ទិន្នន័យនេះត្រូវបានលើកឡើងក្នុងកិច្ចជំនួបពិភាក្សារវាងក្រុមការងារជំរុញការវិនិយោគក្នុងភូមិភាគឦសាន «ក.វ.ឦសាន» និងធុរជនក្នុងខេត្តមណ្ឌលគិរី កាលពីរសៀលថ្ងៃទី ១០ ខែសីហា ឆ្នាំ ២០២៦ នៅសាលាខេត្តមណ្ឌលគិរី ដើម្បីផ្សព្វផ្សាយពីវិសាលភាពនៃកម្មវិធីពិសេស និងជំរុញការអនុវត្តកម្មវិធីនេះឱ្យកាន់តែមានប្រសិទ្ធភាព។

កិច្ចជំនួបនេះដឹកនាំដោយ ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្ត្រី និងជាប្រធានក្រុមការងារជំរុញការវិនិយោគក្នុងភូមិភាគឦសាន ដោយមានការចូលរួមពី ឯកឧត្តម គង់ គឹមនី អភិបាលនៃគណៈអភិបាលខេត្តមណ្ឌលគិរី និងធុរជនក្នុងខេត្ត។

ក្នុងជំនួបនេះ ឯកឧត្តមអភិបាលបានលើកឡើងពីស្ថានភាពសេដ្ឋកិច្ច-សង្គម និងផែនការអភិវឌ្ឍ និងវិនិយោគក្នុងខេត្តមណ្ឌលគិរី ខណៈឯកឧត្តមបណ្ឌិតសភាចារ្យ ហ៊ាន សាហ៊ីប បានជម្រាបជូនអង្គប្រជុំពីវឌ្ឍនភាពនៃការអនុវត្តកម្មវិធីពិសេសជំរុញការវិនិយោគនៅភូមិភាគឦសាន។

ថ្នាក់ដឹកនាំទាំងពីរបានគូសបញ្ជាក់ពីសារៈសំខាន់នៃការពន្លឿនការរៀបចំប្លង់គោលប្រើប្រាស់ដី ដោយមានការគាំទ្រពីក្រសួងរៀបចំដែនដី នគរូបនីយកម្ម និងសំណង់។ ការរៀបចំផែនការប្រើប្រាស់ដីមានសារៈសំខាន់សម្រាប់មណ្ឌលគិរី ដែលមានធនធានធម្មជាតិ ទេសភាព និងខ្យល់បរិសុទ្ធ ដែលត្រូវការការការពារ និងប្រើប្រាស់ជាធនធានសម្រាប់ទេសចរណ៍ប្រកបដោយចីរភាព ជៀសវាងការអភិវឌ្ឍដែលផ្អែកទាំងស្រុងលើយន្តការទីផ្សារ។

ក្នុងកិច្ចប្រជុំ ក៏មានការបង្ហាញពីអត្ថប្រយោជន៍នៃការលើកទឹកចិត្ត និងការសម្រួលនីតិវិធីក្រោមកម្មវិធីពិសេស។ សម្រាប់សហគ្រាសធុនតូច និងមធ្យម លក្ខខណ្ឌទំហំទុនវិនិយោគអប្បបរមាត្រូវបានបន្ធូរបន្ថយមកត្រឹម ១០ ម៉ឺនដុល្លារឡើងទៅ ដែលអាចស្នើសុំគោលការណ៍វិនិយោគពី ក.វ.ឦសាន ដើម្បីចុះបញ្ជីជា គ.ល.គ. បាន។

លើសពីនេះ សកម្មភាពធុរកិច្ចដែលកំពុងដំណើរការនៅក្នុងខេត្តទាំងបួននៃភូមិភាគឦសាន ប៉ុន្តែមិនទាន់បានចុះបញ្ជីពន្ធដារ អាចចុះបញ្ជីពន្ធដារដោយស្ម័គ្រចិត្តរហូតដល់ដំណាច់ឆ្នាំ ២០២៦ និងទទួលបានការលើកលែងពិន័យទោសទណ្ឌ បំណុលពន្ធ និងការផាកពិន័យជាប្រាក់ ចំពោះការមិនបានបំពេញអនុលោមភាពកន្លងមក។

ជាមួយគ្នានេះ ក្រុមហ៊ុននៅមណ្ឌលគិរីដែលបានដាក់ពាក្យមក ក.វ.ឦសាន បានលើកសំណួរដោយផ្ទាល់អំពីស្ថានភាពសំណើគម្រោងរបស់ខ្លួន ជាពិសេសបញ្ហាពាក់ព័ន្ធនឹងដីធ្លី។ ក្រុមការងារ ក.វ.ឦសាន ដែលមានរដ្ឋបាលខេត្តជាសមាជិក បានស្រាយបំភ្លឺអំពីបច្ចុប្បន្នភាពនៃសំណើគម្រោងនីមួយៗ។

ក្រុមការងារបានបញ្ជាក់ថា ការស្នើសុំសិទ្ធិប្រើប្រាស់ដីធ្លីរបស់រដ្ឋជាបញ្ហារសើប និងស្មុគស្មាញ ដែលតម្រូវឱ្យមានការពិនិត្យម៉ត់ចត់លើលក្ខណៈសម្បត្តិ និងស្ថានភាពជាក់ស្តែងរបស់ដី អនុលោមភាពតាមបទដ្ឋានគតិយុត្តិ ព្រមទាំងសមត្ថភាពវិនិយោគ ដើមទុន និងឆន្ទៈរបស់វិនិយោគិន មុនពេលស្ថាប័នមានសមត្ថកិច្ចអាចលើកមតិយោបល់ជូនប្រមុខរាជរដ្ឋាភិបាលសម្រេចផ្តល់ការអនុញ្ញាតវិនិយោគ។

កិច្ចប្រជុំក៏បានពិភាក្សាពីបញ្ហាប្រឈមផ្សេងៗ រួមមានភាពយឺតយ៉ាវនៃការចុះបញ្ជីតាមប្រព័ន្ធរបស់ស្ថាប័នមួយចំនួន ការមិនទាន់ចេញប្លង់ដីជូនប្រជាពលរដ្ឋនៅតំបន់មួយចំនួន ដែលបង្កឧបសគ្គដល់សកម្មភាពធុរកិច្ច និងការដោះស្រាយជីវភាពប្រចាំថ្ងៃរបស់ប្រជាពលរដ្ឋ ព្រមទាំងភាពកម្សោយនៃសេវាទូរស័ព្ទ និងតម្លៃអគ្គិសនី។

ឯកឧត្តមបណ្ឌិតសភាចារ្យ ហ៊ាន សាហ៊ីប បានជំរុញឱ្យមានការពិភាក្សា និងសម្របសម្រួលបន្ត ដើម្បីចៀសវាងការយល់ច្រឡំដោយសារកង្វះការទំនាក់ទំនង។ ក.វ.ឦសាន និងរដ្ឋបាលខេត្តត្រៀមទទួលការស្នើសុំប្រឹក្សាយោបល់ ការគាំទ្រការដាក់ពាក្យ ការសម្រួលនីតិវិធី និងការចូលរួមដោះស្រាយបញ្ហារាំងស្ទះ តាមរយៈ «យន្តការច្រកចេញចូលតែមួយ»។

កម្មវិធីពិសេសនេះត្រូវបានប្រកាសដាក់ឱ្យអនុវត្តជាផ្លូវការកាលពីថ្ងៃទី ៩ ខែមេសា ឆ្នាំ ២០២៥ ដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលបំណងប្រែក្លាយភូមិភាគឦសានជាប៉ូលសេដ្ឋកិច្ចថ្មីដែលមានសក្តានុពល។

កម្មវិធីផ្តោតលើវិស័យអាទិភាពចំនួន ៣ រួមមាន កសិកម្ម កសិ-ឧស្សាហកម្ម និងទេសចរណ៍ ដោយផ្តល់ការគាំទ្រតាមរយៈការលើកទឹកចិត្តផ្នែកពន្ធ និងអាករ ហិរញ្ញប្បទានអត្រាការប្រាក់សមរម្យ ការកាត់បន្ថយថ្លៃដើមផលិតកម្ម និងការសម្របសម្រួលពិសេសពី ក.វ.ឦសាន និងក្រសួង-ស្ថាប័នពាក់ព័ន្ធ។

គិតត្រឹមថ្ងៃទី ៣ ខែសីហា ឆ្នាំ ២០២៦ ក.វ.ឦសាន បានទទួលសំណើគម្រោងសរុបចំនួន ៧២ គម្រោង ដែលមានទុនវិនិយោគសរុប ២.៦៥ ពាន់លានដុល្លារអាម៉េរិក។ ក្នុងចំណោមនោះ ខេត្តមណ្ឌលគិរីមានសំណើគម្រោងចំនួន ២២ គម្រោង ទុនវិនិយោគ ៥១១ លានដុល្លារអាម៉េរិក និងអាចបង្កើតការងារបាន ៥,០០៣ កន្លែង៕

អត្ថបទ៖ ប៊ី

តាមដានជាមួយយើង៖ Million Times

second...

x

The post មណ្ឌលគិរីទទួលសំណើវិនិយោគ ២២ គម្រោង មានទុន ៥១១ លានដុល្លារ appeared first on Millions times.

ក្នុងសន្និសីទសារព័ត៌មាន «អំពីយុទ្ធនាការបង្ក្រាបអាជីវកម្មរ៉ែអនាធិបតេយ្យ» ស្ថិតនៅភូមិសាស្រ្តតំបន់មេសំ ឃុំចុងផ្លាស់ ស្រុកកែវសីមា ខេត្តមណ្ឌលគិរី នាព្រឹកថ្ងៃពុធនេះ លោក អ៉ឹង ឌីប៉ូឡា បានលើកឡើងថា គិតត្រឹមថ្ងៃទី៣ ខែវិច្ឆិកា ឆ្នាំ២០២៤នេះ កម្ពុជាចម្រាញ់រ៉ែមាស បានចំនួនជិត១៣តោន នៅក្នុងខេត្ដមណ្ឌលគិរី។

តាមដានជាមួយយើង៖ Million Times

លោកថ្លែងថា ក្រុមហ៊ុន Renaissance Minerals ផលិតបានមាស ៨០៧ដុំ គិតជាទម្ងន់សរុប ប្រមាណ១២,៥៣៦គីឡូក្រាម រីឯក្រុមហ៊ុន Rong Cheng ផលិតបាន១២ដុំ ស្មើនឹងប្រមាណ២២គីឡូក្រាម គិតត្រឹមថ្ងៃទី០៣ ខែវិច្ឆិកា ឆ្នាំ២០២៤។

លោកបន្តថា ដំណើរការអាជីវកម្មរបស់ក្រុមហ៊ុន Renaissance Minerals (Cambodia) Ltd ស្ថិតក្នុងតំបន់អូរខ្វាវ ស្រុកកែវសីម៉ា ខេត្តមណ្ឌលគិរី គឺដំណើរការទៅតាមផែនការល្អ មិនមានអ្វីជាបញ្ហានោះទេ។ ដោយឡែក ក្រុមហ៊ុន Rong Cheng ស្ថិតនៅតំបន់ចុងផ្លាស់ ខេត្ដមណ្ឌលគិរី គឺជួបបញ្ហា នៅមានដែលចាប់ផ្ដើមជីកចុះទៅ អណ្ដូងរបស់ក្រុមហ៊ុនលិចធ្លាយទឹក និងជួបជាមួយអណ្ដូងរ៉ែ អនាធិបតេយ្យ ដែលជាបញ្ហាធំ ធ្វើឲ្យមានការប៉ះពាល់ ទៅដល់សង្វាក់ផលិតកម្ម។

គួរឲ្យដឹងដែរថា បច្ចុប្បន្នកម្ពុជាមានក្រុមហ៊ុនចំនួន១០ ដែលកំពុងតែចម្រាញ់រ៉ែមាស ស្ថិតក្នុងតំបន់អូរខ្វាវ ស្រុកកែវសីម៉ា ខេត្តមណ្ឌលគិរី, តំបន់ភ្នំម្លុង ខេត្ដព្រះវិហារ, តំបន់ចុងផ្លាស់ ខេត្ដមណ្ឌលគិរី, តំបន់អូរត្រូន ខេត្តក្រចេះ, តំបន់ភ្នំជី ខេត្តកំពង់ធំ, នៅភ្នំព្រឹក ខេត្ដបាត់ដំបង, នៅភ្នំជី ខេត្ដកំពង់ធំ, នៅភ្នំប៉ាង ខេត្ដរតនគិរី និងស្ថិតនៅអូរយ៉ាវដាវ ខេត្ដរតនគិរី៕

អត្ថបទ៖ សេដ្ឋានី រូបភាព៖ ក្រសួងរ៉ែ

second...

x

The post នៅខេត្ដមណ្ឌលគិរី ចម្រាញ់រ៉ែមាសបានជិត ១៣តោនគិតត្រឹមថ្ងៃទី៣ ខែវិច្ឆិកានេះ appeared first on Millions times.