សម្ដេចមហាបវរធិបតី ហ៊ុន ម៉ាណែត Archives - Millions times

រដ្ឋាភិបាលកម្ពុជា សម្រេចលើកលែងពន្ធប្រាក់ចំណូល និងលើកទឹកចិត្តអ្នកវិនិយោគនៅខេត្តភាគឦសាន

Vin Chang — Wed, 09 Apr 2025 03:05:46 +0000

ក្ដៅៗនៅព្រឹកថ្ងៃ៨ ខែមេសានេះ ប្រមុខរាជរដ្ឋាភិបាលកម្ពុជា បានសម្រេចលើកលែងពន្ធលើប្រាក់ចំណូល ប្រាក់រំដោះពន្ធលើ ប្រាក់ចំណូល និងពន្ធអប្បបរមា រយៈពេល ១២ ឆ្នាំ ដើម្បីជំរុញមានការវិនិយោគលើ វិស័យកសិកម្ម កសិ-ឧស្សាហកម្ម និងទេសចរណ៍ ក្នុងភូមិភាគឦសាន។ ក្នុងនោះមានខេត្ត ក្រចេះ ស្ទឹងត្រែង រតនគិរី និងមណ្ឌលគិរី។

តាមដានជាមួយយើង៖ Million Times

យោងតាមកម្មវិធីពិសេស ជំរុញការវិនិយោគក្នុងខេត្តទាំងបួន នៅភូមិភាគឦសាន ឆ្នាំ ២០២៥-២០២៨។ កម្មវិធីពិសេស ជំរុញការវិនិយោគក្នុងខេត្តទាំងបួន នៅភូមិភាគឦសាន ត្រូវបាន នាយករដ្ឋមន្ត្រីកម្ពុជាសម្ដេច ហ៊ុន ម៉ាណែត សម្រេចអនុវត្តកាលពីថ្ងៃ២៧កុម្ភៈ ឆ្នាំ ២០២៥។ កម្មវិធីនេះ ផ្ដោតសំខាន់លើវិធានការ និងលក្ខខណ្ឌវិនិច្ឆ័យទទួលបានការគាំទ្រ និងជំរុញការវិនិយោគ។

វិធានការផ្នែកពន្ធដារ និងពន្ធគយលើគម្រោងវិនិយោគ ក្នុងវិស័យអាទិភាព វិស័យអាទិភាព ក្នុងការលើកលែងពន្ធ មានវិស័យកសិកម្ម កសិ-ឧស្សាហកម្ម ទេសចរណ៍ មានដូចជា បង្កើតតំបន់ទេសចរណ៍អត្តសញ្ញាណពិសេស តំបន់អេកូទេសចរណ៍ សួនសត្វ រមណីយដ្ឋាន សណ្ឋាគារ សួនកម្សាន្ត កន្លែងហាត់កីឡាជាដើម។ វិស័យទាំងនោះ នឹងទទួលបានការលើកលែងពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល និងពន្ធអប្បបរមា រយៈពេល១២ឆ្នាំ ដោយគិតចាប់ពីឆ្នាំ ដែលគម្រោងវិនិយោគ មានចំណូលពីសកម្មភាពអាជីវកម្មដំបូង។

គម្រោងវិនិយោគមានលក្ខណៈសម្បត្តិគ្រប់គ្រាន់ របស់សហគមន៍កសិកម្មទំនើប ក្នុងវិស័យកសិកម្ម និងកសិ-ឧស្សាហកម្ម ដែលនាំចូលសម្ភារៈសាងសង់ បរិក្ខាសំណង់ សម្ភារៈបរិក្ខាផលិតកម្ម និងធាតុចូលផលិតកម្ម រដ្ឋជាអ្នកទទួលបន្ទុកលើពន្ធគយ អាករពិសេស និងអាករលើតម្លៃបន្ថែម។ រដ្ឋ សម្រេចលើកលែងពន្ធកាត់ទុកលើការជួយអចលនទ្រព្យ ពន្ធលើផ្ទាំងផ្សព្វផ្សាយ និង ពន្ធប៉ាតង់រយៈពេល ៣ ឆ្នាំផងដែរ។

លោក មាស សុខសេនសាន អគ្គលេខាធិការនៃអគ្គលេខាធិការដ្ឋាន ក្រសួងសេដ្ឋកិច្ចនិងហិរញ្ញវត្ថុ និង ជាអ្នកនាំពាក្យ បានពន្យល់ពីជំហរ រដ្ឋចង់តម្រង់ទិស និងផ្ដោតចំណាប់អារម្មណ៍របស់ វិនិយោ គិនឲ្យងាកទៅសម្លឹងមើលតំបន់ ដែលមិនសូវមានការចាប់អារម្មណ៍ពីវិនិយោគិនទូទៅ ប៉ុន្តែ ជាតំបន់ដែលមានសក្តានុពលធំ។

ក្នុងត្រីមាសទី១ នៃឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគសរុប ១៧២ គម្រោង ដែលមានទុនវិនិយោគសរុបប្រមាណ ២,៥ ពាន់លានដុល្លារ និងអាចបង្កើតការងារបាន ប្រមាណជិត ១២ ម៉ឺនកន្លែង។ បើធៀបនឹងរយៈពេលដូចគ្នា ក្នុងឆ្នាំ ២០២៤ ទុនវិនិយោគ មានការកើនឡើងប្រមាណជា ៣០៥ លានដុល្លារ ស្មើនឹងប្រមាណ១៤%៕

អត្ថបទ៖ មេរ៉ា, រូបភាព៖ STPM

The post រដ្ឋាភិបាលកម្ពុជា សម្រេចលើកលែងពន្ធប្រាក់ចំណូល និងលើកទឹកចិត្តអ្នកវិនិយោគនៅខេត្តភាគឦសាន appeared first on Millions times.

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាផ្ដល់អនុសាសន៍ណែនាំទិសដៅការងារ ៧ ចំណុច

Vin Chang — Tue, 24 Dec 2024 03:59:18 +0000

កាលពីថ្ងៃសុក្រ ទី ២០ ខែធ្នូ ឆ្នាំ ២០២៤ កន្លងទៅ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងប្រធានក្រុមប្រឹក្សាអភិវឌ្ឍន៍កម្ពុជា បានណែនាំអនុសាសន៍ទិសដៅការងារទាំង ៧ ចំណុច ក្នុងកិច្ចប្រជុំផ្លូវការលើកទី១ បន្ទាប់ពីរាជរដ្ឋាភិបាលនីតិកាលទី៧ នៃរដ្ឋសភាចាប់ផ្ដើមដំណើរការ។ កិច្ចប្រជុំនាពេលនោះ មានការអញ្ជើញចូលរួមពីឯកឧត្ដមទេសរដ្ឋមន្ត្រី អនុប្រធានទី២ ក.អ.ក. ឯកឧត្ដមរដ្ឋមន្ត្រីប្រតិភូអមនាយករដ្ឋមន្ត្រី ឯកឧត្ដមអគ្គលេខាធិការ អគ្គលេខាធិការរង ជាថ្នាក់ដឹកនាំ ក.អ.ក. សរុប ២៤ រូប។

តាមដានជាមួយយើង៖ Million Times

១. បន្តអនុវត្តយន្តការពិគ្រោះយោបល់ជាមួយសហភាគីរួមមាន ជប៉ុន កូរ៉េខាងត្បូង សហរដ្ឋអាម៉េរិក និងសហភាពអឺរ៉ុប ក្នុងក្របខណ្ឌក្រុមប្រឹក្សាអភិវឌ្ឍន៍កម្ពុជា ឱ្យបាន ២ ដងក្នុងមួយឆ្នាំ បន្ថែមលើយន្តការវេទិការាជរដ្ឋាភិបាល-ផ្នែកឯកជន ដែលដឹកនាំដោយសម្ដេចបវរធិបតី រៀងរាល់មួយឆ្នាំម្ដង។

២. សិក្សាវាយតម្លៃ និងធ្វើអាទិភាវូបនីយកម្ម សម្រាប់ការលើកទឹកចិត្តវិនិយោគតាមវិស័យ និងទីតាំងភូមិសាស្ត្រ ដែលស្របតាមគោលនយោបាយរបស់រាជរដ្ឋាភិបាល។

៣. រៀបចំយន្តការតាមដានត្រួតពិនិត្យការអនុវត្តគម្រោងវិនិយោគមានលក្ខណៈសម្បត្តិគ្រប់គ្រាន់ (គ.ល.គ. ឬ QIP) ក្រោយទទួលបានវិញ្ញាបនបត្រជា គ.ល.គ.។

៤. រៀបចំយន្តការប្រទាក់ក្រឡាធ្វើឲ្យមានសង្គតិភាព នៃលំហូរការងារវិនិយោគ រវាងថ្នាក់ជាតិ និងថ្នាក់ក្រោមជាតិ តាមរយៈការពិគ្រោះយោបល់ជាមួយរដ្ឋបាលរាជធានី ខេត្ត ដោយឈរលើស្មារតីសហការគ្នា ក្នុងអភិក្រម “ជវភាពនៃប្រព័ន្ធតួអង្គតែមួយ”។

៥. អនុវត្តឲ្យបានពេញលេញលើការប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា (ប្រព័ន្ធ cdcIPM) ទាំងនៅក្នុងក្រុមប្រឹក្សាអភិវឌ្ឍន៍កម្ពុជា និងថ្នាក់ក្រោមជាតិ តាមរយៈ អនុគណៈកម្មាធិការវិនិយោគរាជធានី ខេត្ត ព្រមទាំងធ្វើសន្ធានកម្មតភ្ជាប់ តាមថ្នាលបច្ចេកវិទ្យាអេកូឡូស៊ី ដែលមានស្រាប់ ដើម្បីចែករំលែកទិន្នន័យជាមួយអន្តរក្រសួង ស្ថាប័នពាក់ព័ន្ធ សំដៅបង្កើតជាបណ្ដុំទិន្នន័យរួមសព្វជ្រុងជ្រោយមានសក្ដានុពលបម្រើជាប្រយោជន៍ដល់វិនិយោគិន ក៏ដូចជាសម្រួលការផ្ដល់សេវាសាធារណៈពាក់ព័ន្ធ។

៦. ជំរុញការរៀបចំការផ្ដល់ព័ត៌មានវិនិយោគសម្បូរបែប ចំគោលដៅ និងមានភាពទាក់ទាញ ដើម្បីឲ្យវិនិយោគិន បណ្ដាដៃគូអភិវឌ្ឍន៍ និងគ្រប់ភាគីពាក់ព័ន្ធ ទទួលបានបច្ចុប្បន្នភាពកាន់តែស៊ីជម្រៅ អំពីសក្ដានុពលរបស់កម្ពុជា និងនីតិវិធីពាក់ព័ន្ធការស្នើសុំវិនិយោគ។

៧. ពង្រឹងការលើកកម្ពស់ធនធានមនុស្សសម្រាប់ការផ្ដល់សេវាជូនវិនិយោគិនប្រកប ដោយគុណភាព ប្រសិទ្ធភាព និងស័ក្ដិសិទ្ធិភាព ដោយហេតុថា ធនធានមនុស្សរបស់ក្រុមប្រឹក្សាអភិវឌ្ឍន៍កម្ពុជា មិនត្រឹមតែជះឥទ្ធិពលកម្រិតអន្តរក្រសួង ស្ថាប័នប៉ុណ្ណោះទេ ប៉ុន្តែការលើកកម្ពស់ធនធានមនុស្សនេះ នឹងផ្ដល់លទ្ធផលជាវិជ្ជមានដល់បងប្អូន ប្រជាពលរដ្ឋកម្ពុជារាប់លាននាក់ តាមរយៈការទាក់ទាញវិនិយោគ បង្កើតការងារ និងបង្កើនផលចំណូលសម្រាប់គ្រប់តួអង្គពាក់ព័ន្ធ៕

អត្ថបទ៖ មេរ៉ា,រូបភាព៖ Chanthol Sun DPM

The post សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាផ្ដល់អនុសាសន៍ណែនាំទិសដៅការងារ ៧ ចំណុច appeared first on Millions times.

សម្តេចធិបតី ហ៊ុន ម៉ាណែត និងសេដ្ឋីកសិកម្ម ម៉ុង ឫទ្ធី ពិភាក្សាលើការផលិតជីសរីរាង្គក្នុងជំនួបពិសាអាហារពេលព្រឹកនេះ

Vin Chang — Fri, 01 Nov 2024 07:24:59 +0000

នាព្រឹកថ្ងៃ១ ខែវិច្ឆិកា ឆ្នាំ ២០២៤ នេះ សម្ដេចមហាបវធិបតី ហ៊ុន ម៉ាណែត នាយករដ្ឋមន្ត្រី បានផ្តល់កិត្តិយសពិសាអាហារពេលព្រឹក ជាមួយអ្នកឧកញ៉ា ម៉ុង ឫទ្ធី ដើម្បីពិភាក្សាគ្នាលើការផលិតជីសរីរាង្គ (ជីធម្មជាតិ) ដើម្បីលក់ចែកជូនប្រជាកសិករខ្មែរ ក្នុងតម្លៃទាបជាងជីនាំចូលមកពីបរទេស។ ព្រមទាំងបានជួយជំរុញពង្រីកវិស័យទេសចរណ៍ធម្មជាតិ ឲ្យកាន់តែរីកចម្រើនបន្ថែមទៀត ។

តាមដានជាមួយយើង៖ Million Times

លោកបណ្ឌិត ម៉ុង ឫទ្ធី បានបញ្ជាក់ថា ក្រោយពីបានជួបពិភាក្សារយៈពេល ១ម៉ោង ១៥ នាទីរួចមក លោកពិតជាបានកោតសរសើរ និងវាយតម្លៃខ្ពស់បំផុតចំពោះសម្ដេចបវរធិបតី ដែលឈ្លាសវៃ ស្ទើរតែគ្រប់ពាក្យទាំងអស់ ប្រមុខរាជរដ្ឋាភិបាលរូបនេះ គិតគូរតែពីផលប្រយោជន៍ជាតិ និងប្រជាជន ខ្មែរជាធំ។

ម្ចាស់ក្រុមហ៊ុន ម៉ុង ឫទ្ធី គ្រុប ក៏បានថ្លែងអំណរគុណយ៉ាងជ្រាលជ្រៅបំផុត ដែលសម្ដេចមហាបវធិបតី ហ៊ុន ម៉ាណែត បានផ្ដល់កិត្តិយស ហើយអ្នកឧកញ៉ាប្ដេជ្ញាខិតខំប្រឹងប្រែងរកគ្រប់មធ្យោបាយ ដើម្បីអនុវត្តឲ្យបានតាមអនុសាសន៍របស់សម្ដេច ដើម្បីបានចូលរួមចំណែកបម្រើជាតិប្រជាជន លើវិស័យកសិកម្ម កសិ-ឧស្សាហកម្ម និងទេសចរណ៍ធម្មជាតិនេះ។

ក្រោយទទួលទានអាហារពេលព្រឹកយ៉ាងសាមញ្ញ ព្រមទាំងពិភាក្សាកិច្ចការចប់សព្វគ្រប់ អ្នកឧកញ៉ា និងសម្ដេចបវរធិបតី បានថតរូបខ្លះៗ ដើម្បីចែករំលែកពីរឿងសំខាន់នោះឲ្យមហាជនដឹងផងដែរ៕

The post សម្តេចធិបតី ហ៊ុន ម៉ាណែត និងសេដ្ឋីកសិកម្ម ម៉ុង ឫទ្ធី ពិភាក្សាលើការផលិតជីសរីរាង្គក្នុងជំនួបពិសាអាហារពេលព្រឹកនេះ appeared first on Millions times.

សម្ដេចមហាបវរធិបតី ហ៊ុន ម៉ាណែត Archives - Millions times

រដ្ឋាភិបាលកម្ពុជា សម្រេចលើកលែង​ពន្ធ​​ប្រាក់​ចំណូល និងលើកទឹកចិត្តអ្នកវិនិយោគនៅខេត្តភាគឦសាន

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាផ្ដល់អនុសាសន៍ណែនាំទិសដៅការងារ ៧ ចំណុច

រដ្ឋាភិបាលកម្ពុជា សម្រេចលើកលែងពន្ធប្រាក់ចំណូល និងលើកទឹកចិត្តអ្នកវិនិយោគនៅខេត្តភាគឦសាន