​នា​ព្រឹក​ថ្ងៃទី​ ​១៥​ ​ខែ ​កក្កដា ​ឆ្នាំ​ ​២០២៦, ​នៅ​ទីស្តីការ​ក្រសួង​សេដ្ឋកិច្ច​ ​និង​ហិរញ្ញវត្ថុ​, ​ឯកឧត្តម​អគ្គ​បណ្ឌិត​សភាចារ្យ​ ​អូន​ ព័ន្ធ​មុនីរ័ត្ន ​ឧប​នាយក​រដ្ឋមន្ត្រី​ ​រដ្ឋមន្ត្រី​ក្រសួង​សេដ្ឋកិច្ច​ ​និង​ហិរញ្ញវត្ថុ​ ​បាន​ទទួល​ជួប​សម្តែង​ការ​គួរសម ​ជាមួយ​ ​ឯកឧត្តម​ ​UENO​ ​Atsushi​ ​ក្នុង​ឱកាស​ដែល​ ​ឯកឧត្តម​បញ្ចប់​អាណត្តិ​ដ៏​ឧត្តុង្គឧត្តម​ជា​ឯក​អគ្គ​រាជ​ទូត​វិសាមញ្ញ ​និង​ពេញ​សមត្ថភាព​នៃ​ប្រទេស​ជប៉ុន​ ​ប្រចាំ​នៅ​ព្រះរាជាណាចក្រ​កម្ពុជា​ ​និង​ជម្រាប​លា ​។​

ក្នុង​កិច្ច​ជំនួប​ពិភាក្សា​, ​ឯកឧត្តម​អគ្គ​បណ្ឌិត​សភាចារ្យ​ ​អូន​ ព័ន្ធ​មុនីរ័ត្ន ​បាន​ថ្លែងអំណរគុណ​យ៉ាង​ជ្រាលជ្រៅ​ចំពោះ​រដ្ឋាភិបាល​ជប៉ុន​ ​ដែល​តែងតែ​គាំទ្រ​ និង​រួមចំណែក​យ៉ាង​ធំធេង​ដល់​ការ​កសាងឡើងវិញ​ព្រះរាជាណាចក្រ​កម្ពុជា​ ​ចាប់តាំងពី​ដំណើរការ​ស្វែងរក​សន្តិភាព​សម្រាប់​កម្ពុជា​ ​រួមចំណែក​ដល់​សកម្មភាព​អភិវឌ្ឍន៍​ដល់​សេដ្ឋកិច្ច​ ​និង​សង្គម​កម្ពុជា​រហូតដល់​បច្ចុប្បន្ន​កាល​នេះ​ ​។

​ឯកឧត្តម​អគ្គ​បណ្ឌិត​សភាចារ្យ​ ​បាន​ថ្លែង​ថា​ ​ជប៉ុន​ ​បាន​ផ្តល់​ហិរញ្ញប្បទាន​អភិវឌ្ឍន៍​ផ្លូវការ​ ​(​Official​ ​Development​ ​Assistance​ ​-​ ​ODA​) ​ដោយ​ផ្តោត​អាទិភាព​ក្នុង​ការ​ផ្តល់​ឥណទាន​សម្បទាន​ ​ស្រប​តាម​យុទ្ធសាស្ត្រ​, ​ផែនការ​យុទ្ធសាស្ត្រ ​អភិវឌ្ឍន៍​ជាតិ​របស់​រាជ​រដ្ឋាភិបាល​កម្ពុជា​ ​និង​កម្មវិធី​អភិវឌ្ឍន៍​អាទិភាព​នានា​របស់​កម្ពុជា​។​

​ជាក់ស្តែង​, ​តាមរយៈ​ទីភ្នាក់ងារ​ ​JICA​ ​ដែល​ជា​ភ្នាក់ងារ​អនុវត្ត​, ​គិត​ដល់​ត្រឹម​ខែមិថុនា ​ឆ្នាំ​ ​២០២៦​ ​នេះ​, ​មាន​កិច្ចព្រមព្រៀង​ឥណទាន​សម្បទាន​ពី​ជប៉ុន​ចំនួន​ ​៣៩​ ​សម្រាប់​ហិរញ្ញប្បទាន​ដល់​គម្រោង​/​កម្មវិធី​ចំនួន​ ​២៥​ ​មាន​ទឹកប្រាក់​ សរុប​ចំនួន​ ​៤២២​ ​១៧៩​ ​លាន​យ៉េន​ជប៉ុន​ ត្រូវ​ជា​ប្រមាណ​ ​៣​ ​៥១៥​ ​លាន​ដុល្លារ​អាម៉េរិក​ ក្នុង​នោះ​ ​គម្រោង​/​កម្មវិធី​កំពុង​ដំណើរការ​សរុប​ចំនួន​ ​១២​ ​និង​គម្រោង​/​កម្មវិធី​បាន​បញ្ចប់​សរុប​ចំនួន​ ​១៣​។

​ឆ្លៀត​ក្នុង​ឱកាស​នេះ​, ​ឯកឧត្តម​អគ្គ​បណ្ឌិត​សភាចារ្យ​ ​ឧប​នាយក​រដ្ឋមន្ត្រី​ ​ក៏​បាន​ថ្លែងអំណរគុណ​ផងដែរ​ចំពោះ​ ​ឯកឧត្តម​ ​UENO​ ​Atsushi​ ​ផ្ទាល់​ ​ដែល​ឯកឧត្តម​បាន​ខិតខំ​ប្រឹងប្រែង​អស់​ពី​កម្លាំង​កាយ​ចិត្ត​ ​និង​សម្រេច​បាន​ស្នាដៃ​ដ៏​ធំ​នៅក្នុង​ការ​បំពេញភារកិច្ច​ជា​ឯក​អគ្គ​រាជ​ទូត​វិសាមញ្ញ ​និង​ពេញ​សមត្ថភាព​នៃ​ប្រទេស​ជប៉ុន​ប្រចាំ​នៅ​កម្ពុជា​ ​ក្នុង​អាណត្តិ​របស់​ឯកឧត្តម​ ​UENO​ ​Atsushi​ ​ចាប់ពី​ឆ្នាំ​ ​២០២៣​ ​ដល់​ដំណាច់​ឆ្នាំ​ ​២០២៦​ ​នេះ​។​ ក្នុង​នោះ​, ​កម្ពុជា​ទទួលបាន​ហិរញ្ញប្បទាន​សរុប​ចំនួន​ ​២៦​ ​គម្រោង​/​កម្មវិធី​ ​ដែល​មាន​ឥណទាន​សម្បទាន​សរុប​ចំនួន​ ​១៤​ ​គម្រោង​/​កម្មវិធី​ ​និង​ហិរញ្ញប្បទាន​ឥត​សំណង​សរុប​ចំនួន​ ​១២​ ​គម្រោង​/​កម្មវិធី​ ​មាន​ទឹកប្រាក់​សរុប​ប្រមាណ​ ​១​ ​៦៥២​ ​លាន​ដុល្លារ ​អាម៉េរិក​។

​សម្រាប់​ឆ្នាំ​ ​២០២៦, ​ឥណទាន​សម្បទាន​សរុប​ចំនួន​ ​៦​ ​គម្រោង​/​កម្មវិធី​ ​មាន​ទឹកប្រាក់​សរុប​ប្រមាណ​ ​៧០០​ ​លាន​ដុល្លារ​អាម៉េរិក​ និង​ហិរញ្ញប្បទាន​ឥត​សំណង​ចំនួន​ ​៣​ ​គម្រោង​/​កម្មវិធី​ ​មាន​ទឹកប្រាក់​សរុប​ប្រមាណ​ ​១១​ ​លាន​ដុល្លារ​អាម៉េរិក​។ ​ជាមួយគ្នា​នេះ​, ​រដ្ឋាភិបាល​ជប៉ុន​ ​ក៏​បាន​សម្រេច​ផ្តល់​កញ្ចប់​ឥណទាន​សម្បទាន​ថ្មី​ ​ចំនួន​ ​១​ កម្មវិធី​ បន្ថែម​ទៀត​ ​មាន​ទឹកប្រាក់​ចំនួន​ ​១៨៨​ ​លាន​ដុល្លារ​អាម៉េរិក ​ដែល​គ្រោង​នឹង​ចុះហត្ថលេខា​ក្នុង​ឆ្នាំ​ ​២០២៦​ ​នេះ​ផងដែរ​។​

ក្រៅពី​ឥណទាន​សម្បទាន​ដែល​ទទួលបាន​ពី​ភាគី​មិត្ត​ជប៉ុន​សម្រាប់​អភិវឌ្ឍន៍​ហេដ្ឋារចនាសម្ព័ន្ធ​នានា​, ​កម្ពុជា​ ​ក៏​ ​នៅ​មាន​តម្រូវការ​ ​និង​រៀនសូត្រ​បន្ថែម​ទៀត​ពី​មិត្ត​ជប៉ុន​ ​លើ​គ្រប់​វិស័យ​ ​ដូចជា​ ​ការ​វិនិយោគ​ ​និង​ការ​ចូលរួម​វិនិយោគ​ពី​វិស័យ​ឯកជន​, ​អភិវឌ្ឍន៍​ហេដ្ឋារចនាសម្ព័ន្ធ​, ​សេដ្ឋកិច្ច​បៃតង​,​ កសិកម្ម​, ​ឧស្សាហកម្ម​, ​ទេសចរណ៍​, ​ការ​អភិវឌ្ឍ​វិស័យ​ភស្តុភារកម្ម ​(​Logistics​)​, ​សេដ្ឋកិច្ច​ឌីជីថល​, ​ការ​អភិវឌ្ឍន៍​ធនធាន​មនុស្ស​ ​ពិសេស​ផ្នែក​ជំនាញ​ទន់ ​(​Soft​ ​Skills​) ​ជាដើម​។

​ជា​ទីបញ្ចប់​, ​ឯកឧត្តម​អគ្គ​បណ្ឌិត​សភាចារ្យ​ ​ឧប​នាយក​រដ្ឋមន្ត្រី​ ​បាន​ជូន​ពរ ​ឯកឧត្តម​ឯក​អគ្គ​រាជ​ទូត​ជប៉ុន​ ទទួលបាន​នូវ​ជោគជ័យ​បន្ត​ទៀត​សម្រាប់​ការ​បំពេញភារកិច្ច​ថ្មី​របស់​ឯកឧត្តម​៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ជប៉ុន​ ​ផ្ដល់​ហិរញ្ញប្បទាន​ ​៣.៥​ ​ពាន់​លាន​ដុល្លារ ​ដើម្បី​ចូលរួម​អភិវឌ្ឍ​វិស័យ​អាទិភាព​នានា​របស់​កម្ពុជា​ appeared first on Millions times.

តាមដានជាមួយយើង៖ Million Times

ការលើកឡើងនេះ ស្របពេលដែលសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី១ ខែមេសានេះ បានអនុញ្ញាតឱ្យលោកស្រី Rabab Fatima អគ្គលេខាធិការរង UN និងជាតំណាងជាន់ខ្ពស់សម្រាប់ប្រទេសអភិវឌ្ឍន៍តិចតួច ប្រទេសកំពុងអភិវឌ្ឍន៍ គ្មានព្រំដែនជាប់សមុទ្រ និងប្រទេសដីកោះកំពុងអភិវឌ្ឍន៍តូចៗ ចូលជួបសម្ដែងការគួរសម និងពិភាក្សាការងារ.

លោកស្រីអគ្គលេខាធិការរង UN បានកោតសរសើរចំពោះការរីកចម្រើនយ៉ាងឆាប់រហ័សរបស់កម្ពុជា និងវាយតម្លៃខ្ពស់ចំពោះកម្ពុជា ដែលបានដាក់ចេញនូវផែនការអភិវឌ្ឍ និងការអភិរក្សបេតិកភណ្ឌ។

លោកស្រី បានបន្តថា អង្គការសហប្រជាជាតិ ប្ដេជ្ញាបន្តគាំទ្រកម្ពុជាក្នុងដំណើរការចាកចេញពីប្រទេសអភិវឌ្ឍតិចតួច​ ហើយអង្គការសហប្រជាជាតិ ក៏បានបង្កើតក្រុមការងារចំពោះកិច្ច​ ដើម្បីគាំទ្រដល់ដំណើរការចាកចេញនេះ។

លោកស្រី Rabab Fatima ក៏បានលើកឡើងដែរថា កម្ពុជាបានសម្រេចតាមលក្ខណៈវិនិច្ឆ័យរួចរាល់សម្រាប់ការចាកចេញពីក្រុមប្រទេសអភិវឌ្ឍន៍តិចតួច (LDC) តាមរយៈការវាយតម្លៃចំនួនពីរលើកកន្លងមក។ លោកស្រី ក៏បានគូសបញ្ជាក់ថា កម្ពុជាស្ថិតក្នុងដំណើរផ្លូវ ដើម្បីឈានចាកចេញពីក្រុមប្រទេសអភិវឌ្ឍន៍តិចតួចនៅឆ្នាំ២០២៩។

ជាការឆ្លើយតប សម្ដេចធិបតី បានស្វាគមន៍ចំពោះការបង្កើតក្រុមការងារចំពោះកិច្ច របស់អង្គការសហប្រជាជាតិ ដើម្បីគាំទ្រដំណើរការចាកចេញពីក្រុមប្រទេស LDC របស់កម្ពុជា។

សម្ដេចធិបតី បានសង្កត់ធ្ងន់ថា រាជរដ្ឋាភិបាល បានដាក់ចេញនូវវិធានការជាក់ស្ដែង ដើម្បីកសាងភាពធន់របស់កម្ពុជា តាមរយៈការដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដែលផ្ដោតលើការអភិវឌ្ឍមូលធនមនុស្ស ការដាក់ចេញការកែទម្រង់វិស័យអប់រំ សុខាភិបាល និងការបណ្ដុះបណ្ដាលវិជ្ជាជីវៈ ការពង្រឹងប្រព័ន្ធហិរញ្ញវត្ថុស្របតាមការវិវត្តនៃបច្ចេកវិទ្យារបស់ពិភពលោក និងការជំរុញភាពជាដៃគូជាមួយវិស័យឯកជន ជាដើម៕

អត្ថបទ៖ វីរៈ រូបភាព៖ បណ្ដាញសង្គមនាយករដ្ឋមន្ត្រី

second...

x

The post អង្គការសហប្រជាជាតិ ប្ដេជ្ញាបន្តគាំទ្រកម្ពុជាក្នុងដំណើរការចាកចេញពីប្រទេសអភិវឌ្ឍតិចតួច​ appeared first on Millions times.

តាមដានជាមួយយើង៖ Million Times

តាមរយៈទំព័រហ្វេសប៊ុករបស់ខ្លួន នៅព្រឹកថ្ងៃទី៥ ខែកុម្ភៈនេះ អ្នកឧកញ៉ា ម៉ុង ឬទ្ធី បានបង្ហោះថា ថ្ងៃនេះ​អ្នកឧកញ៉ា ​សរសេរ​ប្រវត្តិ​ វិថី​បណ្ឌិត​ ម៉ុង​ ឬទ្ធី​ ដែលមាន​ទីតាំង​ស្ថិតនៅ​ក្នុង​រាជធានី​ភ្នំពេញ​ ដើម្បី​ឱ្យ​ប្រិយមិត្ត​ដែលបាន​ធ្វើ​ដំណើរ​ឆ្លងកាត់ និង​ប្រកប​អាជីវកម្ម​អាស្រ័យ​ផលតាមបណ្តោយផ្លូវនេះ ព្រមទាំង​កូនចៅ​ជំនាន់ក្រោយៗបានដឹង​។

អ្នកឧកញ៉ា បានរំលឹកថា នៅក្នុង​ឆ្នាំ​១៩៩៨​ ខ្មែរ​ក្រហម​បាន​យល់ព្រម​ធ្វើ​សមាហរណកម្ម​ ជាមួយ​រាជរដ្ឋាភិបាល​កម្ពុជា​ ដើម្បី​បិទបញ្ចប់​សង្គ្រាម​បង្ហូរ​ឈាមកាប់សម្លាប់​ខ្មែរ​គ្នាឯង ១៩៧០-១៩៩៨=២៨ឆ្នាំសង្រ្គាម។

អគ្គនាយកក្រុមហ៊ុន ម៉ុង ឫទ្ធី បានរំលឹកបន្តថា នៅពេលស្រុកមាន​សង្គ្រាម​មិនបាន​កសាង​អភិវឌ្ឍន៍​អ្វី​នោះទេ​ គឺ​ជាប់ដៃតែការពារ​ជាតិជា​ចម្បង​។ ដោយសង្កេត​ឃើញជាក់ស្តែងពី​មហន្ដរាយនៃ​សង្គ្រាម​ ធ្វើឱ្យហេដ្ឋារចនាសម្ព័ន្ធ ​ផ្លូវ​ ស្ពាន​ សាលារៀន​ មន្ទីរពេទ្យ​ វត្ត​អារាម​ និងលំនៅឋាន ត្រូវបានខូចខាត​ស្ទើរតែ​ទាំងអស់​ អ្នកឧកញ៉ា ក៏បាន​ចូលរួម​ចំណែក​កសាង​អភិវឌ្ឍន៍​ឡើងវិញ​ជាច្រើន​ ជាមួយ​រាជរដ្ឋាភិបាល​កម្ពុជា​។

និយាយ​ដោយឡែក​ អ្នកឧកញ៉ា ម៉ុង ឬទ្ធី ​បាន​ចាប់ផ្ដើមជួយ​សាងសង់​ វិថី​បណ្ឌិត​ ម៉ុង​ ឬទ្ធី​ ក្នុង​ឆ្នាំ២០០៨ និងរួចរាល់​បើក​ឱ្យ​ដំណើរការ​ក្នុងឆ្នាំ​២០០៩។ អ្នកឧកញ៉ារូបនេះ បានបញ្ជាក់ថា «ខ្ញុំ​សរសេរ​នេះគ្មានគោល​​បំណងរំលើកយក​គុណស្រ័យ​អីទេ​ បើមាន​បងប្អូន​កូន​ក្មួយណា​ដឹងគុណ​ក៏បាន​ បើ​រមើលគុណ​ក៏មិនអីទេ​៕

អត្ថបទ៖ វីរៈ រូបភាព៖ អ្នកឧកញ៉ា ម៉ុង ឬទ្ធី  

second...

x

The post អ្នកឧកញ៉ា ម៉ុង ឬទ្ធី រំលឹកពីប្រវត្តិនៃការជួយសាងសង់​វិថី​បណ្ឌិត​ ម៉ុង​ ឬទ្ធី កាលពី១៨ឆ្នាំមុន appeared first on Millions times.

តាមដានជាមួយយើង៖ Million Times

តាមរយៈទំព័រហ្វេសប៊ុកផ្លូវការ លោកឯកអគ្គរដ្ឋទូតចិន បានលើកឡើងថា ក្នុងរយៈពេល ៣០ឆ្នាំកន្លងមកនេះ ប្រទេសកម្ពុជា បានរក្សាសន្តិភាព ស្ថិរភាព និងការអភិវឌ្ឍសេដ្ឋកិច្ចបានយ៉ាងឆាប់រហ័ស។

លោកថា ផលិតផលសរុបក្នុងស្រុកបានកើនឡើងពី ២.៧៩ពាន់លានដុល្លារអាមេរិក ក្នុងឆ្នាំ១៩៩៤ ដល់ ៤៦.៣៥ពាន់លានដុល្លារអាមេរិក ក្នុងឆ្នាំ ២០២៤ ហើយផលិតផលក្នុងស្រុកសរុបក្នុងមនុស្សម្នាក់ បានកើនឡើងពី ៣០២ដុល្លារអាមេរិក ក្នុងឆ្នាំ ១៩៩៤ ដល់ ២,៧១៣ដុល្លារអាមេរិក ក្នុងឆ្នាំ ២០២៤។

លោក វ៉ាង វិនពីន បានសរសេរបន្ថែមថា «យើងជឿជាក់ថា គ្មានការលំបាកណាមួយ អាចបញ្ឈប់ជំហាននៃការអភិវឌ្ឍរបស់ប្រទេសកម្ពុជាបានទេ។ យើងមានទំនុកចិត្តយ៉ាងពេញលេញលើទស្សនវិស័យអភិវឌ្ឍន៍របស់ប្រទេសកម្ពុជា។ យើងជឿជាក់នៅក្រោមម្លប់របស់ព្រះមហាក្សត្រ នរោត្តម សីហមុនី និងការដឹកនាំរបស់សម្តេច ហ៊ុន សែន និងនាយករដ្ឋមន្ត្រី ហ៊ុន ម៉ាណែត កម្ពុជាមុខជានឹងសម្រេចបាននូវគោលដៅនៃការអភិវឌ្ឍជាតិ និងការស្តារឡើងវិញរបស់ជាតិ»។ 

នៅក្នុងពិធីអបអរសាទរចំពោះខួបលើកទី ៣០ នៃសភាពាណិជ្ជកម្មចិនប្រចាំនៅកម្ពុជា កាលពីថ្ងៃទី៣១ ខែមករា លោកឯកអគ្គរដ្ឋទូតចិន ក៏បានលើកឡើងដែរថា ការរីកចម្រើន និងការអភិវឌ្ឍជាបន្តបន្ទាប់របស់សភាពាណិជ្ជកម្មចិននៅកម្ពុជា គឺជាការឆ្លុះបញ្ចាំងយ៉ាងច្បាស់លាស់នៃកិច្ចសហប្រតិបត្តិការ ដែលផ្តល់ផលប្រយោជន៍ទៅវិញទៅមក កាន់តែស៊ីជម្រៅរវាងប្រទេសចិន និងកម្ពុជា និងភាពកាន់តែរឹងមាំនៃមិត្តភាពជាដែកថែបរវាងប្រទេសទាំងពីរ។

លោកបានឱ្យដឹងថា សព្វថ្ងៃនេះ សភាពាណិជ្ជកម្មចិននៅកម្ពុជាដែលមានអាយុ៣០ឆ្នាំ កំពុងចាត់វិធានការដ៏រឹងមាំ និងមានទំនុកចិត្ត កំពុងរួបរួម និងដឹកនាំសហគ្រាសចិននៅកម្ពុជា ឲ្យខិតខំប្រឹងប្រែងដើម្បីអនាគតដ៏ភ្លឺស្វាង សម្រាប់កិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-កម្ពុជា៕

អត្ថបត៖ វីរៈ រូបភាព៖ ហ្វេសប៊ុកលោក វ៉ាង វិនពីន  

second...

x

The post ទូតចិន៖ ប្រទេសចិននឹងនៅតែបន្តគាំទ្រយ៉ាងរឹងមាំដល់ការអភិវឌ្ឍ និងការស្តារឡើងវិញរបស់ប្រទេសកម្ពុជា appeared first on Millions times.

ឯកឧត្តម Wang Wenbin បានលើកឡើងដូច្នេះ កាពីទី១៨ ខែធ្នូ ឆ្នាំ២០២៥ នៅទីស្តីការគណៈរដ្ឋមន្រ្តី នាឱកាសរៀបចំពិធីប្រគល់-ទទួលអំណោយកញ្ចប់ Panda ឆ្នាំ២០២៥ រវាងមូលនិធិចិនដើម្បីអភិវឌ្ឍជនបទ និងវេទិកាសម្ព័ន្ធសង្គមស៊ីវិល នៃទីស្តីការគណៈរដ្ឋមន្រ្តី។ ពិធីនេះបានប្រព្រឹត្តទៅក្រោមអធិបតីភាពឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងឯកឧត្តម វ៉ាង វិនពីន ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋប្រជាមានិតចិនប្រចាំកម្ពុជា ដោយមានការអញ្ជើញចូលរួមពីសំណាក់មន្រ្តីជាន់ខ្ពស់រាជរដ្ឋាភិបាល មន្រ្តីជាន់ខ្ពស់ទីស្ដីការគណៈរដ្ឋមន្រ្តី អាជ្ញាធរមូលដ្ឋាន លោកគ្រូ អ្នកគ្រូ និងសិស្សានុសិស្សជាច្រើននាក់ផងដែរ។ អំណោយកញ្ចប់ Panda ឆ្នាំ២០២៥ រួមមាន កាតាប Panda ចំនួន២១ ៦០០កញ្ចប់ និងកង់ចំនួន២ ៥០០គ្រឿង ដើម្បីចែកជូនដល់សិស្សានុសិស្សនៅតាមសាលាចំនួន១២៨ នៅរាជធានីភ្នំពេញ និងតាមបណ្តាខេត្តចំនួន១២ផ្សេងទៀត។

ឯកឧត្តម Wang Wenbin បានកោតសរសើរ ចំពោះចំណងមិត្តភាពរវាងចិន និងកម្ពុជា ដែលបាននាំមកនូវការអភិវឌ្ឍលើគ្រប់វិស័យ និងជាពិសេសបានផ្សារភ្ជាប់បេះដូងរបស់ប្រជាពលរដ្ឋនៃប្រទេសទាំងពី។ ឯកឧត្តមក៏បានបញ្ជាក់ផងដែរថា ប្រទេសចិននឹងបន្តជួយអភិវឌ្ឍសង្គមស៊ីវិលកម្ពុជា ដើម្បីគាំទ្រដល់ការលើកកម្ពស់ជីវភាពរបស់ប្រជាពលរដ្ឋកម្ពុជា ហើយសង្ឃឹមថានឹងមានសង្គមស៊ីវិលចិនជាច្រើនផ្សេងទៀត នឹងមកចូលរួមលើកកម្ពស់ជីវភាពប្រជាជនកម្ពុជា និងកាត់បន្ថយភាពក្រីក្រ។ ឯកឧត្តមសង្ឃឹមថាសិស្សានុសិស្សដែលទទួលបានអំណោយកញ្ចប់ Panda នេះ នឹងខិតខំរៀនសូត្រ ដើម្បីរួមចំណែកកសាងប្រទេសកម្ពុជា និងជំរុញទំនាក់ទំនងរវាងប្រទេសទាំងពីរឱ្យកាន់តែជិតស្និទ្ធ។

តាមដានជាមួយយើង៖ Million Times

ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត មានប្រសាសន៍ថា អំណោយដ៏ថ្លៃថ្លានេះឆ្លុះបញ្ចាំងពីចំណងមិត្តភាព សាមគ្គីភាព និងស្មារតីមនុស្សធម៌ ពិសេសសមានចិត្តស្រឡាញ់រាប់អាន ខ្វល់ខ្វាយ និងជួយទំនុកបម្រុងពីសំណាក់ប្រជាជន និងរដ្ឋាភិបាលចិន ចំពោះប្រទេសនិងប្រជាជនកម្ពុជា។ ម្ខាងទៀតក៏ឆ្លុះបញ្ចាំងពីការអភិវឌ្ឍនៃទំនាក់ទំនង និងផ្សារភ្ជាប់បេះដូងរវាងប្រជាជននិងប្រជាជន ជាពិសេសយុវជនដែលជាទំពាំងស្នងឫស្សី ហើយនឹងជ្រោងទង់នៃមិត្តភាពកម្ពុជា-ចិន ដើម្បីជាប្រយោជន៍ដល់ការអភិវឌ្ឍ ការកសាងជាតិ ការការពារជាតិ និងទំនើបកម្មរវាងប្រទេសទាំងពីរ។ ឯកឧត្តមឧបនាយករដ្ឋមន្ត្រីប្រចាំការ បានបន្តថា អំណោយកញ្ចប់ Panda ឆ្នាំ២០២៥ នេះ មិនមែនមានអត្ថន័យត្រឹមតែជាសម្ភារៈសិក្សា និងមធ្យោបាយធ្វើដំណើរទៅសាលារៀនប៉ុណ្ណោះទេ ប៉ុន្តែគឺជាការរួមចំណែកមួយក្នុងការកសាងមូលធនមនុស្ស ដែលត្រូវចំណាយពេលយូរអង្វែង តែជាកត្តាកំណត់អនាគតប្រទេសជាតិក្នុងរយៈពេលវែង។

ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានបន្តលើកឡើងថា ចំណងទាក់ទងរវាងកម្ពុជា-ចិន បានចាក់ឫសជ្រៅរាប់ពាន់ឆ្នាំ ហើយប្រវត្តិសាស្រ្តនេះក៏បានគូសបញ្ជាក់ផងដែរថា ចិននិងកម្ពុជាមាននិស្ស័យជាមួយនឹងគ្នា (Friends by destiny) ដែលមិនអាចកាត់ផ្តាច់បាន និងជាមិត្តដែលកម្ពុជាអាចពឹងពាក់បាន ទុកចិត្តបាន ព្រមទាំងជាមិត្តយល់ចិត្តមិនអាចបំបែកបាន ក្នុងគ្រប់កាលៈទេសៈ។ ក្នុងប្រវត្តិសាស្ត្រចុងក្រោយនេះ ចំណងមិត្តភាពដ៏មានតម្លៃនេះត្រូវបានទទួលស្គាល់និងពូនជ្រំ ដោយថ្នាក់ដឹកនាំជាច្រើនជំនាន់ ចាប់ផ្តើមពី ព្រះករុណាព្រះបាទ សម្តេចព្រះនរោត្តម សីហនុ ព្រះបរមរតនកោដ្ឋ និងលោកប្រធាន ម៉ៅ សេទុង និងឯកឧត្តម ជូ អេនឡាយ ហើយត្រូវបានបន្តពូនជ្រំ, ថែបំប៉ន និងបានបន្ដរីកលូតលាស់យ៉ាងរឹងមាំ ដោយសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត និង ឯកឧត្តមប្រធានាធិបតី ស៊ី ជីនពីង។

ក្នុងនាមរាជរដ្ឋាភិបាល និងប្រជាជនកម្ពុជា ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានថ្លែងអំណរគុណចំពោះរដ្ឋាភិបាល និងប្រជាជនចិន ដែលបានជួយទ្រទ្រង់ដល់ការស្តារ និងអភិវឌ្ឍកម្ពុជាលើគ្រប់វិស័យ និងតែងតែគាំទ្រដល់ការពង្រឹងសន្តិភាពនិងឯករាជ្យភាពរបស់កម្ពុជា ក្នុងរយៈពេលកន្លងមក។ ឯកឧត្តមឧបនាយករដ្ឋមន្ត្រីប្រចាំការបានបន្តថា វឌ្ឍនភាព វិបុលភាព និងការអភិវឌ្ឍសង្គម-សេដ្ឋកិច្ច ដែលកម្ពុជាសម្រេចបានគួរជាទីមោទនៈមកដល់ពេលនេះ គឺមិនអាចកាត់ផ្តាច់បានឡើយពីតួនាទីរបស់មិត្តចិន ហើយកម្ពុជានៅតែត្រូវការមិត្តចិន នៅក្នុងកាលៈទេសៈបច្ចុប្បន្នក៏ដូចជាទៅអនាគត។ ចំណងមិត្តភាពរវាងកម្ពុជា-ចិន ដែលបានឆ្លងកាត់ការសាកល្បងជាបន្តបន្ទាប់ នៅបន្តរឹងមាំជាលំដាប់ ហើយជឿជាក់ថានឹងសម្រេចបានសមិទ្ធផលជាផ្លែផ្កាឥតឈប់ឈរ ដើម្បីជាឧត្តមប្រយោជន៍ជូនប្រជាជន និងប្រទេសទាំងពីរ និងតំបន់ផងដែរ។

ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត មានជំនឿយ៉ាងមុតមាំថា មិត្តចិននឹងបន្តផ្តល់ការគាំទ្រ និងរួមចំណែកនៅក្នុងមាគ៌ានៃដំណើរអភិវឌ្ឍន៍ដ៏វែងឆ្ងាយរបស់កម្ពុជា ក៏ដូចជាដើម្បីបន្ថែមសន្ទុះថ្មីទៀតដល់ការកសាងសហគមន៍វាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់ ដោយផ្តោតលើការអភិវឌ្ឍប្រកបដោយភាពបើកចំហ ផលប្រយោជន៍រួមគ្នា និងចីរភាព ដោយយកប្រជាជនជាអាទិភាពស្នូល។

នៅក្នុងឱកាសនោះដែរ ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត ក៏បានថ្លែងអំណរគុណមិត្តចិនដែលបានជួយជ្រោមជ្រែងជំរុញឱ្យមានការឈប់បាញ់ និងការស្តារសន្តិភាពឡើងវិញ។ ឯកឧត្តមឧបនាយករដ្ឋមន្ត្រីប្រចាំការ បានបន្តថា ទោះបីជាស្ថានភាពមិនទាន់មានភាពល្អប្រសើរយ៉ាងណាក្តី តែការរួមចំណែករបស់ចិនក្នុងការជំរុញឱ្យមានការឈប់បាញ់ និងសន្តិភាពពិតប្រាកដនិងយូរអង្វែង គឺជាគុណតម្លៃដ៏ថ្លៃថ្លាសម្រាប់ប្រទេស និងប្រជាជនកម្ពុជា ជាពិសេសសម្រាប់ឱ្យប្រជាពលរដ្ឋរាប់សែននាក់ រួមទាំង ស្រ្តី កុមារ ជនចាស់ជរា ដែលត្រូវរត់ចោលផ្ទះសម្បែង និងសាលារៀន និងកំពុងជ្រកនៅក្នុងជំរំជនភៀសសឹកតាមបណ្តាខេត្តជាប់ព្រំដែន ត្រឡប់មកនៅផ្ទះសម្បែង និងចូលសាលារៀនរៀងៗខ្លួនឡើងវិញ។ ឯកឧត្តមឧបនាយករដ្ឋមន្ត្រីប្រចាំការ ក៏បានស្នើសុំភាគីចិនពិចារណាកៀរគរជំនួយមនុស្សធម៌ តាមលទ្ធភាពដែលអាចធ្វើបាន ដើម្បីជួយដល់ប្រជាជនភៀសសឹកកម្ពុជារាប់សែននាក់ផងដែរ៕

អត្ថបទ៖ ប៊ី

second...

x

The post ឯកឧត្តម Wang Wenbin៖ ប្រទេសចិននឹងបន្តជួយអភិវឌ្ឍសង្គមស៊ីវិលកម្ពុជា appeared first on Millions times.

ឯកឧត្តម រដ្ឋមន្រ្តីក្រសួងទេសចរណ៍ បានលើកឡើងដូច្នេះ នាឱកាសអញ្ជើញជាអធិបតីក្នុងពិធីប្រកាសបើកសិក្ខាសាលាថ្នាក់តំបន់ស្តីពីផែនការសកម្មភាពស្តារ និងភាពធន់វិស័យទេសចរណ៍មេគង្គឡានឆាង ឆ្នាំ ២០២៦-២០៣០ អមដោយការបកស្រាយរបស់ទូតទេសចរវ័យក្មេង មេគង្គ-ឡានឆាង នៅខេត្តសៀមរាប ដោយមានការចូលរួមពីសំណាក់ឯកឧត្តម Wang Wenbin ឯកអគ្គរាជទូតចិនប្រចាំកម្ពុជា និងប្រតិភូអន្តរជាតិមកពីបណ្តាប្រទេសចិន មីយ៉ាន់ម៉ា វៀតណាម ឡាវ និងកម្ពុជា ព្រមទាំងអ្នកជំនាញទេសចរណ៍ល្បីៗ សាស្រ្តាចារ្យមកពីសកលវិទ្យាល័យចិនធំៗ និងល្បី យុវជន-យុវនារីជាទូតទេសចរណ៍វ័យក្មេងមេគង្គ-ឡានឆាង ភ្ញៀវកិត្តយសជាតិ និងអន្តរជាតិ ប្រមាណជាង ៣០០ នាក់។

ក្នុងឱកាសនៃសិក្ខាសាលាជាលក្ខណៈអន្តរជាតិ និងមានសារៈសំខាន់នេះ គណៈអធិបតី បានកោតសរសើរ និងវាយតម្លៃខ្ពស់ចំពោះសិក្ខាសាលាថ្នាក់តំបន់ដែលមិនត្រឹមតែជាការចូលរួមចំណែកក្នុងការអភិវឌ្ឍវិស័យទេសចរណ៍ដែលជាវិស័យដ៏សំខាន់មួយក្នុងសេដ្ឋកិច្ច និងការរិះរកគំនិតផែនការបង្កើនសន្ទុះការងើបឡើងវិញរបស់វិស័យនេះ តាមរយៈការចូលរួមរបស់យុវជនពីបណ្តាប្រទេសជាសមាជិក។

តាមដានជាមួយយើង៖ Million Times

សិក្ខាសាលាអន្តរជាតិដ៏ធំនេះ ជាវេទិការឹតបន្តឹង និងពូនជ្រំទំនាក់ទំនងមិត្តភាព កិច្ចសហការ និងការផ្លាស់ប្តូរប្រជាជន និងប្រជាជនរវាងបណ្តាប្រទេសក្នុងអាងទន្លេមេគង្គ ដែលគម្រោងនេះត្រូវបានឧបត្តម្ភគាំទ្រទាំងស្រុងដោយភាគីមិត្តចិន។

ឆ្លៀតក្នុងឱកាសដ៏មានសារៈសំខាន់នេះ ឯកឧត្តមរដ្ឋមន្រ្តី បានថ្លែងថា សិក្ខាសាលាដ៏ធំ និងប្រកបដោយគុណភាព នឹងបន្ថែមអត្ថន័យឱ្យកាន់តែស៊ីជម្រៅដល់កិច្ចសហប្រតិបត្តិរវាងប្រទេសក្នុងតំបន់អាងទន្លេមេគង្គ ព្រមទាំងចំណងមិត្តភាពកម្ពុជា-ចិន និងទំនាក់ទំនងការទូតដ៏យូរលង់អស់រយៈពេល៦៧ឆ្នាំ ស្របតាមស្មារតី «មិត្តដែកថែប និងសហគមន៍វាសនារួម កម្ពុជា-ចិនគ្រប់រដូវកាល ប្រកបដោយភាពស៊ីជម្រៅ និងភាពជាក់ស្ដែង ក្នុងយុគសម័យថ្មី» ក៏ដូចជាក្របខណ្ឌកិច្ចសហប្រតិបត្តិការត្បូងពេជ្ររវាងកម្ពុជា-ចិន។

ឯកឧត្តម បានបន្តថា ជាពិសេសគឺផ្តល់ឱកាសរួមគ្នាដល់យុវជនបន្តវេនពីប្រទេសសមាជិក ក្នុងការចូលរួមគ្នាគិត និងរួមគ្នាធ្វើ ដើម្បីអភិវឌ្ឍទេសចរណ៍ តាមរយៈការទាញយកពីបច្ចេកវិទ្យានិងគំនិតច្នៃប្រឌិតថ្មី ដើម្បីជម្រុញការងើបឡើងវិញនូវវិស័យទេសចរណ៍ បន្ទាប់ពីត្រូវជួបផលវិបាកយ៉ាងខ្លាំងពីវិបត្តិជម្ងឺកូវីដ១៩ កន្លងទៅ។

សិក្ខាសាលាថ្នាក់តំបន់នេះ នឹងផ្តល់ឱកាសដ៏យុវជនជានិស្សិត ជាអ្នកប្រកបវិជ្ជាជីវៈ ឬ ក៏សហគ្រិន ភ្ជាប់ទំនាក់ទំនងគ្នា ធ្វើការរួមគ្នា សហការចាប់ឱកាសបង្កើតអាជីវកម្មទេសចរណ៍រួមគ្នាផងដែរ ដើម្បីជំរុញសន្ទុះងើបឡើងវិញនៃការវិនិយោគក្នុងវិស័យទេសចរណ៍ និងកំណើនភ្ញៀវទេសចរជាតិ ចិន និងអន្តរជាតិមកលេងតំបន់អាងទន្លេមេគង្គនេះ៕

អត្ថបទ៖ ប៊ី

second...

x

The post ឯកឧត្តម ហួត ហាក់៖ យុវជនរួមចំណែកសំខាន់ក្នុងការអភិវឌ្ឍវិស័យទេសចរណ៍ appeared first on Millions times.

ការលើកឡើងដូច្នេះ ត្រូវបានធ្វើឡើង នាព្រឹកថ្ងៃទី២៦ ខែតុលា ឆ្នាំ២០២៥ អំឡុងពេលកិច្ចពិភាក្សាការងាររវាងសម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកបណ្ឌិត Carlos Felipe Jaramillo អនុប្រធានធនាគារពិភពលោក ទទួលបន្ទុកតំបន់អាស៊ីបូព៌ា និងប៉ាស៊ីហ្វិក ក្នុងឱកាសចូលរួមកិច្ចប្រជុំ កំពូលអាស៊ាន លើកទី៤៧ និងកិច្ចប្រជុំកំពូលពាក់ព័ន្ធ នៅទីក្រុងគូឡាឡាំពួ ប្រទេសម៉ាឡេស៊ី ពីថ្ងៃទី២៦-២៨ ខែតុលា ឆ្នាំ២០២៥។

ក្នុងឱកាសនៃជំនួប, លោកបណ្ឌិតអនុប្រធានធនាគារពិភពលោកបានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អរវាងរាជរដ្ឋាភិបាលកម្ពុជា និងធនាគារពិភពលោក និងបានសម្តែងក្តីសង្ឃឹមយ៉ាងមុតមាំថា កិច្ចសហប្រតិបត្តិការនេះនឹងបន្តរីកចម្រើនបន្ថែមទៀត។ លោកបណ្ឌិត ក៏បានសម្តែងនូវបំណងចង់ស្វែងយល់បន្ថែមអំពីវិស័យអាទិភាពរបស់រាជរដ្ឋាភិបាលកម្ពុជា ក្នុងគោលដៅឈានទៅសម្រេចបាននូវចក្ខុវិស័យកម្ពុជា ឆ្នាំ២០៥០។

តាមដានជាមួយយើង៖ Million Times

លោកបណ្ឌិត បានកោតសរសើរ និងវាយតម្លៃខ្ពស់ ចំពោះមាគ៌ាច្បាស់លាស់ប្រកបដោយមហិច្ឆតារបស់រាជរដ្ឋាភិបាលកម្ពុជា ក្នុងការឈានទៅសម្រេចបាននូវចក្ខុវិស័យកម្ពុជា ឆ្នាំ២០៥០ ខណ:ដែលពិភពលោកពោរពេញទៅដោយភាពមិនច្បាស់លាស់ និងបញ្ហាប្រឈម។ លោកបណ្ឌិត បានគូសបញ្ជាក់ជាថ្មីម្តងទៀត ថា ធនាគារពិភពលោកត្រៀមខ្លួនជានិច្ចដើម្បីបន្តសហការ និងចូលរួមជាមួយកម្ពុជា សំដៅជំរុញការសម្រេចទិសដៅរបស់កម្ពុជានាពេលអនាគត។

ជាការឆ្លើយតប, សម្ដេចបវរធិបតី បានគូសបញ្ជាក់ថា កម្ពុជាបានដាក់ចេញ និងកំពុងអនុវត្តនូវយុទ្ធសាស្ត្របញ្ចកោណ-ដំណាក់កាលទី១ ដែលផ្ដោតសំខាន់ ជាអាទិ៍លើ៖ ១. វិស័យអប់រំ សម្រាប់អភិវឌ្ឍធនធានមនុស្សប្រកបដោយគុណភាព និងគុណវុឌ្ឍិគ្រប់គ្រាន់ សំដៅជំរុញផលិតភាពការងារ។

២. វិស័យហេដ្ឋារចនាសម្ព័ន្ធ សម្រាប់បម្រើសកម្មភាពសេដ្ឋកិច្ច ជាពិសេសការលើកស្ទួយវិស័យដឹកជញ្ជូន និងភស្តុភារ។ ៣. ការធានាបាននូវការផ្គត់ផ្គង់ថាមពលកកើតឡើងវិញ ដែលបច្ចុប្បន្ន កម្ពុជាប្រើប្រាស់ប្រភពថាមពលកកើតឡើងវិញចំនួន ៦២% និងប្ដេជ្ញាចិត្តក្នុងការបង្កើនឱ្យបាន ៧០% នៅឆ្នាំ២០៣០។

៤. បច្ចេកវិទ្យា និងឌីជីថលូបនីយកម្ម ដែលអនុញ្ញាតឱ្យកម្ពុជាអាចគ្រប់គ្រងបាននូវហានិភ័យ ក៏ដូចជាការជំរុញសកម្មភាពសេដ្ឋកិច្ចឱ្យកាន់តែល្អប្រសើរជាមួយនឹងប្រសិទ្ធភាពខ្ពស់ ផលិតភាពខ្ពស់ និងគុណភាពខ្ពស់ ៥. ការធានាបាននូវកំណើន និងការអភិវឌ្ឍប្រកបដោយចីរភាព។

ព្រមជាមួយគ្នានេះ, សម្ដេចបវរធិបតីក៏បានសម្ដែងក្ដីរីករាយរងចាំទទួលស្វាគមន៍លោកបណ្ឌិតអនុប្រធានធនាគារពិភព នៅកម្ពុជា នាពេលខាងមុខដ៏ខ្លី៕

អត្ថបទ៖ ប៊ី

second...

x

The post World Bank បន្តចូលរួមអភិវឌ្ឍកម្ពុជា ឈានទៅសម្រេចបានចក្ខុវិស័យកម្ពុជាឆ្នាំ ២០៥០ appeared first on Millions times.

លោក ង៉ូវ សេងកាក់ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប បានចូលរួមផ្សព្វផ្សាយទិវាទេសចរណ៏ពិភពលោក ឆ្នាំ ២០២៥ ក្រោមប្រធានបទ “ទេសចរណ៏ និងបរិវត្តកម្មប្រកបដោយចីរភាព” កាលពីរសៀលថ្ងៃទី ១០ ខែតុលា​ ឆ្នាំ ២០២៥​។

លោក ង៉ូវ សេងកាក់ បានថ្លែងថា រាជរដ្ឋាភិបាលកម្ពុជា បានបន្តចាត់ទុកវិស័យទេសចរណ៍ជាវិស័យអាទិភាព និងជាឆ្អឹងខ្នងសេដ្ឋកិច្ចដ៏សំខាន់ ដោយមានមូលដ្ឋានគ្រឹះរឹងមាំនៃសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សាធារណៈល្អប្រសើរ និងស្ថិរភាពម៉ាក្រូសេដ្ឋកិច្ចមានលំនឹង តាមរយៈការដាក់ចេញនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី ១ ដើម្បីកំណើន ការងារ សមធម៌ ប្រសិទ្ធភាព និងចីរភាព ដែលកំពុងបន្តដំណើរឆ្ពោះទៅសម្រេចបានគោលដៅចក្ខុវិស័យកម្ពុជាឆ្នាំ ២០៥០ ក្លាយជាប្រទេសមានចំណូលខ្ពស់។

តាមដានជាមួយយើង៖ Million Times

លោកបានបន្តថា គោលដៅទេសចរណ៍សកលឈានមុខ ប្រកបដោយភាពសម្បូរបែប និងភាពកក់ក្ដៅ គឺសម្រេចបានតាមរយៈការអនុវត្តជាក់ស្ដែងលើចំណុចសំខាន់ៗដូចជា ការផ្លាស់ប្តូរពីទេសចរណ៍ដែលផ្ដោតតែកំណើនបរិមាណ ទៅជាទេសចរណ៍ដែលផ្ដោតលើ គុណភាព ចីរភាព និងបរិយាបន្ន ដោយឈរលើគោលការណ៍គ្រឹះ «ទេសចរណ៍ផ្សារភ្ជាប់ទឹក ដី និងធម្មជាតិ»។

លោកបានបន្តទៀតថា វិស័យទេសចរណ៍ត្រូវតែសម្រេចបាននូវគោលដៅយុទ្ធសាស្ត្រចំនួន ៣ គឺ៖ ភាពប្រកួតប្រជែងទេសចរណ៍ ចីរភាពទេសចរណ៍ និងបរិយាបន្នទេសចរណ៍។ បន្ថែមពីនេះ គឺលើកកម្ពស់ប្រសិទ្ធភាពនៃការគ្រប់គ្រង និងអភិវឌ្ឍទេសចរណ៍ ស្របតាមចក្ខុវិស័យ ស្អាត បៃតង និងចីរភាព។

លោកអភិបាលរងខេត្ត ក៏បានណែនាំ និងជំរុញឱ្យគ្រប់ភាគីទាំងអស់ បង្កើនការវិនិយោគគាំទ្របរិស្ថាន និងកាត់បន្ថយផលប៉ះពាល់ពីការប្រែប្រួលអាកាសធាតុ ដោយគិតគូរលើការអភិវឌ្ឍ និងអភិរក្សធនធានធម្មជាតិ របៀងជីវៈចម្រុះ និងការប្រែប្រួលអាកាសធាតុ។

លោកក៏បានជំរុញការអនុវត្តស្តង់ដារបៃតង ដូចជាស្តង់ដារសណ្ឋាគារបៃតងអាស៊ាន និងបង្កើតស្តង់ដារបៃតងសម្រាប់សេវាទេសចរណ៍ផ្សេងទៀត ដើម្បីសម្រេចគោលដៅអភិវឌ្ឍន៍ប្រកបដោយចីរភាព ពិសេសវិស័យទេសចរណ៍ប្រកាន់ខ្ជាប់នូវទស្សនាទាន «ការអភិរក្សបម្រើដល់ការអភិវឌ្ឍ ការអភិវឌ្ឍបម្រើដល់ការអភិរក្ស» ដើម្បីផលប្រយោជន៍យូរអង្វែងដល់មនុស្សជំនាន់ក្រោយ ពិសេសបង្កើនសមត្ថភាពអ្នកជំនាញទេសចរណ៍ ដើម្បីពង្រឹងការប្រកួតប្រជែង និងឆ្លើយតបទីផ្សារ ហើយនិងគិតគូរអំពីសមភាពយេនឌ័រ យុវជន និងសេដ្ឋកិច្ចក្រៅប្រព័ន្ធ ក្នុងវិស័យទេសចរណ៍ ដើម្បីរួមចំណែកដល់ការអភិវឌ្ឍប្រកបដោយចីរភាព បរិយាបន្ន និងភាពធន់នឹងវិបត្តិ។

លោក ង៉ូវ សេងកាក់ បានគូសបញ្ជាក់ថា ទេសចរណ៍គឺជាកម្លាំងដ៏ខ្លាំងក្លាក្នុងការផ្លាស់ប្តូរ វាបង្កើតការងារ ជំរុញសេដ្ឋកិច្ចមូលដ្ឋាន និងកសាងស្ពានភ្ជាប់ទំនាក់ទំនងរវាងវប្បធម៌នានា។ លោកបានអំពាវនាវថា៖ «ចូរយើងរួមគ្នាប្រើប្រាស់ទេសចរណ៍ជានាវាសម្រាប់ការកសាងភាពធន់ មូលដ្ឋានគ្រឹះរឹងមាំ ចីរភាព និងវឌ្ឍនភាពរួម ហើយលើកកម្ពស់ភាពជាដៃគូរដ្ឋ-ឯកជន-ប្រជាជន ដែលផ្ដល់ឱកាសដល់ប្រជាជនមូលដ្ឋានចូលរួម និងទទួលបានផលប្រយោជន៍អតិបរមាពីការអភិវឌ្ឍ»។

គ្រឹះស្ថានអង្គរ កាលពីថ្ងៃទី ០១ ខែតុលា ឆ្នាំ ២០២៥ បានឱ្យដឹងថា រយៈពេល ៩ ខែ ឆ្នាំ ២០២៥ នេះ ការលក់សំបុត្រចូលទស្សនារមណីយដ្ឋានអង្គរ ទទួលបានចំណូលសរុប ៣២.៧ លានដុល្លារ​​ពីមានភ្ញៀវទេសចរបរទេស ចំនួន ៧០៥ ២៦៩ នាក់ កើនឡើង ០.៧៧%។

គ្រឹះស្ថានអង្គរ បានឱ្យដឹងទៀតថា ក្នុងរយៈពេល ៩ ខែ ឆ្នាំ ២០២៥ នេះ មានភ្ញៀវទេសចរបរទេស ១៤ ៣៦៤ នាក់ បានចូលទស្សនា នៅប្រាសាទកោះកែ ដោយទទួលបានចំណូល ២១៥ ៤៦០ ដុល្លារ​។

​បន្ថែមពីនេះ ក្នុងរយៈពេល៩ខែនេះ ការ​លក់សំបុត្រ នៅប្រាសាទបេងមាលា ទទួលបានចំណូល ១១០ ១៣០ ដុល្លារ ពីភ្ញៀវចំនួន ១១ ០១៣ នាក់, ការលក់សំបុត្រ នៅភ្នំក្បាលស្ពាន ទទួលបានចំណូល ៤ ៣៦០ ដុល្លារ ពីភ្ញៀវ​​ចំនួន ៨៧២ នាក់ និងចំណូលពីការលក់សំបុត្រទូក មានចំនួន ៤៤៥ ០២៣ដុល្លារ។

គួររំលេចផងដែរថា រយៈពេល ៩ ខែ ឆ្នាំ ២០២៥ នេះ គ្រឹះស្ថានអង្គរ​ឧបត្ថម្ភមូលនិធិគន្ធបុប្ផាកម្ពុជា ​ចំនួន ​១ ៤១០ ៥៣៨ ដុល្លារ​៕

second...

x

The post រដ្ឋបាលខេត្តសៀមរាប អំពាវនាវឱ្យវិស័យទេសចរណ៍ផ្តោតលើការអភិវឌ្ឍប្រកបដោយចីរភាព បរិយាបន្ន និងភាពធន់នឹងវិបត្តិ appeared first on Millions times.