ផែនការនេះត្រូវបានប្រកាសផ្សព្វផ្សាយ និងដាក់ឱ្យអនុវត្តក្រោមអធិបតីភាពឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ កាលពីថ្ងៃទី១៧ ខែកញ្ញា ឆ្នាំ២០២៦ នៅសាលាខេត្តសៀមរាប ដោយមានការចូលរួមពីឯកឧត្តម ង៉ូវ សេងកាក់ អភិបាលរង តំណាងឯកឧត្តម ប្រាក់ សោភ័ណ អភិបាលខេត្តសៀមរាប ព្រមទាំងថ្នាក់ដឹកនាំក្រសួងទេសចរណ៍ មន្ត្រីអង្គភាព និងមន្ទីរពាក់ព័ន្ធ អាជ្ញាធរដែនដី កងកម្លាំងប្រដាប់អាវុធ ប្រតិបត្តិករទេសចរណ៍ សហគមន៍ទេសចរណ៍ គ្រឹះស្ថានសិក្សា សិស្សានុសិស្ស និងអ្នកផលិតមាតិកាព័ត៌មាន ប្រមាណ ២០០រូប។

ក្រសួងទេសចរណ៍បានចាត់ទុកផែនការនេះជាផែនទីបង្ហាញផ្លូវរួម និងជាក្របខ័ណ្ឌសកម្មភាពអនុវត្តជាក់ស្តែង សម្រាប់កៀរគរគ្រប់តួអង្គពាក់ព័ន្ធឱ្យរួមគ្នាអភិវឌ្ឍទេសចរណ៍នៅខេត្តសៀមរាប ដោយផ្តោតលើការបង្កើនគុណភាព និងភាពទាក់ទាញ ដើម្បីសម្រេចចក្ខុវិស័យឱ្យសៀមរាបក្លាយជាគោលដៅទេសចរណ៍បេតិកភណ្ឌឆ្លាតវៃកម្រិតពិភពលោក។

តាមផែនការនេះ សៀមរាបនឹងផ្តោតលើការផ្សារភ្ជាប់ទេសចរណ៍វប្បធម៌ និងធម្មជាតិ ប្រកបដោយភាពធន់ បរិយាបន្ន ចីរភាព និងការទទួលខុសត្រូវ ដើម្បីផ្តល់បទពិសោធដ៏វិសេសវិសាលដល់ភ្ញៀវទេសចរ និងរួមចំណែកលើកកម្ពស់ជីវភាពប្រជាពលរដ្ឋក្នុងមូលដ្ឋាន។

ថ្លែងក្នុងពិធីនេះ ឯកឧត្តម ហួត ហាក់ បានលើកឡើងថា ខេត្តសៀមរាបប្រៀបបាននឹងដួងព្រលឹងនៃព្រះរាជាណាចក្រកម្ពុជា ជាទឹកដីអរិយធម៌ដ៏រុងរឿង និងជាទីតាំងនៃប្រាសាទអង្គរវត្ត ដែលជាសម្បត្តិបេតិកភណ្ឌពិភពលោកដ៏អស្ចារ្យ និងជាកំណប់ទ្រព្យដ៏វិសេសវិសាលរបស់មនុស្សជាតិ។

ឯកឧត្តម បានបញ្ជាក់ថា សៀមរាបមិនត្រឹមតែឆ្លុះបញ្ចាំងពីតថភាពប្រវត្តិសាស្ត្រ សិល្បៈដ៏រស់រវើក វប្បធម៌ និងអរិយធម៌ដ៏ឧត្តុង្គឧត្តមរបស់ខ្មែរប៉ុណ្ណោះទេ ប៉ុន្តែជាគោលដៅទេសចរណ៍ដ៏ល្បីល្បាញ ដែលតំណាងឱ្យអត្តសញ្ញាណ កិត្យានុភាព និងមោទនភាពជាតិខ្មែរនៅលើឆាកអន្តរជាតិផងដែរ។

ជាមួយការប្រកួតប្រជែងទេសចរណ៍ក្នុងតំបន់កាន់តែខ្លាំង និងអាកប្បកិរិយារបស់ភ្ញៀវទេសចរមានការផ្លាស់ប្តូរ ឯកឧត្តម ហួត ហាក់ បានសង្កត់ធ្ងន់លើភាពចាំបាច់នៃការបង្កើតផលិតផលទេសចរណ៍ថ្មីៗ ដោយលើកយកគំនិត «សៀមរាប លើសពីតំបន់អង្គរ» ជាផ្នែកមួយនៃការពង្រីកភាពទាក់ទាញរបស់ខេត្ត។

ឯកឧត្តម បានជំរុញឱ្យមានការកែលម្អ និងពង្រឹងគុណភាពសេវាកម្មទេសចរណ៍ បង្កើនភាពទាក់ទាញ ព្រមទាំងពង្រឹងសន្តិសុខ និងសុវត្ថិភាពជូនភ្ញៀវទេសចរ ដើម្បីធានាថា សៀមរាបអាចឆ្លើយតបនឹងតម្រូវការភ្ញៀវទេសចរជំនាន់ថ្មី និងដើរទាន់ការប្រកួតប្រជែងជាមួយគោលដៅទេសចរណ៍សំខាន់ៗក្នុងតំបន់ និងពិភពលោក។

ដើម្បីជំរុញការអនុវត្តផែនការនេះ ឯកឧត្តមរដ្ឋមន្ត្រីបានដាក់ចេញអនុសាសន៍គន្លឹះចំនួន៤។

អនុសាសន៍ទី១ គឺបន្តច្នៃប្រឌិត និងបង្កើតទីតាំងដែលជាអត្តសញ្ញាណរបស់ខេត្តសៀមរាប ព្រមទាំងពិនិត្យលទ្ធភាពបំផុសសក្តានុពលទីតាំង ឬលំហសាធារណៈក្នុងខេត្តដែលមិនទាន់ត្រូវបានប្រើប្រាស់ពេញលេញ ដើម្បីបម្លែងទៅជាផលិតផល និងបទពិសោធទេសចរណ៍ថ្មីៗ ប្រកបដោយភាពច្នៃប្រឌិត និងទាក់ទាញខ្ពស់។

អនុសាសន៍ទី២ គឺរៀបចំឱ្យមាននិទានកថា (Story Telling) នៅតាមទីតាំងសក្តានុពលទេសចរណ៍។ ឯកឧត្តមរដ្ឋមន្ត្រីបានបញ្ជាក់ថា ក្នុងសម័យទេសចរណ៍ទំនើប មិនត្រឹមតែ «លក់ទីកន្លែង» ប៉ុណ្ណោះទេ ប៉ុន្តែត្រូវ «លក់រឿងរ៉ាវ លក់បទពិសោធ និងលក់អារម្មណ៍» ដោយភ្ជាប់ជាមួយប្រវត្តិសាស្ត្រ វប្បធម៌ ស្ថាបត្យកម្ម ជីវភាពរស់នៅ អាហារ និងលក្ខណៈពិសេសរបស់ទីតាំងនីមួយៗ។

អនុសាសន៍ទី៣ គឺបង្កើត Branding របស់ខេត្តសៀមរាប ដោយផ្តោតលើការកសាងម៉ាកគោលដៅទេសចរណ៍របស់ខេត្តឱ្យមានអត្តសញ្ញាណពិសេស និងអាចដក់ជាប់ក្នុងការចងចាំរបស់ភ្ញៀវទេសចរ។

អនុសាសន៍ទី៤ គឺពិនិត្យលទ្ធភាពបង្កើនសកម្មភាពទេសចរណ៍នាពេលរាត្រី ដើម្បីពន្យារពេលស្នាក់នៅរបស់ភ្ញៀវទេសចរ។

ក្នុងឱកាសនោះ ឯកឧត្តម ហួត ហាក់ ក៏បានថ្លែងអំណរគុណដល់រដ្ឋបាលខេត្តសៀមរាប មន្ទីរពាក់ព័ន្ធ អាជ្ញាធរដែនដីគ្រប់លំដាប់ថ្នាក់ និងកងកម្លាំងប្រដាប់អាវុធគ្រប់ប្រភេទ ដែលបានផ្តល់កិច្ចសហការយ៉ាងជិតស្និទ្ធ និងសម្របសម្រួលជាមួយក្រសួងទេសចរណ៍នៅក្នុងព្រឹត្តិការណ៍ទេសចរណ៍នានា ព្រមទាំងចូលរួមជំរុញ និងអភិវឌ្ឍវិស័យទេសចរណ៍ខេត្តសៀមរាប និងសម្របសម្រួលជូនភ្ញៀវទេសចរជាតិ និងអន្តរជាតិដែលមកទស្សនាខេត្តនេះ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post សៀមរាបដាក់ចេញផែនការអភិវឌ្ឍន៍ទេសចរណ៍ ២០២៦-២០៣០ ឆ្ពោះទៅជាគោលដៅបេតិកភណ្ឌឆ្លាតវៃកម្រិតពិភពលោក appeared first on Millions times.

ផែនការនេះត្រូវបានប្រកាសដាក់ឱ្យអនុវត្តនៅខេត្តព្រះសីហនុ កាលពីរសៀលថ្ងៃទី១៤ ខែកញ្ញា ឆ្នាំ២០២៦ ក្រោមអធិបតីភាព ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ដោយមានការចូលរួមពីតំណាងក្រសួង-ស្ថាប័ន អាជ្ញាធរមូលដ្ឋាន ប្រតិបត្តិករទេសចរណ៍ សហគមន៍ទេសចរណ៍ គ្រឹះស្ថានសិក្សា សិស្សានុសិស្ស និងអ្នកផលិតមាតិកា សរុបប្រមាណ ២៥០នាក់។

ក្រសួងទេសចរណ៍បានចាត់ទុកផែនការអភិវឌ្ឍន៍ទេសចរណ៍ខេត្តព្រះសីហនុ ឆ្នាំ២០២៦-២០៣០ ជាផែនទីបង្ហាញផ្លូវរួម និងជាក្របខ័ណ្ឌសកម្មភាពសម្រាប់កៀរគរតួអង្គពាក់ព័ន្ធចូលរួមអភិវឌ្ឍវិស័យទេសចរណ៍ក្នុងខេត្តឱ្យកាន់តែមានគុណភាព និងភាពទាក់ទាញ។

តាមផែនការនេះ ព្រះសីហនុមានចក្ខុវិស័យក្លាយជាគោលដៅទេសចរណ៍ធុរកិច្ច និងលម្ហែកម្សាន្តកម្រិតអន្តរជាតិ ប្រកបដោយគុណភាព និងឧត្តមភាពប្រកួតប្រជែងទាំងក្នុងតំបន់ និងអន្តរជាតិ ព្រមទាំងរួមចំណែកអភិវឌ្ឍខេត្តទៅជាមជ្ឈមណ្ឌលទីក្រុងធំទី២របស់កម្ពុជា ដែលគាំទ្រដល់វិបុលភាពសេដ្ឋកិច្ច ការច្នៃប្រឌិត និងការអភិវឌ្ឍទីក្រុងប្រកបដោយចីរភាព។

រដ្ឋមន្ត្រីក្រសួងទេសចរណ៍ ឯកឧត្តម ហួត ហាក់ បានអបអរសាទរ និងកោតសរសើរចំពោះសមិទ្ធផលដែលខេត្តព្រះសីហនុសម្រេចបានទាំងនៅកម្រិតជាតិ និងអាស៊ាន ព្រមទាំងការអភិវឌ្ឍហេដ្ឋារចនាសម្ព័ន្ធ និងសោភណភាពទីក្រុង ដែលបានកែលម្អជាបន្តបន្ទាប់។

ក្នុងនោះ ការរៀបចំទីតាំងកម្សាន្ត និងសំណង់និមិត្តរូប ដូចជា រូបសំណាក «ព្រះថោងតោងស្បៃនាងនាគ» «ខ្មែរធ្វើបាន» និង «នាគបាញ់ទឹក» ត្រូវបានចាត់ទុកថា បានចូលរួមបង្កើនភាពទាក់ទាញរបស់ខេត្តសម្រាប់ភ្ញៀវទេសចរជាតិ និងអន្តរជាតិ។

ឯកឧត្តមរដ្ឋមន្ត្រីបានបញ្ជាក់ថា ព្រះសីហនុមានសក្តានុពលទេសចរណ៍ធម្មជាតិចម្រុះ រួមមានឆ្នេរសមុទ្រ កោះធំតូច ធនធានធម្មជាតិ ជីវចម្រុះសមុទ្រ និងឧទ្យានជាតិរាម ដែលអំណោយផលដល់ការអភិវឌ្ឍទេសចរណ៍ឆ្នេរ ទេសចរណ៍កោះ អេកូទេសចរណ៍ និងកីឡាទេសចរណ៍លើទឹក។

បន្ថែមពីនេះ ខេត្តមានហេដ្ឋារចនាសម្ព័ន្ធតភ្ជាប់សំខាន់ៗ រួមមាន ផ្លូវល្បឿនលឿនភ្នំពេញ-ព្រះសីហនុ កំពង់ផែសមុទ្រទឹកជ្រៅ និងអាកាសយានដ្ឋានអន្តរជាតិ ព្រមទាំងមូលដ្ឋានអាជីវកម្ម និងសេវាកម្មទេសចរណ៍ជាច្រើនកម្រិត ដែលជាមូលដ្ឋានសម្រាប់ជំរុញខេត្តឱ្យក្លាយជាគោលដៅទេសចរណ៍សមុទ្រកម្រិតអន្តរជាតិ ប្រកបដោយគុណភាព សុវត្ថិភាព និងចីរភាព។

ទោះជាយ៉ាងណា ឯកឧត្តម រដ្ឋមន្ត្រីបានលើកឡើងថា ក្នុងបរិបទដែលការប្រកួតប្រជែងទេសចរណ៍ក្នុងតំបន់កាន់តែខ្លាំង និងអាកប្បកិរិយារបស់ភ្ញៀវទេសចរកំពុងផ្លាស់ប្តូរ ព្រះសីហនុត្រូវបន្តបង្កើតផលិតផលទេសចរណ៍ថ្មី កែលម្អ និងពង្រឹងគុណភាពសេវាកម្ម ព្រមទាំងបង្កើនភាពទាក់ទាញ ភាពស្អាត សន្តិសុខ និងសុវត្ថិភាពសម្រាប់ភ្ញៀវទេសចរ។

ឯកឧត្តម បានបន្តថា ការអភិវឌ្ឍទេសចរណ៍ក៏ត្រូវឆ្លើយតបទៅនឹងតម្រូវការរបស់ភ្ញៀវទេសចរជំនាន់ថ្មី និងការវិវត្តនៃបច្ចេកវិទ្យាឌីជីថល និងបញ្ញាសិប្បនិម្មិត ដើម្បីរក្សាភាពប្រកួតប្រជែងរបស់ព្រះសីហនុជាមួយគោលដៅទេសចរណ៍សំខាន់ៗក្នុងតំបន់ និងពិភពលោក។

ក្នុងន័យនេះ ក្រសួងទេសចរណ៍បានដាក់ចេញសសរស្តម្ភយុទ្ធសាស្ត្រនៃកិច្ចសហប្រតិបត្តិការចំនួន៦ ដោយផ្តោតលើការចូលរួមរបស់ក្រសួង-ស្ថាប័នថ្នាក់ជាតិ រដ្ឋបាលថ្នាក់ក្រោមជាតិ ដៃគូអន្តរជាតិ និងអភិវឌ្ឍ សង្គមស៊ីវិល វិស័យឯកជនក្នុងស្រុក និងបរទេស ព្រមទាំងបណ្តាញសារព័ត៌មាន អ្នកផលិតមាតិកា Influencers និង KOLs និងប្រជាពលរដ្ឋ។

ឯកឧត្តម ហួត ហាក់ ក៏បានថ្លែងអំណរគុណដល់អ្នកផលិតមាតិកា Influencers និងយុវជន ដែលបានចូលរួមផ្សព្វផ្សាយរូបភាព និងគោលដៅទេសចរណ៍នានាក្នុងខេត្តព្រះសីហនុ ព្រមទាំងព័ត៌មានវិជ្ជមានអំពីកម្ពុជា ដើម្បីលើកកម្ពស់កិត្តិនាមរបស់ប្រទេសទៅកាន់ពិភពលោក។

លោកបានគូសបញ្ជាក់ស្របតាមទិសស្លោករបស់មហាគ្រួសារវិស័យទេសចរណ៍ថា «បុគ្គលម្នាក់ៗ គឺជាអ្នកផ្សព្វផ្សាយទេសចរណ៍កម្ពុជាម្នាក់»៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ខេត្តព្រះសីហនុជំរុញសក្តានុពលទេសចរណ៍ និងធុរកិច្ច ឆ្ពោះទៅជាមជ្ឈមណ្ឌលទីក្រុងធំទី ២ របស់កម្ពុជា appeared first on Millions times.

ការប្តេជ្ញានេះត្រូវបានលើកឡើងក្នុងជំនួបរវាង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោក Bo Shanglang ប្រធានសមាគមជំរុញការលើកកម្ពស់សេដ្ឋកិច្ច និងពាណិជ្ជកម្មកម្ពុជា-អាស៊ាន រួមជាមួយសហការី និងវិនិយោគិនចិន កាលពីថ្ងៃទី១៣ ខែកញ្ញា ឆ្នាំ២០២៦ នៅទីស្តីការក្រសួងទេសចរណ៍។

ក្នុងជំនួបនេះ ភាគីទាំងពីរបានពិភាក្សាអំពីការពង្រឹង និងពង្រីកកិច្ចសហប្រតិបត្តិការទេសចរណ៍កម្ពុជា-ចិន ជាពិសេសលើគំនិតផ្តួចផ្តើម «ទេសចរណ៍ និងភាពយន្ត»។

ឯកឧត្តម ហួត ហាក់ បានស្វាគមន៍ និងវាយតម្លៃខ្ពស់ចំពោះការចូលរួមរបស់សមាគម និងវិនិយោគិនចិន ក្នុងការគាំទ្រ និងផ្សព្វផ្សាយសក្តានុពលទេសចរណ៍ និងវិនិយោគរបស់កម្ពុជាទៅកាន់ប្រជាជន សហគ្រាស និងវិនិយោគិននៅចិន។

ឯកឧត្តមបានលើកឡើងថា ក្រសួងទេសចរណ៍កំពុងដឹកនាំក្រុមការងារអន្តរក្រសួង ដើម្បីសម្របសម្រួល និងគាំទ្រការផលិតភាពយន្តទេសចរណ៍នៅកម្ពុជា ក្នុងគោលបំណងប្រែកម្ពុជាឱ្យក្លាយជាគោលដៅថតភាពយន្តអន្តរជាតិ។

តាមក្រសួង កិច្ចការនេះរួមមានការសម្រួលនីតិវិធី ការបង្កើតយន្តការច្រកចេញ-ចូលតែមួយ និងការផ្សព្វផ្សាយទីតាំងថតភាពយន្តនៅកម្ពុជា ដែលមានទាំងប្រាសាទ បេតិកភណ្ឌវប្បធម៌ ឆ្នេរសមុទ្រ ព្រៃភ្នំ និងតំបន់ធម្មជាតិ។

ជាមួយគ្នានេះ លោក Bo Shanglang បានបង្ហាញការប្តេជ្ញាសហការជាមួយក្រសួងទេសចរណ៍ ដើម្បីទាក់ទាញក្រុមហ៊ុនផលិតភាពយន្តធំៗរបស់ចិន និងហុងកុង មកថតភាពយន្តខ្នាតធំនៅកម្ពុជា ព្រមទាំងជួយផ្សព្វផ្សាយព័ត៌មានអំពីស្ថានភាពពិត និងសុវត្ថិភាពនៅកម្ពុជាទៅកាន់ប្រជាជន និងធុរជនចិន។

លោកបានបញ្ជាក់ថា កិច្ចសហការនេះក៏មានគោលបំណងពង្រឹងការតភ្ជាប់បណ្តាញធុរកិច្ច និងការវិនិយោគរវាងកម្ពុជា និងចិនផងដែរ។

ជាកិច្ចបញ្ចប់ ឯកឧត្តម ហួត ហាក់ បានស្នើឱ្យសមាគមបន្តផ្សព្វផ្សាយព័ត៌មានពិតអំពីស្ថានភាពនយោបាយ សង្គម សេដ្ឋកិច្ច និងសន្តិសុខរបស់កម្ពុជា ព្រមទាំងផ្សព្វផ្សាយគោលនយោបាយលើកទឹកចិត្តរបស់រាជរដ្ឋាភិបាល ដើម្បីទាក់ទាញក្រុមហ៊ុនផលិតភាពយន្ត អ្នកបង្កើតមាតិកា និងវិនិយោគិនចិនមកកម្ពុជា។

ឯកឧត្តមក៏បានស្នើឱ្យសមាគមរៀបចំកម្មវិធី FAM Trip សម្រាប់ប្រតិបត្តិករទេសចរណ៍ អ្នកផលិតមាតិកា និងសារព័ត៌មានចិន ដើម្បីផ្សព្វផ្សាយសក្តានុពលទេសចរណ៍ និងបរិយាកាសវិនិយោគរបស់កម្ពុជា។

សមាគមជំរុញការលើកកម្ពស់សេដ្ឋកិច្ច និងពាណិជ្ជកម្មកម្ពុជា-អាស៊ាន មានបេសកកម្មជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម វប្បធម៌ និងការតភ្ជាប់ធុរកិច្ចរវាងកម្ពុជា និងចិន ហើយមានបណ្តាញការិយាល័យតំណាងនៅទីក្រុងប៉េកាំង ខេត្តធំៗក្នុងប្រទេសចិន និងបណ្តាប្រទេសក្នុងតំបន់អាស៊ាន៕

អត្ថបទ៖ ប៊ី

តាមដានជាមួយយើង៖ Million Times

second...

x

The post សមាគមកម្ពុជា-អាស៊ានប្តេជ្ញាទាក់ទាញក្រុមហ៊ុនភាពយន្តធំៗចិនមកកម្ពុជា appeared first on Millions times.

តាមដានជាមួយយើង៖ Million Times

សមិទ្ធផលដ៏ប្រពៃនេះកើតចេញពីកត្តាសន្តិភាព ស្ថិរភាពនយោបាយ និងការដឹកនាំស្របតាម «យុទ្ធសាស្ត្រចក្រាវិស័យបរិស្ថាន ២០២៣-២០២៨» (ស្អាត ភាពបៃតង និងចីរភាព) របស់​រាជរដ្ឋាភិបាល ក្រោម​ការ​ចង្អុល​បង្ហាញ​ជា​យុទ្ធសាស្ត្រ​របស់​សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​កម្ពុជា។

រាជរដ្ឋាភិបាលនឹងបន្តរៀបចំ និងពង្រីក «គោលដៅលំហែបៃតង» នៅតាមតំបន់ការពារធម្មជាតិ ដើម្បី​បង្កើតការងារបៃតង លើកកម្ពស់ជីវភាពសហគមន៍ និង​អភិរក្ស​ធនធាន​ធម្មជាតិ​ប្រកប​ដោយ​ចីរភាព។

លើសពីនេះតំបន់លម្ហែបៃតងនៅតាមតំបន់ការពារធម្មជាតិ កំពុងបង្ហាញសក្តានុពល និង​ការ ទាក់ទាញ​ទេសចរណ៍​ធម្មជាតិ ដែល​ជំរុញ​ឲ្យ​កម្ពុជា​បង្កើត​បាន​សក្តានុពល​យ៉ាង​សំខាន់​ក្នុង​ការ​ស្រូប​ទាញ​ភ្ញៀវ​ទេសចរ​គ្រប់ទិសទី ទាំងជាតិ និងអន្តរជាតិដែលស្រឡាញ់ ចូលរួមការពារ និង​អភិរក្ស​ធនធាន​ធម្មជាតិ និងបរិស្ថានបានល្អប្រសើរជាលំដាប់៕

អត្ថបទ៖ ឆដា, រូបភាព៖ បណ្ដាញសង្គម

second...

x

The post កម្ពុជាជាប់លេខ១ ក្នុងតំបន់អាស៊ីអាគ្នេយ៍ និងលេខ១៧ លើពិភពលោក ជាប្រទេសមានវិស័យទេសចរណ៍ធម្មជាតិល្អបំផុត appeared first on Millions times.

ការគាំទ្រនេះត្រូវបានបង្ហាញក្នុងជំនួបរវាងឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោក ឡៅ ស៊ុនលី ចាងហ្វាងផលិតកម្មប្រាយ ហ្វីម ព្រមទាំងសហការី និងតារាសម្តែងជនជាតិកាណាដា លោក ដាវ ឡឺឌុក (Dave Leduc) កាលពីថ្ងៃទី៥ ខែកញ្ញា ឆ្នាំ២០២៦ នៅរាជធានីភ្នំពេញ។

ក្នុងជំនួបនេះ លោកចាងហ្វាងផលិតកម្មប្រាយ ហ្វីម បានរាយការណ៍អំពីគម្រោងផលិតភាពយន្ត «ល្បុក្កតោ៖ អ្នកចម្បាំងអង្គរ» និងស្នើសុំអនុសាសន៍ ព្រមទាំងការគាំទ្រសម្របសម្រួលពីក្រសួងទេសចរណ៍ ដើម្បីឱ្យដំណើរការផលិតភាពយន្តប្រព្រឹត្តទៅដោយរលូន និងអាចរួមចំណែកផ្សព្វផ្សាយវប្បធម៌ និងគោលដៅទេសចរណ៍កម្ពុជាឱ្យកាន់តែទូលំទូលាយ។

ឯកឧត្តម ហួត ហាក់ បានស្វាគមន៍ និងវាយតម្លៃខ្ពស់ចំពោះការវិនិយោគរបស់ផលិតកម្មប្រាយ ហ្វីម ក្នុងវិស័យភាពយន្តនៅកម្ពុជា ព្រមទាំងបង្ហាញការចាប់អារម្មណ៍ចំពោះគម្រោងនេះ ដោយចាត់ទុកថា ភាពយន្តអាចដើរតួនាទីសំខាន់ក្នុងការផ្សព្វផ្សាយសិល្បៈ វប្បធម៌ អត្តសញ្ញាណជាតិ និងតំបន់ទេសចរណ៍សក្តានុពលរបស់កម្ពុជា។

រដ្ឋមន្ត្រីក្រសួងទេសចរណ៍បានបញ្ជាក់ថា ក្រសួងស្វាគមន៍ និងគាំទ្រគម្រោងថតភាពយន្តនៅកម្ពុជា ហើយត្រៀមសម្របសម្រួលការងារពាក់ព័ន្ធ ស្របតាមតួនាទី និងភារកិច្ចរបស់ក្រសួង។ ចំពោះនីតិវិធី និងខ្លឹមសារនៃការផលិតភាពយន្ត ក្រុមហ៊ុនត្រូវស្នើសុំការអនុញ្ញាតពីក្រសួងវប្បធម៌ និងវិចិត្រសិល្បៈ និងអនុវត្តតាមបទប្បញ្ញត្តិជាធរមាន។

ឯកឧត្តម ហួត ហាក់ បានគូសបញ្ជាក់ថា ក្រសួងទេសចរណ៍កំពុងយកចិត្តទុកដាក់ខ្ពស់លើការជំរុញ «ទេសចរណ៍ភាពយន្ត» ដោយមើលឃើញថា វាជាឧបករណ៍មានសក្តានុពលសម្រាប់នាំយករូបភាពកម្ពុជា ទៅផ្សព្វផ្សាយនៅលើទីផ្សារអន្តរជាតិ។

ដោយទទួលបានគោលការណ៍ឯកភាពដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្រុមការងារអន្តរក្រសួងដើម្បីសម្របសម្រួល និងគាំទ្រវិស័យទេសចរណ៍ភាពយន្ត និងការទស្សនាប្រាសាទនាពេលរាត្រីនៅកម្ពុជា ត្រូវបានបង្កើតឡើង ដោយមានឯកឧត្តមរដ្ឋមន្ត្រីក្រសួងទេសចរណ៍ជាប្រធាន។

ក្រុមការងារនេះមានភារកិច្ចរៀបចំផែនការយុទ្ធសាស្ត្រ និងផែនការសកម្មភាពគាំទ្រវិស័យទេសចរណ៍ភាពយន្ត សិក្សា និងរៀបចំតំបន់សក្តានុពលសម្រាប់ការផលិតភាពយន្ត បទចម្រៀងទេសចរណ៍ និងស្ប៉តពាណិជ្ជកម្ម ព្រមទាំងជំរុញការអភិវឌ្ឍ និងការវិនិយោគលើឧស្សាហកម្មទេសចរណ៍ភាពយន្ត និងសិក្សារៀបចំយន្តការលើកទឹកចិត្តដល់ការផលិតភាពយន្តនៅកម្ពុជា។

ក្នុងជំនួបនេះ រដ្ឋមន្ត្រីក្រសួងទេសចរណ៍ក៏បានលើកទឹកចិត្តដល់ផលិតកម្មប្រាយ ហ្វីម ឱ្យចូលរួមផលិតភាពយន្ត និងវីដេអូដែលមានការនិទានរឿងអំពីប្រាសាទ បេតិកភណ្ឌ វប្បធម៌ ធម្មជាតិ និងតំបន់ទេសចរណ៍សក្តានុពលនានារបស់កម្ពុជា ដើម្បីបង្ហាញភាពស្រស់ស្អាត និងភាពសម្បូរបែបរបស់កម្ពុជាដល់ទស្សនិកជនអន្តរជាតិ។

ឯកឧត្តមក៏បានអញ្ជើញផលិតកម្មប្រាយ ហ្វីម ឱ្យចូលរួមសហការផ្សព្វផ្សាយយុទ្ធនាការ និងព្រឹត្តិការណ៍ទេសចរណ៍សំខាន់ៗរបស់ក្រសួងទេសចរណ៍ ជាពិសេសយុទ្ធនាការ «ទស្សនាកម្ពុជានៅរដូវកាលបៃតង» (Green Season) និងការជំរុញ Soft Power តាមរយៈទេសចរណ៍ភាពយន្ត ទេសចរណ៍ម្ហូបអាហារ ទេសចរណ៍កីឡា ការទស្សនាប្រាសាទនាពេលរាត្រី ការប្រគំតន្ត្រីអន្តរជាតិ និងព្រឹត្តិការណ៍ទេសចរណ៍ជាតិ-អន្តរជាតិនានា។

តាមរយៈការជំរុញទេសចរណ៍ភាពយន្ត ក្រសួងទេសចរណ៍មានគោលដៅប្រើប្រាស់ការផលិតភាពយន្ត និងមាតិកាដែលមានកម្ពុជាเป็นទីតាំងសំខាន់ ដើម្បីផ្សារភ្ជាប់ការកម្សាន្តជាមួយការស្គាល់វប្បធម៌ បេតិកភណ្ឌ និងគោលដៅទេសចរណ៍ ដែលអាចជួយបង្កើនការចាប់អារម្មណ៍របស់ទស្សនិកជនអន្តរជាតិចំពោះកម្ពុជា៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ក្រសួងទេសចរណ៍ជំរុញ «ទេសចរណ៍ភាពយន្ត» ផ្សព្វផ្សាយកម្ពុជា និងទាក់ទាញភ្ញៀវអន្តរជាតិ appeared first on Millions times.

ក្នុងដំណើរទស្សនកិច្ចស្វែងយល់អំពីបដិសណ្ឋារកិច្ច និងការផ្តល់សេវាកម្មជូនភ្ញៀវ និងអ្នកដំណើរជាតិ និងអន្តរជាតិ នៅអាកាសយានដ្ឋានអន្តរជាតិតេជោ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម Dominic Williams ឯកអគ្គរាជទូតវិសាមញ្ញ និងពេញសមត្ថភាពនៃចក្រភពអង់គ្លេស និងអៀរឡង់ខាងជើង ព្រមទាំងសហការី បានជួបសំណេះសំណាលជាមួយមន្ត្រីមានសមត្ថកិច្ចប្រចាំការ និងវិស័យឯកជននៅក្នុងអាកាសយានដ្ឋាន។

ក្នុងឱកាសនោះ ឯកឧត្តម ហួត ហាក់ និងឯកឧត្តម Dominic Williams បានចុះពិនិត្យ និងស្វែងយល់អំពីលំហូរបដិសណ្ឋារកិច្ច អន្តោប្រវេសន៍ ការប្រើប្រាស់ច្រកទ្វារឆ្លាត (Smart Gate) ព្រមទាំងសេវាកម្មនានាដែលផ្តល់ជូននៅក្នុងអាកាសយានដ្ឋាន។

ភាគីទាំងពីរបានកោតសរសើរ និងវាយតម្លៃខ្ពស់ចំពោះការរៀបចំដ៏ទំនើប ស្របតាមស្តង់ដារអន្តរជាតិ និងការត្រៀមខ្លួនរួចជាស្រេចរបស់ភាគីពាក់ព័ន្ធ ក្នុងការទទួលស្វាគមន៍ភ្ញៀវទេសចរមកពីជុំវិញពិភពលោក។

ក្នុងដំណើរទស្សនកិច្ចនេះ ក្រុមការងារក៏បានថតរូបភាព និងវីដេអូ ដើម្បីផ្សព្វផ្សាយអំពីអាកាសយានដ្ឋានអន្តរជាតិតេជោ សំដៅបង្ហាញពីសមិទ្ធផលថ្មីរបស់កម្ពុជា ព្រមទាំងសក្តានុពលនៃវិស័យទេសចរណ៍ និងអាកាសចរណ៍ទៅកាន់ពិភពលោក។

ថ្លែងក្នុងឱកាសនេះ ឯកឧត្តម ហួត ហាក់ បានគូសបញ្ជាក់ថា អាកាសយានដ្ឋានអន្តរជាតិតេជោ គឺជាហេដ្ឋារចនាសម្ព័ន្ធដ៏សំខាន់មួយ ដែលរួមចំណែកពង្រឹងការតភ្ជាប់ការធ្វើដំណើរអន្តរជាតិ ផ្សព្វផ្សាយសក្តានុពលទេសចរណ៍កម្ពុជាដ៏សម្បូរបែប និងលើកកម្ពស់ភាពប្រកួតប្រជែងរបស់វិស័យទេសចរណ៍កម្ពុជា។

លោកបានបន្ថែមថា KTI ក៏ជាច្រកសំខាន់មួយសម្រាប់ផ្សព្វផ្សាយរូបភាពកម្ពុជាជាគោលដៅទេសចរណ៍ដែលមានសុវត្ថិភាព ភាពទាក់ទាញ និងបដិសណ្ឋារកិច្ចដ៏កក់ក្តៅ។

អាកាសយានដ្ឋានអន្តរជាតិតេជោ (KTI) គឺជាអាកាសយានដ្ឋានអន្តរជាតិថ្មីកម្រិត 4F របស់កម្ពុជា ដែលត្រូវបានសាងសង់ឡើង ដើម្បីបង្កើនសមត្ថភាពទទួលអ្នកដំណើរ និងពង្រីកការតភ្ជាប់ផ្លូវអាកាសរវាងកម្ពុជា និងពិភពលោក ជាពិសេសដើម្បីគាំទ្រដល់ការអភិវឌ្ឍវិស័យទេសចរណ៍ និងកំណើនសេដ្ឋកិច្ចជាតិ។

KTI ត្រូវបានបើកសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។

យោងតាមរបាយការណ៍របស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជា ក្នុងឆមាសទី១ ឆ្នាំ២០២៦ អាកាសយានដ្ឋានទាំងបីរបស់កម្ពុជាទទួលបានជើងហោះហើរទ្វេទិសសរុបចំនួន ៣២,៣០៦ ជើង ដោយរក្សាបាននូវស្ថិរភាព បើធៀបនឹងរយៈពេលដូចគ្នាក្នុងឆ្នាំ២០២៥។

ក្នុងរយៈពេល៦ខែដំបូងនៃឆ្នាំ២០២៦ អ្នកដំណើរដែលចូលមកកម្ពុជាតាមផ្លូវអាកាសមានចំនួន ៣,២៦៩,២៩៧ នាក់ ថយចុះ ៧ ភាគរយ បើធៀបនឹងរយៈពេលដូចគ្នាក្នុងឆ្នាំ២០២៥។

តាមរយៈការរៀបចំទំនើប និងការផ្តល់សេវាកម្មស្របតាមស្តង់ដារអន្តរជាតិ អាកាសយានដ្ឋានអន្តរជាតិតេជោត្រូវបានរំពឹងថា នឹងបន្តដើរតួនាទីសំខាន់ក្នុងការពង្រឹងការតភ្ជាប់ផ្លូវអាកាស និងជួយបង្ហាញសក្តានុពលទេសចរណ៍ និងបដិសណ្ឋារកិច្ចរបស់កម្ពុជាទៅកាន់ភ្ញៀវអន្តរជាតិ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post អាកាសយានដ្ឋានតេជោ ជាច្រកទ្វារសំខាន់ ផ្សព្វផ្សាយសក្តានុពលទេសចរណ៍កម្ពុជាទៅកាន់ពិភពលោក appeared first on Millions times.

ការជំរុញនេះត្រូវបានលើកឡើងក្នុងសិក្ខាសាលាថ្នាក់ជាតិស្តីពី «ការជំរុញទេសចរណ៍ភាពយន្តនៅកម្ពុជា» ដែលបានបិទបញ្ចប់នៅខេត្តសៀមរាប ក្រោមអធិបតីភាពឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានក្រុមការងារអន្តរក្រសួង ដើម្បីសម្របសម្រួល និងគាំទ្រវិស័យទេសចរណ៍ភាពយន្ត និងការទស្សនាប្រាសាទនាពេលរាត្រីនៅកម្ពុជា។

សិក្ខាសាលានេះបានប្រមូលផ្តុំតំណាងស្ថាប័នរដ្ឋ វិស័យឯកជន សមាគម និងអ្នកជំនាញក្នុងវិស័យទេសចរណ៍ វប្បធម៌ សិល្បៈ និងភាពយន្ត ដើម្បីពិភាក្សា ផ្លាស់ប្តូរទស្សនៈ និងស្វែងរកវិធានការជាក់ស្តែងសម្រាប់ជំរុញកម្ពុជាឱ្យក្លាយជាគោលដៅទេសចរណ៍ភាពយន្តដែលមានភាពទាក់ទាញ និងប្រកួតប្រជែង។

ចំណុចសំខាន់មួយនៃសិក្ខាសាលា គឺកិច្ចពិភាក្សាស្តីពី «កាលានុវត្តភាព បញ្ហាប្រឈម និងវិធានការគន្លឹះក្នុងការជំរុញទេសចរណ៍ភាពយន្ត» ដែលបានផ្តល់ឱកាសដល់តំណាងស្ថាប័នពាក់ព័ន្ធ និងអ្នកជំនាញក្នុងវិស័យភាពយន្ត និងទេសចរណ៍ ចែករំលែកបទពិសោធន៍ ទស្សនៈ និងអនុសាសន៍ ដើម្បីកំណត់ទិសដៅអភិវឌ្ឍទេសចរណ៍ភាពយន្តនៅកម្ពុជាឱ្យកាន់តែមានប្រសិទ្ធភាព។

ក្នុងកិច្ចពិភាក្សា អ្នកចូលរួមបានផ្តោតលើសក្តានុពលរបស់កម្ពុជា ក្នុងការទាក់ទាញផលិតកម្មភាពយន្តជាតិ និងអន្តរជាតិ ដោយប្រទេសមានសម្បត្តិបេតិកភណ្ឌវប្បធម៌ និងប្រវត្តិសាស្ត្រ ប្រាសាទបុរាណ ទេសភាពធម្មជាតិ ឆ្នេរសមុទ្រ កោះ តំបន់អេកូទេសចរណ៍ ទីក្រុង និងជីវភាពរស់នៅរបស់ប្រជាជន ដែលអាចក្លាយជាទីតាំងថតភាពយន្តប្រកបដោយភាពចម្រុះ និងអត្តសញ្ញាណពិសេស។

ទន្ទឹមនឹងនេះ អង្គពិភាក្សាក៏បានកំណត់បញ្ហាប្រឈមមួយចំនួនដែលត្រូវការកិច្ចសហការដោះស្រាយជាប្រព័ន្ធ រួមមាន ការសម្របសម្រួលនីតិវិធីពាក់ព័ន្ធនឹងការថតភាពយន្ត ការផ្តល់ព័ត៌មាន និងសេវាគាំទ្រដល់ផលិតកម្ម ការអភិវឌ្ឍធនធានមនុស្ស និងជំនាញបច្ចេកទេស ការពង្រឹងសមត្ថភាពផលិតកម្មក្នុងស្រុក ការផ្សព្វផ្សាយទីតាំងថតភាពយន្ត និងការពង្រឹងកិច្ចសហការរវាងវិស័យទេសចរណ៍ វប្បធម៌ ភាពយន្ត និងវិស័យឯកជន។

អង្គពិភាក្សាបានគូសបញ្ជាក់ថា ការជំរុញទេសចរណ៍ភាពយន្តមិនគួរផ្តោតត្រឹមការទាក់ទាញផលិតកម្មភាពយន្តមកថតនៅកម្ពុជាប៉ុណ្ណោះទេ ប៉ុន្តែត្រូវអាចប្រែក្លាយ «ទីតាំងថតភាពយន្ត» ទៅជា «គោលដៅទេសចរណ៍» តាមរយៈការតភ្ជាប់ស្នាដៃភាពយន្តជាមួយផលិតផល និងខ្សែទស្សនកិច្ចទេសចរណ៍ ការផ្សព្វផ្សាយគោលដៅ និងការបង្កើតបទពិសោធន៍ថ្មីៗសម្រាប់ភ្ញៀវទេសចរ។

ថ្លែងក្នុងពិធីបិទ ឯកឧត្តម ហួត ហាក់ បានវាយតម្លៃខ្ពស់ចំពោះលទ្ធផលនៃសិក្ខាសាលា និងកិច្ចពិភាក្សា ព្រមទាំងជំរុញឱ្យក្រសួង ស្ថាប័នពាក់ព័ន្ធ វិស័យឯកជន សមាគម អ្នកផលិតភាពយន្ត និងដៃគូអភិវឌ្ឍន៍ បន្តពង្រឹងកិច្ចសហការ និងប្រែក្លាយអនុសាសន៍ដែលទទួលបានទៅជាសកម្មភាពជាក់ស្តែង។

ឯកឧត្តមរដ្ឋមន្ត្រីបានលើកទឹកចិត្តឱ្យគ្រប់ភាគីពាក់ព័ន្ធបន្តបង្កើតបរិយាកាសអំណោយផលសម្រាប់ផលិតកម្មភាពយន្តជាតិ និងអន្តរជាតិ ព្រមទាំងបង្កើនការផ្សព្វផ្សាយទីតាំងថត និងសក្តានុពលទេសចរណ៍របស់កម្ពុជា។

ឯកឧត្តម ហួត ហាក់ បានគូសបញ្ជាក់ថា ការអភិវឌ្ឍ Film Tourism ឱ្យក្លាយជាផលិតផលទេសចរណ៍ថ្មី និងជាផ្នែកមួយនៃ Soft Power របស់កម្ពុជា អាចរួមចំណែកទាក់ទាញភ្ញៀវទេសចរ បង្កើតការងារ និងប្រាក់ចំណូលដល់ប្រជាពលរដ្ឋ ព្រមទាំងលើកកម្ពស់កិត្យានុភាព និងរូបភាពវិជ្ជមានរបស់កម្ពុជាលើឆាកអន្តរជាតិ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជា ជំរុញទេសចរណ៍ភាពយន្ត ឱ្យក្លាយជាផលិតផលទេសចរណ៍ថ្មី appeared first on Millions times.

​ការ​ប្តេជ្ញា​នេះ​ធ្វើឡើង​ក្នុង​ជំនួប​កាលពី​ថ្ងៃទី​៧​ ​ខែសីហា ​ឆ្នាំ​២០២៦​ រវាង​ឯកឧត្តម​ ហួត​ ​ហាក់ ​រដ្ឋមន្ត្រី​ក្រសួង​ទេសចរណ៍​ ​និង​ឯកឧត្តម​ ​Sonexay​ ​Vannaxay​ ​ឯក​អគ្គ​រដ្ឋទូត​វិសាមញ្ញ ​និង​ពេញ​សមត្ថភាព​នៃ​សាធារណរដ្ឋ​ប្រជាធិបតេយ្យ​ប្រជាមានិត​ឡាវ​ប្រចាំ​ព្រះរាជាណាចក្រ​កម្ពុជា​ ​និង​សហការី​ជាន់​ខ្ពស់​ ​នៅ​ទីស្តីការ​ក្រសួង​ទេសចរណ៍​ ​ដើម្បី​ពិភាក្សា​អំពី​ការ​ពង្រឹង​ និង​ពង្រីក​កិច្ចសហប្រតិបត្តិការ​ទេសចរណ៍​រវាង​ប្រទេស​ទាំង​ពីរ​។

​ក្នុង​ឱកាស​នោះ​ ​ឯកឧត្តម​ ហួត​ ​ហាក់ ​បាន​ស្វាគមន៍​ និង​អបអរសាទរ​ឯកឧត្តម​ឯក​អគ្គ​រដ្ឋទូត​ ​ចំពោះ​ការ​តែងតាំង​ជា​ឯក​អគ្គ​រដ្ឋទូត​ថ្មី​ ​ព្រមទាំង​ថ្លែងអំណរគុណ​ដល់​រដ្ឋាភិបាល​ ​និង​ប្រជាជន​ឡាវ ​ដែល​តែងតែ​គាំទ្រ​កម្ពុជា​ក្នុង​ការ​អភិវឌ្ឍ​ជាតិ ​សេដ្ឋកិច្ច​ ​និង​សង្គម​ ក្រោម​ស្មារតី​សាមគ្គីភាព​ ​និង​ចំណង​មិត្តភាព​ជា​ប្រពៃណី​ដ៏​យូរអង្វែង​រយៈពេល​ ​៧០​ឆ្នាំ​ ​គិត​មកដល់​ឆ្នាំ​២០២៦​។

​រដ្ឋមន្ត្រី​ក្រសួង​ទេសចរណ៍​បាន​លើកឡើង​ថា​ ​ទំនាក់ទំនង​មិត្តភាព​រវាង​កម្ពុជា​ ​និង​ឡាវ ​បាន​ពង្រឹង​ និង​ពង្រីក​លើ​វិស័យ​ជាច្រើន​ ​រួមទាំង​វិស័យ​ទេសចរណ៍​ ​និង​បាន​កាន់តែ​ស៊ីជម្រៅ​នូវ​កិច្ចសហប្រតិបត្តិការ​ដែល​ផ្តល់​ផលប្រយោជន៍​ទៅ​វិញទៅមក​ ស្រប​តាម​ស្មារតី​ «​ភាព​ជាដៃគូ ​យុទ្ធសាស្ត្រ​គ្រប់​ជ្រុងជ្រោយ​ ​និង​យូរអង្វែង​រវាង​កម្ពុជា​ ​និង​ឡាវ​» ​ដើម្បី​ការ​អភិវឌ្ឍ​ ​និង​វិបុលភាព​នៃ​ប្រជាជាតិ​ ​និង​ប្រជាជន​ទាំង​ពីរ​។

​ឯកឧត្តម​ ហួត​ ​ហាក់ ​ក៏​បាន​គូសបញ្ជាក់​អំពី​ស្ថានភាព​នយោបាយ​ ​សេដ្ឋកិច្ច​ ​សង្គម​ និង​ការ​អភិវឌ្ឍ​វិស័យ​ទេសចរណ៍​របស់​កម្ពុជា​ ​ដោយ​បញ្ជាក់​ថា​ ​កម្ពុជា​នៅតែ​ជា​គោលដៅ​ទេសចរណ៍​ប្រកបដោយ​សន្តិភាព​ ស្ថិរភាព​ ​សុវត្ថិភាព​ ​និង​បដិសណ្ឋារកិច្ច​ដ៏​កក់ក្តៅ​។

​ជាមួយគ្នា​នេះ​ រដ្ឋមន្ត្រី​បាន​លើកឡើង​ពី​យុទ្ធនាការ​ «​កម្ពុជា​៖​ ​ព្រះរាជាណាចក្រ​អច្ឆរិយៈ​ ​ផ្តល់​នូវ​ភាព​កក់ក្តៅ​» ​និង​ «​ទស្សនា​កម្ពុជា​ ​នា​រដូវកាល​បៃតង​» ​ព្រមទាំង​យុទ្ធនាការ​ «​ប្រទេស​បី ​គោលដៅ​មួយ​» ​ដែល​ត្រូវបាន​ឯកភាព​ដោយ​ថ្នាក់ដឹកនាំ​នៃ​ប្រទេស​កម្ពុជា​ ឡាវ ​និង​វៀតណាម​។

​ជា​ការ​ឆ្លើយតប ​ឯកឧត្តម​ ​Sonexay​ ​Vannaxay​ ​បាន​សម្តែង​ការ​កោតសរសើរ​ចំពោះ​ការ​រីកចម្រើន​ និង​ការ​អភិវឌ្ឍ​របស់​កម្ពុជា​ក្រោម​ការ​ដឹកនាំ​របស់​រាជ​រដ្ឋាភិបាល​កម្ពុជា​ ​ក្រោម​អាណត្តិ​ដឹកនាំ​របស់​សម្តេច​អគ្គ​មហា​សេនាបតី​ តេជោ ​ហ៊ុន ​សែន ​ប្រធាន​ព្រឹទ្ធសភា​ ​និង​សម្តេច​មហា​បវរ​ធិបតី​ ហ៊ុន​ ​ម៉ាណែត ​នាយក​រដ្ឋមន្ត្រី​។

​ឯកឧត្តម​ឯក​អគ្គ​រដ្ឋទូត​ក៏​បាន​សម្តែង​ការ​ចាប់អារម្មណ៍​ចំពោះ​សក្តានុពល​ទេសចរណ៍​ដ៏​សម្បូរបែប​របស់​កម្ពុជា​ ​និង​ហេដ្ឋារចនាសម្ព័ន្ធ​ដែល​តភ្ជាប់គោលដៅ​ទេសចរណ៍​នានា​នៅក្នុង​ប្រទេស​។ ​លោក​បាន​លើកឡើង​ថា​ ​ភ្ញៀវ​ទេសចរ​ឡាវ​អាច​ធ្វើដំណើរ​ពី​ខេត្ត​ជាប់​ព្រំដែន​កម្ពុជា​ ​ទៅដល់​តំបន់​ឆ្នេរសមុទ្រ​របស់​កម្ពុជា​តាម​រថយន្ត​ ​ដោយ​ចំណាយ​ពេល​ធ្វើដំណើរ​តែ​មួយ​ថ្ងៃ​។

​ឯកឧត្តម​ឯក​អគ្គ​រដ្ឋទូត​ក៏​បាន​ស្នើ​ឱ្យ​ពិនិត្យ​លទ្ធភាព​សម្រួល​ការ​ធ្វើដំណើរ​របស់​ប្រជាជន​នៅ​ខេត្ត​ជាប់​ព្រំដែន​នៃ​ប្រទេស​ទាំង​ពីរ​ ​ដើម្បី​អាច​ធ្វើដំណើរ​មក​ទស្សនា​ប្រាសាទ​អង្គរវត្ត​ក្នុង​ខេត្ត​សៀមរាប ​ឬ​ទៅ​ទស្សនា​ខេត្ត​ចំប៉ាសាក់ ​តាម​រថយន្ត​គ្រួសារ​។

​ជា​កិច្ច​បញ្ចប់​ ​ឯកឧត្តម​ ហួត​ ​ហាក់ ​បាន​ស្នើសុំ​កិច្ចសហការ​ពី​ស្ថានទូត​ឡាវ​ ក្នុង​ការ​បន្ត​គាំទ្រ​ការ​ផ្សព្វផ្សាយ​សក្តានុពល​ទេសចរណ៍​ ​និង​ស្ថានភាព​ជាក់ស្តែង​របស់​កម្ពុជា​ ​ព្រមទាំង​ជំរុញ​ទីផ្សារ​ទេសចរណ៍​អន្តរជាតិ​ «​Plus​-​One​» ​និង​ការ​អនុវត្ត​យុទ្ធនាការ​ «​ប្រទេស​បី ​គោលដៅ​មួយ​» ​(​Three​ ​Countries​, ​One​ ​Destination​) ​រវាង​កម្ពុជា​ ឡាវ ​និង​វៀតណាម​ ​ឱ្យ​កាន់តែ​មាន​ប្រសិទ្ធភាព​។

​ក្រសួង​ទេសចរណ៍​បាន​បញ្ជាក់​ថា​ ​កិច្ចសហប្រតិបត្តិការ​នេះ​មាន​គោលដៅ​បង្កើន​លំហូរ​ភ្ញៀវ​ទេសចរ ​ពង្រឹង​ការ​តភ្ជាប់​រវាង​ប្រទេស​ទាំង​ពីរ​ និង​ពង្រីក​កិច្ចសហប្រតិបត្តិការ​ទេសចរណ៍​ឱ្យ​កាន់តែ​រឹងមាំ​។ ​រដ្ឋមន្ត្រី​ក៏​បាន​ស្នើ​ឯកឧត្តម​ឯក​អគ្គ​រដ្ឋទូត​ ​ជួយ​សម្របសម្រួល​អញ្ជើញ​លោកជំទាវ​រដ្ឋមន្ត្រី​ក្រសួង​វប្បធម៌​ ​និង​ទេសចរណ៍​ឡាវ ​អាជ្ញាធរ​ខេត្ត​ជាប់​ព្រំដែន​ ក្រុម​ធុរកិច្ច​ ​ក្រុម​វិនិយោគ ​ភ្នាក់ងារ​ទេសចរណ៍​ ​និង​វិស័យ​ឯកជន​ឡាវ​ មក​ចូលរួម​ក្នុង​កម្មវិធី​អបអរសាទរ​ខួប​លើក​ទី​៧០​ ​នៃ​ទំនាក់ទំនង​ការ​ទូត​កម្ពុជា​-​ឡាវ​។

​កម្មវិធី​នេះ​គ្រោង​រៀបចំ​ដោយ​ក្រសួង​ទេសចរណ៍​នា​ដើម​ខែកញ្ញា​ខាងមុខ​ ​នៅ​ខេត្ត​ស្ទឹងត្រែង​។

​ឆ្នាំ​២០២៦​នេះ​ ​គឺជា​ខួប​លើក​ទី​៧០​ ​នៃ​ការ​បង្កើត​ទំនាក់ទំនង​ការ​ទូត​ផ្លូវការ​រវាង​កម្ពុជា​ ​និង​ឡាវ​។ ​ព្រឹត្តិការណ៍​អបអរសាទរ​ខួប​លើក​ទី​៧០​ ​នៃ​ទំនាក់ទំនង​ការ​ទូត​រវាង​ប្រទេស​ទាំង​ពីរ​ ​នឹង​ប្រារព្ធ​ឡើង​ចាប់ពី​ថ្ងៃទី​៦​ ​ដល់​ថ្ងៃទី​៩​ ​ខែកញ្ញា​ ​ឆ្នាំ​២០២៦​ ​នៅ​ខេត្ត​ស្ទឹងត្រែង​៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជា​-​ឡាវ ​ជំរុញ​ការ​តភ្ជាប់​ទេសចរណ៍​ ​និង​អនុវត្ត​ ​«​ប្រទេស​បី ​គោលដៅ​មួយ​» appeared first on Millions times.

ការលើកឡើងនេះធ្វើឡើងនៅពេល ឯកឧត្តម ហួត ហាក់ អញ្ជើញជាអធិបតីក្នុងពិធីបិទ «ព្រឹត្តិការណ៍ទេសចរណ៍ក្នុងរដូវកាលបៃតង ឆ្នាំ២០២៦» នៅខេត្តស្ទឹងត្រែង នាល្ងាចថ្ងៃទី៨ ខែសីហា ឆ្នាំ២០២៦ ក្រោមប្រធានបទ «សក្តានុពលអេកូទេសចរណ៍នៅតំបន់ភូមិភាគឦសាន ក្នុងរដូវកាលបៃតង ឆ្នាំ២០២៦»។

ឯកឧត្តម រដ្ឋមន្ត្រីបានថ្លែងថា ការបំប្លែងរដូវកាលទៅជា «Green Season» មិនមែនគ្រាន់តែជាការផ្លាស់ប្តូរឈ្មោះនោះទេ ប៉ុន្តែជាការផ្លាស់ប្តូរផ្នត់គំនិត និងជាយុទ្ធសាស្ត្រជាតិ ដើម្បីបង្ហាញពីសម្រស់ដ៏ពិតប្រាកដ និងរស់រវើករបស់កម្ពុជាក្នុងរដូវកាលនេះ។

ឯកឧត្តមបានបន្ថែមថា ក្នុងរដូវកាលបៃតង ធម្មជាតិកម្ពុជាពោរពេញដោយភាពស្រស់បំព្រង ដោយពណ៌បៃតងគ្របដណ្តប់ពាសពេញប្រទេស ខ្យល់អាកាសបរិសុទ្ធ និងទេសភាពដ៏ត្រកាល ដែលអាចបង្កើតជាបទពិសោធន៍ដ៏កម្រ និងមានតម្លៃសម្រាប់ភ្ញៀវទេសចរ។

ឯកឧត្តម ហួត ហាក់ បានគូសរំលេចថា «ព្រឹត្តិការណ៍ទេសចរណ៍ក្នុងរដូវកាលបៃតង» គឺជាផ្នែកមួយនៃការជំរុញចលនាទេសចរណ៍ និងបង្ហាញពីភាពស្រស់ស្អាត ព្រមទាំងសក្តានុពលដ៏សម្បូរបែបរបស់កម្ពុជាក្នុងរដូវកាលនេះ។ តាមរយៈព្រឹត្តិការណ៍នេះ ប្រជាពលរដ្ឋ និងភ្ញៀវទេសចរអាចមើលឃើញថា រដូវកាលបៃតងគឺជាពេលវេលាដ៏សមស្របមួយសម្រាប់ការធ្វើដំណើរកម្សាន្តនៅកម្ពុជា ជាមួយបទពិសោធន៍ទេសចរណ៍ថ្មីៗជាច្រើនដែលកំពុងរង់ចាំការស្វែងយល់ និងរុករក។

ព្រឹត្តិការណ៍នេះក៏មានគោលបំណងបំផុសស្មារតីស្នេហាជាតិ ស្រឡាញ់មាតុភូមិ និងសាមគ្គីភាព ព្រមទាំងលើកកម្ពស់ការចូលរួមអភិរក្សសម្បត្តិបេតិកភណ្ឌរូបី អរូបី និងធនធានធម្មជាតិ ស្របតាមទស្សនទាន «ទេសចរណ៍ ផ្សារភ្ជាប់នឹងទឹកដី» និង «ស្រឡាញ់ជាតិ ត្រូវស្គាល់ទឹកដី»។

ជាមួយគ្នានេះ ក្រសួងទេសចរណ៍ក៏មានគោលដៅជំរុញចលនាទេសចរណ៍ក្នុងស្រុក លើកកម្ពស់កិត្តិនាមកម្ពុជា និងបង្ហាញទៅកាន់ពិភពលោកថា កម្ពុជាជាគោលដៅទេសចរណ៍ប្រកបដោយសុវត្ថិភាព ភាពកក់ក្ដៅ និងបដិសណ្ឋារកិច្ចល្អ ដែលស្វាគមន៍ភ្ញៀវទេសចរមកពីគ្រប់ទិសទី។

ឯកឧត្តម រដ្ឋមន្ត្រីក៏បានសម្តែងការកោតសរសើរ និងវាយតម្លៃខ្ពស់ចំពោះកិច្ចសហការរវាងរដ្ឋបាលខេត្តស្ទឹងត្រែង ក្រុមការងាររដូវកាលបៃតងនៃក្រសួងទេសចរណ៍ មន្ទីរទេសចរណ៍ខេត្ត ដៃគូឧបត្ថម្ភ វិស័យឯកជន វាគ្មិន សិល្បករ អ្នកផលិតមាតិកា Influencers និង KOLs ដែលបានចូលរួមរៀបចំ និងគាំទ្រព្រឹត្តិការណ៍នេះ។

ព្រឹត្តិការណ៍នេះមានការចូលរួមពី លោក ឈាង ឡាក់ ប្រធានក្រុមប្រឹក្សាខេត្តស្ទឹងត្រែង លោក សរ សុពុត្រា អភិបាលនៃគណៈអភិបាលខេត្តស្ទឹងត្រែង តំណាងស្ថានកុងស៊ុលឡាវប្រចាំខេត្តស្ទឹងត្រែង ថ្នាក់ដឹកនាំក្រសួងទេសចរណ៍ អាជ្ញាធរខេត្ត មន្ទីរទេសចរណ៍ខេត្តនៅតំបន់ភូមិភាគឦសាន ដៃគូអភិវឌ្ឍន៍ សមាគមក្នុងឧស្សាហកម្មទេសចរណ៍ ប្រតិបត្តិករទេសចរណ៍ វិស័យឯកជន អ្នកផលិតមាតិកា យុវជន សិស្ស និងនិស្សិត ប្រមាណ ១,០០០នាក់។

«ព្រឹត្តិការណ៍ទេសចរណ៍ក្នុងរដូវកាលបៃតង» បានចាប់ផ្តើមដំណើរពីរាជធានីភ្នំពេញ ឆ្ពោះទៅខេត្តសៀមរាប ក្រោមប្រធានបទ «សក្តានុពលទេសចរណ៍តំបន់បេតិកភណ្ឌ និងវប្បធម៌ក្នុងរដូវកាលបៃតង» ដើម្បីបង្ហាញពីភាពរស់រវើក និងភាពទាក់ទាញនៃតំបន់បេតិកភណ្ឌ និងវប្បធម៌ខ្មែរ។

បន្ទាប់មក ព្រឹត្តិការណ៍បានបន្តមកកាន់ខេត្តស្ទឹងត្រែង ដែលជាតំបន់សម្បូរទៅដោយធនធានធម្មជាតិ ទន្លេ ព្រៃឈើ សហគមន៍ និងសក្តានុពលអេកូទេសចរណ៍ ដោយផ្តោតលើប្រធានបទ «សក្តានុពលអេកូទេសចរណ៍នៅតំបន់ភូមិភាគឦសាន ក្នុងរដូវកាលបៃតង ឆ្នាំ២០២៦»។

ក្រោយបញ្ចប់នៅខេត្តស្ទឹងត្រែង ព្រឹត្តិការណ៍ទេសចរណ៍ក្នុងរដូវកាលបៃតងនឹងបន្តទៅកាន់ខេត្ត Cluster នៅតំបន់ឆ្នេរ មុននឹងបិទបញ្ចប់នៅរាជធានីភ្នំពេញ ដោយមានប្រធានបទផ្សេងៗ ស្របតាមសក្តានុពលទេសចរណ៍របស់រាជធានី និងខេត្តនីមួយៗ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post រដ្ឋមន្ត្រី ហួត ហាក់៖ “រដូវកាលបៃតង” មិនមែនជាឧបសគ្គ តែជាឱកាសស្គាល់កម្ពុជាពីជ្រុងថ្មី appeared first on Millions times.

​គម្រោង​នេះ​ត្រូវបាន​លើកឡើងកាលថ្មីៗនេះ ​ក្នុង​ជំនួប​រវាង​លោក​ ​Lu​ ​Wei​ ​ប្រធាន​ក្រុមប្រឹក្សាភិបាល​ ​AIAI​ ​និង​ឯកឧត្តម​ ​ហួត​ ​ហាក់ ​រដ្ឋមន្ត្រី​ក្រសួង​ទេសចរណ៍​ ​ដើម្បី​ពិភាក្សា​អំពី​ការ​លើកកម្ពស់​វិស័យ​ទេសចរណ៍​ ​ការ​តភ្ជាប់​ផ្លូវ​អាកាស​ និង​ការ​វិនិយោគ​ទេសចរណ៍​នៅ​ខេត្ត​សៀមរាប​។

​ក្នុង​ជំនួប​នេះ​ លោក​ ​Lu​ ​Wei​ ​បាន​ជម្រាប​ជូន​អំពី​គោលបំណង​ ​និង​គម្រោង​សំខាន់​ៗ​ចំនួន​៣​ ​របស់​ក្រុមហ៊ុន​។

​ទី​១​ ​គឺ​ការ​អភិវឌ្ឍ​ផលិតផល​ទេសចរណ៍​ទស្សនា​តំបន់​អង្គរ​នា​ពេល​រាត្រី​។ ​ឯកឧត្តម​ ​ហួត​ ​ហាក់ ​បាន​គាំទ្រ​ការ​អភិវឌ្ឍ​ផលិតផល​ទេសចរណ៍​ថ្មី​ៗ​នៅ​តំបន់​អង្គរ ​ដើម្បី​បង្កើន​បទពិសោធន៍​របស់​ភ្ញៀវ​ទេសចរ ​ពន្យារ​រយៈពេល​ស្នាក់​នៅ​ ​និង​ជំរុញ​ការ​ចំណាយ​របស់​ភ្ញៀវ​ទេសចរ​។

​សកម្មភាព​ដែល​អាច​រួមបញ្ចូល​ក្នុង​ផលិតផល​ទេសចរណ៍​ពេល​រាត្រី​នេះ​ មាន​ដូចជា​ ​ការ​សម្តែង​សិល្បៈ​ ​និង​វប្បធម៌​ ​កម្មវិធី​ពន្លឺ​ ​និង​បច្ចេកវិទ្យា​ទំនើប​ ព្រមទាំង​ព្រឹត្តិការណ៍​អន្តរជាតិ​នានា ​ដោយ​ត្រូវ​អនុវត្ត​ស្រប​តាម​គោលការណ៍​អភិរក្ស​បេតិកភណ្ឌ​ ​និង​ការ​អភិវឌ្ឍ​ប្រកបដោយ​ចីរភាព​។

​ទី​២​ ​គឺ​គម្រោង​វិនិយោគ​ ​និង​អភិវឌ្ឍ​ទីតាំង​ព្រលានយន្តហោះ​អន្តរជាតិ​សៀមរាប​ចាស់​ ​ឱ្យ​ក្លាយជា​តំបន់​អភិវឌ្ឍ​ពហុ​មុខងារ​ ​ដែល​រួមបញ្ចូល​សេវា​ទេសចរណ៍​ ​ពាណិជ្ជកម្ម​ ​ការ​កម្សាន្ត​ ​និង​សកម្មភាព​សេដ្ឋកិច្ច​ផ្សេង​ៗ​។

​ចំពោះ​គម្រោង​នេះ​ រដ្ឋមន្ត្រី​ក្រសួង​ទេសចរណ៍​បាន​សម្តែង​ការ​គាំទ្រ​ ​និង​ស្នើ​ឱ្យ​ភាគី​ពាក់ព័ន្ធ​សិក្សា​ ​និង​រៀបចំ​ផែនការ​លម្អិត​ប្រកបដោយ​ចីរភាព​ និង​បរិយា​បន្ន​។

​ទី​៣​ ​គឺ​ការ​ពង្រឹង​កិច្ចសហប្រតិបត្តិការ​ក្នុង​ការ​នាំ​ភ្ញៀវ​ទេសចរ​មក​កម្ពុជា​។ ​ភាគី​ទាំង​ពីរ​បាន​ឯកភាព​ពង្រឹង​កិច្ចសហប្រតិបត្តិការ​ផ្សព្វផ្សាយ​គោលដៅ​ទេសចរណ៍​កម្ពុជា​នៅ​ទីផ្សារ​អន្តរជាតិ​ ​ជាពិសេស​ទីផ្សារ​ចិន ​តាមរយៈ​ការ​សហការ​ជាមួយ​ក្រុមហ៊ុន​ទេសចរណ៍​ និង​ដៃគូ​អន្តរជាតិ​។

​កិច្ចសហការ​នេះ​នឹង​ផ្តោត​លើ​ការ​បើក​ផ្លូវ​ហោះហើរ​ថ្មី​ ​ការ​បង្កើន​ប្រេកង់​ជើងហោះហើរ​ ការ​រៀបចំ​យុទ្ធនាការ​ផ្សព្វផ្សាយ​រួម​ និង​ការ​ទាក់ទាញ​ភ្ញៀវ​ទេសចរ​ដែល​មាន​គុណភាព​ខ្ពស់​មក​កម្ពុជា​។

​ឯកឧត្តម ​ហួត​ ​ហាក់ ​ក៏​បាន​សម្តែង​ការ​កោតសរសើរ​ចំពោះ​ ​AIAI​ ​ដែល​បាន​វិនិយោគ​លើ​ហេដ្ឋារចនាសម្ព័ន្ធ​អាកាសចរណ៍​ដ៏​សំខាន់​នៅ​កម្ពុជា​ ​និង​បាន​បញ្ជាក់​ថា​ ​ក្រសួង​ទេសចរណ៍​នឹង​បន្ត​ធ្វើការ​យ៉ាង​ជិតស្និទ្ធ​ជាមួយ​ក្រុមហ៊ុន​ ​និង​ភាគី​ពាក់ព័ន្ធ​ ​ដើម្បី​អភិវឌ្ឍ​ផលិតផល​ទេសចរណ៍​ថ្មី​ៗ​ ​ពង្រឹង​ការ​តភ្ជាប់​ផ្លូវ​អាកាស​ និង​លើកកម្ពស់​ភាព​ប្រកួតប្រជែង​របស់​គោលដៅ​ទេសចរណ៍​កម្ពុជា​។​

ក្រសួង​ទេសចរណ៍​មាន​គោលដៅ​ជំរុញ​ការ​ទាក់ទាញ​ភ្ញៀវ​ទេសចរ​អន្តរជាតិ​ឱ្យ​កាន់តែ​ច្រើន​ និង​ប្រកបដោយ​គុណភាព​ ​ស្រប​តាម​ទិសដៅ​នៃ​ការ​អភិវឌ្ឍ​វិស័យ​ទេសចរណ៍​ប្រកបដោយ​ចីរភាព​។

​ជាមួយគ្នា​នេះ​ ឯកឧត្តម​ ​ហួត​ ​ហាក់ ​បាន​ចាត់តាំង​ក្រុមការងារ​បច្ចេកទេស​របស់​ក្រសួង​ទេសចរណ៍​ ​ឱ្យ​សហការ​យ៉ាង​ជិតស្និទ្ធ​ជាមួយ​ក្រុមការងារ​របស់​ ​AIAI​ ​ដើម្បី​សិក្សា​លម្អិត​លើ​គម្រោង​នីមួយ​ៗ​ ​សម្របសម្រួល​ជាមួយ​ស្ថាប័ន​ពាក់ព័ន្ធ​ ​និង​រៀបចំ​ផែនការ​អនុវត្ត​ជា​ជំហាន​ៗ​។​

ក្រសួង​ទេសចរណ៍​បាន​បញ្ជាក់​ថា​ ​កិច្ចការ​នេះ​មាន​គោលដៅ​ជំរុញ​ការ​អភិវឌ្ឍ​ផលិតផល​ទេសចរណ៍​ថ្មី​ៗ​ ​ការ​វិនិយោគ​ទេសចរណ៍​ ​និង​ការ​ទាក់ទាញ​ភ្ញៀវ​ទេសចរ​អន្តរជាតិ​មក​កម្ពុជា​ឱ្យ​កាន់តែ​មាន​ប្រសិទ្ធភាព​ និង​ប្រកបដោយ​ចីរភាព​៕

អត្ថបទ៖ ប៊ី

តាមដានជាមួយយើង៖ Million Times

second...

x

The post កម្ពុជា​គ្រោង​អភិវឌ្ឍ​ព្រលានយន្តហោះ​សៀមរាប​ចាស់​ជា​តំបន់​ពហុ​មុខងារ​ appeared first on Millions times.