ប្រធានាធិបតីវៀតណាម Archives - Millions times

រយៈពេលមិនដល់មួយឆ្នាំផង វៀតណាមផ្លាស់ប្ដូរប្រធានាធិបតីរហូតដល់ ៤រូប

ទីន Tin — Tue, 22 Oct 2024 05:12:48 +0000

រយៈពេលតែជាង ១០ខែប៉ុណ្ណោះ ប្រទេសវៀតណាមបានផ្លាស់ប្ដូរប្រធានាធិបតីចំនួន ៤រូបហើយ ហើយការផ្លាស់ប្ដូរក្បាលម៉ាស៊ីននៃជួររដ្ឋាភិបាលវៀតណាមជាញឹកញាប់បែបនេះ កើតឡើងបន្ទាប់ពីលោក Vo Van Thuong ត្រូវបានបង្ខំឲ្យចុះចេញពីតំណែងជាប្រធានាធិបតី កាលពីថ្ងៃទី២១ ខែមីនា ឆ្នាំ២០២៤ ក្រោយរកឃើញថា មានជាប់ពាក់ព័ន្ធជាមួយករណីពុករលួយ។

តាមដានជាមួយយើង៖ Million Times

នៅថ្ងៃទី២២ ខែមីនា លោកស្រី Vo Thi Anh Xuan អនុប្រធានាធិបតីវៀតណាម ត្រូវបានតែងតាំងជាប្រធានាធិបតីស្ដីទី ហើយកាន់តួនាទីនេះបានរយៈពេលត្រឹម ៦២ថ្ងៃ តំណែងកំពូលមួយនេះ ក៏ត្រូវបានផ្ទេរទៅកាន់បុគ្គលទី៣។

បុគ្គលក្លាយជាប្រធានាធិបតីទី៣ នៅក្នុងឆ្នាំនេះ គឺលោក To Lam ដែលមានតំណែងជាអគ្គលេខាធិការបក្សកុម្ម៉ុយនីស្ត និងជាតំណែងកំពូលនៅក្នុងរចនាសម្ព័ន្ធថ្នាក់ដឹកនាំនៃប្រទេសវៀតណាម។

លោក To Lam បានក្លាយជាប្រធានាធិបតីទី១៣ ក្នុងប្រវត្តិសាស្ត្រវៀតណាម ពីថ្ងៃទី២២ ខែឧសភា ឆ្នាំ២០២៤ រហូតដល់ថ្ងៃទី២១ ខែតុលា ឆ្នាំ២០២៤ បន្ទាប់ពីលោកបានប្រកាសលាលែងពីតំណែង និងចង់ផ្ដោតតែលើការងារ ជាអគ្គលេខាធិការបក្សតែមួយមុខវិញ។

ចំណែកឯ ប្រធានាធិបតីទី៤ គឺឧត្ដមសេនីយ Luong Cuong ដែលទើបទទួលបានការតែងតាំងថ្មីថ្មោង ពីសភាកាលពីថ្ងៃទី២១ ខែតុលា ដោយទទួលបានសម្លេងគាំទ្រ ១០០% ពីសមាជិក ៤៤០នាក់នៅសភា។

មុនក្លាយជាប្រធានាធិបតី លោក Luong Cuong ក៏ជាបុគ្គលមួយរូប ដែលមានឥទ្ធិពលខ្លាំងបំផុតនៅក្នុងវិស័យយោធាវៀតណាម និងជាក្បាលម៉ាស៊ីនទី៥ នៃរចនាសម្ព័ន្ធថ្នាក់ដឹកនាំវៀតណាម បន្ទាប់ពីអគ្គលេខាធិការបក្ស ប្រធានាធិបតី នាយករដ្ឋមន្ត្រី និងប្រធានសភា។

គួររំលឹកបន្តិចថា អាណត្តិដឹកនាំរបស់ប្រធានាធិបតីវៀតណាម គឺត្រូវបានកំណត់រយៈពេល ៥ឆ្នាំ ក៏ប៉ុន្តែចាប់តាំងពីឆ្នាំ២០១៦ មិនដែលមានប្រធានាធិបតីរូបណា អាចកាន់តំណែងបានពេញមួយអាណត្តិស្រួលបួលឡើយ ពោលគឺអាចកាន់បានយ៉ាងយូរ ២ឆ្នាំកន្លះប៉ុណ្ណោះ ក៏ត្រូវផ្ទេរតួនាទីទៅកាន់បុគ្គលដទៃទៀត ជាហេតុធ្វើឲ្យរយៈពេល ៨ឆ្នាំចុងក្រោយ វៀតណាមបានផ្លាស់ប្ដូរប្រធានាធិបតីផ្លូវការដល់ទៅ ៦រូប៕

អត្ថបទ៖ Luffy រូបភាព៖ បរទេស

The post រយៈពេលមិនដល់មួយឆ្នាំផង វៀតណាមផ្លាស់ប្ដូរប្រធានាធិបតីរហូតដល់ ៤រូប appeared first on Millions times.

សភាវៀតណាម តែងតាំងនាយឧត្តមសេនីយផ្កាយ៤ ជាប្រធានាធិបតីថ្មី

ទីន Tin — Mon, 21 Oct 2024 10:33:29 +0000

នារសៀលថ្ងៃទី២១ ខែតុលា សភាវៀតណាមបានប្រកាសតែងតាំងលោក Luong Cuong នាយឧត្តមសេនីយផ្កាយ៤ មកកាន់តួនាទីជាប្រធានាធិបតី ជំនួសលោក To Lam ដែលសម្រេចចិត្តលាលែងពីតំណែងមួយនេះ ហើយផ្ដោតសំខាន់តែលើតួនាទីជាអគ្គលេខាធិការបក្សកុម្ម៉ុយនីស្តវិញ។

តាមដានជាមួយយើង៖ Million Times

ទីភ្នាក់ងារសារព័ត៌មាន AP បានរាយការណ៍ថា លោក Cuong មានវ័យ ៦៧ឆ្នាំ គឺជាសមាជិកអចិន្ត្រៃយ៍នៃគណបក្សកុម្ម៉ុយនីស្តវៀតណាមតាំងពីខែឧសភា ឆ្នាំ២០២៤ និងបានបម្រើកងទ័ពយោធារយៈពេលជាង ៤០ឆ្នាំមកហើយ។

នាយកឧត្ដមសេនីយផ្កាយ៤ រូបនេះ ទទួលបានសម្លេងគាំទ្រពីសមាជិកសភា ១០០% ក្នុងចំណោមការបោះឆ្នោតតែងតាំងប្រធានាធិបតី ចំនួន ៤៤០សម្លេង។

ការតែងតាំងប្រធានាធិបតីវៀតណាមថ្មី ត្រូវបានអ្នកវិភាគនយោបាយនៅវៀតណាមអះអាងថា ជាការស្ដារស្ថានភាពនយោបាយ ដែលវៀតណាមបានជួបភាពវឹកវរ អំឡុងពេលបង្ក្រាបអំពើពុករលួយពេញផ្ទៃប្រទេស ក៏ដូចជាពង្រឹងសន្តិសុខសង្គមមួយកម្រិតទៀតផងដែរ។

គួរជម្រាបដែរថា រចនាសម្ព័ន្ធថ្នាក់ដឹកនាំនៅប្រទេសវៀតណាម គឺមាន ៤តំណែងកំពូលៗដូចជា អគ្គលេខាធិការបក្ស ប្រធានាធិបតី នាយករដ្ឋមន្ត្រី និងប្រធានរដ្ឋសភា៕

អត្ថបទ៖ Luffy រូបភាព៖ VNExpress

The post សភាវៀតណាម តែងតាំងនាយឧត្តមសេនីយផ្កាយ៤ ជាប្រធានាធិបតីថ្មី appeared first on Millions times.

មេដឹកនាំកំពូលទើបឡើងតំណែងថ្មីថ្មោងវៀតណាម បំពេញទស្សនកិច្ចនៅចិនរយៈពេល៣ថ្ងៃ

Vin Chang — Sun, 18 Aug 2024 14:41:10 +0000

ទើបឡើងកាន់តំណែងថ្មីថ្មោង ប្រធានាធិបតីវៀតណាម លោក To Lam បានបំពេញទស្សនកិច្ចផ្លូវរដ្ឋជាលើកដំបូងទៅកាន់ប្រទេសចិនរយៈពេល ៣ថ្ងៃ ពោលគឺចាប់ពីថ្ងៃអាទិត្យ ដល់ថ្ងៃអង្គារ ខែសីហានេះ។

ទៅដល់ក្រុងប៉េកាំងភ្លាមនាថ្ងៃអាទិត្យនេះលោក To Lam ចាប់ផ្តើមជួបជាមួយនាយករដ្ឋមន្ត្រី Li Qiang ហើយក៏នឹងជួបជាមួយប្រធានាធិបតី Xi Jinping ដែលនឹងបញ្ជាក់ពីទំនាក់ទំនងពាណិជ្ជកម្មរវាងប្រទេសជិតខាងទាំងពីរ ទោះបីជាមានជម្លោះលើសមុទ្រចិនខាងត្បូងក៏ដោយ។

ប្រព័ន្ធផ្សព្វផ្សាយរដ្ឋ CCTV បានរាយការណ៍ថា នៅទីក្រុងក្វាងចូវ លោក Lam គ្រោងនឹងទៅទស្សនាទីតាំងដែលអតីតប្រធានាធិបតីហូជីមិញបានធ្វើសកម្មភាពបដិវត្តន៍ក្នុងទសវត្សរ៍ឆ្នាំ១៩២០។

លោក Lam ត្រូវបានជ្រើសរើសជាអគ្គលេខាបក្សកុម្មុយនិស្តដែលកំពុងកាន់អំណាចកាលពីដើមខែសីហានេះ ដែលធ្វើឲ្យលោកក្លាយជាមេដឹកនាំកំពូលនៅក្នុងប្រទេសវៀតណាម។

ដំណើរទស្សនកិច្ចរបស់លោកទៅកាន់ប្រទេសចិន គឺជាលើកដំបូងបន្ទាប់ពីការចូលកាន់តំណែង ដែលក្រសួងការបរទេសចិនបាននិយាយថា “ឆ្លុះបញ្ចាំងយ៉ាងពេញលេញនូវសារៈសំខាន់ដ៏អស្ចារ្យដែលលោកបានយកចិត្តទុកដាក់ចំពោះការអភិវឌ្ឍន៍ទំនាក់ទំនងរវាងភាគីទាំងពីរ និងប្រទេស”៕

អត្ថបទ៖ សារ៉ាយ រូបភាព៖ Vietnam Plus

The post មេដឹកនាំកំពូលទើបឡើងតំណែងថ្មីថ្មោងវៀតណាម បំពេញទស្សនកិច្ចនៅចិនរយៈពេល៣ថ្ងៃ appeared first on Millions times.

ប្រធានាធិបតីវៀតណាម នឹងមកបំពេញទស្សនកិច្ចនៅកម្ពុជាដើម្បីពង្រីកផលប្រយោជន៍នៃប្រទេសជាតិទាំងពីរ

Vin Chang — Thu, 11 Jul 2024 01:54:08 +0000

ប្រធានាធិបតីវៀតណាមលោក តូ ឡឹម ដែលទើបកាន់តំណែង នឹងមកបំពេញទស្សនកិច្ចនៅកម្ពុជារយៈពេលពីរថ្ងៃ ដើម្បីរឹតចំណងទ្វេភាគីបន្ថែម ចាប់ពីថ្ងៃទី ១២ ដល់ទី ១៣ ខែកក្កដា ឆ្នាំ២០២៤។

សេចក្តីប្រកាសព័ត៌មានរបស់ក្រសួងការបរទេសកម្ពុជា អំឡុងទស្សនកិច្ចនៅកម្ពុជា លោក តូ ឡឹម នឹងចូលគាល់ព្រះមហាក្សត្រ និងមានជំនួបជាមួយសម្តេច ហ៊ុន សែន ប្រធានព្រឹទ្ធសភា សម្តេច ឃួន សុដារី ប្រធានរដ្ឋសភា និងសម្តេច ហ៊ុន ម៉ាណែត នាយករដ្ឋមន្ត្រី។

ក្រសួងការបរទេសបញ្ជាក់ថា៖ «ជំនួបទាំងនេះត្រូវបានរំពឹងថានឹងគ្របដណ្តប់លើកិច្ចសហប្រតិបត្តិការក្នុងក្របខណ្ឌទ្វេភាគី និងពហុភាគី ដោយផ្អែកលើស្មារតីភាពជាអ្នកជិតខាងល្អ មិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយ ដើម្បីផលប្រយោជន៍នៃប្រទេសជាតិទាំងពីរ»។

វៀតណាម និងកម្ពុជាបានបង្កើតទំនាក់ទំនងការទូតនៅឆ្នាំ ១៩៦៧។ ពាណិជ្ជកម្មរវាងកម្ពុជា និងវៀតណាម មានទំហំប្រមាណជា ៦.៥៨ ពាន់លានដុល្លាអាមេរិក នៅឆ្នាំ២០២៣។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។

បើតាមកាសែត VNEXPRESS បច្ចុប្បន្នវៀតណាមមានគម្រោងវិនិយោគចំនួន ២០៥នៅកម្ពុជា ដែលមានដើមទុនចុះបញ្ជីសរុបចំនួន ២.៩៤ ពាន់លានដុល្លារ ដែលជាប់ចំណាត់ថ្នាក់លេខ ១ ក្នុងតំបន់អាស៊ាន និងក្នុងក្រុមប្រទេសចំនួន ៥ ដែលមានការវិនិយោគផ្ទាល់ច្រើនជាងគេនៅកម្ពុជា៕

អត្ថបទ៖ សាង តេជៈ រូបភាព៖ VNEXPRESS

The post ប្រធានាធិបតីវៀតណាម នឹងមកបំពេញទស្សនកិច្ចនៅកម្ពុជាដើម្បីពង្រីកផលប្រយោជន៍នៃប្រទេសជាតិទាំងពីរ appeared first on Millions times.