សម្ដេច ហ៊ុន សែន Archives - Millions times

សម្ដេច ហ៊ុន សែន ប្រាប់ប្រជាជនខ្មែរថា ការវះកាត់របស់គ្រូពេទ្យចិនថ្វាយព្រះមហាក្សត្រទទួលបានជោគជ័យហើយ

Vin Chang — Mon, 20 Apr 2026 04:28:30 +0000

នៅព្រឹកថ្ងៃទី២០ខែមេសាឆ្នាំ២០២៦នេះ សម្ដេចតេជោ ហ៊ុន សែន កំពុងនៅប្រទេសចិនផ្ទាល់ ដើម្បីមកកំដរព្រះមហាក្សត្រ និងហ្លូងម៉ែក្នុងពេលវេលាដ៏លំបាកនេះ ព្រោះព្រះរាជសុខភាពរបស់ព្រះមហាក្សត្រ គឺជាសុខភាពរបស់ប្រទេសជាតិទាំងមូល។

តាមដានជាមួយយើង៖ Million Times

ក្នុងឱកាសទៅកំដរផ្ទាល់នេះដែរ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាបានអះអាងថាការវះកាត់របស់គ្រូចិនពេទ្យ ថ្វាយចំពោះព្រះមហាក្សត្រជាទីគោរពសក្ការៈបានទទួលជោគជ័យហើយ។

ការវះកាត់បានធ្វើនៅព្រឹកថ្ងៃ២០ ខែមេសាឆ្នាំ២០២៦នេះ។ ពេលនេះព្រះករុណាព្រះអង្គបានដឹងព្រះកាយបន្ទាប់ពីអស់ថ្នាំសណ្តំ។ ពេលនេះគ្រូពេទ្យកំពុងតាមដានដោយយកចិត្តទុកដាក់នូវការវិវត្តប្រែប្រួលក្រោយការវះកាត់។ ព្រះករុណាព្រះមហាក្សត្រ និងសម្តេចម៉ែព្រះអង្គសូមអរព្រះគុណ និងអរគុណចំពោះព្រះសង្ឃ និងប្រជាពលរដ្ឋ ដែលបានផ្ញើសារថ្វាយព្រះពរចំពោះព្រះអង្គ។

សម្ដេចតេជោ ហ៊ុន សែន ក៏សូមយកឱកាសនេះ អរគុណប្រធានាធិបតី ស៊ី ជីនភីង ប្រមុខរដ្ឋាភិបាលនៃសាធារណរដ្ឋប្រជាមានិតចិនដែលបានយកចិត្តទុកដាក់ចំពោះព្រះរាជសុខភាពរបស់ព្រះមហាក្សត្រកម្ពុជា។ សូមអរគុណជាពិសេសដល់ក្រុមគ្រូពេទ្យដ៏ពូកែដែលបានវះកាត់ប្រកបដោយជោគជ័យនិងសុវត្តិភាពសម្រាប់ព្រះមហាក្សត្រជាទីគោរពស្រឡាញ់របស់ប្រជាជនកម្ពុជា។

សូមបញ្ជាក់ថាសម្ដេចតេជោ ហ៊ុន សែន បានទៅប្រទេសចិនជាមួយកូនប្រុស២នាក់គឺ ឯកឧត្តម ហ៊ុន ម៉ានិត និងឯកឧត្តម ហ៊ុន ម៉ានី តាំងពីថ្ងៃទី១៧ខែមេសាឆ្នាំ ២០២៦ មកម្ល៉េះ ដោយមានគោលដៅតែមួយគត់គឺកំដរព្រះមហាក្សត្រ និងហ្លូងម៉ែក្នុងពេលវេលាដ៏លំបាកនេះ ព្រោះព្រះរាជសុខភាពរបស់ព្រះមហាក្សត្រគឺជាសុខភាពរបស់ប្រទេសជាតិទាំងមូល៕

អត្ថបទ៖ ឆដា, រូបភាព៖

The post សម្ដេច ហ៊ុន សែន ប្រាប់ប្រជាជនខ្មែរថា ការវះកាត់របស់គ្រូពេទ្យចិនថ្វាយព្រះមហាក្សត្រទទួលបានជោគជ័យហើយ appeared first on Millions times.

សម្តេច ហ៊ុន សែន ចែកបទពិសោធន៍អប់រំកូនៗ ផ្តោតលើវិន័យ និងគុណធម៌ ក្លាយជាពេជ្រកំពុងឆ្នៃ និងពេជ្រកែឆ្នៃរួច និងកំពុងរក្សាទុក

ទីន Tin — Thu, 13 Mar 2025 10:13:42 +0000

“ពេជ្រកំពុងឆ្នៃ និងពេជ្រកែឆ្នៃរួច និងកំពុងរក្សាទុក ឬនិយាយមួយបែបគឺដាវកំពុងផលិត ដាវកំពុងប្រើ និងកំពុងសំលៀងបន្ត”។ នេះជាសំណេរដ៏មានអត្ថន័យរបស់សម្តេច ហ៊ុន សែន អតីតនាយករដ្ឋមន្រ្តី នៅលើបណ្តាញសង្គម នារសៀលថ្ងៃទី១៣ ខែមីនា ឆ្នាំ២០២៥។

តាមដានជាមួយយើង៖ Million Times

សំណេរដ៏ជ្រាលជ្រៅ អមដោយរូបថតប៉ុន្មានសន្លឹក សម្តេច ហ៊ុន សែន បានកត់សម្គាល់ថា បង្ហាញពីជោគជ័យនៃការអប់រំបណ្តុះបណ្តាលកូនៗ ដែលពុកម៉ែប្រើពេលជាង ៤០ឆ្នាំទើបទទួលផលដូចថ្ងៃនេះ។ សម្តេចបានសរសេរយ៉ាងដូច្នេះថា «ទោះពួកកូនជាកូននាយករដ្ឋមន្ត្រី តែពួកកូនមិនមានម៉ូតូ ឬឡានជិះទេ ពួកកូនត្រូវដើរទៅរៀន ព្រោះសាលាមិនឆ្ងាយពីផ្ទះទេ (សាលាចតុមុខ) សំណាងជាងគេ ម៉ាណែត បានកង់ជិះព្រោះត្រូវរៀននៅវិទ្យាល័យព្រះសុីសុវត្តិ ដែលឆ្ងាយជាងគេបន្តិច»។

សម្តេចប្រធានព្រឹទ្ធសភា បានសរសេរបន្តថា ពុកមានលទ្ធភាពគ្រប់គ្រាន់ទិញឡាន ឬម៉ូតូឲ្យកូនជិះ តែពុកចង់ឲ្យពួកកូនស្គាល់នូវជីវភាពប្រជាជនធម្មតាដូចកាលពុកនៅពីក្មេង។ ពេលកូនណាមួយមានកំហុស ពួកកូនត្រូវជាប់វិន័យទាំងអស់គ្នា ដោយអង្គុយអានសៀវភៅទាំងអស់គ្នា ព្រោះពុកចង់ឲ្យពួកកូនចេះជួយដាស់តឿនគ្នាសាមគ្គីគ្នា ដើម្បីជៀសវាងជាប់វិន័យទាំងអស់គ្នា។ ពេលពួកកូនចេញទៅរៀននៅក្រៅប្រទេសពុកទៅសរសេរវិន័យបិទក្នុងបន្ទប់គេង បន្ទប់ទឹកដែលពុកចាំជាងគេនៅបារាំង សម្រាប់ ម៉ានិត ម៉ានី ម៉ាលី គឺ(ចេញពីផ្ទះ៥០០ម៉ែត្រត្រូវប្រាប់បងណាហ្រ្គា និងសុខហ៊ា និងចាយលុយលើស 100France ត្រូវសុំការអនុញ្ញាតពីសុខហ៊ា)។ ពេលពួកកូនចេញទៅរៀនជុំគ្នានៅអាមេរិកដែលមាន ម៉ាណា ម៉ានិត ម៉ានី ម៉ាលី លើកលែងតែ ម៉ាណែត ពុកសរសេរវិន័យ (ដើរឃ្លាតពីផ្ទះ៥០០ម៉ែត្រត្រូវសុំអុំ ចាយលុយលើស៥០ដុល្លារត្រូវសុំពីអុំ) ទាំងនៅបារាំង ទាំងនៅអាមេរិកសុទ្ធមានការកំណត់ម៉ោងត្រូវចូលគេងនិងត្រូវបិទភ្លើងបិទម៉ាសុីនកំដៅ ម៉ាសុីនត្រជាក់ដើម្បីសន្សំសំចៃភ្លើង។

បន្ថែមទៀតនោះ សម្តេច ហ៊ុន សែន សរសេរក្នុងន័យដើមថា ពុកម៉ែសូមអរគុណកូនៗ ដែលជាង២០ឆ្នាំមុនបាននិយាយជាមួយគ្នាដែលពុកបានលួចស្តាប់ឮម៉ានិតនិយាយថា ប្រាប់ទាំងអស់គ្នាថា (ពុកម៉ែតឹងតែងចំពោះពួកយើងគឺចង់ឲ្យយើងល្អ)។ ពិតមែនតែពេលនេះ ពួកកូនមានប្រពន្ធ មានប្តី និងមានកូនព្រមទាំងចេញដឹកនាំប្រទេស ឬចូលរួមក្នុងការងារបំរើជាតិក្នុងឋានៈខ្ពង់ខ្ពស់តែពុកនៅរង់ចាំធ្វើជា ថ្មសំលៀងសម្រាប់ពួកកូនតទៅទៀត។ ពុកម៉ែចង់ឲ្យកូនៗខិតខំបណ្តុះបណ្តាលអប់រំកូនៗដែលជាចៅរបស់ពុកម៉ែតាមរបៀបពុកម៉ែ តទៅទៀតពិសេសផ្តោតលើគុណធម៍ ចរិយាធម៍ សិលធម៍ចេះជួយអ្នកក្រីក្រ ទន់ខ្សោយ គោរពចាស់ទុំ សុភាពរាបសារ មិនឆ្មើងឆ្មៃ។ល។ ចៅរបស់ពុកម៉ែជាចៅល្អ ហើយតែត្រូវតែតាមតម្រង់ទិសពួកគេតទៅទៀត៕

អត្ថបទ៖ សាងតេជៈ រូបភាព៖ ផេកសម្តេចតេជោ

The post សម្តេច ហ៊ុន សែន ចែកបទពិសោធន៍អប់រំកូនៗ ផ្តោតលើវិន័យ និងគុណធម៌ ក្លាយជាពេជ្រកំពុងឆ្នៃ និងពេជ្រកែឆ្នៃរួច និងកំពុងរក្សាទុក appeared first on Millions times.

សម្ដេច ហ៊ុន សែន សម្របសម្រួលបញ្ចប់ជម្លោះ ណន សុខហេង ព្រមថៅកែ ព្រមទាំងថវិកា ១ ម៉ឺនដុល្លារ និង ៣៥លានរៀល ហើយបង្កើតហាងដុតនំប៉័ង

Vin Chang — Thu, 31 Oct 2024 06:47:36 +0000

ក្រោយឃើញផ្ទុះព័ត៌មានករណីថៅកែលក់គ្រឿងសំណង់មិនបើកប្រាក់ខែឲ្យកម្មករ ហើយកម្មករបានលួចចាប់ឆ្កែរបស់ថៅកែទៅស្រុកកំណើតខាង ខេត្តក្រចេះ រហូតមានពាក្យប្ដឹងផ្ដល់ និងឈានដល់ការឃាត់ខ្លួនរួចមក ព្រឹកនេះសម្ដេចតេជោ ហ៊ុន សែន បានចេញមុខមកសម្របសម្រួលបញ្ចប់ទំនាស់ហើយ។

តាមដានជាមួយយើង៖ Million Times

សម្ដេចតេជោ សម្របសម្រួលបញ្ចប់ជម្លោះរវាង ណន សុខហេង និងថៅកែ ព្រមទាំងឧបត្ថម្ភថវិកា ១០ ០០០ ដុល្លារ និង ៣៥ លានរៀល ហើយបង្កើតអាជីវកម្មឡដុតនំប៉័ងមួយនៅក្នុងក្រុងក្រចេះឲ្យ ណន សុខហេង។

នៅព្រឹកថ្ងៃព្រហស្បតិ៍ ១៤ រោច ខែអស្សុជ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៣១ ខែតុលា ឆ្នាំ២០២៤ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឲ្យចៅ ណន សុខហេង អាយុ ២២ ឆ្នាំរស់នៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ ដែលមានជម្លោះជាមួយ ឈ្មោះ គា ចន្ធូ ម្ចាស់ក្រុមហ៊ុន«ស៊ាង ឡង មីងស៊ូ» លក់ និងផ្គត់ផ្គង់សម្ភារៈការពារជម្រាបទឹក ដែលមានទីតាំងនៅផ្លូវភ្នំពេញ ហាណូយ ភូមិឃ្មួញ សង្កាត់ឃ្មួញ ខណ្ឌសែនសុខ ចូលជួប ដើម្បីសម្របសម្រួលបញ្ចប់ជម្លោះក្រៅប្រព័ន្ធតុលាការ ដោយមានការចូលរួមសម្របសម្រួលដោយ ប្រធានគណៈកម្មាធិការនីតិកម្មព្រឹទ្ធសភា ស្នងការនគរបាលរាជធានីភ្នំពេញ នៅវិមានព្រឹទ្ធសភា រាជធានីភ្នំពេញ។

នៅក្នុងការសម្របសម្រួលនេះ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានស្នើសុំឲ្យភាគីជម្លោះ និងបានណែនាំទៅ គណៈកម្មាធិការនីតិកម្មព្រឹទ្ធសភា ក្រុមមេធាវីស្ម័គ្រចិត្តសម្ដេច និងស្នងការនគរបាលរាជធានីភ្នំពេញ ធ្វើការសម្របសម្រួលបញ្ចប់ជម្លោះនេះនៅក្រៅប្រព័ន្ធតុលាការ និងកុំឲ្យបន្តដេញដោលរកខុសត្រូវអ្វីបន្ថែមទៀត ពិសេសកុំមានការគុំកួនគ្នា និងសុំឲ្យប្រព័ន្ធផ្សព្វផ្សាយសង្គមនានា បញ្ឈប់ការផ្សាយ អ្នកនេះខុស អ្នកនេះត្រូវបន្តទៀត។

បន្ទាប់ពីបញ្ចប់ សម្ដេចតេជោ បានអនុញ្ញាតឲ្យ ណន សុខហេង បានថតរូបអនុស្សាវរីយ៍ និងបានឧបត្ថម្ភថវិកាចំនួន ១០ ០០០ ដុល្លារសហរដ្ឋអាមេរិក និង ៣៥ លានរៀល ព្រមទាំងបានបង្កើតអាជីវកម្មឡដុតនំប៉័ងមួយនៅក្នុងក្រុងក្រចេះ ខេត្តក្រចេះ ដល់ចៅប្រុស ដើម្បីប្រកបរបរចញ្ចឹមគ្រួសារ លើសពីនេះ សម្ដេចតេជោ បានណែនាំ ណន សុខហេង ត្រូវយកចិត្តទុកដាក់ក្នុងការប្រកបអាជីវកម្មដែល សម្ដេចបានផ្ដល់អោយពេលនេះ ពិសេសត្រូវចេះយកលុយបង្កើតលុយ ហាមលេងល្បែង និង ស្មោះត្រង់ជាមួយប្រពន្ធ៕

The post សម្ដេច ហ៊ុន សែន សម្របសម្រួលបញ្ចប់ជម្លោះ ណន សុខហេង ព្រមថៅកែ ព្រមទាំងថវិកា ១ ម៉ឺនដុល្លារ និង ៣៥លានរៀល ហើយបង្កើតហាងដុតនំប៉័ង appeared first on Millions times.