅរបស់ ឯកឧត្តមឧបនាយករដ្ឋមន្ត្រី, លោកស្រីភារធារី បានសម្តែងនូវអំណរគុណយ៉ាងជ្រាលជ្រៅ និងបានបង្ហាញនូវក្តីរំភើបរីករាយដែលបានវិលត្រឡប់មកបំពេញបេសកកម្មការទូតនៅកម្ពុជាជាថ្មីម្តងទៀត ដោយលោកស្រីបានរំឮកអំពីប្រវត្តិនៃការបំពេញការងារជា ប្រធានផ្នែកនយោបាយសេដ្ឋកិច្ច (Political-Economic Chief) នៃស្ថានទូតសហរដ្ឋអាម៉េរិកនាពេលកន្លងទៅ។

ផ្អែកលើមូលដ្ឋាននេះ លោកស្រីបានបង្ហាញចំណាប់អារម្មណ៍ផ្ទាល់ខ្លួនលើការអភិវឌ្ឍសង្គម-សេដ្ឋកិច្ចរបស់កម្ពុជា ដែលមានការរីកចម្រើននិងមានភាពខុសប្លែកគ្នាគួរឱ្យកត់សម្គាល់ បើធៀបទៅនឹងអំឡុងពេលដែលលោកស្រីបានបំពេញការងារកាលពីអាណត្តិមុន។

បន្ថែមពីនោះ លោកស្រីភារធារី បានសម្តែងនូវការស្ញើចសរសើរ និងវាយតម្លៃខ្ពស់ចំពោះរាជរដ្ឋាភិបាលកម្ពុជា ក៏ដូចជាចំពោះរូបឯកឧត្តមឧបនាយករដ្ឋមន្ត្រីផ្ទាល់ លើកិច្ចខិតខំប្រឹងប្រែងប្រកបដោយភាពរស់រវើក ក្នុងការរក្សាបាននូវសុខសន្តិភាព ស្ថិរភាពជាតិ និងស្ថានភាពម៉ាក្រូសេដ្ឋកិច្ចឱ្យមានកំណើនវិជ្ជមាន បើទោះបីជាស្ថានភាពសេដ្ឋកិច្ច និងភូមិសាស្ត្រនយោបាយពិភពលោកទាំងមូល កំពុងជួបប្រទះនឹងភាពមិនប្រាកដប្រជាយ៉ាងណាក្តី។

ក្នុងជំនួបនារសៀលនេះ ភាគីទាំងពីរបានពិភាក្សាផ្លាស់ប្តូរទស្សនៈជុំវិញ៖ (១) ការជំរុញទំហំពាណិជ្ជកម្មទ្វេភាគី, (២) ការលើកកម្ពស់លំហូរទុនវិនិយោគពីអាម៉េរិកមកកម្ពុជា, (៣) បច្ចុប្បន្នភាពនៃការអនុវត្តគម្រោងគ្រប់គ្រងធនធានទឹកចម្រុះហ្វូណនតេជោ, (៤) ការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការបោសសម្អាតនិងលុបបំបាត់បទល្មើសឆបោកតាមប្រព័ន្ធបច្ចេកវិទ្យា, និង (៥) គោលជំហរដ៏រឹងមាំរបស់កម្ពុជាក្នុងការដោះស្រាយវិវាទព្រំដែនជាមួយភាគីថៃដោយសន្តិវិធី ជាមួយនឹងការប្រើប្រាស់ច្បាប់អន្តរជាតិ និងយន្តការច្បាប់ទ្វេភាគីជាធរមានដែលមានស្រាប់។

ជាមួយគ្នានេះ លោកស្រីភារធារI បានបញ្ជាក់ជាថ្មីពីការគាំទ្រលើគោលជំហរដ៏ច្បាស់លាស់របស់កម្ពុជា ក្នុងការប្រើប្រាស់ច្បាប់អន្តរជាតិនិងយន្តការច្បាប់ទ្វេភាគីជាធរមានដែលមានស្រាប់ ដើម្បីដោះស្រាយវិវាទព្រំដែន ប្រកបដោយសន្តិវិធី និងតម្លាភាព សំដៅរក្សាស្ថិរភាព និងសន្តិសុខនៅក្នុងតំបន់ទាំងមូល។

ជំនួបពិភាក្សាការងារនាឱកាសនេះ បានបញ្ចប់ទៅក្រោមបរិយាកាសស្និទ្ធស្នាល បើកចំហ ដែលឆ្លុះបញ្ចាំងយ៉ាងច្បាស់ពីឆន្ទៈរួមដ៏មោះមុតក្នុងការបន្តពង្រឹងចំណងមិត្តភាព ព្រមទាំងពង្រីកក្របខណ្ឌកិច្ចសហប្រតិបត្តិការសេដ្ឋកិច្ច-ពាណិជ្ជកម្មទ្វេភាគី ឱ្យកាន់តែមានភាពស៊ីជម្រៅ រឹងមាំ និងហុចផលប្រយោជន៍ទៅវិញទៅមក ក្នុងន័យរួមចំណែកដល់ការអភិវឌ្ឍប្រកបដោយចីរភាព និងវិបុលភាពនៃប្រជាជាតិទាំងពីរ កម្ពុជា-សហរដ្ឋអាម៉េរិក ទៅថ្ងៃអនាគត។

យោងតាមអគ្គនាយកដ្ឋានគយ និងរដ្ឋាករ បានឱ្យដឹងថា ពាណិជ្ជកម្មរវាងកម្ពុជា និងសហរដ្ឋអាម៉េរិកបានឈានដល់ជាង ៧,៤ ពាន់លានដុល្លារអាម៉េរិកនៅក្នុងឆមាសទីមួយ ឆ្នាំ ២០២៦ កើនឡើង ៣១,៤ ភាគរយ ធៀបនឹងឆ្នាំមុន។

ការនាំចេញរបស់កម្ពុជាទៅកាន់សហរដ្ឋអាមេរិកបានកើនឡើង ២៩,៨ ភាគរយដល់ ៥,៦ ពាន់លានដុល្លារ ខណៈដែលការនាំចូលពីសហរដ្ឋអាមេរិកបានកើនឡើង ៨៦,៤ ភាគរយដល់ ៣០៧ លានដុល្លារ៕

អត្ថបទ៖ ប៊ី

តាមដានជាមួយយើង៖ Million Times

The post កម្ពុជា-អាម៉េរិក បន្តជំរុញទំហំពាណិជ្ជកម្មទ្វេភាគី និងលំហូរទុនវិនិយោគពីអាម៉េរិកមកកម្ពុជា appeared first on Millions times.

ក្រុមហ៊ុនអាម៉េរិក បោះទុន ១០០ លានដុល្លារ គាំទ្រដល់គម្រោងអភិវឌ្ឍន៍ អាកាសយានដ្ឋានអន្តរជាតិតេជោ

Manuk Bee — Mon, 22 Jun 2026 09:31:34 +0000

សាជីវកម្មហិរញ្ញវត្ថុអភិវឌ្ឍន៍អន្តរជាតិរបស់សហរដ្ឋអាម៉េរិក (DFC) និង ក្រុមហ៊ុន អូស៊ីអាយស៊ី (OCIC) បានចុះហត្ថលេខាជាផ្លូវការលើកញ្ចប់ហិរញ្ញប្បទានចំនួន ១០០ លានដុល្លារអាម៉េរិក ដើម្បីគាំទ្រដល់គម្រោងអភិវឌ្ឍន៍ «អាកាសយានដ្ឋានអន្តរជាតិតេជោ» របស់កម្ពុជា។

ការចុះហត្ថលេខានេះ ត្រូវបានឡើងនៅថ្ងៃទី ២២ ខែមិថុនា ឆ្នាំ២០២៦ នេះ ដោយមានការចូលរួមពី លោក ទិត្យ ពៅ តំណាងរដ្ឋលេខាធិការដ្ឋានអាកាសចរស៊ីវិល លោកស្រី ឧកញ៉ា វេជ្ជបណ្ឌិត លឹម លីណា អនុប្រធាន ក្រុមប្រឹក្សាភិបាលក្រុមហ៊ុន អូស៊ីអាយស៊ី (OCIC) និង លោកស្រី Caroline Vik នាយកាប្រតិបត្តិគោលនយោបាយ នៃសាជីវកម្មហិរញ្ញវត្ថុអភិវឌ្ឍន៍អន្តរជាតិរបស់សហរដ្ឋអាម៉េរិក (DFC) អមជាមួយមន្ត្រីទូតអាម៉េរិកប្រចាំនៅកម្ពុជា។

យោងតាមប្រភពព័ត៌មានពីរដ្ឋលេខាធិការដ្ឋានអាកាសចរស៊ីវិល បានឱ្យដឹងថា នេះ គឺជាជំហានឆ្ពោះទៅមុខដ៏សំខាន់មួយក្នុងការសម្រេចបាននូវហិរញ្ញប្បទានពីសាជីវកម្មហិរញ្ញវត្ថុអភិវឌ្ឍន៍អន្តរជាតិ (DFC) សម្រាប់គម្រោងអាកាសយានដ្ឋានអន្តរជាតិតេជោ ហើយក៏ជាការឆ្លុះបញ្ចាំងឱ្យឃើញពីការកើនឡើងនូវទំនុកចិត្តកម្រិតអន្តរជាតិមកលើវិស័យហេដ្ឋារចនាសម្ព័ន្ធរបស់កម្ពុជាផងដែរ។

ប្រភពព័ត៌មានឱ្យដឹងទៀតថា ទោះជាយ៉ាងណាក៏ដោយ កិច្ចការផ្លូវច្បាប់ ហិរញ្ញវត្ថុ អនុលោមភាព និងលក្ខខណ្ឌបិទបញ្ចប់ការចរចាដ៏សំខាន់ៗបំផុត នៅតែជាដំណាក់កាលចម្បងខាងមុខដែលត្រូវសម្រេចឱ្យបាន មុនពេលកញ្ចប់ហិរញ្ញប្បទាននេះចូលជាធរមានពេញលេញ និងអាចដកសាច់ប្រាក់យកមកប្រើប្រាស់បាន។

កញ្ចប់ហិរញ្ញប្បទានចំនួន ១០០ លានដុល្លារអាម៉េរិកដែលបានផ្តល់ដោយ DFC នេះ គួរតែត្រូវបានចាត់ទុកថាមានតម្លៃលើសពីកម្ចីសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធធម្មតា ដោយហេតុថា នេះជាការវិនិយោគយុទ្ធសាស្ត្ររយៈពេលវែង ដែលត្រូវបានបង្កើតឡើងក្នុងគោលបំណងគាំទ្រដល់ការអភិវឌ្ឍជាបន្តបន្ទាប់ ការធ្វើឱ្យប្រសើរឡើងនូវរចនាសម្ព័ន្ធទុន (Capital Optimization) ការពង្រឹងសមត្ថភាពប្រតិបត្តិការ និងនិរន្តរភាព រយៈពេលវែងរបស់អាកាសយានដ្ឋានអន្តរជាតិតេជោ (KTI) ក្នុងនាមជាច្រកទ្វារអាកាសចរណ៍អន្តរជាតិឈានមុខគេរបស់កម្ពុជា។

ហិរញ្ញប្បទាននេះ ត្រូវបានរំពឹងថានឹងរួមចំណែកដល់គោលបំណងយុទ្ធសាស្ត្រដែលផ្សារភ្ជាប់គ្នាទៅវិញទៅមកចំនួន ៦ រួមមាន៖១. ការពង្រឹងសមត្ថភាពហេដ្ឋារចនាសម្ព័ន្ធ និងឧត្តមភាពប្រតិបត្តិការ (Infrastructure Capacity & Operational Excellence ២. ការបង្កើននិរន្តរភាពហិរញ្ញវត្ថុ និងការធ្វើឱ្យប្រសើរឡើងនូវរចនាសម្ព័ន្ធទុន (Financial Sustainability & Capital Structure) ៣. ការជម្រុញយុទ្ធសាស្ត្រប្រែក្លាយកម្ពុជាទៅជាមជ្ឈមណ្ឌលអាកាសចរណ៍ក្នុងតំបន់ (Regional Aviation Hub Strategy) ៤. ការធ្វើជាកាតាលីករជម្រុញកំណើនសេដ្ឋកិច្ច និងការទាក់ទាញការវិនិយោគ (Economic Growth & Investment) ៥. ការបង្ហាញពីទំនុកចិត្តលំដាប់អន្តរជាតិដ៏រឹងមាំមកលើព្រះរាជាណាចក្រកម្ពុជា (International Confidence) និង៦. ការកៀរគរទុនបន្ថែមពីប្រភពស្ថាប័នហិរញ្ញវត្ថុអន្តរជាតិនានា (Mobilizing International Capital)៕

តាមដានជាមួយយើង៖ Million Times

អត្ថបទ៖ ប៊ី

The post ក្រុមហ៊ុនអាម៉េរិក បោះទុន ១០០ លានដុល្លារ គាំទ្រដល់គម្រោងអភិវឌ្ឍន៍ អាកាសយានដ្ឋានអន្តរជាតិតេជោ appeared first on Millions times.

កម្ពុជា-សហរដ្ឋអាម៉េរិក បន្តកិច្ចសន្ទនា ដើម្បីកសាងជំនឿទុកចិត្ត និងជំរុញការវិនិយោគបន្ថែមទៀតមកកម្ពុជា

Manuk Bee — Thu, 12 Mar 2026 12:43:24 +0000

កម្ពុជា និងសហរដ្ឋអាម៉េរិក បានបើកកិច្ចសន្ទនាលើកទី៤ រវាងរដ្ឋ និងវិស័យឯកជន នៃប្រទេសទាំងពីរ ដើម្បីពង្រឹង និងជំរុញកិច្ចសហប្រតិបត្តិការសេដ្ឋកិច្ច, ពាណិជ្ជកម្ម, និងការវិនិយោគ និងដើម្បីកសាងជំនឿទុកចិត្តពីសំណាក់សហគមន៍ធុរកិច្ចអាម៉េរិក ព្រមទាំងជំរុញការវិនិយោគបន្ថែមទៀតមកកម្ពុជា។

ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា រួមជាមួយ លោកស្រី Bridgette L. Walker ភារធារីស្ថានទូតសហរដ្ឋអាម៉េរិកប្រចាំកម្ពុជា បានអញ្ជើញដឹកនាំកិច្ចសន្ទនាលើកទី៤ រវាងរដ្ឋនិងវិស័យឯកជន កម្ពុជា-អាម៉េរិក កាលពីថ្ងៃទី១១ ខែមីនា ឆ្នាំ២០២៦។

កិច្ចសន្ទនានេះ មានការចូលរួមពី ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាអនុប្រធានទី៣ ក្រុមប្រឹក្សាអភិវឌ្ឍន៍កម្ពុជា, ឯកឧត្តម អគ្គលេខាធិការ, ឯកឧត្តមអគ្គលេខាធិការរង ក.អ.ក., លោក Casey Barnett ប្រធានសភាពាណិជ្ជកម្មអាម៉េរិកនៅកម្ពុជា (AmCham Cambodia), ឯកឧត្តម លោកជំទាវ តំណាងក្រសួង ស្ថាប័នពាក់ព័ន្ធ, តំណាងក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន (US-ABC), វិស័យឯកជន និងមន្ត្រីជំនាញជាច្រើនរូប។

កិច្ចសន្ទនាលើកទី៤ នារសៀលនេះ បានប្រព្រឹត្តទៅក្នុងគោលបំណងបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការផ្តល់ឱកាសដល់វិនិយោគិនអាម៉េរិក ដែលកំពុងវិនិយោគនៅកម្ពុជាបានលើកឡើងពីបញ្ហាប្រឈមនានា ធានាដល់ការតាមដាន និងស្វែងរកដំណោះស្រាយសមស្រប សំដៅពង្រឹង និងជំរុញកិច្ចសហប្រតិបត្តិការសេដ្ឋកិច្ច, ពាណិជ្ជកម្ម, និងការវិនិយោគ ដើម្បីកសាងជំនឿទុកចិត្តពីសំណាក់សហគមន៍ធុរកិច្ចអាម៉េរិក ព្រមទាំងជំរុញការវិនិយោគបន្ថែមទៀតមកកម្ពុជា។

តាមដានជាមួយយើង៖ Million Times

ជាកិច្ចចាប់ផ្ដើម ឯកឧត្តមឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅជូនចំពោះវត្តមានរបស់លោកស្រីភារធារីស្ថានទូតសហរដ្ឋអាម៉េរិកប្រចាំកម្ពុជា តំណាងក្រសួងស្ថាប័ន និងវិស័យឯកជនអាម៉េរិកទាំងអស់ដែលបានចូលរួមនាឱកាសនេះ។

ឯកឧត្តមឧបនាយករដ្ឋមន្ត្រី បានគូសបញ្ជាក់ថា កិច្ចសន្ទនានេះឆ្លុះបញ្ចាំងពីការប្តេជ្ញាចិត្តរួមគ្នាក្នុងការកសាងទំនាក់ទំនងកាន់តែរឹងមាំរវាងរដ្ឋាភិបាល និងធុរកិច្ច ក៏ដូចជាកិច្ចសហប្រតិបត្តិការ រវាងប្រទេសកម្ពុជា និងសហរដ្ឋអាម៉េរិកផងដែរ។ វេទិកានេះបង្ហាញពីស្មារតីចាស់ទុំ និងសហការគ្នាដែលកំណត់នូវភាពជាដៃគូយុទ្ធសាស្ត្ររវាងព្រះរាជាណាចក្រកម្ពុជា និងសហរដ្ឋអាម៉េរិក។

ការរៀបចំកិច្ចសន្ទនារវាងរដ្ឋនិងវិស័យឯកជនគឺជាយន្តការដែលចង្អុលបង្ហាញដោយផ្ទាល់ពីសម្តេចមហាបវរធិបតីនាយករដ្ឋមន្ត្រី ក្នុងការរួមគ្នាគិត រួមគ្នាធ្វើ រួមគ្នាទទួលខុសត្រូវ ហើយគោលការណ៍នេះធានាថាការវិនិយោគដែលមានស្រាប់នឹងបន្តរីកចម្រើន និងពង្រីកខ្លួនជាបន្តបន្ទាប់ក្នុងរយៈពេលវែង។

បន្ថែមពីនេះ ឯកឧត្តមឧបនាយករដ្ឋមន្រ្ដី ក៏បានធ្វើបច្ចុប្បន្នភាពថ្មីនូវព័ត៌មានពាក់ព័ន្ធមួយចំនួន មានជាអាទិ៍៖ ការអនុម័តគម្រោងវិនិយោគក្នុងឆ្នាំ២០២៥, ស្ថានភាពពាណិជ្ជកម្មរវាងកម្ពុជា-សហរដ្ឋអាម៉េរិក ដែលមានការកើនឡើងគួរជាទីកត់សម្គាល់ និងវឌ្ឍនភាពនៃការអនុវត្តកិច្ចព្រមព្រៀងពាណិជ្ជកម្មបដិការ កម្ពុជា-អាម៉េរិក ផងដែរ។

បន្ថែមពីនេះ ឯកឧត្តមឧបនាយករដ្ឋមន្ត្រី ក៏បានលើកឡើងពីគំនិតផ្តួចផ្តើម លើការរៀបចំជំនួបអាហារពេលព្រឹកការងារជាមួយសភាពាណិជ្ជកម្មអន្តរជាតិនានានៅកម្ពុជា ដើម្បីផ្តល់លទ្ធភាពឱ្យវិនិយោគិន ផ្លាស់ប្តូរព័ត៌មានជាមួយរាជរដ្ឋាភិបាលបានកាន់តែញឹកញាប់ និងជិតស្និទ្ធជាងមុន សំដៅផ្លាស់ប្តូរការយល់ដឹង និងពង្រឹងការប្តេជ្ញាចិត្តរបស់កម្ពុជាចំពោះការគាំទ្រវិនិយោគិន។ យន្តការនេះនឹងបម្រើជាវេទិកាបន្ថែមមួយទៀតដើម្បីស្តាប់ពីបញ្ហាប្រឈមថ្មីៗរបស់វិនិយោគិននៅក្នុងបរិបទបម្រែបម្រួលដ៏ឆាប់រហ័សនៅលើសកលលោក និងជាមូលដ្ឋានក្នុងការរៀបចំសេចក្តីព្រាងរបៀបវារៈសម្រាប់កិច្ចសន្ទនារវាងរដ្ឋ និងវិស័យឯកជនលើកក្រោយៗទៀត។

ទន្ទឹមនឹងនេះ លោកស្រីភារធារី បានបង្ហាញនូវសេចក្ដីសោមនស្សរីករាយក្រៃលែងដែលបានសហការដឹកនាំកិច្ចសន្ទនាលើកទី៤នេះ ជាមួយនឹងសុឆន្ទៈក្នុងការរួមគ្នាពិនិត្យ និងពិភាក្សាស្វែងរកដំណោះស្រាយសមស្របសម្រាប់បញ្ហាប្រឈមនានាដែលវិនិយោគិនអាមេរិកបានលើកឡើង សំដៅចូលរួមចំណែកក្នុងការលើកម្ពស់បរិយាកាសវិនិយោគ និងបរិស្ថានធុរកិច្ចនៅកម្ពុជា ក៏ដូចជាពង្រឹង និងពង្រីកវត្តមានរបស់សហគ្រាសអាមេរិកឱ្យមកបណ្តាក់ទុនវិនិយោគនៅលើទឹកដីកម្ពុជាបន្ថែមទៀត។

តាមរយៈវេទិកានៃកិច្ចសន្ទនានារសៀលនេះ តំណាងវិនិយោគិនអាម៉េរិកបានបង្ហាញនូវសុទិដ្ឋិនិយមខ្ពស់បំផុតចំពោះការទទួលស្តាប់ពីបញ្ហាប្រឈម និងការពិភាក្សាផ្លាស់ប្តូរយោបល់ ជាពិសេសជាមួយនឹងបទពិសោធន៍ដែលធ្លាប់ទទួលបានការឆ្លើយតប ក៏ដូចជាដំណោះស្រាយនានា បន្ទាប់ពីបានលើកឡើងនៅក្នុងកិច្ចសន្ទនាទាំង៣លើកកន្លងមក ដែលបានផ្តល់នូវភាពកក់ក្តៅក្នុងការបន្តធ្វើកិច្ចសហប្រតិបត្តិការសេដ្ឋកិច្ច ធុរកិច្ចពាណិជ្ជកម្ម គ្នាទៅវិញទៅមកដោយទទួលបានការយកចិត្តទុកដាក់ពីរាជរដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា និងក្រសួងស្ថាប័នពាក់ព័ន្ធនានា ជាសេនាធិការផងដែរ៕

អត្ថបទ៖ ប៊ី

The post កម្ពុជា-សហរដ្ឋអាម៉េរិក បន្តកិច្ចសន្ទនា ដើម្បីកសាងជំនឿទុកចិត្ត និងជំរុញការវិនិយោគបន្ថែមទៀតមកកម្ពុជា appeared first on Millions times.

អាម៉េរិក Archives - Millions times

ការ​លើកលែង​ពន្ធ​គយ​របស់​សហរដ្ឋ​អាម៉េរិក​ផ្តល់​ឱកាស​សម្រាប់​ឧស្សាហកម្ម​ស្វាយចន្ទី​កម្ពុជា​

សហរដ្ឋអាម៉េរិក សម្រេចដាក់ពន្ធគយអត្រាត្រឹម ១០ ភាគរយលើកម្ពុជា

បណ្ដាក្រុមហ៊ុនអាម៉េរិកមានវត្តមាននៅកម្ពុជា ប្ដេជ្ញា​បន្តពង្រីកការវិនិយោគថ្មីៗបន្ថែមទៀត

កម្ពុជា-អាម៉េរិក បន្តជំរុញទំហំពាណិជ្ជកម្មទ្វេភាគី និងលំហូរទុនវិនិយោគពីអាម៉េរិកមកកម្ពុជា

ក្រុមហ៊ុនអាម៉េរិក បោះទុន ១០០ លានដុល្លារ គាំទ្រដល់គម្រោងអភិវឌ្ឍន៍ អាកាសយានដ្ឋានអន្តរជាតិតេជោ

កម្ពុជា-សហរដ្ឋអាម៉េរិក បន្តកិច្ចសន្ទនា ដើម្បីកសាងជំនឿទុកចិត្ត និងជំរុញការវិនិយោគបន្ថែមទៀតមកកម្ពុជា

ការលើកលែងពន្ធគយរបស់សហរដ្ឋអាម៉េរិកផ្តល់ឱកាសសម្រាប់ឧស្សាហកម្មស្វាយចន្ទីកម្ពុជា

បណ្ដាក្រុមហ៊ុនអាម៉េរិកមានវត្តមាននៅកម្ពុជា ប្ដេជ្ញាបន្តពង្រីកការវិនិយោគថ្មីៗបន្ថែមទៀត