គម្រោងស្ទឹងឃ្លៀច រំពឹងផ្គត់ផ្គង់ទឹកស្រោចស្រព ៤ម៉ឺនហិកតា និងពង្រឹងសន្តិសុខទឹក

Manuk Bee — Wed, 19 Aug 2026 12:37:08 +0000

រដ្ឋមន្ត្រីក្រសួងធនធានទឹក និងឧតុនិយម ឯកឧត្តម ថោ ជេដ្ឋា បានចុះពិនិត្យជាក់ស្តែងវឌ្ឍនភាពការងារគម្រោងអភិវឌ្ឍន៍ធនធានទឹកស្ទឹងឃ្លៀច ក្នុងស្រុកឱរ៉ាល់ ខេត្តកំពង់ស្ពឺ ដែលគិតត្រឹមពាក់កណ្តាលខែសីហា សម្រេចបានប្រមាណ ២២ ភាគរយ។

ការចុះពិនិត្យនេះធ្វើឡើងនៅព្រឹកថ្ងៃទី១៩ ខែសីហា ឆ្នាំ២០២៦ នៅទីតាំងគម្រោងស្ថិតក្នុងភូមិត្រពាំងថ្មៀរ ឃុំតាសាល និងភូមិសាមគ្គី ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ។

ក្នុងឱកាសនោះ ក៏មាននិស្សិតផ្នែកវិស្វកម្មចំនួន ២០ នាក់ មកពីវិទ្យាស្ថានបច្ចេកវិទ្យាកម្ពុជា (ITC) ចូលរួមចុះសិក្សា និងដកស្រង់បទពិសោធន៍ផ្ទាល់នៅការដ្ឋានគម្រោងអភិវឌ្ឍន៍ធនធានទឹកដ៏សំខាន់នេះផងដែរ។

យោងតាមក្រសួងធនធានទឹក គម្រោងអភិវឌ្ឍន៍ធនធានទឹកស្ទឹងឃ្លៀច ស្ថិតនៅចម្ងាយប្រមាណ ៨២ គីឡូម៉ែត្រពីក្រុងច្បារមន នៃខេត្តកំពង់ស្ពឺ។ គម្រោងនេះបានចាប់ផ្តើមអនុវត្តនៅខែធ្នូ ឆ្នាំ២០២៥ ហើយគិតត្រឹមពាក់កណ្តាលខែសីហា ឆ្នាំ២០២៦ វឌ្ឍនភាពការងារសម្រេចបានប្រមាណ ២២ ភាគរយ។

ការងារសំខាន់ៗរបស់គម្រោង រួមមានការសាងសង់តួទំនប់មេមួយកន្លែង ទំនប់បង្ហៀរមួយកន្លែង ទ្វារទឹកមួយកន្លែង អគារគ្រប់គ្រងទំនប់មួយកន្លែង ផ្លូវចូលទីតាំងគម្រោងមួយខ្សែប្រវែង ១៣ គីឡូម៉ែត្រ និងសំណង់លូដោះទឹកមួយចំនួននៅតាមបណ្តោយផ្លូវ។

នៅពេលការងារសាងសង់បញ្ចប់ជាស្ថាពរ គម្រោងស្ទឹងឃ្លៀចមានសមត្ថភាពស្តុកទឹកបានប្រមាណ ១១៥ លានម៉ែត្រគូប និងនឹងដើរតួនាទីសំខាន់ក្នុងការធានាសន្តិសុខទឹក និងកាត់បន្ថយគ្រោះទឹកជំនន់។

គម្រោងនេះនឹងផ្តល់ទឹកសម្រាប់ស្រោចស្រពផ្ទៃដីស្រូវវស្សាចំនួន ៣៥,០០០ ហិកតា និងផ្ទៃដីស្រូវប្រាំងចំនួន ៥,០០០ ហិកតា សរុបប្រមាណ ៤០,០០០ ហិកតា។

លើសពីនេះ គម្រោងនឹងផ្តល់ទឹកសម្រាប់ការប្រើប្រាស់ប្រចាំថ្ងៃដល់ប្រជាពលរដ្ឋ និងការប្រើប្រាស់ក្នុងវិស័យឧស្សាហកម្ម ដោយគ្របដណ្តប់លើខេត្តកំពង់ស្ពឺ ខេត្តកណ្តាល ខេត្តតាកែវ និងរាជធានីភ្នំពេញ។

គម្រោងនេះក៏មានសក្តានុពលក្នុងការបង្កើតតំបន់ទេសចរណ៍ធម្មជាតិ កែលម្អប្រព័ន្ធជីវៈចម្រុះ ជាប្រភពទឹកសម្រាប់សត្វព្រៃ និងបង្កើនផលត្រីក្នុងតំបន់ឱ្យកាន់តែសម្បូរបែបផងដែរ៕

អត្ថបទ៖ ប៊ី

តាមដានជាមួយយើង៖ Million Times

The post គម្រោងស្ទឹងឃ្លៀច រំពឹងផ្គត់ផ្គង់ទឹកស្រោចស្រព ៤ម៉ឺនហិកតា និងពង្រឹងសន្តិសុខទឹក appeared first on Millions times.

ស្ទឹងឃ្លៀត Archives - Millions times

គម្រោង​ស្ទឹង​ឃ្លៀច​ ​រំពឹង​ផ្គត់ផ្គង់​ទឹក​ស្រោចស្រព​ ៤​ម៉ឺន​ហិកតា​ ​និង​ពង្រឹង​សន្តិសុខ​ទឹក​

គម្រោងស្ទឹងឃ្លៀច រំពឹងផ្គត់ផ្គង់ទឹកស្រោចស្រព ៤ម៉ឺនហិកតា និងពង្រឹងសន្តិសុខទឹក